Декса-Гентамицин
Инструкция
-
русский
-
қазақша
Саудалық атауы
Декса-Гентамицин
Халықаралық патенттелмеген атауы
Жоқ
Дәрілік түрі
Көз тамшы дәрісі
Құрамы
Бір мл ерітіндінің құрамында
белсенді заттар – дексаметазон натрий фосфаты 1 мг, гентамицин сульфаты 5 мг;
қосымша заттар - бензалконий хлориді, натрий хлориді, калий дигидрофосфаты, калий гидрофосфаты, инъекцияға арналған су.
Сипаттамасы
Түссізден ақшыл-сары түске дейінгі мөлдір ерітінді
Фармакотерапиялық тобы
Микробтарға қарсы препараттармен біріктірілген қабынуға қарсы препараттар. Микробтарға қарсы препараттармен біріктірілген глюкокортикостероидтар. Микробтарға қарсы препараттармен біріктірілген дексаметазон.
АТХ коды S01С A01
Фармакологиялық қасиеттері
Фармакокинетикасы
Гентамицинді жергілікті қолданудан кейін жағу жиілігіне байланысты конъюнктива мен мөлдір қабықта бактерицидті концентрацияға жетеді. Офтальмологиялық қолдануда гентамициннің жүйелік сіңу құбылыстары болмайды.
Дексаметазон натрий фосфаты интактілі эпителий арқылы өтпейді десе болады, алайда оның сіңуі көздің шырышты қабықтарының қабынуы немесе зақымдануы кезінде едәуір артады.
Дексаметазон плазма альбуминімен дозаға тәуелді тәсілмен байланысады. Ересектерде дексаметазонның сарысудан орташа жартылай шығарылу кезеңі шамамен 250 минут (± 80 минут). Дексаметазон бос спирт туындысы түрінде негізінен бүйрекпен шығарылады. Ол ішінара метаболизмге ұшырайды, ал дексаметазон метаболиттері глюкуронаттар немесе сульфаттар түрінде негізінен бүйрекпен шығарылады.
Фармакодинамикасы
Декса-Гентамицин – офтальмологияда жергілікті қолдануға арналған бактерияға қарсы және қабынуға қарсы әсер ететін біріктірілген препарат.
Дексаметазон – бұл қабынуға қарсы, аллергияға қарсы және иммуносупрессивті айқын әсері бар глюкокортикостероид.
Қабыну медиаторларының эозинофилдермен шығарылуын, жуан жасушалар миграциясын басады және қылтамырлар өткізгіштігін төмендетеді.
Гентамицин дегеніміз - аминогликозидтер тобының әсер ету ауқымы кең бактерицидті антибиотигі. Бактериялардың жасуша жарғақшасы арқылы өте отырып, гентамицин бактериялық рибосомалар 30S-субъбірлігімен қайтымсыз байланысады, сонысымен бактериялық ақуыздар синтезін тежейді.
Гентамицинге сезімталдық жалпы мынадай штаммдар үшін расталған:
- аэробты грамоң микроорганизмдер: Staphylococcus aureus, Streptococcus spp., Corynebacterium spp., Bacillus spp.;
- аэробты грамтеріс микроорганизмдер: Haemophilus influenzae, Haemophilus parainfluenzae, Enterobacteriaceae (Escherichia coli, Proteus mirabilis, Klebsiella oxytoca), Serratia marescen, Enterobacter cloacae, Klebsiella pneumoniae, Pseudomonas aeruginosa, Acinetobacter Iwoffii, Acinetobacter baumannii, Moraxella catarrhalis.
Сонымен қатар кейбір микроорганизмдермен жұқпалану кезінде төзімділіктің дамуына байланысты гентамицинді қолдану тиімсіз болуы мүмкін. Осындай бактериялық штаммдарға жататындар:
- аэробты грамоң микроорганизмдер: коагулазды-теріс штаммдар Staphylococcus, Streptococcus pneumoniae, Streptococcus spp. (Viridans тобын қоспағанда) және Enterococcus spp.;
- аэробты грамтеріс микроорганизмдер: Stenotrophomonas maltophilia.
