Каденс (Флекаинид)

Каденс

Флекаинид

Дәрілік түрі, дозалануы

50 мг немесе 100 мг таблеткалар

Жүрек-қантамыр жүйесі. Кардиологиялық препараттар. Аритмияға қарсы препараттар I  және III класс. Аритмияға қарсы препараттар Іc класс. Флекаинид.

АТХ коды C01BC04

Каденс мынадай жай-күйде:

- АВ түйіндік реципрокты тахикардияда; Вольф-Паркинсон-Уайт (ВПУ) синдромымен және қосымша өткізу жолдарының бар болуына байланысты ұқсас бұзылулармен астасқан аритмияларда;

- емдеу қажеттілігі анықталған кезде және сол жақ қарыншаның дисфункциясы болмағанда мүгедектікке ұшырататын симптомдары бар пациенттерде жүрекшелердің пароксизмальді фибрилляциясында. Жақында басталған аритмия ем жүргізуге жақсы жауап береді;

- симптоматикалық тұрақты қарыншалық тахикардияда;

- егер олар емнің басқа түрлеріне резистентті болса немесе басқа ем түрлеріне көтере алмаушылығы болса, мүгедектікке ұшырататын симптомдарды туындататын мерзімінен бұрын қарыншалық жиырылуда (МҚЖ) және/немесе тұрақсыз қарыншалық тахикардияда көрсетілген

Қолдануды бастағанға дейін қажетті мәліметтер тізбесі

- флекаинидке немесе қосымша заттардың кез келгеніне аса жоғары сезімталдық

- анамнездегі Бругада синдромы

- кардиогенді шоктың болуы

- жүрек жеткіліксіздігі кезінде және анамнезінде миокард инфарктісі бар, симптомсыз қарыншалық эктопия немесе симптомсыз тұрақсыз қарыншалық тахикардия байқалатын пациенттерде

- синусты ырғаққа ауысуға әрекет жасалмаған жүрекшелердің ұзаққа созылатын фибрилляциясы бар пациенттерге және жүректің гемодинамикалық маңызды ақауы бар пациенттерге

- балалар мен 18 жасқа дейінгі жасөспірімдер

Егер электрокардиостимуляция дәрілері болмаса, Каденсті синус түйінінің дисфункциясы, жүрекшелік өткізгіштік ақаулары, екінші немесе одан жоғары сатыдағы атриовентрикулярлы блокадасы, Гис шоғыры тармақтарының блокадасы немесе дистальді бөлімдердің блокадасы бар пациенттерге тағайындамау керек.

Қолдану кезіндегі қажетті сақтық шаралары

Электролиттік бұзылулар (мысалы, гипо- және гиперкалиемия) флекаинидті қолдану басталғанға дейін түзетілуі керек.

Осылайша, флекаинидтің плазмадан шығарылуы бауырдың елеулі жеткіліксіздігі бар пациенттерде едәуір баяу болуы мүмкін, егер оны қолданудың ықтимал пайдасы қауіптерден айқын асып түсетін жағдайды қоспағанда, флекаинидті мұндай пациенттерде қолдануға болмайды. Мұндай пациенттерде препараттың плазмалық деңгейіне мониторинг жүргізу ұсынылады.

Флекаинид эндокард кардиостимуляциясының шегін арттыратыны белгілі, яғни эндокардтың стимуляциялауға сезімталдығын төмендетеді. Бұл әсер созылмалы әсерге қарағанда жедел стимуляция шегінен қайтымды және анағұрлым айқын. Осылайша, флекаинидті тұрақты кардиостимуляторлары немесе уақытша кардиостимуляторлы электродтары бар барлық пациенттерде сақтықпен қолдану керек және егер кардиостимуляцияның тиісті құтқару дәрісі бар болған жағдайды қоспағанда, оны шегі нашар немесе бағдарламаланбаған кардиостимуляторлары бар пациенттерге тағайындауға болмайды.

Әдетте, қармауды қалпына келтіру үшін импульстің енін немесе кернеуді екі есе арттыру жеткілікті, бірақ флекаинидтің қатысуымен алғашқы имплантациялау кезінде 1 вольттан аз қарыншалық шектіке қолжеткізу қиын болуы мүмкін.

