Гемзар® (1 г)

• русский
• қазақша

• Скачать инструкцию медикамента

Саудалық атауы

Гемзар

Халықаралық патенттелмеген атауы

Гемцитабин

Дәрілік түрі

Инфузия үшін ерітінді дайындауға арналған 200 мг, 1 г лиофилизат

Құрамы

200 мг ұнтақтың құрамындабелсенді зат - 228 мг гемцитабин гидрохлориді (200 мг гемцитабинге баламалы)

қосымша заттар: маннитол, натрий ацетаты.

1г ұнтақтың құрамындабелсенді зат - 1140 мг гемцитабин гидрохлориді (1 г гемцитабинге баламалы)

қосымша заттар: маннитол, натрий ацетаты.

Сипаттамасы

Ақ немесе ақ дерлік престелген масса немесе ұнтақ.

Фармакотерапиялық тобы

Ісікке қарсы препараттар. Антиметаболиттер. Пиримидин аналогтары. Гемцитабин.

АТХ коды L01BC05

Фармакологиялық қасиеттері

Фармакокинетикасы

Препараттың 1г/м2 дозадағы 30 минут ішіндегі бір реттік көктамырішілік инфузиясынан кейін гемцитабин плазмадағы концентрациясының (Сmax) жоғары шегіне инфузия аяқталғаннан кейін 3-15 минуттан соң жетеді. Гемцитабиннің плазма ақуыздарымен байланысуы мардымсыз. Орташа таралу көлемі 11л/м2 құрайды. Цитидиндеаминаза ферментімен белсенді емес урацилді метаболит 2–дезокси-2,2-дифторуридинге дейін бүйректе, бауырда, қанда және организмнің өзге тіндерінде метаболизденеді. Жасуша ішіндегі метаболизм үдерісінде плазма мен несепте анықталмайтын дифосфатты және трифосфатты белсенді метаболиттер түзіледі. 10%-дан аз енгізілген доза өзгеріссіз күйде несептен табылады.

Дозалар бір рет және көп рет енгізілетін зерттеулерді фармакокинетикалық талдау таралу көлемінің едәуір дәрежеде жынысқа байланысты екенін көрсетеді. Шамамен 30 л/с/м2 – 90 л/с/м2 аралығында ауытқитын жүйелі клиренсі жас және жыныс ерекшеліктеріне байланысты.

Жартылай шығарылу кезеңі 32 минуттан 94 минутқа дейін ауытқиды.

Фармакодинамикасы

Гемцитабин пиримидин аналогтары тобының антиметаболиті түрінде болады.

Препарат S (репликация фазасы) және G1/S (бастапқы өсу фазасы мен репликация фазасы арасындағы аралық) фазаларында жасушаларға әсер етумен циклдық спецификалық танытады.

Гемцитабин дифосфатты және трифосфатты белсенді нуклеозидтер түзетін нуклеозидкиназалардың әсер етуімен жасуша ішінде метаболизденеді.

Дифосфатты нуклеозидтер дезоксирибонуклеин қышқылы (ДНҚ) синтезіне қажетті дезоксинуклеозидтрифосфаттар түзілуіне әкелетін реакциялардың бірден-бір катализаторы ретінде әрекет ететін рибонуклеотидредуктазаны тежейді. Трифосфатты нуклеозидтер ДНҚ және рибонуклеин қышқылының (РНҚ) молекулаларына тізбектелу үшін дезоксицитидинтрифосфатпен белсенді бәсекелеседі. ДНҚ тізбегіне гемцитабиннің жасушаішілік метаболиттері тізбектелген соң оның өсу үстіндегі жіптеріне тағы бір қосымша нуклеотид қосылады, бұл ДНҚ синтезінің әріқарай толық тежелуіне және апоптоз ретінде белгілі жасушаның бағдарламалы жойылуына әкеледі.

Қолданылуы

• жергілікті таралған немесе метастаздық өкпенің ұсақ жасушалы емес обырында цисплатинмен немесе карбоплатинмен біріктірілген бірінші желідегі ем ретінде, сонымен қатар егде жастағы емделушілер немесе 2-ге тең функционалдық статусы бар емделушілердегі монотерапияда.

• резектабельді емес, жергілікті қайталанатын немесе метастаздық сүт безінің обырында олардың тағайындалуына қарсы көрсетілімдері болмаса, антрациклиндер қамтылған неоадъювантты және/немесе адъювантты ем жүргізілген соң паклитакселмен біріктірілген ем құрамында.

• жергілікті таралған немесе метастаздық уротелиальді обырда (қуықтың, бүйрек тостағаншасының, несепағардың, несеп шығару өзегінің обыры).

• жергілікті таралған немесе метастаздық эпителиальді аналық бездер обырында платина туындылары негізінде бірінші желідегі ем жүргізілгеннен кейін ауруы үдеп кеткен емделушілерде монотерапия ретінде немесе карбоплатинмен біріктірілімде.

• жергілікті таралған немесе метастаздық ұйқы безінің обырында.

• жергілікті таралған немесе метастаздық жатыр мойны обырында.

• өт шығару жолдарының обырында.

Гемзар бүйрек обырында монотерапия ретінде немесе біріктірілген ем құрамында белсенділігін көрсетті. Гемзар өкпенің кең таралған ұсақ жасушалы обырында және аталық бездің кең таралған рефрактерлі обырында тиімділігін көрсетті.

