Дексаметазон (капли глазные, суспензия, 0,1%)
Инструкция
-
русский
-
қазақша
Саудалық атауы
Дексаметазон
Халықаралық патенттелмеген атауы
Дексаметазон
Дәрілік түрі
Көз тамшы дәрісі, 0,1% суспензия 5 мл және 10 мл
Құрамы
1 мл препараттың құрамында
белсенді зат – 1.00 мг дексаметазон,
қосымша заттар: полисорбат 80, гипромеллоза (НРМС 4000 сР), натрий гидрофосфатының додекагидраты, лимон қышқылының моногидраты, натрий хлориді, динатрий эдетатының дигидраты, бензалконий хлориді, тазартылған су.
Сипаттамасы
Тұрғанда шөгінді пайда болатын, сілкігенде суспензияға қайтадан жеңіл айналатын ақ немесе ақ дерлік суспензия
Фармакотерапиялық тобы
Көз ауруларын емдеуге арналған препараттар. Глюкокортикостероидтар.
АТХ коды S01BA01
Фармакологиялық қасиеттері
Фармакокинетикасы
Конъюнктивалдық қапшыққа тамызғаннан кейін мөлдір қабықтың эпителийіне және конъюнктиваға жақсы өтеді; бұл арада көздің сулы ылғалында емдік концентрацияларына жетеді; шырышты қабықтың қабынуы немесе зақымдануында пенетрация жылдамдығы ұлғаяды. Қан жүйесіне түсетін дексаметазонның 60-70% жуығы плазма ақуыздарымен байланысады. Құрамында цитохромы бар ферменттер әсерімен бауырда метаболизденеді; метаболиттер ішек арқылы шығарылады. Жартылай шығарылу кезеңі (T1/2) орташа 3 сағатты құрайды.
Препараттың жүйелік сіңуі өте төмен.
Фармакодинамикасы
Офтальмологияда жергілікті қолдануға арналған глюкокортикоидты препарат. Қабынуға қарсы, аллергияға және антиэкссудативті айқын әсер етеді.
Нысана тіндерде арнайы ақуыз рецепторларымен өзара әрекеттесумен кортикоидқа тәуелді гендер экспрессиясын реттейді және осылайша ақуыз синтезіне әсер етеді. Қабыну медиаторларының (гистаминнің, кининнің, простагландиндердің, лизосомальді ферменттердің) түзілуін, босап шығуын және белсенділігін төмендетеді. Қабыну орнындағы жасушалар миграциясын бәсеңдетеді; вазодилатацияны және қабыну ошағындағы тамырлардың жоғары өткізгіштігін төмендетеді. Лейкоциттер жарғақшаларының лизосомальді ферменттерін тұрақтандырады; антидене синтезін бәсеңсітеді және антиген тануды бұзады. Лимфоциттер және макрофагтардан интерлейкин 1 және интерлейкин 2, интерферон гамма босап шығуын тежейді. Липокортин түзілуін индукциялайды, қабыну медиаторларының эозинофилдермен босап шығуын бәсеңсітеді және жуан жасушалардың жарғақшаларын тұрақтандырады. Бұл әсерлердің барлығы механикалық, химиялық немесе иммундық зақымдануға жауап ретінде тіндерде қабыну реакцияларын бәсеңдетуге қатысады.
Қолданылуы
- конъюнктивитте (іріңсіз және аллергиялық)
- кератитте, кератоконъюнктивитте (эпителий зақымдануынсыз)
- блефаритте, блефароконъюнктивитте
- склеритте, эписклеритте
- хориоретинитте
- увеиттерде
- оперативті араласулар мен жарақаттардан кейінгі қабынудың алдын алу және емдеуде
- мөлдір қабықтың мөлдірлігін қалпына келтіруде және кератиттерден, күйіктерден кейінгі неоваскуляризацияны төмендетуде
Қолдану тәсілі және дозалары
Тамызу алдында қолды мұқият жуыңыз.
Құтыны пайдаланар алдында сілкіңіз!
Жедел қабыну жағдайларында конъюнктивалдық қапшыққа
1 - 2 тамшыдан тәулігіне 4 - 5 рет 2 күн бойына, ал содан соң 1-2 тамшыдан 4 – 6 күн бойына тәулігіне 3 – 4 рет тамызу керек.
Созылмалы қабыну жағдайларында 1 – 2 тамшыдан тәулігіне 2 рет 3 – 6 апта бойына тамызады (дәрігер бақылауында). Емдеу курсының ұзақтығы 6 аптадан аспау керек.