Гентамицинге төзімділік бірнеше механизмдерден болуы мүмкін, оның ішінде маңыздысы антибиотиктің бактериялық рибосомалармен байланысуына мүмкіндік бермейтін ферментативті инактивация болып табылады. Гентамициннің тобрамицинмен ауқымды айқаспалы төзімділігі және аминогликозидтер тобының басқа антибиотиктерімен ішінара айқаспалы төзімділігі болады. Жалпы алғанда жүре пайда болған гентамицинге төзімділік таралуының орынға байланысты және емдеу курсы бойына елеулі айырмашылықтары бар.
Қолданылуы
- гентамицинге сезімтал бактериялық штаммдардан туындаған қатар жүретін жұқпалы аурулармен бірге, немесе бактериялық жұқпалардың даму қаупі бар көздің алдыңғы сегментінің қабынуында
- бактериялық асқынжұқпамен қатар жүретін көздің алдыңғы сегментінің аллергиялық қабынуында
Қолдану тәсілі және дозалары
1 тамшы препараттан зақымданған көздің конъюнктивальді қалтасына тәулігіне 4-6 рет тамызады.
Әдетте емдеу ұзақтығы 2 аптадан аспайды. Клиникалық көрінісіне қарай жалғастырудың мақсатқа лайықтылығын анықтау немесе емді ауыстыру үшін емдеудің тиімділігін мезгіл-мезгіл бақылап отыру керек. Көз тамшыларын тамызғанда тамшылатқыштың ұшын көзге немесе теріге тигізбеуге тырысу керек.
Жағымсыз әсерлері
- аса жоғары сезімталдықтың жергілікті реакциялары, өтпелі күйдіру сезімі мен көрудің көмескіленуін қоса, сондай-ақ қышыну, ісіну немесе қабақ экземасы сияқты жанаспалы аллергиялық реакциялар
- көзішілік қысымның көтерілуі (глаукома), катаракта
- эпителиальді герпестік кератит, кератит болғанда мөлдің қабықтың тесілуі
- мөлдір қабықтың зеңдік жұқпалары немесе бактериялық жұқпалардың өршуі
- птоз, мидриаз
- жаралардың баяу жазылуы
Қолдануға болмайтын жағдайлар
- препараттың белсенді заттарына немесе қосымша компоненттеріне аса жоғары сезімталдық
- эпителиальді герпестік кератит және көздің басқа да вирустық аурулары
- мөлдір қабықтың жарақаттық немесе ойық-жаралы зақымданулары
- жабық- немесе ашықбұрышты глаукома
- көз туберкулезі
- көздің тек бактериялық немесе зеңдік жұқпалары
Дәрілермен өзара әрекеттесуі
Препараттың дәрілермен өзара әрекеттесуіне арнайы зерттеулер жүргізілмеген.
Офтальмологиялық препараттар глюкокортикостероидтарды атропинмен немесе басқа да антихолинергиялық дәрілермен бір мезгілде қолдану көзішілік қысымның қосымша жоғарылауына әкелуі мүмкін.
Гентамицин амфотерицин В, гепарин, сульфадиазин, цефалотин және клоксациллинмен үйлесімсіз. Бір мезгілде гентамицин және осы заттардың бірін қолдану конъюнктивальді қалтада шөгу әсерін туындатуы мүмкін.
Декса-Гентамицин көз тамшы дәрісін жергілікті қолдануға арналған басқа офтальмологиялық препараттармен бір мезгілде қолданғанда тамызу арасында 15-минуттық аралықты ұстану керек.