Қолдану тәсілі және дозалары

Гемзар 30 минут ішінде көктамыр ішіне тамшылатып енгізіледі.

Гемзар іcікке қарсы химиялық ем жүргізу тәжірибесі бар дәрігердің бақылауымен енгізілуі тиіс.

Емделушіде дамыған уыттылық дәрежесіне қарай, Гемзар дозасын кейінгі емдеу курстарында немесе басталып кеткен курс кезінде азайтуға болады.

Гемзарды әр енгізер алдында қандағы тромбоциттер, лейкоциттер және гранулоциттер мөлшерін бақылау қажет. Препарат туғызған сүйек кемігі функциясының бәсеңдеу белгілері білінгенде емдеуді тоқтата тұру немесе дозаны түзету қажет.

Гемзар инфузия кезінде жақсы көтерімді және амбулаторлы енгізуге болады.

Қан құйылулар немесе қанталаулар пайда болған жағдайда препараттың көктамырішілік инфузиясын дереу тоқтату керек. Препарат енгізуді басқа қан тамырын пайдаланып жаңғыртуға болады. Препарат енгізілгеннен кейін емделуші мұқият бақылауда болуы тиіс.

Өкпенің ұсақ жасушалы емес обыры (жергілікті таралған немесе метастаздық), емнің бірінші желісі.

Монотерапия: Препараттың ұсынылған дозасы – әр 28 күндік циклдың 1, 8 және 15 күндері 3 апта бойы аптасына бір рет 1000 мг/м2, кейіннен апталық үзіліспен. Әріқарай осы төрт апталық цикл қайталанады. Емделуші ұшырайтын уыттану дәрежесіне қарай, әр цикл сайын немесе қандай да бір цикл кезінде дозаны азайтуға болады.

Цисплатинмен біріктірілген ем: Препараттың ұсынылған дозасы – әр 21 күндік циклдың 1 және 8 күні 1250 мг/м2 немесе әр 28 күндік циклдың 1, 8 және 15 күндері 1000 мг/м2. Цисплатин 70 мг/м2 дозада циклдың 1-ші күні гипергидратация аясында Гемзар инфузиясынан соң енгізіледі. Емделуші ұшырайтын уыттану дәрежесіне қарай, әр цикл сайын немесе қандай да бір цикл кезінде дозаны азайтуға болады.

Карбоплатинмен біріктірілген ем: Препараттың ұсынылған дозасы – әр 21 күндік циклдың 1 және 8 күні 1000 мг/м2 немесе 1200 мг/м2. Карбоплатин Гемзар инфузиясынан кейін циклдың 1 күні 5,0 мг/мл/мин AUC («концентрация-уақыт» қисығы астындағы аудан) есебінен енгізіледі. Емделуші ұшырайтын уыттану дәрежесіне қарай, әр цикл сайын немесе қандай да бір цикл кезінде дозаны азайтуға болады.

Сүт безі обыры (резектабельді емес, жергілікті таралған немесе метастаздық)

Паклитакселмен біріктірілген ем: Оларға қарсы көрсетілімдері болмаса, антрациклиндер қамтылған неоадъювантты және/немесе адъювантты емнен кейін ауру үдеп кеткенде бірінші желідегі ем ретінде.

Паклитаксел 175 мг/м2 дозада 21 күндік циклдың 1 күні 3 сағат бойы көктамыр ішіне тамшылатып енгізіліп, кейіннен Гемзар енгізуге ұласады. Препараттың ұсынылған дозасы – әр 21 күндік циклдың 1 және 8 күні 1250 мг/м2. Емделуші ұшырайтын уыттану дәрежесіне қарай, әр цикл сайын немесе қандай да бір цикл кезінде дозаны азайтуға болады. Біріктірілген емді (Гемзар + паклитаксел) бастар алдында қандағы гранулоциттердің абсолютті саны емделушілерде 1500/мкл-ден кем болмауы тиіс.

Уротелиальді обыр (қуықтың (жергілікті таралған немесе метастаздық және беткейлік), бүйрек тостағаншасының, несепағардың, несеп шығару өзегінің обыры).

Монотерапия: Препараттың ұсынылған дозасы – әр 28 күндік циклдың 1, 8 және 15 күндері 1250 мг/м2. Әріқарай осы төрт апталық цикл қайталанады. Емделуші ұшырайтын уыттану дәрежесіне қарай, әр цикл сайын немесе қандай да бір цикл кезінде дозаны азайтуға болады.

Цисплатинмен біріктірілген ем: Препараттың ұсынылған дозасы – әр 28 күндік циклдың 1 немесе 2 күніндегі Гемзар инфузиясынан кейін бірден 70 мг/м2 дозада цисплатинмен біріктіріп 1, 8 және 15 күндері енгізілетін 1000 мг/м2. Әріқарай осы төрт апталық цикл қайталанады. Емделуші ұшырайтын уыттану дәрежесіне қарай, әр цикл сайын немесе қандай да бір цикл кезінде дозаны азайтуға болады. Клиникалық зерттеулер цисплатиннің 100 мг/м2 дозасында аса айқын миелосупрессияның байқалуын көрсетті.

