Инсуприд (1 мг)

Инсуприд

Глимепирид

1 мг, 2 мг, 3 мг, 4 мг таблеткалар

Бір таблетканың құрамында

белсенді зат - 1 мг, 2 мг, 3 мг немесе 4 мг глимепирид,

қосымша заттар: микрокристалды целлюлоза, лактоза моногидраты, натрий кроскармеллозасы, натрий крахмал гликоляты (А типі), повидон, магний стеараты.

Екі жағында да сызығы бар ұзынша пішінді ақ немесе ақ дерлік түсті таблеткалар.

Қант диабетін емдеуге арналған дәрілер. Ішу арқылы қабылдауға арналған қантты төмендететін препараттар. Сульфонилмочевина туындылары. Глимепирид.

АТХ коды А10ВВ12

Фармакокинетикасы

Глимепиридті бір рет және көп рет қабылдау кезінде алынған деректерді салыстырғанда, фармакокинетика параметрлерінің сенімді айырмашылықтары анықталмаған, ал әртүрлі пациенттер арасындағы ауытқушылығы өте төмен болды. Препараттың елеулі жиналуы болмаған.

Сіңуі

Глимепиридті ішке қабылдағанда оның биожетімділігі толық болады. Ас ішу, сіңірілу жылдамдығының мардымсыз баяулауын қоспағанда, сіңуіне елеулі ықпалын тигізбейді. Тәуліктік 4 мг дозада глимепиридті көп рет қабылдағанда қан сарысуында ең жоғары концентрациясына шамамен 2,5 сағаттан соң жетіп, 309 нг/мл құрайды, доза мен ең жоғары концентрациясы арасында, сондай-ақ доза және AUC (концентрация-уақыт қисығы астындағы аудан) арасында дозаға байланысты қатынас бар.

Таралуы

Глимепиридке шамамен альбуминнің таралу көлеміне тең өте төмен таралу көлемі, плазма ақуыздарымен жоғары байланысу дәрежесі (99%-дан астам) және төмен клиренс (48 мл/мин жуық) тән.

Жануарларға жүргізілген зерттеулерде глимепирид емшек сүтіне өтеді. Плацентарлық бөгет арқылы өтеді. Гематоэнцефалдық бөгет арқылы нашар өтеді.

Биотрансформациясы және шығарылуы

Көп реттік дозалау режиміне сәйкес келетін сарысудағы препараттың плазмалық концентрацияларында жартылай шығарылу кезеңі 5-8 сағат құрайды. Жоғары дозаларын қабылдаудан кейін жартылай шығарылу кезеңі біршама ұзарады. Глимепирид дозасын бір рет ішке қабылдаудан кейін несеппен 58% және нәжіспен 35% шығарылады. Несептен өзгермеген зат табылмаған. Несептен және нәжістен бауырдағы метаболизм нәтижесінде түзілетін белсенді емес екі метаболит анықталады, олардың біреуі - гидрокситуынды, ал екіншісі - карбокситуынды. Глимепиридті ішке қабылдаудан кейін осы метаболиттердің терминалдық жартылай шығарылу кезеңі, тиісінше, 3-6 және 5-6 сағат құрайды.

Ерекше клиникалық жағдайлардағы фармакокинетикасы

Фармакокинетика параметрлері әр алуан жас топтарындағы әртүрлі жыныс пациенттерінде ұқсас. Бүйрек функциясының бұзылулары бар (КК төмен) пациенттерде глимепирид клиренсінің арту және оның қан сарысуындағы орташа концентрацияларының төмендеу үрдісі байқалады, зор ықтималдықпен, бұл оның ақуыздармен төменірек байланысуы салдарынан препараттың жылдамырақ шығарылу себебінен болады. Осылайша, пациенттердің осы санатында глимепиридтің қосымша жинақталу қаупі болмайды.

Фармакодинамикасы

Инсуприд - ішуге арналған гипогликемиялық препарат - ІІІ буынның сульфонилмочевина туындысы.

