Гепарин №50 (5000 ЕД/мл, Синтез ОАО)
Инструкция
-
русский
-
қазақша
Саудалық атауы
Гепарин
Халықаралық патенттелмеген атауы
Натрий гепарині
Дәрілік түрі
Инъекцияға арналған ерітінді, 5000 ӘБ/мл
Құрамы
1 мл ерітіндінің құрамында
белсенді зат - 5000 ӘБ натрий гепарині,
қосымша заттар: бензил спирті, натрий хлориді, 1 мл-ге дейін инъекцияға арналған су.
Сипаттамасы
Түссіз немесе ашық-сары түсті мөлдір сұйықтық.
Фармакотерапиялық тобы
Тікелей антикоагулянттар. Гепарин және оның туындылары.
АТЖ коды В01АВ01
Фармакологиялық қасиеттері
Фармакокинетикасы
Тері астына енгізгеннен кейін ТCmax – 4-5 сағат. Қан плазмасының ақуыздарымен байланысуы – 95%-ға дейін, таралу көлемі өте кішкентай – 0,06 л/кг (қан плазмасы ақуыздарымен күшті байланысуына орай, қан тамыры арнасынан кетпейді). Гепарин плацента арқылы және емшек сүтіне өтпейді. Эндотелийлік жасушалармен және мононуклеарлық-макрофагтық жүйенің жасушаларымен (ретикула-эндотелий жүйесінің жасушаларымен) қарқынды қармалады, бауырда және көкбауырда шоғырланады. Ингаляциялық енгізу тәсілінде (ішке тартқанда) үлкен қан тамырлардың және лимфатикалық тамырлардың альвеолярлық макрофагтарымен, қылтамырлар эндотелийімен жұтылады: осы жасушалар гепарин депонирленетін негізгі орын болып табылады, одан ол қан плазмасындағы қажетті концентрациясын ұстап тұрып, біртіндеп босап шығады. Бауырда N-десульфамидазаның және гепарин метаболизміне көп кешеуілдеген сатыларда қосылатын тромбоциттер гепариназасының қатысуымен метаболизденеді. IV тромбоцитарлық фактордың (гепаринге қарсы фактор) метаболизміне қатысуы, сондай-ақ гепариннің макрофагтар жүйесімен байланысуы биологиялық белсенділіктің жылдам жойылуын және әсер етудің қысқа мерзімділігін көрсетеді. Десульфаттанған молекулалар бүйрек эндогликозидазасының әсер етуімен төмен молекулалық фрагменттерге айналады. Гепариннің жартылай шығарылу кезеңі –1-6 сағат (орташа – 1,5 сағ.); семіздікте, бауыр және/немесе бүйрек жеткіліксіздігінде ұзарады; өкпе артериясының тромбоэмболиясында, жұқпаларда, қатерлі ісіктерде қысқарады. Бүйрекпен бөлінеді, негізінен белсенді емес метаболиттер түрінде, тек жоғары дозаларды енгізгенде өзгермеген күйде (50%-ға дейін) шығарылуы мүмкін. Гемодиализ арқылы шығарылмайды.
Фармакодинамикасы
Тікелей әсер ететін антикоагулянт, орташа молекулалық гепариндер тобына жатады, фибриннің түзілуін баяулатады. Антикоагулянттық әсері in vitro және in vivo сипатында анықталады, көктамыр ішіне енгізгеннен кейін бірден басталады.
Гепариннің әсер ету механизмі бәрінен бұрын оның қан ұюының белсенділендірілген факторларының: тромбин, IXa, Xa, XIa, XIIa тежегіші - III антитромбинмен (ерекше маңыздысы тромбин мен белсенділендірілген Х факторды тежеу қабілеті болып саналады) байланысуына негізделген. Гепарин протромбиннің тромбинге ауысуын бұзады, тромбинді бәсеңдетеді және фибриннің фибриногеннен түзілуін тоқтатады, сондай-ақ аздаған дәрежеде тромбоциттер агрегациясын азайтады.
Бүйректік қан ағымын ұлғайтады; ми тамырларының қарсыласуын арттырады, ми гиалуронидазасының белсенділігін азайтады, липопротеинлипазаны белсенділендіріп, гиполипидемиялық әсер иеленеді. Гепарин өкпедегі сурфактанттың белсенділігін төмендетеді, бүйрек үсті бездерінің қыртысындағы альдостеронның артық мөлшерлі синтезін бәсеңдетеді, адреналинді байланыстырады, аналық бездердің гормональді жандану реакциясын реттейді, паратгормонның белсенділігін күшейтеді. Ферменттермен өзара әрекеттесуінің нәтижесінде ми тирозингидроксилазасының, пепсиногеннің, ДНҚ-полимеразаның белсенділігінің жоғарылатуы және миозиндік АТФазаның, пируваткиназаның, РНҚ-полимеразаның, пепсиннің белсенділігін төмендетуі мүмкін. Жүрегінің ишемиялық ауруы бар науқастарда (ацетилсалицил қышқылымен біріктіріп) коронарлық артериялардың жедел тромбоздарының, миокард инфарктісінің және кенеттен болатын өлімнің қаупін төмендетеді. Миокард инфарктісін өткерген науқастарда қайталанатын инфаркт жиілігін және өлім-жітімділікті азайтады.