Аналық бездердің эпителиальді обыры (жергілікті таралған немесе метастаздық, платина туындыларына төзімді).

Монотерапия: Препараттың ұсынылған дозасы – әр 28 күндік циклдың 1, 8 және 15 күндері 800-1250 мг/м2. Әріқарай осы төрт апталық цикл қайталанады. Емделуші ұшырайтын уыттану дәрежесіне қарай, әр цикл сайын немесе қандай да бір цикл кезінде дозаны азайтуға болады.

Карбоплатинмен біріктірілген ем: Препараттың ұсынылған дозасы – әр 21 күндік циклдың 1 күні Гемзар инфузиясынан кейін бірден 4,0 мг/мл/мин AUC есебінен карбоплатинмен біріктіріп 1 және 8 күндері енгізілетін 1000 мг/м2. Емделуші ұшырайтын уыттану дәрежесіне қарай, әр цикл сайын немесе қандай да бір цикл кезінде дозаны азайтуға болады.

Ұйқы безінің обыры (жергілікті таралған немесе метастаздық, соның ішінде 5-фторурацилмен емдеуге төзімді).

Монотерапия: Препараттың ұсынылған дозасы –7 апта бойы аптасына бір рет 1000 мг/м2, кейіннен апталық үзіліске ұласады. Артынан препарат әр 28 күндік циклдың 1, 8 және 15 күндері енгізіледі. Кейінгі циклдар 3 апта бойы бір реттік апта сайынғы инфузиялардан құралып, кейіннен апталық үзіліс жасалуы тиіс. Емделушідегі уыттану симптомдарына қарай, дозаны әрбір кейінгі цикл сайын немесе емдеу циклын жүргізгенде оның аяқталуын күтпестен азайтуға болады.

Жатыр мойны обыры (жергілікті таралған немесе метастаздық).

Цисплатинмен біріктірілген ем: бірізді химиялық-сәулелі ем кезінде (неоадъювантты) жергілікті таралған обырда және метастаздық обырда цисплатин 70 мг/м2 дозада циклдың 1 күні соңынан Гемзар енгізілетін гипергидратация аясында енгізіледі. Гемзар 1250 мг/м2 дозада әр 21 күндік циклдың 1 және 8 күні енгізіледі. Әріқарай осы төрт апталық цикл қайталанады. Емделуші ұшырайтын уыттану дәрежесіне қарай, әр цикл сайын немесе қандай да бір цикл кезінде дозаны азайтуға болады.

Жергілікті таралған обырда бір мезгілдегі химиялық-сәулелі ем кезінде цисплатин 40 мг/м2 дозада енгізіліп, соңынан (цисплатин енгізілген соң тікелей) Гемзар енгізіледі. Гемзар 125 мг/м2 дозада 6 апта бойы аптасына 1 рет циклдың 1-ші, 8-ші, 15-ші, 22-ші, 29-шы немесе 36-шы күндері сәулемен емдеу басталғанша 1-2 сағат бұрын енгізіледі.

Өт шығару жолдарының обыры

Монотерапия: Препараттың ұсынылған дозасы –3 апта бойы аптасына бір рет 1000 мг/м2, кейіннен апталық үзіліске ұласады. Әріқарай осы төрт апталық цикл қайталанады. Емделуші ұшырайтын уыттану дәрежесіне қарай, әр цикл сайын немесе қандай да бір цикл кезінде дозаны азайтуға болады.

Цисплатинмен біріктірілген ем: Цисплатин 70 мг/м2 дозада циклдың 1 күні соңынан Гемзар енгізілетін гипергидратация аясында енгізіледі. Гемзар 1250 мг/м2 дозада әр 21 күндік циклдың 1 және 8 күні енгізіледі. Әріқарай осы төрт апталық цикл қайталанады. Емделуші ұшырайтын уыттану дәрежесіне қарай, әр цикл сайын немесе қандай да бір цикл кезінде дозаны азайтуға болады.

Уыттылық мониторингі және уыттану салдарынан препараттың дозалануын өзгерту

Гематологиялық емес уыттану симптомдарын анықтау кезінде дозаны модификациялау

Түсініксіз диспноэ немесе өкпенің ауыр уыттануының, бауырдың ауыр уыттануының басқа көріністері туындағанда, гемолитикалық-уремиялық синдромда, қылтамырлардың жоғары өткізгіштік синдромында, қайтымды артқы лейкоэнцефалопатия синдромында Гемзармен емдеуді дереу тоқтату керек.

Гематологиялық емес уыттануды анықтау үшін науқасты жүйелі тексеруден өткізіп, бауыр және бүйрек функциясын бақылау қажет. Уыттылық дәрежесіне қарай дозаны әр цикл барысында немесе жаңа циклдың басталуымен сатылап азайтуға болады. Жалпы, жүрек айну мен құсуды қоспағанда, ауыр гематологиялық емес уыттылық (3 немесе 4 класс) дамығанда, емдеуші дәрігердің қарастыруымен Гемзармен емдеу уақытша тоқтатылуы тиіс немесе препарат дозасы азайтылуы тиіс. Препарат енгізу, дәрігердің пікірі бойынша, уыттылық басылатын сәтке дейін кейінге шегерілуі тиіс.

