Диклофенак (5% гель)
Инструкция
-
русский
-
қазақша
Саудалық атауы
ДИКЛОФЕНАК
Халықаралық патенттелмеген атауы
Диклофенак
Дәрілік түрі
Сыртқа қолдануға арналған 5 % гель
Құрамы
100 г гельдің құрамында
белсенді зат – 5,0 г натрий диклофенагы,
қосымша заттар: этанол, пропиленгликоль, карбопол, метилпарагидроксибензоат, троламин, лаванда майы, тазартылған су
Сипаттамасы
Ақ немесе реңі сарғыштау немесе крем тәрізді ақ, өзіне тән әлсіз иісі бар біртекті гель
Фармакотерапиялық тобы
Жергілікті қолдануға арналған қабынуға қарсы стероидты емес препараттар (ҚҚСП). Диклофенак
АТХ коды М02АА15
Фармакологиялық қасиеттері
Фармакокинетикасы
Препарат ауыру синдромын жою және қабыну үдерісімен байланысты ісінуді азайту үшін пайдаланылады. Жергілікті қолданғанда тыныш күйде және қозғалыс кезінде буындар ауыруын бәсеңдетеді немесе жоғалтады. Буындардың таңертеңгі қозғалмауы мен домбығуын азайтады, қимыл көлемінің ұлғаюына ықпал етеді. Препаратты ұсынылған тәсілмен жаққан кезде 6% аспайтын диклофенак сіңіріледі.
Фармакодинамикасы
Диклофенак препаратының белсенді компоненті – айқын аналгезиялық (ауыруды басатын) және қабынуға қарсы қасиеттерді иеленген қабынуға қарсы стероидты емес препарат (ҚҚСП). 1 және 2 типті циклооксигенезаны таңдаусыз бәсеңдету арқылы арахидон қышқылының метаболизмін және қабынудың дамуында негізгі буын болатын простагландиндер синтезін бұзады.
Қолданылуы
- жұмсақ тіндердің жарақаттан кейінгі қабынуында, мысалы созылу, шамадан тыс жүктемеде және соғылулар салдарынан
- жұмсақ тіндердің ревматизмдік ауруларында (тендовагинит, бурсит, периартикулярлық тіндердің зақымдануы)
- бұлшықет және буын ауруларымен (ревматоидты артрит, остеоартроз, радикулиттер, люмбаго, ишиас, ревматизмдік және ревматизмдік емес бұлшықет ауыруы) байланысты ауыру синдромы және ісінуде
Қолдану тәсілі және дозалары
Сыртқа. Ересектерге және 12 жастан асқан балаларға препаратты теріге күніне 2-3 рет жағып, жеңіл ысқылайды. Препараттың қажетті мөлшері ауратын аймақ көлеміне байланысты. Препаратттың бір реттік дозасы – 2 г дейін (сықпаның толық ашылған аузында 4 см жуық).
Препаратты жаққаннан кейін қолды жуу керек.
Емдеу ұзақтығы көрсеткіштері мен байқалған әсеріне байланысты. Препаратты 2 апта бойы пайдаланғаннан кейін дәрігермен кеңескен жөн.
Жағымсыз әсерлері
Жиі
- жайылған тері бөртпесі
Сирек
- экзема, фотосенсибилизация, жанаспалы дерматит (қышыну, қызару, терінің өңделетін бөлігінің ісінуі, папула, везикула, қабыршықтану)
Өте сирек
- аллергиялық реакциялар (есекжем, ангионевроздық ісіну, бронхоспастикалық реакциялар)
Қолдануға болмайтын жағдайлар
- диклофенакқа немесе препараттың басқа компоненттеріне, ацетилсалицил қышқылына немесе басқа да қабынуға қарсы стероидты емес препараттарға жоғары сезімталдық
- ацетилсалицил қышқылын немесе басқа да қабынуға қарсы стероидты емес препараттар қолданғанда бронх демікпесі ұстамалары, есекжем немесе жедел риниттер туындауына бейімділік («аспирин» демікпесі)
- тері жабындысы бүтіндігінің бұзылуы
- жүктілік (ІІІ триместр) және лактация кезеңі
- 12 жасқа дейінгі балаларға
Дәрілермен өзара әрекеттесуі
Препарат фотосенсибилизацияны туындататын препараттардың әсерін күшейтуі мүмкін. Басқа да дәрілік препараттармен клиникалық мәнді өзара әрекеттесулері сипатталмаған.
Айрықша нұсқаулар
Сақтықпен: бауыр порфириясы (асқыну), асқазан-ішек жолының эрозиялық-ойық жаралы зақымдануы, бауыр және бүйрек функциясының ауыр бұзылуы, созылмалы жүрек жеткіліксіздігі, бронх демікпесі, қан ұюының бұзылуы (оның ішінде гемофилия, қан кету уақытының ұзаруы, қан кетуге бейімділік), егде жас, жүктіліктің I және II триместрі.
Гельді ашық жараға түсірмей, зақымданбаған теріге ғана жағу керек. Жаққаннан кейін окклюзиялық таңғыш тағуға болмайды. Препаратты көзге және шырышты қабыққа түсірмеу керек.
Препараттың көп мөлшерін ұзақ уақыт бойы пайдаланғанда ҚҚСП тән жағымсыз әсерлердің пайда болуын жоққа шығаруға болмайды.
Дәрілік заттың көлік құралдарын және қауіптілігі зор механизмдерді басқару қабілетіне әсер ету ерекшеліктері
Сипатталмаған.
Артық дозалануы
Симптомдары: сыртқа қолданған кезде препараттың белсенді компоненттерінің жүйелі сіңуі өте төмен болғандықтан артық дозаланудың орын алуы іс жүзінде мүмкін емес. Жақпамайдың үлкен мөлшерін (20 г астам) кездейсоқ жұтып қойғанда, ҚҚСП тән жүйелі жағымсыз реакциялар пайда болуы мүмкін.
Емі: асқазанды шаю, белсендірілген көмір қабылдау қажет.
Шығарылу түрі және қаптамасы
30 г, 50 г-ден бұралған полимер бушонымен алюминий сықпада немесе бұралған полимер бушонымен ламинатты сықпада.
100 г-ден бұралған полимер бушонымен алюминий сықпада немесе бұралған полимер бушонымен ламинатты сықпада.
Әрбір сықпа медициналық қолдану жөніндегі мемлекеттік және орыс тіліндегі нұсқаулықпен бірге картон қорапшаға салынған.
Сақтау шарттары
15 °С-ден 25°С-ге дейінгі температурада сақтау керек. Мұздатып қатыруға болмайды.
Балалардың қолы жетпейтін жерде сақтау керек!
Сақтау мерзімі
3 жыл
Жарамдылық мерзімі өткеннен кейін пайдалануға болмайды.
Дәріханалардан босатылу шарттары
Рецептісіз
Өндіруші
«Синтез» ААҚ.
Ресей Федерациясы, 640008, Қорған қ., Конституция даңғылы, 7
Тел./факс (3522) 48-16-89
E-mail: real@kurgansintez.ru
Интернет-сайт: http://www.kurgansintez.ru
Тіркеу куәлігінің иесі
«Синтез» ААҚ, Ресей Федерациясы
Қазақстан Республикасы аумағында тұтынушылардан өнім сапасына қатысты шағымдарды қабылдайтын ұйымның мекенжайы
«СТОФАРМ» ЖШС, 000100, Қазақстан Республикасы,
Қостанай облысы, Қостанай қ., Орал к-сі, 14
тел. 714 228 01 79