Витаксон® (таблетки)

• русский
• қазақша

• Скачать инструкцию медикамента

Саудалық атауы

Витаксон®

Халықаралық патенттелмеген атауы

Жоқ

Дәрілік түрі

Үлбірлі қабықпен қапталған таблеткалар

Құрамы

Бір таблетканың құрамында

белсенді заттар – 100% құрғақ затқа шаққанда 100 мг бенфотиамин, 100% құрғақ затқа шаққанда 100 мг пиридоксин гидрохлориді,

қосымша заттар: микрокристалды целлюлоза (101) және (102), жүгері крахмалы, повидон (К 29/32), кальций стеараты, тальк, сусыз коллоидты кремнийдің қостотығы (аэросил 200),

қабығының құрамы Opadry II 85 F 18422 White: поливинил спирті, полиэтиленгликоль, тальк, титанның қостотығы (Е 171).

Сипаттамасы

Ақ немесе ақ дерлік түсті, дөңгелек пішінді, екі жақ беті дөңес, үлбірлі қабықпен қапталған таблеткалар.

Фармакотерапиялық тобы

Витаминдер. В6 және/немесе B12 витаминімен біріктірілген В1 витамині

АТХ коды А11DВ

Фармакологиялық қасиеттері

Фармакокинетикасы

Бенфотиамин

100 мг бенфотиаминді ішке қабылдағаннан кейін қанда ең жоғары деңгейге 1,2 сағаттан соң жетеді.

Он екі елі ішекте өте үлкен көлемде, жіңішке ішектің жоғарғы бөлігінде аз дәрежеде сіңеді.

Алмасудың негізгі өнімі тиаминкарбон қышқылы, пирамин, тиамин және әлі анықталмаған бірқатар метаболиттер болып табылады. Ішекте фосфотазалардың қатысуымен S-бензоилтиаминге (SBT) дейін фосфорсызданады. SBT майда еритін зат болып табылады, оның жоғары дәрежелі өткізгіштігі осынысымен түсіндіріледі. Сондай-ақ витаминнің сіңуі оның тиаминге едәуір айналуынсыз-ақ жүреді. Тиаминге және биологиялық тұрғыдан белсенді коферменттерге дейін ферменттік бензоилсіздендіру соңғы сатыларда жүреді.

Бенфотиаминнің шамадан тыс мөлшері организмнен өзгермеген күйінде, фосфорланған форма немесе метаболиттер түрінде, пирамидинді және тиазол молекулаларын қоса, несеппен бірге шығарылады.

Пиридоксин гидрохлориді

Пиридоксин гидрохлориді және оның туындылары, негізінен АІЖ жоғарғы бөлімдерінде, пассивті диффузия жолымен сіңеді. 150 мг пиридоксин гидрохлоридін ішке қабылдағаннан кейін қанда ең жоғары деңгейге 1,5 сағат ішінде жетеді.

Пиридоксин белсенді түрлерге: пиридоксаль 5-фосфат және пиридоксамин фосфатына айналады, бұлар бауырда 4-пиридоксин қышқылына дейін тотығады. Бүйрек арқылы шығарылады.

Фармакодинамикасы

В (В1 және В6) тобының нейротроптық витаминдері жүйке және қимыл аппаратының қабыну және дегенерациялық ауруларында жағымды әсер етеді. Олар тапшылық жағдайын жою үшін қолданылады, ал жоғары дозаларда ауыруды басатын қасиеттері бар, қан айналымының жақсаруына мүмкіндік береді және жүйке жүйесінің жұмысын қалыпқа түсіреді.

Бенфотиамин В1 витаминінің (тиаминнің) майда еритін дериваты ретінде организмде фосфорланып, биологиялық тұрғыдан белсенді тиаминпируват (ТРР) және тиаминтрифосфат (ТТР) түзеді.

ТРР коэнзим ретінде көмірсу алмасу үдерісіне қатысады. Ол пируватдекарбоксилазаның, 2-оксоглютератдегидрогеназаның және транскетолазаның коэнзимі болып табылады. Пентозофосфатты циклде ТРР альдегид тобын тасымалдауға қатысады.

