Визионир (250 мг)

• русский
• қазақша

• Скачать инструкцию медикамента

Саудалық атауы

Визионир

Халықаралық патенттелмеген атауы

Леветирацетам

Дәрілік түрі

Үлбірлі қабықпен қапталған 250 мг, 500 мг, 750 мг, 1000 мг таблеткалар

Құрамы

Бір таблетканың құрамында

белсенді зат –250 мг, 500 мг, 750 мг, 1000 мг леветирацетам,

қосымша заттар: жүгері крахмалы, коллоидты сусыз кремний қостотығы, повидон К-30, тальк, магний стеараты,

үлбірлі қабықтың құрамы: опадрай көгілдір OY-S-30913 (250 мг), опадрай сары 05F82840 (500 мг), опадрай қызғылт-сары OY-S-33016 (750 мг), опадрай ақ Y-1-7000 (1000 мг): гипромеллоза 3 сР (Е 464), гипромеллоза 5сР (Е 464), гипромеллоза 6 сР (Е 464), титан қостотығы (Е 171), макрогол 4000, FD & C көгілдір №2 /индиго кармин алюминий лагы (Е 132), FD & C сары №6 /cансет сары FCF алюминий лагы (Е 110), темірдің сары тотығы, темірдің қызыл тотығы (Е 172).

Сипаттамасы

Сопақша пішінді, екі беті дөңес, бір жағында «Е» және «10» деген жазуларды бөлетін сызығы бар, екінші жағы тегіс, көгілдір түсті, үлбірлі қабықпен қапталған таблеткалар (250 мг доза үшін).

Сопақша пішінді, екі беті дөңес, бір жағында «Е» және «11» деген жазуларды бөлетін сызығы бар, екінші жағы тегіс, сары түсті, үлбірлі қабықпен қапталған таблеткалар (500 мг доза үшін).

Сопақша пішінді, екі беті дөңес, бір жағында «Е» және «12» деген жазуларды бөлетін сызығы бар, екінші жағы тегіс, қызғылт-сары түсті, үлбірлі қабықпен қапталған таблеткалар (750 мг доза үшін).

Сопақша пішінді, екі беті дөңес, бір жағында «Е» және «13» деген жазуларды бөлетін сызығы бар, екінші жағы тегіс, ақ түсті, үлбірлі қабықпен қапталған таблеткалар (1000 мг доза үшін).

Фармакотерапиялық тобы

Эпилепсияға қарсы басқа препараттар.

АТЖ коды N03AX14

Фармакологиялық қасиеттері

Фармакокинетикасы

Сіңуі

Леветирацетам ішке қабылдағаннан кейін жылдам сіңеді. Ішу арқылы биожетімділігі 100%-ға жақын.

Препарат қан плазмасындағы ең жоғары концентрациясына (Cmax) қабылдағаннан кейін 1,3 сағаттан соң, ал тұрақтанған тепе-тең концентрациясына сызба бойынша тәулігіне 2 рет қабылдау дүркінділігімен емнің екі күнінен кейін жетеді.

Препараттың қан плазмасындағы ең жоғары концентрациясы (Cmax) препаратты 1000 мг дозада бір дүркін қабылдағаннан кейін, әдетте, 31 мкг/мл, ал тәулігіне 2 рет 1000 мг көп дүркін қабылдағаннан кейін – 43 мкг/мл құрайды. Сіңу дәрежесі дозаға байланысты емес және ас ішкенде өзгермейді.

Таралуы

Препараттың адам тінінде таралуы жөнінде деректер жоқ. Леветирацетам да, оның негізгі метаболиті де қан плазмасының ақуыздарымен айтарлықтай дәрежеде байланыспайды (<10 %). Леветирацетамның таралу көлемі шамамен 0,5 л/кг-ден 0,7 л/кг-ге дейін құрайды; бұл мәндер ағзадағы судың қосынды көлеміне жақын.

Биоөзгерісі

Леветирацетам адам ағзасында елеулі метаболизмге ұшырайды. Негізгі биоөзгеру жолы (дозаның 24%-ы) – бұл ацетамид тобының ферментативті гидролизі. Негізгі L057 метаболитінің түзілуі бауырдың P450 цитохромы изоферменттерінің белсенділігімен байланысты емес. Ацетамид тобының гидролизін, қан жасушасын қоса, тіндердің үлкен мөлшерінде анықтау мүмкін болды. Ucb L057 метаболиті фармакологиялық белсенділік иеленбеген.

