Йопамигита (50 мл)

• русский
• қазақша

• Скачать инструкцию медикамента

Саудалық атауы

Йопамигита

Халықаралық патенттелмеген атауы

Йопамидол

Дәрілік түрі

Инъекцияға және инфузияға арналған ерітінді 300 мг/мл және 370 мг/мл, 50 мл және 100 мл

Құрамы

1 мл препараттың құрамында

белсенді зат - 612,4 мг йопамидол, 300 мг йодқа баламалы немесе 755.2 мг, 370 мг йодқа баламалы,

қосымша заттар: трометамол, натрий кальций эдетат дигидраты, 36 % хлорлы сутегі қышқылы, инъекцияға арналған су.

Сипаттамасы

Көрінетін механикалық қоспаларcыз, мөлдір, түссіз немесе бозғылт-сары ерітінді.

Фармакотерапиялық тобы

Контрастылы заттар. Құрамында йод бар рентгенконтрастылы заттар.

Суда еритін осмолярлығы төмен ренотропты рентгеноконтрастылы заттар. Йопамидол.

ATХ коды V08AB04

Фармакологиялық қасиеттері

Фармакокинетикасы

Йопамигита ерітіндісінің физикалық-химиялық сипаттамалары

Контрастылы зат көктамыр ішіне енгізілген соң тамыр ішінде және жасуша аралық кеңістікте өте жылдам таралып, бірден бүйрек арқылы шығарыла бастайды. Енгізілген йопамидолдың 50 %-ға жуығы қалыпты қызмет атқаратын бүйек арқылы 2 сағат ішінде бөлінеді, бүйрек жеткіліксіздігі жағдайында шығарылу кезеңі ұзара түседі.

Өзінің гидрофильдік қасиеттеріне орай йопамидол қан плазмасы ақуыздарымен мүлдем байланыспайды және жасуша жарғақшалары арқылы өтпейді. Йопамидол интактылы гематоэнцефалдық кедергі арқылы өтпейді.

Фармакодинамикасы

Йопамигита - йодталған, суда еритін, нефротропты, төмен осмолярлық рентгенконтрастты зат болып табылады. Тұрақты байланысқан йодтың болуы есебінен препарат рентген сәулесін жұтып, осы арқылы бейненің контрасттылығын арттырады.

Қолданылуы

Препарат тек қана диагностикалық мақсаттарда қолдануға арналған!

Йопамигита 300 мг/370 мг:

- артериография, ангиокардиография, сандық субтракциялық ангиография (ССА), компьютерлік томография (КТ) жасағанда, бейненің контрасттылығын күшейтеді

Йопамигита 300 мг:

- флебография, экскреторлық урографияда бейненің контрасттылығын күшейтеді.

Қолдану тәсілі және дозалары

Контрастты заттың дозасы зерттеудің түрі мен әдісіне, емделушінің жас ерекшелігіне, дене массасына, жүрек қызметі мен жалпы күйіне байланысты болады. Әдетте, құрамында йод бар ионды емес басқа да рентгенконтрастты заттарды пайдаланған кездегідей концентрациялар мен көлемдер қолданылады. Ақпараттық нәтижеге қол жеткізуге қажетті ең аз дозасын таңдау керек.

Айқын бүйрек және жүрек-қантамыр жеткіліксіздігі бер емделушілерде, сондай-ақ жалпы күйі нашар жағдайда - контрастты заттың дозасы барынша азайтылуы тиіс. Тексеруден соң мұндай емделушілердің кем дегенде үш күн бойы бүйрек қызметін бақылау қажет.

Контрастты затты енгізу алдында оны дене температурасына дейін жылытып алу керек.

Контрастты затты тікелей енгізу алдында еккішке жинап алу керек.

Контрастты затты енгізгенде, емделуші көлденең (горизонталь) қалыпта жатуы тиіс. Препаратты енгізген соң, емделуші орналасу қалпын ауыстыра алады.

Зерттеу алдында емделушіге шұғыл жағдай туындауына арналған көктамыр катетерін енгізу керек.

Аспирация қаупін төмендету үшін, емделуші зерттеуге дейін 2 сағат бұрын тамақтанбауы тиіс, өйткені лоқсу мен құсу сияқты жағымсыз реакциялар туындауы мүмкін.

Сезімталдыққа арнап тест жасау үшін, контрастылы заттың кішігірім мөлшерін пайдалану ұсынылмайды, өйткені оның болжамдық мәні жоқ. Сонымен қатар мұндай тестілеуді жүргізу өздігінен маңызды жағымсыз реакцияларға әкелуі мүмкін.

