Золдрис (концентрат для приготовления раствора)

Золдрис

Золедрон қышқылы

Инфузия үшін ерітінді дайындауға арналған концентрат, 4.0 мг/5 мл

Бір құтының ішінде

белсенді зат - золедрон қышқылының моногидраты 4.264 мг

(золедрон қышқылына баламалы) 4.000 мг

қосымша заттар: маннитол, натрий цитраты, инъекцияға арналған су.

Мөлдір және түссіз концентрацияланған ерітінді

Сүйек ауруларын емдеуге арналған препараттар. Сүйектердің құрылымы мен минералдануына әсер ететін препараттар. Бисфосфонаттар. Золедрон қышқылы.

АТХ коды М05ВА08

Фармакокинетикасы

Золедрон қышқылының фармакокинетикалық көрсеткіштерінің мәндері дозасына тәуелсіз. Золедрон қышқылы in vitro Р450 ферментін тежемейді және биоөзгеріске ұшырамайды. Золедрон қышқылы өзгеріссіз күйде бүйрек арқылы бөлініп шығады. Бауыр функциясының жағдайы золедрон қышқылының фармакокинетикасына айтарлықтай әсер етпейді.

Золедрон қышқылының инфузиясы басталғаннан кейін препараттың плазмадағы концентрациялары жылдам артады, инфузия кезеңінің соңына қарай ең жоғарғы шыңына жетеді, содан кейін 4 сағаттан соң концентрациясының ең жоғарғы шыңының <10% дейін және 24 сағаттан соң < 1% дейін жылдам азаюы, ары қарай препараттың 28-ші күнгі екінші инфузиясына дейін ең жоғарғы шыңының 0,1%-ынан аспайтын өте төмен концентрацияларының ұзақ кезеңі орын алады.

Таралуы

Золедрон қышқылының қанның жасушалық компоненттерімен тектестігі өте төмен, қан мен плазмадағы концентрациясының орташа арақатынасы 30 нг/мл-ден 5000 нг/мл дейінгі концентрацияларының ауқымында 0,59 құрайды. Плазма ақуыздарымен байланысуы төмен, байланыспаған фракциясы 2 нг/мл золедрон қышқылы кезіндегі 60%-дан 2000 нг/мл кезіндегі 77%-ға дейін ауытқып тұрады.

Вена ішіне енгізілген золедрон қышқылы бүйрекпен үш кезеңде шығарылады: препараттың жүйелі айналымнан 0,24 сағат және 1,87 сағат жартылай шығарылу кезеңдерімен жылдам екі сатылы шығарылуы және 146 сағатты құрайтын ақырғы жартылай шығарылу кезеңімен жүретін ұзақ сатысы. Золедрон қышқылы метаболизмге ұшырамайды және бүйрекпен өзгеріссіз күйде шығарылады.

Алғашқы 24 сағат ішінде несепте енгізілген дозасының 39±16%-ы анықталады. Препараттың қалған мөлшері негізінен сүйек тінімен байланысады. Содан соң золедрон қышқылының сүйек тінінен жүйелі айналымға баяу кері босап шығуы және оның бүйрекпен шығарылуы жүреді.

Препараттың жалпы плазмалық клиренсі 5,04±2,5 л/сағатты құрайды. Ол препараттың дозасына, пациенттің жынысына, жас шамасына, нәсілдік ерекшелігі мен дене салмағына тәуелді емес. Инфузия ұзақтығының 5 минуттан 15 минутқа дейін ұзаруы инфузияның соңына қарай қандағы золедрон қышқылы концентрациясының 30%-ға төмендеуіне алып келеді, бірақ «концентрация-уақыт» қисығы астындағы ауданының (AUC) шамасына ешқандай әсер етпейді.