Жоғары дозаларда өкпе артериясының тромбоэмболияларында және көктамырлық тромбозда, аз дозаларда көктамырлық тромбоэмболиялардың алдын алуға, соның ішінде хирургиялық операциялардан кейін тиімді. Қанның ұюы көктамыр ішіне енгізгенде бірден дерлік, бұлшықет ішіне енгізгенде - 15-30 минуттан кейін, тері астына енгізгенде - 20-60 минуттан соң баяулайды, ингаляциядан кейін ең жоғары тиімділігі – бір тәуліктен кейін; антикоагуляциялық әсерінің ұзақтығы, тиісінше, 4-5, 6, 8 сағат және 1-2 апта, тромб түзілуін болдырмайтын емдік әсері едәуір ұзақ сақталады. Плазмадағы немесе тромбоз орынындағы III антитромбин тапшылығы гепариннің антитромботикалық әсерін төмендетуі мүмкін.
Қолданылуы
- терең көктамырлар тромбозында
- өкпе артериясының тромбоэмболиясында
- коронарлық артериялар тромбозында
- тромбофлебиттерде
- тұрақсыз стенокардияда
- жедел миокард инфарктісінде
- жыпылықтағыш аритмияда
- ДВС-синдромында
- микротромб түзілуінің және микроайналым бұзылуының алдын алу және емдеуде
- бүйрек тамырларының тромбозында
- гемолитикоуремиялық синдромда
- жүректің митральді ақауында
- бактериялық эндокардитте
- гломерулонефритте
- жегілік нефритте
- қан айналымының экстракорпоральді әдістері пайдаланылатын операциялар кезінде қан ұюының алдын алуда, гемодиализ, гемосорбция, перитонеальді диализ, цитаферез, жеделдетілген диурез жүргізгенде, көктамырлық катетерлерді жуып-шайғанда
Қолдану тәсілі және дозалары
Гепарин үздіксіз көктамырішілік инфузия түрінде немесе жүйелі көктамырішілік инъекциялар түрінде, сондай-ақ тері астына (іш аймағына) тағайындалады.
Алдын алу мақсатында 8-12 сағат аралықтармен тері астына тәулігіне 5000 ӘБ-ден. Теріастылық инъекциялар салу үшін әдеттегі жер іштің алдыңғы-бүйірлік қабырғасы болып табылады (айрықша жағдайларда иық немесе санның жоғарғы аймағына енгізеді), осы орайда жіңішке ине пайдаланылып, бас бармақ пен сұқ саусақ арасында ұсталатын тері қатпарына ерітіндіні енгізіп біткенше перпендикулярлы терең енгізіледі. Әр кезде енгізу орынын ауыстырып отыру керек (гематома түзілуін болдырмау үшін).
Алғашқы инъекцияны операция басталғанша 1-2 сағат бұрын салады; операциядан кейінгі кезеңде 7-10 күн бойы, қажет болған жағдайда ұзақтау уақыт енгізеді.
Емдік мақсаттарда енгізілетін гепариннің бастапқы дозасы, әдетте, 5000 ӘБ құрайды және көктамыр ішіне енгізіледі, сонан соң емдеуді көктамырішілік инфузияларды пайдаланумен жалғастырады.
Қолдану тәсіліне қарай демеуші дозалар белгіленеді:
- үздіксіз көктамырішілік инфузияда, гепаринді 0,9% натрий хлориді ерітіндісінде сұйылтып, сағатына 1000-2000 ӘБ (24000-48000 ӘБ/тәулік) тағайындайды;
- мерзім сайын жасалатын көктамырішілік инъекцияларда әр 4 сағат сайын 5000-10000 ӘБ гепарин тағайындалады.
