Дуксет (30 мг)

ДУКСЕТ

Дулоксетин

Босап шығуы кейінге қалдырылған 30 мг, 60 мг капсулалар

Бір капсуланың құрамында

белсенді зат - 176.100 мг немесе 352.200 мг дулоксетин микропеллеті

қосымша заттар: бейтарап пеллеттер, кристалды қант, гидроксипропилметилцеллюлоза 603, гипромеллоза ацетаты сукцинат-LF (НРМС-AS-LF), тальк, триэтилцитрат, 25% аммиак ерітіндісі, Opadry white 02A28361 бояғыш заты (гипромеллоза, титанның қостотығы, тальк)

капсула корпусының және қақпақшасының құрамы: индиготин – FD&C Blue2 (Е 132), титанның қостотығы (Е171), темірдің сары тотығы (Е172), желатин

Ақ түсті біркелкі корпусы және қою көк түсті тегіс қақпақшасы бар, өлшемі №3, қатты желатинді капсулалар (30 мг дозасы үшін).

Ақшыл-жасыл түсті біркелкі корпусы және қою көк түсті біркелкі қақпақшасы бар, өлшемі №1, қатты желатинді капсулалар (60 мг дозасы үшін).

Капсуланың ішіндегісі – ақшыл-крем түсті микропеллеттер.

Психоаналептиктер. Антидепрессанттар. Басқа да антидепрессанттар. Дулоксетин.

АТХ коды N06AX21

Фармакокинетикасы

Дулоксетин жалғыз энантиомер ретінде тағайындалады. Дулоксетин тотықтырғыш ферменттермен (CYP1A2 және полиморфты CYP2D6) қарқынды түрде метаболизденіп, әрі қарай конъюгацияланады. Дулоксетиннің фармакокинетикасы субъектаралық үлкен ауытқушылығымен (жалпы алғанда 50 - 60%), ішінара жынысына, жасына, шылым шегуіне және CYP2D6 метаболизаторының жағдайына байланысты ерекшеленеді.

Сіңуі. Дулоксетин ішке қабылдаған кезде жақсы сіңіп, қабылдаудан кейін 6 сағат өткен соң қан плазмасында ең жоғары концентрацияға (Cmax) жетеді. Сіңуі препаратты қабылдағаннан кейін орта есеппен 2 сағаттан соң басталады. Дулоксетиннің абсолютті пероральді биожетімділігі 32 - 80% шегінде (орта есеппен 50%) болады. Тамақ ішу препараттың қандағы концентрациясына ықпалын тигізбейді, бірақ Cmax жету уақытын 6-дан 10 сағатқа дейін арттырады, бұл сіңу дәрежесін аздап (шамамен 11%-ға) төмендетеді. Препаратты кешке қабылдағанда, таңертеңгі дозамен салыстырғанда, дулоксетиннің сіңуін 3 сағатқа кідіртеді және дулоксетиннің үштен бірінің клиренсін арттырады.

Таралуы. Дулоксетин шамамен плазма ақуыздарымен, негізінен, альбуминмен және α1-қышқыл гликопротеинмен 96%-ға байланысады. Бүйрек немесе бауыр функцияларының бұзылулары қан ақуыздарымен байланысу дәрежесіне ықпалын тигізбейді. Таралу көлемі орта есеппен 1640 л-ге жуықты құрайды.

Метаболизмі. Дулоксетин белсенді түрде метаболизденеді және оның метаболиттері негізінен несеппен (70%-ға жуығы) және 20%-ы нәжіспен бірге шығарылады. P450-2D6 және 1A2 цитохромының екеуі де негізгі екі метаболиттің (4-гидроксидулоксетиннің глюкуронды конъюгаты, 5-гидрокси 6-метоксидулоксетиннің сульфат конъюгаты) түзілуін катализдейді.

Шығарылуы. Дулоксетиннің жартылай шығарылу кезеңі орта есеппен 12 сағатты (8-ден 17 сағатқа дейінді) құрайды. Дулоксетин тұрақты концентрацияға әдеттегідей препаратты 3 күн қолданғаннан кейін жетеді. Пероральді түрде қабылдағанда дулоксетиннің орташа клиренсі сағатына 101 л (сағатына 33-тен 261 л-ге дейінді), вена ішіне енгізгенде – сағатына 36 л (22-ден 46 л-ге дейінді) құрайды.

Егде жастағы пациенттер: Егде жастағы пациенттерді емдеген кезде сақтық таныту ұсынылады.

Бүйрек функциясының бұзылуы: Дулоксетин бүйрек функциясының терминальді сатыдағы жеткіліксіздігі немесе бүйрек функциясының ауыр жеткіліксіздігі бар (креатинин клиренсі <30 мл/мин) пациенттерге қолданылмауы тиіс. Дулоксетиннің фармакокинетикасы жөнінде деректер бүйрек функциясының жеңіл және орташа дәрежедегі жеткіліксіздігі бар пациенттерде шектеулі.

Бауыр функциясының бұзылуы: Дулоксетиннің және оның метаболиттерінің фармакокинетикасы бауыр функциясының жеңіл және ауыр дәрежедегі жеткіліксіздігі бар пациенттерде зерттелген жоқ. Дулоксетин бауыр функциясының жеткіліксіздігі бар пациенттерде қолданылмауы тиіс.

Лактация кезеңі: Дулоксетинді күніне екі рет 40 мг дозада қабылдағанда емшек сүтіне бөлініп шығады және емшек сүтіндегі дулоксетиннің мөлшері күніне 7 мг-ге жуықты құрайды. Лактация дулоксетиннің фармакокинетикасына ықпалын тигізбейді.

Фармакодинамикасы

Әсер ету механизмі

Дулоксетин серотонинді (5-HT) және норадреналинді (NA) кері қармап қалатын біріктірілген тежегіш болып табылады, ол дофаминді кері қармап қалмайтын елеулі тежегіш әсер бермейді және гистаминдік, дофаминергиялық холинергиялық және адренергиялық рецепторларға айтарлықтай ұқсастығы жоқ.