Флекаинидтің шамалы теріс инотропты әсері жүрек жеткіліксіздігіне бейім пациенттерде маңызды болуы мүмкін. Кейбір пациенттерде дефибрилляцияда қиындықтар болды. Тіркелген жағдайлардың көпшілігінде пациенттерде жүректің ұлғаюымен байланысты жүрек аурулары, анамнездегі миокард инфарктісі, жүректің артериосклероздық ауруы және жүрек жеткіліксіздігі болған.

Флекаинид симптомсыз қарыншалық аритмиямен миокард инфарктісін бастан өткерген пациенттерде өлім қаупін арттыратыны көрсетілді.

Флекаинид, аритмияға қарсы басқа дәрілер сияқты, проаритмиялық әсерлерді туындатуы мүмкін, яғни, ол аритмияның анағұрлым ауыр түрін туындатуы, бар аритмия жиілігін немесе симптомдардың ауырлығын арттыруы мүмкін.

Флекаинидті бүйрек функциясы бұзылған (креатинин клиренсі ≤ 35 мл/мин/1,73 м2) пациенттерде сақтықпен қолданған жөн және терапиялық емге (қолданылатын дәрілік заттарға) мониторинг жүргізу ұсынылады.

Егде жастағы адамдарда флекаинидтің плазмадан шығарылу жылдамдығы төмендеуі мүмкін. Бұл дозаны түзету кезінде ескерілуі керек.

Флекаинидті балалар мен 18 жастағы жасөспірімдерде қолдану ұсынылмайды, себебі оның осындай жас тобында қолданылуы туралы дәлелдер саны жеткіліксіз. Ауыр брадикардияны немесе айқын гипотензияны флекаинидті қолдану басталғанға дейін түзету қажет.

Жүректің құрылымдық органикалық аурулары немесе сол жақ қарынша функциясының бұзылуы бар пациенттерде флекаинидті қолданудан аулақ болу керек.

Флекаинидті жүрекке жасалған хирургиялық операциядан кейін жедел жүрекшелер фибрилляциясы бар пациенттерде сақтықпен қолдану керек.

Флекаинид QT аралығын ұзартады және QRS-кешенін 12-20%-ға кеңейтеді. JT аралығына әсері шамалы.

Бругада синдромы флекаинидпен емдеу аясында пайда болуы мүмкін (жасырын күйден шығу). Бругада синдромына нұсқауы мүмкін флекаинидпен емдеу кезінде ЭКГ-да өзгерістер дамыған жағдайда емдеуді тоқтату мүмкіндігін қарастыру керек.

Флекаинид қабылдаған пациенттерде өлім-жітімнің жоғары деңгейі байқалды, олар бірнеше миокард инфарктісін алған.

Флекаинидтің пациенттердің басқа топтарында өлім қаупі жоғары байланысын анықтау бойынша салыстырмалы плацебо-бақыланатын клиникалық сынақтар жүргізілген жоқ.

Сүт өнімдері (сүт, балалар тағамы және мүмкін йогурт) балалар мен сәбилерде флекаинидтің сіңуін төмендетуі мүмкін. Флекаинидті 12 жасқа дейінгі балаларда қолдануға рұқсат етілмейді, алайда флекаинидпен емдеу кезінде сүтті тұтыну төмендеген балаларда және сүт қоспасынан декстрозамен тамақтануға ауысқан балаларда флекаинидтің уыттылығы байқалды.

Флекаинид емдік индексі тар препарат ретінде пациентті басқа дәрілік түрге ауыстыру кезінде сақтықты және мұқият мониторингті талап етеді.

Басқа дәрілік препараттармен өзара әрекеттесуі

Флекаинид I класс аритмияға қарсы препараты болып табылады және бірін-бірі толықтыратын әсерлер туындауы мүмкін немесе дәрілік заттар флекаинид метаболизміне әсер еткен кезде аритмияға қарсы басқа препараттармен өзара әрекеттесуі мүмкін. Флекаинидті аритмияға қарсы I класс басқа препараттарымен бір мезгілде қолдануға болмайды. Дәрілік заттардың келесі санаттары флекаинидпен өзара әрекеттесуі мүмкін екендігі белгілі:

Жүрек гликозидтері: флекаинид плазмадағы дигоксин деңгейінің шамамен 15% - ға жоғарылауын туындатуы мүмкін, бұл емдік ауқымдағы плазмалық деңгейі бар пациенттер үшін клиникалық мәнге ие болуы екіталай. Дигитализацияланған (жүрек гликозидтерін алатын) пациенттердің плазмасындағы дигоксин деңгейін дигоксиннің кез келген дозасын қабылдағаннан соң кемінде алты сағат өткен кейін, флекаинид қабылдағанға дейін немесе одан кейін өлшеу ұсынылады.

