Ибуфен® мини Юниор

Ибуфен® мини Юниор

Ибупрофен

Дәрілік түрі, дозалануы

100 мг жұмсақ капсулалар

Сүйек-бұлшықет жүйесі. Қабынуға қарсы және ревматизмге қарсы препараттар. Қабынуға қарсы стероидты емес препараттар. Пропион қышқылының туындылары. Ибупрофен

АТХ коды M01AE01

Әртүрлі шығу тегіндегі қызбалы жай-күйлер (сонымен бірге вирустық инфекцияларда, вакцинадан кейінгі реакцияда).

Этиологиясы әртүрлі және қарқындылығы жеңілден орташаға дейінгі ауырулар:

• суық тию және тұмау симптомдары кезіндегі ауыру синдромы

• бас ауыру (сондай-ақ бас сақинасы)

• бұлшықет және ревматизм ауырулары

• тіс ауыру

• невралгия

• ортаңғы отит кезінде құлақтың ауыруы

• арқаның ауыруы

Қолданудың басталуына дейінгі қажетті мәліметтер тізбесі

• ибупрофенге немесе препараттың басқа компоненттеріне, сондай-ақ басқа қабынуға қарсы стероидты емес дәрілік препараттарға жоғары сезімталдық

• ацетилсалицил қышқылын (салицилаттар) немесе басқа ҚҚСП қолданумен байланысты аса жоғары сезімталдық реакцияларының (бронх демікпесі, бронх түйілуі, ринит, риносинусит, қайталамалы мұрын немесе мұрын маңы қойнаулары полипозы, Квинке ісінуі, есекжем) анамнезде болуы

• асқазан-ішек жолының ойық жаралы зақымдануы (асқазанның және он екі елі ішектің ойық жара ауруы, ойық жаралы колит)

• асқазан-ішектен қан кетулер

• ҚҚСП емімен байланысты асқазан-ішек қан кетуінің немесе тесілуінің анамнезде болуы

• жүректің ауыр жеткіліксіздігі (NYHA IV)

• геморрагиялық васкулит

• қан аурулары (қан кетуге бейімділік, гемофилия, гипокоагуляция)

• бүйректің немесе бауырдың ауыр жеткіліксіздігі

• айқын сусыздану (құсу, диарея немесе сұйықтықты жеткіліксіз ішу салдарынан)

• цереброваскулярлы қан кетулер немесе басқа белсенді қан кетулер

• геморрагиялық диатез, қан түзу жүйесінің түсініксіз бұзылулары

• 4 жасқа дейінгі балаларға

Қолдану кезіндегі қажетті сақтандыру шаралары

Төмендегі пациенттерде дәрілік өнімді қолданғанда сақтану шарасын қадағалау керек:

• жүйелі қызыл жегімен және дәнекер тіннің басқа жүйелі ауруларымен,

• анальді өтіс және тік ішек ауруларымен,

• АІЖ ауруларымен, сондай-ақ ішектің созылмалы қабыну ауруларымен (ойық жаралы колит, Крон ауруы),

• гипертониямен және (немесе) жүрек жеткіліксіздігімен,

• бүйрек жеткіліксіздігімен (бүйрек функциясын тексеру керек, өйткені ҚҚСП қолдану нәтижесінде оның нашарлауы мүмкін),

• бауыр жеткіліксіздігімен,

• қан ұю жеткіліксіздігімен (ибупрофен қан кету уақытын ұзартуы мүмкін).

• тікелей хирургиялық араласудан кейін

• оларда аллергиялық реакциялардың даму қаупі болатындықтан, анамнезде поллиноздары немесе тыныс жолдарының обструкциясы бар пациенттерде

• инфекциясы бар – «Арнайы сақтандырулар» бөлімінен «Инфекциялар» тақырыбын қараңыз.

