Диклобрю

• русский
• қазақша

• Скачать инструкцию медикамента

Саудалық атауы

Диклобрю

Халықаралық патенттелмеген атауы

Диклофенак

Дәрілік түрі

Көктамыр ішіне және бұлшықет ішіне енгізуге арналған 75 мг/3 мл ерітінді

Құрамы

1 мл ерітіндінің құрамында

белсенді зат – 25 мг натрий диклофенагы,

қосымша заттар: бензил спирті, пропиленгликоль, натрий гидроксиді, натрий метабисульфиті, маннит, инъекцияға арналған су.

Сипаттамасы

Түссізден сарғыш түске дейінгі мөлдір ерітінді.

Фармакотерапиялық тобы

Қабынуға қарсы және ревматизмге қарсы препараттар. Қабынуға қарсы стероидты емес препараттар. Сірке қышқылының туындылары.

Диклофенак.

АТХ коды М01А В05

Фармакологиялық қасиеттері

Фармакокинетикасы

Диклофенак қан плазмасы ақуыздарымен 99%-ға байланысады. Тіндерге, синовиальді сұйықтыққа және емшек сүтіне жақсы өтеді. Жартылай шығарылу кезеңі 1-2 сағатты, синовиальді сұйықтықтан – 3–6 сағатты құрайды. Бауырда метаболизденеді. Шамамен 65%-ы глюкуронид және сульфатты қосылыстар түрінде несеппен бірге және шамамен 35%-ы нәжіспен және өтпен бірге шығарылады.

Фармакодинамикасы

Диклофенактың қабынуға қарсы және ауыруды сездірмейтін әсерлері бар. 1 және 2 циклооксигеназаны (ЦОГ) іріктемей тежеп, арахидон қышқылының метаболизмін бұзады, қабыну ошағында простагландиндер мөлшерін азайтады. Жарақаттарда, операциядан кейінгі кезеңде Диклофенак ауыру сезімін және қабынып ісінуді азайтады.

Қолданылуы

- жедел артриттерде (подагра ұстамасын қоса есептегенде)

- бурситте

- тендинитте

- операциядан кейінгі ауыру синдромында

- буындардың және омыртқаның қабыну және дегенеративтік ауруларында, соның ішінде ревматоидты артритте, шорбуынданатын спондилитте

Қолдану тәсілі және дозалары

Бұлшықетішілік еннгізу

Препарат ересек емделушілерге қолданылады. Препаратты бөксе аймағындағы бұлшықет ішіне терең инъекция жолымен енгізеді. Диклобрю инъекциясын қатарынан 2 күннен артық қолданбаған жөн. Емдеу қажет болғанда диклофенактің таблеткасы немесе ректальді свеча жәрдемімен жалғастыруға болады.

Бұлшықетішілік инъекция жасағанда, инъекция орнындағы жүйкелерді немесе басқа да тіндерді зақымдап алмау үшін, келесі ережелерді сақтау керек.

Препаратты бөксе аймағының жоғарғы сыртқы шаршысындағы бұлшықет ішіне терең етіп енгізген жөн. Доза әдетте күніне 1 рет 75 мг (1 ампуланың ішіндегіні) құрайды. Ауыр жағдайларда, ерекшелік ретінде 75 мг-нан 2 инъекция бірнеше сағат аралықпен жүргізілуі мүмкін (екінші инъекция екінші бөксе аймағына жүргізілуі тиіс).

Альтернатива ретінде препараттың күніне бір инъекциясын (75 мг) Диклофенактің басқа дәрілік түрлерін (таблеткалар, ректальді свечалар) қабылдаумен біріктіруге болады, мұндайда ең жоғары тәуліктік доза 150 мг құрайды.

Көктамырішілік инфузия

Диклобрюді, инъекцияға арналған ерітіндіні, көктамырішілік болюстік инъекция түрінде енгізбеген және қатарынан 2 күннен артық қолданбаған жөн.