Аритмияға қарсы II класс дәрілері: бета-адреноблокаторлардың және верапамил сияқты басқа да кардиодепрессанттардың оларды флекаинидпен бір мезгілде қолданған кезде өзара толықтыратын теріс инотропты әсерінің мүмкіндігін назарға алған жөн.

Аритмияға қарсы IІI класс дәрілері: флекаинидті амиодаронның қатысуымен қолданған кезде флекаинидтің әдеттегі дозасын 50% - ға төмендету қажет және пациентте жағымсыз әсерлерге мұқият мониторинг жүргізу керек. Мұндай жағдайларда плазмалық деңгейлерге мониторинг жүргізу ұсынылады.

Аритмияға қарсы IV класс дәрілері: флекаинидті натрий арналарының басқа блокаторларымен бірге қолдану ұсынылмайды.

Плазмадағы концентрацияның жоғарылауына әкелетін өзара әрекеттесу нәтижесінде өмірге қауіпті немесе тіпті өлімге әкелетін жағымсыз әсерлер пайда болуы мүмкін. Флекаинид айтарлықтай дәрежеде CYP2D6 арқылы метаболизденеді және осы изоферментті тежейтін (мысалы, антидепрессанттар, нейролептиктер, пропранол, ритонавир, кейбір антигистаминді препараттар) немесе индукциялайтын (мысалы, фенитоин, фенобарбитал, карбамазепин) препараттарды бір мезгілде қолдану тиісінше плазмадағы флекаинидтің концентрациясын арттыруы немесе төмендетуі мүмкін

Плазма деңгейінің жоғарылауы флекаинид клиренсінің төмендеуіне байланысты бүйрек жеткіліксіздігінің салдары болуы мүмкін.

Гипокалиемия, сондай-ақ гиперкалиемия немесе басқа электролиттік бұзылулар флекаинидті қолдану басталғанға дейін түзетілуі тиіс. Гипокалиемия диуретиктерді, кортикостероидтарды немесе іш жүргізетін дәрілерді бір мезгілде қолдану нәтижесінде туындауы мүмкін.

Антидепрессанттар: флуоксетин, пароксетин және басқа антидепрессанттар плазмадағы флекаинид концентрациясын арттырады; трициклді антидепрессанттарды қолдану кезінде аритмия қаупі жоғары болуы мүмкін; ребоксетин өндірушісі осындай бір мезгілде қолданғанда сақтық танытуды ұсынады.

Эпилепсияға қарсы дәрілер: ферменттердің белгілі индукторларын (фенитоин, фенобарбитал, карбамазепин) алған пациенттердегі шектеулі деректер флекаинидтің шығарылу жылдамдығының 30% - ға артуын ғана көрсетеді.

Нейролептиктер (психозға қарсы дәрілер): клозапин – аритмиялар қаупінің жоғарылауы.

Антигистаминдер: мизоластинмен және терфенадинмен қолданғанда қарыншалық аритмиялардың қаупі жоғары (осындай бір мезгілде қолданудан аулақ болу керек) болады.

Безгекке қарсы дәрілер: хинин плазмадағы флекаинидтің концентрациясын арттырады.

Вирусқа қарсы дәрілер: бұл препараттың плазмадағы концентрациясы ритонавир, лопинавир және индинавир (қарыншалық аритмия қаупінің жоғарылауы) әсерінен жоғарылайды (осындай бір мезгілде қолданудан аулақ болу керек)).

Диуретиктер: кардиоуыттылықты туындататын гипокалиемияға байланысты дәрілік заттардың осы класына тән әсерлердің болуы.

Зеңге қарсы дәрілер: тербинафин оның CYP2D6 белсенділігін тежеу нәтижесінде плазмадағы флекаинид концентрациясын арттыруы мүмкін.

