Глюкоза (Раствор для инфузий 5%, 200 мл, 400 мл, Несвижский завод медицинских препаратов ОАО)
Инструкция
-
русский
-
қазақша
Саудалық атауы
Глюкоза
Халықаралық патенттелмеген атауы
Жоқ
Дәрілік түрі
Инфузияға арналған 5% 200 мл және 400 мл ерітінді
Құрамы
1 литр ерітіндінің құрамында
белсенді зат: сусызға шаққанда 50.00 г глюкоза ,
қосымша заттар: натрий хлориді, 0,1 М хлорлы сутек қышқылының ерітіндісі рН 3.0–4.1 дейін, инъекцияға арналған су.
Сипаттамасы
Түссіз немесе сәл сарғыштау мөлдір сұйықтық.
Фармакотерапиялық тобы
Плазма алмастырғыш және перфузиялық ерітінділер. Ирригациялық ерітінділер. Басқа да ирригациялық ерітінділер.
АТХ коды B05CX01
Фармакологиялық қасиеттері
Фармакокинетикасы
Глюкозаның 5% ерітіндісі изотониялық болып табылады. Декстроза, тіндерге түсумен, глюкозо-6-фосфатқа айнала отырып, фосфорланады, ол организмнің зат алмасуының көп буындарына белсенді түрде қосылады. Глюкоза тіндерде метаболизмге ұшыраған кезде организмнің тіршілік әрекеті үшін қажетті энергияның елеулі мөлшері бөлініп шығады. Ерітінді қантамыр жүйесінен тез шығарылады және қантамырлары айналымындағы сұйықтық көлемін тек уақытша ғана арттырады. Бүйрекпен шығарылады.
Фармакодинамикасы
Регидратация және дезинтоксикацияға арналған дәрі. Глюкоза организмде тотығу-тотықсыздану үдерістерін күшейтеді, бауырдың уыттануға қарсы қызметін жақсартады, жеңіл қорытылатын көмірсу көзі болып табылатындықтан организмдегі энергетикалық шығындардың бір бөлігін жауып отырады.
Қолданылуы
- қан жоғалтқанда
- күйіктерде
- эндогендік және экзогендік уыттануда
- коллапста, шокта (қанның орнын басатын компонент және шокқа қарсы сұйықтық ретінде)
- көктамыр ішіне енгізуге арналған дәрілік препараттарды еріту және сұйылту үшін
Қолдану тәсілі және дозалары
Глюкозаның изотоникалық ерітіндісін көктамыр ішіне тамшылатып енгізуге тағайындайды. Жедел жағдайларда препараттың сорғалатып енгізілуі мүмкін. Енгізілетін ерітіндінің көлемін науқастың жағдайына қарай анықтайды. Инфузияның жылдамдығы әр адамға жекелей белгіленеді.
Тамшылатып енгізуге ұсынылатын ең жоғары жылдамдық - сағатына 400 мл дейін (минутына 150 тамшы). Әдетте көктамырға 5 % глюкоза ерітінідісін 400 мл-ден 2000 мл-ге дейін енгізеді. Препаратты сондай-ақ тері астына (300-400 мл және одан артық) және клизмада (тамшылатып тәулігіне 300-400 мл-ден 1000-2000 мл-ге дейін) енгізеді.
Балаларды парентеральды түрде қоректендіру үшін майлармен және амин қышқылдарымен қатар алғашқы күні дене салмағының әр кг шаққанда тәулігіне 6 г, кейінгі күндері – тәулігіне 15 г/кг дейін глюкоза енгізеді. Глюкозаның дозасын 5% ерітіндісін енгізгенде есептеген кезде енгізілетін сұйықтықтың тиісті көлеміне көңіл бөлу керек, дене салмағы 2-10 кг балалар үшін - тәулігіне 100-165 мл/кг, дене салмағы 10-40 кг балалар үшін – тәулігіне 45-100 мл/кг.
Балаларда глюкозаны енгізу жылдамдығы дене салмағының әр кг шаққанда сағатына 0,5 г аспауы тиіс; бұл 5% ерітінді үшін – минутына шамамен 10 мл немесе минутына 200 тамшыны құрайды.