Ересектерге жеңіл және орташа дәрежелі ауырлық сипатындағы тромбоздарда препаратты көктамыр ішіне тәулігіне 40000-50000 ӘБ дозада 3-4 ретке бөліп; ауыр тромбозда және эмболияда – көктамыр ішіне тәулігіне 80000 ӘБ дозада, 4 ретке бөліп 6 сағат аралықпен тағайындайды. Тіршілік көрсеткіштеріне қарай, көктамыр ішіне бір дүркін 25000 ӘБ (5 мл), сосын әр 4 сағат сайын 20000 ӘБ-ден тәуліктік 80000-120000 ӘБ дозаға жеткенше енгізеді. Көктамырішілік тамшылатып құюлар кезінде инфузиялық ерітіндінің тәуліктік көлеміне кемінде 40000 ӘБ гепарин қосу қажет. Көктамыр ішіне енгізгенде гепарин дозаларын белсенділендірілген жартылай тромбопластин уақыты (БЖТУ) бақылануынан 1,5-2 есеге көбірек болатындай етіп іріктейді. Тері астына аз дозаларды енгізгенде (күніне 2-3 рет 5000 ӘБ) тромб түзілуінің алдын алу үшін жүйелі БЖТУ бақылауы, оның ұлғаюы мардымсыз болғандықтан, талап етілмейді.
Үздіксіз көктамырішілік инфузия жүргізу гепаринді қолданудың, жүйелі (әлсін-әлсін) инъекциялардан гөрі, үздік ең тиімді тәсілі болып табылады, өйткені мейлінше тұрақты гипокоагуляциямен қамтамасыз етеді және қан кетуді сирек туындатады.
Экстракорпоральді қан айналдыруды жүргізгенде 140-400 ӘБ/кг дозада немесе 500 мл қанға 1500-2000 ӘБ-ден енгізеді. Гемодиализ кезінде басында көктамыр ішіне 10000 ӘБ, сосын емшараның ортасында – тағы 30000-50000 ӘБ енгізеді. Егде жастағы тұлғаларға, әсіресе әйелдерге дозалар азайтылуға тиіс.
Балаларға препаратты көктамыр ішіне тамшылатып енгізеді: 3-тен 6 жасқа дейін – тәулігіне 600 ӘБ/кг, 6-дан 15 жасқа дейін – тәулігіне 500 ӘБ/кг БЖТУ бақылануымен.
Жағымсыз әсерлері
Кейде:
- бас айналу, бас ауыру, жүрек айну, тәбеттің төмендеуі, құсу, диарея
Сирек:
- тромбоцитопения
- тері некрозы
- гангренаның, миокард инфарктісінің, инсульттің дамуымен қатар жүретін артериялық тромбоздар
- жұмсақ тіндердің кальцификациясы
- остеопороз, сүйектердің өздігінен күрт сынуы
- гипоальдостеронизм
- өтпелі алопеция
- «бауыр» трансаминазалары белсенділігінің жоғарылауы
- аллергиялық реакциялар: кейде - тері гиперемиясы, дәрілік қызба, есекжем, ринит, тері қышымасы және табанның ысынуын сезіну, сирек - бронх түйілуі, коллапс, анафилактикалық шок
- жергілікті реакциялар: тітіркену, ауырсыну, гиперемия, гематома және енгізген жердің ойық жаралануы, қан кету (қарсы көрсетілімдерді мұқият бағалағанда, қан ұюын жүйелі зертханалық тексергенде және нақты дозалағанда қауіпті жоққа тән кемітуге болады)
- асқазан-ішек жолынан және несеп жолдарынан, енгізілген жерлерде, қысымға ұшырайтын аймақтарда, операциялық жарақаттардан қан кетулер, сонымен қатар басқа ағзаларға (бүйрекүсті бездері, сары дене, ретроперитонеальді кеңістік) қан құйылулар
Қолдануға болмайтын жағдайлар
- гепаринге асқын сезімталдық
- гемофилия, тромбоцитопения, васкулит
- қан кету
- ми тамырларының аневризмасы, қолқа қабатын ажырататын аневризма
- геморрагиялық инсульт
- антифосфолипидті синдром
- жарақат (әсіресе бассүйек-мидың)
- бақыланбайтын артериялық гипертензия
- асқазан-ішек жолының эрозиялық-ойық жаралы зақымданулары
- өңеш көктамырларының варикозды кеңеюімен қатар жүретін бауыр циррозы
- етеккір кезеңі
- қатерлі түсік
- босану (соның ішінде таяудағы)
- көзге, миға, қуық асты безіне, бауырға және өт жолдарына таяуда жүргізілген хирургиялық араласуларда
- жұлынға жасалған пункциядан кейінгі жай-күй
- жүктілік
- лактация кезеңі
- 3 жасқа дейінгі балаларға
Дәрілермен өзара әрекеттесуі
Гепариннің әсерін кейбір антибиотиктер (ішек микрофлорасында К витаминінің түзілуін төмендетеді), ацетилсалицил қышқылы, дипиридамол, қабынуға қарсы стероидты емес препараттар және тромбоциттер агрегациясын төмендететін (гепаринмен емдеу аясында науқастардағы гемостаздың негізгі механизмі болып қалатын) басқа дәрілік заттар, тікелей емес антикоагулянттар, өзекшелік сөліністі бөгейтін дәрілік заттар күшейтеді. Гистаминге қарсы дәрілік заттар, фенотиазиндер, жүрек гликозидтері, никотин қышқылы, этакрин қышқылы, тетрациклиндер, алкалоид қастауыштары, никотин қышқылы, нитроглицерин (көктамыр ішіне енгізу), тироксин, адренокортикотропты гормон, сілтілік амин қышқылдары және полипептидтер, протамин - әлсіретеді.
