Дибазол - Дарница

МНН: Бендазол
Производитель: Фармацевтическая фирма «Дарница» ЧАО
Анатомо-терапевтическо-химическая классификация: Прочие периферические вазодилататоры
Номер регистрации в РК: № РК-ЛС-5№016796
Информация о регистрации в РК: 24.09.2020 - 24.09.2030

Инструкция

Саудалық атауы

Дибазол-Дарница

Халықаралық патенттелмеген атауы

Бендазол

Дәрілік түрі

Инъекцияға арналған 1% 1 мл, 5 мл ерітінді

Құрамы

1 мл ерітіндінің құрамында

белсенді зат: 10 мг бендазол гидрохлориді

қосымша заттар: 96 % этанол, глицерин, 1 М хлорсутек қышқылы, инъекцияға арналған су.

Сипаттамасы

Мөлдір түссіз немесе сәл сарғыш немесе жасылдау реңді сұйықтық.

Фармакотерапиялық тобы

Шеткергі вазодилататорлар. Басқа да шеткергі вазодилататорлар.

АТХ коды С04АХ

Фармакологиялық қасиеттері

Фармакокинетикасы

Бұлшықет ішіне енгізген кезде препарат жүйелі қан ағысына жылдам енеді. Қандағы ең жоғары концентрациясы енгізген сәттен бастап 15–30 минуттан соң байқалады. Әсер ету ұзақтығы – 2–3 сағат. Бауырда метаболизденеді.

Дибазолдың биотрансформация өнімдері дибазол имидазольді сақинасының иминотоптары: 1-метил-2-бензилбензимидазол мен 1-карбоэтокси -2- бензилбензимидазолдың метилдену және карбоэтоксилдену салдарынан түзілетін екі конъюгат болып табылады.

Метаболизм өнімдері негізінен несеппен шығарылады.

Фармакодинамикасы

Тамыр кеңейткіш және спазмолитикалық дәрі. Гипотензивті, тамыр кеңейткіш әсерге ие, жұлын-ми функциясын көтермелейді, орташа иммунитет көтермелегіш белсенділікке иеленеді.

Қан тамырларының және ішкі ағзалардың тегіс бұлшықеттеріне тікелей спазмолитикалық әсер етеді. Препарат ұзақ емес (2-3 сағ) және орташа гипотензивті әсер туғызады, жақсы көтерімді.

Қан айналымының жергілікті бұзылуынан (церебральді артериялардың склерозы) туындаған созылмалы ми гипоксиясы кезінде аз уақытқа ми қан тамырларының кеңеюін тудырады.

Жұлын-мидағы синапстық берілісті жеңілдетеді.

Иммуномодуляциялаушы белсенділікке ие. Циклогуанозинмонофосфат- тың (цГМФ) және цикло-аденозинмонофосфаттың (цАМФ) концентрациялық арақатынасын реттеу арқылы иммундық жасушаларда цГМФ-ның құрамын жоғарылатады, ол жетілген сенсибилизацияланған T- және B-лимфоциттердің пролиферациясына, олардың өзара реттелу факторларының секрециялануына, кооперативті реакциясына және жасушалар функциясының соңғы әсерлерінің белсенділенуіне әкеледі. Препарат антиденелер өндірілуін көтермелейді, лейкоциттердің, макрофагтардың фагоцитарлық белсенділігін күшейтеді, интерферон синтезін жақсартады, бірақ иммуномодуляциялаушы әсері баяу дамиды.

Қолданылуы

- қосымша дәрі ретінде гипертониялық аурудың өршуінде, гипертониялық кризде

- қосымша дәрі ретінде асқазанның, ішектің пилорус түйілулерінде

- неврологиялық ауруларды (ең бастысы, полиомиелиттің қалдық құбылыстарын, бет жүйкесінің шеткергі салдануын, полиневритті) емдеуде.

Қолдану тәсілі және дозалары

Ересектерге және 12 жастан асқан балаларға Дибазол-Дарницаны көктамыр ішіне, бұлшықет ішіне немесе теріастына тағайындайды. Гипертониялық кризді басу үшін көктамыр ішіне немесе бұлшықет ішіне 3–5 мл 1 % ерітіндіні (30–50 мг) енгізеді. Артериялық қысым айтарлықтай жоғарылаған кезде 2-3 мл 1 % препаратты (20–30 мг) бұлшықет ішіне тәулігіне 2–3 рет енгізу керек. Емдеу курсы жекелей тағайындалады, орташа алғанда – 8-14 күн

Жағымсыз әсерлері

- бас айналуы, бас ауыруы

- жүрек соғуын сезіну, жүрек тұсының ауыруы, ұзақ қолданған кезде – жүрек лықсытуы азаюына байланысты ЭКГ көрсеткіштерінің нашарлауы; артериялық қысымның төмендеуі

- құрғақ жөтел, тұмау, тыныс алудың қиындауы

- жүрек айну, тамақтың ашуы

- қышыну, гиперемия, бөрту, есекжем

- ысыну сезімі, қатты тершеңдік, беттің қызаруы

- енгізілген орындағы реакциялар: жергілікті ауырту.

Қолдануға болмайтын жағдайлар

- бендазолға немесе препараттың қосымша компоненттеріне жоғары сезімталдық

- бұлшықет тонусының төмендеуі, құрысу синдромы, жүректің ауыр жеткіліксіздігімен қатар жүретін аурулар

- артериялық гипотензия

- ісінулері және бүйректің азот шығару функциясының бұзылуы бар созылмалы нефрит

- қан кетумен жүретін асқазан мен он екі елі ішектің ойық жарасы

- қант диабеті

- 12 жасқа дейінгі балалар

- жүктілік және лактация кезеңі

Дәрілермен өзара әрекеттесуі

Егер Сіз басқа қандай да бір дәрілік заттарды қабылдап жүрсеңіз, препаратты қолдану мүмкіндігі жайында міндетті түрде дәрігермен кеңесіңіз.