В6 витамині өзінің фосфорланған түрінде (пиридоксаль-5-фосфат, PALP) амин қышқылдарының жалпы тотықпаған метаболизмінде өзара әрекеттесетін бірқатар ферменттердің коэнзимі болып табылады. Декарбоксилдену арқылы олар физиологиялық тұрғыдан белсенді аминдердің (мысалы, адреналиннің, гистаминнің, серотониннің, допаминнің, тираминнің) түзілуіне, трансаминделу арқылы – анаболизмдік және катаболизмдік алмасу үдерістеріне (мысалы, глутамат-оксалацетаттрансаминаза), сондай-ақ әртүрлі ыдырау үдерістеріне және амин қышқылдарының синтезіне қатысады. В6 витамині триптофан метаболизмінің әртүрлі 4 бөлігіне ықпалын тигізеді. Гемоглобин синтезі шегінде В6 витамині α-амино-b-кетоадинин қышқылының түзілуін катализдейді.

Қолданылуы

– шығу тегі В1, В6 витаминдерінің тапшылығы расталған неврологиялық ауруларда

Қолдану тәсілі және дозалары

Ішке сұйықтықтың мол мөлшерімен ішіп қабылдау керек.

Тәулігіне ұсынылатын дозасы 1 таблетканы құрайды. Жеке-дара жағдайларда дозаны жоғарылату керек және тәулігіне 3 рет 1 таблеткадан қабылдау керек.

Таблеткаларды тамақ ішуден кейін, тұтас ішу керек.

Емдеу курсының ұзақтығын әр жағдайда емдеуші дәрігер жеке анықтайды. Емнің ең жоғары кезеңінен (4 апта) кейін препарттың дозасын түзету және төмендету туралы шешім қабылданады.

Жағымсыз әсерлері

Сирек

• жүрек айнуы, құсу

• тері бөртпесі, қышыну

• анафилаксиялық шок

Өте сирек

• есекжем

• шок жағдайы

Жиілігі белгісіз

• диарея, іштің ауыруы, асқазан сөлінің қышқылдығы жоғарылауы

• тахикардия

• анафилаксия

В6 витаминін күн сайын 50 мг астам дозада ұзақ уақыт (6-12 айдан астам) қолдану шеткергі сенсорлық нейропатияға, жүйке қозуына, бас айналуына, бас ауыруларына әкелуі мүмкін.

Қолдануға болмайтын жағдайлар

• препарат компоненттеріне жекелей жоғары сезімталдық

• В1 витаминін аллергиялық реакцияларда қабылдауға болмайды

• В6 витаминін асқазан мен он екі елі ішектің ойық жара ауруларының өршу сатысында қабылдау қарсы көрсетілімде (өйткені асқазан сөлінің қышқылдығы жоғарылауы мүмкін)

• жүктілік және лактация кезеңі

• балалар және 18 жасқа дейінгі жасөспірімдер

Дәрілермен өзара әрекеттесуі

Пиридоксин құрамында леводопа бар препараттармен үйлеспейді, өйткені бір мезгілде қабылдағанда леводопаның шеткергі декарбоксилденуі күшейеді, осылайша, оның паркинсонға қарсы әсері төмендейді. Бенфотиамин тотықтырғыш және тотықсыздандырғыш қосылыстармен: сынап хлоридімен, йодидпен, карбонатпен, ацетатпен, танин қышқылымен, темір-амоний-цитратпен, сондай-ақ натрий фенобарбиталымен, рибофлавинмен, бензилпенициллинмен, глюкозамен және метабисульфитпен, 5-фторурацилмен үйлеспейді, өйткені олардың қатысуымен белсенділігі жойылады. Мыс бенфотиаминнің ыдырауын жылдамдатады; бұдан басқа, тиамин рН мәні (3 астамға) артқан кезде өзінің әсерін жоғалтады.