Егде жастағы пациенттерде дәрілік препаратты қабылдау нәтижесінде жағымсыз әсерлердің (негізінен қан кету және тесілу) туындау қаупі жас пациенттерден көбірек. Жағымсыз әсерлердің туындау жиілігі мен қарқындылығын ең қысқа тиімді мерзімде ең төмен емдік доза қолданумен төмендетуге болады. Егде жастағы пациенттерде ұзақ уақыт ҚҚСП қолдану ұсынылмайды.

Бронх демікпесі және белсенді немесе анамнездегі басқа аллергиялық аурулары бар тұлғаларда препарат қабылдау бронх түйілуін туғызуы мүмкін.

Өлімге соқтыруы мүмкін және алдын ала сақтандыру симптомдары үнемі біліне бермейтін АІЖ-нан қан кету, ойық жаралану немесе тесілу қаупі бар. Қауіп аталған сақтандыру симптомдары байқалған пациенттерде де болады. АІЖ-нан қан кету немесе ойық жаралану жағдайында препарат қабылдауды дереу тоқтату керек. Анамнезінде АІЖ аурулары бар пациенттер, әсіресе, егде жастағы тұлғалар АІЖ тарапынан, әсіресе, бастапқы ем кезеңінде болатын кез келген типтік емес симптомдар (атап айтқанда, қан кету туралы) туралы дәрігерге мәлімдеу қажеттілігінен хабарлануы тиіс. Ондай пациенттер дәрілік препараттың ең төмен дозасын қабылдауы тиіс.

Асқазан-ішек бұзылуларының немесе қан кету қаупін ықтималды арттыратын басқа дәрілік препараттарды, мысалы, кортикостероидтарды және варфарин сияқты тромбозға қарсы немесе ацетилсалицил қышқылы сияқты агрегацияға қарсы препараттарды бірге қабылдайтын пациенттерде дәрілік препаратты абайлап қолдану керек.

Ибуфен® мини Юниор қабылдаған пациенттерде АІЖ-нан қан кету немесе ойық жаралану жағдайында препаратпен емдеуді тоқтату керек.

Қабынуға қарсы/ауыруды басатын, мысалы, ибупрофен сияқты дәрілік заттарды қабылдау, әсіресе, жоғары дозаларда қабылдағанда жүрек ұстамасы немесе инсульттің даму қаупінің сәл жоғарылауымен қатар жүруі мүмкін. Ұсынылатын дозалары мен емдеу ұзақтығынан асыруға болмайды.

Пациент ибупрофенді қабылдау алдында емдеуді дәрігермен талқылап алу керек, егер:

• жүрек-қантамыр аурулары, соның ішінде жүрек жеткіліксіздігі, стенокардиясы (кеуденің ауыруы) болса, сондай-ақ егер миокард инфарктісін, коронарлық тамырларға операцияны, кез келген типті инсультті (соның ішінде «мини-инсульт» немесе транзиторлы ишемиялық шабуыл «ТИШ») өткерсе немесе шеткері артериялар ауруы (артериялардың тарылуы немесе бітелуі салдарынан болатын аяқтардағы нашар қан айналымы) болса.

• артериялық қысымның көтерілуі, қант диабеті, қандағы холестерин деңгейінің жоғарылауы, отбасы мүшелеріндегі жүрек-қантамыр аурулары немесе шылым шегуде.

Анальгетиктердің үлкен дозаларын ұзақ уақыт қолданғанда ауыруды басатын дәрі дозасын арттырумен емдеуге болмайтын бас ауырулары болуы мүмкін.

Ұзаққа созылатын емдеу курсы тағайындалған пациенттерде бүйрек, бауыр функциясын және қан түзу жүйесін жүйелі тексеру қажет.