Фармакодинамикалық әсері

Дулоксетин сондай-ақ нейропатиялық және қабыну ауыруларының кейбір эксперименттік үлгілерінде ауыру шегін қалыпқа келтіреді және созылмалы ауыру үлгісінде ауыру сезімдерінің айқындылығын азайтады. Дулоксетиннің ауыруды басатын әсері орталық жүйке жүйесі шегінде баяу тежелуімен жүзеге асырылуы мүмкін.

Ересектер

• үлкен депрессиялық бұзылыста (ҮДБ)

• жайылған үрейлі бұзылыстар (ЖТБ)

• диабеттік шеткері нейропатияның (ДШНП) ауыртатын түрінде

Қатаң түрде дәрігердің тағайындауымен қолдану керек!

Ішке қабылдауға арналған. Капсуланы шайнамай және ұсақтамай тұтастай жұтқан жөн. Капсуланы ашуға және капсуланың ішіндегісін тамақпен немесе сұйықтықпен араластыруға болмайды.

Үлкен үрейлі бұзылыс (ҮДБ)

Дуксеттің ұсынылған бастапқы және демеуші дозасы, тамақ ішуге қарамай, күніне 1 рет 60 мг құрайды.

Емдік жауабы әдетте 2 - 4 апта емдегеннен кейін білінеді.

Депрессияға қарсы әсерін консолидациялағаннан кейін, аурудың қайталануына жол бермеу мақсатында, емдеуді жалғастыру ұсынылады. Дуксетпен емдеуге жауап беретін және анамнезінде қайталанған депрессия көріністері бар пациенттерде әрі қарай 60-тан 120 мг-ге дейінгі дозада ұзақ емдеу ықтималдылығын қарастыру қажет.

Жайылған үрейлі бұзылыс:

Жайылған үрейлі бұзылыс бар пациенттерде ұсынылатын бастапқы доза, тамақ ішуге қарамай-ақ, күніне бір рет 30 мг құрайды. 30 мг дозаға жауабы жеткіліксіз пациенттерде препараттың дозасы күніне бір рет 60 мг-ге дейін арттырылуы мүмкін.

Диабеттік шеткері нейропатияның (ДШНП) ауыртатын түрі

Дуксеттің бастапқы және ұсынылатын демеуші дозасы күніне 60 мг құрайды. Плазмадағы Дуксет концентрациясының жекелей аралық едәуір ауытқушылығы бар болғандықтан, 60 мг дозаға жауабы жеткіліксіз пациенттерде препараттың дозасы арттырылуы мүмкін.

Пациенттің емдеуге реакциясына 2 ай емдеуден кейін баға берілуі тиіс. Бастапқы жауабы жеткіліксіз болған пациенттерде, осы уақыт аралығынан кейінгі қосымша реакцияның болуы екіталай. Емдік пайдасына баға беру ұдайы (үш айда кем дегенде бір рет) қайта қарастырылуы тиіс.

Диабет бүйрек ауруымен жиі асқынатын болғандықтан, бүйрек функциясы бұзылған пациенттерді емдеу препараттың өте төмен дозасынан басталуы және Дуксет дозасын арттыру біртіндеп жүргізілуі тиіс.

Дуксетті пациенттердің ерекше топтарында қолдану

18 жасқа дейінгі балалар мен жасөспірімдерге қолдану

Дуксет препаратын үлкен депрессиялық бұзылыстарды емдеу үшін, қолданудың қауіпсіздігімен және тиімділігімен байланысты ықтимал мәселелерін ескеріп, 18 жасқа дейінгі балалар мен жасөспірімдерге тағайындау ұсынылмайды.

Дуксетті қолданудың қауіпсіздігі мен тиімділігі диабеттік шеткері нейропатияда немесе жайылған үрейлі бұзылыстарда ауыру синдромы бар 18 жасқа дейінгі балалар мен жасөспірімдерде зерттелген жоқ.

Егде жастағы пациенттерде қолдану

Егде жастағы пациенттерге тек жасына негіздей отырып, дозаны түзету қажет болмайды.

Үлкен депрессиялық бұзылыстарда, деректер шектеулі болғандықтан, егде жастағы пациенттерді емдегенде, әсіресе Дуксетті 120 мг дозада тағайындағанда сақтық шараларын қолдану қажет.

Бауыр функциясы бұзылған пациенттерде қолдану

Дуксет бауыр функциясының жеткіліксіздігіне әкеп соғатын бауыр аурулары бар пациенттерге пайдаланылмауы тиіс.

Бүйрек функциясы бұзылған пациенттерде қолдану

Бүйрек функциясының жеңіл және орташа дәрежедегі бұзылулары бар (креатинин клиренсі 30 - 80 мл/мин) пациенттерде Дуксет дозасын түзету қажет емес. Дуксет бүйрек функциясының ауыр жеткіліксіздігі бар (креатинин клиренсі минутына 30 мл-ден аз) пациенттерде пайдаланылмауы тиіс.

Дуксетпен емдеуді тоқтатқан кезде байқалатын тоқтату синдромы

Емдеуді күрт тоқтатуға жол бермеу қажет. Тоқтату синдромының даму қаупін азайту үшін дозаны төмендету 1 - 2 апта ішінде біртіндеп жүргізілуі тиіс. Препарат дозасын төмендеткеннен кейін немесе емдеуді тоқтатқанда жақпаушылық симптомдары пайда болған жағдайда, оны қабылдау бұрынғы белгіленген дозада қайта жаңғыртылуы мүмкін. Әрі қарай дәрігер дозаны азайтуды, бірақ өте баяу қарқынмен ғана жалғастыруы мүмкін.