Золедрон қышқылының бүйректік клиренсі креатинин клиренсімен тікелей байланысты. Золедрон қышқылының креатинин клиренсінен 75±33 % бүйректік клиренсі орташа алғанда 84±29 мл/минутты құрады (22-ден 143 мл/минутқа дейінгі ауқым). Креатинин клиренсі 20 мл/минуттан (бүйректің ауыр жеткіліксіздігі) 50 мл/минутқа (бүйректің орташа жеткіліксіздігі) дейінгі науқастарда золедрон қышқылының салыстырмалы клиренсі креатинин клиренсі 84 мл/минут пациентпен салыстырғанда сәйкесінше 37 % немесе 72 % болады.

Бүйректің жедел жеткіліксіздігі (креатинин клиренсі <30 мл/мин) бар пациенттердегі фармакокинетикасы туралы деректер шектеулі. Золдрис препаратын жедел бүйрек жеткіліксіздігі бар пациенттерде қолдану ұсынылмайды.

Фармакодинамикасы

Золедрон қышқылы сүйекке іріктеп әсер ететін бисфосфонаттардың жаңа класына жатады, және сүйек тіні резорбциясының тежегіші болып табылады.

Бисфосфонаттардың сүйеккке іріктеп әсер етуі олардың минералданған сүйекке тектестігінің жоғарылығымен байланысты, алайда остеокластар белсенділігінің тежелуін қамтамасыз ететін дәл молекулалық механизм әлі де анықталмаған күйі қалып отыр. Золедрон қышқылы сүйектің резорбциясын тежейді, сонымен қатар, сүйектің қалыптасуына, минералдануына және механикалық қасиеттеріне жағымсыз әсер етпейді.

Остеокласттық сүйек резорбциясын тежеуден басқа золедрон қышқылы адамдағы миелома мен сүт безі обырының өсірінді жасушаларына тікелей ісікке қарсы әсер береді, ол ісік жасушаларының пролиферациясын бәсеңдетуі мен апоптозын индукциялауынан көрінеді.

Ісіктен туындаған гиперкальциемиясы бар пациенттерде золедрон қышқылының әсері сарысудағы кальций концентрациясының төмендеуімен және оның несеппен шығарылуының азаюымен сипатталады.

- қатерлі ісіктен туындаған гиперкальциемияда (қан сарысуындағы альбумин деңгейі бойынша түзетілген ≥ 12 мг/дл немесе 3 ммоль/л кальций концентрациясы кезінде)

- сүйектегі метастаздармен қатар жүретін қатерлі жаңа түзілімдері бар пациенттердегі сүйек тіні патологиясымен (патологиялық сынулар, омыртқа бағанының компрессиясы, сүйекке жасалған хирургиялық араласымдардан және сәулемен емдеуден кейінгі асқынулар, ісік индукциялаған гиперкальциемия) байланысты симптомдардың профилактикасында

- әйелдердегі менопауза кезеңі алдындағы бастапқы сатыдағы гормонға тәуелді рецептор-оң обырының адъювантты емінде гонадотропин-рилизинг гормон агонистерін қоса, гормоналдық еммен бірге

- бастапқы сатыдағы сүт безінің обыры бар, ароматаза тежегіштерімен ем қабылдап жүрген әйелдердегі менопауза кезеңінен кейінгі сүйек тінінің сынулары мен резорбциясының профилактикасы үшін

Қолдану тәсілі мен дозалары

Қатерлі ісікпен байланысты гиперкальциемияны емдеуде

Ересектер мен егде жастағы пациенттер

Гиперкальциемия (альбумин деңгейі бойынша түзетілген кальций концентрациясы > 12 мг/дл немесе 3 ммоль/л) кезінде препараттың ұсынылатын дозасы инфузияға арналған ерітіндімен (100 мл 0,9% натрий хлориді ерітіндісі немесе 5% глюкоза ерітіндісі) сұйылтылған 4 мг құрайды, ол вена ішіне енгізілетін кемінде 15 минуттық бір реттік инфузия түрінде тағайындалады.

