Вестибо® (16 мг)

• русский
• қазақша

• Скачать инструкцию медикамента

Саудалық атауы

Вестибо®

Халықаралық патенттелмеген атауы

Бетагистин

Дәрілік түрі

8 мг, 16 мг таблеткалар

Құрамы

Бір таблетканың құрамында

белсенді зат - 8 мг, 16 мг бетагистин дигидрохлориді,

қосымша заттар: повидон К90, микрокристалды целлюлоза, лактоза моногидраты, кремнийдің коллоидты қостотығы, кросповидон, стеарин қышқылы

Сипаттамасы

Диаметрі 6,9 мм-ден 7,2 мм-ге дейін және биіктігі 2,2-ден 2,7 мм-ге дейін болатын, бір жақ бетінде “В8” таңбасы, қарсы жақ беті – тегіс, екі жақ бетінде ойығы бар, ақ немесе ақ дерлік түсті, дөңгелек, жайпақ таблеткалар (8 мг доза үшін).

Диаметрі 8,9 мм-ден 9,2 мм-ге дейін және биіктігі 2,7-ден 3,4 мм-ге дейін болатын, бір жақ бетінде “В16” таңбасы, қарсы жақ беті – тегіс, екі жақ бетінде ойығы бар, ақ немесе ақ дерлік түсті, дөңгелек, жайпақ таблеткалар (16 мг доза үшін).

Фармакотерапиялық тобы

Бас айналуын қайтаруға арналған дәрілер.

АТХ коды N07CA01

Фармакологиялық қасиеттері

Фармакокинетикасы

Бетагистин дигидрохлоридті ішке қабылдағаннан кейін асқазан-ішек жолдарынан жылдам және толық дерлік сіңеді. Бетагастиннің ең жоғарғы плазмалық концентрациясына аш қарынға ішке қабылдағаннан кейін бір сағаттан соң жетеді. Плазмадағы деңгейі өте төмен. Қан плазмасы ақуыздарымен байланысуы өте төмен. Бетагистин гидрохлориді бауырда белсенді емес басты метаболитке, 2-пиридилсірке қышқылына және диметил-бетагистинге дейін жылдам метаболизденеді.

Ағзадан несеппен бірге 24 сағат ішінде толық шығарылады. Жартылай шығарылу кезеңі 3–4 сағатты құрайды. Жүйе алдындағы метаболизмі және өтпен шығарылуы жөнінде деректер жоқ.

Фармакодинамикасы

Вестибо - гистаминнің синтетикалық аналогы. Бетагистин негізінен ішкі құлақ және орталық жүйке жүйесінің вестибулярлы ядроларының гистаминді Н1 және Н3-рецепторларына әсер етеді. Ішкі құлақ тамырларының Н1-рецепторларына тікелей агонистік әсер етуі арқылы, сондай-ақ Н3-рецепторларға әсер ету арқылы микроциркуляцияны және ішкі құлақ қылтамырларының өткізгіштігін жақсартады, базилярлы артерияларда қан ағымын арттырады, лабиринт пен иірім түтіктегі эндолимфа қысымын қалыпты етеді. Бетагистин вестибулярлы жүйке ядросының Н3-рецепторларының тежегіші бола отырып, орталықтан айқын тиімділікке ие. Вестибулярлы жүйкенің медиальді ядроларының нейрондарына ми бағанының көпірі тұсында трансмиттерлі берілісті қалыпты етеді.

Нәтижесінде вестибулярлы аппараттың бұзылуы және кохлеарлы бұзылулар қалпына келеді, бас айнлуының жиілігі мен қарқындылығы төмендейді, құлақтағы шуыл мен дабыл азаяды, есту жақсарады.

Өкпе эпителийінің өткізгіштігін арттырады. Бұл әсер терфенадиннің Н1 бөгегіштерін қабылдаған кезде бәсеңдейді. Жүрек көлеміне әсер етуі туралы деректер жоқ, кейбір тамыркеңейткіш әсерге ие, ол кейде артериялық қысымның аздап төмендеуіне әкелуі мүмкін. Экзокриндік бездер қызметіне аз дәрежеде әсер етеді.

Қолданылуы

- бас айналуымен, бас ауыруымен, құлақтағы шуылмен, естудің төмендеуінің өршуімен, жүрек айнуымен және құсумен, шығу тегі әр түрлі вестибулярлы бас айналуымен сипатталатын синдромдарда (вертебробазилярлы жеткіліксіздік, жарақаттан кейінгі энцефалопатиядағы, ми қантамырларының атеросклерозындағы, вестибулярлы невриттегі, лабиринтиттегі, нейрохирургиялық және офтальмологиялық араласулардан кейінгі қатерсіз позициялық бас айналуда)

- Меньер синдромында және ауруында.