Балаларға арналған дозаны емдеуші дәрігер олардың жасына және дене салмағына қарай жеке тағайындалады.

Йопамигита 300 мг/мл

Йопамигита 370 мг/мл

Жағымсыз әсерлері

Құрамында йод бар контрастылы заттарды қолданғанда жағымсыз әсерлер, әдетте, жұмсақ, орташа және транзиторлық сипатқа ие. Алайда, кейбір жағдайларда өмір үшін қауіпті және жылдам әрі тиімді реанимациялық емдеуді қажет етуі мүмкін ауыр реакциялардың көрініс алуы мүмкін.

Өте жиі

- есекжем, қышыну

- жүрек айнуы, құсу

- ентігу

Жиі (1/100)

- ангионевротикалық ісіну, конъюнктивит, түшкіру, тұмаурату, бөртпе.

Бұл реакциялар уақыт кідірісінен дозаға және енгізу тәсіліне тәуелді емес және анафилактикалық шок дамуының ізашары болуы мүмкін

- ісіну, ысынулар, эритема

- тыныс алу жиілігінің өткінші өзгеруі, тыныс алудың қиындауы және

респираторлық дистресс-синдром, жөтел

- жүрек айнуы, құсу, дәм сезудің бұзылуы

Сирек(1/1000, 1/100)

- қозу, сананың шатасуы, амнезия, сөйлеудің, көздің көруі мен естудің бұзылуы, эпилепсиялық талма, қалтырау, парез, салдану, парестезия, жарықтан қорқу, өткінші соқырлық, ұйқышылдық, кома (церебральді ангиографияда және контрастты заттарды жоғары дозада мидың артериялық қантамырына енгізетін басқа да емшараларда)

- инсультке немесе миокард инфарктісіне алып келетін тромбоэмболиялар

- бронхоспазм, ларингоспазм, көмейдің ісінуі

- ішек бұзылулары

- жедел бүйрек жеткіліксіздігі

- шұғыл емдеуді қажет ететін және жүрек-қантамыр, тыныс алу және орталық жүйке жүйесінің қызметімен байланысты өмірге маңызды қауіп төндіретін реакциялар (оның ішінде өлімге әкелетін) Өте сирек(1/10,000)

- артериялық қысымның, жүректің жиырылу жиілігінің, жүрек ырғағының бұзылуы, жүрек жеткіліксіздігі, жүректің тоқтап қалуы

- өкпенің ісінуі, тыныс алудың тоқтауы

- сілекей безінің үлкеюі (йодты свинка)

- шырышты-тері синдромы (мысалы, Стивенс-Джонсон синдромы немесе Лайелл синдромы)

- ысынулар, дене температурасының өзгеруі (қызба), бас ауыруы, өзін-өзі нашар сезінуі, тершеңдік, суықты сезіну, вазовагальді реакциялар

- тромбофлебит, көктамырлық тромбоз

- препарат енгізілген орында тіндерінің қабынуы мен некрозы

Айқын гипертиреозбен байланысты тиреотоксикалық кризде зат алмасудың бұзылу жағғдайлары туралы; өткінші бас айналуы және бас ауыруы; препарат енгізілген орында жергілікті ауыру және ісінуі туралы хабарланған.

Қолдануға болмайтын жағдайлар

- препараттың белсенді немесе қосымша компоненттеріне асқын сезімталдық

- сыртартқысында йопамидол инъекциясына жылдам немесе баяу типті аллергиялық тері реакциясының бар болуы

- манифестацияланған гипертиреоз

Дәрілермен өзара әрекеттесуі

Папавериннен кейін йопамидолды енгізгенде, артериялық тромбоз туралы хабарланған.

Метформин қабылдайтын, қант диабеті бар науқастарда рентгенконтрастты затты қолдану бүйрек қызметінің транзиторлық бұзылуы мен лактатацидоздың дамуын тудыруы мүмкін.

Бета-адренблокаторларды қабылдайтын емделушілерде артериялық қысымның төмендеуі, брадикардия және бронхтың түйілуі сияқты өте жоғары сезімталдық реакциялары, әсіресе, емделушіде бронх демікпесі болған жағдайда неғұрлым айқын болуы мүмкін.

Сондай-ақ, мұндай емделушілерге бета-агонистердің жоғары дозасы қажет болуы мүмкін екендігін ескеру керек, өйткені олар өте жоғары сезімталдық реакцияларын емдеу үшін қолданылатын стандарты дозаларға резистентті болуы мүмкін.