Золдрис препаратын енгізгенге дейін пациенттегі гидратация дәрежесіне баға беру керек. Пациенттің гидратациясы талапқа сай болған жағдайда, инфузия жүргізіледі.

Сүйектегі метастаздармен қатар жүретін қатерлі жаңа түзілімдері бар пациенттердегі сүйек тінінің патологиясымен (патологиялық сынулар, омыртқа бағанының компрессиясы, сүйекке жасалған хирургиялық араласымдардан және сәулемен емдеуден кейінгі асқынулар, ісік индукциялаған гиперкальциемия) байланысты симптомдардың профилактикасы

Ересектер мен егде жастағы пациенттер

Ұсынылатын дозасы – 4 мг Золдрис препараты. Концентрат 100 мл 0,9% натрий хлориді ерітіндісінде немесе 5% глюкоза ерітіндісінде сұйылтылуы тиіс. Әр 3-4 апта сайын вена ішіне енгізілетін кемінде 15 минуттық инфузия түрінде тағайындалады.

Сондай-ақ пациенттер күн сайын қандай-да бір кальций препаратын 500 мг дозада және Д дәруменін 400 ХБ қабылдауы тиіс.

Менопауза кезеңі алдындағы әйелдердегі бастапқы сатыдағы сүт безінің гормонға тәуелді рецептор-оң обырының (СБРО) адъюванттық емінде гонадотропин-рилизинг гормонның агонистерін қоса, гормоналдық еммен бірге

Ұсынылатын дозасы – 4 мг Золдрис препараты әр 6 ай сайын вена ішіне енгізілетін инфузия түрінде.

Сондай-ақ пациенттер күн сайын қандай-да бір кальций препаратын 500 мг дозада және Д дәруменін 400 ХБ қабылдауы тиіс.

Бастапқы сатыдағы сүт безі обыры бар, ароматаза тежегіштерімен ем қабылдап жүрген әйелдердегі менопауза кезеңінен кейінгі сүйек тінінің сынулары мен резорбциясының профилактикасы

Ересектер мен егде жастағы пациенттер

Ұсынылатын дозасы – әр 6 ай сайын 4 мг Золдрис препараты. Лиофилизат 100 мл 0,9% натрий хлориді ерітіндісінде немесе 5% глюкоза ерітіндісінде сұйылтылуы тиіс. Вена ішіне енгізілетін кемінде 15 минуттық инфузия түрінде тағайындалады.

Сондай-ақ пациенттер күн сайын қандай-да бір кальций препаратын 500 мг дозада және Д дәруменін 400 ХБ қабылдауы тиіс.

Бүйрек функциясының бұзылуы бар пациенттерде қолданылуы

Қатерлі ісіктен туындаған гиперкальциемия кезіндегі бүйрек жеткіліксіздігінде

Бүйректің айқын жеткіліксіздігі бар пациенттердегі қатерлі ісіктен туындаған гиперкальциемияны Золдрис препаратымен емдеуді, тек аталған емнің қаупі мен пайдасына баға бергеннен кейін ғана тағайындау керек. Қатерлі ісіктен туындаған гиперкальциемиясы бар, сарысудағы креатинин деңгейі <400 мкмоль/л немесе <4,5 мг/дл пациенттерде дозасын түзету қажет емес.

Сүйектердің зақымдануымен жүретін асқынған қатерлі жаңа түзілімдері бар пациенттердегі сүйек тінінің патологиясымен байланысты симптомдардың профилактикасы кезіндегі және сүт безі обырының бастапқы сатысындағы менопауза кезеңінен кейінгі, ароматаза тежегіштерімен ем қабылдап жүрген әйелдердегі сүйектердің сынулары мен резорбциясының профилактикасы кезіндегі бүйрек жеткіліксіздігі.