Қолдану тәсілі және дозалары

Ұсынылатын бастапқы доза – 24 мг күніне 2-3 рет қабылдауға (күніне 3 рет 8 мг-ден немесе күніне 2 рет 16 мг-ден). Егер осы дозалану жеткіліксіз болса, тәуліктік доза 48 мг-ге – ең жоғарғы тәуліктік дозаға дейін арттырылуы мүмкін.

Емдеу курсының ұзақтығын емдеуші дәрігер анықтайды.

Вестибомен балаларды және 18 жастан кіші жасөспірімдерді емдеуге болмайды.

Жағымсыз әсерлері

Өте сирек

- бөртпе, есекжем, қышыма

Сирек

• бас ауыруы, ұйқышылдық

• ысынуды сезіну

• жүрек қағуы

• асқазан маңайының ауыруы, қыжыл, жүрек айнуы, құсу

• бронхтық демікпесі бар белгілердің асқынуы

Қолдануға болмайтын жағдайлар

- бетагистин гидрохлоридіне және/немесе препараттың кез келген құрамдас бөліктеріне жоғарғы сезімталдықта

- феохромоцитомада

- жүктілікте және лактация кезеңінде

- балаларға және 18 жасқа дейінгі жасөспірімдерге

Дәрілермен өзара әрекеттесуі

Вестибоны антигистаминді препараттармен бір мезгілде қабылдауға болмайды.

Этил спирті, пириметамин, сальбутамол бетагистин әсерін күшейтеді.

Айрықша нұсқаулар

Сыртартқысында асқазанның немесе он екі елі ішектің ойық жаралы ауруы бар емделушілерге емдеу кезінде диспепсияның даму қаупіне байланысты препаратты сақтықпен тағайындау керек. Бронхтық демікпесі, есекжемі, бөртпесі және аллергиялық риниті бар науқастарға препаратты сақтықпен тағайындау керек. Артериялық қысымы төмен, сондай-ақ гистаминді бас ауыруы және бас сақинасы бар емделушілерге. Қосымша зат ретінде құрамында лактоза бар болғандықтан кейбір қант жақпайтын емделушілерге препаратты тағайындаудан бас тарту керек.

Дәрілік заттардың көлік құралдарын жүргізуге және қауіпті механизмдерді басқару қабілетіне әсер ету ерекшеліктері

Техникамен жұмыс жасау немесе автомобильді жүргізу сияқты жоғары зейін қоюды талап ететін жұмыстарды орындауға әсер етпейді. Сирек жағдайларда ұйқышылдықты туғызуы мүмкін, мұндай жағдайларда емделушілер жоғары зейін қоюды қажет ететін жұмыстардан аулақ болған жөн.

Артық дозалануы

Белгілері: жүрек айнуы, құсу, диспепсия, атаксия және құрысулар.

Емдеу: асқазанды шаю, белгісіне қарай емдеу.

Шығарылу түрі және қаптамасы

ПВХ/ПВДХ/алюминий фольгадан жасалған пішінді ұяшықты қаптамада 10 таблеткадан.

3 пішінді қаптама мемлекеттік және орыс тілдерінде жазылған медицинада қолданылуы жөніндегі нұсқаулықпен бірге картоннан жасалған пәшкеге салынған.

Сақтау шарттары

25°С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Қаптамасында көрсетілген жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

«Балканфарма-Дупница АД», Болгария

Каталент Германия Шорндорф ГмбХ-мен ынтымақтастықта, Германия,

“Самоков тас жолы ” к-сі 3, 2600 Дупница қ., Болгария

тел.: +359/701 58 196, факс: +359/701 58 555.

Тіркеу куәлігінің иесі

Балканфарма-Дупница АД, Болгария

“Самоков тас жолы” к-сі 3, 2600 Дупница қ., Болгария

тел.: +359/701 58 196, факс: +359/701 58 555.

Тұтынушылардан өнім сапасы туралы түскен шағымдарды Қазақстан Республикасы аумағында қабылдайтын ұйымның мекенжайы:

Алматы қаласындағы «Актавис Интернешнл Лтд.» өкілдігі

Қазақстан Республикасы, 050000, Алматы қ-сы, Мұқанов к-сі, 241-1А.

Тел./факс: 8 (727) 313 74 30, 313 74 31;

Электронды пошта: actavis@actavis.kz; сайт: www.actavis.com