Герцептин (440 мг, порошок лиофилизированный)

• русский
• қазақша

• Скачать инструкцию медикамента

Саудалық атауы

Герцептин

Халықаралық патенттелмеген атауы

Трастузумаб

Дәрілік түрі

Инфузиялық ерiтінді үшін концентрат дайындауға арналған лиофилизацияланған 440 мг ұнтақ еріткішімен жиынтықта

Құрамы

Бір құтының ішінде

белсенді зат - 440 мг трастузумаб бар,

қосымша заттар: L-гистидин гидрохлориді, L-гистидин, α,α-трегалоза дигидраты, полисорбат 20.

Еріткіш

Бір құтының ішінде бензил спирті, инъекцияға арналған су бар.

Сипаттамасы

Ақтан бозғылт-сары түске дейінгі лиофилизацияланған масса.

Қалпына келтірілген ерітінді: түссізден бозғылт-сары түске дейінгі мөлдір немесе cәл бозаңданатын сұйықтық.

Еріткіші – түссіз немесе әлсіз сарғыш реңді мөлдір сұйықтық.

Фармакотерапиялық тобы

Ісікке қарсы препараттар. Басқа да ісікке қарсы препараттар. Моноклональді антиденелер. Трастузумаб

АТХ коды L01ХС03

Фармакологиялық қасиеттері

Фармакокинетикасы

Алғашқы инфузия кезінде трастузумаб дене салмағына 4 мг/кг, кейінгілерінде - дене салмағына 2 мг/кг дозада аптасына 1 рет енгізілгенде трастузумаб клиренсі тәулігіне 0,23-0,24 л, таралу көлемі орташа 3,02 л; түпкілікті жартылай шығарылу кезеңі 3 аптаға жуық құрайды. Герцептинмен емдеуді тоқтатқаннан кейін трастузумаб элиминациясы үшін дәл осынша уақыт кезеңі қажет болады.

Бір мезгілде цитостатиктер (антрациклин/циклофосфамид, паклитаксел немесе доцетаксел) мен анастрозол енгізу трастузумаб фармакокинетикасын өзгертпейді.

Егде жастағы емделушілерде немесе бүйрек әлде бауыр жеткіліксіздігімен науқастарда арнайы фармакокинетикалық зерттеулер жүргізілмеген. Егде жастағы тұлғаларда трастузумаб таралуы өзгермейді.

Фармакодинамикасы

Трастузумаб – ісікке қарсы дәрі, адамның 2 эпидермалық өсу факторы (HER2) рецепторының жасушадан тыс доменімен таңдамалы өзара әрекеттесетін қытай атжалманының аналық бездерінің жасушаларынан алынған рекомбинантты ДНҚ-туындылы гуманизделген моноклональді антиденелер түрінде болады. Антиденелер адам аймақтарынан (ауыр тізбекті константты бөліктер) тұратын IgG1 қосалқы класына жатады және HER2 р185 антиденесінің тышқан бөліктерінің HER2-ге комплементарлығын айқындайды. HER2 немесе c-erB2 протоонкогені құрылымы жағынан эпидермалық өсу факторы рецепторына ұқсас молекулалық салмағы 185 кДа болатын жарғақша аралық рецептор тәрізді дара ақуызды кодтайды. HER2 гиперэкспрессиясы 25-30% науқаста алғашқы сүт безі обырының тіндерінен табылады. Осы ісік жасушаларының беткейінде HER2 ақуызы экспрессиясының күшеюі HER2 гені амплификациясының салдары болып саналады, бұл HER2 рецепторының тұрақты белсенділенуіне әкеледі.

Зерттеулер ісік тіндерінде HER2 амплификациясы немесе гиперэкспрессиясы болатын сүт безі обырына шалдыққан емделушілер, ісік тіндерінде HER2 амплификациясы немесе гиперэкспрессиясы болмайтын науқастармен салыстырғанда, аурудың белгілерінсіз аз тіршілік қабілетін иеленеді.

Трастузумаб HER2 гиперэкспрессиясы бар адамның ісік жасушаларының пролиферациясын in vivo және in vitro бөгейді. In vitro трастузумабтың антиденеге тәуелді жасушалық цитоуыттылығы көбінесе HER2 гиперэкспрессиясы бар ісік жасушаларына бағытталған.

Иммуногенділік

Трастузумабқа антиденелер препаратты монотерапияда немесе химиялық еммен біріктіріп алған СБО бар 903 емделуші әйелдің біреуінен табылған, осы орайда оның трастузумабқа аллергиясы болмаған.

Асқазан обырын емдеуге трастузумаб қолдану кезіндегі иммуногенділігі жөнінде деректер жоқ.

Қолданылуы

HER2 ісік гиперэкспрессиясы бар сүт безінің метастаздалатын обыры (СБМО):

• негізгі ауруға байланысты бір немесе одан көп химиялық ем курстарынан кейін монотерапия түрінде

• негізгі ауруға байланысты бұрын химиялық ем алмаған емделушілерді паклитакселмен немесе доцетакселмен біріктіріп емдеу үшін

• гормональді оң рецепторлары бар менопаузадан кейінгі емделушілерді ароматаза тежегіштерімен біріктіріп емдеу үшін

HER2 ісік гиперэкспрессиясы бар сүт безінің ерте обыры (СБЕО)

• хирургиялық операциядан, химиялық емнен (неоадъювантты немесе адъювантты) және сәулемен емдеуден (егер қолданылса) кейін

• доксорубицин мен циклофосфамид пайдаланылатын адъювантты химиялық емнен кейін доцетакселмен немесе паклитакселмен біріктіріп

• доцетакселмен немесе карбоплатинмен біріктірілген адъювантты химиялық ем құрамында

• жергілікті жайылған (қабынған түрін қоса) сүт безінің обыры үшін немесе ісік көлемінің диаметрі 2 см-ден асып кететін жағдайларда соңынан Герцептинмен адъювантты монотерапия жүргізілетін неоадъювантты химиялық ем құрамында

HER2 ісік гиперэкспрессиясы бар емделушілердегі жайылған асқазан обыры

• бұрын негізгі ауруы бойынша ісікке қарсы ем алмаған асқазанының немесе гастроэзофагеальді қосылысының жайылған обыры бар емделушілерді капецитабинмен немесе 5-фторурацилмен және платина препараттарымен біріктіріп емдеу үшін. HER2 ісік гиперэкспрессиясы ИГХ 2+ иммуногистохимиялық зерттеулері нәтижелерінің және FISH оң нәтижесінің негізінде немесе ИГХ 3+ иммуногистохимиялық зерттеу нәтижелерінің негізінде анықталуы тиіс.