Көптеген миеломасы немесе ауқымды ісіктер кезіндегі сүйектердің метастаздық зақымдануы бар пациенттерді, сондай-ақ менопауза кезеңінен кейінгі, сүт безі обырының бастапқы сатысындағы, ароматаза тежегіштерімен ем қабылдап жүрген әйелдерді емдеуді бастар алдында, сарысудағы креатинин деңгейі мен креатинин клиренсін анықтап алу керек. Креатинин клиренсін сарысудағы креатинин деңгейінің негізінде Кокрофт-Голт формуласы бойынша есептеп шығарады. Золдрис емдеу басталғанға дейін бүйректің айқын жеткіліксіздігін бастан өткерген, ол кезде креатинин клиренсі < 30 мл/минут болған пациенттерге ұсынылмайды.

Сүйекте метастаздары бар пациенттерге және менопауза кезеңінен кейінгі сүт безі обырының бастапқы сатысындағы, ароматаза тежегіштерімен ем қабылдап жүрген, Золдрис препаратымен емдеу басталғанға дейін жеңіл немесе орташа бүйрек жеткіліксіздігі болған (анықталған креатинин клиренсі 30-60 мл/мин) әйелдерге, препараттың келесі дозалары ұсынылады:

* Дозалары 0,66 (мг · сағ/л) құрайтын (креатинин клиренсі = 75 мл/мин) мақсатты AUC негізінде есептелген. Бүйрек жеткіліксіздігі кезіндегі төмендетілген дозалары AUC мәндерінің креатинин клиренсі 75 мл/минут пациенттердегідей мәндерге жетуін қамтамасыз етеді деп шамаланады.

Емдеу басталғаннан кейін қан сарысуындағы креатинин деңгейін Золдрис препаратының әр дозасын енгізер алдында өлшеп отыру керек. Бүйрек функциясының бұзылуы кезінде емдеуді тоқтату керек. Клиникалық зерттеулерде бүйрек функциясының бұзылуы төмендегідей анықталды:

• сарысудағы креатининнің бастапқы деңгейі қалыпты (<1,4 мг/дл) пациенттер үшін – көрсеткіштің 0,5 мг/дл жоғарылауы

• сарысудағы креатининнің бастапқы деңгейі өзгерген (> 1,4 мг/дл) пациенттер үшін – көрсеткіштің 1 мг/дл жоғарылауы.

Клиникалық зерттеулерде Золдрис препаратымен емдеу креатинин деңгейі бастапқы шамасының 10%-ы шегіндегі деңгейіне қайта келгеннен кейін қайта басталды. Препаратпен емдеуді емдеу тоқтатылғанға дейінгі дозада қайта бастау керек.

Золдрис препаратының азайтылған дозаларын дайындау жөніндегі нұсқаулар

Қажетті сұйық концентраттың тиісінше мөлшерін алыңыз:

4,4 мл - 3,5 мг дозасы үшін

4,1 мл - 3,3 мг дозасы үшін

3,8 мл - 3,0 мг дозасы үшін

Концентраттың өлшеп алынған мөлшерін 100 мл стерильді 0,9% натрий хлориді немесе 5% глюкоза ерітіндісінде сұйылту қажет. Инфузияға арналған дайын ерітіндіні вена ішіне кемінде 15 минут енгізілетін бір реттік инфузия түрінде енгізу керек.

Салқындатылған ерітіндіні қолданар алдында оны алдын ала бөлме температурасына жеткенше ұстау қажет.

Жағымсыз әсерлер

Өте жиі (≥1/10)

• гипофосфатемия

Жиі (≥1/100 <1/10)

• анемия

• бас ауыруы, парестезия

• ұйқы бұзылулары

• конъюнктивит

• жүрек айнуы, құсу, тәбеттің нашарлауы, іш қатуы

• гипергидроз

• сүйектердің ауыруы*, миалгия*, артралгия*, денеге жайылған ауыру, буындардың сіресуі

• гипертензия

• бүйрек жеткіліксіздігі

• жедел сатылы реакция, қызба, тұмау тәрізді аурулар (шаршауды, қалтырауды, дімкәстану мен ысынуларды қоса)