Дуксет қабылдаған пациенттерде келесі жағымсыз реакциялардың дамығаны жөнінде өте жиі мәлімделді: жүректің айнуы, бас ауыру, ауыздың кеберсуі, ұйқышылдық және бас айналу. Жиі байқалатын жағымсыз реакциялардың көбісі әдетте емнің бас кезінде пайда болатын және емдеуді жалғастырғанда көптеген жағдайларда бәсеңдейтін әлсіз немесе орташа айқын болды.

Өте жиі(≥10%)

• бас ауыру, ұйқышылдық

• жүректің айнуы, ауыздың кеберсуі

Жиі(≥1%, <10%)

• тәбеттің нашарлауы, салмақтың кемуі

• ұйқысыздық, ажитация, либидоның нашарлауы, үрейлену/мазасыздық, патологиялық оргазм, патологиялық түстер көру

• бас айналу, летаргия, тремор, парестезия, естен тану, қажығыштық

• көрудің бұлдырауы, тиннит

• жүрек қағуының жиілеуі

• артериялық қысымның жоғарылауы, бетке қан тебу

• іш қату, диарея, іштің ауыруы, құсу, диспепсия, метеоризм, есінеу

• қатты терлеу, бөртпе

• бұлшықет-қаңқа ауыруы, бұлшықет түйілуі

• дизурия, поллакиурия

• эректильді дисфункция, эякуляцияның бұзылуы, эякуляцияның кідіруі

Жиі емес (≥0,1%, <1%)

• ларингит, тамақта кернеу сезімі, мұрыннан қан кету

• гипергликемия (әсіресе қант диабеті бар пациенттерде)

• суицидтік ойлар, ұйқының бұзылуы, бруксизм, бағдардан адасу, апатия

• миоклонус, акатизия, күйгелектік, зейіннің нашарлауы, дисгевзия, дискинезия, мазасыз аяқ синдромы, ұйқы сапасының нашар болуы

• мидриаз, көрудің бұзылуы

• вертиго, құлақтың ауыруы

• тахикардия, суправентрикулярлы аритмия (көбіне жүрекшелердің фибрилляциясы)

• естен тану, гипертензия, ортостатикалық гипотензия, шеткері қан айналымының бұзылуы (аяқ-қолдың мұздауы)

• асқазан-ішектік қан кету, гастроэнтерит, кекіру, гастрит, дисфагия

• гепатит, бауыр ферменттері (АЛТ, АСТ, сілтілік фосфатаза) деңгейінің жоғарылауы, бауырдың жедел зақымдануы

• түнгі тершеңдік, есекжем, жанаспалы дерматит, суық тер, фотосенсибилизация, қанталаулардың түзілуіне жоғары үрдіс, кеуденің ауыруы, патологиялық сезімдер, мұздау сезімі, шөлдеу, дімкәстік, қызу сезімі, жүріс-тұрыс мәнерінің бұзылуы

• бұлшықет сіресуі, бұлшықет құрысулары

• несептің іркілуі, несеп шығарудың бұзылуы, никтурия, полиурия, несеп шығару ағынының төмендеуі

• гинекологиялық қан кету, етеккір оралымының бұзылуы, сексуальді дисфункция, аталық бездің ауыруы

• салмақтың артуы, қандағы креатинфосфокиназа деңгейінің жоғарылауы, қандағы калий деңгейінің артуы

Сирек (≥0,01%, <0,1%)

• анафилаксиялық реакция, аса жоғары сезімталдық

• гипотиреоз, тризм, Стивенс-Джонсон синдромы, ангионевроздық ісіну

• дегидратация, гипонатриемия, диурезге қарсы гормонның адекватты емес секрециясы синдромы (ДҚГАЕСС)

• суицидтік мінез-құлық, мания, елестеулер, агрессия және ашу, серотониндік синдром, құрысулар, психомоторлы мазасыздық, экстрапирамидтік симптомдар

• глаукома, гипертониялық криз

• стоматит, қан аралас нәжіс, ауыздан жағымсыз иістің шығуы, несептің патологиялық иісі

• бауыр функциясының жеткіліксіздігі, сарғаю

• менопауза симптомдары, галакторея, гиперпролактинемия

• қанда холестерин деңгейінің жоғарылауы

Өте сирек (<0,01%)

• тері васкулиті

• микроскопиялық колит

Жеке жағымсыз реакциялардың сипаттамасы

Дуксетті қабылдауды тоқтату (әсіресе емдеудің күрт тоқтатқанда) әдетте тоқтату симптомдарының пайда болуына әкеледі. Өте кең таралған реакцияларға: бас айналу, сезімталдықтың бұзылулары (парестезияны немесе электр тогымен зақымдануға ұқсас сезім, әсіресе баста), шаршау, ұйқышылдық, қозу немесе үрейлену, жүректің айнуы және/немесе құсу, тремор, бас ауыру, миалгия, күйгелектік, диарея, қатты терлеу және вертиго жатады.

• дулоксетинге немесе препараттың қосымша компоненттеріне жоғары сезімталдық

• сирек тұқым қуалайтын фруктоза жақпаушылығы, глюкоза-галактоза мальабсорбциясы немесе сахароза-изомальтоза жеткіліксіздігі проблемалары бар пациенттерде

• бауыр функциясының жеткіліксіздігіне әкеп соғатын бауыр аурулары

• бауыр функциясының ауыр жеткіліксіздігі (креатинин клиренсі минутына 30 мл-ден кем)

• потенциалды гипертониялық кризге әкеп соғатын бақыланбайтын гипертензия

• бақыланбайтын жабық бұрышты глаукома

• препаратты моноаминоксидаза тежегіштерімен (МАОТ) бір мезгілде қолдану

• CYP1A2 күшті тежегіштерімен (мысалы, флувоксаминмен, ципрофлоксацинмен немесе эноксацинмен) бір мезгілде қолдану

• 18 жасқа дейінгі балалар мен жасөспірімдер

• лактация кезеңі

CYP1A2 арқылы метаболизденетін дәрілік препараттар. Дуксетті (күніне 2 рет 60 мг) бір мезгілде қолдану теофиллиннің, CYP1A2 субстратының фармакокинетикасына елеулі ықпалын тигізген жоқ.