Қолдану тәсілі және дозалары

Емдеуді бастар алдында ісіктің HER2-статусына міндетті түрде зерттеу жүргізу керек.

Герцептин тек көктамыр ішіне тамшылатып енгізіледі! Препаратты сорғалатып немесе болюсті енгізуге болмайды.

Сүт безінің метастаздық обыры, апта сайынғы сызба

Монотерапия немесе паклитакселмен немесе доцетакселмен біріктіру үшін келесі жүктеме және демеуші дозалар ұсынылады:

Жүктеме доза. Алғашқы инфузия кезінде Герцептин ерітіндісін дене салмағына 4 мг/кг есебінен 90 минут бойы көктамыр ішіне тамшылатып енгізеді. Емделуші қалтырау мен қызба сияқты инфузиялық асқынулардың туындауы тұрғысынан қадағаланады. Осы симптомдарды басу үшін инфузияны тоқтатуға болады. Симптомдардың жоғалуына қарай инфузияны жаңғыртуға болады.

Демеуші доза. Қайталап енгізген кездерде Герцептиннің апта сайынғы дозасы дене салмағына 2 мг/кг құрайды. Егер алдыңғы дозаны жақсы көтерген болса, кейінгі инфузияларды 30 минут ішінде енгізуге болады. Сонымен қатар емделушілер инфузиялық асқынулар тұрғысында бақылауды қажет етеді.

Клиникалық зерттеулерде препаратпен емдеу негізгі ауру үдегенше жалғасқан.

Сүт безінің ерте обыры, 3-апталық сызба

Жүктеме доза дене салмағына 8 мг/кг құрайды, артынан әр 3 апта сайын дене салмағына 6 мг/кг демеуші дозада Герцептин енгізуді 90 минуттық инфузия түрінде қайталайды.

СБЕО бар емделушілерді Герцептинмен емдеу 1 жыл бойы немесе негізгі ауру үдегенше жалғасады.

Жайылған асқазан обыры, 3-апталық сызба

Жүктеме доза дене салмағына 8 мг/кг құрайды, артынан әр 3 апта сайын дене салмағына 6 мг/кг демеуші дозада Герцептин енгізуді 90-минуттық инфузия түрінде қайталайды.

Емдеу негізгі ауру үдегенше жалғасады.

Егер Герцептинді жоспарлы енгізуді 7 күн немесе одан аз өткізіп алса, препаратты 6 мг/кг дозада мүмкіндігінше тез (келесі жоспарлы енгізуді күтпей-ақ) енгізіп, әріқарай белгіленген кестеге сәйкес 3 аптада 1 рет енгізу керек. Егер препаратты енгізудегі үзіліс 7 күннен көп болса, трастузумабтың 8 мг/кг жүктеме дозасын қайта енгізіп, артынан әр 3 апта сайын 6 мг/кг режимінде енгізуді жалғастыру қажет.

Дозаны азайту.

Химиялық емнен туындайтын қайтымды миелосупрессия пайда болған кезеңде нейтропениядан болған асқынулар мұқият бақыланған жағдайда химиялық емнің дозасын азайтудан немесе оны уақытша тоқтатудан кейін Герцептинмен емдеу курсын жалғастыруға болады. Цитостатиктердің дозасын азайту бойынша нұсқауларды қадағалау қажет. Қарттық жастағы науқастарға дозаны азайту қажет емес.

Ерітіндіні дайындау

Препаратты енгізуге дайындық асептикалық жағдайларда жүргізілуі тиіс. 440 мг Герцептин бар бір құтының ішіндегісін препаратпен бірге жеткізілетін құрамында 1,1% бензил спирті бар инъекцияға арналған 20 мл бактериостатикалық суда сұйылтады. Нәтижесінде көп рет енгізуге жарамды құрамында 21 мг трастузумаб бар рН 6,0 болатын 1 мл ерітіндінің концентраты алынады. Басқа еріткіштерді қолданудан аулақ болу керек.

Концентрат дайындау жөніндегі нұсқау

Стерильді еккішпен инъекцияға арналған 20 мл бактериостатикалық суды 440 мг Герцептин препараты бар құтыға сұйықтық ағынын лиофилизатқа тіке бағыттап баяу енгізеді. Еріту үшін құтыны айналдыра ұқыпты шайқау керек. Сілкуге болмайды! Препаратты сұйылтқанда аракідік көбіктің аздаған мөлшері түзіледі. Көбіктің шектен тыс түзілуі құтыдан препараттың керек дозасын сорып алуды қиындатуы мүмкін. Оған жол бермеу үшін ерітіндіні 5 минутқа жуық қойып қою қажет. Дайындалған концентрат мөлдір және түссіз немесе бозғылт-сары түсті болуы тиіс. Инъекцияға арналған бактериостатикалық суда дайындалған Герцептин ерітіндісінің концентраты бар құты 2-8°С температурада 28 күн бойы тұрақты. 28 күннен соң ерітіндінің пайдаланылмаған қалдығын тастау керек. Дайындалған концентратты мұздатып қатыруға болмайды.