• шеткері ісінулер, астения

• қандағы креатинин мен мочевина деңгейінің жоғарылауы, гипокальциемия

Жиі емес (≥1/1,000 <1/100)

• тромбоцитопения, лейкопения

• аса жоғары сезімталдық реакциясы

• бас айналуы, дәм сезудің бұзылуы, гипостезия, гиперстезия, тремор

• мазасыздық

• көру жітілігінің нашарлауы

• диарея, абдоминальді ауыру, диспепсия, стоматит, ауыздың құрғауы

• диспноэ, жөтел

• қышыну, бөртпе (эритематоздық және макулярлық бөртпені қоса)

• жақсүйек остеонекрозы, бұлшықет түйілулері*

• гипотензия

• жедел бүйрек жеткіліксіздігі, гематурия, протеинурия

• инъекция орнындағы реакциялар (ауырсынуды, тітіркенуді, іш кебуін, тығыздануды, қызаруды қоса)

• кеуденің ауыруы

• дене салмағының артуы

• гипомагниемия, гипокалиемия

• дене салмағының артуы

Сирек (≥1/10,000 <1/1,000)

• панцитопения

• ангионевроздық ісіну

• сананың шатасуы

• увеит

• өкпенің интерстициальді ауруы

• брадикардия, жүрек аритмиясы (гипокальциемия аясында)

• артрит және буындардың ісінуі (жедел сатылы реакция симптомы ретінде)

• гиперкалиемия, гипернатриемия

Өте сирек (<1/10,000)

• құрысулар, гипестезия және тетания (гипокальциемия аясында)

* жоғарырақ жиілігі менопауза кезеңінен кейінгі гормон-рецептор оң СБРО бар, гонадотропин-босатып шығаратын гормонның (ГБГ) агонисін қолдану кірістірілген гормоналдық ем қабылдап жүрген әйелдерде, және менопауза кезеңінен кейінгі СБРО бар, ароматаза тежегіштерін қатарлас қолданумен ем қабылдап жүрген әйелдерде байқалуы мүмкін

Маркетингтен кейінгі қадағалаулар (жиілігі белгісіз)

• анафилаксиялық реакциялар/шок

• ұйқышылдық

• эписклерит, склерит және көз ұясының қабынуы

• жыпылықтағыш аритмия

• естен тануға немесе қантамыр жеткіліксіздігіне алып келетін гипотензия, бірінші кезекте қауіп факторлары бар пациенттерде

• бронх түйілуі

• есекжем

• жедел, кейде қатардан қалдыратын сүйектердің, буындардың және/немесе бұлшықеттердің ауыруы, ортан жілік сүйегінің атиптік ұршықасты және диафизарлық сынулары (Золдрис препаратын қоса, бисфосфонаттардан туындаған жағымсыз реакциялар).

Жекелеген жағымсыз реакциялардың сипаттамасы

Бүйрек функциясының бұзылуы

Золдрис препаратын қолдану бүйрек функциясы бұзылуының дамуымен астасып отырды. Препаратты клиникалық зерттеулерде сүйекті зақымдайтын жайылған қатерлі жаңа түзілімдері бар пациенттердегі қаңқа тарапынан болатын асқынулардың профилактикасы мақсатында қолданғанда, препаратты қолданумен байланысты бүйрек функциясы бұзылуының туындау жиілігі былайша жіктелді: көптеген миелома (3,2%), простата обыры (3,1%), сүт безі обыры (4,3%), өкпе обыры және басқа ауқымды ісіктер (3,2%). Бүйрек функциясының нашарлау қаупін арттыруы мүмкін факторларға мыналар жатады: дегидратация, осының алдындағы бүйрек функциясының бұзылуы, Золдрис препаратымен немесе басқа бисфосфонаттармен көптеген емдеу курстары, нефроуытты препараттарды бір мезгілде қолдану немесе препаратты ұсынылған кезеңінен аз уақыт ішінде енгізу. Бүйрек функциясының нашарлауы, бүйрек функциясы бұзылуының бүйрек жеткіліксіздігіне және Золдрис препаратының старттық немесе бір реттік дозасын енгізгеннен кейін гемодиализ жүргізу қажеттілігіне дейін үдеуі байқалған.