Инсупридтің белсенді заты - глимепирид, ең алдымен, ұйқы безінің β-жасушаларынан инсулиннің босап шығуын көтермелеу есебінен қанда глюкоза концентрациясын төмендетеді. Оның әсері көбінесе ұйқы безінің β-жасушаларының глюкозамен физиологиялық көтермеленуге жауап беру қабілетін жақсартумен байланысты. Глибенкламидпен салыстырғанда, глимепирид төмен дозаларда қандағы глюкоза концентрациясының шамамен бірдей төмендеуіне жеткенде инсулиннің аз мөлшерінің босап шығуын туындатады. Бұл дерек глимепиридте экстрапанкреатиндік гипогликемиялық әсерлердің (тіндердің инсулинге сезімталдығының жоғарылауы және инсулиномиметикалық әсер) болу пайдасын айғақтайды.

Инсулин секрециясы. Басқа да сульфонилмочевина туындылары сияқты, глимепирид β-жасушалар жарғақшаларында аденозинтрифосфатқа сезімтал (АТФ-сезімтал) калий өзекшелерімен өзара әрекеттесу есебінен инсулин секрециясын реттейді. Басқа сульфонилмочевина туындыларынан ерекшелігі, глимепирид ұйқы безінің β-жасушалар жарғақшаларында болатын молекулалық массасы 65 килодальтон ақуызбен байланысады. Глимепиридтің осы өзімен байланысатын ақуызбен өзара әрекеттесуі АТФ-сезімтал калий өзекшелерінің ашылуын немесе жабылуын реттейді.

Глимепирид калий өзекшелерін жабады. Бұл β-жасушалар деполяризациясын тудырып, вольтаж-сезімтал кальций өзекшелерінің ашылуына және кальцийдің жасуша ішіне түсуіне алып келеді. Нәтижесінде кальцийдің жасушаішілік концентрациясының артуы инсулин секрециясын экзоцитоз арқылы белсенділендіреді.

Глибенкламидке қарағанда, глимепирид жылдамырақ және, тиісінше, жиірек байланысқа түсіп, өзімен байланысатын ақуызбен байланыстан босап шығады. Глимепиридтің өзімен байланысатын ақуызбен жоғары жылдамдықта алмасатын қасиеті оның β-жасушаларды глюкозаға айқын сенсибилизациялау әсеріне және олардың десенсибилизацияланудан және мерзімінен бұрын сарқылудан қорғануына себеп болады.

Тіндердің инсулинге сезімталдығының жоғарылау әсері. Глимепирид глюкозаның шеткері тіндерге сіңірілуіне инсулиннің әсерлерін күшейтеді.

Инсулиномиметикалық әсері. Глимепирид глюкозаның шеткері тіндерге сіңірілуіне және бауырдан глюкозаның шағарылуына инсулиннің әсер етуіне ұқсас әсерлерге иелік етеді.

Глюкозаның шеткері тіндерге сіңірілуі бұлшықет жасушаларының және адипоциттердің ішіне оның тасымалдану жолымен жүзеге асады. Глимепирид бұлшықет жасушаларының және адипоциттердің плазмалық жарғақшаларына глюкозаны тасымалдайтын молекулалар санын бірден көбейтеді.

Глюкозаның жасушалар ішіне көп түсуі гликозилфосфатидилинозитол- спецификалық С фосфолипазаның белсенділенуіне әкеледі. Соның нәтижесінде жасуша ішінде кальций концентрациясы төмендеп, протеинкиназа А белсенділігінің азаюын туындатады, бұл өз кезегінде глюкоза метаболизмінің көтермеленуіне әкеледі.

Глимепирид глюконеогенезді тежейтін фруктоза-2,6-бисфосфат концентрациясының артуы есебінен бауырдан глюкозаның шығарылуын тежейді.

Тромбоциттер агрегациясына әсері және атеросклероз түйіндақтарының түзілуі. Глимепирид тромбоциттер агрегациясын in vitro және in vivo азайтады. Бұл әсері, көрінісіне қарай, тромбоциттер агрегациясының маңызды эндогенді факторы - тромбоксан А түзілуіне жауап беретін циклооксигеназаның селективті тежелісімен байланысты.