440 мг Герцептиннің еріткіші ретінде инъекцияға арналған стерильді суды (консервантсыз) пайдалануға рұқсат етіледі. Дайындау келтірілген нұсқауға ұқсас. Бұл жағдайда концентратты дайындағаннан кейін бірден пайдаланған дұрыс. Қажет болса, ерітіндіні 2–8°С температурада 24 сағаттан асырмай сақтауға болады. Дайындалған концентратты мұздатып қатыруға болмайды.

Препаратты әріқарай сұйылту жөніндегі нұсқау

– Герцептиннің дене салмағына 4 мг/кг тең жүктеме дозасын немесе 2 мг/кг тең демеуші дозасын енгізу үшін қажетті ерітіндінің көлемі келесі формула бойынша анықталады:

Көлемі (мл) = [дене салмағы (кг) х қажетті доза (4 мг/кг - жүктеме немесе 2 мг/кг - демеуші)] / [21 (мг/мл) (дайындалған ерітінді концентрациясы)]

– Герцептиннің дене салмағына 8 мг/кг тең жүктеме дозасын немесе 6 мг/кг тең демеуші дозасын енгізу үшін қажетті ерітіндінің көлемі келесі формула бойынша анықталады:

Көлемі (мл) = [дене салмағы (кг) х қажетті доза (8 мг/кг - жүктеме немесе 6 мг/кг - демеуші)] / [21 (мг/мл) (бұл дайындалған ерітіндінің концентрациясы)]

Дайындалған концентраты (концентрацияланған ерітіндісі) бар құтыдан тиісті көлемін сорып алып, оны 250 мл 0,9% натрий хлоридінің ерітіндісі бар инфузиялық пакетке енгізу керек. Артынан ерітіндіні көпіршік түзілмейтіндей араластыру үшін инфузиялық пакетті абайлап аударған жөн. Ерітінді енгізер алдында механикалық қоспалардың болуы мен түсінің өзгеруі тұрғысынан алдын ала тексеріп (көзбен) қарау керек. Инфузияға арналған ерітіндіні дайындалғаннан кейін бірден енгізген дұрыс. Егер еріту асептикалық жағдайларда жүргізілсе, инфузияға арналған ерітіндіні пакетте 2–8°С температурада 24 сағаттан асырмай сақтауға болады. Дайын ерітіндіні мұздатып қатыруға болмайды.

Жағымсыз әсерлері

Қазіргі уақытта Герцептин препаратын пайдалану кезінде хабарланған ең көп күрделі және/немесе жиі жағымсыз реакциялар: кардиоуыттылық, инфузиялық реакциялар, гематоуыттылық (атап айтқанда, нейтропения) және өкпе тарапынан бұзылулар.

Осы бөлімде жағымсыз реакциялар жиілігін сипаттау үшін мынадай жіктеу пайдаланылады: өте жиі ( 1/10), жиі ( 1/100, бірақ <1/10), жиі емес (≥1/1000, бірақ <1/100), сирек (≥1/10000, бірақ <1/1000), өте сирек (<1/10000), белгісіз (қолда бар деректер негізінде есептеп шығаруға келмейді). Әр топтың аясында жағымсыз реакциялар күрделілігінің төмендеуіне сәйкес берілген.

Төменде базалық клиникалық зерттеулерде және постмаркетингтік пайдалану тұсында Герцептин препаратын монотерапияда да, химиялық еммен біріктіріп те қолдану кезінде хабарланған жағымсыз реакциялар берілген. Жиілігі базалық клиникалық зерттеулерде барынша кездесуіне сәйкес көрсетілген.

Өте жиі

• фебрильді нейтропения;

• тремор2, бас айналу, бас ауырулар;

• конъюнктивит

• АҚ төмендеуі және көтерілуі2, жүрек ырғағының бұзылуы2, жүрек қағу2, жүрекшелер немесе қарыншалар дірілдеуі2, сол жақ қарынша лықсыту фракциясының төмендеуі3, «ысынулар»

• қырылдар1,2, ентігу1 (14%), жөтел, мұрыннан қан кету, ринорея

• диарея, құсу, жүрек айну, еріннің ісінуі2, іштің ауыруы

• эритема, бөртпе, беттің ісінуі2

• артралгия, бұлшықеттің қарысуы2, миалгия

• астения, кеуденің ауыруы, қалтырау, әлсіздік, тұмау тәрізді синдром, инфузиялық реакциялар, ауырулар, қызба

Жиі

• пневмония1 (<1%), нейтропениялық сепсис, цистит, Herpes zoster, жұқпалар, тұмау, назофарингит, синусит, тері жұқпалары, ринит, жоғарғы тыныс жолдарының жұқпалары, несеп шығару жолдарының жұқпалары, тілме, флегмона

• шеткергі нейропатия, парестезиялар, бұлшықеттік гипертонус, ұйқышылдық, дисгевзия (дәм сезудің бұрамалануы), атаксия

• анемия, нейтропения, тромбоцитопения, лейкопения

• аса жоғары сезімталдық реакциялары

• дене салмағының кемуі, анорексия

• үрейлену, депрессия, ұйқысыздық, ойлаудың бұзылуы

• көздің құрғауы, көз жасының көп ағуы

• жүрек жеткіліксіздігі (іркілісті) 1 (2%), суправентрикулярлы тахиаритмия1,2, кардиомиопатия, артериялық гипотензия1,2, вазодилатация

• бронх демікпесі, өкпе функциясының бұзылуы, фарингит

• панкреатит, диспепсия, геморрой, іш қату, ауыздың кеберсуі

• гепатит, бауыр аумағындағы ауырсыну, гепатоцеллюлярлы зақымдану

• акне, алопеция, терінің құрғауы, экхимоз, гипергидроз, макула-папулезді бөртпе, тырнақ құрылымының бұзылуы, қышыну

• артрит, арқаның ауыруы, оссалгия, бұлшықеттердің түйілуі, мойын аумағының ауыруы