Басқа дәрілік заттармен бір еккіште араластыруға болмайды.
Айрықша нұсқаулар
Сақтықпен: Поливалентті аллергиядан (соның ішінде бронх демікпесінен), артериялық гипертензиядан зардап шегетін тұлғаларға, стоматологиялық манипуляцияларда, қант диабетінде, эндокардитте, перикардитте, жатырішілік контрацептив (ЖІК) бар болса, белсенді туберкулезде, сәулелі емде, бауыр жеткіліксіздігінде, созылмалы бүйрек жеткіліксіздігінде, егде жаста (60 жастан асқандар, әсіресе әйелдер).
Гепаринді бұлшықет ішіне енгізуге болмайды, өйткені енгізілген жерде гематома түзілуі мүмкін.
Гепарин ерітіндісінде сары рең болуы мүмкін, ол оның белсенділігін немесе көтерімділігін өзгертпейді.
Гепаринді емдік мақсаттарда тағайындағанда оның дозасын БЖТУ (белсенділендірілген жартылай тромбопластин уақытының) мәніне қарай іріктейді.
Гепаринді қолдану кезінде дәрілік заттарды бұлшықет ішіне енгізуге және ағзаларға биопсия жүргізуге болмайды.
Гепаринді сұйылту үшін тек 0,9% натрий хлоридінің ерітіндісін пайдаланады.
Гепарин емшек сүтіне өтпесе де, оны бала емізетін аналарға тағайындау жекелеген жағдайларда оостеопороздың жылдам дамуын (2-4 апта ішінде) және омыртқаның зақымдануын туындатты.
Дәрілік заттың көлік құралдарын және қауіпті механизмдерді басқару қабілетіне әсер ету ерекшеліктері
Гепарин препаратын қолданғанда: бас айналу, бас ауыру, жүрек айну пайда болуы ықтимал, осыған орай емдеу кезінде көлік құралын немесе қауіптілігі зор механизмдерді басқаруды қоя тұру қажет.
Артық дозаланғанда
Белгілері: қан кету нышандары
Емі: гепаринмен артық дозалану туғызған аз қан кетулерде оны қолдануды тоқтату жеткілікті. Аумақты қан кетулерде гепариннің артық мөлшерін протамин сульфатымен (100 ӘБ гепаринге 1 мг протамин сульфаты) бейтараптандырады. Гепариннің жылдам шығарылатынын ескерген жөн, егер де протамин сульфаты гепариннің алдыңғы дозасынан кейін 30 минуттан соң тағайындалса, қажетті дозаның жартысын ғана енгізу керек; протамин сульфатының ең жоғарғы дозасы 50 мг құрайды.
Гемодиализ тиімсіз.
Шығарылу түрі және қаптамасы
Құтыларда инъекцияға арналған ерітінді 5 мл-ден.
5 құты пішінді ұяшықты қаптамада. 1 пішінді ұяшықты қаптамадан медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салынған.
50 құты медицинада қолданылуы жөніндегі мемлекеттік және орыс тілдеріндегі 1-5 нұсқаулықпен бірге картон қорапқа салынған.
Сақтау шарттары
Құрғақ, жарықтан қорғалған жерде, 8 0С-ден 15 0С-ге дейінгі температурада сақтау керек.
Балалардың қолы жетпейтін жерде сақтау керек!
Сақтау мерзімі
4 жыл
Жарамдылық мерзімі өткеннен кейін пайдалануға болмайды.
Дәріханалардан босатылу шарттары
Рецепт арқылы.
Өндіруші
«Синтез» ААҚ.
Ресей Федерациясы, 640008, Қорған қ., Конституция даңғылы, 7.
тел./факс: (3522) 48-16-89
Тіркеу куәлігінің иесі
«Синтез» ААҚ, Ресей Федерациясы
Қазақстан Республикасы аумағында тұтынушылардан өнім (тауар) сапасына қатысты шағымдар қабылдайтын ұйымның мекенжайы
«СТОФАРМ» ЖШС, 000100, Қазақстан Республикасы
Қостанай облысы, Қостанай қ., Орал қ-сы, 14
тел.: 714 228 01 79