Жақсүйек остеонекрозы

Бисфосфонаттармен, соның ішінде Золдрис препаратымен емдеу кезінде, негізінен онкологиялық аурулары бар пациенттерде остеонекроз (негізінен жақсүйек остеонекрозы, бірақ басқа жерлерде де, соның ішінде жамбас сүйегінде, ортан жілік сүйегінде және сыртқы есту өзегінде орналасқан) дамыған жағдайлар байқалған. Көптеген пациенттерде жергілікті инфекциялық үдерістің, соның ішінде остеомиелиттің белгілері білінді; көп ретте мұндай жағдайлар тіс экстракциясынан немесе стоматологиялық операциялық араласулардан кейінгі онкологиялық аурулары бар пациенттерде байқалды. Қатерлі жаңа түзілімдер, бір мезгілде емдеу (мысалы, химиотерапия, антиангиогенді препараттар, сәулемен емдеу, глюкокортикостероидтар) және қатарлас жағдайлар (мысалы, анемия, коагулопатиялар, инфекциялар, осының алдындағы ауыз қуысының ауруы) сияқты жақсүйек остеонекрозының дамуына бейімдейтін кеңінен белгілі көптеген қауіп факторлары бар,. Себеп-салдарлық байланысы анықталмағанына қарамастан, сауығудың кешеуілдеуі мүмкіндігіне байланысты, стоматологиялық операциялық араласымдардан бас тартқан дұрыс. Қолжетімді мәліметтер бойынша, жақсүйек остеонекрозының даму жиілігі ісіктің сипатымен (сүт безінің жайылған обыры, көптеген миелома) байланысты болып келеді.

Жедел сатылы реакция

Бұл жағымсыз реакция мына симптомдардың кешені болып табылады: дене температурасының жоғарылауы, жалпы әлсіздік, сүйектердің ауыруы, қалтырау, тұмау тәрізді синдром. Әдетте Золдрис препаратының инфузиясынан кейін ≤3 күн аралығында басталады. Сонымен қатар реакция «тұмау тәрізді» немесе «дозадан кейінгі» симптомдар терминдердің пайдаланылуымен еске түседі. Симптомдары әдетте бірнеше күннен кейін басылады.

Жүрекшелердің фибрилляциясы

Клиникалық зерттеулердің бірінде золедрон қышқылын менопаузадан кейінгі остеопорозы бар пациент әйелдерде 3 жыл бойы (жылына бір рет 5 мг дозада) қолданғанда жүрекшелер фибрилляциясы дамуының жалпы жиілігі плацебо тобындағы 1,9%-бен (3852 адамның 75-і) салыстырғанда 2,5 % (3862 адамның 96-сы) құрады. Ауыр гемодинамикалық бұзылулармен қатар жүретін жүрекшелер фибрилляциясының даму жиілігі золедрон қышқылы және плацебо үшін сәйкесінше 1,3% (3862 адамның 51-і) және 0,6% (3852 адамның 22-сі) құрады. Мұндай теңгерімсіздік золедрон қышқылының басқа клиникалық зерттеулерінде, соның ішінде, Золдрис препаратын онкологиялық аурулары бар пациенттерде 3-4 аптада бір рет 4 мг дозада қолданғанда байқалған жоқ. Аталған зерттеудегі менопаузадан кейінгі остеопорозы бар пациент әйелдерде золедрон қышқылымен емдеу аясында жүрекшелер фибрилляциясының даму жиілігінің арту себебі анықталған жоқ.