• бүйрек ауруы

• сүт безінің қабынуы/мастит

• шеткергі ісінулер, дімкәстану, мукозит, ісінулер

• соғылу

Жиі емес

• сепсис

• кереңдік

• плевралық жалқық

• перикардиальді жалқық

Сирек

• парез

• пневмонит

• сарғаю

Белгісіз

• қатерлі жаңа түзілімнің үдеуі, жаңа түзілімнің үдеуі

• гипопротромбинемия

• анафилактикалық реакциялар1, анафилактикалық шок1

• гиперкалиемия

• мидың ісінуі

• көру жүйкесі дискісінің ісінуі, торқабыққа қан құйылу

• өкпе фиброзы1, тыныс алу жеткіліксіздігі1, өкпе инфильтрациясы1, өкпенің жедел ісінуі1, жедел респираторлық дистресс-синдром1, бронх түйілу1, гипоксия1, гемоглобиннің оттегімен қанығуының төмендеуі1, көмейдің ісінуі, ортопноэ, өкпенің ісінуі

• кардиогенді шок, перикардит, брадикардия, «атшабыс» ырғағы

• бауыр жеткіліксіздігі

• ангионевротикалық ісіну, дерматит, есекжем

• жарғақшалық гломерулонефрит, гломерулонефропатия, бүйрек жеткіліксіздігі

• олигогидрамнион, өкпенің фатальді гипоплазиясы және ұрық бүйрегінің гипоплазиясы

1 – хабарламаларда өліммен аяқталумен астасқан жағымсыз реакциялар.

2 – негізінен инфузиялық реакциялармен астаса хабарланған жағымсыз реакциялар. Нақты пайыздық мөлшері анықталмаған.

3 – жағымсыз реакциялар антрациклиндерден кейінгі біріктірілген және таксандармен біріктірілген ем кезінде байқалды.

«Жиі» немесе «өте жиі» жиілігінде өліммен аяқталумен бірге хабарланған терминдерге тән нақты пайыздық көрсеткіш жақшада берілген. Пайыздық көрсеткіш өліммен аяқталған және онсыз осы құбылыстардың жалпы санына қатысты.

Келесі жағымсыз реакциялар базалық клиникалық зерттеулерде Герцептин қамтылатын ем тобы мен салыстырып емдеу тобының арасындағы мәнді айырмашылықсыз ем топтарының кез келгенінде 1/10 жиілікте хабарланды: летаргия, гипестезия, аяқ-қолдың ауыруы, ауыздың және жұтқыншақтың ауыруы, лимфедема, денеге салмақ қосу, онихоклазия, сүйек-бұлшықет ауыруы, фарингит, бронхит, кеуденің жайсыздануы, эпигастрийдегі ауыру, гастрит, стоматит, вертиго, артериялық гипертензия, ықылықтау, алақан-табан синдромы, сүт бездері аумағындағы ауыру, онихорексис, дене жүктемесі кезіндегі ентігу және дизурия.

Төменде жекелеген жағымсыз реакциялар бойынша ақпарат берілген.

Инфузиялық реакциялар және аса жоғары сезімталдық реакциялары

Герцептин алатын 40% жуық емделуші қандай да бір түрде инфузиялық реакциялар сезінеді деп есептелген. Алайда инфузиялық реакциялардың көпшілігі ауырлық дәрежесі бойынша жеңіл және орташа болып келеді (NCI-CTC сай) және емдеудің басында, яғни 1, 2 және 3-ші инфузия кезінде пайда болу үрдісіне ие, кейінгі енгізулер кезінде сирек туындайды. Реакциялар өзінде мына симптомдарды қамтиды: қалтырау, қызба, бөртпе, жүрек айну және құсу, ентігу және бас ауыру (бірақ осымен шектелмейді). Қосымша шұғыл медициналық араласуларды талап ететін ауыр анафилактикалық реакциялар Герцептин препаратының бірінші немесе екінші инфузиясы кезінде бәрінен жиі пайда болуы мүмкін, мұндай реакциялар өліммен аяқталумен астасқан.

Кардиоуыттылық

NYHA бойынша II-IV функционалдық класына жататын кардиоуыттылық (жүрек жеткіліксіздігі) Герцептин препаратын қолдану кезінде жиі болатын реакция және өліммен аяқталумен астасқан. Трастузумаб адъювантты химиялық еммен біріктіріп қолданылған 3 базалық клиникалық зерттеулерде 3/4 дәрежелі жүрек дисфункциясының (симптоматикалық іркілісті жүрек жеткіліксіздігі) жиілігі тек химиялық ем (яғни, Герцептин препаратынсыз) алған емделуші әйелдердегі және таксандар мен Герцептинді бірізді алған емделуші әйелдердегі жиіліктен (0.3-0.4%) ерекшеленбеген. Жиілігі Герцептинді таксандармен бірге алған емделуші әйелдерде көбірек (2.0%) болды.

Герцептин препаратымен емдеуді жалғастыру немесе жаңғырту қауіпсіздігі кардиоуыттылық құбылыстарын сезінген емделуші әйелдерде проспективті зерттелмеген. Алайда базалық зерттеулерде жүрек жеткіліксіздігін сезінген көпшілік емделушілердің жай-күйі диуретиктер, жүрек гликозидтері, бета-адреноблокаторлар және/немесе АӨФ тежегіштері қамтылған стандартты ем тағайындалғанда жақсарды.

Кардиальді симптомдары мен Герцептин препаратымен емделудің клиникалық пайдасының белгілері бар емделушілердің көпшілігі қосымша клиникалық мәнді кардиальді құбылыстардың туындауынсыз емді жалғастырды.

Герцептин препаратын неоадъювантты емде антрациклиндердің төмен дозалы режимдерімен біріктіріп пайдалану тәжірибесі шектеулі.