Гематологиялық уыттану симптомдарын анықтау кезінде дозаны модификациялау

Курсты бастау

Қолданылу көрсетілімдеріне байланыссыз Гемзармен емдеу циклын бастар алдында гранулоциттердің абсолютті саны кемінде 1500 (х106/л), ал тромбоциттердікі кемінде 100000 (х106/л) болуы тиіс.

Курс кезінде

Гематологиялық уыттылық дамыған жағдайда Гемзар дозасын азайтуға немесе оның енгізілуін мына сызбаларға сәйкес кейінге шегеруге болады:

А. Уротелиальді обырда, өкпенің ұсақ жасушалы емес обырында, ұйқы безінің обырында монотерапия ретінде немесе цисплатинмен біріктірілген емдеу циклы аясында Гемзар дозасын түзету.

* Тоқтатылған ем гранулоциттердің абсолютті саны, ең аз дегенде, 500 (1 мкл), ал тромбоциттер саны 50000 (1 мкл) мөлшеріне жеткенше басталған цикл ішінде жаңғыртылмайды.

Б. Сүт безі обырында паклитакселмен біріктірілген ем циклы аясында Гемзар дозасын түзету.

* Тоқтатылған емдеу басталған курс ішінде жаңғыртылмайды. Емдеу гранулоциттердің абсолютті саны, ең аз дегенде, 1500 (1 мкл), ал тромбоциттер саны 100.000 (1 мкл) мөлшеріне жететін келесі курстың 1 күнінен жаңғыртылады.

В. Аналық бездер обырында карбоплатинмен біріктірілген ем циклы аясында Гемзар дозасын түзету.

* Тоқтатылған емдеу басталған курс ішінде жаңғыртылмайды. Емдеу гранулоциттердің абсолютті саны, ең аз дегенде, 1500 (1 мкл), ал тромбоциттер саны 100.000 (1 мкл) мөлшеріне жететін келесі курстың 1 күнінен жаңғыртылады.

Барлық көрсетілімдер үшін кейінгі курстарда гематологиялық уыттылық нәтижесінде дозалануын өзгерту

Гемзар дозасы гематологиялық уыттылықтың мынадай белгілері болғанда бастапқы старттық дозасының 75% дейін азайтылуы тиіс:

• 5 күннен астам уақыт бойы гранулоциттердің абсолютті саны

< 500х106/л

• 3 күннен астам уақыт бойы гранулоциттердің абсолютті саны

< 100х106/л

• Фебрильді нейтропения

• Тромбоциттер <25.000 х 106/л

• Емдеу курсын бастауды уыттануға байланысты аптадан аса кідірту

Емделушілердің ерекше топтары

Бауыр немесе бүйрек функциясы бұзылған емделушілер

Гемзарды бауыр немесе бүйрек функциясы төмендеген емделушілерде препаратты емделушілердің осы санатында қолдану жөніндегі клиникалық зерттеулерден жеткілікті деректер болмауына орай сақтықпен қолдану керек.

Егде жастағы емделушілер (65 жастан асқан)

Егде жастағы емделушілерде Гемзар дозасын түзету қажеттілігін болжауға мүмкіндік беретін барлық емделушілерге ұсынылатын нұсқасынан басқа деректер жоқ.

Балалар және жасөспірімдер (18 жасқа толмаған)

Гемзарды, емделушілердің осы қауымындағы препараттың қауіпсіздігі мен тиімділігі жөніндегі ақпараттың жеткіліксіз екеніне орай, 18 жасқа дейінгі балалар мен жасөспірімдерге тағайындау ұсынылмайды. Гемцитабин жаңа түзілімдердің әртүрлі типтері бар балаларда I және II фазадағы шектеулі зерттеулерде зерттелген. Осы зерттеулердің деректері гемцитабинді балаларда қолданудың тиімділігі мен қауіпсіздігін дәлелдеу үшін жеткіліксіз.

Инфузияға арналған ерітінді дайындау жөніндегі нұсқаулар

Еріткіш ретінде консерванттарсыз натрий хлоридінің 0,9% ерітіндісі ғана пайдаланылады.

Инфузияға арналған ерітінді дайындау үшін құтының ішіндегі 200 мг иньекцияға арналған 0,9% натрий хлоридінің кемінде 5 мл, ал 1 г кемінде 25 мл ерітіндісінде ерітіледі.

Инфузияға арналған ерітіндіні дайындағанда еріткіш құты қабырғасын бойлап баяу қосылуы тиіс. Әрбір құтыны лиофилизат толық ерігенше мұқият шайқайды. Алынған ерітінді мөлдір болуы тиіс.

Гемзардың ең жоғары концентрациясы 40 мг/мл-ден аспауы тиіс. 40 мг/мл-ден жоғары концентрацияда дайындалған ерітінділер толық ерімей қалуы мүмкін.

Препараттың керек дозасынан құралып дайындалған Гемзар ерітіндісін енгізер алдында 30 минуттық көктамырішілік инфузия үшін жеткілікті мөлшерде иньекцияға арналған 0,9% натрий хлориді ерітіндісімен сұйылтады.

Парентеральді енгізу алдында дайындалған ерітіндіні механикалық қоспаларының бар-жоғы мен түсінің өзгерісі тұрғысынан көзбен шолып тексеру қажет.