Антиатерогенді әсері. Глимепирид липидтер мөлшерінің қалыпқа түсуіне ықпал етеді, қандағы малон альдегиді деңгейін төмендетеді, бұл липидтердің асқын тотықты тотығуының едәуір төмендеуіне әкеледі.

2 типті қант диабеті бар пациенттерде тұрақты болатын тотығудан болатын стресс айқындылығының төмендеуі. Глимепирид эндогенді α-токоферол деңгейін, каталаза, глютатионпероксидаза және супероксиддисмутаза деңгейін арттырады.

Жүрек-қантамыр әсерлері. Сульфонилмочевина туындылары АТФ-сезімтал калий өзекшелері арқылы жүрек-қантамыр жүйесіне де әсерін көрсетеді. Дәстүрлі сульфонилмочевина туындыларымен салыстырғанда, глимепирид жүрек-қантамыр жүйесіне нақты аз әсерін көрсетеді. Ол тромбоциттер агрегациясын төмендетеді және атеросклероз түйіндақтарының елеулі азаюына әкеледі.

Дені сау еріктілерде глимепиридтің ең тиімді дозасы 0,6 мг құрайды. Глимепирид әсері дозаға тәуелді және ұдайы жаңғыру сипатында болады. Глимепирид қабылдағанда дене жүктемесіне физиологиялық реакция (инсулин секрециясының төмендеуі) сақталады.

Препараттың тамақтанудан 30 минут бұрын немесе тамақтану алдында қабылданғанына қарай әсер ету сипатында нақты айырмашылықтар жоқ. Қант диабеті бар пациенттерде препаратты бір рет қабылдағанда 24 сағат ішінде жеткілікті метаболизмдік бақылауға жетуге болады. Оның үстіне, клиникалық зерттеуде бүйрек жеткіліксіздігі бар (креатинин клиренсі (КК) 4-79 мл/мин) 16 пациенттің 12-де де жеткілікті метаболизмдік бақылауға жетуге болады.

Метформинмен біріктірілген ем. Глимепиридтің ең жоғары дозасын қолданғанда жеткілікті метаболизмдік бақылауға жете алмайтын пациенттерде глимепиридпен және метформинмен біріктірілген емді бастауға болады. Екі зерттеуде де біріктірілген ем жүргізілгенде осы препараттардың әрқайсысымен бөлек емдеу кезіндегі осындаймен салыстырғанда метаболизмдік бақылаудың жақсаруы дәлелденген.

Инсулинмен біріктірілген ем. Глимепиридті ең жоғары дозаларда қабылдағанда метаболизмдік бақылауға жетуі жеткіліксіз пациенттерде инсулинмен бір мезгілде емдеуді тағайындауға болады. Екі зерттеудің де нәтижелері бойынша осы біріктірілімді қолданғанда тек инсулиннің өзін қолдану кезіндегі сияқты, метаболизмдік бақылаудың жақсаруына жетуге болады. Алайда, біріктірілген емде инсулиннің төмендеу дозасы қажет болады.

- тек диета, дене жаттығулары немесе дене салмағын азайту көмегімен талапқа сай бақылау мүмкін болмайтын жағдайда 2 типті қант диабетінде (монотерапияда немесе метформинмен немесе инсулинмен біріктірілген ем құрамында)

Инсуприд - ішке қабылдауға арналған таблеткалар.

Таблеткаларды жеткілікті (1-2 стақанға жуық) сұйықтық мөлшерімен ішіп, шайнамай, бүтіндей қабылдау керек.

Глимепирид дозасы қандағы және несептегі глюкоза мөлшерін талдау нәтижелері бойынша белгіленеді. Препаратты қажетті метаболизмдік бақылауға жетуге қажетті ең төмен дозада қолдану керек.

Препаратпен емделу кезінде қандағы глюкоза деңгейін жүйелі анықтау қажет. Бұдан бөлек, гликозилденген гемоглобин деңгейін жүйелі бақылау ұсынылады.