Гематологиялық уыттылығы

Фебрильді нейтропения өте жиі пайда болды. Жиі туындайтын жағымсыз реакциялар өзінде анемия, лейкопения, тромбоцитопения және нейтропенияны қамтиды. Гипопротромбинемияның пайда болу жиілігі белгісіз. Антрациклиндік қатардағы препараттармен емнен кейін трастузумабты доцетакселмен біріктіріп қолданғанда нейтропения қаупі біршама жоғары болуы мүмкін.

Бүйрек тарапынан бұзылулар

Герцептин препаратын қолданумен өкпе тарапынан болатын ауыр жағымсыз құбылыстар (соның ішінде өліммен аяқталатын) астасады. Аталған реакциялар мыналарды қамтиды (бірақ онымен шектелмейді): өкпедегі инфильтраттар, жедел респираторлық дистресс-синдром, пневмония, пневмонит, плевралық жалқық, жедел өкпе ісінуі және тыныс алу жеткіліксіздігі.

Қолдануға болмайтын жағдайлар

• трастузумабқа, тышқан ақуыздарына, препараттың қосымша ингредиенттеріне аса жоғары сезімталдық

• өкпе метаздардарынан туындайтын немесе оттегімен демеуші емді талап ететін тыныштықтағы ауыр ентігу

• жүктілік және лактация кезеңі

• 18 жасқа дейінгі балалар мен жасөспірімдер

Дәрілермен өзара әрекеттесуі

Герцептиннің дәрілік өзара әрекеттесулеріне арнайы зерттеулер жүргізілмеген. Қауымдық фармакокинетикалық талдау деректері негізінде (Н0407g, HO551g, HO649g және HO648g) басқа дәрілік заттармен клиникалық мәнді өзара әрекеттесулер байқалмаған.

Трастузумабтың ісікке қарсы басқа дәрілер фармакокинетикасына ықпалы

HER2-оң метастаздық СБО бар әйелдерде ВО15935 және М77004 зерттеулері барысында алынған фармакокинетикалық деректер трастузумабтың (көктамыр ішіне 8 м г/кг немесе 4 мг/кг жүктеме дозасында кейіннен дозаны 3 аптада 1 рет 6 мг/кг немесе аптасына 1 рет 2 мг/кг дейін өзгертумен) паклитаксел мен доксорубициннің (және олардың негізгі метаболиттері - 6-α-гидроксилпаклитаксел мен доксорубицинолдың) таралуына ықпалын тигізбейді деп түйіндеуге мүмкіндік береді.

Алайда трастузумаб доксорубицин метаболиттерінің бірінің (7-деокси-13-дигидродоксорубицинон, D7D) жалпы таралу көлемін арттыруы мүмкін. D7D биологиялық белсенділігі және оның таралу көлемі өзгерісінің клиникалық мәні түсініксіз.

JP16003 зерттеуінің барысында алынған деректер (HER2-оң метастаздық СБО бар жапон әйелдерінде кейіннен аптасына 1 рет 2 мг/кг дозаға дейін өзгертілетін көктамыршілік трастузумабтың 4 мг/кг жүктеме дозасындағы және доцетакселдің 60 мг/м2 дозадағы салыстырмалы емес зерттеуі) трастузумабты бір мезгілде тағайындау доцетаксел фармакокинетикасына ықпалын тигізбейді деп түйіндеуге мүмкіндік береді.

JP19959 зерттеуі кең таралған асқазан обырына шалдыққан жапон ерлері мен әйелдерінде оқшау алынған немесе трастузумабпен біріктірілген капецитабин және цисплатин фармакокинетикасын зерттеу мақсатында өткізілген ВО18255 (ToGA) зерттеуінің бір бөлігі болды. Осы шағын зерттеу нәтижелері цисплатинді немесе трастузумабпен біріктірілген цисплатинді бір мезгілде тағайындау капецитабиннің биологиялық белсенді метаболиттерінің таралу көлеміне әсер етпейді деп түйіндеуге мүмкіндік береді. Алайда трастузумабпен бір мезгілде тағайындалғанда капецитабиннің аса жоғары концентрациялары және жартылай шығарылу кезеңінің ұзағырақ созылуы байқалады. Дәл осы деректер капецитабинді немесе трастузумабпен біріктірілген капецитабинді бір мезгілде тағайындау цисплатин фармакокинетикасына әсер етпейді деп қорытынды жасауға мүмкіндік береді.

Басқа да ісікке қарсы дәрілердің трастузумаб фармакокинетикасына ықпалы

Қан сарысуындағы трастузумаб концентрацияларын (4 мг/кг жүктеме дозадағы монотерапияда кейіннен дозаны аптасына 1 рет көктамырішілік 2 мг/кг дейін өзгертумен) және HER2-оң метастаздық СБО бар жапон әйелдеріндегі трастузумаб концентрацияларын (JP16003 зерттеуі) салыстырғанда доцетакселмен біріктірілім аясындағы трастузумаб фармакокинетикалық параметрлерінде өзгерістері болмаған.

Емделушілер Герцептинмен және паклитакселмен біріктірілген ем алған II фазадағы 2 зерттеудің (ВО15935 және М77004) және III фазадағы (H0648g) бір зерттеудің және HER2-оң метастаздық СБО бар әйелдер Герцептинді монотерапияда алған II фазадағы (W016229 және MO16982) 2 зерттеудің фармакокинетикалық параметрлерін салыстыру зерттеуге байланысты Герцептиннің жекеше және орташа концентрациялары ауытқиды деп түйіндеуге мүмкіндік береді, дегенмен бір мезгілде паклитаксел тағайындаудың трастузумаб фармакокинетикасына нақты ықпал етуі болмаған деп түйіндеуге мүмкіндік береді.

Бір мезгілде анастрозол тағайындау трастузумаб фармакокинетикасына әсер етпейді.

