Интафлю (раствор для инфузий, 0.2%)

Интафлю

Флуконазол

Дәрілік

Инфузияға арналған ерітінді, 0.2 %, 100 мл

100 мл препараттың құрамында

белсенді зат: 200 мг флуконазол,

қосымша заттар: натрий хлориді, инъекцияға арналған су.

Түссізден ақшыл-сары түске дейінгі мөлдір ерітінді.

Жүйелі қолдануға арналған зеңге қарсы препараттар.

Триазол туындылары. Флуконазол.

АТХ коды J02AC01

Фармакокинетикасы

Вена ішіне енгізгеннен кейін Интафлю организмнің тіндері мен сұйықтықтарына жақсы сіңеді. Плазмадағы концентрациясы дозаға тура пропорционалды тәуелділікте болады.

Флуконазолдың фармакокинетикасы вена ішіне енгізгенде және ішке қабылдаған кезде ұқсас.

Тепе-тең концентрациясы 90% деңгейіне ем басталған соң 4-5 күнге қарай препаратты тәулігіне бір рет бірнеше мәрте енгізгеннен кейін жетеді.

Орташа тәуліктік дозасынан 2 есе асып кететін екпінді дозаны 1-ші күні енгізу 2-ші күнге қарай 90% концентрациясына (Css) жетуге мүмкіндік береді. Болжамды таралу көлемі (Vd) организмдегі судың жалпы мөлшеріне жуықтайды. Қан плазмасы ақуыздарымен байланысуы төмен (11-12%).

Флуконазол организм сұйықтықтарының бәріне жақсы өтеді. Сілекей мен қақырықта флуконазол деңгейлері оның қан плазмасындағы концентрацияларына ұқсас. Зеңді менингитпен науқастарда жұлын сұйықтығындағы флуконазол деңгейлері оның қан плазмасындағы деңгейлерінің 80% жуығын құрайды.

Мүйізгек қабатында, эпидермисте және тер сұйықтығында сарысудағысынан асып кететін жоғары концентрацияларына жетеді. Флуконазол мүйізгекті қабатта жиналады. Тәулігіне 1 рет 50 мг дозада қабылдағанда 12 күннен соң флуконазол концентрациясы 73 мкг/г, ал емді тоқтатудан кейін 7 күннен соң тек 5.8 мкг/г құрады. Аптасына 1 рет 150 мг дозада қолданғанда мүйізгекті қабатта флуконазол концентрациясы 7-ші күні 23.4 мкг/г, ал екінші дозаны қабылдаудан кейін 7 күннен соң 7.1 мкг/г құрады.

Тырнақтағы флуконазол концентрациясы аптасына 1 рет 150 мг дозада 4 ай қолданудан кейін зақымданған тырнақтарда 1.8 мкг/г құрады; ем аяқталған соң 6 ай өткенде флуконазол бұрынғыша тырнақтан табылды.

Препарат негізінен бүйрек арқылы шығарылады; енгізілген дозаның 80%-ға жуығы өзгермеген күйінде несептен табылады. Флуконазолдың клиренсі креатининнің клиренсіне пропорционалды. Айналымдағы метаболиттер табылған жоқ.

Жартылай шығарылу кезеңі (T1/2) – ұзақ (30 сағат).

Қан плазмасынан ұзаққа созылатын T1/2 флуконазолды қынаптық кандидоз кезінде бір рет және басқа көрсетілімдерде тәулігіне 1 рет немесе аптасына 1 рет қабылдауға мүмкіндік береді.

Ерекше клиникалық жағдайлардағы фармакокинетикасы

Балаларда  мынадай фармакокинетикалық параметрлері анықталды:

Шала туған балаларға (28 аптаға жуық дамыған) флуконазолды балалар Қарқынды ем бөлімінде (ҚЕБ) болған кезде әрбір 3-ші күні вена ішіне ең көбі 5 доза енгізгенге дейін 6 мг/кг дозада енгізді. Орташа T1/2 1-ші күні 74 сағ құрады, 7-ші күні, орта есеппен, 53 сағатқа дейін және 13-ші күні, орта есеппен, 47 сағатқа дейін (27-68 сағат көлемінде) азайды.

AUC мәндері 1-ші күні 271 мкг×сағ./мл құрап, артынан 7-ші күні 490 мкг×сағ./мл дейін артты және 13-ші күнге қарай орта есеппен 360 мкг×сағ./мл дейін төмендеді.

Vd 1-ші күні 1183 мл/кг құрап, артынан орта есеппен 7-ші күні 1184 мл/кг дейін және 13-ші күні 1328 мл/кг дейін ұлғайды.

Егде жастағы пациенттерде (65 жастағы және одан асқан) 

Егде жастағы пациенттерде фармакокинетикалық параметрлер мәндері жас пациенттердегіден жоғары. Диуретиктермен бірге қабылдау AUC немесе Cmax мәндерін мардымсыз өзгерткен. Бұдан бөлек, егде жастағы науқастар үшін флуконазолдың креатинин клиренсі (74 мл/мин), несепте өзгеріссіз күйде қалыпқа келген дәрі пайызы (0-24 сағат, 22%) және бүйрек клиренсінің мәндері (0.124 мл/мин/кг), әдетте, жас адамдардағы сондай мәндерінен төмен болды. Флуконазол қабылдайтын егде жастағы пациенттерде фармакокинетикалық параметрлерінің жоғарырақ мәндері егде жасқа тән төмендеп кеткен бүйрек функциясымен байланысты болуы ықтимал.