Пайдаланылмаған ерітінді цитоуытты дәрілік препараттармен қауіпсіз жұмыс істеу жөніндегі нұсқауға сай жойылуы тиіс.

Цитоуытты дәрілік препараттармен жұмыс істеу кезіндегі алдын-ала сақтандыру шаралары

Цитоуытты дәрілік препараттарды дайындау және олармен жұмыс істеу кезінде тиісті сақтану шараларын қадағалау керек. Цитоуытты заттар инъекциясы үшін ерітінділер дайындауды пайдаланылған препараттар туралы білімдері бар үйретілген білікті мамандар атқаруы тиіс. Осы емшара арнайы тағайындалған аймақта жүргізілуі тиіс. Көзді қорғауға арналған тиісті заттарды, бір реттік қолғаптарды, бетті қорғайтын бетпердені және бір реттік алжапқышты қолдану керек. Дәрілік препараттың көзге кездейсоқ түсіп кетуін болдырмайтын сақтандыру шараларын қадағалау қажет. Көзге байқаусызда тиіп кеткен жағдайда мол мөлшерлі сумен мұқият жуып-шаю қажет. Кез келген қалдықтар және пайдаланылмаған препарат жергілікті талаптарға сай жойылуы тиіс.

Жағымсыз әсерлері

Гемзармен ем кезінде ең жиі кездесетін жағымсыз реакцияларға құсумен бірге немесе онсыз жүрек айну; бауыр трансаминазалары (АСТ/АЛТ) мен сілтілік фосфатаза (шамамен 60% емделушіде тіркелген) деңгейінің көтерілуі; протеинурия мен гематурия (50% емделушіде); ентігу (10-40% жағдай) (осы реакциялардың ең көп жиілігі өкпе обырымен науқастарда білінеді); терінің аллергиялық (25% емделушіде), соның ішінде қышынумен қатар жүретін (10% емделушіде) бөртулері жатады.

Жағымсыз реакциялардың жиілігі мен ауырлығы дозаға, инфузия жылдамдығына және препарат енгізу арасындағы аралықтарға байланысты. Дозаны шектейтін жағымсыз реакциялар: тромбоциттер, лейкоциттер және гранулоциттер санының төмендеуі.

Бірлі-жарым жағдайлардан жиірек кездескен жағымсыз реакциялар келесі градацияға сәйкес тізбеленген: өте жиі (>10%); жиі (>1%, <10%); кейде (>0,1%, <1%); сирек (>0,01%, <0,1%); аса сирек (>0,01%).

Клиникалық зерттеулер деректері бойынша

Өте жиі

• анемия, лейкопения және тромбоцитопения

• ентігу (әдетте орташа дәрежедегі және емделмей-ақ тез басылатын)

• құсумен қатар жүретін немесе қатар жүрмейтін жүрек айну

• бауыр трансаминазалары (аспартатаминотрансфераза (АСТ), аланинаминотрансфераза (АЛТ)) және сілтілік фосфатаза концентрациясының жоғарылауы

• қышынумен жиі қатар жүретін орташа дәрежедегі аллергиялық тері бөртулері

• алопеция (әдетте шаш тым аз түсетін)

• орташа дәрежедегі протеинурия және гематурия («Жағымсыз әсерлері. Постмаркетингтік деректер» бөлімін қараңыз)

• тұмау тәрізді синдром (дене температурасының көтерілуі, бас ауыру, қалтырау, миалгия, астения және анорексия), жөтел, ринит, дімкәстану, тершеңдік және ұйықтау қиындықтары)

• ісінулер, шеткергі ісінулер, бет ісінуін қоса (ісінулер, әдетте, емдеуді тоқтатқаннан кейін қайтымды)

Жиі

• фебрильді нейтропения

• анорексия

• бас ауыру, ұйқының бұзылуы, ұйқышылдық

• жөтел, ринит

• диарея, стоматит, ауыз қуысы шырышты қабатының ойық жаралануы, іш қату

• билирубин концентрациясының жоғарылауы

• қышыну, тершеңдік

• арқаның ауыруы, миалгия

• қызба, астения, қалтырау

Кейде

• инсульт

• аритмия (көбінесе суправентрикулярлық)

• интерстициальді пневмонит («Жағымсыз әсерлері. Постмаркетингтік деректер» бөлімін қараңыз)

• бронх түйілуі (әдетте қысқа мерзімді, орташа айқын, бірақ парентеральді ем жүргізу қажет болуы мүмкін)

• бауыр жеткіліксіздігі және өліммен аяқталу қаупі бар айқын гепатоуыттылық

• бүйрек жеткіліксіздігі

• гемолитикалық уремиялық синдром (ГУС)

• жүрек жеткіліксіздігі

Сирек

• миокард инфарктісі

• шеткергі васкулит, гангрена

• артериялық қысымның төмендеуі

• өкпе ісінуі

• ересектердің респираторлық дистресс-синдромы (ЕРДС)

• гаммаглутамилтрансфераза (ГГТ) концентрациясының көтерілуі

• айқын тері реакциялары, десквамация мен терінің буллезді зақымдануын қоса

• ойық жаралар, везикулалар мен жаралар түзілуі, терінің ажырауы

• инъекция орнындағы орташа айқын реакциялар

• радиациялық уыттылық, радиацияға ретроспективті реакция («Басқа да ем түрлерімен өзара әрекеттесуі» бөлімін қараңыз)

Аса сирек

• тромбоцитоз

• анафилактоидтық реакциялар

• қылтамырлардың жоғары өткізгіштік синдромы (ҚЖӨС)

• ишемиялық колит

• уытты эпидермалық некролиз

• Стивенс-Джонсон синдромы

Клиникалық зерттеулер жүргізу кезінде өте жиі байқалатын сүйек кемігі функциясының бәсеңдеуі, әдетте, жеңілден орташа дәрежеге дейінгі ауырлықта ауытқиды, ең алдымен, гранулоциттер санына ықпал етеді.