Эксфолиативті дерматитті, Стивенс-Джонсон синдромын және уытты эпидермальді некролизді қоса, кейбіреуі өліммен аяқталатын күрделі тері реакциялары ҚҚСП пайдалануға байланысты сирек хабарланады. Пациенттер осы реакциялардың айтарлықтай қаупіне көптеген жағдайда емдеудің бірінші айында пайда болатын емнің ерте сатысында ұшырайды. Құрамында ибупрофен бар препараттарға қатысты жедел жайылған экзантематозды пустулез (AGEP) туралы хабарланды. Ибуфен® мини Юниор тері бөртпесі, шырышты қабықтың зақымдануы немесе аса жоғары сезімталдықтың кез келген басқа белгілері сияқты күрделі тері реакцияларының белгілері мен симптомдары алғаш пайда болғанда тоқтату керек.

Жекелеген сирек жағдайларда ауыр тері инфекциялары және желшешек кезіндегі асқынулар сияқты жұмсақ тіндер инфекциялары болуы мүмкін. Қазіргі уақытта ҚҚСП тобы препараттарының осы инфекциялар күшеюіне ықпал етуін жоққа шығаруға болмайды. Осыған орай, желшешекке шалдыққандарда ибупрофен қолданудан сақтануға кеңес беріледі.

Басқа дәрілік препараттармен өзара әрекеттесуі

Ибупрофенді (ҚҚСП тобындағы басқа препараттар сияқты) төменде атап көрсетілген дәрілік препараттармен бірге қолдануға болмайды:

• ацетилсалицил қышқылымен: ибупрофенмен бірге қолданғанда ацетилсалицил қышқылының аз дозаларының тромбоциттер агрегациясын тежеу әсері бұзылуы мүмкін. Клиникалық деректер бойынша ацетилсалицил қышқылының аз дозаларымен бір мезгілде қабылданатын ибупрофен тромбоциттер агрегациясын болдырмау әсерін тежеуі мүмкін. Алайда, ұсынылатын деректер шектеулі және анық емес. Олардың клиникалық жағдайларға ex vivo экстраполяциясынан соң ибупрофенді жүйелі қолдануға қатысты біржақты қорытындылар жасауға болмайтыны айқын болады, есесіне ибупрофен бір рет қабылданған жағдайда елеулі клиникалық өзара әрекеттесу жоқ болып саналады;

• басқа қабынуға қарсы стероидты емес дәрілік препараттармен жоғары әсерлер қаупінің артуына орай;

• несеп айдайтын және гипертензияға қарсы препараттармен (атап айтқанда, АКФ тежегіштері және ангиотензин II антагонистері): ибупрофен несеп айдайтын және гипертензияға қарсы әсерді азайтуы мүмкін. Бүйрек жеткіліксіздігі бар кейбір пациенттерде (мысалы, дегидратация жағдайында немесе егде жастағыларда) АКФ тежегіштерімен немесе ангиотензин II антагонистерімен бірге ҚҚСП қолдану жедел бүйрек жеткіліксіздігіне дейін апаратын бүйрек жеткіліксіздігінің күшеюіне (бәрінен жиірек – қайтымды) әкелуі мүмкін. Демек, әсіресе, егде жастағы пациенттерде біріктірілген емді абайлап тағайындау талап етіледі. Ондай пациенттер жағдайында гидратация және емдеу курсының басында, сондай-ақ ем барысында мезгіл-мезгіл бүйрек функциясына қатаң мониторинг өткізу көрсетілген;

• тромбозға қарсы дәрілік препараттармен: аздаған клиникалық деректерге сүйенсек, ҚҚСП қан ұюын төмендететін дәрілердің әсерін күшейтуі мүмкін;

• литиймен және метотрексатпен: қабынуға қарсы стероидты емес препараттар плазмада литийдің де, метотрексаттың да концентрацияларын жоғарылатуы мүмкін; сарысудағы литий және метотрексат концентрациясын бақылау ұсынылады;

• зидовудинмен – ибупрофен мен зидовудинді бірге қабылдайтын пациенттерде қан кетудің ұзаққа созылу дәлелдері бар;

• кортикостероидтармен – АІЖ тарапынан жағымсыз әсерлер қаупі артады;

• циклоспоринмен – бүйрекке жоғары уытты әсер ету қаупін қамтитын болжамды өзара әрекеттесу деректерінің саны аз;