Фармакодинамикасы

Интафлю – триазолды зеңге қарсы дәрі, зеңдер жасушасындағы стеролдар синтезінің қуатты іріктелген тежегіші болып табылады.

Вена ішіне енгізген кезде флуконазол зеңдік инфекциялардың әртүрлі модельдеріне белсенділік көрсетеді.

Интафлю оппортунистік, соның ішінде Candida spp., жайылған кандидозды қоса; бассүйек ішіндегі инфекцияларды қоса, Cryptococcus neoformans; Microsporum spp. және Trychoptyton spp. туғызған микоздарда белсенділік танытады. Флуконазолдың Blastomyces dermatitidis, Coccidioides immitis туғызған инфекцияларды қоса, бассүйек ішіндегі инфекцияларды және Histoplasma capsulatum қоса, эндемиялық микоздар кезіндегі де белсенділігі анықталған.

Интафлю P450 цитохромына тәуелді зеңдік ферменттерге қатысты жоғары спецификалылыққа ие.

Интафлюдің 28 тәулікке дейінгі тәулігіне 50 мг емі ерлер плазмасындағы тестостерон концентрациясына немесе бала туу жасындағы әйелдердегі стероидтар концентрациясына ықпал етпеген.

- криптококкоз, криптококктік менингит және басқа жерге (мысалы, өкпе, тері) орныққан инфекцияларды қоса, соның ішінде иммундық жауабы қалыпты науқастарда және ЖИТС-ке шалдыққан науқастарда, ағзалары алмастырып салынған реципиенттерде және иммун тапшылығының басқа түрлері бар науқастарда; ЖИТС-ке шалдыққан науқастарда криптококкоз рецидивтеріне профилактика жүргізу мақсатында демеуші ем ретінде

- жайылған кандидозда, кандидемияны қоса, диссеминацияланған кандидоз және ішперденің, эндокардтың, көздің, тыныс және несеп жолдарының инфекциялары сияқты кандидозды инфекциялардың басқа инвазиялық түрлерін қоса, соның ішінде қарқынды терапия бөлімінде жатқан және цитоуыттық және иммуносупрессиялық дәрілер қабылдап жүрген қатерлі ісікпен ауыратын науқастарда, сондай-ақ кандидоздың дамуына бейім басқа да факторлары бар науқастарда

- шырышты қабықтардың кандидозында, ауыз қуысы мен жұтқыншақтың, өңештің шырышты қабықтарын қоса, инвазиялық емес бронх-өкпе инфекцияларында, кандидурияда, тері-шырышты және ауыз қуысының (тіс протездерін киюге байланысты) созылмалы атрофиялық кандидозында, иммундық функциясы қалыпты және бәсеңсіген науқастарда; ЖИТС-пен ауыратын науқастардағы орофарингеальді кандидоз рецидивтеріне профилактика жүргізу үшін

- генитальді кандидозда; жедел немесе қайталанатын қынаптық кандидозда; қынаптық кандидоздың қайталау жиілігін азайту мақсатында профилактика жүргізу үшін (жылына 3 және одан да көп эпизодтар болғанда); кандидозды баланитте

- цитостатикалық химиялық ем немесе сәулелік ем нәтижесінде осындай инфекцияларға бейім қатерлі жаңа түзілімдері бар науқастардағы зеңдік инфекцияларға профилактика жүргізу үшін

- дерматомикоз, табанның, дененің, аяқ-қолдардың тегіс терісінің микоздарын қоса, кебек тәрізді теміреткі, онихомикоз және терінің кандидозды инфекциялары

- иммунитеті қалыпты науқастардағы терең эндемиялық микоздарда, кокцидиомикозда, паракокцидиоидомикозда, споротрихозда және гистоплазмозда.

Вена ішіне инфузияға арналған ерітінді.

Емді сеппенің және басқа зертханалық зерттеулердің нәтижелері алынғанға дейін бастауға болады. Алайда, осы зерттеулер нәтижелері белгілі болғанда инфекцияға қарсы емді тиісті түрде өзгерту қажет.

Көп реттік дозалармен емдеуді талап ететін инфекция түрлері үшін ем клиникалық және зертханалық көрсеткіштер белсенді зеңді инфекцияның басылғанын көрсеткенше жалғастырылуы тиіс. Емдеу кезеңінің талапқа сай болмауы белсенді инфекцияның қайталануына әкелуі мүмкін. ЖИТС және криптококкты менингитпен немесе қайталанатын орофарингеальді кандидозбен науқастар, әдетте, аурудың қайталануына жол бермеу үшін демеуші емді қажет етеді.

Интафлюді вена ішіне инфузия жолымен 10 мл/мин аспайтын жылдамдықпен енгізуге болады. Флуконазолдың күнделікті дозасы зеңді инфекцияның сипатына және ауырлық дәрежесіне негізделуі тиіс.

Енгізу тәсілін таңдау науқастың клиникалық жай-күйіне байланысты. Пациентті вена ішіліктен препаратты ішу арқылы қабылдауға көшірген кезде тәуліктік дозаны өзгерту қажет емес.

Интафлюдің тәуліктік дозасы зеңдік инфекцияның сипатына және ауырлық дәрежесіне байланысты.

Флуконазол 0.9 % натрий хлориді ерітіндісінен тұрады, әрбір 200 мг (100 мл бөтелке) құрамында әрқайсысы 15 ммоль Na+ және CL- бар. Флуконазол натрийді қажет ететін немесе сұйықтықты қабылдауды шектеуді қажет ететін науқастарда сұйылтылған тұзды ерітінді түрінде болатындықтан, сұйықтықты қабылдау жылдамдығын ескеру керек.