Сүт безі обыры кезінде біріктірілген ем

3 және 4 дәрежедегі гематологиялық уыттылық, әсіресе, нейтропения жиілігі гемцитабинді паклитакселмен біріктіріп пайдаланғанда артады. Соның өзінде, осы жағымсыз реакциялардың ұлғаюы жұқпалар немесе қан кетулердің пайда болу жиілігінің жоғарылауымен байланысты емес. Шаршау және фебрильді нейтропения гемцитабинді паклитакселмен біріктіріп пайдаланғанда жиірек туындайды. Анемиямен байланыссыз шаршау, әдетте, емнің алғашқы циклынан кейін басылады.

Аналық бездер обырында біріктірілген ем

Сенсорлы нейропатия да біріктірілген ем тобында карбоплатинмен монотерапиядағыдан жиірек байқалды.

Постмаркетингтік деректер

Сирек

• өкпенің ісінуі, интерстициальді пневмонит, ересектердің респираторлық дистресс-синдромы (ЕРДС) («Айрықша нұсқаулар» бөлімін қараңыз)

• гемолитикалық-уремиялық синдром (ГУС)

• бауыр ферменттерінің: аспартатаминотрансфераза (АСТ), аланинаминотрансфераза (АЛТ), сілтілік фосфатаза, гаммаглутамилтрансфераза (ГГТ), билирубин концентрациясының жоғарылауы

Аса сирек

• жүрек жеткіліксіздігі

• шеткергі васкулит, гангрена, қылтамырлардың жоғары өткізгіштік синдромы (ҚЖӨС)

• ауыр дәрежелі тері реакциялары, десквамация мен терінің буллезді зақымдануын қоса

• қайтымды артқы энцефалопатия синдромы (ҚАЭС) («Айрықша нұсқаулар» бөлімін қараңыз)

Клиникалық зерттеулер жүргізу барысында радиациялық уыттылықтың даму жағдайлары хабарланған. Клиникалық зерттеулер барысында тіркелген бауыр функциясы бұзылуының, әдетте, айқындылығы орташа, үдеп кетпейді және емнің тоқтатылуын талап етуі сирек. Құсумен қатар жүретін немесе қатар жүрмейтін жүрек айну дозаны шектеуді сирек талап етеді, әрі құсуға қарсы дәрілермен жеңіл түзетіледі.

Ересектердің респираторлық дистресс-синдромы, өкпе ісінуі дамығанда Гемзармен емді тоқтату мәселесін қарастыру керек. Демеуші емді ертерек пайдалану жағдайды жақсарта алады.

Айрықша нұсқаулар

Постмаркетингтік хабарламалар деректері бойынша, аритмия (көбінесе суправентрикулярлық) мен радиацияға ретроспективті реакция сияқты жағымсыз реакциялар да тіркелген.

Қолдануға болмайтын жағдайлар

- гемцитабинге немесе препараттың басқа компоненттеріне жоғары сезімталдық

- жүктілік және лактация кезеңі

- 18 жасқа дейінгі балалар мен жасөспірімдерге

Сақтықпен

Бауыр және/немесе бүйрек функциясының бұзылуында, сүйек кеміктік қан түзілудің бәсеңдеуінде (соның ішінде, қатарлас сәулелі немесе химиялық ем аясында), вирустық, зеңдік немесе бактериялық тектегі жедел жұқпалы ауруларда.

Дәрілермен өзара әрекеттесуі

Сәулемен емдеу:

Бір мезгілде қолдану (бірге немесе 7 күннен аз аралықпен): осындай мультимодальді емдеумен ілеспелі уыттылығы көптеген әртүрлі факторларға: Гемзар дозасына, Гемзарды енгізу жиілігіне, сәулелі ем дозасына, сәулемен емдеуді жоспарлау техникасына, сәулеленген тін типі мен көлеміне байланысты.

