Кабазред

• русский
• қазақша

• Скачать инструкцию медикамента

Саудалық атауы

Кабазред

Халықаралық патенттелмеген атауы

Кабазитаксел

Дәрілік түрі

Инфузия үшін ерітінді дайындауға арналған концентрат 60 мг/1.5 мл, 5.3 мл еріткішімен жиынтықта

Құрамы

1,5 мл концентраттың құрамында

белсенді зат - 60.00  мг кабазитаксел,

қосымша зат: полисорбат 80

Еріткіш: 96% этил спирті, инъекцияға арналған су.

Сипаттамасы

Концентрат – сарыдан сары-қоңыр түске дейінгі, көзге көрінетін қоспаларсыз мөлдір майлы сұйықтық.

Еріткіш – іс жүзінде механикалық қоспаларсыз, мөлдір түссіз сұйықтық.

Фармакотерапиялық тобы

Ісікке қарсы препараттар. Өсімдік текті алкалоидтар. Таксандар. Кабазитаксел.

АТХ коды L01CD04

Фармакологиялық қасиеттері

Фармакокинетикасы

Сіңуі

Кабазитакселді қуықасты безінің метастаздық обыры бар пациенттерге 25 мг/м2 дозада вена ішіне енгізгеннен кейін 1 сағаттан соң оның концентрациясы (Сmax) 226 нг/мл [өзгеру коэффициенті (ӨК): 107%] құрады. Тmax сағаттық инфузиядан кейін «концентрация-уақыт» фармакокинетикалық қисық астындағы ауданның (AUC) орташа мәні 991 нг∙сағ./мл (ӨК: 34%) құрады.

Үдемелі ауқымды ісігі бар пациенттерде 10-30 мг/м2-де дозаға пропорционалды жағына қарай елеулі ауытқулар байқалған жоқ.

Таралуы

Қанығу сатысындағы таралу көлемі (Vss) 4870 л құрады (орташа ДБА (дене беткейінің ауданы) 1,84 м2 болатын пациенттерде 2640 л/м2).

Кабазитакселдің адам плазмасының ақуыздарымен іn vitro байланысуы 89-92% құрады және 50,000 нг/мл дейін қанықпайтын болды, бұл клиникалық зерттеулерде байқалған ең жоғары концентрацияны бүркемелейді. Қан сарысуында кабазитаксел, негізінен, альбуминмен (82,0%) және липопротеиндермен (87,9% - тығыздығы жоғары липопротеиндермен (ТТЛП), 69,8% - тығыздығы төмен липопротеиндермен (ТТЛП) және 55,8% - тығыздығы өте төмен липопротеиндермен (ТӨТЛП)) байланысады. Қан плзмасындағы концентрациялар мен плазмадағы in vitro арақатынас 0,90-нан бастап 0,99 дейінгі шекте болды, бұл препараттың қан мен плазма арасында біркелкі таралғанын айғақтайды.

Биотрансформациясы

Кабазитаксел қарқынды түрде бауырда (>95%), көбіне, CYP3А4 изоэнзимімен (80%-90%) метаболизденеді. Кабазитаксел адам плазмасындағы негізгі айналымдағы қосылыс болып табылады. Плазмада жеті метаболит (О-деметилдену кезінде түзілген белсенді 3 метаболитті қоса,) табылды, сонымен қатар негізгі метаболиттің үлесіне бастапқы экспозицияның 5%-ы тиеді. Адамда кабазитакселдің 20 метаболитке жуығы несеппен және нәжіспен бірге шығарылады.

Іn vitro зерттеулер негізінде кабазитакселмен клиникалық маңызды концентрацияларда тежелуінің потенциалды қаупі, негізінен, CYP3A изоферментінің субстраты болып табылатын дәрілік препараттарға қатысты болуы мүмкін.

Алайда клиникалық зерттеулер кабазитаксел (25 мг/м2 дозада бір реттік бір сағаттық инфузия түрінде енгізілген) CYP3A зерттелетін субстраты мидазоламның плазмалық деңгейін өзгертпегенін көрсетті. Сондықтан пациенттерге CYP3A субстраттарын және кабазитакселді емдік дозаларда бірге енгізген кезде ешқандай да клиникалық әсерлер күтілмейді.

CYP басқа изоферменттерінің (1A2, 2B6, 2C9, 2C8, 2C19, 2E1 және 2D6) субстраттары болып табылатын дәрілік препараттардың потенциалды тежелу қаупі жоқ, сондай-ақ CYP1A, CYP2C9 және CYP3A изоферменттерінің субстраттары болып табылатын медициналық препараттардың кабазитакселмен индукциясының потенциалды қаупі жоқ.

Кабазитаксел in vitro варфариннің 7-гидроксиварфаринге CYP2С9 арқылы биотрансформациялануының негізгі жолын тежемейді. Сондықтан кабазитакселдің in vivo варфаринмен фармакокинетикалық өзара әрекеттесуі күтілмейді. CYP3А күшті индукторы немесе тежегіші кабазитакселдің плазмалық концентрациясына ықпалын тигізуі мүмкін, өйткені кабазитаксел көбіне CYP3А жәрдемімен метаболизденеді. Күніне 10 мг-ден енгізілетін преднизон және преднизолон кабазитакселдің фармакокинетикасына ықпалын тигізген жоқ.

In vitro кабазитаксел мультирезистентті протеиндерді (МРП): МРП1 және МРП2 немесе органикалық катиондардың тасымалдаушыларын (OCT1) бәсеңдеткен жоқ. Кабазитаксел Р-гликопротеиннің (PgP) (дигоксин, винбластин), сүт бездерінің резистентті обыры протеиндерінің (BCRP) (метотрексат)) тасымалдануын және полипептидтерді тасымалдайтын органикалық аниондарды OATP1B3 (CCK8) клиникалық жағдайларда байқалғандардан кем дегенде 15 есе жоғары концентрацияларда бәсеңдетті, ал ол клиникалық жағдайларда байқалғандардан 5 есе жоғары концентрацияларда ғана OATP1B1 (эстрадиол-17β-глюкуронид) тасымалдануына кедергі жасайды. Сондықтан 25 мг/м2 дозада МРП, OCT1, PgP, BCRP және OATP1B3 субстраттарымен in vivo өзара әрекеттесулер қаупінің болуы екіталай. OATP1B1 тсымалдаушыларымен өзара әрекеттесу қаупі, әсіресе ұзақтығы (1 сағат) инфузия кезінде және инфузия аяқталғаннан кейін 20 минутқа дейін болуы мүмкін.

