ИЗО-МИК (спрей 1,25 мг/доза)
Инструкция
-
русский
-
қазақша
Саудалық атауы
ИЗО-МИК
Халықаралық патенттелмеген атауы
Изосорбид динитраты
Дәрілік түрі
Дозаланған тіл астылық спрей, 1,25мг/доза
Құрамы
1 құтының ішінде
белсенді зат – 100% изосорбид динитратына шаққанда сулы изосорбид динитраты 0.375 г
қосымша заттар - полиэтиленоксид-400, 96% этил спирті.
Сипаттамасы
Спирт иісі бар түссіз мөлдір сұйықтық
Фармакотерапиялық тобы
Жүрек ауруларын емдеуге арналған препараттар. Жүрек ауруларын емдеуге арналған вазодилататорлар. Органикалық нитраттар. Изосорбид динитраты.
АТХ коды СО1D А 08
Фармакологиялық қасиеттері
Фармакокинетикасы
Ауыз қуысына шашыратқан кезде препарат жылдам сіңеді және 2-5 минут өткенде гемодинамикалық және антиангинальды әсер ете бастайды (яғни қабылдаудан кейін 2-5 минут өткеннен кейін стенокардия ұстамасының басылғаны байқалады). Қан плазмасындағы белсенді заттың ең жоғарғы концентрациясына 5-6 минут өткенде жетеді. ИЗО-МИК препаратын бүркуден кейінгі ең жоғарғы әсері 10-15-ші минутта басталады. Изосорбид динитраты жартылай шығарылу кезеңі 5 сағатты құрайтын белсенді метаболит изосорбид-5-мононитратын, сондай-ақ жартылай шығарылу кезеңі 2,5 сағатты құрайтын изосорбид-2-мононитратын түзе отырып метаболизденеді. Препаратты сублингвальді қолданған кезде изосорбид динитратының жартылай шығарылу кезеңі 1 сағатты құрайды. Жартылай шығарылу кезеңі препаратты курстық түрде қолданған кезде ұзаруы мүмкін. Енгізілген бір реттік дозаның 80-нен 100% -ға дейіні негізінен метаболиттер түрінде 24 сағаттың ішінде несеппен шығарылады.
ИЗО-МИКті қолданған кезде стенокардия ұстамасы 2-3 минут ішінде басылады, әсері 1 сағатқа жуық созылады.
Фармакодинамикасы
ИЗО-МИК – көктамырларға басым әсер ететін шеткергі вазодилататор. Препараттың емдік әсерінің ұзақтығы 60-120 минутты құрайды. Бұл - қысқа әсер ететін дәрілік түр. Препараттың әсері жүрекке алдыңғы жүктеменің (шеткергі көктамырлардың кеңеюі және оң жақ жүрекшеге қан келуінің азаюы) және кейінгі жүктеменің (қантамырлар кедергісінің жалпы кезеңінің азаюы) азаюы есебінен миокардтың оттегіні қажетсінуінің төмендеуімен, сондай-ақ тікелей жүрек қантамырларын кеңейтетін әсерімен байланысты. Қанмен жабдықталуы төмендеген бөліктерде коронарлық қан ағысының қайта таралуына ықпал етеді. Препаратты қолданған кезде стенокардиясы бар науқастарда дене жүктемелеріне төзімділіктің жоғарылағаны байқалады. Жүрек жеткіліксіздігі кезінде препарат алдыңғы жүктеменің азаюы есебінен миокард жұмысының жеңілдеуіне ықпал етеді. Кіші қан айналымы шеңберінде қысымды төмендетеді.
Қолданылуы
- стенокардия ұстамаларын басуда және алдын алуда
- жедел миокард инфарктісінде
- жедел сол жақ қарыншалық жеткіліксіздікте
Қолдану тәсілі мен дозалары
Көлемі 0,05 мл препараттың бір дозасының ( бір бүрку) құрамында 1,25 мг изосорбид динитраты бар. Препаратты тілдің астына шашыратады. Дем алмау керек! Стенокардия ұстамаларын басу үшін немесе ұстаманы қоздыруы мүмкін эмоциональдық немесе дене жүктемесінің алдында жекелей ұсынымдар болмаған кезде спрейді 30 секундтық аралықпен 1-2 рет, мұрынмен тыныс ала отырып, бүрку керек. Жедел миокард инфарктісінде және жедел жүрек жеткіліксіздігінде 1-3 бүркуден бастайды. 5 минут ішінде әсері болмаса, дәрігердің бақылауымен шашыратуды қайталауға болады. Егер жақсару басталмаса, келесі 10 минут бойы артериялық қысымды қатаң бақылай отырып, шашыратуды қайталайды. Стенокардияның ұстамаларының алдын алу үшін препаратты әдетте тәулігіне 3-4 рет 1-2 бүрку түрінде тағайындайды. Емдеу ұзақтығы әр адамға жекелей анықталады. Нитраттарға едәуір жоғары қажеттілікте 10 немесе 20 мг ИЗО-МИК таблеткаларын қолдану ұсынылады.