Клиникаға дейінгі және клиникалық зерттеулер Гемзардың радиосенсибилизациялаушы әсері бар екенін көрсетті. Өкпенің ұсақ жасушалы емес обырымен науқастарда кеуде қуысын емдік сәулелендірумен бір мезгілде 6 апта бойы 1000 мг/м2 дозада Гемзар енгізілген бірден-бір зерттеуде шырышты қабықтардың ауыр және өмірге зор қатерлі қабынуы; ең алдымен, эзофагит түріндегі едәуір уыттану; сондай-ақ, әсіресе, тіндердің үлкен көлемді сәулеленуіне шалдыққан емделушілердегі пневмонит (сәулелену көлемінің медианасы 4795 см3) тіркелген. Кейінірек жүргізілген зерттеулер (өкпенің ұсақ жасушалы емес обыры кезіндегі II фаза зерттеулері) уыттылығы болжанатын сәулелі еммен қатарлас Гемзарды төмендеу дозаларда енгізудің мақсатқа сай екенін айғақтайды. Кеуде қуысы аумағына сәулелі ем (СОД 66 Гр) химиялық еммен бір мезгілде 6 апта бойы 600 мг/м2 дозадағы Гемзармен (4 енгізу) және 80 мг/м2 дозадағы цисплатинмен (2 енгізу) жүргізілді. I және II фазадағы бірнеше зерттеу өкпенің ұсақ жасушалы емес обырында және ұйқы безінің обырында сәулелі еммен қатар Гемзармен (аптасына 300 мг/м2 дейінгі дозада) монотерапия жүргізудің мақсатқа сай екенін көрсетті. Гемзарды сәулемен емдеудің емдік дозаларымен қауіпсіз енгізуге оңтайлы режим жаңа түзілімдердің барлық типтеріне белгіленбеген.

Бірізді қолдану (7 күннен көп аралық): сәулемен емдеуге дейін 7 күннен көп бұрын немесе одан кейін Гемзар енгізу кезіндегі сәуле реакциясынан басқа, уыттылықтың артуы тіркелмеген. Бұл деректер Гемзарды сәулемен емдеуден кейін бір апта өткенде немесе сәулелі емнің жедел зардаптары басылғаннан кейін енгізуге болатынын жорамалдауға мүмкіндік береді.

Гемзарды сәулелі еммен бір мезгілде де, бірінен соң бірін де қолданғанда сәулеге шалдыққан тіндердің сәулелі зақымданулары (мысалы, эзофагит, колит және пневмонит) тіркелген.

Басқалары:

Өліммен аяқталуы мүмкін жүйелі аурулар қаупі салдарынан, әсіресе, иммуносупрессиясы бар емделушілерде сары қызбаның тірі вакциналарын және басқа да тірі вакциналарды бірге қолдану ұсынылмайды.

Айрықша нұсқаулар

Гемзармен емдеуді ісікке қарсы химиялық ем қолдану тәжірибесі бар дәрігердің бақылауымен ғана жүргізуге болады.

Препаратпен жұмыс істегенде цитоуытты препараттармен жұмыс істеу кезіндегі жалпы қауіпсіздік ережелерін қадағалау қажет.

Инфузия ұзақтығын және препарат енгізу жиілігін ұлғайту уыттылықтың артуына алып келеді.

Гемзар сүйек кемігінің белсенділігін бәсеңдетуі мүмкін, бұл лейкопениямен, тромбоцитопениямен немесе анемиямен көрініс береді.

Гемзарды әр енгізу алдында қандағы тромбоциттер, лейкоциттер мен гранулоциттер санын бақылау қажет. Препарат туындататын сүйек кемігі функциясының бәсеңдеу белгілерінде емдеуді тоқтата тұру немесе дозаны түзету қажет.

Гемзар бүйрек пен бауыр функциясы бұзылған емделушілерді емдегенде, емделушілердің осы қауымында препараттың қауіпсіздігі мен тиімділігі бойынша ақпараттың жеткіліксіз екеніне орай, ерекше сақтықпен қолданылуы тиіс.

Гемзарды бауырдағы қатарлас метастаздары немесе гепатиті, сыртартқыдағы алкоголизмі мен бауыр циррозы бар емделушілерде қолдану бауыр функциясы бұзылуының өршуіне әкелуі мүмкін.

Науқасты жүйелі тексеруден өткізу және бүйрек пен бауыр функциясын бағалау (вирусологиялық тестілерді қоса) қажет.

Гемзар қабылдаудан болатын жүрек және/немесе тамыр бұзылуларының даму қаупіне орай, сыртартқысында жүрек-қантамыр аурулары бар емделушілерді емдеу ерекше сақтықпен жүргізілуі тиіс.

Гемзарды монотерапияда немесе басқа да химиялық ем препараттарымен біріктіріп алған емделушілерде қылтамырлардың жоғары өткізгіштік синдромының (ҚЖӨС) дамуы хабарланды. Осы жай-күй, әдетте, ерте диагностикаланған және тиісті ем тағайындалған жағдайда емдеуге келеді, бірақ өліммен аяқталған жағдайлар хабарланған. Клиникалық симптомдарына жайылған ісіну, денеге салмақ қосу, гипоальбуминемия, ауыр гипотония, жедел бүйрек жеткіліксіздігі және өкпе ісінуі жатады. Гемзармен ем кезінде қылтамырлардың жоғары өткізгіштік синдромы (ҚЖӨС) дамыған жағдайда препарат енгізуді тоқтатып, симптоматикалық емдеуді бастау қажет. Әдебиет деректері бойынша, емнің кешірек циклдарында туындаған қылтамырлардың жоғары өткізгіштік синдромы (ҚЖӨС) ересектердің респираторлық дистресс-синдромымен байланысты болуы мүмкін.