Диклобрю инфузиясын бастаудың тура алдында, оның қажетті ұзақтығына байланысты, 100-500 мл 0,9% натрий хлоридінің ерітіндісінде немесе 5% глюкоза ерітіндісінде, контейнерді ашу бойына алынған инъекцияға арналған натрий бикарбонатының буферленген ерітіндісімен (0,5 мл 8,4% ерітінді немесе 1 мл 4,2%, немесе өзге концентрацияның тиісті көлемі) сұйылтқан жөн; осы ерітіндіге Диклобрю препаратының бір ампуласының ішіндегі затты қосу керек. Мөлдір ерітінділерді ғана пайдалануға болады. Егер ерітіндіден кристалдар немесе шөгінділер анықталса, инфузия үшін оны қолдануға болмайды.

Диклобрю препаратын, инъекцияға арналған ерітіндіні, дозалаудың екі альтернативтік режимі ұсынылады. Операциядан кейінгі орташа және ауыр ауырсынуларда емдеу үшін 75 мг препаратты 30 минуттан бастап 2 сағатқа дейін үздіксіз енгізу қажет. Қажет болғанда, емдеуді бірнеше сааттан соң қайталауға болады, бірақ доза 24 сағаттың кез келген кезеңі ішінде 150 мг-нан аспауы тиіс.

Операциядан кейінгі ауырсынулардың алдын алу үшін хирургиялық араласымнан кейін 15 мин-1 сағаттан соң 25-50 мг жүктеме дозаны енгізу қажет, осыдан кейін тәуліктік ең жоғары 150 мг дозаға дейін сағатына 5 мг үздіксіз инфузияны қолдану қажет.

Жағымсыз әсерлері

Келесі жағымсыз әсерлер Диклобрю препаратын, инъекцияға арналған ерітіндіні, қысқа мерзімге және ұзаққа қолданған жағдайда, енгізумен байланысты болатын құбылыстарды қамтиды.

Жиі (≥ 1/100, <1/10)

- бас ауыру, бас айналу

- жүректің айнуы, құсу, диарея, диспепсия, іштің ауыруы, метеоризм

- сұйықтықтың іркілуі, ісінулер, артериялық гипертензия

- бөртпе

- инъекция жасаған жердегі реакция, ауыру, қатаю

Сирек (≥ 1/10000, <1/1000)

- асқын сезімталдық, анафилактикалық және жалған анафилактикалық реакциялар (артериялық гипотензияны және шокты қоса есептегенде)

- ұйқышылдық

- демікпе (диспноэні қоса есептегенде), бронхтың түйілуі

- гастрит, гастроинтестинальді қан кетулер, қан аралас құсу, геморрагиялық диарея, мелена, асқазанның немесе ішектің ойық жарасы (қан кететін немесе онсыз, перфорация)

- гепатит, сарғаю, бауыр функциясының бұзылуы

- есекжем

- ісіну, инъекция жасаған жерде некроз

- трансаминазалар деңгейінің жоғарылауы

Өте сирек (< 1/10000)

- инъекция жасаған жерде абсцесс

- тромбоцитопения, лейкопения, анемия (гемолитикалық және апластикалық анемияны қоса есептегенде), агранулоцитоз

- ангионевротикалық ісіну (беттің ісінуін қоса есептегенде)

- бағыттан адасу, депрессия, инсомния, түнгі қорқыныштар, тітіркенгіштік, психикалық бұзылулар

- парестезиялар, жадының нашарлауы, құрысулар, үрейленушілік, тремор, асептикалық менингит, дәм сезімінің бұзылуы, инсульт

- көрудің бұзылуы, көрудің бұлдырауы, диплопия

- құлақтың шыңылдауы, естудің нашарлауы

- жүректің лүпілдеуі, кеуденің ауыруы, жүрек қызметінің жеткіліксіздігі, миокард инфарктісі