CYP1A2 индукторлары. Дулоксетиннің қан плазмасындағы концентрациясы шылым шегетіндерде, шылым шекпейтіндермен салыстырғанда, 50%-ға дерлік төмен.

CYP1A2 тежегіштері. CYP1A2 Дуксеттің метаболизміне қатысатын болғандықтан, препаратты CYP1A2 потенциалды тежегіштерімен бір мезгілде қабылдау дулоксетин концентрациясының жоғарылауына әкеп соғуы мүмкін. CYP1A2 тежегіші флувоксамин (күніне 1 рет 100 мг) плазмада дулоксетин клиренсін (күніне 2 рет 40 мг) шамамен 77%-ға төмендетті және AUC0-t және Cmax мәндерін 6 есе арттырды. Дуксетті CYP1A2 күшті тежегіштерімен (мысалы, циметидин, флувоксамин, кейбір хинолон туындылары (ципрофлоксацин, эноксацин сияқты)) біріктіріп пайдалану ұсынылмайды.

CYP2D6 арқылы метаболизденетін дәрілік препараттар. Дуксет CYP2D6 орташа тежегіші болып табылады. Дуксетті күніне 2 рет 60 мг дозада дезипраминмен, CYP2D6 субстратымен бір реттік бірге қабылдағанда, дезипраминнің AUC мәнінің 3 есеге артқаны байқалды. Дуксетті (күніне 2 рет 40 мг) бірге тағайындау толтеродиннің (күніне 2 рет 2 мг) AUC мәнін анықталған күйінен 71%-ға арттырды, бірақ оның белсенді 5-гидроксил метаболитінің фармакокинетикасына ықпалын тигізген жоқ және препарат дозасына түзету жүргізуді қажет еткен жоқ. Дуксетті көбіне CYP2D6 жүйесімен метаболизденетін препараттармен (мысалы, рисперидонмен, нортриптилин, амитриптилин және имипрамин сияқты үшциклді антидепрессанттармен (ТЦА), әсіресе емдік индексі тар препараттармен (мысалы, флекаинид, пропафенон немесе метопролол), фенотиазиндермен бір мезгілде тағайындағанда сақтық таныту қажет. Дуксетті үшциклді антидепрессанттармен бірге тағайындағанда плазмадағы концентрациясына мониторинг және ТЦА дозаларын кейіннен төмендету қажет етілуі мүмкін. Дуксет пен тиоридазинді, плазмадағы тиоридазиннің жоғары деңгейімен потенциалды байланысты күрделі қарыншалық аритмиялар дамитын және кенеттен өлімге ұшырайтын болғандықтан, бірге қолдану ұсынылмайды.

CYP2D6 тежегіштері. Дуксетті (күніне бір рет 40 мг) және пароксетинді (күніне бір рет 20 мг) бір мезгілде қолдану дулоксетиннің AUC мәнін шамамен 60%-ға арттырды, және үлкен дәрежедегі тежелу пароксетиннің өте жоғары дозаларында күтіледі. Осындай әсерлер CYP2D6 басқа күшті тежегіштерін (мысалы, флуоксетинді және хинидинді) қолданған кезде де күтіледі.

CYP2C9, CYP2C19 арқылы метаболизденетін дәрілік препараттар. Дуксет CYP2C9 және CYP2C19 белсенділігіне тежегіш ықпалын тигізбейді, демек, CYP2C19 субстраттарының метаболизмінің басылуы күтілмейді.

Лоразепам және темазепам. Лоразепаммен немесе темазепаммен бірге қолдану дулоксетиннің фармакокинетикасына ықпалын тигізген жоқ.

Пероральді контрацептивтер және басқа да стероидты дәрілер. Дуксет CYP3A белсенділігін тежемейді және көтермелемейді. CYP3A белсенділігінің индукциялануы немесе тежелуі салдарынан, CYP3A субстраттары (мысалы, пероральді контрацептивтер және басқа да стероидты дәрілер) метаболизмінің артуы немесе азаюы күтілмейді.

Антикоагулянттар және антиагрегантты дәрілер. СКҚСТ және СжНКҚТ-ті варфаринмен бірге тағайындағанда, қанталаудың жоғарылауын қоса, антикоагулянттық әсерлердің өзгерулері жөнінде мәлімделді. Дуксетті пероральді антикоагулянттармен немесе антиагрегантты дәрілермен бір мезгілде тағайындағанда, фармакодинамикалық өзара әрекеттесумен байланысты қан кетулер қаупі ұлғаюы мүмкін болғандықтан, сақтық танытқан жөн. Дуксетті және варфаринді бір мезгілде тағайындағанда халықаралық қалыптасқан қатынас (ХҚҚ) артуы мүмкін. Дулоксетиннің тромбоциттерге потенциалды ықпалын ескеріп, варфаринді қабылдап жүрген пациенттер Дуксетті қолданудың басында немесе онымен емдеуді тоқтатқан жағдайда бақылауда болуы тиіс.

Серотонинергиялық дәрілер. Сирек жағдайларда серотонинергиялық дәрілермен бірге СКҚСТ және СжНКҚТ қолданып жүрген пациенттерде серотониндік синдромның пайда болғаны жөнінде мәлімделді. Дуксетті СКҚСТ, СжНКҚТ, үшциклді антидепрессанттар сияқты серотонинергиялық препараттармен (мысалы, кломипрамин немесе амитриптилин), МАОТ (мысалы, моклобемид немесе линезолид), шайқураймен (Hypericum perforatum), триптандармен, трамадолмен, петидинмен және триптофанмен бір мезгілде тағайындағанда сақтық таныту қажет.