Шығарылуы

Вена ішіне [14С]-кабазитакселмен 25 мг/м2 дозада бір сағаттық инфузия жасағаннан кейін енгізілген дозаның шамамен 80%-ы науқастың организмінен 2 апта ішінде шығарылды. Кабазитаксел көптеген метаболиттер (дозаның 76%-ы) түрінде, көбіне, нәжіс массаларымен бірге шығарылады, ал кабазитакселдің және оның метаболиттерінің бүйрек арқылы шығарылу үлесіне дозаның 4%-дан азырағы (несепте өзгермеген дәрілік препарат түрінде 2,3%) тиеді.

Кабазитакселдің плазмалық клиренсі жоғары: 48,5 л/сағ. (орташа ДБА 1,84 м2 болатын науқастарда 26,4 л/сағ./м2), ақырғы жартылай шығарылу кезеңі ұзақ: 95 сағат.

Ерекше популяциялар

Егде жастағы пациенттер

Кабазитакселдің фармакокинетикасы пациенттердің жасына байланысты емес.

Педиатриялық науқастар

Кабазредтің қауіпсіздігі мен тиімділігі 18 жастан кіші балалар мен жасөспірімдерде анықталған жоқ.

Бауыр функциясының бұзылуы

Бауыр функциясы бұзылған науқастардың қатысуымен зерттеулер жүргізілген жоқ. Алайда кабазитакселдің негізінен метаболизм жолымен шығарылатынын ескерер болсақ, экспозициясының жоғары болатындығын күтуге болады.

Бүйрек функциясының бұзылуы

Кабазитаксел бүйрек арқылы өте аз мөлшерде (дозаның 2,3%-ы) шығарылады. Бүйрек функциясының жеңілден орташа дәрежеге дейінгі дәрежеде бұзылуы кабазитакселдің фармакокинетикасына үлкен ықпалын тигізген жоқ. Бұл бір реттік 25 мг/м2 дозаға дейін венаішілік инфузиямен кабазитакселдің бірнеше циклін қабылдаған, бүйрек функциясы қалыпты (8 пациент), бүйрек функциясының ауырлығы орташа (8 пациент) және ауыр дәрежедегі (9 пациент) жеткіліксіздігі бар пациенттерге жүргізілген салыстырмалы фармакокинетикалық зерттеулерде айғақталды.

Фармакодинамикасы

Әсер ету механизмі

Кабазитаксел антинеопластикалық агент болып табылады, ол жасушаларда микротубулярлы тізбекті бұзу жолымен әсер етеді. Кабазитаксел тубулинмен байланысады және тубулиннің микротүтікшелерге жиналуына мүмкіндік береді, және олардың бір мезгілде ыдырап кетуіне кедергі жасайды. Бұл микротүтікшелердің тұрақтануына әкеледі, оның нәтижесі жасушалардың митоздық және интерфазалық функциясының басылуы болып табылады.

Фармакодинамикалық әсерлері

Клиникаға дейінгі зерттеулерде кабазитаксел адамда ісіктердің кеш сатыларына қатысты ісікке қарсы белсенділік ауқымының кеңдігін көрсетті. Кабазитаксел доцетакселге сезімтал ісіктерге қатысты белсенді. Бұдан басқа, кабазитаксел, доцетакселді қоса химиотерапияға сезімтал емес ісік модельдерінде белсенділік танытты.

Қолданылуы

- алдын ала доцетаксел қамтылған режим бойынша емделген, қуықасты безінің гормон рефрактерлік метастаздық обыры бар науқастарды емдеу үшін преднизонмен немесе преднизолонмен біріктіріп.

Қолдану тәсілі және дозалары

Кабазред препаратын қолдану цитоуытты препараттарды қолдануға мамандандырылған бөлімдермен шектелуі тиіс, оны обырға қарсы химиотерапия жүргізу тәжірибесі бар дәрігердің қадағалауымен ғана енгізген жөн. Жоғары сезімталдықтың гипотензия және бронхтың түйілуі сияқты күрделі реакцияларын емдеуге арналған құрал-жабдықтар және аппараттар қолда болуы тиіс («Айрықша нұсқауларды» қараңыз).

Премедикация

Премедикацияның ұсынылатын режимін, жоғары сезімталдық көріністерінің қаупін және ауырлығын азайту үшін, Кабазред препаратының әрбір енгізілуіне дейін 30 минуттан кешіктірмей, вена ішіне енгізілетін келесі препараттарды пайдаланып жүргізген жөн:

- антигистаминдік дәрі (5 мг дексхлорфенирамин немесе 25 мг дифенгидрамин, немесе баламалы дәрілер)

- кортикостероидты дәрі (8 мг дексаметазон немесе баламалы дәрілер)

- Н2 рецепторларының антагонисі (ранитидин немесе балама) («Айрықша нұсқауларды» қараңыз).

Құсуға қарсы профилактика ұсынылады: оны қажеттілігіне қарай пероральді түрде немесе вена ішіне жүргізуге болады.

Емдеудің бүкіл кезеңі бойы бүйрек функциясының жеткіліксіздігі сияқты асқынуларға жол бермеу үшін, науқас тиісті гидратациямен қамтамасыз етілуі тиіс.

Дозасы

Әрбір 3 апта сайын, емнің бүкіл кезеңі бойы күн сайын қабылданатын 10 мг пероральді преднизонмен немесе преднизолонмен біріктірілген, вена ішіне бір сағаттық инфузия түрінде енгізілетін Кабазред препаратының ұсынылатын дозасы 25 мг/м2 құрайды.

Дозаны түзету

Егер науқаста келесі жағымсыз реакциялар туындаса, дозаға түзету жүргізген жөн (дәрежелері Жалпы терминология критерийлеріне (Common Terminology Criteria for Adverse Events, CTCAE 4.0) сәйкес көрсетілген.

Кабазитакселмен ем қабылдап жүрген пациенттердегі жағымсыз реакцияларда ұсынылатын дозаларға өзгертулер

Егер 20 мг/м2 доза кезінде науқаста осы реакциялардың қандай да болсын біреуі сақталса, емдеуді тоқтатқан жөн.