• дигоксинмен – ибупрофенді құрамында дигоксин бар препараттармен бір мезгілде қолдану қан плазмасында осы препараттар концентрациясын арттыруы мүмкін. Сарысуда дигоксин концентрациясын бақылау препаратты әдеттегі қолдануға (көп дегенде 4 күн) қойылатын дағдылы талап болып табылмайды;

• такролимузбен – бүйрекке уытты әсер ету қаупі жоғары болуы мүмкін;

• тромбозға қарсы препараттармен және серотонинді кері қармаудың селективті тежегіштерімен (SSRI) – асқазан-ішектен қан кету қаупі жоғары болуы мүмкін;

• мифепристонмен – мифепристон қолданудан кейін 8-12 күн ішінде ҚҚСП қабылдауға болмайды, өйткені ҚҚСП оның әсерін әлсіретуі мүмкін;

• хинолондар тобы антибиотиктерімен – жануарларда жүргізілген зерттеулерде хинолондар тобы антибиотиктерімен байланысты құрысулардың қаупін ҚҚСП арттыруы мүмкін екені дәлелденді. ҚҚСП мен хинолондарды бірге қабылдайтын пациенттер құрысулардың жоғары туындау қаупіне бейім;

• жүрек ауруларында қолданылатын гликозидтермен: ҚҚСП жүрек жеткіліксіздігі симптомдарын күшейтуі және плазмада гликозидтер концентрациясын арттыруы мүмкін;

• аминогликозидтермен: бүйрек жеткіліксіздігіне бейімділігі бар пациенттерде бүйрек функциясын әлсіретуі, аминогликозидтер шығарылуын азайтуы және олардың сарысудағы концентрациясын арттыруы мүмкін;

• пробенецидпен: ҚҚСП тобы препараттарының және олардың метаболиттерінің шығарылуы мен метаболизмін азайтуы мүмкін;

• ішу арқылы қабылданатын диабетке қарсы дәрілік препараттармен: сульфонилмочевина туындылары метаболизмінің төмендеуі, жартылай шығарылу кезеңінің ұзаруы және гипогликемия қаупінің артуы мүмкін.

Арнайы сақтандырулар

Ауыруды басатын әртүрлі дәрілік заттарды ұзақ уақыт бірге қолдану бүйректің зақымдануына және бүйрек жеткіліксіздігінің туындау қаупіне (ауыруды басудан кейінгі нефропатия) әкелуі мүмкін.

Сусызданған балалар мен жасөспірімдерде бүйрек функциясының бұзылу қаупі бар.

Ибупрофенді қолдану кезінде уытты амблиопияның жекелеген жағдайлары болатынын ескеріп, көру қабілетінің кез келген бұзылысы жөнінде дәрігерді хабарландыру керек.

Инфекциялар

Ибуфен® мини Юниор ысыну және ауыру сияқты инфекцияның белгілерін жасыруы мүмкін. Сондықтан Ибуфен® мини Юниор инфекцияны тиісті емдеуді кейінгі қалдыруы мүмкін, бұл асқыну қаупінің артуына әкелуі мүмкін. Бұл бактериялардан туындаған пневмония және желшешекпен байланысты бактериялық тері инфекциялары кезінде байқалды. Егер сіз осы дәріні инфекция кезінде қабылдап, ал инфекцияның симптомдары сақталса немесе нашарласа, дереу дәрігерге қаралыңыз.

Фертильділік

Циклооксигеназаны (простагландиндер синтезін) тежейтін дәрілік препараттардың овуляциға ықпал етіп, әйелдерде фертильділіктің бұзылуын туындатуы мүмкін. Осы әсері уақытша сипатта болады және ем аяқталған соң басылады.