Сонымен қатар, екі қосалқы метаболит сәйкестендірілді. Бірі пирролидон сақинасының гидроксилденуі нәтижесінде (дозаның 1,6%-ы), ал екіншісі – пирролидон сақинасының ашылуы нәтижесінде (дозаның 0,9%-ы) түзіледі.

Басқа сәйкестендірілмеген құрамдас бөліктерге дозаның 0,6 %-ы ғана тиесілі.

Іn vitro сынақтарында леветирацетам мен оның негізгі метаболиті адам бауырының P450 цитохромының негізгі изоферменттерінің (CYP3A4, 2A6, 2C9, 2C19, 2D6, 2E1 және 1A2), глюкуронил-трансферазаның (UGT1A1 және UGT1A6) және эпоксидті гидроксилазаның белсенділігін тежемейтіні анықталған. Бұдан басқа, леветирацетам вальпрой қышқылының in vitro глюкурондануына ықпал еткен жоқ.

Адам гепатоциттерінің өсіндісіне зерттеулер жүргізілгенде CYP1A2, SULT1E1 және UGT1A1 белсенділігіне мардымсыз ықпал етті, немесе мұндай әсер мүлде болған жоқ. Леветирацетам CYP2B6 мен CYP3A4-тің болымсыз индукциясын туындатты. Іn vitro алынған деректер, сондай-ақ препараттың ішу арқылы қабылданатын контрацептивтермен, дигоксинмен және варфаринмен өзара әрекеттесуі жөніндегі in vivo алынған мәліметтер in vivo ферменттерінің елеулі индукциясы болмайтынын айғақтайды.

Сондықтан леветирацетамның басқа заттармен өзара әрекеттесуінің, әлде керісінше, ықтималдығы аз.

Шығарылуы

Препараттың қан плазмасынан жартылай шығарылу кезеңі 7±1 сағат құрап, енгізу тәсіліне және дозалау тәртібіне байланысты болмайды. Ағзаның жалпы орташа клиренсі 0,96 мл/мин/кг құрайды.

Препараттың 95%-ы бүйрекпен шығарылады (дозаның 93%-ға жуығы 48 сағат ішінде шығарылады).

Препараттың нәжіспен шығарылуына дозаның 0,3%-ынан ғана келеді.

Тұтас алғанда, алғашқы 48 сағат ішінде қабылданған дозаның 66%-ы леветирацетам түрінде және 24%-ы оның негізгі метаболиті түрінде несеппен шығарылады.

Леветирацетамның бүйректік клиренсі және ucb L057, тиісінше, 0,6 мл/мин/кг және 4,2 мл/мин/кг құрайды. Бұл леветирацетамның әріқарай өзекшелік сіңірілетін шумақтық сүзілу арқылы шығарылатынын білдіреді, ал оның негізгі метаболитінің шығарылуында, шумақтық сүзілуден басқа, белсенді өзекшелік сөлініс рөл атқарады.

Леветирацетамның шығарылуы мен креатинин клиренсі арасында реттеліс білінеді.

Егде жастағы емделушілер

Егде емделушілерде жартылай шығарылу кезеңі шамамен 40%-ға жоғары (10-нан 11 сағатқа дейін). Бұл осы жас тобындағы емделушілердің бүйрек қызметінің төмендеуімен түсіндіріледі.

Бүйрек қызметінің бұзылуы

Леветирацетам мен оның негізгі метаболитінің клиренсі креатинин клиренсімен реттеледі. Осыған орай, бүйрек қызметінің орташа және ауыр бұзылуы бар емделушілерде леветирацетамның тәуліктік демеуші дозасын креатинин клиренсін ескерумен реттеуге кеңес беріледі.

Диализдің стандартты 4 сағаттық сессиясы кезінде леветирацетамның фракциялық ажырауы 51% құрады.

Бауыр қызметінің бұзылуы

Бауыр қызметінің жеңіл және орташа бұзылуы бар тұлғаларда леветирацетам клиренсінің маңызды өзгерісі байқалған жоқ. Бауыр қызметі ауыр бұзылған емделушілердің көпшілігінде леветирацетам клиренсі, бүйрек қызметінің қатарлас бұзылуымен байланысты, 50%-дан артық төмендеген.