Жағымсыз әсерлері
-
гипергликемия, гиперволемия
-
қызба
-
сол жақ қарыншалық жедел жеткіліксіздік
-
енгізілген жерде жұқпаның дамуы, тромбофлебит
- ұйқы безі инсулярлық аппаратының нашарлауы
Қолдануға болмайтын жағдайлар
- препарат компоненттеріне жоғары сезімталдық- гипергликемия, қант диабеті- гиперлактацидемия- гипергидратация- глюкоза утилизациясының операциядан кейінгі бұзылулары- ми және өкпе ісінуінің пайда болу қаупін төндіретін циркуляциялық бұзылулар- ми ісінуі, өкпе ісінуі- сол жақ қарыншалық жедел жеткіліксіздік - гиперосмолярлық кома
Дәрілермен өзара әрекеттесуі
5 % глюкоза ерітіндісін гидрофильді дәрілік препараттарды еріту үшін қолдануға, сондай-ақ қан алмастыратын және шокқа қарсы сұйықтықтармен үйлестіре тағайындауға болады.
Инсулинді 4-5 г-ға 1 ӘБ есебімен бір уақытта енгізу глюкозаның неғұрлым толық сіңуіне жағдай жасайды.
Глюкоза жеткілікті түрде күшті тотықтырғыш болып табылатындықтан, оны гексаметилентетраминмен бірге бір еккіште енгізуге болмайды.
Глюкозаны мүмкіндігінше алкалоид ерітінділерімен (олар ыдырай бастайды), жалпы анестетиктермен және ұйықтатқыштармен (олардың белсенділігін төмендетеді) араластырмаған дұрыс.
Айрықша нұсқаулар
Басқа препараттармен біріктірген кезде үйлесімділігін көзбен шолып бақылау қажет (көрінбейтін химиялық немесе емдік сәйкессіздігі болуы мүмкін).
Ауыр жүрек жеткіліксіздігі, өкпе ісінуі, олигурия, анурия, гипонатриемия кезінде сақтықпен қолдану керек.
Қандағы қант деңгейін бақылау қажет.
Жүктілік және лактация
Ерітінді жүктілік және лактация кезінде әйелдерге қолданылуы мүмкін.
Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері
Әсер етпейді.
Артық дозалануы
Симптомдары: жағымсыз әсерлерінің күшеюі.
Емі: симптоматикалық.
Шығарылу түрі және қаптамасы
200 мл, 400 мл резеңке тығындармен тығындалып, алюминий қалпақшалармен қаусырылған қанға арналған шыны бөтелкелерге құйылған.
Стационарға арналған 200 мл 40 бөтелке және 400 мл 24 бөтелке медицинада қолданылуы жөніндегі мемлекеттік және орыс тілдеріндегі 10-15 нұсқаулықпен бірге гофрланған картон аралығы немесе торлары бар картон жәшіктерге салынады.
Бөтелкеге, топтық ыдысқа заттаңбалық қағаздан жасалған заттаңбалар немесе өзі желімденетін заттаңбалар жапсырылады.
Сақтау шарттары
5 °С-ден 30 °С-ге дейінгі температурада сақтау керек.
Тығыз жабылуы сақталған жағдайда препаратты мұздатып қатыру оны қолдануға қарсы көрсетілім болып табылмайды.
Балалардың қолы жетпейтін жерде сақтау керек!
Сақтау мерзімі
3 жыл
Жарамдылық мерзімі өткеннен кейін қолдануға болмайды.
Дәріханалардан босатылу шарттары
Рецепт арқылы
Өндіруші
«Несвижск медициналық препараттар зауыты» ААҚ
Беларусь Республикасы, 222603,
Альба кенті, Заводская к-сі, 1
Тел. / факс +375 (1770) 62001 / 62073.
Тіркеу куәлігінің иесі
«Несвижск медициналық препараттар зауыты» ААҚ
Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы:
«ЦентрАзияФарм» ЖШС
050030, Қазақстан Республикасы, Алматы қ.
Сүйінбай даңғылы, 290
Тел. 727 290 27 80, 727 385 04 00
e-mail: register@caph.kz