Циклофосфамид, доксорубицин және эпирубицин кардиоуытты әсерлердің даму қаупін арттырады.

Герцептин, ақуыз агрегациясының болуы мүмкін екеніне орай, 5% глюкоза ерітіндісімен үйлесімсіз. Герцептинді басқа дәрілік препараттармен бірге араластыруға болмайды.

Герцептин ерітіндісі поливинилхлорид, полиэтилен немесе полипропиленнен жасалған инфузиялық пакеттермен үйлесімді.

Айрықша нұсқаулар

Герцептинмен емдеуді онкологтың қадағалауымен ғана жүргізген жөн.

Герцептин енгізгенде ентігу, гипотензия, бронх түйілуі, суправентикулярлы тахикардия, оттегі сатурациясының төмендеуі, анафилаксия, респираторлық дистресс-синдром, есекжем, ангионевротикалық ісіну сияқты ауыр инфузиялық жағымсыз реакциялар сирек туындайды. Мұндай симптомдар пайда болғанда препаратты тоқтатып, осы симптомдар басылғанша емделушіні мұқият қадағалау қажет. Ауыр инфузиялық жағымсыз реакцияларды тиімді емдеу оттегі ингаляциясын, бета-адреностимуляторлар, глюкокортикостероидтар қолданумен жүзеге асады. Ауыр және өмірге қатерлі инфузиялық реакциялар дамыған жағдайда Герцептин препаратымен әріқарай емдеуді тоқтату мәселесін қарастыру керек. Өкпе метастаздары немесе қатарлас аурулар туғызған тыныштықта ентігуі бар емделушілерде өлімге ұшырататын инфузиялық реакциялардың даму қаупі жоғары, сондықтан мұндай емделушілерге препаратпен ем жүргізуге болмайды.

Бастапқы жақсарудан кейін жай-күйдің нашарлап кеткені байқалған жағдайлар, сондай-ақ ахуалдың кейіннен білінетін екпінді нашарлау жағдайлары хабарланған. Өліммен аяқталу инфузиядан кейін бір сағат немесе бір апта ішінде болды. Өте сирек жағдайларда емделушілерде инфузиялық реакциялар симптомдары немесе өкпе симптомдары (Герцептин препаратын енгізу басталғаннан кейін 6 сағаттан аса уақыт өткенде) білінді. Емделушілерді осы симптомдар дамуының кейіннен білінуі мүмкін екенін және олар пайда болған жағдайда емдеуші дәрігермен дереу хабарласу қажеттілігін ескерткен жөн.

Өкпе тарапынан болатын жайсыз, кейде өліммен аяқталатын ауыр жағымсыз реакциялар Герцептин тағайындалғанда сирек байқалған және инфузиялық реакциялар көріністері түрінде инфузия кезінде де, препаратты енгізгеннен кейін де пайда болған. Өкпе инфильтраттарын, жедел респираторлық дистресс-синдром, пневмония, пневмонит, плевралық жалқық, жедел өкпе ісінуі мен өкпе жеткіліксіздігін қоса, өкпенің интерстициальді ауруы жағдайлары (ӨИА) байқалды. ӨИА-мен астасқан қауіп факторлары: ӨИА-мен байланысты болғаны белгілі басқа антинеопластикалық препараттармен бұрын жүргізілген немесе қатарлас емді (таксандар, гемцитабин, винорельбин және сәулемен емдеу) қамтиды. Өкпе тарапынан болатын ауыр жағымсыз реакциялар қаупі тыныштықта ентігумен қатар жүретін қатарлас аурулары бар өкпесі метастазды зақымданған емделушілерде жоғары. Сондықтан мұндай емделушілер Герцептин препаратын алмауы тиіс. Пневмониттің дамуына орай, әсіресе, таксандармен қатарлас ем алатын емделушілерде сақтық шарасын қадағалау керек.

Герцептинмен монотерапия ретінде немесе паликсателмен әлде доцетакселмен біріктіріп емдеуден кейін, әсіресе, химиялық емнен соң білінген жүрек жеткіліксіздігі (NYHA бойынша ІІ-IV функционалдық класы) орташа дәрежеде немесе ауыр ағымды болуы және бірқатар жағдайларда өліммен аяқталуға әкелуі мүмкін.

Артериялық гипертензиясы, ишемиялық жүрек ауыруы, сол жақ қарыншасының <55% лықсыту фракциясымен созылмалы жүрек жеткіліксіздігі бар емделушілерді, қарттық жастағы емделушілерді емдеуде сақтық таныту керек.

Герцептин тағайындау жоспарланған науқастар, әсіресе олардың ішінде бұрын антрациклиндік қатардағы препараттар мен циклофосфамид алғандар алдымен сыртартқы жинау, дене бойын тексеру және электрокардиография, эхокардиография, радиоизотопты вентрикулография немесе МРТ сияқты аспаптық тексеру әдістерінің біреуі немесе бірнешеуі қамтылатын тиянақты кардиологиялық тексеруден өтуі тиіс. Герцептинмен емдеу басталғанша оны тағайындаудың болжамды пайдасы мен қатерін мұқият салыстыру қажет.

Герцептин препаратының жартылай шығарылу кезеңі 28-38 күнге жуық созылатындықтан, препарат ем аяқталғаннан кейін 27 аптаға дейін қанда болуы мүмкін. Герцептин препаратымен емдеу аяқталғаннан кейін антрациклиндер алатын емделушілерде кардиоуыттылық қатерінің жоғарылауы мүмкін. Мүмкіндігінше, дәрігерлер Герцептин препаратымен емдеу аяқталған соң 27 апта ішінде антрациклиндер негізіндегі химиялық ем тағайындамауы тиіс. Антрациклиндік қатар препараттарын қолданғанда жүрек функциясына мұқият мониторинг жүргізген жөн.

Емдеуді бастар алдындағы тексеру кезінде жүрек-қантамыр ауруларына күдіктері анықталатын емделуші әйелдерде стандартты кардиологиялық ем жүргізу қажеттілігін бағалау керек.