Фармакодинамикасы

Белсенді зат – леветирацетам – қолданымдағы эпилепсияға қарсы белсенді заттар ішіндегі үздік пирролидин туындысы (α-этил-2-оксо-1-пирролидин ацетамидінің S-оптикалық изомері).

Препарат құрысуға қарсы және эпилепсияға қарсы тиімді әсерлер иеленген.

Препараттың әсер ету механизмі әлі толық ауқымда зерттелген жоқ; оның қазіргі уақытта қолданылатын эпилепсияға қарсы препараттардың әсер ету механизмінен ерекшеленуі ықтимал. Іn vitro және in vivo сынақтарының нәтижелері препараттың жасушаның және қалыпты нейротрансмиссияның негізгі сипаттамаларын өзгертпейтінін көрсетеді.

Іn vivo зерттеуінің нәтижелері Визионирдің интранейрональді Ca2+ деңгейін N түріндегі кальций өзектеріндегі тоқты ішінара тежеу және интранейрональді деподан Ca2+-ның босатылып шығуын төмендету арқылы өзгертетінін көріністеді. Бұдан басқа, ол цинкпен және β-карболиндермен индукцияланған ГАМК- және глицинмен реттелетін өзектерде тоқтың бәсеңдеуін ішінара бөгейді. Ол өз алдына, Визионир in vitro зерттеулерінде егеуқұйрықтардың ми тіндерінде спецификалық рецепторлармен байланысу қабілетін көріністеді. Осы байланысу орыны 2А синаптикалық везикулалаларының ақуызы болып табылады; оның везикулалардың интеграциясы және нейромедиаторлардың экзоцитозы үдерістеріне қатысуы жорамалданады. Визионир және оның аналогтары тышқандардағы аудиогенді эпилепсия үлгілеріндегі сынақтарда 2A синаптикалық везикулалары ақуызының байланысуына тәртіптелген туыстық кеңдігін көріністеді, ал ол солардың құрысуға қарсы қорғанысының қуаттылығымен реттелді. Бұл нәтижелер Визионир мен 2A синаптикалық везикулаларының ақуызы арасындағы өзара әрекеттесудің осы препараттың эпилепсияға қарсы әсер ету механизміне үлес қосуы ықтимал екенін жорамалдауға мүмкіндік береді.

Қолданылуы

- қайта диагностикаланған эпилепсиясы бар емделушілерде салдарлы жайылған және онсыз парциальді ұстамаларды емдегенде монотерапия ретінде

- кешенді ем құрамында:

• салдарлы жайылған және онсыз парциальді құрысу ұстамаларын

• миоклоникалық эпилепсиядан зардап шегетін емделушілердегі миоклоникалық құрысуларды

• идиопатикалы жайылған эпилепсиядан зардап шегетін ересектерде алғашқы жайылған тоника-клоникалық құрысуларды емдегенде

Қолдану тәсілі және дозалары

Үлбірлі қабықпен қапталған таблеткаларды ас ішуге байланыссыз жеткілікті сұйық мөлшерімен іше отырып, ішке қабылдау керек. Тәуліктік доза тең екі қабылдауға бөледі.

Монотерапия

Ересектер

Ұсынылатын бастапқы доза тәулігіне 2 рет 250 мг құрайды, 2 аптадан кейін дозаны тәулігіне 2 рет 500 мг-ге тең бастапқы емдік дозаға дейін арттыруға болады. Әріқарай, емге клиникалық жауап реакциясына қарай, дозаны екі аптада бір мәрте тәулігіне 2 рет тағы 250 мг-ге көбейтуге болады. Ең жоғары доза тәулігіне 2 рет 1500 мг құрайды.

Кешенді ем құрамында

Бастапқы емдік доза тәулігіне 2 рет 500 мг құрайды. Осы дозадағы препаратты емнің бірінші күнінен қабылдауға болады.

Клиникалық жауап реакциясына және көтерімділігіне қарай, тәуліктік дозаны тәулігіне 2 рет 1500 мг-ге арттыруға болады. Екі-төрт аптада бір мәрте тәуліктік дозаны тәулігіне 2 рет 500 мг-ге көбейте және азайта отырып, дозаны реттеуге болады.