- артериялық гипертензия, васкулит

- пневмонит

- колит (геморрагиялық колитті және ойық жаралы колиттің өршуін немесе Крон ауруын қоса есептегенде), іш қату, стоматит, глоссит, өңеш тарапынан бұзылулар, ішектің диафрагма тәрізді стриктурасы, панкреатит

- фульминантты гепатит, гепатонекроз, бауырдың жеткіліксіздігі

- буллезді дерматит, экзема, эритеманың алуан түрі, мультиформалы эритема, Стивенс-Джонсон синдромы, уытты эпидермальді некролиз (Лайелл синдромы), эксфолиативті дерматит, алопеция, фотосезімталдық реакциясы, пурпура, Генох-Шенлейн пурпурасы, қышыну

- бүйректің жедел жеткіліксіздігі, гематурия, протеинурия, нефротикалық синдром, тубулоинтерстициальді нефрит, бүйректік папиллярлы некроз

- флебит

Диклофенак, әсіресе жоғары дозаларда (тәулігіне 150 мг) және ұзақ қолданғанда, артериялық тромбоэмболияның (мысалы, миокард инфарктісі немесе инсульт) пайда болу қаупін арттыруы мүмкін.

Қолдануға болмайтын жағдайлар

• әсер етуші затқа, натрий метабисульфитіне немесе препараттың кез келген басқа компоненттеріне белгілі асқын сезімталдық

• қабынуға қарсы стероидты емес басқа препараттарға (ҚҚСП), мысалы, ацетилсалицил қышқылына аллергиялық реакция, ол бронхтің түйілуімен, есекжеммен, жедел ринитпен немесе басқа да аллергиялық симптомдармен білінуі мүмкін

• жүктілік және лактация кезеңі

• асқазанның және ішектің белсенді ойық жарасы, қан кету немесе перфорация

• ішектің қабыну аурулары (мысалы, Крон ауруы немесе ойық жаралы колит)

• бауыр қызметі жеткіліксіздігінің ауыр түрі (Child-Pugh С класы, бауыр циррозы және асцит)

• бүйрек қызметі жеткіліксіздігінің орташа және ауыр түрлері (креатинин клиренсі < 30 мл / мин)

• жүрек қызметінің айқын жеткіліксіздігі (NYHA III-IV), брадикардия, кардиогендік немесе гиповолемиялық шок

• операциядан кейінгі қан кетудің пайда болу қаупі жоғары, гемостаз және қанның ұюы бұзылған, гемопоэздік бұзылулар немесе цереброваскулярлы қан кетулер қаупі бар емделушілер

• коронарлы шунттау операциясынан кейінгі ауыруларды емдеу (немесе жасанды қан айналымы аппаратын қолдану)

• бронх демікпесі

• 18 жасқа дейінгі балалар және жасөспірімдер

Дәрілермен өзара әрекеттесуі

CYP2C9 күшті тежегіштері: Диклофенакті CYP2C9 күшті тежегіштерімен (мысалы, вориконазол) бірге тағайындағанда сақ болу керек, олар диклофенактің қан плазмасындағы концентрациясының шыңын және, диклофенак метаболизмінің тежелуі есебінен, экспозициясын едәуір арттыруы мүмкін.

Литий, дигоксин

Диклобрю қан плазмасында литий мен дигоксиннің концентрациясын арттыруы мүмкін. Қан сарысуында литий мен дигоксин деңгейіне мониторинг жасауға кеңес беріледі.