Ерекше популяциялар

Бауыр функциясы бұзылған науқастар

Кабазред дәрілік заты бауырда қарқынды метаболизмге ұшырайды. Бауыр функциясы бұзылған науқастарға кабазитакселді қолдану жөнінде деректер жоқ. Сақтық шаралары ретінде кабазитакселді бауыр функциясы бұзылған [билирубин ≥ 1х қалыптың жоғары шегі (ҚЖШ) немесе АСТ және/немесе АЛТ ≥ 1,5х ҚЖШ] науқастарға тағайындамаған жөн («Қолдануға болмайтын жағдайлар», «Айрықша нұсқаулар», «Фармакокинетикасы» бөлімдерін қараңыз).

Бүйрек функциясы бұзылған науқастар

Кабазитаксел бүйрек арқылы өте аз мөлшерде экскрецияланады. Диализді қажет етпейтін, бүйрек функциясы бұзылған науқастарда дозаны түзету ұсынылмайды. Бүйрек функциясының бұзылуы терминальді сатыда (креатинин клиренсі (КрК < 15 мл/мин/1.73 м2) болатын пациенттер, қолда бар деректер мөлшері шектеулі болғандықтан, сақтықпен емделуі және емделу кезінде мұқият бақылауда болуы тиіс («Айрықша нұсқаулар», «Фармакокинетикасы» бөлімдерін қараңыз).

Егде жастағы адамдар

Егде жастағы пациенттерде Кабазредті пайдаланған кезде дозаны арнайы түзету ұсынылмайды («Айрықша нұсқаулар», «Жағымсыз әсерлері», «Фармакокинетикасы» бөлімдерін қараңыз).

Дәрілік препараттарды біріктіріп қабылдау

CYP3A күшті индукторлары немесе тежегіштері сияқты дәрілік препараттарды бір мезгілде қолдануға жол бермеген жөн. Алайда, егер CYP3A күшті тежегішін бірге қабылдау қажет болса, кабазитаксел дозасын 25%-ға төмендетуді қарастыру керек («Айрықша нұсқаулар», «Дәрілермен өзара әрекеттесуі» бөлімдерін қараңыз).

Педиатриялық популяция

Кабазредтің қауіпсіздігі мен тиімділігі 18 жастан кіші балалар мен жасөспірімдерде анықталған жоқ. Тиісті деректер жоқ.

Енгізу тәсілі

Препаратты дайындау және енгізу жөніндегі арнайы нұсқауларды «Қолдану тәсілі және дозалары» бөлімінен қараңыз.

Үйлесімсіздік

Бұл дәрілік препаратты, «Қолдану тәсілі және дозалары» бөлімінде көрсетілгендерді қоспағанда, басқа дәрілік препараттармен араластыруға болмайды.

Инфузиялық ерітіндіні дайындау және енгізу үшін ПВХ-ден жасалған инфузиялық ыдыстарды және полиуретаннан жасалған инфузиялық жүйені пайдаланбаңыз.

Сақталуы

Ашылғаннан кейін

Ішінде концентраты және еріткіші бар құтыларды ашу бойына бірден пайдалану керек. Препаратты кейіннен пайдаланғанда оның мерзіміне және сақтау шарттарына оны пайдаланушы жауапты.

Концентратты еріткішпен алғаш сұйылтқаннан кейін

Қоршаған ортаның (15-30°С) температурасында бір сағаттық мерзім ішінде пайдаланғандағы химиялық және физикалық тұрақтылығы дәлелденді. Препаратты кейіннен пайдаланғанда оның мерзіміне және сақтау шарттарына оны пайдаланушы жауапты (медициналық қызметкер), және егер сұйылту бақыланатын және валидацияланған асептикалық жағдайларда жүргізілмесе, әдетте ол 2-8°С температурада 24 сағаттан аспауы тиіс.

Инфузиялық ыдыста (қалта, бөтелке) соңғы сұйылтудан кейін инфузиялық ерітіндінің қоршаған орта температурасында 8 сағат ішіндегі (1 сағат инфузиялық уақытты қоса) және салқындау жағдайында 48 сағат ішіндегі (1 сағат инфузиялық уақытты қоса) химиялық және физикалық тұрақтылығы айғақталды.

Микробиологиялық көзқарас тұрғысынан инфузиялық ерітінді дереу пайдаланылуы тиіс. Препаратты кейіннен пайдаланғанда оның мерзіміне және сақтау шарттарына оны пайдаланушы жауапты (медицина қызметкері), және егер сұйылту валидацияланған асептикалық жағдайларда бақылаумен жүргізілмесе, әдетте ол 2-8°С температурада 24 сағаттан аспауы тиіс.

Жойған кездегі және онымен жұмыс жасаған кездегі арнайы сақтық шаралары

Кабазред препаратын цитоуытты агенттермен жұмыс жасауға үйретілген қызметкер ғана дайындауы және енгізуі тиіс. Қызметкер жүкті әйелдер осы препаратпен жұмыс жасауға жіберілмеуі тиіс. Кез келген басқа антинеопластикалық агент жағдайындағы сияқты, Кабазред препаратымен жұмыс жасаған кезде, оның ерітінділерін дайындау кезінде, препараттың қоршаған ортаға таралуын шектеу тетігін пайдалануға, арнайы қорғанышпен (мысалы, қолғаппен) жабдықтауға, дайындау процедурасына көңіл бөле отырып, сақтық танытқан жөн. Егер жұмыс жасаудың кез келген кезеңінде Кабазред теріге тиіп кетсе, теріні дереу және мұқият сабындап жуып-шайыңыз. Егер ол шырышты қабыққа тиіп кетсе, оларды сумен дереу және мұқият шайыңыз.

Инфузиялық ерітіндіге араластырмас бұрын, инфузия үшін ерітінді дайындауға арналған концентратты міндетті түрде оның жанына қоса салынған еріткішпен сұйылтыңыз.

Ескерту: Кабазред 60 мг/1.5 мл концентратының құтысы ішінде (толтыру көлемі: 73.2 мг кабазитаксел/1.83 мл) және еріткіштің құтысы ішінде (толтыру көлемі: 5.67 мл) ерітіндіні дайындау кезінде жойылған сұйықтықтың орнын толтыру үшін препараттың қосымша мөлшері бар. Бұл қосымша мөлшерлер концентратты сұйылтқаннан кейін кабазитаксел 10 мг/мл концентрациялы ерітіндісін алуды қамтамасыз етеді.