Операциядан және жарақаттан кейін, қабыну симптомдарының қарқындылық дәрежесіне қарай 1 – 2 тамшыдан тәулігіне 2 – 4 рет 2 – 4 апта бойына (дәрігер бақылауында).
8-ден 12 жасқа дейінгі балаларда аллергиялық және қабыну жай-күйлерін емдеуде 7-10 күн бойына тәулігіне 2-3 рет 1 тамшыдан тамызады. Қажет болған жағдайда флюоресцеинді сынаманы (мөлдір қабық эпителийінің тұтастығын тексеру үшін) өткерген соң 10 күн емді жалғастырады. Тамызғаннан кейін мұрын-көз жас өзегін қысу немесе қабақты жабу ұсынылады. Бұл жергілікті қолданылатын дәрілік препараттың жүйелік сіңуін және жағымсыз әсерін төмендетеді.
Жағымсыз әсерлері
Препарат негізінен жағымды.
Жергілікті реакциялар: препаратты тамызғаннан кейін бірден тез өтетін ашыту сезімі, жас ағу, көрудің бұлыңғырлануы, мидриаз болуы мүмкін
Ұзақ уақыт қолданғанда ( 2 аптадан астам) көзішілік қысым жоғарылауы мүмкін; көру жүйкесі зақымдануымен глаукоманың дамуы, көру өткірлігінің төмендеуі және көру аясының азаюы, сондай-ақ артқы субкапсулярлық катарактаның пайда болуы, сонымен бірге мөлдір қабықтың жұқаруы және тесілуі мүмкін
Өте сирек
- герпестік және бактериялық жұқпаның таралуы
- салдарлық жұқпа дамуы, стероидтарды ұзақ қолданғанда мөлдір қабықтың зеңдік зақымдануы
Дексаметазонға немесе бензалконий хлоридіне өте жоғары сезімталдығы бар емделушілерде аллергиялық конъюнктивит және блефарит дамуы мүмкін.
- қышыну, палпебральді эритема немесе конъюнктивальді эритема
Ұзақ уақыт қолданғанда глюкокортикостероидтарға тән жүйелік жағымсыз әсерлер даму қаупі ұлғаюы мүмкін:
- глюкозаға толеранттылықтың төмендеуі, стероидты қант диабеті немесе латентті қант диабетінің манифестациясы, бүйрек үсті бездері қызметінің бәсеңдеуі, Иценко-Кушинг синдромы.
- жүрек айнуы, құсу, тәбеттің ашылуы немесе төмендеуі, асқазан-ішек жолдарының созылмалы ауруларының асқынуы
- аритмия, брадикардия, артериялық қысымның жоғарылауы
- бассүйекішілік қысымның жоғарылауы, ашушаңдық немесе мазасыздану, ұйқысыздық, бас айналуы, бас ауыруы
Қолдануға болмайтын жағдайлар
- дексаметазонға немесе препараттың кез келген басқа ингредиенттеріне жоғары сезімталдық
- көздің вирустық және зеңдік аурулары
- көздің іріңді аурулары (микробқа қарсы қатар жүретін емсіз)
- трахома
- көз ішінің жоғары қысымы
- мөлдір қабық эпителиясы тұтастығының зақымдануы
- көз туберкулезі
- 8 жасқа дейінгі балаларға
- жүктілік, лактация кезеңі
Дәрілермен өзара әрекеттесуі
Идоксуридинмен ұзақ уақыт қолданғанда мөлдір қабықтың эпителийінде деструктивті үдерістер күшеюі мүмкін.
Дексаметазон барбитураттар әсерін күшейтуі мүмкін.
Фенитоинді дексаметазонмен қоса қолдану соңғысының концентрациясының төмендеуіне алып келеді.
Варфарин дексаметазонмен үйлесімде қан кету қаупін ұлғайтады.
Жергілікті қолданудың әдеттегі режимінде доза индукция туындатуға немесе бауыр ферменттерінің қанығуын туындатуға жеткіліксіз.
Бірге: диуретиктермен (әсіресе “тиазидті” және карбоангидраза тежегіштерімен) және В амфотерицинмен қолдану организмнен калий (K+) шығарылуының күшеюіне және жүрек жеткіліксіздігі даму қаупінің ұлғаюына алып келуі мүмкін; жүрек гликозидтерімен – олардың жағымдылығы нашарлайды және қарыншалық экстрасистолия даму ықтималдығы жоғарылайды (гипокалиемия туындауына байланысты); этанолмен және қабынуға қарсы стероидты емес препараттармен (ҚҚСП) – асқазан-ішек жолдарында эрозиялы-ойық жаралы зақымдану туындау қаупі ұлғаяды.