Диуретиктер және антигипертензивтік дәрілер:

Басқа да ҚҚСП сияқты, диклофенакті диуретиктермен немесе антигипертензивнтік дәрілермен (мысалы, бета-блокаторлармен, ангиотензинге өзгертуші фермент (АӨФ) тежегіштерімен) бір мезгілде қолдану олардың гипертензияға қарсы әсерінің төмендеуіне әкеп соғады. Әсіресе егде жастағы емделушілер артериялық қысымын мұқият бақылап отыруы керек. Емделушілер тиісті гидратация қабылдауы тиіс, нефроуыттылық қаупінің артуы салдарынан, әсіресе диуретиктерге және АӨФ тежегіштеріне қатысты, қатараласатын емді бастағаннан кейін және одан кейін жүйелі негізде бүйрек функциясына мониторинг жүргізу керек. Калий препараттарымен қатарластыра емдеу қан сарысуындағы калий деңгейінің артуымен байланысты болуы мүмкін, бұл науқасты ұдайы бақылауды қажет етеді.

Циклоспорин

ҚҚСП бүйректерде простагландиндердің синтезіне ықпал етуі циклоспориннің нефроуыттылығын күшейтуі мүмкін. Диклофенакты циклоспорин қабылдап жүрмеген науқастарға қарағанда өте төмен дозаларда қолданған жөн.

Гиперкалиемияны тудыратын препараттар

Калий жинақтаушы диуретиктермен, циклоспоринмен, такролимуспен немесе триметоприммен қатарластыра емдеу калийдің сарысулық деңгейін арттыруы мүмкін. Қан сарысуындағы калий деңгейін жиі бақылап отырған жөн.

Антибактериялық дәрілер – хинолон туындылары

Хинолон туындыларын және ҚҚСП бір мезгілде қабылдап жүрген науқастарда құрысудың пайда болғаны жөнінде жеке мәлімдемелер бар.

Қабынуға қарсы стероидты емес басқа да препараттар (ҚҚСП) және кортикостероидтар

ҚҚСП немесе кортикостероидтарды диклофенакпен бір мезгілде жүйелік қолдану асқазан-ішек жолы тарапынан жағымсыз құбылыстардың пайда болу жиілігін арттыруы мүмкін.

Антикоагулянттар және антитромботикалық дәрілер

Диклобрю мен антикоагулянттарды бір мезгілде қабылдаған емделушілерде қан кету қаупінің жоғарылағаны жөнінде жекелеген мәлімдемелер бар. Дәрілік заттарды осылай біріктірген жағдайда науқастарды мұқият және жүйелі түрде бақылап отыру керек.

Серотонинді кері қармап қалатын селективті тежегіштер (СКҚСТ): Жүйелік ҚҚСП және СКҚСТ бір мезгілде тағайындау асқазан-ішектік қан кету қаупін арттыруы мүмкін.

Диабетке қарсы препараттар

Диабетке қарсы препараттармен де бір мезгілде қолданылуы мүмкін, мұндайда соңғысының тиімділігі өзгермейді. Гипогликемия, сондай-ақ гипергликемия жағдайларының да туындағаны жөнінде жекелеген мәлімдемелер белгілі, бұған Диклобрюді қолдану кезінде қантты төмендететін препараттардың дозасын өзгерту қажеттілігі себепші болды.

Колестипол және холестирамин

Диклофенакты және колестиполды немесе холестираминді бір мезгілде қолдану диклофенактің сіңуін шамамен тиісінше 30%-ға және 60%-ға азайтады. Препараттарды бірнеше сағаттық аралықпен қабылдаған жөн.

Дәрілік заттарды метаболиздейтін ферменттерді стимуляциялайтын препараттар

Ферменттерді стимуляциялайтын препараттар, мысалы, рифампицин, карбамазепин, фенитоин, шайқурай (Hypericum perforatum) және т.б., плазмадағы диклофенак концентрациясын теориялық тұрғыдан алғанда азайтуға қабілетті.

Метотрексат

ҚҚСП метотрексатты қабылдаудан бұрын немесе одан кейін 24 сағаттан аз уақыт ішінде тағайындағанда сақ болған жөн, өйткені мұндай жағдайларда қандағы метотрексат концентрациясы жоғарылауы және оның уыттық әсері күшеюі мүмкін.

Фармацевтикалық үйлеспеушілік

Ампулалардағы Диклобрю ерітіндісін инъекцияға арналған басқа дәрілік заттар ерітінділерімен араластырмаған жөн.