• золедрон қышқылына, басқа бисфосфонаттарға немесе препараттың құрамына кіретін кез келген басқа компоненттерге жоғары сезімталдық

• бүйректің ауыр жеткіліксіздігі (креатинин клиренсі <35 мл/мин)

• жүктілік және лактация кезеңі

• балалар мен 18 жасқа дейінгі жасөспірімдерге

Золедрон қышқылы клиникалық зерттеулерінде ісікке қарсы препараттармен, диуретиктермен (ілмектік диуретиктерден басқа), антибиотиктермен және анальгетиктермен параллель қолданылды. Препараттың клиникалық тұрғыдан елеулі өзара әрекеттесулері анықталған жоқ. Золедрон қышқылы сияқты бисфосфонаттарды аминогликозидтермен, кальцитонинмен немесе ілмектік диуретиктермен параллель қолданғанда сақтық таныту ұсынылады, өйткені препараттарды бір мезгілде қолдану сарысудағы кальций деңгейінің қажеттісіне қарағанда ұзақ уақытқа төмендеуіне алып келуі мүмкін. Золедрон қышқылы мен басқа нефроуыттылығы зор препараттарды тағайындағанда сақтық таныту керек. Золедрон қышқылы мен антиангиогенді препараттарды тағайындағанда сақтық таныту керек, өйткені ол препараттарды бір мезгілде қолданғанда пациенттерде жақсүйек остеонекрозы жиілігінің артқаны байқалған.

Емдеуді бастар алдында және барлық емдеу курсы бойына дегидратация және гиповолемия симптомдарына түзету жүргізу қажет. Тәулігіне 2 л жуық диурезді барлық емдеу курсы бойына ұстап тұру ұсынылады.

Емдеу басталғаннан кейін қан сарысуындағы кальций, фосфор және магнийдің концентрациясына мұқият мониторинг жүргізу қажет. Золедрон қышқылы бастапқы гипокальциемиясы бар пациенттерде қолданылмайды. Электролиттік теңгерімнің бұзылуы (гипокальциемия, гипомагниемия немесе гипофосфатемия) қысқа мерзімді орнын толтырушы ем жүргізуді қажет етеді.

Әр дозасын енгізер алдында бүйрек функциясын анықтау үшін, креатинин концентрациясын анықтау қажет.

Бүйрек функциясының үдемелі бұзылуымен расталған қатерлі жаңа түзілімдер кезінде гиперкальциемияны емдеу үшін золедрон қышқылын қабылдаған пациенттердің жағдайы, үздіксіз емдеудің күтілетін пайдасының ықтимал қауіптен басымдығын анықтау үшін тиісінше бағалануы тиіс. Бүйрек функциясының бүйрек жеткіліксіздігіне дейінгі клиникалық тұрғыдан елеулі нашарлау мүмкіндігіне байланысты, бір реттік дозасы 4 мг-ден аспауы тиіс және инфузияның ұзақтығы кемінде 15 минутты құрауы тиіс.

Жүрек жеткіліксіздігі бар пациенттерде шамадан тыс гидратацияны болғызбау керек.

Обыр ісігі бар, емдеу кестесіне бифосфонаттар қосылған пациенттердегі жақсүйек остеонекрозы жағдайлары туралы хабарламалар болған. Бұл пациенттердің көпшілігі химиотерапия мен кортикостероидтарды да қабылдаған. Хабарламалардың көпшілігі тіс жұлу сияқты стоматологиялық емшаралар жүргізілген, сонмен қатар, остеомиелиттерді қоса, жергілікті инфекция белгілері болған пациенттерге қатысты болды.