Инфузия үшін ерітінді дайындау кезіндегі сұйылтудың келесі екі кезеңдік үдерісін асептикалық жағдайларда жүргізу керек.

№1 кезең: Инфузия үшін ерітінді дайындауға арналған концентратты жанына салынған еріткішпен бастапқы сұйылту

- Кабазред концентраты бар құтыны және оның жанына қоса салынған еріткішті шығарып қойыңыз. Құтыдағы концентрат ерітіндісі мөлдір болуы тиіс.

- жанына қоса салынған еріткіштің барлығын, құтыны ішінара айналдыра отырып, шприцтің жәрдемімен құйып алыңыз, және оны ішінде Кабазред концентраты бар тиісті құтыға енгізіңіз. Еріткішті енгізген кезде болуы мүмкін көбіктің түзілуін барынша ең азға азайту үшін, инені ішінде концентраты бар құтының ішкі қабырғасына тура бағыттап, еріткішті баяу енгізіңіз.

- шприц пен инені алып тастаңыз да, құтыны мөлдір гомогенді ерітінді алынғанша қайта-қайта аударып-төңкеріп, ақырын араластырыңыз. Бұған шамамен 45 секунд кетеді.

- осы еріткішті шамамен 5 минутқа қойып қойыңыз, содан соң ерітіндінің гомогенді және мөлдір екендігіне көз жеткізіңіз. Осы уақыт өткеннен кейін көбік сақталса, қалыпты деп саналады.

Алынған концентрат пен еріткіш қоспасында 10 мг/мл кабазитаксел бар (құйып алынған көлем кемдегенде 6 мл). Оны №2 кезеңде сипаттамада көрсетілгендей, бірден (бір сағат ішінде) сұйылту керек.

№ 2 кезең: Инфузиялық ерітіндіні дайындау

- науқасқа қажетті дозаға қарай, бөліктелген шприцтің жәрдемімен ішінде 10 мг/мл Кабазред бар концентрат пен еріткіш қоспасының тиісті көлемін құйып алыңыз. Мысалы, 45 мг доза Кабазред үшін № 1 кезең барысында дайындалған концентрат пен еріткіштің 4,5 мл қоспасы қажет болады. Тиісті дозаны дайындау үшін концентрат пен еріткіш қоспасының бір құтыдан көбірегі қажет болуы мүмкін.

- бірінші кезеңде сипатталған осы ерітіндіні дайындағаннан кейін құтының қабырғаларында көбіктің сақталуы мүмкін болғандықтан, қоспаны құйып алғанда шприцтің инесін құтының ортасында ұстаған дұрыс.

- құрамына ПВХ кірмейтін, инфузияға арналған ыдысты пайдаланыңыз, және құйып алынған мөлшерді инфузияға арналған не 5% глюкоза ерітіндісіне, немесе 0,9% (9 мг/мл) натрий хлоридінің ерітіндісіне қосыңыз. Инфузиялық ерітіндінің концентрациясы 0,10 мг/мл және 0,26 мг/мл аралығында болуы тиіс.

- шприцті алып тастаңыз және қалтаның немесе бөтелкенің ішіндегіні шайқап қозғау арқылы араластырыңыз.

Инфузияға арналған Кабазред ерітіндісін кідіртпей пайдаланған жөн. Алайда пайдаланған кездегі сақтау мерзімі «Қолдану тәсілі және дозалары» бөлімінде көрсетілген ерекше жағдайларда ұзағырақ болуы мүмкін. Парентеральді енгізуге арналған барлық препараттар жағдайындағы сияқты, алынған инфузиялық ерітіндіні пайдаланар алдында көзбен қарап тексерген жөн. Шамадан тыс қаныққан инфузиялық ерітінді уақыты келгенде кристалдануы мүмкін. Мұндай жағдайда ерітіндіні қолдануға болмайды, оны тастау керек.

Енгізген кезде инфузиялық жүйенің тесіктерінің нақтылы өлшемі 0,22 микрометр (сондай-ақ 0,2 микрометр деп белгіленген) сүзгісін пайдалану ұсынылады. Кабазред препаратын дайындау және енгізу үшін инфузиялық сұйықтар үшін ПВХ контейнерлерді және инфузия жүргізу үшін полиуретан жиынтықтарды пайдалануға тыйым салынады.

Кез келген пайдаланылмаған өнімдерді және қалдықтарды жергілікті талаптарға сай жойған жөн.

Жағымсыз әсерлері

Жалпы қауіпсіздік бейіні

Жағымсыз реакцияларға көріністердің жиілігі мен ауырлығы бойынша баға берілген. Жағымсыз реакциялардың ауырлығы жағымсыз реакциялар критерийлерінің жалпы терминологиясына сай белгіленген.

Қуықасты безінің гормон рефрактерлі обыры барлық дәрежедегі ауырлықта кездескен ең жиі (≥ 10%) жағымсыз реакциялар анемия (97,3%), лейкопения (95,6%), нейтропения (93,5%), тромбоцитопения (47,4%) және диарея (46,6%) болды.

Ауырлығы ≥3 дәрежеде пайда болған ең жиі (≥5%) жағымсыз реакциялар нейтропения (81.7%), лейкопения (68.2%), анемия (10.5%), фебрильді нейтропения (7.5%), диарея (6.2%) болды.