Препаратты қабылдаудың бұзылуын, мысалы, кезекті дозаны қабылдауды өткізіп алуды кейіннен препаратты аса жоғары дозада қабылдау арқылы толықтыруға болмайды.

Дәрігер пациентке препарат қабылдауда қателіктер орын алғанда (атап айтқанда, кезекті доза қабылдауды өткізіп алғанда немесе ас ішу уақыты өтіп кеткенде) немесе препаратты қабылдау мүмкіндігі жоқ жағдайларда қабылдау керек болатын әсерлер туралы алдын ала нұсқау беруі тиіс.

Инсуприд препаратының бастапқы дозасы тәулігіне 1 рет 1 мг құрайды. Қажет болса, тәуліктік дозаны қандағы глюкоза мөлшерін жүйелі бақылаумен (1-2 апталық аралықтармен) және тәулігіне 1 мг-2 мг-3 мг-4 мг-6 мг тәртібінде біртіндеп арттыруға болады.

2 типті қант диабеті жақсы бақыланатын пациенттерде препараттың күнделікті дозасы, әдетте, 1-4 мг құрайды. Күнделікті 6 мг-ден көп дозасы пациенттердің шағын санында ғана едәуір тиімді болады.

Препаратты қабылдау уақыты мен жиілігін дәрігер пациенттің өмір салтын (ас ішу уақыты, дене жүктемелерінің саны) ескере отырып, белгілейді. Тәуліктік доза бір қабылдауға, әдетте, тура толыққанды таңғы ас алдында немесе, егер тәуліктік дозасы қабылданбаған болса, тура алғашқы негізгі ас ішу алдында тағайындалады. Таблеткалар қабылдаудан кейін тамақтану уақытын өткізіп алмау өте маңызды.

Метаболизмдік бақылаудың жақсаруы инсулинге сезімталдықтың жоғарылауымен астасатындықтан емдеу барысында глимепиридті қажетсіну төмендеуі мүмкін. Гипогликемия дамуынан сақтану үшін, дозаны дер кезінде азайту немесе Инсуприд препаратын қабылдауды тоқтату қажет. Дене салмағының немесе өмір салтының өзгеруі, сондай-ақ гипо- немесе гипергликемияның даму қаупінің артуына ықпал ететін басқа факторлар жағдайында дозаны түзету де қажет болуы мүмкін.

Егер пациентте тәулігіне бір рет 1 мг глимепирид қабылдау аясында гипогликемиялық реакция дамыса, бұл осы пациентте ауруды бақылау үшін тек тиісті диета жеткілікті болуы мүмкін екенін айғақтайды.

Глимепиридпен емделу әдетте ұзақ уақыт жүргізіледі.

Пациентті басқа ішуге арналған гипогликемиялық препараттан Инсупридке ауыстыру

Науқасты диабетке қарсы басқа дәрілерден Инсупридке ауыстыруға болады. Осының алдындағы гипогликемиялық дәрінің әсер ету қарқындылығы мен ұзақтығын ескеру қажет. Кейбір жағдайларда, әсіресе, жартылай шығарылу кезеңі ұзаққа созылатын дәрілерді (мысалы, хлорпропамид) қолданғанда емдеуде үзіліс жасап, гипогликемияның даму қаупін арттыратын аддитивті әсерден сақтану қажет болуы мүмкін.

Диабетке қарсы басқа препараттардан Инсупридке ауысқанда соңғысының ұсынылатын бастапқы тәуліктік дозасы 1 мг құрайды (тіпті егер пациентті басқа ішуге арналған гипогликемиялық препараттың ең жоғары дозасынан Инсупридке ауыстырған жағдайда да). Жоғарыда берілген нұсқауларға сәйкес, препарат дозасын кез келген арттыруды глимепиридке берілген жауапты ескерумен сатылы жүргізген жөн.

Пациентті инсулиннен Инсупридке ауыстыру

Айрықша жағдайларда пациенттерді инсулиннен Инсупридке ауыстыру көрсетілуі мүмкін. Бұл үдеріс дәрігерлік бақылаумен жүргізілуі тиіс.