Анамнезінде обыр ісіктері, химиотерапия, кортикостероидтарды қабылдау, ауыз қуысы гигиенасының қиындықтары сияқты қауіп факторлары бар пациенттерге бисфосфонаттармен емдеу басталғанға дейін тістерді тексеру мен санация жүргізу ұсынылады. Бисфосфонаттармен емдеу кезінде бұл пациенттер, мүмкіндігінше жарақаттайтын стоматологиялық емшаралардан аулақ болғаны дұрыс, өйткені бисфосфонаттар жақсүйек остеонекрозының туындауына жағдай туғызады деп шамаланады. Стоматологиялық емшараларды қажет ететін пациенттерде бисфосфонаттардың дозасын азайтқанда немесе бисфосфонаттармен емдеуді тоқтатқанда жақсүйек остеонекрозының даму қаупінің төмендегені туралы хабарлар болмаған. Бұл жағдайда пациентті емдеудің клиникалық кестесін емдеуші дәрігер анықтайды және пайда/қауіп арақатынасының жекелей бағалануын негізге алады.

Бұлшықет ауыруы

Маркетингтен кейінгі зерттеулерде бисфосфонаттарды қабылдаған пациенттерде жедел, кейде мүгедектікке ұшырататын сүйектердің, буындардың және/немесе бұлшықеттердің ауыруы туралы хабарланған. Симптомдардың басталуына дейінгі уақыт емдеуді бастағаннан кейін бір күннен бірнеше айға дейін ауытқып отырған. Пациенттердің көпшілігінде емдеуді тоқтатқаннан кейін симптомдар айқындығының азаюы орын алды. Пациенттердің аталған санатында егер, дәл осы дәрілік затпен немесе басқа бисфосфонатпен емдеу қайта басталса, симптомдарының қайталануы байқалған.

Дәрілік заттың автокөлік немесе қауіптілігі зор механизмдерді басқару қабілетіне әсер ету ерекшеліктері

Препараттың автокөлікті басқару мен механизмдерді пайдалану қабілетіне әсер етуіне қатысты зерттеулер жүргізілген жоқ, бірақ ОЖЖ тарапынан жағымсыз әсерлер туындаған жағдайда, ондай қызмет түрлерімен шұғылданбау керек.

Золдрис препаратының артық дозалануы кезіндегі жедел уыттану туралы клиникалық мәліметтер шектеулі.

Симптомдары: препараттың ұсынылғанынан артық дозаларын қабылдаған пациенттер мұқият қадағалауда болуы тиіс, өйткені бүйрек функциясының бұзылуы (бүйрек жеткіліксіздігін қоса) және сарысу электролиттері (кальций, фосфор және магнийді қоса) деңгейінің бұзылулары туралы хабарланған.

Емі: клиникалық тұрғыдан елеулі гипокальциемияны кальций глюконатының инфузиясы арқылы бейтараптандыруға болады.

АҚШФ бойынша I типті, сыйымдылығы 5 мл түссіз шыныдан жасалған, сұр түсті резеңке тығынмен тығындалған, «flip-off» типті сарғыштау-қоңыр түсті алынып-салынатын пластмасса қақпағы бар алюминий қалпақшалармен қаусырылған құтыларда.

Препараты бар 1 құтыдан медициналық қолдану жөніндегі мемлекеттік және орыс тілдеріндегі нұсқаулықпен бірге картоннан жасалған қорапшаға салынған.

Түпнұсқалық қаптамасында, 25 C-ден аспайтын температурада сақтау керек.

Балалардың қолы жетпейтін жерде сақтау керек!

2 жыл

Жарамдылық мерзімі өткеннен кейін пайдалануға болмайды.

Рецепт арқылы

Өндіруші ұйымның атауы мен елі

Health Biotech Ltd., Үндістан

Висвас Лайфсайнсес Пвт. Лтд, Үндістан

Қазақстан Республикасы аумағында тұтынушылардан өнімнің сапасына қатысты шағымдарды қабылдайтын ұйымның мекенжайы

«Тачголд» ЖШС, Алматы қ., Достық д-лы, 85А, 306 кеңсе, тел.: 8 -727-2722175

Қазақстан Республикасы аумағында дәрілік заттың тіркеуден кейінгі қауіпсіздігін қадағалауға жауапты ұйымның мекенжайы

«Тачголд» ЖШС, Алматы қ., Достық д-лы, 85А, 306 кеңсе, тел.: 8 -727-2722175