Кабазред преднизонмен немесе преднизолонмен біріктіріп қолданған кезде туындаған жағымсыз әсерлер

Өте жиі (≥ 1/10)

- анемия, лейкопения, нейтропения, тромбоцитопения

- анорексия, жүректің айнуы, құсу, іштің ауыруы, диарея, іш қату

- дисгевзия

- шаршау, астения, пирексия

- жөтел, ентігу

- алопеция

- арқаның ауыруы, артралгия

- гематурия

Жиі (≥ 1/100 - < 1/10)

- бас ауыру, бас айналу

- шеткері нейропатия, шеткері сенсорлы нейропатия, парестезия, гипестезия, летаргия, ишиас

- конъюнктивит, жас ағудың күшеюі

- құлақтың шуылдауы, вертиго

- жыпылықтағыш аритмия, тахикардия

- гипотензия, соның ішінде ортостаздық, гипертензия

- қан кернеулері, гиперемия, тереңдегі веналар тромбозы

- ауыз-жұтқыншақ аймағының ауыруы, пневмония

- ауыз ішінің құрғауы, диспепсия, гастроэзофагеальді-рефлюкс ауруы, іштің жоғарғы бөлімінің ауыруы, іштің кебуі

- геморрой, ректальді қан кету

- аяқ-қолдың ауыруы, бұлшықет спазмдары, миалгия

- кеуде қуысындағы қаңқа-бұлшықет ауыруы, бүйірдің ауыруы

- бүйрек функциясының жеткіліксіздігі, бүйрек функциясының жедел жеткіліксіздігі, гидронефроз, бүйрек шаншулары, дизурия, поллакиурия, несепті ұстай алмау, уретраның обструкциясы, несептің іркілуі, жамбастың ауыруы

- тұмау, зостер герпесі, жоғары тыныс алу жолдарының инфекциясы, кандидоз

- несеп жолдарының инфекциясы, цистит, целлюлит

- сепсис, сепсистік шок

- фебрильді нейтропения

- жоғары сезімталдық

- сусыздану, гипокалиемия, гипергликемия

- үрейлену, сананың шатасуы

- терінің құрғауы, эритема

- ісіну, соның ішінде шеткері ісіну, шырышты қабықтың қабынуы

- ауыру, соның ішінде кеуде қуысының ауыруы

- өзін нашар сезіну, қалтырау, дене салмағының кемуі

- трансаминазалар, соның ішінде аспартат-аминотрансфераза деңгейінің жоғарылауы

Кейбір жағымсыз реакциялардың сипаттамасы

Нейтропения және онымен байланысты клиникалық көріністер

Зертханалық деректер бойынша ≥ 3 дәрежедегі нейтропения жиілігі 81,7% құрады. Жағымсыз реакциялардың, клиникалық және фебрильді нейтропенияның жиілігі, сәйкесінше, 21,3% және 7,5% құрады. Нейтропения дәрілік препарат қабылдауды тоқтатуға (2,4%) әкелетін ең көп таралған жағымсыз реакция болды.

Нейтропенияның асқынуларына нейтропениялық инфекциялар (0,5%), нейтропениялық сепсис (0,8%) және кейбір жағдайларда өліммен аяқталуға әкелген сепсистік шок (1,1%) жатады.

Г-КСФ қолдану нейтропенияның жиілігін және ауырлығын азайтты («Қолдану тәсілі және дозалары» және «Айрықша нұсаулар» бөлімдерін қараңыз).

Жүректің бұзылулары және аритмиялар

Кабазитакселді пайдаланған кезде жүрек қызметінің бұзылулары түріндегі ауырлығы барлық дәрежедегі мына жағымсыз реакциялар жиі кездесті: ≥ 3 дәрежедегі жүрек аритмиялары (1,6%), тахикардия жиілігі 1,6% құрады, олардың бірде-біреуі де ≥ 3 дәрежеде болған жоқ, жүрекшелер фибрилляциясы (1,1%), жүрек функциясының жеткіліксіздігі (0,5%). Өлімге әкеп соқтыратын қарыншалар фибрилляциясы 0,3%, жүректің тоқтап қалуы 0,5% құрады.

Басқа да патологиялық зертханалық көрсеткіштер

Зертханалық талдаулармен айғақталған ауытқулар жиілігі мынаны құрады: анемия ≥ 3 - 10,6 %, АСТ белсенділігінің жоғарылауы – 0.7%, АЛТ - 0,9% және билирубин концентрациясы – 0,6%.

Асқазан-ішек жолы тарапынан бұзылулар

Колиттің, энтероколиттің, гастриттің, нейтропениялық энтероколиттің туындау жғдайлары байқалды. Асқазан-ішектік қан кетулер және тесілулер жағдайларының, илеустің және ішек бітелісінің туындағаны жөнінде мәлімделді («Айрықша нұсқаулар» бөлімін қараңыз).

Педиатриялық популяция («Қолдану тәсілі және дозалары» бөлімін қараңыз).

Басқа да ерекше популяциялар

Егде жастағы науқастардың популяциясы

Келесі жағымсыз реакциялар, жасырақ пациенттермен салыстырғанда, 65 жастағы және одан үлкен пациенттерде жиі білінді: әлсіздік (29,8%-ға қарағанда 40,4%), клиникалық көріністері бар нейтропения (17,6%-ға қарағанда 24,2%), астения (14,5%-ға қарағанда 23,8%), пирексия (7,6%-ға қарағанда 14,6%), бас айналу (4,6%-ға қарағанда 10,0%), несеп шығару жолдарының инфекциялары (3,1%-ға қарағанда 9,6%) және сусыздану (1,5%-ға қарағанда 6,7%).

Ауырлығы ≥3 дәрежедегі келесі жағымсыз құбылыстардың жиілігі, жасырақ пациенттермен салыстырғанда, ≥ 65 жастағы пациенттерде жоғары болды: зертханалық талдау нәтижелері бойынша нейтропения (73,3%-ға қарағанда 86,3%), клиникалық көріністері бар нейтропения (16,8%-ға қарағанда 23,8%) және фебрильді нейтропения (6,1%-ға қарағанда 8,3%).

Болжамды жағымсыз реакциялар жөніндегі мәлімдеме

Дәрілік препаратты тіркегеннен кейінгі болжамды жағымсыз реакциялар жөніндегі мәлімдемелер маңызды мәнге иеленген. Бұл дәрілік препараттың пайда/қаупі арақатынасын қадағалауды жалғастыруға мүмкіндік береді. Денсаулық сақтау қызметкерлерінен кез келген күмәнді жағымсыз реакцияларды ұлттық есеп беру жүйесі арқылы мәлімдеп отыру сұралады.

Қолдануға болмайтын жағдайлар

- кабазитакселге, басқа да таксандарға немесе, полисорбат 80 қоса, препараттың кез келген басқа қосымша заттарына жоғары сезімталдық реакциялары;

- нейтрофилдер саны 1,500/мм3-ден аз;

- бауыр функциясының бұзылуы [билирубин ≥ 1х ҚЖШ немесе АСТ және/немесе АЛТ ≥ 1,5х ҚЖШ];

- сары қызбаға қарсы вакцинамен бір мезгілде егу («Дәрілермен өзара әрекеттесуі» қараңыз);

- 18 жасқа дейінгі балалар мен жасөспірімдер, өйткені қауіпсіздігі мен тиімділігі анықталған жоқ;

- жүктілік және емшек емізу кезеңі.

