Визгеф
Инструкция
-
русский
-
қазақша
Саудалық атауы
Визгеф
Халықаралық патенттелмеген атауы
Гефитиниб
Дәрілік түрі
Үлбірлі қабықпен қапталған 250 мг таблеткалар
Құрамы
Бір таблетканың құрамында
белсенді зат - 250 мг гефитиниб
қосымша заттар: лактоза, микрокристалды целлюлоза, натрий кроскармеллозасы, повидон К-30, 2-пропанол, натрий лаурилсульфаты, магний стеараты,
қабығының құрамы: Винкоат WT – 1089 (қызғылт сары) (полиэтиленгликоль 6000, этилцеллюлоза (10 Cps), титан қостотығы (Е 171), темірдің қызыл тотығы (Е 172), темірдің сары тотығы (Е 172)), метанол, метиленхлорид.
Сипаттамасы
Қызғылт сары түсті үлбірлі қабықпен қапталған, бір жағында сындыру сызығы бар, капсула тәрізді таблеткалар.
Фармакотерапиялық тобы
Ісікке қарсы басқа да препараттар. Протеинтирозинкиназа тежегіштері. Гефитиниб АТХ коды L01XЕ02
Фармакологиялық қасиеттері
Фармакокинетикасы
Ішке қабылдағаннан кейін сіңуі салыстырмалы түрде баяу жүреді. Қан плазмасындағы Cmax 3-7 сағаттың ішінде жетеді. Абсолютті биожетімділігі орташа алғанда 59% құрайды. Тамақтану препараттың биожетімділігіне әсер етпейді. Асқазан рН-ның көрсеткіші 5-тен жоғары болғанда гефитинибтің биожетімділігі 47%-ға төмендеген.
Препаратты тәулігіне 1 рет ұдайы қолданғанда бір реттік қабылдаумен салыстырғанда концентрациясының 2-8 есе ұлғаюын туындатады. 7-10 дозаны қабылдаудан кейін Css қол жетеді. Css қол жеткенде гефитинибтің Vd 1400 л құрайды, бұл препараттың тіндерде қарқынды таралуын дәлелдейді. Плазма ақуыздарымен (сарысулық альбуминмен және α1-гликопротеинмен) байланысуы шамамен 90% құрайды.
Гефитиниб CYP3A4 изоферменті арқылы тотықтану метаболизміне ұшырайды. Гефитинибтің метаболизмі: N пропилморфолинді топтың метаболизмі, метоксильді топтың хиназолинді бөлікке деметилденуі және галогенделген фенильді топтың тотықтанып фосфорсыздануы сияқты үш жолмен жүреді.
Адам қанының плазмасында анықталатын негізгі метаболиті - О-десметилгефитиниб. Гефитинибпен салыстырғанда метаболит өсудің эпидермальді факторы көтермелеген жасушалық өсуге қатысты 14 есе аз белсенділікке ие болады, бұл гефитинибтің клиникалық белсенділігіне елеулі әсер ету мүмкіндігін азайтады.
Гефитинибтің жалпы плазмалық клиренсі - шамамен 500 мл/мин. T1/2 орташа алғанда 41 сағатты құрайды. Препарат негізінен нәжіспен шығарылады. Енгізілген дозаның 4% азы несеппен шығарылады.
Фармакодинамикасы
Визгеф ісікке қарсы препарат. Эспрессиясы көптеген елеулі ісіктерде байқалатын өсудің эпидермальді факторы рецепторы тирозинкиназасының іріктеп әсер ететін тежегіші бола отырып, ісіктің өсуін, метастаздануды және ангиогенезді тежейді, сондай-ақ ісік жасушаларының апоптозын жеделдетеді. Ісік жасушалары түрлі желілерінің өсуін тежейді және химиялық ем препараттарының, сәулелік және гормональді емінің ісікке қарсы белсенділігін жоғарылатады. Клиникалық деректер Визгефтің ісікке қарсы объективті әсер ететінін, жергілікті таралған немесе өкпесінің метастаздалатын ұсақ жасушалы емес обыры бар емделушілерде уақытты статистикалық тұрғыда нақты арттыратынын растайды.
Қолданылуы
- құрамында платина туындылары мен доцетаксел бар химиялық емнің режимдеріне рефрактерлі жергілікті таралған немесе өкпенің метастаздалатын ұсақ жасушалы емес обырында.