Н2-антигистаминдер (асқазан ойықжарасын емдеу үшін): циметидин флекаинидтің метаболизмін тежейді. Бір апта ішінде циметидин (тәулігіне 1 г) қабылдаған дені сау адамдарда плазмадағы флекаинид деңгейі шамамен 30% - ға артты, ал жартылай шығарылу кезеңі шамамен 10% - ға артты.

Шылым шегуге қарсы дәрілер: флекаинидті қоса алғанда, CYP2D6 изоферментімен метаболизденетін дәрілік заттармен бупропионды бірге қолдануды сақтықпен жүзеге асырған жөн және мұндай қолдануды бір мезгілде қолданылатын препарат дозалары ауқымының төменгі бөлігінен бастау қажет. Егер бупропион флекаинид қабылдаған пациентті емдеу схемасына қосылса, онда бастапқы препараттың дозасын төмендету мүмкіндігін қарастыру қажет.

Антикоагулянттар: флекаинидпен емдеу пероральді антикоагулянттарды қолданумен үйлесімді.

Арнайы ескертулер

Жүктілік немесе лактация

Бұл препараттың адамда жүктілік кезіндегі қолданылу қауіпсіздігі туралы ешқандай дәлел жоқ. Флекаинидті жүктілік кезінде, егер оны қабылдау пайдасы қауіптен асып кетсе ғана қолдану керек.

Флекаинид адамның ана сүтіне енеді. Емшек сүтін емген нәрестелерде байқалған плазмадағы концентрациялар осы препараттың емдік концентрациясынан 5-10 есе төмен болды. Емшектегі балаға жағымсыз әсер ету қаупі өте төмен болғанымен, флекаинидті лактация кезінде, егер оны қабылдау пайдасы қауіптен асып кетсе ғана қолдану керек.

Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Бас айналу, көрудің бұзылу мүмкіндігін ескере отырып, көлік құралдарын басқарудан немесе басқа механизмдермен жұмыс істеуден бас тарту ұсынылады.

Қолдану жөніндегі ұсынымдар

Дозалау режимі

Ересектер:

Қарыншаүстілік аритмиялар: ұсынылатын бастапқы доза тәулігіне екі рет 50 мг құрайды және пациенттердің көпшілігінде осы дозаны қолдану кезінде жағдайды бақылауға қол жеткізуге болады. Қажет болса, дозаны ең жоғары дозаға – тәулігіне 300 мг дейін арттыруға болады.

Қарыншалық аритмиялар: ұсынылатын бастапқы доза тәулігіне екі рет 100 мг құрайды. Ең жоғары тәуліктік доза 400 мг құрайды және әдетте ірі денелі пациенттер үшін немесе аритмияны жылдам бақылауға қол жеткізу қажет болған жағдайларда қолданылады.

3-5 күннен кейін дозаны аритмияны бақылау сақталатын, ең төменгі деңгейге дейін біртіндеп түзету ұсынылады. Ұзаққа созылған емдеу кезеңінде дозалауды төмендетуге болады.

Плазмадағы деңгейлер: МҚЖ бәсеңдету бойынша деректер негізінде шамасы, ең жоғары емдік әсерге қол жеткізу үшін 200-1000 нг/мл плазмалық деңгейлер қажет болуы мүмкін. 700-1000 нг/мл жоғары плазмалық деңгейлер жағымсыз құбылыстардың жоғары ықтималдығымен астасқан.

Ауруханаларда флекаинид ацетатпен вена ішіне емдеу ұсынылады.

Пероральді флекаинид ацетатымен емдеу

а) АВ түйіндік реципрокты тахикардияға; Вольф-Паркинсон-Уайт синдромымен және қосымша өткізу жолдарының бар болуына байланысты ұқсас бұзылулармен астасқан аритмияға шалдыққан пациенттер үшін маман дәрігердің тікелей бақылауымен немесе аурухана жағдайында;

б) Мүгедектікке ұшырататын симптомдары бар пациенттерде жүрекшелердің пароксизмальді фибрилляциясы кезінде жүргізілуі тиіс.

Басқа көрсетілімдері бар пациенттерді емдеуді ауруханада осындай емдеу басталғаннан кейін жалғастыру керек.

Пациенттердің ерекше топтары

Балалар

Каденсті балалар мен 18 жастағы жасөспірімдерде қолдану ұсынылмайды, себебі оның осындай жас тобында қолданылуы туралы дәлелдер саны жеткіліксіз.