Айрықша нұсқаулар

Жалпы

Диклобрю препаратын жүйелік ҚҚСП-пен, селективті циклооксигеназа-2 тежегіштерін қоса есептегенде, қандай да болсын синергиялық пайдасының жоқ болуы және қосымша жағымсыз әсерлер туындауы мүмкін болғандықтан, бірге қолданбау керек.

Егде жастағы адамдарға тағайындағанда сақ болған жөн. Денсаулығы әлсіз егде жастағы адамдар үшін және дене салмағының көрсеткіші төмен емделушілер үшін тиімді ең төмен дозаларды қолдану керек.

Сыртартқыда демікпенің болуы

Бронх демікпесі, маусымдық аллергиялық риниті, мұрынның шырышты қабығының ісінуі (мұрын полиптері), өкпенің созылмалы обструктивтік аурулары немесе тыныс жолдарының созылмалы жұқпалары (әсіресе ринитке ұқсас аллергиялық симптомдарымен байланысты) бар науқастарда басқаларға қарағанда ҚҚСП-ке демікпенің өршуі Квинке ісінуі немесе есекжемге ұқсас реакциялар жиі пайда болады. Мұндай науқастарға арнайы шараларды қолдану (шұғыл жәрдем көрсетуге дайындық) ұсынылады. Бұл сондай-ақ басқа заттарға алллергиясы, мысалы тері реакциялары, қышыну немесе есекжемі бар науқастарға да қатысты.

Диклобрю бронх демікпесі бар емделушілерге парентеральді түрде қолданылатын жағдайда ерекше сақ болуы керек, өйткені симптомдар өршіп кетуі мүмкін.

Ас қорыту жүйесіне ықпалы

Басқа ҚҚСП қолданған кездегідей, Диклобрю препаратын ас қорыту жүйесі (АЖ) тарапынан бұзылулардың бар екендігін айғақтайтын симптомдары, асқазанның немесе ішектің ойық жарасы, сыртартқысында қан кетулер немесе перфорация бар емделушілерге тағайындағанда, міндетті түрде медициналық тексеру және ерекше сақ болу қажет. Асқазан-ішек жолында қан кетудің пайда болу қаупі сыртартқысында ойық жарасы бар, әсіресе қан кету немесе перфорация түріндегі асқынулары бар науқастарда және егде жастағы адамдарда артады.

Сыртартқысында ойық жарасы, әсіресе қан кету немесе перфорация түріндегі асқынулары бар емделушілерде және егде жастағы адамдарда АЖ-ға уытты әсер ету қаупін төмендету үшін, емдеуді тиімді төмен дозалардан бастайды және демейді.

Мұндай емделушілер, сондай-ақ құрамында ацетилсалицил қышқылының дозалары төмен дәрілік заттарды немесе АЖ-ға жағымсыз әсер ету қаупін арттыруы мүмкін деп шамаланатын басқа дәрілік заттарды қатарластыра қолдануды керек ететін науқастар үшін, қорғағыш дәрілермен (мысалы, протонды сорғы тежегіштерін немесе мизопростолды) біріктіріп емдеуді қолдану жөніндегі мәселені қарастырған жөн.

Асқазан-ішектің уыттанушылығы сыртартқысында көрсетілген, әсіресе егде жастағы емделушілер, әдеттен тыс кез келген абдоминальді симптомдар (әсіресе АЖ қан кетулер) жөнінде мәлімдеуі тиіс. Ойық жара немесе қан кетулер қаупін арттыруы мүмкін, жүйелік кортикостероидтар, антикоагулянттар, тромбозға қарсы дәрілер немесе серотонинді кері қармап қалатын селективті тежегіштер сияқты дәрілік заттарды қатарластыра қабылдап жүрген науқастар үшін де сақтық керек.