Бүйрек және бауыр жеткіліксіздігінде қолдану

Бүйрек және бауыр жеткіліксіздігі ауыр пациенттерде препаратты қолдану деректері шектеулі. Бұл жағдайда пациентті инсулинге көшіру ұсынылады.

Төменде пайдаланылған жағымсыз әсерлер жиілігінің параметрлері келесі үлгіде белгіленген: сирек (≥ 1/10000-нан < 1/1000 дейін); өте сирек (< 1/10 000), жиілігі белгісіз.

Сирек (≥ 1/10000-нан < 1/1000 дейін)

- препарат қабылдауды тоқтатқанда әдеттегі қайтымды болатын тромбоцитопения, лейкопения, гранулоцитопения, агранулоцитоз, эритропения, гемолиздік анемия және панцитопения

- гипогликемия*

Өте сирек (< 1/10000)

- лейкоцитопласттық васкулит, артериялық қысымның түсіп кетуімен, диспноэ және кейде анафилаксиялық шокпен қатар жүретін өмірге қатерлі жай-күйлерге дейін үдеуі мүмкін аса жоғары сезімталдықтың орташа білінетін реакциялары

- жүрек айну, құсу, диарея, іштегі қысым, ауырлық немесе жайсыздануды сезіну, сирек жағдайларда емдеуді тоқтатуға әкелетін іштің ауырулары

- қанда натрий концентрациясының төмендеуі

- аномальді бауыр функциясы (мысалы, холестаз немесе өт құйылып кетуі), гепатит және бауыр жеткіліксіздігі

Жиілігі белгісіз

- әсіресе, емдеудің басында глюкоза концентрациясының өзгеру себебінен болатын көру қабілетінің уақытша бұзылуын байқауға болады

- бауыр ферменттері деңгейлерінің жоғарылауы

- тромбоциттер саны 10 000/мкл-ден аз ауыр тромбоцитопения, тромбоцитопениялық пурпура

- сульфонилмочевина туындыларымен, сульфаниламидтермен немесе тектес заттармен айқаспалы аллергенділік дамуы мүмкін

- қышыну, есекжем, жарыққа сезімталдық түрінде көрініс беретін терінің аса жоғары сезімталдық реакциясы

* - Бұл реакциялар, ең алдымен, препарат қабылдаудан кейін тез арада туындайды, қауіпті бола түсуі мүмкін, ал оларды оңай басудың сәті үнемі түсе бермейді. Осындай реакциялар туындауы, гипогликемиялық емнің басқа түрлері жағдайындағы сияқты, тамақтану дағдылары және препараттың дозалануы сияқты бірқатар жеке факторларға байланысты.

- глимепиридке немесе препараттың қандай да бір компонентіне, сульфонилмочевинаның басқа туындыларына, сульфаниламидті препараттарға жоғары сезімталдық

- 1 типті қант диабеті (инсулинге тәуелді)

- диабеттік кетоацидоз, диабеттік прекома және кома

- бауыр және бүйрек функциясының ауыр бұзылулары

- жүктілік және лактация кезеңі

- балалар және 18 жасқа дейінгі жасөспірімдерге (клиникалық қолдану тәжірибесінің болмауы)

Глимепиридті метформинмен және инсулинмен қолдану аясында бірқатар жағдайларда қандағы глюкоза деңгейлерінің төмендеу әсерінің күшеюін және тиісінше гипогликемияның дамуын байқауға болады.

Метформинмен біріктіріп қолдану

Глимепирид немесе метформинді ең жоғары тәуліктік дозаларда қабылдағанда қант диабеті жеткіліксіз бақыланатын пациенттерде осы екі препараттың біріктірілімімен емдеуді бастауға болады. Бұл орайда, бұрын жүргізілген не глимепиридпен, не метформинмен емдеу сол дозаларда жалғасады, ал метформин мен глимепиридті қосымша қабылдау төмен дозадан басталады, ол артынан мақсатты метаболизмдік бақылау деңгейіне қарай ең жоғары тәуліктік дозаға дейін титрленеді. Біріктірілген емді қатаң медициналық қадағалаумен бастау керек.