Бета-блокаторлар, вазобелсенді препараттар, ангиотензин өзгертуші ферменттердің тежегіштері, ангиотензин рецепторларының антогонистері сияқты дәрілік препараттар жүрек-қантамыр жүйесінің компенсаторлық механизмдері тиімділігінің төмендеуін индуцирлейді және артериялық қысымды өзгертеді. Дәрігер йодконтрастты затты енгізгенге дейін емделушінің жоғарыда аталған препараттарды қабылдағанынан хабардар болып, реанимацияны дайындауы тиіс.

Құрысу шегін төмендететін дәрілік заттар (фенотиазин туындылары, аналептиктер, үшциклдық антидепрессанттар, МАО тежегіштері, нейролептиктер сияқты), әсіресе, эпилепсиямен зардап шегетін немесе мидың ошақтық зақымдануы бар емделушілерде құрысу талмасының туындауына ықпал етуі мүмкін. Осы дәрілік заттарды рентгенконтрастты зерттеу өткізгенге дейін 48 сағат бұрын және контрастты зат енгізілгеннен кейін 24 сағат ішінде қабылдауды тоқтату керек.

Интерферон және интерлейкиндерді қабылдаған емделушілерде, контрастылы заттарды енгізгенде пайда болатын эритема, қызба және/немесе тұмауға ұқсас симптомдар неғұрлым жиі туындауы немесе баяу сипат алуы мүмкін.

Диагностикалық тестілерге әсері

Контрастылы заттар қан плазмасындағы билирубиннің, ақуыз бен органикалық емес заттардың (мысалы, темір, мыс, кальций, фосфат) зертханалық көрсеткіштеріне әсер ете алады. Зертханалық тексеру контрастты затты енгізгеннен кейінгі бірінші күні жүргізілмеуі тиіс. Йопамигитаны енгізген соң 2-6 апта ішінде қалқанша безінің тиреотропты изотоптарының төмендеуі орын алады, бұл қалқанша безі ауруларын диагностикалау мен емдеудегі олардың тиімділігін төмендете түседі.

Бүйрек өзекшелері арқылы бөлінетін радиоактивтік заттарды қолдана отырып, бүйрек сцинтиграфиясын жоспарлағанда, зерттеуді контрастты заттар енгізгенге дейін жүргізу керек.

Айрықша нұсқаулар

Йодталған контрастты зат мүмкіндігінше шұғыл көмек көрсету үшін алдын ала дайындалған стационар жағдайында және техникалық қамтамасыз ету арқылы, сондай-ақ білікті қызметкерлер құрамы тарапынан қолданылуы тиіс. Елеулі реакцияларды шұғыл емдеу шаралары және қажетті апаттық қорек көздері дайындалуы тиіс. Электр тогы кенетен өшіп қалған жағдайда, контрастты затты енгізу тез арада тоқтатылып, қажет болған жағдайда спецификалық көктамыр ішін емдеу тағайындалуы тиіс.

Контрастты затты көктамыр ішіне енгізу үшін, иілгіш қуыс канюля немесе катетерді (тікелей көктамыр ішіне жету үшін) пайдаланған жөн. Препаратты енгізген соң, емделуші 30 минут бойы бақылауда болуы тиіс, өйткені барлық елеулі оқиғалардың көпшілігі атап айтқанда осы кезеңде өтеді.

Ангиографиялық зерттеулерді орындағанда, олардың әдістемесін мұқият сақтаған жөн, пайдаланушы катетерді 9 мг\мл-лік (0.9 %) натрий хлоридінің ерітіндісімен (қажет болған жағдайда гепаринді қосу) жиі шаю қажет.

Препаратты енгізу алдында құтыны мұқият тексеру керек.

Көзге көрінетін бөлшектер пайда болған жағдайда, препаратты пайдалануға болмайды.

Зерттелуші емделушінің барлық мүмкін болған қауіпті факторларын ескере отырып, Йопамигита қатаң түрде клиникалық көрсетілім бойынша қолданылуы тиіс. Келесі аурулары бар емделушілерге айрықша назар аудару қажет: аллергияға бейімділік; жасырын гипертиреоз; эутериоидты зоб; бүйрек жеткіліксіздігі; бауыр қызметінің ауыр бұзылуы; ауыр жүрек-қантамыр аурулары; бронх демікпесі; қант диабеті; мидың құрысу бұзылыстары; церебральді тамырлардың таралған атеросклерозы; жедел инсульт; гематоэнцефалдық кедергінің бұзылуымен, мидың ісінуімен қатар жүретін жедел бассүйекішілік қан құйылу; жалпы жағдайы нашар жай-күйде; сусыздану; дис- немесе парапротеинемия; феохромоцитома.