Жағымсыз әсерлері
Жиі
-
көбіне препаратты әрі қарай қолданғанда бірнеше күннен кейін қайтатын бас ауыруы («нитраттық»)
-
бас айналуы, ұйқышылдық
-
ортостатикалық гипотензия (кейде брадикардиямен бірге)
-
стенокардияның ушығуы
Жиі емес
-
рефлекторлық тахикардия
-
астения
-
спрейді шашқан уақытта тілдің шымылдатып ашыту сезімі
-
жүрек айнуы, құсу
-
бет терісінің қызаруы және бөртпе сияқты терінің аллергиялық реакциялары
-
әлсіздік сезімі
-
ангионевротикалық ісіну, ысынулар
-
коллапс жағдайы, кейде брадикардиямен бірге, синкопе
Сирек
-
гипоксемия (біріншілік өкпе ауруы бар науқастарда төмен желдетілетін альвеолярлық аймаққа қан ағысының салыстырмалы түрде қайта таралуы есебінен)
-
шеткергі ісінулер
Өте сирек
-
қыжыл
-
Квинке ісінуі, Стивенс-Джонсон синдромы
Жекелеген жағдайларда
-
эксфолиативті дерматит
Белгісіз жиілікпен
-
гипотензия
Қолдануға болмайтын жағдайлар
-
нитратты қосылыстарға немесе препараттың басқа да компоненттеріне жоғары сезімталдық
-
жедел қантамырлық жеткіліксіздік (шок, қантамырлық коллапс)
-
айқын артериялық гипотензия (систолалық артериялық қысым 90 мм с. б. төмен, диастолалық – 60 мм с. б. төмен)
-
ауыр гиповолемия
-
кардиогенді шок
-
гипертрофиялық обструктивті кардиомиопатия
-
констриктивті перикардит, жүрек тампонадасы
-
ауыр анемия
-
бір мезгілде фосфодиэстераза-5 тежегіштерін (мысалы, силденафил, варденафил немесе тадалафил) қабылдау
-
18 жасқа дейінгі балалар және жасөспірімдер (препараттың тиімділігі және қауіпсіздігі анықталмаған)
Сақтықпен:
-
сол жақ қарынша жеткіліксіздігімен жедел миокард инфарктісінде
-
аорталық және / немесе митральды стенозда
-
ортостатикалық реакцияларға бейімділікте
-
бас сүйекішілік қысымның жоғарылауымен қатар жүретін аурулар, геморрагиялық инсульт, бас сүйегі-ми жарақаты
-
егде жас (65 жастан жоғары)
-
ауыр бүйрек жеткіліксіздігі және/немесе бауыр жеткіліксіздігі;
-
жабық бұрышты глаукома
Дәрілермен өзара әрекеттесуі
Басқа да вазодилататорларды, бета-адреноблокаторларды, диуретиктерді, «баяу» кальций өзекшелерінің блокаторларын, ангиотензин-өзгертуші фермент тежегіштерін, үш циклді антидепрессанттарды, нейролептиктерді, этанол және құрамында этанол бар дәрілерді, эректильді дисфункцияны емдеуге арналған дәрілік заттарды - фосфодиэстераза-5 тежегіштерін (силденафил, варденафил немесе тадалафил) бір мезгілде қолданған кезде гипотензивті әсері күшеюі мүмкін.
ИЗО-МИК препаратын дигидроэрготаминмен бір уақытта қабылдау қан плазмасында дигидроэрготамин концентрациясының артуына алып келуі және осылайша оның гипотензивті әсерін күшейтуі мүмкін.
Симпатомиметикалық дәрілерді (адреналин, эфедрин, норадреналин, нафтизин, мезатон, изадрин) бір мезгілде қолданғанда изосорбид динитратының антиангинальдық әсері төмендеуі мүмкін.
Айрықша нұсқаулар
Ми қан айналымының бұзылуы, аорталық және/немесе митральді стенозы бар емделушілерге; ортостатикалық гипотензияға бейім емделушілерге, артериялық қысымның төмендеуі аясында пайда болатын түрлі тамыр арналарында ишемия симптомдары бар науқастарды емдеуде сақтықпен қолданады. Емдеу кезеңінде, әсіресе дозаны біртіндеп арттырған жағдайда артериялық қысымды және жүректің жиырылу жиілігін бақылап отыру қажет. Жоғары дозаларды жиі қабылдау “нитраттық” төзімділіктің пайда болуына алып келуі мүмкін. Изосорбид динитратына төзімділікті жеңу үшін (нитраттарды тоқтату мүмкін болғанда) қабылдау жиілігін немесе препарат дозасын арттырмаған жөн, басқа антиангинальдық дәрілермен ауыстыра отырып, оны қабылдаудан 24-36 сағатқа кідіре тұру қажет және одан кейін әдеттегі дозада монотерапия түрінде немесе басқа дәрілермен үйлестіре отырып емдеуді қайта жалғастыру керек. Препаратты жүйелі түрде қабылдау кезінде үзілісті 4-6 апта сайын жасап отыру ұсынылады. Емдеудің бас кезінде пайда болатын “нитраттық” бас ауыруын дозаны біртіндеп арттыру немесе валидолды және есірткілік емес анальгетиктерді (ацетилсалицил қышқылы, парацетамол, анальгин, каптоприл) тағайындау арқылы болдырмауға болады. Препаратпен емдеу кезінде алкогольді тұтынудан бас тартқан жөн.