Айрықша нұсқаулар
Препарат құрамында бензалконий хлориді бар, ол көзді тітікендіруі және жұмсақ жанаспалы линзаларды түссіздендіруі мүмкін. Сондықтан препаратпен емдеу кезінде жұмсақ жанаспалы линзаларды тақпаған жөн.
Жанаспалы линзаларды препаратты қолданар алдында көзден алады және қайтадан, тамызғаннан кейін кем дегенде 15 минут өткен соң тағу керек.
Офтальмологиялық препараттар глюкокортикостероидтарды ұзақ қолдану көзішілік қысымның қайтымды жоғарылауын (глаукома) немесе катарактаның қайтымсыз пайда болуын туындатуы мүмкін болғандықтан, Декса-Гентамицин көз тамшы дәрісін қатарынан 10 күннен аса қолданған кезде емделушінің көзішілік қысымы мен көзінің жай-күйін ұдайы тексеріп тұру керек. Емдеу кезінде аса жоғары сезімталдық реакциялары дамыған жағдайда препаратты қолдануды дереу тоқтату керек.
Жүктілік және лактация кезеңі
Декса-Гентамицин көз тамшы дәрісін жүктіліктің бірінші триместрінде қолданбаған жөн, ал одан арғы жүктілік мерзімі бойы оны қолданудың ана үшін артықшылығы мен ұрыққа төнетін ықтимал қауіпін мұқият бағалаудан кейін ғана препаратты қолдануға болады. Препаратты бала емізу кезінде қолдану ұсынылмайды.
Педиатрияда қолданылуы
Препаратты балалар мен жасөспірімдерде қолданудың тиімділігі мен қауіпсіздігі жөніндегі деректер жоқ.
Көлік құралдарын немесе қауіптілігі зор механизмдерді басқару қабілетіне әсер ету ерекшеліктері
Препаратты тамызғаннан кейін бірден көрудің қысқа мерзімдік көмескіленуі мүмкін. Сондықтан автокөлік жүргізу немесе күрделі механизмдермен жұмыс істеу кезінде препаратты қолданғаннан кейін көру айқындылығы қалпына келгенге дейін бірнеше минут күте тұру керек.
Артық дозалануы
Артық дозалану жағдайлары туралы хабарланған жоқ. Препаратты тиісінше қолданған кезде артық дозалану немесе уыттану әсерлері болмайды.
Шығарылу түрі және қаптамасы
5 мл көз тамшы дәрісі ерітіндісі алғашқы ашылуы бақыланатын қалпақшалармен жабылған тамшылатқыш-құтыда. 1 тамшылатқыш-құтыдан медицинада қолданылуы жөніндегі мемлекеттік және орыс тілдеріндегі нұсқаулықпен бірге картон қорапқа салынады.
Сақтау шарттары
Түпнұсқалық қаптамасында 25 °С-ден аспайтын температурада сақтау керек.
Балалардың қолы жетпейтін жерде сақтау керек!
Сақтау мерзімі
3 жыл
Қаптамасында көрсетілген жарамдылық мерзімі өткеннен кейін қолдануға болмайды.
Қаптаманың бірінші ашылуынан кейін сақтау мерзімі – 4 апта.
Дәріханалардан босатылу шарттары
Рецепт арқылы
Өндіруші
УРСАФАРМ Арцнаймиттель ГмбХ / URSAPHARM Arzneimittel GmbH
Индустриештрассе 35, D-66129 Саарбрюкен, Германия (Industriestrasse 35, D-66129 Saarbrucken, Germany)
Тіркеу куәлігінің иесі
УРСАФАРМ Арцнаймиттель ГмбХ, Германия (URSAPHARM Arzneimittel GmbH, Germany)
Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы:
ҚР, Алматы қаласындағы «Сона-Фарм» ЖШҚ өкілдігі
Алматы қ., Қонаев к-сі, 18 үй, 6 кеңсе
тел/факс: +7 (727) 250-71-74
Е-mail: infokz@sona-pharm.com.ua