Контрастылы заттар көктамыр ішіне және артерия ішіне гомозиготты орақ тәрізді генді адамдарда енгізілгенде орақ-жасушалы эритроциттер өндірілуіне ықпал етуі мүмкін.

Кездейсоқ паравазальді инъекция жергілікті ісінуге, ауыруға және эритемаға әкелуі мүмкін. Бұл симптомдар қайтымды болып табылады және асқынуларсыз өтеді. Зақымдалған аяқ-қолды көтеріп, салқын компресс таңу керек.

Гидратация

Контрастылы заттарды қабылдағанға дейін және одан кейін организмге сұйықтықтың жеткілікті келіп түсуін қамтамасыз ету керек. Қажет болған жағдайда, емделушіге контрастты зат толық жойылғанға дейін көктамыр ішіне гидратация жүргізуі тиіс. Бұл, әсіресе, бүйрек қызметі бұзылған, дис- және парапротеинемиясы, қан диабеті, гиперурикемиясы бар емделушілерге, сондай-ақ жаңа туылған сәбилерге, емшектегі балаларға, жасы кіші балаларға, егде жастағы емделушілер мен жалпы жай-күйі нашар емделушілерге қажет. Қауіп тобындағы емделушілерде су-электролиттік балансты бақылау, сондай-ақ қан сарысуындағы кальций деңгейінің төмендеуін көрсететін симптомдарды бақылау керек.

Біріншіден несеп айдайтын дәрілерден, су және электролиттік регидратациядан туындаған сусыздану қаупіне байланысты жедел бүйрек жеткіліксіздігі даму қаупін төмендету керек.

Қалқанша безі қызметінің бұзылуы

Ерітінді құрамында бос йодтың болуы және йодталған контрастты затты қолданудан соң йодсыздандыру арқылы йодтың пайда болуы қалқанша безінің қызметіне әсер етеді. Бұл бейім емделушілерде гипертиреоз немесе тіпті тиреоуытты криз тудыруы мүмкін. Айқын, бірақ диагностикаланбаған гипертиреозы бар емделушілер, анықталған гипертиреозы бар емделушілер (көбіне түйінді зобы бар емделушілер) және функционалдық бұзылуы бар емделушілер (негізінен, йод жетіспейтін өңірлердегі егде жастағы адамдар) қауіпті топқа жатады.

Егер йодталған контрастты затты қабылдау әлеуетті қауіпті топтағы емделушілерде жоспарлы әрекет болып табылса, қалқанша безінің гипертиреозы мен әрекеттік дербестігін жоққа шығару үшін, зерттеуге дейін қалқанша безінің қызметін бағалау қажет.

Йодталған контрастылы затты қабылдау алдында, емделушінің қалқанша безін сканирлеуді жоспарламағанына немесе қалқанша безінің қызметін тексеруді немесе радиоактивті йодты қолдана отырып емдеуді жоспарламағанына көз жеткізу керек. Енгізу тәсіліне қарамай йодталған контрастты затты қабылдау препараттың қалқанша безінің гормондары құрамына және йод толық шығарылғанға дейін оны қалқанша безінің немесе қалқанша безі обыры метастаздарының толық экскрециялаумен жұтуына әсер етеді, йодталған контрастылы затты енгізгеннен кейін гипотиреоздың туындау қаупі бар.

Гипотиреоздың даму қаупі сондай-ақ йодталған контрастылы заттарды қабылдаған жаңа туған нәрестелерде немесе олардың аналары қабылдаған сәбилерде де бар.

Аллергиялық және анафилактикалық реакциялар (өте жоғары сезімталдық реакциялары)

Йопамигитаны дозаға қарамай қабылдау өте жоғары сезімталдықтың түрлі ауырлық дәрежесіндегі және түрлі симптоматикасына ие аллергиялық емес реакцияларына (жалған аллергияға, аллергияға ұқсас реакцияларға) әкелуі мүмкін. Әдетте, осы реакциялар тыныс алудың орташа қиындауы, терінің қызаруы (эритема) есекжем, қышу немесе беттің ісінуі сияқты тыныс алудың елеусіз бұзылуы немесе тері симптомдары түрінде көрініс алады.