Ересектерде қолдану

1. Криптококкты менингитте және басқаша орналасқан криптококкты инфекцияларда, әдетте, бірінші күні 400 мг тағайындалады, ал артынан емді тәулігіне бір рет 200-400 мг дозада жалғастырады. Криптококкты инфекцияларды емдеу ұзақтығы клиникалық және микологиялық әсерлерінің бар-жоғына байланысты; криптококкты менингитте емдеу, әдетте, 6-8 апта жалғасады.

ЖИТС-пен науқастарда криптококкты менингит қайталануының профилактикасында ұсынылатын Интафлю дозасы - 200 мг/тәулік.

2. Кандидемия кезінде, диссеминацияланған кандидозда және басқа да инвазиялық кандидоздық инфекцияларда доза әдетте бірінші күні 400 мг, ал содан кейін тәулігіне 200 мг құрайды. Клиникалық әсердің айқындығына қарай доза тәулігіне 400 мг-ге дейін арттырылуы мүмкін.

Емнің ұзақтығы клиникалық әсерге байланысты.

3. Орофарингеальді кандидоз кезінде қайталану ықтималдығын төмендету үшін әдеттегі доза –7-14 күн бойы күніне бір рет 50-100 мг. Айқын иммундық тапшылығы бар науқастарда қажет болса емдеу одан да ұзақ кезеңге жалғастырылуы тиіс.

Тіс протездерін киюге байланысты оральді атрофиялық кандидозда препаратты әдетте протезге арналған жергілікті антисептикалық шаралармен бірге, 14 күн бойы тәулігіне бір рет 50 мг дозада тағайындайды.

Шырышты қабықтың басқа да кандидозды инфекцияларында (генитальді кандидозды қоспағанда, төменнен қараңыз), мысалы, эзофагитте, инвазиялық емес бронх-өкпе инфекцияларында, кандидурияда, дерматомикозда және т.б. емдеу ұзақтығы 14-30 күн болғанда тиімді доза әдетте тәулігіне 50-100 мг құрайды.

ЖИТС-пен ауыратын науқастарда орофарингеальді кандидоздың қайталануына профилактика жүргізу үшін алғашқы терапияның толық курсы аяқталғаннан кейін Интафлю аптасына бір рет 150 мг-ден тағайындалуы мүмкін.

4. Қынаптық кандидозда Интафлю бір рет 150 мг дозада тағайындалады. Қынаптық кандидоз профилактикасында препаратты айына бір рет 150 мг дозада қолдануға болады. Ем ұзақтығы әркімге жеке белгіленеді; ол 4-тен 12 айға дейін ауытқиды. Кейбір науқастарға бұдан да жиірек дозалау қажет болуы мүмкін. Қынаптық кандидоздың көптеген жағдайлары бір реттік дозамен емге реакция береді.

5. Қатерлі жаңа түзілімдері бар науқастардағы зеңдік инфекцияларға профилактика жүргізу үшін зеңдік инфекцияның даму қаупінің дәрежесіне байланысты Интафлюдің ұсынылатын дозасы тәулігіне бір рет 50-400 мг құрайды. Жайылған инфекцияның жоғары қаупі бар науқастар үшін, мысалы, айқын немесе ұзақ сақталатын нейтропения болжанған науқастар, ұсынылатын доза тәулігіне бір рет 400 мг құрайды. Интафлюді қабылдау нейтропенияның болжанған ұстамасынан бірнеше күн бұрын басталуы және нейтрофильді лейкоциттердің саны мм3-ге 1000 жасушаға ұлғайғаннан кейін 7 күн бойы жалғасуы тиіс.

7. Дерматомикоздарда, табандардың, дененің тегіс терісінің, аяқ-қолдардың микоздарын қоса алғанда, ұсынылатын доза аптасына бір рет 150 мг немесе тәулігіне бір рет 50 мг құрайды. Емнің ұзақтығы әдетте 2-4 апта, алайда табан микозында әдеттегіден ұзағырақ емдеу (6 аптаға дейін) қажет болуы мүмкін.

Кебек тәрізді теміреткіде ұсынылатын доза 2 апта бойы аптасына бір рет 300 мг құрайды; кейбір науқастарға аптасына препараттың 300 мг үшінші дозасы керек болуы мүмкін, ал кейбір науқастар үшін 300-400 мг препаратты бір рет қабылдау жеткілікті болады. Емдеудің баламалы сызбасы препаратты 50 мг-ден 2-4 апта бойы тәулігіне бір рет қолдану болып табылады.

Онихомикоз кезінде ұсынылатын доза аптасына бір рет 150 мг құрайды. Емдеуді сау тырнақ пластинкасы толық түрде пайда болғанша жалғастыру керек. Қол және аяқ саусақтарының тырнақтары қайтадан өсуі үшін әдетте тиісінше 3-6 ай және 6-12 ай қажет. Алайда, өсу жылдамдығы әр адамда, сондай-ақ жас ерекшелігіне байланысты кең ауқымда өзгеріп отырады. Ұзақ сақталған созылмалы инфекция сәтті емделгеннен кейін, кейде тырнақ пішінінің өзгергені байқалады.

Терең эндемиялық микозда препаратты 2 жыл бойы тәулігіне 200-400 мг дозада қолдану қажет етілуі мүмкін. Емдеу ұзақтығы әр адамға жекелей таңдалуы тиіс, бірақ кокцидиоидомикоз үшін 11-24 ай көлемінде, паракокцидиоидомикоз үшін 2-17 ай көлемінде, споротрихоз үшін 1-16 ай және гистаплазмоз үшін 3-17 ай. Емнің ұзақтығы жекелей анықталады.