Инсулинмен біріктіріп қолдану

Глимепиридті ең жоғары дозада қабылдағанда қант диабетінің бақылануы жеткіліксіз пациенттерге бір мезгілде инсулин тағайындауға болады. Бұл жағдайда науқасқа соңғы тағайындалған глимепирид дозасы өзгеріссіз күйде қалады. Осы орайда инсулинмен емдеу төмен дозадан басталып, қандағы глюкоза концентрациясын бақылаумен біртіндеп арттырылады. Біріктірілген ем мұқият медициналық қадағалаумен жүргізіледі. Гликемияны ұзақ уақыт бақылау сақталғанда осы біріктірілген ем инсулин қажеттілігін 40% дерлік төмендетуі мүмкін.

Глимепирид P4502C9 цитохромымен метаболизденеді, ол индукторлармен (мысалы, рифампицин) немесе тежегіштермен (мысалы, флуконазол) бір мезгілде қолданғанда ескерілуі тиіс.

Әдебиетте жарияланған in vivo өзара әрекеттесу нәтижелері CYP2C9 ең қуатты тежегіштерінің бірі – флуконазолдың глимепирид AUC мәнін шамамен 2 есе арттыратынын көрсетеді.

Гипогликемиялық әсер күшеюін және сонымен байланысты гипогликемияның даму мүмкіндігін глимепиридті ангиотензин өзгертуші фермент тежегіштерімен, аллопуринол, анаболиялық стероидтар және ерлердің жыныс гормондарымен, хлорамфеникол, кумарин туындыларымен, цикло-, тро- және изофосфамидтермен, фенфлурамин, фибраттармен, флуоксетин, симпатолитиктермен (гуанетидин), моноаминоксидаза тежегіштерімен, миконазол, флуконазол, пентоксифиллин (жоғары дозаларда парентеральді енгізілгенде), фенилбутазон, азапропазон, оксифенбутазон, пробенецид, хинолондармен, салицилаттармен және аминосалицил қышқылымен, сульфинпиразон, ұзақ әсер ететін кейбір сульфаниламидтермен, тетрациклиндермен, тритоквалинмен бір мезгілде қолданғанда байқауға болады.

Гипогликемиялық әсер әлсіреуін және сонымен байланысты қандағы глюкоза концентрациясының жоғарылауын глимепиридті ацетазоламид, барбитураттармен, глюкокортикостероидтармен, диазоксид, салуретиктермен, тиазидті диуретиктермен, эпинефрин және басқа симпатомиметикалық дәрілермен, глюкагон, іш жүргізетін дәрілермен (ұзақ уақыт қолданғанда), никотин қышқылымен (жоғары дозаларда) және никотин қышқылы туындыларымен, эстрогендермен және прогестогендермен, фенотиазиндермен, хлорпромазин, фенитоин, рифампицин, қалқанща без гормондарымен, литий тұздарымен бір мезгілде қолданғанда байқауға болады.

H2-рецепторлар блокаторлары, клонидин және резерпин глимепиридтің гипогликемиялық әсерін күшейтуге де, әлсіретуге де қабілетті.

Глимепирид қабылдау аясында кумарин туындылары әсерінің күшеюін немесе әлсіреуін байқауға болады

Бір рет немесе ұзақ уақыт алкоголь тұтыну глимепиридтің гипогликемиялық әсерін күшейте де, әлсірете де алады.

Колесевелам глимепиридпен байланысады және асқазан-ішек жолынан глимепирид сіңірілуін азайтады. Колесевелам қабылдаудан, кем дегенде, 4 сағат бұрын глимепирид қабылдау кезінде өзара әрекеттесуі байқалмаған. Сондықтан, глимепиридті колесевелам қабылдаудан, кем дегенде, 4 сағат бұрын қабылдау керек.