Егде жастағы емделушілер (65 жас және одан үлкен)

Бүйрек қызметі бұзылған егде емделушілерде дозаны реттеу ұсынылады (төменде «Бүйрек қызметі бұзылған емделушілер» бөлімін қараңыз).

Бүйрек қызметі бұзылған емделушілер

Тәуліктік дозаны, бүйрек қызметінің бұзылу дәрежесіне қарай, әркімге жеке белгілеу қажет.

Ересектер үшін дозаны келесі кестенің көмегімен ретке келтіру керек. Бұл үшін емделушінің есептелген креатинин клиренсінің (КК) мл/мин арқылы көріністелген мәні қажет. КК мл/минутын сарысулық креатинин концентрациясы (мг/дл) мәнінің негізінде келесі формуланың көмегімен анықтауға болады:

Әйелдер: жоғарыда келтірілген мәні х 0,85

Сосын КК-ін дене беткейінің ауданын (ДБА) есепке алып, келесі үлгіде реттеу қажет:

КК (мл/мин/1,73 м2) = КК (мл/мин)/емделуші ДБА (м2) х 1,73

Бүйрек қызметінің бұзылуы бар ересек емделушілер үшін дозаны реттеу

(1) Препаратпен емдеудің алғашқы күні 750 мг-ге тең жүктеме дозаны тағайындау ұсынылады.

(2) Диализден кейін қосымша 250 мг-ден 500 мг-ге дейін қабылдауға кеңес беріледі.

Бауыр қызметі бұзылған емделушілер

Бауыр қызметі жеңіл немесе орташа бұзылған емделушілер үшін дозаны реттеу қажет емес. Бауыр қызметінің ауыр бұзылуы бар емделушілерде креатинин клиренсі мәнінің негізінде бүйрек жеткіліксіздігінің болуы жете бағаланбауы мүмкін. Сондықтан осы санаттағы емделушілерде креатинин клиренсі <70 мл/мин төмендеген кезде тәуліктік демеуші дозаны 50%-ға азайту ұсынылады.

Жағымсыз әсерлері

Өте жиі (≥1/10):

• ұйқышылдық

• астения/қажығыштық

Жиі (≥1/100,<1/10):

• жұқпа, назофарингит

• тромбоцитопения

• анорексия, дене салмағының артуы (топиромат пен леветирацетам қосылғанда анорексия қаупі жоғары)

• ажитация, депрессия, эмоциялық құбылулар/ көңіл-күй ауытқулары, жауығу сезімі/озбырлық, ұйқысыздық, қатты қозу/ашушаңдық, тұлғалық тоқырау, ойлаудың бұзылуы

• амнезия, атаксия, құрысулар, бас айналу, бас ауыру, гиперкинезия, тремор, тепе-теңдіктің бұзылуы, зейіннің нашарлауы, жадының жоғалуы

• диплопия, көрудің бұлыңғырлануы

• вертиго

• жөтелдің күшеюі

• іштің ауыруы, диарея, диспепсия, жүрек айну, құсу

• бөртпе, экзема, қышыма

• миалгия

• кездейсоқ жарақаттанулар

Постмаркетингтік қолдану деректері:

• лейкопения, нейтропения, панцитопения (кейбір жағдайларда сүйек кемігі супрессиясымен қатарлас)

• дене салмағының азаюы

• мінез-құлықтық бұзылулар, ызақорлық, үрейлену, шатасушылық, елестеулер, психотикалық бұзылыс, өзіне-өзі қол жұмсау, өзіне-өзі қол жұмсауға талпыну және өзін-өзі қол жұмсауды ойлау

• парестезия

• панкреатит

• бауыр жеткіліксіздігі, гепатит, бауырдың қызметтік сынамалары нәтижелерінің ауытқуы

• алопеция: кейбір жағдайларда препаратты тоқтатқаннан кейін қалпына келуі байқалған

• аллергиялық реакциялар

Қолдануға болмайтын жағдайлар

- леветирацетамға немесе пирролидонның басқа туындыларына, сондай-ақ кез келген қосымша затқа асқын сезімталдықта

- 18 жасқа дейінгі балалық және жасөспірімдік кезеңде

- жүктілік және лактация кезеңінде

Дәрілермен өзара әрекеттесуі

Ересек емделушілерде Визионир қолданымдағы эпилепсияға қарсы препараттардың (фенитоин, карбамазепин, вальпрой қышқылы, фенобарбитал, ламотриджин, габапентин және примидон) сарысулық концентрациясына әсер етпейді, ал аталған эпилепсияға қарсы препараттар Визионир фармакокинетикасына ықпалын тигізбейді.