Балаларда қолданылуы

Ересектердегі ұқсас инфекциялар сияқты, емдеудің ұзақтығы клиникалық және микологиялық әсерге байланысты.

Ерсектер үшін ең жоғары күнделікті доза балаларда жоғарылатылмауы тиіс. Флуконазол күн сайын бір реттік дозада қабылданады. Шырышты қабықтардың кандидозында Интафлюдің ұсынылатын дозасы тәулігіне 3 мг/кг құрайды. Тұрақты тепе-тең концентрацияға жылдамырақ қол жеткізу мақсатында бірінші күні 6 мг/кг екпінді доза тағайындалуы мүмкін.

Жайылған кандидозды және криптококктік инфекцияларды емдеу үшін аурудың ауырлығына байланысты ұсынылатын доза тәулігіне 6-12 мг құрайды.

Цитоуытты химиялық ем немесе сәулелік ем алатын, нейтропения салдарынан қауіп тобына жатқызылған иммундық тапшылығы бар науқастарда зеңдік инфекциялардың профилактикасы үшін препаратты индукцияланған нейтропенияның айқындылығына және сақталу ұзақтығына байланысты тәулігіне 3-12 мг-ден тағайындайды.

4 апталық және одан кіші балаларға қолдану

Жаңа туған нәрестелерде Интафлю баяу шығарылады. Өмірдің алғашқы 2 аптасында препаратты ересек балалардағыдай дозада, бірақ 72 сағат аралықпен тағайындайды. 3 және 4 апталық балаларға дәл сол дозаны 48 сағат аралықпен енгізеді.

Егде жастағы адамдарда қолданылуы

Бүйрек жеткіліксіздігінің белгілері болмаса, препаратты әдеттегі дозада тағайындайды.

Бүйрек жеткіліксіздігі бар науқастарда қолданылуы

Бір рет қабылдағанда дозасын өзгерту қажет емес. Балаларды қоса, бүйрек функциясының бұзылуы бар науқастарда, препаратты көп рет қолданғанда алдымен 50 мг-ден 400 мг дейінгі екпінді дозасын енгізіп, содан кейін тәуліктік дозасын (көрсетілімге байланысты) төмендегі кестеге сәйкес белгілейді:

Жүйелі диализде жүрген науқастар әр диализден кейін 100% ұсынылатын дозаны алуы тиіс; диализ жоқ күндері науқастар өздерінің креатинин клиренсіне сәйкес қысқартылған дозаны алуы тиіс.

Флуконазолдың, әдетте, жағымдылығы жақсы

Жиі (≥1/100 - <1/10 дейін)

• бас ауыру

• жүрек айну, құсу, іштің ауыруы, диарея

• сілтілік фосфатаза деңгейінің, сарысулық аминотрансферазалар (АЛТ және АСТ) деңгейінің жоғарылауы

бөртпе

Жиі емес (≥1/1,000 - ≤1/100 дейін)

- анемия

- тәбеттің төмендеуі

• ұйқысыздық, ұйқышылдық

• құрысулар, бас айналу, парестезия, дәм сезудің өзгеруі

• вертиго

• диспепсия, метеоризм, ауыздың кеберсуі

• холестаз, сарғаю, билирубин деңгейінің жоғарылауы

• қышыну, есекжем, қатты терлеу,

• миалгия

• шаршау, дімкәстану, әлсіздік, қызба

Сирек (≥1/10,000 - ≤1/1,000 дейін)

• агранулоцитоз, лейкопения, нейтропения, тромбоцитопения

• анафилаксия, ангионевроздық ісіну

• гипертриглицеридемия, гиперхолестеринемия, гипокалиемия

• тремор

• тахикардия, қарыншалар жыпылықтауы/дірілдеуі, QT аралығының ұзаруы

• диспепсия, метеоризм, ауыздың кеберсуі

• гепатоуыттылық, өліммен аяқталатын сирек жағдайларды қоса, бауыр жеткіліксіздігі, гепатоцеллюлярлы некроз, гепатит, гепатоцеллюлярлы зақымданулар

• уытты эпидермалық некролиз, Стивенс-Джонсон синдромы, жедел жайылған экзантематозды пустулез, эксфолиативті дерматит, беттің ісінуі, алопеция.

ЖИТС немесе обырмен науқастарда Интафлюмен және ұқсас препараттармен емделгенде қан көрсеткіштерінің, бүйрек және бауыр функциясының өзгерістері байқалды, алайда, осы өзгерістердің клиникалық мәні және олардың емдеумен байланысы анықталмаған.

Болжамды жағымсыз реакциялар туралы мәліметтерді хабарлау

Дәрілік препаратты тіркеуден кейін жағымсыз әсерлері туралы деректерді хабарлаудың препаратты қолданудың пайдасы мен қаупінің арақатынасына мониторинг жүргізу үшін маңызы зор. Барлық медицина қызметкерлері мен пациенттер кез келген жағымсыз реакциялар туралы осы медициналық қолдану жөніндегі нұсқаулықтың соңында көрсетілген мекенжайға және телефондар бойынша хабарлауы керек.