Дәрілермен өзара әрекеттесуі

Іn vitro сынақтарда кабазитакселдің негізінен CYP3А (80-90%) арқылы метаболизденетіні айғақталды.

CYP3А тежегіштері

Кетоконазолды (күніне бір рет 400 мг), күшті CYP3А тежегіші, қайталап қабылдау кабазитаксел клиренсінің 20%-ға төмендеуіне, соған сәйкес, қисық астындағы ауданның AUC 25%-ға жоғарылауына әкелді. Сондықтан CYP3А күшті тежегіштерін (мысалы, кетоконазол, итраконазол, кларитромицин, индинавир, нефазодон, нелфинавир, ритонавир, саквинавир, телитромицин, вориконазол) бірге қолдануға жол бермеу керек, өйткені қан плазмасында кабазитаксел концентрациясы жоғарылауы мүмкін («Фармакокинетикасы» бөлімін қараңыз).

Апрепитантты, CYP3А орташа тежегіші, бірге қабылдау кабазитакселдің клиренсіне әсерін тигізген жоқ.

CYP3А индукторлары

Рифампицинді (күніне бір рет 600 мг), CYP3А күшті индукторы, қайталап қабылдау кабазитаксел клиренсінің 21%-ға жоғарылауына, соған сәйкес, қисық астындағы ауданның AUC 17%-ға төмендеуіне әкелді. Осыған байланысты, CYP3А күшті индукторларын (мысалы, фенитоин, карбамазепин, рифампин, рифабутин, рифапентин, фенобарбитал) бірге қолдану қан плазмасында кабазитаксел концентрациясының төмендеуіне әкелуі мүмкін («Фармакокинетикасы» бөлімін қараңыз). Бұдан басқа, науқастар шайқурайды қолданудан тартынғандары жөн.

OATP1B1

In vitro кабазитаксел органикалық анион-тасымалдаушы полипептидтердің тасымалдайтын протеиндерін OATP1B1 бәсеңдетті. OATP1B1 субстраттарымен (мысалы, статиндер, валсартан, репаглинид), әсіресе ұзақтығы (1 сағ.) инфузия кезінде және инфузия аяқталғаннан кейін 20 минутқа дейін өзара әрекеттесу қаупі болуы мүмкін.

Ұзақтығы 12 сағаттық уақытша аралық инфузияға дейін, және инфузия аяқталғаннан кейін ең кемінде 3 сағат ішінде OATP1B1 субстраттарын енгізуге дейін ұсынылады.

Вакцинациялар

Химиотерапиядан кейін иммуносупрессиясы бар пациенттерге тірі немесе тірі аттенуирленген вакциналарды енгізу күрделі немесе өлімге әкелетін инфекциялық аурулардың дамуын туындатуы мүмкін. Кабазитаксел қабылдап жүрген пациенттер тірі аттенуирленген вакциналармен егуге жол бермегендері жөн. Өлтірілген немесе белсенділігі жойылған вакциналар енгізілуі мүмкін, бірақ осындай вакциналарға жауап реакциясы азырақ білінуі мүмкін.

Айрықша нұсқаулар

Жоғары сезімталдық реакциялары

Барлық науқастарға Кабазред енгізуді бастар алдында премедикация жүргізу керек («Қолдану тәсілі және дозалары» бөлімін қараңыз).

Жоғары сезімталдық реакцияларын анықтау үшін әсіресе алғашқы және екінші инфузия кезінде науқасқа мұқият бақылау жүргізген жөн. Жоғары сезімталдық реакциялары Кабазред препаратымен инфузияны бастағаннан кейін бірнеше минут ішінде-ақ туындауы мүмкін, сондықтан гипотензияны және бронхтың түйілуін емдеуге арналған құрал-жабдықтар және аспаптар дайын тұруы тиіс. Жайылған бөртпені (эритеманы), гипотензияны және бронхтың түйілуін қоса, ауыр реакциялар орын алуы мүмкін. Жоғары сезімталдықтың ауыр реакциялары Кабазред енгізуді дереу тоқтатуды және тиісті ем жүргізуді қажет етеді («Қолдануға болмайтын жағдайлар» бөлімін қараңыз).

Нейтропенияның даму қаупі

Кабазред қабылдап жүрген науқаста нейтропенияның асқыну қаупін азайту немесе оларды (фебрильді нейтропения, ұзаққа созылған нейтропения және нейтропениялық инфекция) емдеу үшін Америкалық клиникалық онкологиялық қоғамның (ASCO) жетекші қағидаттарына және/немесе медициналық мекемелердің қолданыстағы жетекші қағидаттарына сай профилактиалық тұрғыдан Г-КСФ (гранулоцитарлы-колония стимуляциялаушы фактор) қабылдауы мүмкін.

Г-КСФ жәрдемімен алғашқы профилактика ұзаққа созылған нейтропения дамуының жоғары қаупінің клиникалық белгілері (жасы 65 жастан асқан, жалпы жай-күйі нашар, бұдан бұрын болған фебрильді нейтропения көріністері, бұдан бұрын қабылданған ауқымды сәулелену, дене салмағының тапшылығы немесе басқа да қатар жүретін аурулар) бар науқастар жағдайында болуы мүмкін, бұлар ұзаққа созылатын нейтропения асқынуларына бейім етеді. Г-КСФ қолдану нейтропения жиілігін және ауырлық дәрежесін шектейді.

Нейтропения Кабазред препаратын ең кең таралған жағымсыз реакция болып табылады («Жағымсыз әсерлері» бөлімін қараңыз). Емдеуді алғашқы циклі кезінде апта сайын, содан соң әрбір емдік цикл алдында препарат дозасын түзету мақсатында қанның толық көрінісін қадағалап отыру маңызды. Тиісінше емдеуге келмейтін фебрильді нейтропения немесе ұзаққа созылған нейтропения жағдайында дозаны азайтқан жөн («Қолдану тәсілі және дозалары» бөлімін қараңыз).