Диклобрюді сыртартқысында ішектің қабыну аурулары, мысалы, Крон ауруы немесе өзіне тән емес ойық жаралы колиттері бар науқастарға абайлап тағайындау, және мұқият медициналық бақылау және, потенциальді өршу орын алуы мүмкін болғандықтан, алдын ала тиісті шараларды белгілеу қажет.

Бауырға ықпалы

Диклобрю бауыр функциясы бұзылған емделушілерге тағайындалған жағдайда мұқият медициналық бақылау қажет, өйткені мұндай науқастарда жағдай асқынуы мүмкін.

Басқа ҚҚСП қолданған кездегідей, бір немесе одан көп бауыр энзимдерінің деңгейі жоғарылауы мүмкін. Диклобрю препаратымен ұзақ емдеу кезінде бауыр функциясын жүйелі бақылап отыру тағайындалады. Егер бауыр функциясының бұзылуы сақталса немесе нашарласа, сондай-ақ, егер бауыр ауруларының өршуімен байланысты симптомдар, немесе басқа да біліністер (мысалы, эозинофилия, бөртпе) байқалса, Диклобрю препаратын қолдануды тоқтатқан жөн. Гепатит сияқты аурулар барысы продромальді симптомдарсыз өтуі мүмкін.

Диклобрюді бауыр порфириясы бар емделушілерге қолданған жағдайда, ұстаманың өршуі мүмкін болғандықтан, сақтық қажет.

Бүйрекке ықпалы

ҚҚСП-пен емделген кезде сұйықтықтың іркілуі және ісіну жөнінде мәлімделгендіктен, жүрек немесе бүйрек функциясы бұзылған (соның ішінде гиповолемия, нефротикалық синдром, жегі тәрізді нефропатия және бауырдың декомпенсацияланған циррозы аясында бүйрек функциясының жеткіліксіздігі бар), сыртартқысында артериялық гипертензиясы бар науқастарда, егде жастағы науқастарда, диуретиктермен немесе бүйрек қызметінің елеулі ықпалын тигізетін препараттармен ем қабылдап жүрген науқастарда, және кез келген себептен, мысалы, ауыр хирургиялық араласымға дейін немесе одан кейін сұйықтықтың жасушадан тыс көлемі елеулі төмендеген емделушілерде бүйрек функциясына мониторинг жүргізуге кеңес беріледі. ҚҚСП емдеуді тоқтату әдетте емнің алдында орын алған жағдайға қайта оралуына әкеледі.

Гематологиялық көрсеткіштерге ықпалы

Препаратты ұзақ қолданғанда, басқа ҚҚСП сияқты, қан талдамасына мониторинг жасауға кеңес беріледі. Басқа ҚҚСП сияқты, Диклобрю тромбоциттердің агрегациясын уақытша тежеуі мүмкін. Гемостазы бұзылған науқастарды мұқият бақылауға алған жөн.

Жүрек-қантамырлық әсерлер

ҚҚСП-пен, диклофенакті қоса есептегенде, әсіресе жоғары дозаларда және ұзақ кезең бойы емдеу тромбоздың ауыр кардиоваскулярлы жағдайларының (миокард инфарктісін және инсультті қоса есептегенде) қаупінің аздап жоғарылауымен байланысты болуы мүмкін. ҚҚСП қабылдап жүрген емделушілерде, әсіресе жүрек-қантамырлық қауіп факторлары бар емделушілерде жағымсыз кардиоваскулярлық асқынулар қаупін барынша ең төменге жеткізу үшін, емдеудің ең төмен рұқсат етілген ұзақтығымен тиімді ең төмен дозаны қолданған жөн.

Диклобрю препаратының қосымша заттары

Инъекцияға арналған ерітіндідегі натрий метабисульфиті асқын сезімталдықтың оқшауланған ауыр реакциясына және бронхтың түйілуіне әкеп соғуы мүмкін.