Егер тамақ жүйесіз уақыт аралықтары өткенде ішілсе немесе ас ішу уақыты мүлде өтіп кетсе глимепиридпен ем қабылдайтын пациентте гипогликемия дамуы мүмкін. Гипогликемияның болжамды симптомдарына: бас ауыру, қатты ашығу сезімі, жүрек айну, құсу, шаршау сезімі, ұйқышылдық, ұйқының бұзылуы, мазасыздық, озбырлық, зейін қою мен реакцияның бұзылуы, депрессия, сананың шатасуы, сөйлеу және көру қабілетінің бұзылыстары, афазия, тремор, парез, сенсорлы бұзылулар, бас айналу, шарасыздық сезімі, өзін-өзі бақылай алмау, делирий, церебральді құрысулар, сананың шатасуы және жоғалуы, комаға түсіп кету күйін қоса, үстірт дем алу және брадикардия жатады. Бұдан бөлек, кері байланыс типі бойынша адренергиялық механизм нәтижесінде суық, жабысқақ тер, мазасыздық, тахикардия, артериялық гипертензия, жүректің жиі соғуы, стенокардия және жүрек ырғағының бұзылуы сияқты симптомдар туындауы мүмкін.

Сульфонилмочевинаның басқа туындыларын қолдану тәжірибесі, тіпті қабылданатын шаралардың бастапқы сәттілігіне қарамастан, гипогликемияның қайта дамуы мүмкін екенін көрсетеді.

Әдеттегі қант мөлшерін қабылдаумен уақытша ғана бақыланатын ауыр немесе ұзаққа созылатын гипогликемия шұғыл медициналық жәрдем көрсетуді немесе тіпті ауруханаға жатқызуды талап етеді.

Гипогликемияның дамуына ықпал ететін факторларға:

• пациенттің денсаулық сақтау қызметкерімен ынтымақтасуға құлықсыздығы (егде жастағы науқастарда жиірек) немесе қабілетсіздігі

• жеткіліксіз тамақтану, жүйесіз тамақтану, ас ішу уақыттарын өткізіп алу немесе ашығу кезеңдері

• диетаның өзгеруі

• дене жүктемелері мен көмірсу тұтыну арасында теңгерімнің болмауы

• алкоголь тұтыну, әсіресе ас ішу уақытын өткізіп алумен біріккен

• бүйрек функциясының бұзылулары

• бауыр функциясының күрделі бұзылулары

• Инсупридтің артық дозалануы

• көмірсу алмасуына немесе гипогликемияны бақылауды реттеуге ықпал ететін эндокриндік жүйе тарапынан болатын кейбір компенсацияланбаған бұзылулар (мысалы, қалқанша без функциясының белгілі бір бұзылуларындағы және аденогипофиз немесе бүйрек үсті бездері қыртысы жеткіліксіздігіндегі сияқты);

• кейбір басқа дәрілік препараттарды бір мезгілде қолдану («Дәрілермен өзара әрекеттесуі» бөлімін қараңыз) жатады.

Глимепиридпен емдеу қандағы және несептегі глюкоза концентрациясына жүйелі мониторинг өткізуді талап етеді. Бұдан бөлек, гликозилденген гемоглобин деңгейін анықтау ұсынылады.

Глимепиридпен емдеу кезінде бауыр функциясына жүйелі тексерулер өткізу және қанның пішінді элементтерін (әсіресе, лейкоциттер және тромбоциттер) есептеу қажет.

Cтресс күйлерінде (мысалы, жазатайым жағдайлардан, шұғыл операциялардан, қызбамен өтетін инфекциялардан кейін) инсулинге уақытша ауыстыруға болады.

Глюкоза-6-фосфат-дегидрогеназа тапшылығы бар пациенттерде сульфонилмочевина туындыларымен емдеу гемолиздік анемияға әкелуі мүмкін. Глимепирид сульфонилмочевина туындылары класына жататындықтан, оны глюкоза-6-фосфат-дегидрогеназа тапшылығы бар пациенттерде абайлап қолдану керек. Бұдан бөлек, құрамында сульфонилмочевина туындылары жоқ баламалы дәрілермен емдеу нұсқаларын қарастыру керек.