- флуконазолға, препараттың басқа да компоненттеріне немесе флуконазолға ұқсас құрылыммен азольді заттарға жоғары сезімталдық

- тәулігіне флуконазолдың 400 мг және одан да жоғары дозасын көп рет қолдану кезінде терфенадинді бір мезгілде қолдану

- цизаприд, астемизол, эритромицин, пимозид және хинидин сияқты, QT аралығын ұзартатын және CYP3A4 ферменті арқылы метаболизденетін дәрілік препараттарды бір мезгілде қабылдау

- жүктілік және лактация кезеңі

Сақтықпен

Флуконазолды қолдану аясында бауыр функциясы көрсеткіштерінің бұзылуы; флуконазолды қолдану аясында беткейлік зеңдік инфекциялар және инвазиялық/жүйелік зеңдік инфекциялары бар науқастарда бөртпелердің пайда болуы; терфенадинді және флуконазолды тәулігіне 400 мг-ден аз дозада бір мезгілде қолдану; көптеген қауіп факторлары бар науқастарда әлеуетті проаритмиялық жағдайлар (жүректің органикалық аурулары, электролиттік теңгерімнің бұзылулары және осыған ұқсас бұзылулардың дамуына ықпал ететін қатар жүргізілетін ем).

Гидрохлоротиазид: бір мезгілде гидрохлоротиазид пен Интафлюді қолдану плазмада Интафлю концентрациясын 40% арттырады. Осы арттыру әсері қатар жүретін диуретиктер алатын пациенттерде Интафлю дозалануын өзгертуді талап етпейді.

Рифампицин: Интафлю мен рифампицинді бір мезгілде қолдану Интафлюдің AUC (концентрация-уақыт қисығы астындағы аудан) 25% төмендеуіне және жартылай шығарылу кезеңінің 20% қысқаруына алып келеді. Рифампицинмен қатар жүретін ем алатын науқастарда Интафлю дозасын арттыру қажет.

Интафлю P450 (CYP) 2C9 цитохромы изоферментінің қуатты тежегіші және CYP3A4 ферментінің орташа тежегіші болып табылады. Төменде көрсетілген өзара әрекеттесулерден тыс, Интафлюмен бір мезгілде қолдану кезінде CYP2C9 және CYP3A4 ферменттерімен метаболизденетін басқа қосылыстардың плазмалық концентрацияларының жоғарылау қаупі бар. Сондықтан, осы біріктірілімдерді пайдалану кезінде сақтық танытып, ал науқастарды мұқият бақылау қажет. Интафлюдің ферментті тежеу әсері, жартылай шығарылу кезеңінің ұзаққа созылуына орай, Интафлюмен емделуді тоқтатудан кейін 4-5 күн бойы сақталады.

Альфентанил: Интафлюмен бір мезгілде емдегенде альфентанил клиренсінің және таралу көлемінің төмендеуі, сондай-ақ T½ (жартылай шығарылу кезеңі) ұзаруы байқалады. Болжамды әсер ету механизмі Интафлюдің CYP3A4 ферментін тежеуі болып табылады. Альфентанил дозасын түзету қажет болуы мүмкін.

Амитриптилин, нортриптилин: Интафлю амитриптилин мен нортриптилин әсерін күшейтеді. Біріктірілген емнің басында және апта өткенде 5-нортриптилин және/немесе S-амитриптилинді өлшеуге болады. Егер қажет болса, амитриптилин/нортриптилин дозасы түзетілуі тиіс.

Амфотерицин B: иммунитеті қалыпты және әлсіреген инфекция жұқтырған тышқандарда Интафлю мен амфотерицин B бір мезгілде қолдану мынадай нәтижелерді: C. albicans туғызған жүйелі инфекцияларда зеңге қарсы аздаған қосымша әсерін, Cryptococcus neoformans туғызған бассүйек ішіндегі инфекция кезінде ешқандай өзара әрекеттесудің болмауын, екі препараттың да A. fumigatus туғызған жүйелі инфекцияға антагонизмін көрсетті. Осы зерттеуде алынған клиникалық мәнді нәтижелер белгісіз.

Антикоагулянттар: Интафлю варфаринмен бір мезгілде қолданылғанда протромбин уақытын (12%) ұзартады. Постмаркетингтік зерттеуде, басқа да зеңге қарсы азолды препараттардағы сияқты, Интафлюді варфаринмен бір мезгілде алған науқастарда протромбин уақытының ұзаруымен байланысты қан кету көріністері (гематомалар, мұрыннан қан кетулер, асқазан-ішектен қан кетулер, гематурия және мелена) хабарланды. Кумариндік қатар антикоагулянттарын қабылдайтын науқастарда протромбин уақытын мұқият бақылау қажет. Варфарин дозасын түзету қажет болуы мүмкін.

Азитромицин: Интафлю мен азитромицин арасында ешқандай мәнді фармакокинетикалық өзара әрекеттесу анықталмаған.

Бензодиазепиндер (қысқа әсер ететін): мидазоламмен бір мезгілде қолданғанда, Интафлю мидазолам концентрациясының елеулі жоғарылауына және психомоторлық әсерлерге алып келеді. Интафлюді ішу арқылы қабылдаудан кейін мидазоламға осындай әсері вена ішіне енгізу кезіндегіден айқынырақ. Егер Интафлю алатын науқастарға бензодиазепиндермен қатарлас ем қажет болса, бензодиазепиндер дозасын азайтып, ал науқастарды мұқият қадағалау қажет.

Интафлю, триазолам метаболизмінің тежелісі салдарынан, триазоламның (бір реттік доза) AUC мәнін шамамен 50%, Cmax 20-32% және t½ 25-50% арттырады. Триазолам дозасын түзету қажет болуы мүмкін.

Карбамазепин: Интафлю карбамазепин метаболизмін тежейді және сарысуда соңғысының концентрациясын 30% арттырады. Карбамазепинмен уыттанудың даму қаупі бар. Карбамазепин дозасын концентрация/әсер өлшеміне қарай түзету қажет болуы мүмкін.