Өзекшелік сөліністі бөгейтін препарат – пробенецидтің (тәулігіне 4 рет 500 мг дозада) Визионирдің алғашқы метаболитінің бүйректік клиренсін бәсеңдететіні анықталған, бірақ бастапқы препараттың өзін емес. Соның өзінде, осы метаболиттің концентрациясы қан плазмасында төмен болып қала берген. Белсенді өзекшелік сөлініс арқылы шығарылатын басқа дәрілік препараттардың да Визионир метаболитінің клиренсін төмендетуге қабілеттілігі жорамалданады. Визионирдің басқа белсенді сөліністенетін дәрілік препараттарға, мысалы, ҚҚСП, сульфонамидтер мен метотрексатқа қатысты тиімді әсерлері белгісіз.

Тәулігіне 1000 мг Визионир ішу арқылы қабылданатын контрацептивтердің (этинилэстрадиол және левоноргестрел) фармакокинетикасына әсер етпеген; эндокринологиялық параметрлердің (лютеинделген гормон мен прогестерон концентрациялары) өзгерістері болмаған. Визионир тәулігіне 2000 мг дозада дигоксин мен варфарин фармакокинетикасына ықпалын тигізген жоқ; протромбин уақыты өзгермеген.

Визионирдің сіңірілуіне антацидтердің әсер етуі жөнінде деректер жоқ.

Ас ішу препараттың сіңірілу дәрежесіне әсер еткен жоқ, алайда оның жылдамдығының болымсыз баяулауына әкелді.

Визионирдің алкогольмен өзара әрекеттесуі жөнінде деректер жоқ.

Айрықша нұсқаулар

Визионирді ауыр сипатты жүрек және бүйрек жеткіліксіздігінде сақтықпен қолдану керек. Визионирмен емдеуді тоқтату қажет болғанда, препаратты біртіндеп тоқтатуға кеңес беріледі (мысалы, ересек емделушілерде: дозаны 2-4 аптада бір мәрте тәулігіне 2 рет 500 мг-ге азайту; балалық жастағы емделушілерде: дозаны екі аптада бір мәрте тәулігіне 2 рет 10 мг-ден артық азайтуға болмайды).

Құрысулар жиілігінің 25%-дан артық жоғарылауы Визионирмен ем алған парциальді құрысу ұстамалары бар емделушілердің 14%-ында байқалған; салыстыру үшін, плацебо тобында осындай жоғарылау ересек жастағы емделушілердің 26%-ында болған.

Визионир ересектердегі алғашқы жайылған тоника-клоникалық құрысуларды емдеу үшін қолданылғанда емнің абсанстар жиілігіне әсер етуі байқалмаған.

Визионирді бүйрек қызметінің бұзылуы бар емделушілерде қолданғанда дозаны реттеу қажет болуы мүмкін. Бауыр қызметінің ауыр бұзылуы бар емделушілерде де препарат дозасын белгілеудің алдында бүйрек қызметін бағалау ұсынылады.

Эпилепсияға қарсы препараттармен (Визионирді қоса) ем алған емделушілерде өзіне-өзі қол жұмсау, өзіне-өзі қол жұмсауға талпыну, өзіне-өзі қол жұмсауға ниеттену мен әрекеттену сияқты құбылыстар сипатталған. Эпилепсияға қарсы препараттардың рандомизирленген плацебо-бақыланатын зерттеулерінің мета-талдауының нәтижелері өзіне-өзі қол жұмсауға ниеттену және әрекеттену қаупінің аздап жоғарылауын көріністеді. Аталған қауіп механизмі белгісіз.

Осыған орай, депрессия және/немесе өзіне-өзі қол жұмсауға ниеттену мен әрекеттену нышандарын анықтау мақсатында және тиісті жәрдем көрсету қажет болған жағдайда емделушілерге мұқият қадағалау жүргізу қажет. Емделушілерге (емделушілерді күтімге алған тұлғаларға) депрессия және/немесе өзіне-өзі қол жұмсауға ниеттену әлде әрекеттену белгілері пайда болған жағдайда дәрігерден кеңес алуды ұсыну қажет.