Жүктілік және лактация кезеңі

Диклобрюді, жүктіліктің алғашқы екі триместрінде, ана үшін потенциальді пайдасы ұрық үшін ықтимал қаупінен басым болатын жағдайлардан басқасында, қолданбаған жөн. Жүктіліктің үшінші триместрі кезінде, жатырдың жиырылуының болмауы және/немесе ductus arteriosus мезгілінен ерте жабылуы салдарынан, қолдануға болмайды.

Диклофенак емшек сүтіне аздаған мөлшерде өтеді. Емшектегі нәрестеге жағымсыз әсерін болдырмау үшін, Диклобрюді емшек емізу кезінде қолданбаған жөн. Егер емдеу өте қажет болса, емшек емізуді тоқтату және нәрестені жасанды қоректендіруге көшіру керек.

Фертильділігі

Диклобрю әйелдердің фертильділігіне ықпалын тигізуі мүмкін. Препаратты жүкті болуды жоспарлап жүрген әйелдерге беруге болмайды. Ұрықтану жағынан асқынулары бар, немесе инфертильділік салдарынан тексеруден өткен әйелдер Диклобрю препаратын қолдануды тоқтатуы тиіс.

Дәрілік заттың көлік құралын немесе қауіпті механизмдерді басқару қабілетіне ықпал ету ерекшеліктері

Диклобрю препаратымен емделу кезінде көруі нашарлаған, бас айналу, ұйқышылдық немесе орталық жүйке жүйесі тарапынан басқа да бұзылулары болған емделушілер автокөлікті басқаруды және механизмдермен жұмыс жасауды тоқтата тұруы тиіс.

Артық дозалануы

Симптомдары: құсу, гастроинтестинальді қан кету, диарея, бас айналу, құлақтың шыңылдауы немесе құрысулар. Қатты уланған жағдайда бүйректің жедел жеткіліксіздігі және бауырдың зақымдануы орын алуы ықтимал.

Емі: демеуші шаралар немесе артериялық гипотензия, бүйректің жеткіліксіздігі, құрысулар, гастроинтестинальді бұзылулар және тыныстың тарылуы сияқты асқынуларды жою үшін қажетті симптоматикалық ем жүргізу.

Қарқындатылған диурез, диализ немесе гемоперфузия сияқты ерекше шаралар, ҚҚСП қан плазмасы ақуыздарымен байланысуының жоғары және метаболизмінің қарқынды болуы салдарынан, олардың шығарылуына кепіл бола алмайды.

Шығарылу түрі және қаптамасы

Сары I типті бейтарап шыныдан жасалған ампулаларда ерітінді 3 мл-ден.

Поливинилхлоридті үлбірден жасалған пішінді ұяшықты қаптамада 5 ампуладан.

Пішінді ұяшықты 1 қаптама қолданылуы жөнінде мемлекетттік және орыс тілдеріндегі нұсқаулықпен бірге картон пәшкеге салынған.

Сақтау шарттары

Жарықтан қорғалған жерде, 15°С-ден 25°С-ге дейінгі температурада

Балалардың қолы жетпейтін жерде сақтау керек!

Сақтау мерзімі

5 жыл

Қаптамасында көрсетілген жарамдылық мерзімі өткеннен кейін препаратты қолдануға болмайды.

Дәріханадан босатылу шарттары

Рецепт арқылы

Өндіруші

Брюфармэкспорт с.п.р.л., Бельгия

14, Де ля Гротт к-сі, 1020 Брюссель,

Тіркеу куәлігінің иесі

Брюфармэкспорт с.п.р.л., Бельгия

Тұтынушылардан өнім (тауар) сапасы жөнінде шағымдарды Қазақстан Республикасы аумағында қабылдайтын ұйымның мекенжайы

«Казфармпромоушн» ЖШС

Алматы қ-сы, Қабдолов к-сі 22 б, кеңсе 2

тел.: 7 (727) 356-47-01, 250-72-70

Электронды поштасы: bruphbe@brupharm.skynet.be