Антацидтер және Н2-антагонистері. Дуксетті құрамында алюминий- және магний бар антацидтермен немесе фамотидинмен бір мезгілде тағайындау 40 мг дозада пероральді түрде тағайындалған препараттың сіңу деңгейіне немесе дәрежесіне елеулі ықпалын тигізген жоқ.

Моноаминооксидаза тежегіштері. Серотониндік синдромның даму қаупіне байланысты, Дуксетті моноаминоксидазаның селективті емес, қайтымды емес тежегіштерімен (МАОТ) біріктірілімін, немесе МАОТ қолданып емдеуді тоқтатқаннан кейін 14 күн ішінде қолдану ұсынылмайды. Препараттың жартылай ыдырау кезеңін ескерсек, Дуксет қабылдауды тоқтатқаннан кейін МАОТ-ты қолдануға дейін кем дегенде 5 күн өтуі тиіс.

Дуксетті моклобемид сияқты селективті қайтымды МАОТ-пен бірге қолдану ұсынылмайды.

Линезолид және метиленді көк. Дуксетті қайтымды селективті емес МАОТ болып табылатын линезолид немесе серотониндік синдромның даму қаупінің жоғарылауына байланысты вена ішіне метилен көгін қабылдап жүрген пациенттерге тағайындау ұсынылмайды. Психиатриялық жағдайды шұғыл емдеуді қажет ететін пациенттерде басқа емдік шараларды жүргізу, соның ішінде ауруханаға жатқызу мүмкіндігін қарастыру қажет. Шұғыл жағдайларда, линезолидпен немесе метиленді көкпен емдеу Дуксетті қабылдап жүрген пациентке керек болған, емдеудің басқа альтернативті нұсқаулары болмаған жағдайда және линезолидті қолдануды немесе вена ішіне метилен көгін енгізудің потенциалды пайдасы нақты пациенттерде серотониндік синдромның даму қаупі шамамен басым болғанда, Дуксет қабылдауды дерек тоқтату және линезолидті және вена ішіне метилен көгі инъекциясын қолдану қажет. Серотониндік синдромының бар-жоқтығын анықтау үшін 5 күн бойы немесе линезолидтің соңғы дозасынан кейін немесе, ерте басталуына байланысты, вена ішіне метилен көгін енгізгеннен кейін 24 сағат өткен соң пациенттің жағдайына мониторинг жасау қажет. Дуксетпен емдеу линезолидтің соңғы дозасынан немесе метилен көгінің вена ішіне жасалған инъекциясынан кейін 24 сағаттан соң қайта жаңғыртылуы мүмкін. Дуксетті және метилен көгін енгізудің басқа жолдарын немесе вена ішіне 1 мг/кг шамасынан едәуір төмен дозада енгізуді бірге тағайындағанда серотониндік синдромның даму қаупі белгісіз. Дәрігер препаратты осындай жолмен тағайындағанда серотониндік синдромның пайда болуы мүмкін екендігі жөнінде хабардар болуы тиіс.

ОЖЖ-ге ықпалын тигізетін дәрілік препараттар. Дуксетті басқа препараттармен және орталық жүйке жүйесіне (ОЖЖ) ықпалын тигізетін дәрілермен бірге қолдану қаупі, осы бөлімде сипатталған жағдайлардан басқасында, жүйелі түрде талданған жоқ. Дуксетті алкогольді және седативтік препараттарды (мысалы, бензодиазепиндер, морфиномиметиктер, антипсихотиктер, фенобарбитал, седативтік әсері бар антигистаминдік препараты) қоса, дәрілік заттармен немесе орталық әсері бар заттармен бірге қабылдағанда сақтық танытқан жөн.

Асқазан сөлінің қышқылдылығына ықпалын тигізетін препараттар. Дуксеттің энтеросолюбильді жабыны бар, ол капсулалардың рН 5,5-тен аспайтын асқазан-ішек жолының сегментіне жеткенше еруіне кедергі жасайды. Дуксеттің ішектік жабынымен қорғалмаған өте қышқыл ортада гидролизге ұшырап, нафтол түзуі мүмкін. Асқазанның босауын баяулатуы мүмкін жағдайлары (мысалы, қант диабеті) бар пациенттерде Дуксетті сақтықпен қолданған жөн. Асқазан-ішек жолында рН-ты арттыратын дәрілік препараттар дулоксетиннің өте ерте босап шығуына әкеп соғуы мүмкін. Дегенмен, Дуксетті құрамында алюминий- және магний бар антацидтермен (51 мг-экв) немесе фамотидинмен бірге Дуксетті бірге енгізу препаратты 40 мг дозада енгізгеннен кейін дулоксетиннің сіңу жылдамдығына және дәрежесіне елеулі ықпалын тигізген жоқ. Дуксетті және протонды помпа тежегіштерін бірге қолданудың препараттың сіңуіне ықпалы белгісіз.

Қан ақуыздарымен жоғары дәрежеде байланысатын препараттар. Дулоксетин қан плазмасы ақуыздарымен елеулі дәрежеде байланысады. Сондықтан Дуксетті пациенттерге қан плазмасы ақуыздарымен жоғары дәрежеде байланысатын басқа препаратты қабылдау аясында тағайындау осы препараттың концентрациясының жоғарылауына әкелуі мүмкін, бұл жағымсыз реакциялардың дамуына әкеп соғады.

Алкоголь. Алкогольді көп мөлшерде қолдану аясында Дуксетті қолдану бауырдың ауыр зақымдануына әкеп соғуы мүмкін. Алкогольді шамадан тыс пайдаланатын пациенттерге Дуксетті тағайындау ұсынылмайды.

Айрықша нұсқаулар

Мания және құрысулар. Дуксетті анамнезінде маникальді көріністер, биполярлық бұзылыс және/немесе құрысу бұзылыстары бар пациенттерде сақтықпен қолданған жөн.

Мидриаз. Дуксетті қабылдаған кезде мидриаздың туындауы мүмкін болғандықтан, Дуксетті көзішілік қысымы жоғарылаған пациенттерге немесе жабықбұрышты глаукоманың даму қаупі тобындағы адамдарға тағайындағанда сақтандыру шараларын қолдану қажет.