Жүктілік

Ибупрофенді жүктілік кезінде әйелдерде қолдану қауіпсіздігіне қатысты егжей-тегжейлі ақпарат жоқ. Простагландиндер синтезі бәсеңдеуінің адам ұрығына әсері белгісіз болғандықтан, ибупрофенді жүктіліктің бірінші және екінші триместрінде қолдану ұсынылмайды. Ибупрофенді жүктіліктің III триместрінде қолдануға болмайды, себебі бұл артериялық түтіктің мерзімінен бұрын жабылуына ықпал етеді және жаңа туған балада өкпелік гипертензияны туындатуы мүмкін, сондай-ақ жатырдың жиырылу белсенділігін бәсеңдетеді, бұл босанудың басталуын тежейді және босану әрекетін ұзартады, сондай-ақ ана мен балада қан кету қаупін арттырады.

Лактация

Ибупрофен және оның метаболиттері өте төмен концентрацияларда емшек сүтіне түседі. Емшектегі балалар үшін жағымсыз салдары туралы хабарламалар әлі күнге дейін түспегендіктен, препаратты қысқа мерзімде қолданғанда бала емізуді тоқтату қажеттілігі туындамайды.

Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Ибуфен® мини Юниор препаратын қабылдау кезінде бас айналуы пайда болатындықтан, мұны көлік құралын басқарғанда және қозғалыстағы механизмдерге қызмет көрсеткенде ескеру керек.

Қолдану жөніндегі нұсқаулар

Дозалану режимі

Ішке қабылдауға арналған.

Дәрілік өнімді тамақтану кезінде немесе тамақтанғаннан кейін қабылдау керек. Капсуланы стақан суды іше отырып, толығымен жұту керек. Капсуланы шайнамаған, сормаған немесе ұсақтамаған жөн.

Препарат симптоматикалық емдеуге арналған.

Симптомдарды жеңілдетуге қажетті қысқа мерзімде ең төмен тиімді дозада дәрілік өнімді қабылдау жағымсыз әсерлер қаупін төмендетеді.

Симптомдарды жеңілдету үшін қажетті ең қысқа кезең ішінде ең төмен тиімді дозаны қолдану керек. Егер сізде инфекция болса, егер симптомдар (қызба және ауыру сияқты) сақталса немесе нашарласа («Арнайы сақтандырулар» бөлімін қараңыз) дереу дәрігерге қаралыңыз.

Дозалануы

Дәрілік препарат дене салмағы 16-дан 39 кг дейінгі 4-тен 12 жасқа дейінгі балаларда қолдануға арналған.

Балаларға арналған ибупрофеннің ең жоғары тәуліктік дозасы 3-4 қабылдауға дене салмағына 20-30 мг/кг құрайды.

4-тен 5 жасқа дейінгі балалар (16 кг 19 кг дейін): Бастапқы доза - 1 капсула. Артынан, қажет болса, 6 сағаттан соң 1капсуладан.

Ең жоғары тәуліктік доза 4 капсула (400 мг ибупрофен) құрайды.

6-дан 9 жасқа дейінгі балалар (20 кг 29 кг дейін): бастапқы доза – 1-2 капсула. Артынан, қажет болса, 8 сағаттан соң 1-2 капсуладан.

Ең жоғары тәуліктік доза 6 капсула (600 мг ибупрофен) құрайды.

10-нан 12 жасқа дейінгі балалар (30 кг 39 кг дейін): бастапқы доза – 1-2 капсула. Артынан, қажет болса, 6 сағаттан соң 1-2 капсуладан.

Ең жоғары тәуліктік доза 8 капсула (800 мг ибупрофен) құрайды.

Келесі дозалар арасындағы ең қысқа аралық 6 сағат құрайды.

Препаратты 3 күннен көп қолдану қажет болған немесе симптомдар күшейген жағдайда дәрігерге қаралу қажет.

Бүйрек функциясының бұзылуы бар пациенттер:

Бүйрек функциясы жеңілден орташа дәрежеге дейін бұзылған пациенттерде дозаны азайту қажет емес.

Бауыр функциясының бұзылуы бар пациенттер:

Бауыр функциясы жеңілден орташа дәрежеге дейін бұзылған пациенттерде дозаны азайту қажет емес.