Кальций өзекшелерінің блокаторлары: кальций өзекшелерінің кейбір антагонистері (нифедипин, исрадипин, амлодипин, верапамил және фелодипин) CYP3A4 ферментімен метаболизденеді. Интафлю кальций өзекшелері антагонистерінің жүйелі әсерін едәуір арттыруы мүмкін. Препараттардың жағымсыз әсеріне жиі мониторинг өткізу ұсынылады.

Флуконазолде кальций өзекшесі антагонистерінің жүйелі әсерін арттыру қуаты бар. Жағымсыз құбылыстарға жиі мониторинг өткізу ұсынылады.

Целекоксиб: Интафлюмен (тәулігіне 200 мг) және целекоксибпен (200 мг) қатар жүретін ем кезінде целекоксиб Cmax және AUC, тиісінше, 68% және 134% ұлғайған. Интафлюмен біріктіргенде целекоксиб дозасының жартысы қажет болуы мүмкін.

Циклоспорин: Интафлю циклоспориннің AUC және концентрациясын едәуір арттырады. Бұл біріктірілімді циклоспорин дозасын оның концентрациясына қарай төмендету арқылы пайдалануға болады.

Циклофосфамид: циклофосфамид пен Интафлюдің біріктірілген емі қан сарысуында билирубин мен креатинин деңгейлерінің жоғарылауына алып келеді. Біріктірілімді қан сарысуында билирубин мен креатинин деңгейлерінің жоғарылау қаупі білінгенше пайдалануға болады.

Фентанил: Интафлю фентанил элиминациясын едәуір кідіртеді. Фентанилдің жоғары концентрациялары тыныс алу жеткіліксіздігіне әкелуі мүмкін.

Галофантрин: Интафлю CYP3A4 тежеу әсері салдарынан плазмада галофантрин концентрациясын арттыруы мүмкін.

Гидроксиметилглутарил-кофермент A-редуктаза (ГМГ-КоA-редуктаза) тежегіштері: Интафлю аторвастатин мен симвастатин сияқты CYP3A4 арқылы немесе флувастатин сияқты CYP2C9 арқылы метаболизденетін ГМГ-КоA-редуктаза тежегіштерімен бір мезгілде тағайындалғанда, миопатия және қаңқа бұлшық еттері жедел некрозының (рабдомиолиз) даму қаупі артады. Егер қатар жүретін ем қажет болса, науқаста миопатия және рабдомиолиз симптомдарының білінуі қадағалануы тиіс, сондай-ақ креатинкиназа деңгейіне бақылау жүргізілуі тиіс. Егер креатинкиназа деңгейінің едәуір жоғарылауы байқалса немесе егер миопатия/ рабдомиолиз дамуы диагностикаланса немесе күдік тудырса, ГМГ-КоA-редуктаза тежегіштерін қабылдауды тоқтату керек.

Лосартан: Интафлю Лосартанмен емделу кезінде жүретін ангиотензин II рецепторлары антагонизмінің басым бөлігіне жауап беретін лозартанның өз белсенді метаболитіне (Е-31 74) метаболизденуін тежейді. Науқастар артериялық қысымды тұрақты бақылап отыруы тиіс.

Метадон: Интафлю қан сарысуында метадон концентрациясын арттыруы мүмкін. Метадон дозасын түзету қажет болуы мүмкін.

Қабынуға қарсы стероидты емес препараттар (ҚҚСП): Интафлюмен бір мезгілде тағайындалғанда, флурбипрофен монотерапиясымен салыстырғанда, флурбипрофен Cmax және AUC, тиісінше, 23% және 81% артады. Дәл осы сияқты, Интафлю ибупрофен (400 мг) рацемиялық қоспасымен бір мезгілде тағайындалғанда, соңғысының монотерапиясымен салыстырғанда, фармакологиялық белсенді изомер [S-(+)-ибупрофен] Cmax және AUC, тиісінше, 15% және 82% артты.

Интафлю CYP2C9 арқылы метаболизденетін басқа ҚҚСП (мысалы, напроксен, лорноксикам, мелоксикам, диклофенак) жүйелі әсерін күшейтуі мүмкін. ҚҚСП-мен байланысты жағымсыз әсеріне және уыттылығына жиі мониторинг өткізу ұсынылады. ҚҚСП дозасын түзету қажет болуы мүмкін.

Ішуге арналған контрацептивтер: Интафлю 50 мг дозасының гормондар деңгейіне ешқандай елеулі әсері білінбеген, ал осы кезде 150 мг тәуліктік дозасында этинилэстрадиол мен левоноргестрел AUC (концентрация-уақыт қисығы астындағы аудан), тиісінше, 40% және 24% ұлғайды. Осылайша, Интафлюді осындай дозаларда көп рет қолданудың ұрықтануға қарсы біріктірілген ішуге арналған препараттар тиімділігіне ықпалын тигізуі екіталай.

Фенитоин: Интафлю фенитоиннің бауырдағы метаболизмін тежейді. Бір мезгілде қабылдағанда фенитоинмен уыттануды болдырмау үшін қан сарысуында фенитоиннің концентрация деңгейлері тексерілуі тиіс.

Преднизон: Интафлюмен және преднизонмен ұзақ уақыт емделіп жүрген науқастар Интафлю қабылдауды тоқтатудан кейін бүйрек үсті бездері қыртысының дамуы тұрғысынан бақылануы тиіс.