Агнионевротикалық ісіну, дауыс саңылауы ісінуі, бронх түйілуі және анафилактикалық шок сияқты маңызды реакциялар сирек орын алады. Мұндай реакциялар, әдетте, контрастылы затты қабылдаған соң бір сағаттың ішінде болады. Сирек жағдайларда өте жоғары сезімталдық баяу түрде (бірнеше сағаттан немесе күннен кейін) болуы мүмкін. Алайда, аллергияға ұқсас реакциялар аллергияға бейім (аллергиясы бар), бронх демікпесі немесе сыртартқысында құрамында йод бар басқа бір контрастылы затқа өте жоғары сезімталдық реакциясы бар емделушілерде жиі кездеседі. Бронх демікпесі бар емделушілерде, әсіресе, бронх түйілуінің даму қаупі ұлғаяды. Контрастылы затты қолдану алдында жоғарыда аталған қауіпті факторларға қатысты емделушінің сыртартқысын мұқият зерделеу керек. Аллергиялық диатезі және өте жоғары сезімталдықтың белгілі реакциялары бар емделушілерге препаратты қатаң түрде көрсетілім бойынша қабылдау қажет. Өте жоғары сезімталдық реакцияларының даму қаупі бар емделушілерге антигистаминді заттарды және/немесе глюкокортикоидтерді пайдалана отырып, премедикация өткізу қажет. Сондай-ақ контрастылы затты қолданғанда, Ig E-ге тәуелді аллергиялық реакцияның жедел түрінің даму қаупі бар.

Мазасыздық күйі

Айқын қозу күйі, мазасыздық пен ауыру контрастылы затты қолданғанда, жағымсыз реакциялар қаупін ұлғайтуы мүмкін. Мұндай емделушілер седативті препараттарды қабылдауы тиіс.

Жүрек-қантамыр аурулары

Жүрек-қантамыр аурулары бар, әсіресе, жүрек жеткіліксіздігі, ауыр коронарлық бұзылуы, тұрақсыз стенокардиясы, коронарлық шунттауымен жүрек ақауы, миокард инфарктісі бар, өкпе гипертензиясы бар емделушілерде күрделі жүрек асқынуларының даму қаупі жоғары. Әсіресе, жүрек ішінде сол жақ және оң жақ қарыншаға контрастылы затты қабылдағанда, жоғары болып келеді.

ЭКГ-дегі ишемиялық өзгерістерді және айқын аритмияны қоса реакциялар егде жастағы науқастар мен сыртартқысында жүрек патологиясы бар науқастарда жиі кездеседі. Контрастты затты қантамыр ішіне енгізу жүрек жеткіліксіздігі бар емделушілерде өкпе ісінуін тудыруы мүмкін.

Бүйрек қызметінің бұзылуы

Контрастты заттарды қабылдаған соң, транзиторлық бүйрек жеткіліксіздігі пайда болуы мүмкін. Бүйрек жеткіліксіздігіне алып келетін бүйрек аурулары: бүйрек жеткіліксіздігі; диабеттік нефропатия; 60-тан жоғары жас ерекшелігі; сусыздану; үдемелі атеросклероз; қалпына келмейтін жүрек жеткіліксіздігі; контрастты заттың жоғары дозаларымен көп реттік инъекциялары; контрастты заттың бүйрек артериясына тікелей енгізілуі; нефроуытты заттардың әсері; ауыр және созылмалы артериялық гипертензия; гиперурикемия және парапротеинемия (мысалы, плазмоцитома, макроглобулинемия).

Келесі алдын алу шаралары ұсынылады: 1) контрастылы заттарды қабылдағанға дейін және одан кейін жеткілікті гидратациялауды қамтамасыз еткен жөн; дұрысы, көктамыр ішіне инфузиялау жолымен контрастылы заттардың толық сыртқа шығарылуына дейін; бүйрекке қосымша әсер етуді болдырмау (нефроуытты дәрілік заттар, бүйрек артериясының ангиопластикасы, кең хирургиялық араласулар және т.б); контрастылы заттың дозасын ең төмен дозаға дейін азайту.

Контрастылы затты қолдану арқылы қайта зерттеу бүйрек қызметі қалпына келгенде ғана орындалуы тиіс.

Гемодиализдегі емделушілерде енгізілген контрастылы заттар организмнен диализ барысында шығарылады.

Қант диабеті

Метформин қабылдайтын емделушілер: өйткені йопамидолды қан тамыр ішіне енгізу бүйрек жеткіліксіздігіне әкелуі мүмкін, зерттеуге дейін және зерттеу барысында метформинді қабылдауды тоқтату керек және тексеру кезінде және бүйрек қызметі мен оның қалпына келуін қайта зерттеген соң 48 сағат ішінде қайта жаңғыртуға болмайды.

Бүйрек қызметі бұзылған немесе тексерілмеген реанимациялық науқастарда дәрігер контрастылы затпен тексерудің қаупі және пайдасын таразылап, сақтық шараларын қолдануы тиіс: метформинді қабылдауды тоқтату, гидратация, бүйрек қызметінің мониторингі, қан сарысуындағы лактат деңгейін анықтау және сүт-қышқыл ацидозы белгілерінің болуын анықтауға арналған рН мониторингі.