Артық дозалану жағдайында қабылдау қажет болатын шаралар

Дене салмағына 200 мг/кг-ден көп дозаларды қабылдаудан кейін уытты әсер ету қаупі бар. Ересектерде осындай симптомдарды туғызуға қабілетті доза нақты белгіленбеген. Артық дозалану кезіндегі жартылай шығарылу кезеңі 1,5-нан 3 сағатқа дейін құрайды.

Симптомдары. Клиникалық мәнді ҚҚСП дозаларын қабылдайтын пациенттердің көпшілігінде: жүрек айну, құсу, құрсақ үсті аумағының ауыруы немесе диарея. Сонымен қатар құлақтың шуылдауы, бас ауыруы және асқазаннан немесе ішектен қан кету туындауы мүмкін. Ауыр улану орталық жүйке жүйесіне ықпал етеді және ұйқышылдықты, аса сирек қозу мен бағдардан жаңылуды немесе команы туындатады. Өте сирек құрысу ұстамалары болуы мүмкін. Ауыр уыттануда кейде метаболизмдік ацидоз байқалады, осы орайда INR протромбин уақытының ұзаруы мүмкін. Жедел бүйрек жеткіліксіздігі немесе бауырдың зақымдануы да білінген. Демікпесі бар пациенттерде оның симптомдары өршуі мүмкін.

Емі. Тиісті антидоты жоқ. Симптоматикалық және демеуші ем қолданылады. Жүрек жұмысын қадағалау және, егер олар тұрақты болса, организмнің тіршілік қызметі симптомдарын бақылау көрсетілген. Ұзаққа созылып кететін құрысу ұстамалары жиі болған жағдайда вена ішіне диазепам немесе лоразепам енгізу керек. Демікпесі бар пациенттерге бронхтарды кеңейтетін дәрілік препаратар беру керек.

Дәрілік препаратты стандартты қолдану кезінде көрініс табатын жағымсыз реакциялардың сипаттамасы және осы жағдайда қабылдануы керек шаралар (қажет болса)

Жиі емес (≥ 1/1000-нан < 1/100 дейін)

- тері бөртпесімен және қышынумен аллергиялық реакциялар

- іштің ауыруы, жүрек айну, диспепсия

Сирек (≥ 1/10 000-нан < 1/1000 дейін)

- құсу, метеоризм, диарея, іш қату

- бас ауыру, бас айналу, ұйқысыздық, қозу, ашушаңдық, шаршауды сезіну

Өте сирек (< 1/10 000)

- ауыр жоғары сезімталдық реакциялары: беттің, тілдің және көмейдің ісінуі, ентігу, тахикардия, артериялық гипотензия (анафилаксия, Квинке ісінуі немесе ауыр шок)

- бронх демікпесі, бронх демікпесінің және бронх түйілуінің өршуі

- пептидті ойық жара, ойық жараның тесілуі немесе асқазан-ішек жолынан қан кету, мелена, қан аралас құсу (кейде өліммен аяқталатын, әсіресе, егде жастағы пациенттерде), ойық жаралы стоматит, ойық жаралы колиттің және Крон ауруының өршуі, эзофагит, панкреатит

- көру қабілетінің нашарлауы

- құлақтың шуылдауы

- қан түзу бұзылулары (анемия, лейкопения, тромбоцитопения, панцитопения, агранулоцитоз)

- ісінулердің білінуі, артериялық гипертензия, ҚҚСП тобы препараттарын қолданумен байланысты жүрек жеткіліксіздігі

- жедел бүйрек жеткіліксіздігі, қан сарысуында мочевина жоғарылауымен және ісінулермен астасқан папиллонекроз (әсіресе, ұзақ уақыт қабылдағанда)

- бауыр функциясының, әсіресе, ұзақ уақыт қолдану кезіндегі бұзылулары, гепатит, сарғаю

- көп формалы эритеманы, уытты эпидермалық некролизді, Стивенс-Джонсон синдромын қоса, буллезді реакциялар сияқты тері реакцияларының ауыр түрлері дамуы мүмкін

- асептикалық менингит симптомдары: желке бұлшықеттерінің сіресуі, бас ауыру, жүрек айну, құсу, қызба немесе бағдардан жаңылу, әсіресе осының алдында аутоиммундық бұзылулары болған пациенттерде (жүйелі қызыл жегі, дәнекер тіннің аралас ауруы)

- психоздық реакциялар, депрессия.