Артериялық қысым (АҚ) және жүректің жиырылу жиілігі (ЖЖЖ). Кейбір пациенттерде дулоксетинді қабылдау артериялық қысымның жоғарылауымен және клиникалық тұрғыдан маңызды гипертензияның пайда болуымен байланысты. Бұл дулоксетинде норадренергиялық әсердің болуымен байланысты болуы мүмкін. Гипертониялық криз жағдайлары дулоксетинді қабылдаған кезде, әсіресе анамнезінде гипертензия бар пациенттерде білінді. Гипертензиясы және/немесе жүрек аурулары бар пациенттерде, әсіресе Дуксетпен емдеудің алғашқы айы ішінде артериялық қысымға мониторинг жүргізу ұсынылады. Препаратты жағдайы жүректің жирылу жиілігінің артуына немесе артериялық қысымның жоғарылауына байланысты нашарлаған пациенттерде сақтықпен қолдану қажет. Дуксетті препарат метаболизмін бұзуы мүмкін дәрілік препараттармен бірге тағайындағанда сақтық шараларын қолдану қажет. Дуксетті қабылдаған кезде артериялық қысымның үнемі жоғарылауын бастан кешетін пациенттер үшін дозаны төмендету, немесе препаратты қабылдауды біртіндеп тоқтату мүмкіндігін қарастыру қажет. Дулоксетинді бақыланбайтын гипертензиясы бар пациенттерде қабылдауды бастамаған жөн.

Бүйрек функциясының бұзылуы. Дуксетті бүйрек функциясының ауыр жеткіліксіздігі бар (креатинин клиренсі минутына 30 мл-ден аз) пациенттерде қолдану ұсынылмайды, өйткені қан плазмасындағы препарат концентрациясы артады.

Серотониндік синдром. Басқа серотониндік препараттар жағдайындағы сияқты, Дуксетпен емдеген кезде, әсіресе басқа серотонинергиялық агенттермен (СҚКСН, СжНКҚС, үшциклді антидепрессанттарды, триптандарды, фентанилді, литийді, трамадолды, триптофанды, буспиронды және шайқурайды қоса), серотонин метаболизмін бұзатын препараттармен (атап айтқанда, психикалық бұзылыстарды емдеуге арналған МАОТ, сонымен бірге басқа да препаратты, мысалы, линезолид және метилен көгі), психозға қарсы препараттармен немесе серотонинергиялық нейромедиаторлы жүйелерге ықпалын тигізуі мүмкін допамин антагонистерін бірге қолданғанда өмір үшін потенциалды қауіпті – серотониндік синдром дамуы мүмкін. Серотониндік синдром симптомдары психикалық жағдайлардың өзгерулерін (мысалы, қозу, елестеулер, сандырақтау және қома), вегетативті жүйке жүйесінің тұрақсыздығын (мысалы, тахикардия, артериялық қысымның құбылмалылығы, бас айналу, тершеңдік, қан кернеулер, гипертермия), нейробұлшықет бұзылуларын (мысалы, тремор, сіресушілік, миоклонус, гиперрефлексия, қимыл-қозғалыс үйлесімінің бұзылуы), құрысуларды және/немесе асқазан-ішек симптомдарын (мысалы, жүректің айнуы, құсу, диарея) қамтуы мүмкін. Пациенттерде серотониндік синдром белгілерінің бар-жоқтығына мониторинг жасалуы тиіс. Дуксетті психикалық бұзылыстарды емдеуге арналған МАОТ-мен бір мезгілде қолдану ұсынылмайды. Егер емдеуге Дуксетті серотонинергиялық және/немесе допаминергиялық нейротрансмиттерлі жүйеге ықпалын тигізуі мүмкін басқа серотонинергиялық агенттермен бірге қолдану клиникалық негізделген болып табылады, бірақ пациентті әсіресе емдеуді бастау немесе дәрілік заттың дозасын арттыру кезінде мұқият бақылау қажет. Пациенттерге әсіресе емдеуді бастау немесе дәрілік заттың дозасын арттыру кезінде, Дуксетті және жоғарыда көрсетілген препараттарды бір мезгілде қолданған кезде серотониндік синдромның даму қаупін жөнінде алдын ала ескертілуі тиіс. Серотонинергиялық синдром дамыған жағдайда Дуксетпен және кез келген сәйкес келетін серотонинергиялық препараттармен емдеу дереу тоқтатылуы тиіс және симптоматикалық ем басталуы тиіс.

Шайқурай. Дуксетті және құрамында шайқурай (Hypericum perforatum) бар өсімдік препараттарын бір мезгілде қолданғанда жағымсыз әсерлер пайда болуы мүмкін.

Суицидтік әрекеттер

Үлкен депрессиялық бұзылыс және жайылған үрейлі бұзылыс. Психиатриялық жағдайлар, соның ішінде депрессия пациентте суицидтік ойлардың, өзіне-өзі зақым келтірудің және өзіне-өзі қол жұмсаудың (суицидпен байланысты құбылыстардың) пайда болуының жоғары қаупімен астасуы мүмкін. Осы қауіп тұрақты ремиссия басталғанға дейін сақталады. Жағдайдың жақсаруы емдеудің алғашқы бірнеше аптасы ішінде пайда болмауына байланысты, пациентті жақсару басталғанша мұқият бақылау қажет. Жалпы клиникалық іс-тәжірибеге сәйкес, суицид қаупі сауығудың ерте сатыларында ұлғаюы мүмкін.

Дуксетті тағайындау ұсынылатын басқа психикалық бұзылыстар, сондай-ақ өзіне-өзі қол жұмсау қаупінің жоғарылауымен байланысты болуы мүмкін. Бұдан басқа, бұл жағдайлар депрессиялық бұзылыстармен қатар жүруі мүмкін. Басқа психикалық бұзылыстары бар пациенттерді емдеген кезде үлкен депрессиялық бұзылыстары бар пациенттердегі сияқты сақтық шараларын қолдану қажет.