Герцептинмен емделу барысында жүрек функциясын әр 3 ай сайын зерттеу қажет. Жүрек функциясының симптомсыз бұзылуында жағдайға жиірек (мысалы, әр 6-8 апта сайын) мониторинг жүргізу мақсатқа сай. Тұрақты СҚЛФ төмендеуі болғанда, тіпті клиникалық симптомдары болмаса да, нақты емделуші әйелде айқын клиникалық тиімділік бермейтін жағдайда Герцептинді тоқтатудың мақсатқа сай келуін қарастыру қажет.

СҚЛФ бастапқы мәнінен 10 тармаққа және/немесе 50% дейін және одан аз төмендесе, Герцептинмен емдеуді үзіп, 3 аптадан соң қайтадан СҚЛФ зерттеуін жүргізген жөн, егер СҚЛФ жақсармаса, оны нақты емделуші әйелге қолданудың пайдасы қатерінен едәуір артық болса, емді тоқтату керек.

Герцептинмен ем барысында жүрек жеткіліксіздігінің симптомдары білінсе, стандартты ем тағайындау қажет. Жүрек жеткіліксіздігінің клиникалық мәнді симптомдары бар науқастарда, егер оны нақты емделуші әйелге қолданудың пайдасы қаупінен елеулі артық болса ғана, Герцептинмен емдеуді үзу қажет.

Базалық клиникалық зерттеулерде жүрек жеткіліксіздігі дамыған науқастардың көпшілігінің ахуалы несеп айдағыш дәрілер, жүрек гликозидтері және/немесе ангиотензин өзгертуші фермент тежегіштері қамтылатын стандартты дәрі-дәрмектік ем жүргізгенде жақсарады. Герцептинмен емдеу тиімді болған кардиальді симптомдары бар емделуші әйелдердің көпшілігі жүрек жай-күйінің нашарлауынсыз Герцептинмен емді жалғастырған.

Сүт безінің метастаздық обыры

Сүт безінің метастаздық обырын емдеу үшін Герцептин препаратын антрациклиндер біріктірілімімен бірге қолдану ұсынылады.

Сүт безінің метастаздық обырына шалдыққан емделуші әйелдерде кардиоуыттылықтың даму қаупі антрациклиндермен алдыңғы емдеу кезінде жоғарылаған, алайда ол антрациклиндер мен Герцептин препаратын бір мезгілде қолдану кезіндегісінен төмен.

Сүт безі обырының ерте сатылары

Сүт безі обырының ерте сатыларындағы емделуші әйелдерге емдеуді бастар алдында, ем кезінде әр 3 ай сайын және ол аяқталғаннан кейін препараттың соңғы дозасын енгізген сәттен бастап 24 ай бойына әр 6 ай сайын кардиологиялық тексеруден өту керек. Антрациклиндермен біріктірілген Герцептин препаратымен емделуден соң Герцептин препаратының соңғы дозасын енгізген сәттен бастап немесе егер әріқарай СҚЛФ төмендеуінің ұзаққа созылуы байқалса, 5 жыл бойы жылына 1 рет тексерілу жиілігімен ұзақ уақыт мониторинг жасау ұсынылады.

Сыртартқысында миокард инфарктісі, медициналық жәрдем талап етілетін стенокардия, бұрыннан бар немесе сыртартқыдағы созылмалы жүрек жеткіліксіздігі (NYHA II-IV), сол жақ қарыншаның ˂55% лықсыту фракциясы, басқа кардиомиопатия, емдеуді қажет ететін жүрек аритмиясы, жүрек клапандарының клиникалық мәнді аурулары, нашар бақыланатын гипертензия мен гемодинамикалық маңызды перикардиальді жалқық болған емделушілер сүт безі обырының ерте сатысындағы Герцептиннің пилоттық зерттеулерінен шеттетілді, сондықтан да мұндай емделушілерде Герцептинмен емдеуді ұсынуға болмайды.

Адъювантты ем

Герцептин препаратын адъювантты ем құрамындағы антрациклиндер біріктірілімімен бірге қолдану ұсынылмайды. СБО ерте сатыларында антрациклиндер негізіндегі химиялық емнен кейін Герцептин алған емделуші әйелдерде, доцетакселмен және карбоплатинмен химиялық ем алған (құрамында антрациклин қатарының препараттары жоқ режимдер) осындайлармен салыстырғанда, жүрек тарапынан болатын симптоматикалық және симптомсыз жағымсыз құбылыстар жиілігінің жоғарылауы байқалды. Бұл орайда Герцептин препараты мен таксандарды бірге қолданған жағдайларда бірізді қолдану кезіндегіден айырмашылық көбірек болды.

Пайдаланылған режимге байланыссыз, симптоматикалық кардиальді құбылыстардың көпшілігі емдеудің алғашқы 18 айында пайда болды. Жүргізілген 3 базалық зерттеудің біреуінде (кейіннен 5.5 жыл бақылау кезеңінің медианасымен) симптоматикалық кардиальді құбылыстардың немесе СҚЛФ төмендеуімен байланысты құбылыстардың жинақталу жиілігінің ұзақ уақыт артуы байқалды: антрациклиндермен емнен кейін таксандармен бірге Герцептин алған 2.37% емделуші әйелде салыстыру тобындағы 1% емделуші әйелмен салыстырғанда (антрациклиндермен және циклофосфамидпен, әріқарай таксандармен емдеу тобында және таксандармен, карбоплатинмен және Герцептин препаратымен емдеу тобында).