Гемзар алатын емделушілерде өмірге зор қатер төндіретін жағдай болып саналатын гемолитикалық уремиялық синдром (ГУС) сирек жағдайларда дамиды. Микроангиопатиялық гемолитикалық анемияның тромбоцитопениямен қатарлас гемоглобин деңгейінің екпінді құлдырауы, билирубин деңгейінің, сарысулық креатининнің, қандағы азот мочевинасының немесе ЛДГ жоғарылауы сияқты алғашқы белгілері білінгенде Гемзар енгізу тоқтатылуы тиіс. Жедел бүйрек жеткіліксіздігінің дамуын болдырмау үшін емдеуді тоқтату жеткіліксіз болуы ықтимал, сондықтан мұндай жағдайларда диализ жүргізу талап етілуі мүмкін.

Күрделі зардаптары зор болатын ересектердің респираторлық дистресс-синдромы (ЕРДС) және қайтымды артқы энцефалопатия синдромы (ҚАЭС) Гемзарды монотерапияда немесе басқа да химиялық ем препараттарымен біріктіріп алған емделушілерде білінді. Осы құбылыстар Гемзармен индукциялануы ықтимал тамырлар эндотелийінің зақымдануымен байланысты болуы мүмкін. Ем кезінде жоғарыда аталған синдромдардың кез келгені дамыған жағдайда Гемзармен емдеуді тоқтатып, симптоматикалық емді бастау керек («Жағымсыз әсерлері. Постмаркетингтік деректер» бөлімін қараңыз).

Ересектердің респираторлық дистресс-синдромымен қатар Гемзарды монотерапия ретінде немесе басқа да химиялық ем препараттарымен біріктіріп алған емделушілерде интерстициальді пневмонит пен өкпенің ісінуі сияқты өзге күрделі өкпе ауруларының дамуы хабарланды. Жоғарыда аталған жай-күйлердің кез келгені дамыған жағдайда Гемзармен емдеуді тоқтатып, симптоматикалық емді бастау керек («Жағымсыз әсерлері. Постмаркетингтік деректер» бөлімін қараңыз). Симптоматикалық емді дер мезгілінде жүргізу емделушілердің жағдайын жақсартуға ықпал ете алады.

Гемзар енгізу сперматогенезді бәсеңдетеді. Сондықтан Гемзар қабылдайтын ерлерге емделу кезінде және ол аяқталғаннан кейін 6 ай бойы сенімді контрацептивтік әдістер пайдалану ұсынылады. Препарат қолданудан туындайтын фертильділікті жоғалту мүмкін екеніне байланысты, емдеуді бастар алдында шәуһетті криоконсервациялау мүмкіндігін де қарастыру керек.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Гемзардың автокөлік құралдарын және басқа механизмдерді басқару қабілетіне әсер етуіне зерттеулер жүргізілмеген. Дегенмен Гемзардың, әсіресе, алкогольмен бірге тұтынғанда айқындылығы әлсізден орташа дәрежеге дейін ұйқышылдық туғызуы мүмкін екені белгілі. Емделушілерді олар ұйқышылдықты сезінетін жағдайларда механизмдер басқарудан сақтандыру керек.

Артық дозалануы

Гемзарға арналған у қайтарғы белгісіз. Клиникалық рұқсат етілген уыттылығы екі апта сайын 30 минут бойы көктамыр ішіне 5,7 г/м2 дейін жеткізілген бір реттік дозалар енгізілгенде байқалды. Артық дозаланудан күдіктенген жағдайда науқас, қан формуласын есептеуді қоса, тұрақты дәрігерлік бақылауда болуы тиіс. Қажет болса, науқасқа симптоматикалық ем жүргізіледі.

 

Шығарылу түрі және қаптамасы

Препаратты алюминий сақинамен және пластик қалпақшамен қаусырылған, резеңке тығынмен тығындалған шыны құтыға салады. Әрбір құты орнықты тұруы үшін тұғырмен жабдықталған және мөлдір полиэтиленді үлбірмен тарттырылған. 1 құтыдан медицинада қолданылуы жөніндегі мемлекеттік және орыс тілдеріндегі нұсқаулықпен бірге картон қорапқа салынады.

Сақтау шарттары

15 С - 30 С температурада сақтау керек, салқындатуға және мұздатып қатыруға болмайды.

Препараттың дайындалған ерітіндісін 15 С - 30 С температурада 24 сағаттан асырмай сақтау керек, салқындатуға және мұздатып қатыруға болмайды.

Балалардың қолы жетпейтін жерде сақтау керек!

Сақтау мерзімі

3 жыл

Қаптамасында көрсетілген жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші ұйымның атауы және елі

«Элай Лилли энд Компани», АҚШ

Қаптаушы ұйымның атауы және елі

«Элай Лилли энд Компани», АҚШ

Тіркеу куәлігі иесінің атауы және елі

«Элай Лилли Восток С.А.», Швейцария

Орталық Азия және Монғолия елдері аумағында тұтынушылардан

өнім (тауар) сапасына қатысты шағымдар қабылдайтын ұйымның мекенжайы

«Элай Лили Восток С.А.» компаниясының өкілдігі

Қазақстан Республикасы, 050059, Алматы қ., Иванилов көш., 21.

тел: 8 (727) 2 447 447

факс: 8 (727) 2 442 851

Lilly_ Safety _ CARAGA @Lilly.com