Жүктілік және лактациия кезеңі

Визионирді, оны қолдану анық қажет болатын жағдайларды қоспағанда, жүктілік кезеңінде қабылдауға болмайды.

Басқа эпилепсияға қарсы препараттармен емделген жағдайдағы сияқты, жүктілікпен байланысты физиологиялық өзгерістер Визионир концентрациясының өзгеруіне әкелуі мүмкін. Жүктілік кезеңінде қан плазмасында препарат деңгейінің төмендеуі байқалған.

Осы төмендеу үшінші триместр кезінде көбірек көрініс берген (жүктілікке дейін байқалған бастапқы концентрацияның 60 %-ына дейін). Визионир препаратымен ем алатын жүкті әйелдердің талапқа сай клиникалық қадағалануын қамтамасыз ету қажет. Эпилепсияға қарсы емдеуді тоқтату, өз кезегінде, ана мен ұрыққа зиян тигізуге қабілетті аурудың өршуін туғызуы мүмкін.

Визионир ана сүтіне бөлінеді. Осыған орай, препаратпен емделу кезеңінде бала емізу ұсынылмайды.

Қажеттілік туындағанда бала емізу кезеңінде, емшекпен қоректендірудің маңыздылығын ескере отырып, пайда мен қауіп арақатынасын бағалау керек.

Дәрілік заттың көлік құралдарын немесе қауіптілігі зор механизмдерді басқару қабілетіне әсер ету ерекшеліктері

Препараттың автокөлік басқару және механизмдермен жұмыс істеу қабілетіне ықпалын бағалау мақсатында зерттеулер жүргізілген жоқ.

Препаратқа деген әртүрлі жекеше сезімталдық күшіне қарай, кейбір емделушілерде, әсіресе, емнің басында және дозаны арттырғанда ұйқышылдық және орталық жүйке жүйесі тарапынан басқа белгілер байқалуы мүмкін. Емделушілерге, олар осы препараттың аталған қызмет түрлеріне әсерін тигізбейтініне сенімді болмайынша, автокөлік жүргізуді және механизмдермен жұмыс істеуді қоя тұруға кеңес беру керек.

Артық дозаланғанда

Белгілері: ұйқышылдық, ажитация, озбырлық, сана деңгейінің төмендеуі, тыныс алудың бәсеңдеуі және кома.

Емі: жедел артық дозаланғаннан кейін асқазанды босатуға арналған шараларды қабылдау, мысалы, асқазанды шаю немесе құстыру керек.

Арнайы у қайтарғысы жоқ. Артық дозалануды емдеу белгісіне қарай жүргізіліп, гемодиализді қосуға болады. Визионирге тән диализ арқылы шығарылу тиімділігі 60%, ал оның негізгі метаболиті үшін 74% құрайды.

Шығарылу түрі және қаптамасы

10 таблеткадан поливинилхлорид немесе поливинилдихлорид құрамды үштік көпқабатты үлбірден және ыстық баспалау әдісімен алынған лакталған алюминий фольгадан жасалған пішінді ұяшықты қаптамаға салады.

3 пішінді ұяшықты қаптамадан медицинада қолданылуы жөніндегі мемлекеттік және орыс тілдеріндегі нұсқаулықпен бірге кар­тон пәшкеге салады.

Сақтау шарттары

Құрғақ жерде, 25ºС-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы Өндіруші

Ауробиндо Фарма Лтд

Бачупалли Кутубулапур Мандал провинциясы

Хайдарабад, Андхра-Прадеш

Район Ранга Редди, Үндістан

Тіркеу куәлігі иесінің атауы және елі

Пфайзер Эйч Си Пи Корпорэйшн, АҚШ

Қазақстан Республикасы аумағында тұтынушылардан өнім (тауар) сапасына қатысты шағымдар қабылдайтын ұйымның мекенжайы:

«Пфайзер Эйч-Си-Пи корпорэйшн» компаниясының өкілдігі (АҚШ) Алматы қ., Абылай хан д-лы, 141

тел.: (727) 272-27-01, 250-09-16

факс: (727) 272-04-06