Тромбоэмболиялық асқынулар

Ангиографияда катетердің көмегімен контрастылы заттарды енгізу тромбоэмболиялық асқынулардың қаупімен байланысты. In vitro ионды емес контрастылы заттардың ионды контрастылы заттарға қарағанда, антикоагулянтты белсенділігі аз болып келеді. Контрастылы заттардың өз әсерінен басқа ретте, зерттеудің ұзақтығы, инъекциялар саны, катетер мен еккіш түрі, қатар жүретін аурулар мен жүргізілуші емнің болуы сияқты бірқатар факторлар тромбоэмболиялық асқынулардың дамуына әсер етуі мүмкін. Сондықтан катетеризациялауда, осы факторларды ескеріп, ангиография техникасын орындауға, сондай-ақ катетерді физиологиялық ерітіндімен шаюға (қажет болған жағдайда гепаринді қосу) және тромбоз бен эмболияның туындау қаупін ең төмен дәрежеге келтіру үшін емшараны өткізу мерзімін барынша қысқартуға ерекше көңіл бөлу керек.

Гомоцистинуриясы бар емделушілерге (тромбоэмболияның даму қаупінен) айрықша көңіл бөлу керек.

ОЖЖ қызметінің бұзылуы

Жедел ишемиялық инсульті бар немесе жедел бассүйекішілік қан құйылуы бар емделушілерге, сондай-ақ гематоэнцефалдық кедергінің бұзылуын тудыратын аурулары бар, ми ісінуі немесе жедел демиелинизациясы бар емделушілерде көктамыр ішіне контрастылы заттарды енгізгенде, сақ болу керек. Бассүйекішілік ісіктер немесе метастаз және эпилепсия контрастылы заттарды қолданған соң талма ауруының туындауын ұлғайтуы мүмкін. Контрастылы заттарды қолданған соң, метастаздардан туындаған неврологиялық симптомдар, дегенеративті немесе қабыну үдерістерінің өршуі мүмкін. Контрастылы затты артерия ішіне енгізу ишемия құбылыстары бар тамырлардың түйілуін тудыруы мүмкін. Цереброваскулярлық аурулар, өткерілген инсульт немесе жиі транзиторлық ишемиялық шабуыл симптомдары бар емделушілер контрастылы заттарды артерия ішіне енгізген соң, неврологиялық асқынулардың жоғары даму қаупіне бейім.

Алкоголизм / есірткіге тәуелділік

Алкоголизмнің жедел немесе созылмалы түрі гематоэнцефалдық кедергінің өткізгіштігін ұлғайтуы, сөйтіп, орталық жүйке жүйесіне контраст-индуцирленген әсерге себеп болуы мүмкін.

Қосымша қауіп факторлары

Плазмоцитома немесе парапротеинемиясы бар емделушілерде контрастылы затты енгізген соң бүйрек жеткіліксіздігі дамуы мүмкін. Оны болдырмау үшін жеткілікті гидратацияны қамтамасыз ету керек.

Феохромоцитомамен зардап шегетін емделушілерде гипертензивті криздің даму қаупі бар. Альфа-адренблокаторларымен премедикация жасау ұсынылады.

Құрамында йод бар контрастылы заттарды енгізу миастенияның айқын симптомдарын күшейтуі мүмкін.

Сыртартқысында аутоиммунды аурулары бар науқастарда ауыр васкулиттер немесе Стивенс-Джонсон сияқты синдромның туындау жағдайлары сипатталған.

Әдетте, егде адамдарда болатын қантамыр патологиясы және неврологиялық бұзылулар құрамында йод бар контрастты заттарға жағымсыз реакциялардың даму қаупін арттыруы мүмкін.

Ауыр бауыр жеткіліксіздігімен ауыр бүйрек жеткіліксіздігі кейде гемодализді қажет ететін контрастты заттардың экскрециясын елеулі кідіртуі мүмкін.

Түрлі зерттеу әдістеріндегі контрастты заттарды қолдану кезіндегі сақтық шаралары мен ескертулер:

Көктамыр ішіндегі экскреторлық урография

Балалар бүйрегінің жетілмеген нефронының физиологиялық төмен концентрациялық қабілеті контрастылы заттардың салыстырмалы түрде жоғары дозаларын қажет ететінін балаларда көктамырішілік экскреторлық урография кезінде ескеру керек.