Емдеуді нейтрофилдер ≥ 1,500/мм3 деңгейіне дейін қалпына келген кезде қайта жаңғырту керек («Қолдануға болмайтын жағдайлар» бөімін қараңыз).

Асқазан-ішек жолы тарапынан бұзылулар

Абдоминальді ауыру және әлсіздік, қызба, үнемі іш қату, нейтропениялы немесе онсыз диарея сияқты симптомдар асқазан-ішектің ауыр уыттылығының ерте біліністері болуы мүмкін және оларға баға беріліп, дер кезінде ем жүргізілуі тиіс. Кабазитакселмен емдеуді кейінге қалдыру немесе тоқтату қажет болуы мүмкін.

Жүректің айнуының, құсудың, диареяның және сусызданудың пайда болу қаупі

Егер кабазитакселді енгізгеннен кейін науқаста диарея пайда болса, оны диареяға қарсы кеңінен қолданылатын дәрілік заттармен емдеуге болады. Науқасты регидратациялау үшін тиісті шаралар қабылдаған жөн. Диарея абдоминальді-жамбас аймағына алдын ала сәуле емін қабылдаған науқастарда жиі туындауы мүмкін. Сусыздану көбінесе 65 жастағы және одан үлкен науқастарда кездеседі. Науқастарды регидратациялауға, қандағы электролиттер, әсіресе калий деңгейін бақылауға және түзетуге қатысты тиісті шараларды қолданған жөн. Диарея ≥ 3 дәрежеде болған жағдайда дозаны азайту немесе емдеу циклін кейінге қалдыру қажет етілуі мүмкін («Қолдану тәсілі және дозалары» бөлімін қараңыз). Егер науқаста жүректің айнуы немесе құсу пайда болса, оларды құсуға қарсы кеңінен қолданылатын дәрілермен емдеуге болады.

Асқазан-ішектің ауыр реакцияларының қаупі

Кабазитаксел қабылдаған пациенттерде өліммен аяқталуды қоса, асқазан-ішектік (АК) қан кетулер және тесілу, илеус, колит жағдайлары тіркелді («Жағымсыз әсерлері» қараңыз). Қабынуға қарсы стероидты емес препараттарды (ҚҚСП), антитромбицитарлық препараттарды немесе атикоагулянттарды бір мезгілде қолданғанда, асқазан-ішектік асқынулардың даму қаупі өте үлкен: нейтропениясы бар, егде жастағы пациенттерде, сондай-ақ бұдан бұрын жамбасқа сәуле емін қабылдаған немесе ойық жара және АІ қан кету сияқты асқазан-ішектік аурулары бар пациенттерде емдеуді сақтықпен жүргізген жөн.

Шеткері нейропатия

Кабазитаксел қабылдаған науқастарда шеткері нейропатия, шеткері сенсорлы нейропатия (мысалы, парестезия, дизестезия) және шеткері моторлы нейропатия жағдайлары білінді. Кабазред препаратымен емделіп жүрген науқастарға, нейропатия симптомдары (аяқ-қолдың ауыруы, күйдіру сезімі, шаншуы, ұюы немесе әлсізденуі сияқты) пайда болған жағдайда, емдеуді жалғастырмас бұрын емдеуші дәрігерді бұдан хабардар ету керектігі жөнінде кеңес берген жөн. Әрбір емделу алдында дәрігер нейропатияның бар-жоқтығына немесе оның нашарлағанына баға беруі керек. Емдеуді жағдайы жақсарғанша және симптомдар жоғалғанша кейінге қалдыру керек. Персистирленетін шеткері нейропатия дәрежесі ≥2 болған жағдайда Кабазред дозасын 25 мг/м2-ден 20 мг/м2 дейін азайтқаны жөн («Қолдану тәсілі және дозалары» бөлімін қараңыз).

Анемия

Анемия кабазитаксел қабылдаған пациенттерде байқалды («Жағымсыз әсрлері» бөлімін қараңыз). Кабазитакселмен емдеу алдында немесе егер пациентте анемия белгілері немесе симптомдары немесе қанның жоғалуы көрінсе, гемоглобин деңгейін тексеру қажет. Гемоглобині <10 г/дл пациенттерге препаратты сақтықпен тағайындау және клиникалық көрсетілімдеріне сәйкес тиісті шаралар қолдану керек.

Бүйрек функциясы жеткіліксіздігінің қауіп төндіруі

Бүйрек аурулары сепсистің, диарея, құсу және обструктивті уропатияның салдарынан ауыр сусызданудың дамуымен байланысты тіркелді. Өліммен аяқталуды қоса, бүйрек функциясының жеткіліксіздігі байқалды. Себептерін анықтау үшін тиісті шаралар қолданған және ол анықталған жағдайда қарқынды ем жүргізген жөн.

Кабазитакселмен емделудің бүкіл кезеңі бойы жеткілікті гидратациямен қамтамасыз ету керек. Науқасқа несептің тәуліктік көлеміндегі барлық елеулі өзгерістерді дәрігерге дереу мәлімдеп отыру керектігіне кеңес берген жөн. Сарысудағы креатининнің бастапқы деңгейін анықтау және оны қан көрінісін әрбір талдаған сайын және науқас несеп мөлшерінің өзгеруіне әрдайым шағымданғанда оны бақылау қажет. Кабазитакселмен емдеуді CTCAE 4.0 бойынша бүйрек функциясының ≥ 3 дәрежедегі жеткіліксіздігі жағдайында тоқтатқан жөн.

Жүрек аритмияларының қаупі

Жүрек аритмиялары, көбінесе тахикардия және жыпылықтағыш аритмиялар жөнінде мәлімделді («Жағымсыз әсерлері» бөлімін қараңыз).

Егде жастағы адамдар

Егде жастағы (≥ 65 жас) адамдар нейтропенияны және фебрильді нейтропенияны қоса, кейбір жағымсыз реакциялардың дамуына көбірек душар болуы мүмкін («Жағымсыз әсерлері» бөлімін қараңыз).

Бауыр функциясы бұзылған пациенттер

Кабазред препаратымен емдеуге болмайды («Қолдануға болмайтын жағдайлар» бөлімін қараңыз).