Антацидтер тиаминнің сіңуін баяулатады.

Өзекшелік қайта сіңуді іркетін ілмектік диуретиктер (мысалы фуросемид) ұзақ емдеу кезінде тиамин экскрециясы жоғарылауын туындатуы және осылайша тиамин деңгейін төмендетуі мүмкін.

Айрықша нұсқаулар

Витаксон® препаратын ауыр және жедел түрдегі декомпенсацияланған жүрек жеткіліксіздігі бар пациенттерді емдеу үшін қолдану туралы мәселені науқастың жағдайын ескере отырып, дәрігер жеке шешеді.

Педиатриядағы қолданылуы

Препаратты балаларда қолданудың тиімділігі және қауіпсіздігі анықталмаған, сондықтан оны бұл жас санатындағы пациенттерге тағайындауға болмайды.

Жүктілік және бала емізу кезеңінде қолдану.

Жүктілік немесе бала емізу кезеңінде В6 витаминінің тәуліктік қажеттілігі 25 мг дейінді құрайды. Препарат құрамында В6 витаминінің 100 мг бар, сондықтан оны бұл кезеңде қолдануға болмайды.

Препараттың автокөлікті немесе қауіпті механизмдерді басқару қабілетіне ықпал ету ерекшеліктері

Препарат кейбір пациенттерде бас айналуы, бас ауыруы және тахикардия сияқты жағымсыз әсерлерді туындатуы мүмкін, автокөлік басқарғанда немесе басқа да механизмдермен жұмыс істегенде сақ болу керек.

Артық дозалануы

Артық дозаланғанда препараттың жағымсыз әсерлерінің симптомдары күшейеді.

Емі: асқазанды шаю, белсендірілген көмір қолдану. Симптоматикалық ем.

В1 витаминінің жоғары дозалары кураре тәрізді әсер етеді.

В6 витаминін күн сайын 50 мг астам дозада ұзақ уақыт (6-12 айдан астам) қолдану шеткергі сенсорлық нейропатияға әкелуі мүмкін.

В1 витаминін тәулігіне 2 г астам дозада ұзақ уақыт қолданғанда атаксиясы бар нейропатия және сезімталдық бұзылыстары, ЭЭГ өзгерістері бар церебралдық құрысулар, сондай-ақ жеке жағдайларда – гипохромды анемия және себореялық дерматит тіркелген.

Шығарылу түрі және қаптамасы

Жарықтан қорғайтын ақ пигментті поливинилхлоридті үлбірден және баспалы лакталған алюминий фольгадан жасалған пішінді ұяшықты қаптамаға 10 таблеткадан салынған.

Пішінді ұяшықты 3 немесе 6 қаптамадан медициналық қолдануы жөніндегі мемлекеттік және орыс тілдеріндегі нұсқаулықпен бірге картон қорапшаға салынған.

Сақтау шарттары

Түпнұсқалық қаптамасында, 25°С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін препаратты қолдануға болмайды.

Дәріханалардан босатылу шарттары

Рецептісіз

Өндіруші

«Фармак» ЖАҚ

Мекенжайы: Украина, 04080, Киев қ., Фрунзе к-сі, 74.

Тіркеу куәлігі иесінің атауы мен елі

«Фармак» ЖАҚ, Украина

Қазақстан Республикасы аумағындағы және тұтынушылардан дәрілік заттың сапасына қатысты шағымдарды қабылдайтын және дәрілік заттың қауіпсіздігіне тіркеуден кейінгі бақылауға жауапты ұйымның атауы, мекенжайы және байланыс деректері

«Фармак» ЖАҚ Қазақстан Республикасындағы өкілдігі.

Қазақстан Республикасы, Алматы қ., индекс 050012, Амангелді к-сі 59 "А", "Шартас" бизнес орталығы, 9 қабат.

Тел.: +7 (727) 267 64 63, факс: +7 (727) 267 63 73, электрондық поштасы: a.liadobruk@gmail.com