Қолдану тәсілі мен дозалары
Препаратты тамақтануға қарамастан тәулігіне 1 рет 250 мг-ден ішке қабылдауға тағайындайды. Қабылдаудың алдында таблетканы ауыз судың (газдалмаған) 100 мл мөлшерінде ерітуге болады. Препаратты еріту үшін басқа сұйықтықтар пайдаланылмайды. Дұрыс еріту үшін таблетканы суға салу, үгітпей толық ерігенге дейін (шамамен 10 минут) араластыру және дайын болған ерітіндіні бірден ішу керек. Қабырғаларын шая отырып тағы да жарты стақан су құю және алынған ерітіндіні ішу керек. Визгефтің ерітіндісін сонымен бірге назогастральді зонд арқылы енгізуге де болады. Емделушінің жасына, дене салмағына, этникалық және жыныстық белгісіне, бүйрек функциясына байланысты, сондай-ақ бауырдың метастаздалатын зақымдануы түрткі болған орташа және ауыр бауыр жеткіліксіздігінде Визгефтің дозасын түзету қажет емес. Емдеу аясындағы нашар тоқтайтын диареяда немесе тері жабындары тарапынан көрініс беретін жағымсыз реакциялар кезінде емдеуге қысқа мерзімдік (14 күнге дейін) үзіліс жасап, одан кейін Визгефті тәулігіне 250 мг дозада қайта қабылдауға болады.
Жағымсыз әсерлері
20% астам жағдайда байқалатын едәуір кең тараған жағымсыз әсерлері диарея, тері және безеу бөртпесі, қышыну, терінің құрғауы болып табылады.
Әдетте жағымсыз реакциялары препаратты қолданған алғашқы айда байқалады және әдетте олар қайтымды болады. Шамамен емделушілердің 8%-да елеулі жағымсыз реакциялар (уыттылықтың жалпы өлшемдеріне сәйкес 3-4 дәрежедегі ауырлықта) байқалған.
Дегенмен емделушілердің 1%-да ғана жағымсыз әсерлер салдарынан емдеу тоқтатылған.
Байқалған жағымсыз реакциялар төменде берілген.
Жағымсыз реакциялар жиілігінің анықтамасы: өте жиі (>10%); жиі (>1% - ≤ 10%); жиі емес (>0.1% - ≤ 1%); сирек (>0.01% - ≤ 0.1%); өте сирек (< 0.01%).
Өте жиі
- диарея (20% астам, жекелеген жағдайларда - айқын), жүрек айнуы
- бөртпе (пустулезді), қышыну, эритеманың аясындағы тері құрғауы
Жиі
- гематурия мен мұрыннан қан кету
- құсу, анорексия, стоматит, сусыздану, бауыр трансаминазалары белсенділігінің симптомдарсыз жоғарылауы
- конъюнктивит, блефарит
- тырнақтар өзгерісі, алопеция
- астения, дене температурасының жоғарылауы
Жиі емес
- варфаринді қабылдау аясында гипокоагуляция және/немесе мұрыннан қан кету жиілігінің артуы
- мөлдір қабықтың қайтымды эрозиясы, кірпік өсуінің бұзылулары
- интерстициальді пневмония (өлімге дейін алып келетін 3-4 дәрежедегі уыттылық)
Сирек
- панкреатит
Өте сирек
- уытты эпидермальді некролиз және көп түрлі экссудативті эритема
- ангионевротикалық ісіну, есекжем
Қолдануға болмайтын жағдайлар
- гефитинибке немесе препараттың басқа да компоненттеріне жоғары сезімталдық
- жүктілікте және лактация кезеңі
- балалар мен 18 жасқа дейінгі жасөспірімдер
Препаратты өкпенің идиопатиялық фиброзында, интерстициальді пневмонияда, пневмокониозда, сәуле емінен кейінгі пневмонияда, дәрілік пневмонияда (гефитинибпен емдеу аясында осы аурулардан болатын өлім деңгейі артқан); бауыр трансаминазалары белсенділігінің жоғарылауында сақтықпен қолдану керек.
Дәрілермен өзара әрекеттесуі
Гефитиниб винорельбинді қолданудан туындаған нейтропенияны күшейтеді. Рифампицин (CYP3A4 изоферментінің күшті индукторы) гефитинибтің AUC 83% төмендетеді. Итраконазол (CYP3A4 изоферментінің тежегіші) гефитиниб AUC (концентрация/уақыт қисығы астындағы көлемін) 80% арттырады, бұл клиникалық тұрғыда мәнді болуы мүмкін. Асқазан ішіндегісінің рН-ын елеулі және ұзақ уақыт жоғарылататын препараттар гефитинибтің AUC 47% азайтады.
Мына дәрілік заттар - CYP3A4 изоферментінің индукторлары (фенитоин, карбамазепин, барбитураттар, шайқурай тұнбасы) гефитинибтің метаболизмін жоғарылатуы және қан плазмасындағы концентрациясын төмендетуі мүмкін, бұл оның тиімділігін азайтуы ықтимал. Метопрололмен (CYP2D6 арналған субстратпен) бір мезгілде қабылдау метапролол концентрациясының болымсыз (35%-ға) жоғарылауын туындатады, бұл клиникалық тұрғыда мәнді болып табылмайды.