Егде жастағы пациенттер

Егде жастағы адамдарда флекаинидтің плазмадан шығарылу жылдамдығы төмендеуі мүмкін. Мұны дозаны түзету кезінде ескеру керек.

Бүйрек жеткіліксіздігі бар пациенттер

Бүйрек жеткіліксіздігі елеулі бұзылған (креатинин клиренсі 35 мл/мин./1,73 ш. м. немесе одан төмен) бар пациенттер үшін ең жоғары бастапқы доза тәулігіне 100 мг (немесе тәулігіне екі рет 50 мг) құрауы тиіс.

Препаратты осындай пациенттерде қолданған кезде оның плазмадағы деңгейіне жиі мониторинг жүргізу тиянақты түрде ұсынылады.

Артық дозаланған жағдайда қабылдануы қажет шаралар

Флекаинидпен артық дозалану әлеуетті түрде өмірге қауіп төндіреді және шұғыл медициналық араласымды талап етеді. Препаратқа жоғары сезімталдық және қан плазмасындағы концентрацияның емдік деңгейден асатын деңгейге дейін артуы басқа дәрілік заттармен өзара әрекеттесумен де байланысты болуы мүмкін. Спецификалық антидоты белгісіз. Флекаинидтің организмнен тез шығарылудың белгілі әдісі жоқ. Диализ немесе гемоперфузия жүргізу тиімсіз.

Өзіне асқазан-ішек жолынан әлі сіңірілмеген препаратты шығаруды қамтуы мүмкін демеуші ем қажет. Болашақта допамин, добутамин немесе изопротеренол сияқты инотропты препараттарды немесе жүрек белсенділігінің стимуляторларын, сондай-ақ өкпені жасанды желдету және қан айналымын қолдау шараларын қолдануға болады (мысалы, қосалқы қанайналымына арналған сорғы). Өткізгіштік блокада жағдайында уақытша трансвеналық кардиостимуляторды қолдану орындылығын қарастырған жөн. Плазмадан жартылай шығарылу кезеңі шамамен 20 сағатты құрайтындықтан, демеуші емнің бұл шараларын ұзақ уақыт бойы жүргізген жөн. Несептің тотығуымен күшейтілген диурез теориялық тұрғыдан препараттың организмнен шығарылуына ықпал етуі мүмкін.

Дәрілік препаратты қолдану тәсілін түсіндіру үшін медициналық қызметкердің кеңесіне жүгіну жөніндегі ұсынымдар

Каденс пероральді қолдануға арналған.

ДП стандартты қолдану кезінде пайда болатын жағымсыз реакциялардың сипаттамасы және бұл жағдайда қабылдануы тиіс шаралар

Өте жиі

- әдетте уақытша болатын бас айналу

- диплопия және көрудің бұлыңғырлануы (өткірліктің төмендеуі) сияқты көрудің бұзылуы

Жиі

- проаритмия (жүректің құрылымдық ауруы және/немесе сол жақ қарынша функциясының елеулі бұзылуы бар пациенттерде анағұрлым ықтимал)

- ентігу

- астения, қажу, пирексия, ісіну

Жиі емес

- эритроциттер санының төмендеуі, лейкоциттер санының төмендеуі және тромбоциттер санының төмендеуі

- жүрекшелері жыпылықтайтын пациенттерде жүрек жиырылуының жоғары жиілігімен 1:1 АВ-өткізгіштігі дамуы мүмкін

- жүрек айнуы, құсу, іш қату, іштің ауыруы, тәбеттің төмендеуі, диарея, диспепсия, метеоризм

- аллергиялық дерматит, бөртпе, алопецияны қоса

Сирек

- елестеулер, депрессия, сананың шатасуы, мазасыздық, амнезия, ұйқысыздық

- парестезия, атаксия, гипоэстезия, гипергидроз, естен тану, тремор, гиперемия, ұйқышылдық, бас ауыруы, шеткері нейропатия, құрысулар, дискинезия

- құлақтағы шуыл, бас айналуы (вестибулярлық)

- пневмонит

- сарғаюмен немесе онсыз бауыр ферменттерінің жоғарылауы

- ауыр дәрежедегі есекжем

Өте сирек

- жүйелік қабынуы бар немесе онсыз антинуклеарлы антиденелер санының артуы

- мөлдір қабықтағы шөгінділер

- жарық сезімталдығы реакциясы

Белгісіз (қолда бар деректер негізінде бағалау мүмкін емес)