Анамнезінде суицидтік көріністер немесе емдеуді бастағанға дейін суицидтік ойлар едәуір дәрежеде көрініс беретін пациенттер суицидтік ойлардың немесе мінез-құлықтың пайда болуының үлкен қаупі бар тобында болады және емделу кезінде мұқият бақылауда болуы тиіс. Пациенттерді, атап айтқанда жоғары қауіп тобындағыларды дәрілермен емдеу, әсіресе емдеудің ерте сатыларында және дозаны өзгерткен кезде мұқият бақылаумен жүргізілуі тиіс. Пациенттерге (және оларға күтім жасайтын адамдарға) клиникалық нашарлау симптомдары, суицидтік ойлар немесе мінез-құлықтар, мінез-құлықтың әдеттен тыс өзгерулері пайда болған жағдайда пациенттік бақылау және дәрігерге қаралу қажеттілігі жөнінде алдын ала ескертілуі тиіс.

Диабеттік нейропатиядағы ауыру синдромы. Дәрігерлер кез келген үрей тудыратын ойлар немесе сезімдер жөнінде хабарлап отыруға кез келген уақытта ынталы болуы тиіс.

Қан кету. Дуксетті қоса, серотонинді кері қармап қалатын селективті тежегіштерді және серотонинді және норадреналинді кері қармап қалатын тежегіштерді тағайындағанда қан кетулер (экхимоздар, гематомалар, петехиялар, мұрыннан қан кету, пурпуралар, асқазан-ішектік қан кетулер және өмірге қауіп төндіретін қан кетулер) қаупі ұлғаюы мүмкін. Антикоагулянттарды және/немесе тромбоциттердің функциясына ықпалын тигізетін дәрілік препараттарды (мысалы, ҚҚСП, ацетилсалицил қышқылы, варфарин) қабылдап жүрген пациенттерді, сондай-ақ қан кетудің туындауына бейімділігі бар пациенттерді емдеген кезде сақтық таныту қажет. Пациенттерге Дуксетті және ҚҚСП, аспиринді немесе коагуляцияға ықпалын тигізуі мүмкін басқа препараттарды бір мезгілде пайдаланғанда қан кетулердің пайда болу қаупі жөнінде алдын ала ескертілуі тиіс.

Гипонатриемия. Дуксетті тағайындаған кезде, егде жастағы пациенттерде, әсіресе анамнезінде сұйықтық теңгерімінің өзгеруі немесе осыған бейімдейтін жағдайлардың болуымен біріккенде, қан сарысуындағы натрий 110 ммоль/л дейін төмендеуі мүмкін. Гипонатриемия диурезге қарсы гормонның талапқа сай емес секрецисы синдромымен (ДҚГТЕСС) байланысты болуы мүмкін. Дуксетті гипонатриемияның даму қаупі жоғары пациенттерге, атап айтқанда егде жастағы адамдарға, бауыр циррозы немесе дегидратациясы бар, немесе диуретиктермен ем қабылдап жүрген науқастарға тағайындағанда сақтық таныту қажет.

Акатизия/психомоторлы қозу. Дуксетпен емдеудің алғашқы аптасы ішінде субъективті жағымсыз немесе қинайтын мазасыздықпен және тыныш түрегеліп тұру немесе отырудың мүмкін болмауымен жиі қатарласқан қимыл-қозғалыс қажеттілігімен сипатталатын акатизиялар дамуы мүмкін. Аталған симптомдары бар пациенттерде дозаны арттыру зиянын тигізуі мүмкін.

Құрамында дулоксетин бар дәрілік препараттар. Дулоксетин бірқатар көрсетілімдерде: нейропатияның ауыртатын түрін, жайылған үрейлі бұзылыстарды, кернеген кезде несепті ұстай алмауды емдеу әртүрлі саудалық таңбаларда қолданылады. Осы препараттарды біреуден артық тағайындауға жол бермеу қажет.

Гепатиттер/бауыр ферменттері деңгейінің жоғарылауы. Дуксетті тағайындаған кезде, емдеудің алғашқы айы ішінде, бауыр ферменттерінің едәуір (қалып шегінен 10 есе жоғары) ұлғаюын, гепатиттің және сарғаюдың дамуын қоса, бауыр зақымдануы (негізінен, гепатоцеллюлярлы) мүмкін. Дуксет бауырдың зақымдануын туындататын дәрілік препараттарды қабылдап жүрген пациенттерде сақтықпен қолдану қажет.

18 жасқа дейінгі балалар мен жаөспірімдер

Дуксет 18 жасқа дейінгі балалар мен жасөспірімдерді емдеуге қолданылмауы тиіс. 18 жасқа дейінгі балалар мен жасөспірімдердің өсуі мен дамуына қатысты қауіпсіздігі, сондай-ақ когнитивтік және мінез-құлықтың дамуы жөнінде ұзақ мерзімдік деректер жоқ.

Егде жастағы адамдар. Егде жастағы пациенттерде ауыр депрессиялық көріністерді емдегенде осы дозаны қолдану жөнінде жеткілікті деректер жоқ болғандықтан, Дуксетті 120 мг дозада тағайындағанда сақтық таныту қажет. Дуксетті жайылған үрейлі бұзылысы бар егде жастағы пациенттерде қолдану жөнінде жеткілікті ақпарат жоқ.

Емдеуді тоқтату. Тоқтату синдромы емдеуді тоқтатқан кезде, әсіресе емдеуді күрт тоқтатқанда болатын жеткілікті жиі құбылыс болып табылады. Серотонинді кері қармап қалатын селективті тежегіштерді (СКҚСТ) және серотонинді және норадреналинді кері қармап қалатын тежегіштерді (СНКҚТ)‎ қолданған кезде байқалатын тоқтату синдромының даму қаупі емдеу ұзақтығын, дозалануын және дозаны төмендету жылдамдығын қоса, бірнеше факторларға байланысты болуы мүмкін.