Айрықша нұсқаулар
Гефитинибпен емдеу аясында өкпенің интерстициальді зақымданулары байқалған, кейбір жағдайларда бұл өліммен аяқталған. Ентігу, жөтел, қызба сияқты белгілер арта түскен кезде препаратты қолдануды тоқтату және емделушіні дереу тексеру керек. Егер интерстициальді өкпе ауруының болуы расталса, Визгефті қолдануды тоқтату және емделушіге тиісті ем тағайындау керек. Өкпенің интерстициальді зақымдануын жоғарылататын факорлардың арасында мыналар байқалған: темекі шегу, жалпы ауыр жай-күй (PS >2), компьютерлік томография деректері бойынша қалыпты өкпе тіні < 50%, аурудың ұзаққа созылуы (ҰЖӨО) < 6 ай, сыртартқыдағы интерстициальді пневмония, егде жас (> 55 жас), қатар жүретін жүрек-қантамыр аурулары. Гефитинибті қабылдау аясында бауыр трансаминазаларының симптомсыз жоғарылауы байқалған, осыған байланысты емдеу кезеңінде бауыр қызметін ұдайы бақылап отыру керек. Трансаминазалар белсенділігінің айқын жоғарылауында препаратты қабылдауды тоқтату керек.
Визгефпен емдеу кезеңінде варфарин қабылдайтын емделушілерде протромбиндік уақытты ұдайы бақылап отыру керек.
Көру мүшесі тарапынан кез-келген жағымсыз әсерлер немесе ауыр немесе ұзаққа созылған диарея, жүрек айнуы, құсу немесе анорексия пайда болғанда емделушілерге дереу дәрігерге көрінулері керек екенін ескерту керек.
Лактозаны көтере алмаушылық, лактоза тапшылығы немесе мальабсорбция синдромы сияқты сирек кездесетін тұқым қуалайтын аурулары бар емделушілерге құрамында лактоза болғандықтан Визгефті сақтықпен тағайындау керек.
Дәрілік заттың көлік құралдарын немесе қауіпті механизмдерді басқару қабілетіне әсер ету ерекшеліктері
Емді жүргізу кезінде астения, жүрек айнуы мен құсу сияқты жағымсыз әсерлер өршуі мүмкін болғандықтан, автокөлікті жүргізгенде және назар аудару жоғарылығы мен психомоторлық реакция жылдамдығын талап ететін қызмет түрлерімен айналысқанда сақ болу керек.
Артық дозалануы
Симптомдары: жағымсыз реакцияларының негізінен диарея мен тері бөртпелерінің жиілігі мен ауырлығының артуы
Емі: белгісіне қарай. У қайтарғысы белгісіз.
Шығарылу түрі мен қаптамасы
30 таблеткадан тығыздығы жоғары полиэтиленнен жасалған ашылуы бақыланатын сақинасымен қақпақшасы бар ақ құтыға қапталған.
Картон пәшкеге мемлекеттік және орыс тілдеріндегі медицинада қолданылуы жөніндегі нұсқаулықпен бірге 1 құтыдан салынады.
Сақтау шарттары
25°С-ден аспайтын температурада, құрғақ жерде сақтау керек.
Балалардың қолы жетпейтін жерде сақтау керек!
Сақтау мерзімі
2 жыл
Қаптамада көрсетілген жарамдылық мерзімі өткеннен кейін препаратты қолдануға болмайды.
Дәріханалардан босатылу шарттары
Рецепт арқылы
Өндіруші
НВ Ремедиз Пвт. Лтд.
Үндістан, Мумбаи-400 072, Андери-Ист, Чандивали, Оберой Гарден Эстейт, корпус Д, 3-ші қабат, 3131 кеңсе.
Өндірістік алаңының мекенжайы
G-17/1, ҚӨК Тарапур, Бойсар өнеркәсіптік аймағы, Тан-401 506 ауданы, Махараштра, Үндістан
Қаптаушы-ұйымның атауы мен елі
НВ Ремедиз Пвт. Лтд, Үндістан
Тіркеу куәлігі иесінің атауы мен елі
"Глобал Холдинг" ЖШС, Қазақстан
Қазақстан Республикасының аумағында тұтынушылардан өнімнің сапасы жөніндегі шағымдарды қабылдайтын ұйымның мекенжайы
"Глобал Холдинг" ЖШС
Мекенжайы: 0500004, Алматы қ-сы, Желтоқсан к-сі, 59, Қазақстан Республикасы
Телефон нөмірі: +7 (727) 2581086
Факс +7 (727) 2599756