Рифабутин: Интафлюмен бір мезгілде қолдану қан сарысуында рифабутин деңгейлерін 80% дейін арттыруы мүмкін. Интафлю мен рифабутин бір мезгілде тағайындалған науқастарда увеиттің даму жағдайлары хабарланған. Рифабутин мен Интафлюді бір мезгілде алатын науқастардың жағдайын мұқият бақылау қажет.

Саквинавир: Интафлю CYP3A4 арқылы саквинавирдің бауырдағы метаболизмін тежеу және Р-гликопротеин тежелісі есебінен саквинавир AUC шамамен 50%, Cmax шамамен 55% арттырады және саквинавир клиренсін шамамен 50% азайтады. Саквинавир дозасын түзету қажет болуы мүмкін.

Сиролимус: Интафлю, жорамал бойынша, CYP3A4 және Р-гликопротеин арқылы сиролимус метаболизмін тежеу жолымен сиролимустың плазмалық концентрациясын арттырады. Бұл біріктірілімді әсер/концентрация өлшеміне қарай сиролимус дозасын түзету кезінде пайдалануға болады.

Сульфонилмочевина: Интафлю ішуге арналған сульфонилмочевина препараттарын (мысалы, хлорпропамид, глибенкламид, глипизид, толбутамид) бір мезгілде қабылдағанда сарысудан жартылай шығарылу кезеңін ұзартады. Қан глюкозасын жиі бақылау және сульфонилмочевина дозасын тиісінше азайту ұсынылады.

Такролимус: Интафлю 5 есеге дейін ішу арқылы қабылдағанда CYP3A4 арқылы ішектегі такролимус метаболизмін тежеу есебінен сарысулық такролимус концентрациясын арттыруы мүмкін. Такролимус вена ішіне енгізілгенде ешқандай елеулі фармакокинетикалық өзгерістер анықталмаған. Такролимус деңгейінің жоғарылауы нефроуыттанумен байланысты болды. Ішуге арналған такролимус дозасы препарат концентрациясына қарай азайтылуы тиіс.

Теофиллин: Интафлюді 14 күн бойы 200 мг қабылдау теофиллин клиренсі орташа жылдамдығының 18% төмендеуіне әкеледі. Интафлю мен теофиллинді жоғары дозаларда қабылдайтын науқастарды немесе теофиллиннің уытты әсер ету қаупі жоғары науқастарды теофиллиннің артық дозалану симптомдарын дер мезгілінде анықтау мақсатында мұқият қадағалау қажет; олар білінгенде емді тиісті үлгіде өзгерту керек.

Қабіршөп алкалоиды: Интафлю қабіршөп алкалоидының (мысалы, винкристин және винбластин) плазмалық деңгейлерін арттырып, CYP3A4 тежеу әсеріне орай, нейроуыттануға әкелуі мүмкін.

А дәрумені: Бұл біріктірілімді пайдалануға болады, бірақ ОЖЖ-мен байланысты жағымсыз әсерлерін анықтау мақсатында пациенттерді қадағалау керек.

Зидовудин: Интафлю ішу арқылы қабылдағанда зидовудин клиренсінің шамамен 45% төмендеуі салдарынан зидовудин Cmax және AUC мәндерін, тиісінше, 84% және 74% арттырады. Зидовудиннің жартылай шығарылу кезеңі Интафлюмен біріктірілген емнен кейін шамамен 128% ұзарады. Осы біріктірілімді алатын науқастар зидовудин қабылдаумен байланысты жағымсыз реакцияларды анықтау мақсатында қадағалануы тиіс. Зидовудин дозасын азайту қажет болуы мүмкін.

Тофаситиниб: тофаситиниб CYP3А4 орташа тежелісіне де, CYP2С9 күшті тежелуіне де әкелетін дәрілермен (флуконазол) бірге қабылданғанда әсері артады.

Интафлюдің басқа дәрілермен өзара әрекеттесуін зерттеулер әзірше жүргізілмеген, бірақ мұндай өзара әрекеттесулер туындауы мүмкін.

Вена ішіне енгізуге арналған Интафлю мынадай ерітінділермен үйлесімді:

• 20% глюкоза ерітіндісі

• Рингер ерітіндісі

• Хартманн ерітіндісі

• калий хлоридінің глюкозадағы ерітіндісі

• 4.2 % натрий бикарбонатының ерітіндісі

• аминофузин

• изотониялық физиологиялық ерітіндісі

Интафлюді инфузиялық жүйеге жоғарыда аталған ерітінділердің біреуімен бірге енгізуге болады. Оны басқа препараттармен араластыру ұсынылмайды.

Сирек жағдайларда Интафлю қолдану, ең алдымен, қатарлас аурулары бар науқастарда бауырдың, соның ішінде өліммен аяқталатын уыттылық өзгерістерімен қатар жүрді. Интафлюдің гепатоуытты әсері әдетте қайтымды болды, оның белгілері емді тоқтатудан кейін басылды. Интафлюмен емделу кезінде бауыр функциясының көрсеткіштері бұзылған науқастарды бауырдың зақымдану белгілерін анықтау мақсатында қадағалау қажет. Интафлю қолданумен байланысты болуы мүмкін бауыр зақымдануының клиникалық белгілері немесе симптомдары білінгенде препаратты тоқтату керек.

Интафлю сирек жағдайларда анафилаксиялық реакциялар туғызуы мүмкін.