Тоқтату симптомдары әдетте емдеуді тоқтатқаннан кейін алғашқы бірнеше күн ішінде пайда болады, сирек – пациент препараттың кезекті қабылдануын өткізіп алғанда. Әдеттегідей, бұл тоқтату симптомдары өздігінен шектелетін сипатқа ие және әдетте, кейбір пациенттерде өте ұзақ (2-3 ай немесе одан көбірек) өтуі мүмкін болса да, 2 апта ішінде қайтады. Дуксетпен емдеуді жалғастыру қажеттілігі жоқ болғандықтан, пациенттің керек етуіне сәйкес, препаратты кем дегенде 2 апта бойы біртіндеп тоқтату ұсынылады.

Жүктілік және лактация

Жүкті әйелдерде Дуксетті қолданудың потенциалды қаупі анықталған жоқ. Жүктілік кезінде Дуксетті қолдану тәжірибесі жеткіліксіз болғандықтан, препаратты жүктілік кезінде, егер ана үшін болжамды пайдасы ұрық үшін потенциалды қаупінен басым болған жағдайда ғана, тағайындаған жөн.

Жүктілік кезінде, әсіресе кеш мерзімдерінде, СКҚСТ пайдалану жаңа туған нәрестелерде тұрақты өкпе гипертензиясының пайда болу қаупін ұлғайтуы мүмкін. Тұрақты өкпе гипертензиясының жаңа туған нәрестелерде дамуына және СКҚСТ емдеуге зерттеулердің жоқтығына қарамастан, препараттың әсер ету механизмін (серотонинді кері қармап қалудың тежелуі) ескерер болсақ, бұл потенциалды қауіп жоққа шығарылмауы мүмкін.

Басқа серотонинергиялық препараттар жағдайындағы сияқты, анасы босанар алдында Дуксетті қолданған жағдайда жаңа туған нәрестеде тоқтату синдромы пайда болуы мүмкін. Тоқтату синдромы өзіне гипотония, тремор, күйгелектік, тамақтанудың қиындылғы, тыныс алу функциясының жеткіліксіздігі және құрысулар сияқты симптомдарды қамтиды. Тоқтату синдромының пайда болуының көптеген жағдайлары нәресте туған кезде немесе туғаннан кейін бірнеше күн ішінде тіркелді.

Дуксетпен емделу кезеңінде жүктілік басталған немесе жоспарланған жағдайда пациент бұны емдеуші дәрігерге алдын ала ескертуі қажет.

Дуксетті балаларға қолданудың қауіпсіздігі жөнінде деректер жоқ болғандықтан, препаратты емшек емізу кезеңінде әйелдерге препаратты тағайындау ұсынылмайды.

Көлік құралын және механизмдерді басқару қабілетіне дәрілік заттың ықпал ету ерекшеліктері

Дуксетті қабылдау седативтік әсердің және бас айналудың пайда болуымен қатар жүруі мүмкін. Пациенттер седативтік әсер және бас айналу пайда болған жағдайда көлікті жүргізу немесе механизмдерді басқару сияқты потенциалды қауіпті істермен айналысуға жол бермеуі қажет.

Артық дозалануы келесі белгілермен және симптомдармен (дулоксетинмен монотерапияда немесе басқа дәрілік препараттармен біріктірілген емде) қатар жүруі мүмкін: ұйқышылдық, кома, серотонинді синдром, құрысулар, тахикардия және құсу.

Емі: спецификалық антидоты белгісіз. Серотонинді синдром пайда болған жағдайда спецификалық ем (мысалы, ципрогептадинмен және/немесе температураны бақылау) жүргізілуі мүмкін. Жедел артық дозаланған жағдайда емдеу кез келген препаратпен артық дозаланғанда қабылданатын жалпы шаралардан тұруы тиіс. Симптоматикалық және демеуші ем жүргізу ұсынылады. Белсендірілген көмір сіңуін шектеу үшін пайдалы болуы мүмкін. Дулоксетиннің таралу көлемінің үлкен болуына байланысты, қарқындатылған диурезді, гемоперфузияны және алмастыратын перфузияны қолданудың пайдасы екіталай.

Шығарылу түрі және қаптамасы

Поливинилхлоридті мөлдір үлбірден және баспалы алюминий фольгадан жасалған пішінді ұяшықты қаптамаға 7 капсуладан салынған.

Пішінді 2 немесе 4 қаптама медициналық қолдану жөнінде мемлекеттік және орыс тілдеріндегі нұсқаулықпен бірге өндіруші фирманың голограммасы бар қорапшаға салынған.

Құрғақ, жарықтан қорғалған жерде, 25ºС-ден аспайтын температурада сақтау керек.

Балалардың қолы жетпейтін жерде сақтау керек!

2 жыл

Жарамдылық мерзімі өткеннен кейін қолдануға болмайды.

Рецепт арқылы

Өндіруші/Тіркеу куәлігінің иесі

«Нобел Алматы Фармацевтикалық Фабрикасы» АҚ

Қазақстан Республикасы, Алматы қ., Шевченко к-сі, 162 Е

Тұтынушылардан дәрілік заттың сапасы жөніндегі шағымдарды (ұсыныстарды) Қазақстан Республикасы аумағында қабылдайтын және тіркеуден кейін дәрілік заттың қауіпсіздігін бақылауға жауапты ұйымның атауы, мекенжайы және байланыс деректері (телефон, факс, электронды пошта):

«Нобел Алматы Фармацевтикалық Фабрикасы» АҚ

Қазақстан Республикасы, Алматы қ., Шевченко к-сі, 162 Е

Телефон нөмірі: (+7 727) 399-50-50

Факс нөмірі: (+7 727) 399-60-60

Электронды поштасы: nobel@nobel.kz