Өзара әрекеттесулер

CYР3А4 күшті тежегіштерімен бір мезгілде енгізуге жол бермеген жөн, өйткені олар қан плазмасында кабазитакселдің концентрациясын арттыруы мүмкін («Қолдану тәсілі және дозалары», «Дәрілермен өзара әрекеттесуі» бөлімдерін қараңыз).

CYР3А4 күшті индукторларымен бір мезгілде енгізуге жол бермеген жөн, өйткені олар кабазитакселдің плазмалық концентрациясының төмендеуіне әкелуі мүмкін («Қолдану тәсілі және дозалары», «Дәрілермен өзара әрекеттесуі» бөлімдерін қараңыз).

Қосымша заттар

Препаратты маскүнемдікке шалдыққан адамдарға тағайындағанда аса сақтық танытқан жөн, өйткені еріткіште 573,3 мг 96% этанол (15% көл./көл.) бар, бұл 14 мл сыраға немесе 6 мл шарапқа барабар.

Бұл дәлелді сондай-ақ жоғары қауіп топтарында да (бауыр аурулары және эпилепсиясы бар науқастар) ескерген жөн.

Жүктілік

Жүкті әйелдерге кабазитакселді пайдалану жөнінде деректер жоқ. Клиникаға дейінгі деректер ана үшін уытты дозалардың ұрпақ өрбітуге уыттылығын, сондай-ақ кабазитакселдің плаценталық бөгет арқылы өтетіндігін айғақтады. Басқа да цитоуытты дәрілік препараттар сияқты, кабазитаксел экспозицияға ұшыраған жүкті әйелдердің шаранасына зиянын тигізуі мүмкін.

Жүктілік кезінде, сондай-ақ жүкті болуды жоспарлап жүрген және контрацепцияны пайдаланбайтын әйелдерге осы препарат ұсынылмайды.

Лактация кезеңі

Емшектегі нәресте үшін қауіптің бар екендігін жоққа шығаруға болмайды.

Емшек емізу кезеңінде кабазитакселді қолданбаған жөн.

Фертильділік

Еркектің жыныс жасушаларына ықтимал әсер етуі және тұқым сұйықтығы арқылы ықтимал экспозициясы салдарынан, кабазитакселмен емделіп жүрген еркектер емдеудің бүкіл кезеңі бойы тиімді контрацепцияны қолданғаны жөн, және кабазитакселдің соңғы дозасынан кейін де оларға контрацепцияны тағы да 6 ай жалғастыру ұсынылады. Кабазитекселмен емделіп жүрген еркектердің тұқым сұйықтығына кабазитексел потенциалды түрде әсер етуі мүмкін болғандықтан, емдеудің бүкіл кезеңі бойы сыңарлас серігімен жыныстық қатынасты тоқтата тұруы тиіс. Кабазитакселмен емделуі керек еркектерге емделуге дейін спермасын консервациялауға кеңес беріледі.

Көлік құралын немесе потенциалды қауіпті механизмдерді басқару қабілетіне дәрілік заттың ықпал ету ерекшеліктері

Қауіпсіздік бейінінің негізінде кабазитаксел автомобильді және жұмыс механизмдерін басқару қабілетіне орташа дәрежеде ықпалын тигізуі мүмкін, өйткені ол шаршау сезімін және бас айналуды туындатуы мүмкін. Пациенттерге, егер емделу кезінде олар осы жағымсыз реакцияларды бастарынан кешірсе, автокөлікті басқаруды және механизмдермен жұмыс жасауды тоқтата тұру ұсынылады.

Артық дозалануы

Симптомдары: Кабазред антидоты белгісіз. Артық дозаланудың күтілген асқынулары сүйек кемігі функциясының басылуы және асқазан-ішектік бұзылулар сияқты жағымсыз реакциялардың күшеюі болып табылады.

Емі: артық дозаланған жағдайда науқасты мамандандырылған бөлімге жатқызу керек, қатаң бақылау жүргізу және Г-КСФ қамтылатын тиісті симптоматикалық ем тағайындау керек.

Шығарылу түрі және қаптамасы

Бір қаптамаға концентраты бар бір құты және еріткіші бар бір құты салынған.

Концентрат: 1,5 мл концентрат хлорбутил сұр резеңке тығынмен тығындалған, «flip-off» типті түссіз пластмасса қақпақпен жабылған, алюминий қалпақшамен қаусырылған, сыйымдылығы 15 мл, мөлдір (І тип) шыныдан жасалған құтыда. Әрбір құтыда 1,5 мл нақты көлемдегі 60 мг кабазитаксел бар.

Еріткіш: 5,3 мл еріткіш хлорбутил сұр резеңке тығынмен тығындалған, «flip-off» типті пластмасса қақпақпен жабылған, алюминий қалпақшамен қаусырылған, сыйымдылығы 15 мл, мөлдір (І тип) шыныдан жасалған құтыда.

1 құты концентрат және еріткіш мөлдір пластик контейнерге салынған.

Мөлдір пластик 1 контейнер медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынған.

Сақтау шарттары

Құрғақ, жарықтан қорғалған жерде, 250С-ден аспайтын температурада сақтау керек.

Мұздатып қатыруға болмайды!

Дайындалған ерітінді 30 мин ішінде пайдаланылуы тиіс.

Балалардың қолы жетпейтін жерде сақтау керек!

Сақтау мерзімі

2 жыл

Ашылғаннан кейін

Концентраты және еріткіші бар құтыларды ашқаннан кейін бірден пайдалану керек. Егер ол бірден пайдаланылмаса, онда пайдалану жағдайында сақтау мерзімі үшін және оның шарттары үшін пайдаланушы жауапты.

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші/Қаптаушы

«Dr. Reddy’s Laboratories Ltd.», Үндістн

Тіркеу куәлігінің иесі

«Dr. Reddy’s Laboratories Ltd.», Үндістан

Қазақстан Республикасы аумағында тұтынушылардан дәрілік заттың сапасы жөніндегі шағымдарды қабылдайтын және тіркеуден кейін дәрілік заттың қауіпсіздігін бақылауға жауапты ұйымның атауы, мекенжайы және байланыс жасау деректері

«Д-р Редди’с Лабораторис Лимитед» компаниясының Қазақстан Республикасындағы өкілдігі: 050057 Алматы қ., 22 линия к-сі, 45,

Абоненттік жәшік 7, тел: 8(727)3941688, факс: 8(727)3941294

Maira.Zhagiparova@drreddys.com.