Компьютерлік томография (КТ)

Йопамигита жоғары қысымды инъектордың көмегімен көктамыр ішіне жылдам инъекциялау жолымен енгізілуі мүмкін. Сондай-ақ препарат «қолмен атқару» тәсілімен баяу инфузия жолымен де енгізілуі мүмкін. Орталық жүйке жүйесін белсенділендіру үшін енгізу тәсілін ескеру керек, бұл кезде бейнені түсіруден бұрын 5 - 10 минут күте тұру керек болады. Спиральді КТ, әсіресе, көпқатпарлы КТ бір рет тыныс алуды кідірту кезінде деректердің үлкен көлемін алуға мүмкіндік береді. Тексерілуші аумақта көктамыр ішіне болюстік енгізуден тиімді диагностикалық әсер алу үшін (шектеулі патологиялық өзгерген тіндерде уақытқа байланысты жинақталуы), жоғары қысымды автоматты инъекторды немесе болюстік енгізуді пайдалану ұсынылады. Контрастылы заттың дозасы мен енгізу жылдамдығы тексерілуші органға, диагностикалық ауруға және жабдыққа (яғни, сканирлеу және бейнені реконструкциялаудың ұзақтығы) байланысты болады. Баяу өңдеуші құрылғылар үшін, инфузияны қолдану, ал сканирлеу үшін жылдам болюстік енгізу қажет.

Егер контрастылы затты автоматты бүрку жүйесі арқылы енгізетін болса, оның болатын іске пайдалануға жарамдылығы жүйе өндірушісі тарапынан расталуы тиіс. Жүйені қолдану жөніндегі барлық нұсқаулықтар сақталуы тиіс. Сәбилер мен жасы кіші жастағы балаларға автоматтандырылған бүрку жүйесін пайдалануға болмайды.

Церебральді артериография

Таралған атеросклероз, бас сақинасы, ауыр артериялық гипертензия, жүрек жеткіліксіздігі бар, егде жастағы және ми қантамырларының тромбозын немесе эмболияны өткерген емделушілерге контрастылы затты айрықша сақтықпен қолдану керек. Мұндай емделушілерде брадикардия және артериялық қысымның ұлғаюы немесе азаюы сияқты жүрек-қантамыр реакциялары жиі болуы мүмкін.

Шеткергі артериография

Контрастылы зат енгізілетін артерияда тамыр соғуы (пульсация) болуы тиіс. Облитерациялайтын тромбангиит немесе ауыр ишемиямен біріккен төменнен жоғарылайтын жұқпа жағдайында, ангиография айрықша сақтықпен орындалуы немесе мүлдем өткізілмеуі тиіс.

Қолқа артериографиясы

Қолданылатын әдіске байланысты қолқа мен көрші органдардың зақымдануына, плевроцентезге, ішперде артынан қан кетуге, жұлынның жарақатына және параплегия симптомдарына әкелуі мүмкін.

Коронарлық ангиография және вентрикулография

Коронарлық артериография және сол жақ вентрикулографияда жүрек жеткіліксіздігі, ауыр аритмия, ишемия және миокард инфарктісі пайда болуы мүмкін. Осы зерттеулер тек білікті дәрігер тарапынан ғана және реанимации мен кардиоверсияға арналған тиісті жабдық болғанда ғана жүргізілуі тиіс. Бүкіл тексеру барысында ЭКГ-ны тұрақты тексеру және организмнің өмірлік маңызды қызметтерін бақылау керек.

Балалардағы оң жақ қарыншаның ангиокардиографиясы

Цианоз, өкпе гипертензиясы және жүрек дисфункциясы бар жаңа туылған сәбилерде айрықша сақтық шаралары қолданылуы тиіс.

Қолқа үсті ангиографиясы

Қолқа үсті ангиографиясында катетердің енгізілуіне ерекше назар аударған жөн. Автоматты сорғының жоғарғы қысымы бүйрек инфарктын, жұлын сұйығының зақымдануын, ішперде артынан қан кетуді, ішек инфаркты мен некрозын тудыруы мүмкін. Ангиографияны өткізген соң, бүйрек қызметін зерттеу керек. Әйелдерде ангиография мүмкіндігінше етеккір циклының преовуляторлық кезеңінде өткізілуі тиіс.

Флебография Тромбоз, флебит, ауыр ишемия, оқшауланған жұқпа немесе толық көктамырлық окклюзияға күдікті емделушілерге айрықша сақ болған жөн. Осындай емделушілерде экстравазацияны болдырмау үшін, рентген флюороскопиясын пайдалану ұсынылады.