Интафлюмен емдеу кезінде науқастарда сирек жағдайларда Стивенс-Джонсон синдромы және уытты эпидермалық некролиз жағдайлары сияқты эксфолиативті тері реакциялары дамыды. ЖИТС-пен науқастар көптеген препаратты қолдану кезінде ауыр тері реакцияларының дамуына бейімірек. Науқаста емделу кезінде Интафлю қолданумен байланысты болуы мүмкін бөртпенің беткейлік зеңді инфекциясы білінгенде препаратты тоқтату керек. Инвазиялық/жүйелі зеңді инфекциялары бар науқастарда бөртпе білінгенде оларды мұқият қадағалап, буллезді зақымданулар немесе көп формалы эритема пайда болғанда Интафлюді тоқтату керек.

Интафлю ЭКГ-да QT аралығының ұзаруын туындатуы мүмкін. Интафлю қолдану кезінде органикалық жүрек аурулары, электролиттік теңгерім бұзылулары және осындай бұзылулардың дамуына ықпал ететін қатар жүретін ем сияқты көптеген қауіп факторлары бар науқастарда QT аралығының ұзаруы және қарыншалардың жыпылықтауы/дірілдеуі өте сирек білінді. Сондықтан әлеуетті проаритмиялық жай-күйлері бар мұндай пациенттерге Интафлюді сақтықпен қолдану керек.

Флуконазол күшті әсер ететін CYP2C9 тежегіші және орташа әсер ететін CYP3A4 тежегіші болып табылады. CYP2C9 және CYP3A4 арқылы метаболизденетін емдік өрісі тар дәрілермен қатар ем қабылдайтын флуконазолмен емделіп жүрген науқастар тексеруден өтуі тиіс.

Бауыр, жүрек аурулары бар пациенттерге Интафлюді қолданар алдында дәрігермен кеңесу ұсынылады.

Интафлю бүйрек дисфункциясы бар науқастарда сақтықпен қабылдануы тиіс.

Педиатрияда қолданылуы

Балаларда байқалған жағымсыз құбылыстардың және қалып шегінен зертханалық ауытқулардың мысалдары мен жағдайлары ересектерде байқалған сондай құбылыстармен салыстырмалы.

Жүктілік және лактация кезеңі

Флуконазолды әдетегі дозаларда және қысқа курстарда жүктілік кезінде қажет болмаса пайдаланбаған жөн. Флуконазолды жоғары дозаларда және/немесе ұзақ курстарда өмірге қаупі зор инфекциялардан басқа жағдайда жүктілік кезінде пайдаланбау керек. Флуконазолдың стандарты дозаларын (<200 мг / тәулік) алған, оны жүктіліктің бірінші триместрінде бір реттік немесе көп реттік дозалар түрінде қабылдаған бірнеше жүз жүкті әйелдерді зерттеуден алынған деректер, шаранада қандайда бір жағымсыз әсерлерді көрсеткен жоқ. Аналары кокцидиоидомикоз үшін флуконазолдың жоғары дозаларымен (күніне 400-800 мг) үш айдан кем емес немесе одан көп ай бойы ем алған емшек еметін балаларда көптеген туа біткен аномалиялар жөнінде (оның ішінде брахицефалия, құлақ дисплазиялары, өте үлкен алдыңғы мең, сан сүйегінің алға қарай жайпақ физиологиялық иілісі және білек-иық синостозы) хабарланған.

Емшек емізу кезінде пайдалану

Флуконазол қан сарысуына қарағанда емшек сүтіне азырақ концентрацияда өтеді. Флуконазолдың стандартты 200 мг немесе одан азырақ дозасын бір рет пайдаланғаннан кейін (мысалы, қынаптық кандидоз) емшек емізуді жалғастыруға болады. Көп рет пайдаланғаннан кейін немесе жоғары дозада қолданудан кенйін емшек емізуді жалғастыру ұсынылмайды.

Дәрілік заттың көлік құралын немесе қауіптілігі зор механизмдерді басқару қабілетіне ықпал ету ерекшеліктері

Бас айналу немесе құрысулар туындауы мүмкін болғандықтан, автокөлікті басқару немесе техниканы пайдалану кезінде сақтық шарасын қадағалау керек.

Симптомдары: елестеулермен және параноидты мінез-құлықпен қатар жүретін препараттың жағымсыз әсерлерінің күшеюі.

Емі – симптоматикалық (соның ішінде демеуші шаралар және асқазанды шаю).

Интафлю, негізінен, несеппен шығарылады, сондықтан жеделдетілген диурез препараттың шығарылуын жеделдете алады.

Гемодиализдің 3 сағатқа созылатын сеансы плазмадағы Интафлю деңгейін шамамен 50 % төмендетеді.

Шығарылу түрі және қаптамасы

100 мл препараттан қорғаныш пластик қалпақшасы және құтының төменгі бөлігіндегі тұтқа-сақинасы бар тығыздығы төмен полиэтиленнен жасалған пластик құтыға құйылады.

Құтыға өздігінен желімденетін заттаңба жапсырылған.

1 құтыдан медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынған.

Құрғақ, жарықтан қорғалған жерде 25 С-ден аспайтын температурада сақтау керек. Мұздатып қатыруға болмайды.

Балалардың қолы жетпейтін жерде сақтау керек!

2 жыл

Қаптамасында көрсетілген жарамдылық мерзімі өткеннен кейін қолдануға болмайды

Рецепт арқылы

Amanta Healthcare Ltd

Plot No: 876, N.H. No: 8, Hariala, Kheda – 387 411, Gujarat, Үндістан

Inter Pharma, Үндістан

Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы және мекенжайы:

«КазЕвроФарм» ЖШС

050000, Қазақстан Республикасы, Алматы қ., Құрманғазы к-сі, 48а, 9-кеңсе

тел./факс: +7 (727) 2615141, 2614466

электронды поштасы: registration1@kazeuropharm.com