Эстрогендер және құрамында эстроген бар пероральді контрацептивтер дексаметазон клиренсін төмендетеді, бұл оның әсерінің айқындығын күшейтумен қатарлас жүреді.
Антиаритмиялық препараттарды дексаметазонмен үйлестіре қолдану соңғысының әсерінің азаюына алып келуі мүмкін.
Айрықша нұсқаулар
Препарат тек коъюнктивалды қапшыққа жергілікті қолдану үшін ғана арналған.
Көз ішіне инъекция үшін қолдануға болмайды.
Егер емнің 3-4 күнінен кейін жақсару байқалмаса, қосымша жергілікті немесе жүйелі ем тағайындалады.
Препарат құрамында жұмсақ жанаспалы линзаға сіңетін микробқа қарсы консервант бензалконий хлориді бар. Сондықтан препаратты (жұмсақ) жанаспалы линза кию кезінде қолдануға болмайды. Препаратты қолданғанға дейін линзаны алып тастау керек және оларды тек тамызғаннан кейін 15минут өткен соң ғана киюге болады.
Препаратты басқа офтальмологиялық тамшылармен үйлестіре пайдаланғанда тамшы тамызуда ең кемінде 15 минут аралық сақтау қажет.
Суспензияны ұзақ немесе үлкен дозаларда қолдану препараттың жүйелік сіңуін ұлғайтуы мүмкін, сондай-ақ кейбір емделушілерде көз гипертензиясы және мөлдір қабықтың немесе көз бұршағының кейбір аурулары пайда болуы мүмкін.
Препаратпен емдеу бактериялық немесе зеңдік жұқпалардың көріністерін бүркемелеуі мүмкін, сондықтан көздің жұқпалы ауруларын емдегенде препаратты талапқа сай микробқа қарсы еммен үйлестіру керек.
Дексаметазон допингке тесттің жалған оң нәтижелеріне алып келуі мүмкін.
Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері
Препаратты тамызғаннан кейін көз жасының ағу мүмкіндігін ескере отырып, оны тікелей көлік құралдарын басқару немесе механизмдермен жұмыс жасау алдында қолдануға болмайды.
Инстилляциядан кейінгі 30 минут ішінде жоғары зейін шоғырландыруды талап ететін істерден аулақ болу қажет.
Артық дозалануы
Офтальмологияда қолданғанда артық дозалану ықтималдығы аз. Симптомдары: препараттың жағымсыз әсерлерінің күшеюі (жергілікті білінулер)
Емі: Арнайы у қайтарғысы жоқ. Препаратты тоқтатып және симптоматикалық ем тағайындау керек.
Шығарылу түрі және қаптамасы
Сыйымдылығы 5 мл немесе 10 мл, тамшылатқыш-тығыны және сақтандырғыш сақинасы бар бұралатын қақпақты ақ полиэтилен құтыларда 5 мл немесе 10 мл препараттан. Құтыға заттаңба жапсырылады.
Әрбір құты медицинада қолданылуы жөнінде мемлекеттік және орыс тілдеріндегі нұсқаулықпен бірге картон пәшкеге салынған.
Сақтау шарттары
Құрғақ, жарықтан қорғалған жерде, 250С-ден аспайтын температурада сақтау керек.
Балалардың қолы жетпейтін жерде сақтау керек!
Сақтау мерзімі
3 жыл
Қаптамасында көрсетілген жарамдылық мерзімі өткеннен кейін препаратты пайдалануға болмайды.
Ашылған құтыны 4 апта ішінде пайдалану керек.
Дәріханалардан босатылу шарттары
Рецепт арқылы
Өндіруші
Ромфарм Компани С.Р.Л., Румыния
Отопень, Ероилор 1А көшесі.
тел. +40 21 208 9743, +40 21 208 97 42, факс: +40 21 266 49 38
Тіркеу куәлігінің иесі
Ромфарм Компани С.Р.Л., Румыния
Отопень, Ероилор 1А көшесі,
тел. +40 21 208 9743, +40 21 208 97 42, факс: +40 21 266 49 38
Қазақстан Республикасы аумағында тұтынушылардан өнім сапасына қатысты шағымдарды қабылдайтын ұйымның мекенжайы
ҚР-дағы «Ромфарм Компани» өкілдігі, Алматы қ-сы, Жандосов к-сі, 8А, 806 кеңсе, телефон/факс 8/7272/445126