Жаңа туылған сәбилер мен жасы кіші балалар

1 жасқа дейінгі балалар мен жаңа туылған сәбилер электролиттік баланстың бұзылуы мен гемодинамиканың өзгеруіне неғұрлым бейім болып келеді. Контрастылы заттың дозасын, емделушінің жағдайы бойынша зерттеу әдістемесіне сәйкес мұқият іріктеу керек. Шала туылған сәбилер мұқият тексерілуі тиіс, өйткені контрастылы затты қолдану қысқа мерзімдік гипотиреозға әкелуі мүмкін. Жаңа туылған сәбилерде, әсіресе, шала туылғандарда йодты қолданғаннан кейін гипотиреоздың туындау қаупіне орай, құрамында йод бар затты қолданған соң 7-10 күннен кейін және 1 айдан кейін қалқанша безі қызметін тексеру ұсынылады (әдетте, ТТГ және Т4 көрсеткіштері).

Жүктілік және лактация

Жүктілік кезеңінде талапқа сай және бақыланатын зерттеулер жүргізілген жоқ. Жүктілік кезінде мүмкіндігінше рентгенологиялық зерттеулерді болдырмау керек. Контрастылы затпен немесе контрастылы затсыз жүргізілетін кез келген рентгенологиялық зерттеулердің пайдасы ана мен ұрыққа тигізетін қатерлі мүмкіндігімен мұқият салыстырылуы тиіс. Радиациялық сәулеленуден басқа, ұрықтың сондай-ақ құрамында йод бар контрастылы затты қолданудан соң өндірілетін қалқанша безінің йодына сезімталдығын да назарға алу керек; ол ұрықта иодтың жедел жоғарылауы мен қалқанша без дисфункциясын туындатуы мүмкін.

Контрастылы заттар елеусіз мөлшерде емшек сүтімен бірге шығарылады. Сәби үшін әлеуетті қаупі туралы деректер жеткіліксіз болғандықтан, құрамында йод бар контрастылы заттарды енгізгеннен кейін 24 сағат бойы емшек емізуді тоқтату ұсынылады.

Дәрілік заттың көлік құралдарын немесе басқа да әлеуетті қауіпті механизмдерді басқару қабілетіне әсер ету ерекшеліктері.

Құрамында йод бар контрастты заттың көлікті және қауіптілігі зор механизмдерді басқару қабілетіне әсер етуі туралы зерттеу жүргізілген жоқ.

Артық дозалануы

Симптомдары: сипатталған жағымсыз әсер көріністерінің күшеюі.

Емдеу: кездейсоқ артық дозаланған немесе бүйрек қызметінің ауыр бұзылуы туындаған жағдайда, препарат диализдің көмегімен организмнен шығарылуы тиіс. Емі клиникалық көрінісіне сәйкес симптоматикалық. Емдеу организмнің өмірлік маңызды қызметтерін ұстап тұруға бағытталуы тиіс.

Жалпы реанимациялық шаралардан басқа, жалпы емдеуге (антигистаминдік, кортикостероидтер, оттегімен емдеу), жүрек-қантамыр бұзылуларын (вазопрессорлар, плазма, электролиттер), құрысуды (диазепам), тетаникалық кризді (кальций глюконаты) емдеуге арналған

дәрілік препараттарды қолдану ұсынылады. Кем дегенде 3 күн бойы бүйрек қызметіне бақылау жүргізу керек.

Шығарылу түрі және қаптамасы

Препаратты 50 мл және 100 мл-ден бромбутил резеңкеден жасалған тығынмен тығындалған және "flip-off" пластикалық қақпағы бар алюминий қақпақшалармен қаусырылған II типті шыныдан жасалған құтыларға салады.

10 немесе 30 құтыдан медицинада қолданылуы жөніндегі мемлекеттік және орыс тілдеріндегі нұсқаулықпен бірге картон қорапқа салады.

Сақтау шарттары

Рентген сәулелері мен жарықтан қорғалған жерде, 25 оС-ден аспайтын температурада түпнұсқалық қаптамасында сақтау керек.

Құтыны ашқаннан кейін түпнұсқалық қаптамасында, жарықтан және рентген сәулесінен қорғалған жерде, 2 - 8 ºС температурада 24 сағаттан асырмай сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Препараттың жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші

Солюфарм Фармацойтише Эрцойгниссе ГмбХ,

Индустриштрассе 3, 34212 Мельзунген, Германия

Тіркеу куәлігі иесінің атауы мен елі

Агфа ХэлсКеа Имэйджинг Эйджентс ГмбХ, Германия

 

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы

Қазақстан Республикасындағы «Агфа ХэлсКеа Н.В."» өкілдігі

Қазақстан Республикасы

Алматы, Тимирязев к-сі 42, 25 павильон, 3 секция

Тел.\факс: +7(727) 269 55 05, 245 89 43