Ауқымды адьюванттық төрт зерттеуде сәйкестендірілген жүрек тарапынан бұзылуларды дамытатын қауіп факторлары зерттеудің басында, паклитакселмен емдеу басталғанша немесе одан кейін жасы ұлғайған емделушілерді (˃50 жас), СҚЛФ төмендеуін (˂55%) және гипертензияға қарсы дәрілік заттарды пайдалануға дейін немесе бір мезгілде пайдаланғанда да сол жақ қарынша лықсыту фракциясының 10-15 тармаққа төмендеуін қамтыды. Адьювантты химиялық ем біткеннен кейін Герцептин алған емделушілерде жүрек дисфункциясы Герцептинмен ем басталғанша немесе емнің басында алынған антрациклиндердің жоғары жинақтаушы дозасымен және ˃25 кг/м2 дене салмағы индексімен (ДСИ) байланысты болды.

Неоадъювантты-адъювантты ем

Неоадъювантты-адъювантты ем тағайындауға болатын СБО ерте сатыларындағы емделуші әйелдер үшін антрациклиндермен бірге Герцептин препаратын қолдану, егер олар бұрын химиялық ем алмаған жағдайда ғана және тек антрациклиндермен емдеудің төмен дозалық режимдері пайдаланылғанда (ең жоғары жиынтық доза - 180 мг/м2 доксорубицин немесе 360 мг/м2 эпирубицин) ұсынылған.

Неоадъювантты ем құрамында антрациклиндердің төмен дозалары мен Герцептин алған емделуші әйелдерде хирургиялық араласу жасалған соң қосымша цитоуытты химиялық ем жүргізу ұсынылмайды. Басқа жағдайларда қосымша цитоуытты химиялық ем қажеттілігі жөніндегі шешім жекеше факторлар негізінде белгілі болады.

Трастузумабты антрациклиндермен емнің төмен дозалық режимдерімен бірге қолдану тәжірибесі шектеулі. Герцептин препаратын үшеуден төртеуге дейінгі антрациклин циклдарын қамтитын неоадъювантты химиялық еммен бірге қолданғанда (жиынтық дозасы - 180 мг/м2 доксорубицин немесе 300мг/м2 эпирубицин) жүрек функциясының симптоматикалық бұзылу жиілігі төмен (1.7%) болды.

Герцептин препаратымен неоадъювантты-адъювантты емдеу 65 жастан асқан емделуші әйелдерге ұсынылмайды, өйткені мұндай емделу әйелдердегі клиникалық тәжірибесі шектеулі.

Герцептин бензил спиртіне аса жоғары сезімталдығы бар емделушіге тағайындалғанда препаратты инъекцияға арналған сумен сұйылту керек, бұл орайда әр көп дозалы құтыдан бір дозаны ғана сорып алуға болады. Қалған препаратты тастау керек.

Жүктілік және лактация

Бала туу жасындағы әйелдерге Герцептин препаратымен емделу кезінде және ем аяқталғаннан кейін, кем дегенде, 6 ай бойы контрацепцияның сенімді әдістерін пайдалану қажет.

Жүкті болып қалған жағдайда әйелді ұрыққа зиянды әсер болуы мүмкін екенін ескерту қажет. Егер жүкті әйел Герцептин препаратымен ем алуды жалғастыра берсе, онда ол әр алуан мамандықтағы дәрігерлердің мұқият қадағалауында болуы тиіс. Герцептиннің әйелдің ұрпақ өрбіту қабілеттілігіне ықпал етуі белгісіз. Постмаркетингтік кезеңде жүкті әйелдер Герцептин қолданғанда ұрықтың өсуі және/немесе су аздығымен қосыла бүйрек функциясы бұзылған жағдайлар тіркелген, олардың кейбірі ұрық өкпесінің өлімге ұшырататын гипоплазиясымен байланысты болды.

Герцептин препаратымен емделу кезінде және ем аяқталғаннан кейін, кем дегенде, 7 ай бойы емшек сүтімен қоректендіруге кеңес берілмейді.

Әрбір 440 мг көп дозалы құтыға қоса берілетін инъекцияға арналған бактериостатикалық су құрамында консервант ретінде болатын бензил спирті жаңа туған нәрестелерде және 3 жасқа дейінгі сәбилерде уытты әсерін көрсетеді.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Герцептиннің жағымсыз әсерлері болғанын ескеріп, препарат инфузиясын алатын емделушілерге автокөлік басқарғанда және жоғары зейін шоғырландыру талап етілетін жұмыстарды атқарғанда сақтық шарасын қадағалау керек.

Артық дозалануы

Симптомдары: уыттылығының, бірінші кезекте кардиоуыттану құбылыстарының күшеюі.

Емі: симптоматикалық. Гемодиализ тиімділігі жөніндегі деректер жоқ.

Шығарылу түрі және қаптамасы

Препарат және еріткіш резеңке тығынмен тығындалған және қақпақтары бар алюминий қалпақшалармен қаусырылған түссіз шыны құтыларға құйылады. Препараты бар бір құты және еріткіші бар бір құты медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салынған.

Сақтау шарттары

2°С-ден 8°С-ге дейін температурада сақтау керек. Мұздатып қатыруға болмайды.

Балалардың қолы жетпейтін жерде сақтау керек!

Сақтау мерзімі

4 жыл

Қаптамасында көрсетілген жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

Дженентек Инк, АҚШ

DNA Way 1, South San Francisco, СА 94080, АҚШ

Тіркеу куәлігінің иесі

Ф. Хоффманн Ля Рош Лтд., Швейцария

Қаптаушы

Ф. Хоффманн Ля Рош Лтд., Швейцария

немесе

«ОРТАТ» ЖАҚ, Ресей «Р-Фарм» ЖАҚ үшін, Ресей

Қазақстан Республикасы аумағында тұтынушылардан тауар сапасына қатысты шағымдар қабылдайтын ұйымның мекенжайы:

«Рош Қазақстан» ЖШС

050000, Алматы

Қонаев к-сі, 77 үй,

«Park View Office Tower» бизнес орталығы, 15 қабат

e-mail: kz.safety@roche.com, kz.quality@roche.com