Жиілігі белгісіз

• DRESS синдромы ретінде белгілі терінің күшті тітіркенуі пайда болуы мүмкін. DRESS симптомдарына: тері бөртпесі, қызба, лимфа түйіндерінің ісінуі және эозинофилдердің (ақ қан жасушаларының типі) артуы жатады.

• жедел жайылған экзантематозды пустулез (AGEP).

Клиникалық сынақтар нәтижелерінде, әсіресе, жоғары дозаларда (тәулігіне ≥ 2400 мг) ибупрофен қабылдау мен артериялық тромбоз құбылыстарының аздаған жоғары даму қаупінің (мысалы, миокард инфарктісі және инсульт) арасында өзара байланыс болу мүмкіндігі жорамалданады.

Жағымсыз әсерлер білінгенде препарат қолдануды тоқтату керек.

Жағымсыз дәрілік реакциялар туындаса медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаларды қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей хабарласыңыз

Қазақстан Республикасы Денсаулық сақтау министрлігі Тауарлар мен көрсетілетін қызметтердің сапасы мен қауіпсіздігін бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

Дәрілік препараттың құрамы

Бір капсуланың ішінде

белсенді зат - 100 мг ибупрофен

қосымша заттар: макрогол 600, калий гидроксиді, тазартылған су

капсула қабығы: желатин, сұйық сорбитол (кристалданбаған), сұйық мальтитол, тазартылған су

Сыртқы түрінің, иісінің, дәмінің сипаттамасы

Тігісі бар ашық сары түсті жұмсақ капсулалар; капсуланың ішінде - тұтқыр сұйықтық.

Шығарылу түрі және қаптамасы

Алюминий фольгадан және поливинилхлорид/поливинилдихлорид үлбірінен (Ал/ПВХ/ПВДХ) жасалған пішінді ұяшықты қаптамаға 15 капсуладан салады.

Пішінді 1 қаптамадан медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынады.

2 жыл.

Жарамдылық мерзімі өткеннен кейін қолдануға болмайды!

Түпнұсқалық қаптамада, 25ºС-ден аспайтын температурада сақтау керек.

Балалардың қолы жетпейтін жерде сақтау керек!

Рецептісіз

Өндіруші туралы мәліметтер

«Медана Фарма» АҚ

98-200 Серадз, В. Локетка к-сі 10, Польша

Телефон нөмірі +48 43 827 10 31

Факс нөмірі +48 43 827 12 00

Электронды пошта medana@medana.pl

«Химфарм» АҚ, Қазақстан Республикасы, Шымкент қ., Рашидов к-сі, 81

Телефон нөмірі +7 7252 (610151)

Авто жауап бергіш нөмірі +7 7252 (561342)

Электронды пошта infomed@santo.kz

Қазақстан Республикасы аумағында тұтынушылардан дәрілік заттар сапасына қатысты шағымдар (ұсыныстар) қабылдайтын ұйымның атауы, мекенжайы және байланыс деректері (телефон, факс, электронды пошта)

«Химфарм» АҚ, Қазақстан Республикасы, Шымкент қ., Рашидов к-сі, 81

Телефон нөмірі +7 7252 (610151)

Авто жауап бергіш нөмірі +7 7252 (561342)

Электронды пошта complaints@santo.kz

Қазақстан Республикасы аумағында дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

«Химфарм» АҚ, Қазақстан Республикасы, Шымкент қ., Рашидов к-сі, 81

Телефон нөмірі +7 7252 (610151)

Электронды пошта phv@santo.kz