- PR және QR аралықтарының дозаға тәуелді ұзартылуы, кардиостимуляция шегінің өзгеруі пайда болуы мүмкін; екінші сатыдағы атриовентрикулярлық блокада және үшінші сатыдағы атриовентрикулярлық блокада, жүректің тоқтап қалуы, брадикардия, жүрек жеткіліксіздігі/іркілісті жүрек жеткіліксіздігі, кеуденің ауыруы, гипотензия, миокард инфарктісі, жүректің жиі соғуы, синус түйіні белсенділігінің уақытша тоқтауы немесе тоқтап қалуы, тахикардия (жүрекшелік және қарыншалық) немесе қарыншалық фибрилляция, алдында болған Бругада синдромының бүркемеленуін ашу

- өкпе фиброзы, өкпенің интерстициальді ауруы

- бауырдың дисфункциясы

- артралгия және миалгия

Жағымсыз дәрілік реакциялар туындаған кезде медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаларды қоса алғанда, дәрілік препараттарға жағымсыз реакциялар (әсерлер) жөніндегі ақпараттық дерекқорға тікелей жүгіну қажет

Қазақстан Республикасы Денсаулық сақтау министрлігі Медициалық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

Дәрілік препараттың құрамы

Бір таблетканың құрамында

белсенді зат - флекаинид ацетаты 50 мг немесе 100 мг,

қосымша заттар: микрокристалды целлюлоза (PH 101),

микрокристалды целлюлоза (РН 102), натрий кроскармеллозасы, магний стеараты.

Сыртқы түрінің, иісінің, дәмінің сипаттамасы

Каденс 50 мг: дөңгелек, екі жақ беті дөңес, ақтан ақ дерлік түске дейін, таблетканың бір жағында «НР» және екінші жағында «183» деген өрнектелген жазулары бар таблеткалар.

Каденс 100 мг: дөңгелек, екі жақ беті дөңес, ақтан ақ дерлік түскен дейін, таблетканың бір жағында «H» пен «Р» деген жазуларды бөлетін, өрнектелген бөлу сызығы және екінші жағында «184» деген жазуы бар таблеткалар.

Шығарылу түрі және қаптамасы

10 таблеткадан алюминий-ПВХ (поливинилхлорид)/ПВДХ (поливинилденхлорид) жасалған пішінді ұяшықты қаптамаға салады.

6 пішінді ұяшықты қаптамадан медициналық қолдану жөніндегі қазақ және орыс тілдеріндегі нұсқаулықпен бірге картон қорапшаға салынған.

2 жыл.

Жарамдылық мерзімі өткеннен кейін қолдануға болмайды.

Құрғақ, жарықтан қорғалған жерде 25ºС-ден аспайтын температурада сақтау керек. Балалардың қолы жетпейтін жерде сақтау керек!

Рецепт арқылы

Өндіруші туралы мәліметтер

Emcure Pharmaceuticals Ltd

Plot No. P-1 & P-2, I.T.B.T. Park, Phase II, M.I.D.C., Hinjawadi, 411 057, Пуна, Үндістан.

Тел: 91-20-25533245

Электронды пошта: regulatory@emcure.co.in

Тіркеу куәлігінің ұстаушысы

Emcure Pharmaceuticals Ltd

Plot No. P-1 & P-2, I.T.B.T. Park, Phase II, M.I.D.C., Hinjawadi, 411 057, Пуна, Үндістан.

Тел: 91-20-25533245

Электронды пошта: regulatory@emcure.co.in

Қазақстан Республикасының аумағында тұтынушылардан дәрілік заттардың сапасы жөнінде шағымдарды (ұсыныстарды) қабылдайтын және дәрілік заттың қауіпсіздігін тіркеуден кейінгі бақылауға жауапты ұйымның атауы, мекенжайы және байланыс деректері (телефон, факс, электронды пошта)

«REGICOM» ЖШС

Қазақстан Республикасы, 050000, Алматы қ., Абылай хан даңғылы, 122, 12 кеңсе

Тел. +7(727) 261-22-15 (фармакологиялық қадағалау)

e-mail: safety@regicompany.com

24 сағат бойы қолжетімді телефон: +7 705 132 78-51