Инсуприд препаратында лактоза моногидраты бар, сондықтан оны тұқым қуалайтын лактоза жақпаушылығы, лактаза тапшылығы немесе глюкоза-галактоза сіңуінің бұзылуы бар пациенттерге қабылдауға болмайды.

Дәрілік заттың көлік құралын және қауіптілігі зор механизмдерді басқару қабілетіне әсер ету ерекшеліктері

Глимепиридтің автокөлік және механизмдерді басқару қабілетіне әсер ету зерттеулері жүргізілмеген. Гипогликемия немесе гипергликемияның дамуы нәтижесінде пациент реакциясы немесе зейін қою қабілеті төмендеуі мүмкін.

Пациенттерді көлік жүргізу кезінде гипогликемияны болдырмау үшін алдын ала сақтану шараларын қабылдау қажеттілігінен хабардар ету керек.

Симптомдары: шамадан артық дозасын ішке қабылдаудан кейін бастапқы сауығудан кейін қайталануы мүмкін 12-ден 72 сағатқа дейін созылатын гипогликемия дамуы мүмкін. Гипогликемия симптомдары қабылдаудан кейін 24 сағатқа дейінгі уақыт кезеңі ішінде болмауы мүмкін. Әдетте стационарда қадағалау ұсынылады. Пациентте жүрек айну, құсу және эпигастрий аумағының ауыруы сияқты симптомдарды байқауға болады. Бұдан бөлек, гипогликемия көбіне қозу күйі, тремор, көру қабілетінің бұзылулары, қозғалыс үйлесімінің кінәраттары, коматозды жағдай және құрысулар сияқты бірқатар неврологиялық симптомдармен қатар жүреді.

Емі: ең алдымен, құстырып алып, содан соң су немесе лимонадты белсендірілген көмірмен (адсорбент) және натрий сульфатымен (іш жүргізгіш) ішу арқылы сіңуіне жол бермеумен жүзеге асады. Препаратты көп мөлшерде ішке қабылдаған жағдайда асқазанды шайып, одан кейін белсендірілген көмір және натрий сульфатын қабылдау көрсетілген. Қатты (ауыр) артық дозалану жағдайында ауруханаға қарқынды ем бөліміне жатқызу көрсетілген. Пациентке мүмкіндігінше тезірек глюкоза енгізуді бастау керек: қажет болса, 50 мл 50% ерітіндіні вена ішіне болюстік инъекциялау арқылы қандағы глюкоза деңгейлерін мұқият бақылаумен 10% ерітіндіні инфузиялауға ұластыру. Әріқарай симптоматикалық ем тағайындалады.

Емшектегі нәрестелер немесе кіші жастағы балалардың, атап айтқанда, глимепиридті кездейсоқ қабылдап қоюынан болатын гипогликемияны емдеуде қауіпті гипергликемияның даму мүмкіндігіне жол бермеу үшін енгізілетін глюкоза дозасын мұқият бақылап отыру қажет. Қандағы глюкоза деңгейлеріне үздіксіз мониторинг қажет.

Шығарылу түрі және қаптамасы

ПВХ/ПВДХ үлбірінен және алюминий фольгадан жасалған пішінді ұяшықты қаптамаға 15 таблеткадан салады.

25°С-ден аспайтын температурада сақтау керек.

Балалардың қолы жетпейтін жерде сақтау керек!

3 жыл

Қаптамасында көрсетілген жарамдылық мерзімі өткеннен кейін қолдануға болмайды.

Рецепт арқылы

Өндіруші

Уорлд Медицин Илач Сан. Ве Тидж А. Ш., Түркия

Инсуфар Лабораторис Илачлары Лимитед Ширкети, Түркия

Қазақстан Республикасы аумағында тұтынушылардан өнім сапасына қатысты шағымдар қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның мекенжайы:

«TROKA-S pharma» ЖШС, Алматы қ., Сүйінбай даңғылы 222 б (24/7 форматында қолжетімді), ұялы тел.: 8 701 786 33 98 pvpharma@worldmedicine.kz