Папаверин гидрохлориді, теобромин, сальсолин – дибазолмен біріктіріп қолданған кезде папаверин гидрохлоридінің, теоброминнің, сальсолиннің фармакологиялық әсер ету ауқымы кеңейеді.

Барбитураттар - дибазолмен біріктіріп қолданған кезде барбитураттардың, атап айтқанда фенобарбиталдың ұзақ әсер ету тиімділігін күшейтеді.

Фентоламин, гипотензивті препараттар (ренин-ангиотензин жүйесіне әсер ететін дәрілер және т.б.), салуретиктер – дибазолмен біріктірілімде қолданғанда гипотензиялық әсерін күшейтеді.

β-блокаторлар – дибазолмен біріктіріп қолданғанда соңғысының гипотензивті әсері өзгермейді, бірақ ұзақ қолданған кезде дибазол β-блокаторлары туғызатын жалпы шеткергі қарсыластық жоғарылауының алдын алады.

Дибазол салицилаттармен және бензоаттармен үйлеспейді, өйткені дибазол салицилаты немесе бензоатының шөгінділері түседі.

Айрықша нұсқаулар

Емді бастар алдында дәрігермен кеңесіңіз!

Дибазол инъекция түрінде басқа гипотензивті дәрілерге сезімталдығы болған жағдайда артериялық гипертензияда қолданылатын қосымша дәрі болып табылады. Артериялық гипертензияны емдеу кезінде басқа да гипотензивті препараттармен үйлестіре қолдану ұсынылады.

Дибазол-Дарницаны гипертензияға қарсы дәрі ретінде ЭКГ көрсеткіштерінің нашарлауы, жүрек лықсытуының төмендеуі мүмкін болуына байланысты қарттық жастағы науқастарға ұзақ қолдану мақсатқа сай емес.

Артериялық гипертензияны, әсіресе егде жастағы емделушілерді ұзақ емдеуде қолдану ұсынылмайды.

Дәрілік заттың автокөлікті немесе қауіптілігі зор механизмдерді басқару қабілетіне әсер ету ерекшеліктері

Препаратпен емделіп жүрген кезде көлік құралдары мен күрделі механизмдермен жұмыс істегенде сақ болу керек, бас айналу жағдайы туындап жатса, жоғары назар шоғырландыруды және психомоторлық реакциялар жылдамдығын талап ететін қауіптілігі зор қызмет түрлерімен айналысудан бас тарта тұрған дұрыс.

Артық дозалануы

Симптомдары: препаратты тоқтатқаннан кейін жылдам қайтатын гипотензия, тершеңдік, ысынуды сезіну, бас айналуы, жүрек айнуы, жеңіл түрдегі бас ауыруы.

Емі: препаратты тоқтату. Айқын гипотензия кезінде артериялық қысымды бақылай отырып, трансфузиялық емді, тамыр тарылтатын дәрілерді, жүрек гликозидтерін тағайындайды. Бұдан әрі қарай симптоматикалық ем жүргізіледі.

Шығарылу түрі және қаптамасы

1 мл немесе 5 мл препараттан шыны ампулаларда.

Ампулаға өздігінен жапсырылатын жабыны бар қағаздан жасалған заттаңба жапсыруға немесе шыны бұйымдарға арналған терең баспа бояумен жағуға болады.

1 мл немесе 5 мл 5 ампуладан пішінді ұяшықты қаптамаға (кассетаға) ампула ашуға арналған пышағымен бірге салынады.

Түрлі-түсті сындыру сақинасы немесе түрлі-түсті сындыру нүктесі бар ампулаларды қаптағанда ампула ашуға арналған пышақ салынбайды.

5 ампуладан екі пішінді ұяшықты қаптама медициналық қолдану жөніндегі нұсқаулықпен бірге қорапшаға салынады.

1 мл немесе 5 мл 10 ампуладан медициналық қолдану жөніндегі нұсқаулықпен және ампула ашуға арналған пышақпен бірге гофрланған астары бар қорапқа салады.

Түрлі-түсті сындыру сақинасы, немесе түрлі-түсті сындыру нүктесі бар ампулаларды қаптағанда ампула ашуға арналған пышақ салынбайды.

Сақтау шарттары

Түпнұсқалық қаптамасында, 25°С-ден аспайтын температурада сақтау керек.

Мұздатып қатыруға болмайды.

Балалардың қолы жетпейтін жерде сақтау керек!

Сақтау мерзімі

4 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

«Фармацевтикалық фирма «Дарница» ЖАҚ

Украина, 02093, Киев қ., Борисполь к-сі, 13.

Тіркеу куәлігінің иесі

«Фармацевтикалық фирма «Дарница» ЖАҚ, Украина

Қазақстан Республикасы аумағында тұтынушылардан өнім сапасына қатысты шағымдарды қабылдайтын ұйымның мекенжайы -

телефон/факс: (+ 380 44) 207 73 27

е-mail: vigilance@darnitsa.kiev.ua

http://www.darnitsa.kiev.ua

 

Прикрепленные файлы

072389991477976314_ru.doc 25.38 кб
891373101477977556_kz.doc 65.5 кб

Отправить прикрепленные файлы на почту

Источники

Национальный центр экспертизы лекарственных средств, изделий медицинского назначения и медицинской техники