Органикалық нитраттарға жүрек айнуымен, құсумен, бозарумен, тершеңдікпен, жиі тыныс алумен қатар жүретін ауыр гипотензивтік реакциялардың дамуы жөнінде хабарланған.
Изосорбид динатраты спрейін қолданғанда төмен желдетілетін альвеолдардың бөлігіне қан ағысының салыстырмалы түрде қайта таралуына байланысты, уақытша гипоксемия байқалуы мүмкін. Жүрек қантамырлары жеткіліксіздігі бар емделушілерде бұл миокард гипоксиясына алып келуі мүмкін.
Педиатрияда қолдану
Препаратты педиатриялық практикада қолдану жөнінде зерттеулер жүргізілмеген.
Жүктілік пен лактация кезеңі
ИЗО-МИКті жүктілік пен лактация кезеңінде егер тек анасы үшін күтілетін пайда ұрық пен бала үшін күтілетін қауіптен артқан жағдайда ғана, және тек дәрігердің бақылауымен қолдануға болады.
Дәрілік заттың көлік құралын немесе қауіпті механизмдерді басқару қабілетіне әсер ету қауіптілігі
Емдеу кезеңінде көлік құралдарын басқаруға және басқа қауіпті жұмыс түрлерімен айналысуға болмайды, өйткені изосорбид динитратын жүйелі түрде қолданғанда зейін шоғырландыру қабілеті мен психомоторлық реакция жылдамдығы төмендейді.
Артық дозалануы
Симптомдары: реттелудің ортостатикалық бұзылулары мен рефлекторлық тахикардия. Осыған байланысты бас ауыруы, әлсіздік ұстамалары, бас айналуы, жүрек қағуы, гипертермия, құрысу, тері гиперемиясы, жүрек айнуы, құсу, бас сүйекішілік қысым көтерілуінің және естен айрылып қалу жағдайларының басталуын күтуге болады. Метгемоглобиннің түзілуі ықтимал, бұл тахипноэмен, үрей сезімімен, естен танумен, жүректің тоқтап қалуымен қатар жүруі мүмкін.
Емі: емдеу шараларын ең алдымен қан қысымын арттыруға бағыттау керек, жеңіл жағдайда емделушіні аяқтарын жоғары көтеріп, жатқызу жеткілікті. Едәуір күрделі жағдайларда, коллаптоидты жай-күйде, шокпен күресу шараларын жүргізу қажет. Айналымдағы қанның көлемін (қан алмастырғыштар немесе физиологиялық ерітінділер инфузиясы) қалпына келтіру керек; ауыр жағдайларда норадреналин және/немесе допамин инфузиясын жүргізуге болады. Метгемоглобин түзілген кезде - С витамині, 1 % метилен көкті, 1-2 мг/кг немесе толуидин - көкті көктамыр ішіне енгізу. Оксигенотерапия. Өкпені жасанды желдету, гемодиализ, егер қажет болса реанимациялық шаралар, қан плазмасы көлемін ұлғайту, шокқа қарсы ем.
Шығарылу түрі мен қаптамасы
15 мл препараттан қоңыр шыныдан жасалған құтыда. Құтылар бүріккіші бар дозалайтын механикалық сорғымен жабдықталған.
Әр құтыға өздігінен желімденетін заттаңба жапсырылады.
Әр құты бүріккішімен, сақтандырғыш қалпақшасымен және медицинада қолданылуы жөніндегі мемлекеттік және орыс тіліндегі нұсқаулықпен бірге өндірушінің спецификациясына сәйкес, тұтынушыларға арналған картоннан жасалған пәшкеге салынған.
Сақтау шарттары
30 оС –ден аспайтын температурада сақтау керек.
Балалардың қолы жетпейтін жерде сақтау керек!
Сақтау мерзімі
4 жыл
Жарамдылық мерзімі өткеннен кейін пайдалануға болмайды.
Дәріханалардан босатылу шарттары
Рецепт арқылы
Өндіруші
“Микрохим” ҒӨФ ЖШҚ
Украина, Луганск обл., Рубежный қ, Ленин к-сі, 33.
Тел./факс: (06453) 7-63-98
Тіркеу куәлігінің иесі
“Микрохим” ҒӨФ ЖШҚ
Украина, Луганск обл., Рубежный қ, Ленин к-сі, 33.
Тел./факс: (06453) 7-63-98
Қазақстан Республикасы аумағында тұтынушылардан өнім сапасына қатысты шағымдарды қабылдайтын ұйымның мекенжайы
«Стофарм» ЖШС, 110007, Қостанай қ, Орал к-сі, 14
Тел./факс 8 (7142) 28-01-80
secretariat@stopharm.kz