Веро-Метотрексат (10 мг/мл)

МНН: Метотрексат
Производитель: Лэнс-Фарм ООО
Анатомо-терапевтическо-химическая классификация: Methotrexate
Номер регистрации в РК: № РК-ЛС-5№013075
Информация о регистрации в РК: 07.10.2014 - 07.10.2019

Инструкция

Саудалық атауы

Веро-метотрексат

Халықаралық патенттелмеген атауы

Метотрексат

Дәрілік түрі

Инъекцияға арналған ерітінді, 5 мг/мл және 10 мг/мл

Құрамы

1 мл препараттың құрамында

белсенді зат - 5 мг немесе 10 мг метотрексат,

қосымша зат: натрий гидроксиді, инъекцияға арналған су.

Сипаттамасы

Сары түсті мөлдір сұйықтық

Фармакотерапиялық тобы

Ісікке қарсы препараттар. Антиметаболиттер. Фолий қышқылының аналогтары. Метотрексат.

АТХ коды L01BA01

Фармакологиялық қасиеттері

Фармакокинетикасы

Бұлшықет ішіне енгізгенде қан плазмасында метотрексаттың ең жоғары концентрацияға жету уақыты – 30-60 мин. Плазма ақуыздарымен байланысуы – 50%-ға жуық. Емдік дозаларда қолданғанда метотрексат енгізу жолына қарамай-ақ, іс жүзінде гематоэнцефалдық бөгет арқылы өтпейді, ми сұйықтығына интратекальді түрде енгізгеннен кейін жоғары концентрацияларға жетеді. Емшек сүтіне өтеді. Негізінен бауырда метаболизденіп, фармакологиялық тұрғыдан белсенді дигидрофолатредуктазаны және тимидин синтезін тежейтін полиглутамин түрін түзеді. Бастапқы фазада жартылай шығарылу кезеңі 2‑4 сағатты құрайды, ал соңғы фазасында әдеттегі дозаларда қолданғанда – 3-10 сағатты және метотрексаттың жоғары дозаларын қолданғанда 8-15 сағатты құрайды. Бүйрек қызметінің созылмалы жеткіліксіздігінде метотрексаттың шығарылуының екі фазасы да едәуір ұзаруы мүмкін. Көбіне бүйректер арқылы өзгермеген күйінде шумақтық сүзілу және өзекшелік секреция жолымен шығарылады (көктамыр ішіне енгізгенде 80-90%-ы 24 сағаттың ішінде шығарылады), өтпен бірге 10%-ға дейіні шығарылады (әрі қарай ішекте қайта сіңіріледі). Метотрексаттың шығарылуы бүйрек функциясы бұзылған, айқын асциті немесе транссудаты бар науқастарда едәуір баяулаған. Қайталап енгізгенде тіндерде метаболиттер түрінде жиналады.

Фармакодинамикасы

Веро-метотрексат дигидрофолий қышқылының тетрагидрофолй қышқылы қалпына (пурин нуклеотидтерінің және олардың туындыларының синтезі үшін қажетті бір көмірсутекті топтың тасымалдаушысы) келуіне қатысатын дигидрофолатредуктазаны тежейді. Дезоксирибонуклеин қышқылының (ДНҚ) репарациясын және жасушалық митозды (S-фазада), синтезді тежейді. Жасушалардың пролиферациясы жоғары болатын тіндері: ісік тіні, сүйек кемігі, эмбриональді жасушалар, шырышты қабық эпителийінің жасушалары метотрексаттың әсеріне ерекше сезімтал. Ісікке қарсы әсерімен қатар иммунодепрессивтік те әсері бар.

Қолданылуы

трофобластикалық ісіктерде (хориокарцинома, хориоаденома, көпіршіктің толып қалуы)

жедел лимфобластты лейкозда

нейролейкозда (алдын алуға және емдеуге)

жайылған зеңді микозда

сүт безінің обырында, бас пен мойынның эпидермоидты обырында, өкпе обырының жалпақ жасушалы және ұсақ жасушалы түрлерінде (монотерапияда немесе ісікке қарсы кешенді ем құрамында)

әдеттегі емге жауап бермейтін ересек емделушілердегі псориаздың ауыр жайылған түрлерінде (соның ішінде псориаздық артритте), ересек емделушілерде ревматоидты артритте, ювенильді созылмалы артритте

Қолдану тәсілдері және дозасы

Көктамыр ішіне, бұлшықет ішіне, артерия ішіне, интратекальді түрде.

Веро-метотрексат химиотерапиялық емнің көптеген сызбаларының құрамына кіреді, осыған байланысты, әрбір жекелеген жағдайда енгізу жолын, тәртібін және дозаларын таңдаған кезде арнайы салалық әдебиеттердегі деректерді басшылыққа алған жөн.

Қажет болған кезде Веро-метотрексат ерітіндісі натрий хлоридінің изотониялық ерітіндісінде немесе 5% декстроза ерітіндісінде қосымша сұйылтылуы мүмкін.

100 мг/м2-ден жоғары дозаларды тек көктамыр ішіне ғана тамшылатып енгізеді. Препараттың жоғары дозаларын (100 мг/м2-ден жоғары) тағайындаған кезде әрі қарай кальций фолинатын міндетті түрде енгізу керек.

Веро-метотрексатты интратекальді түрде енгізу үшін натрий хлоридінің 0,9% изотониялық ерітіндісінде 1 мг/мл концентрацияға дейін сұйылтады.

Ересектер және балалар үшін келесі дозалау режимін қолданады:

Трофобластикалық ісіктер: 15-30 мг бұлшықет ішіне, 5 күн бойы күн сайын, бір немесе аптадан көбірек аралықпен (уыттылық белгілеріне байланысты). Емдеу курсын әдетте жиынтық 300-400 мг дозаға дейін 3-тен 5 ретке дейін қайталайды.

Жедел лимфобластты лейкоз: ремиссия жағдайында демеуші ем үшін көктамырішілік инфузия жолымен апта сайын 15 мг/м2.

Нейролейкоз: 12 мг/м2 (ең жоғарысы 15 мг) 15-30 секунд бойы интратекальді түрде, аптасына 1 немесе 2 рет.

Балаларды емдеген кезде дозаны нәрестенің жасына байланысты таңдайды: 1 жасқа дейінгі балаларға 6 мг, 1 жастағы балаларға 8 мг, 2 жастағы балаларға 10 мг, 3 жастағы және одан үлкен балаларға 12 мг тағайындайды. Енгізбес бұрын жұлын-ми сұйықтығының енгізіледі деп болжанған дәрілік заттың көлеміне шамамен тең көлемін жойған жөн.

Интратекальді түрде енгізуді сақтықпен жүргізу керек. Интратекальді түрде енгізгенде ұсынылатын дозаны арттыру уыттылықтың айқын біліністерінің пайда болу қаупін ұлғайтады.

Сақ болыңыз: кальций фолинатын интратекальді түрде енгізуге болмайды!

Ауқымды ісіктер (сүт безінің обыры, бас пен мойын обыры, өкпе обыры): ісікке қарсы басқа препараттармен біріктірілімінде 30-40 мг/м2 көктамыр ішіне аптасына 1 рет сорғалатып енгізеді.

Зең түріндегі микоз: бірнеше апта немесе айлар бойы аптасына 1 рет 50 мг-ден немесе аптасына 2 рет 25 мг-ден. Дозаны төмендету немесе препарат енгізуді тоқтату емделушінің реакциясымен және гематологиялық көрсеткіштерімен анықталады.

Псориаз (соның ішінде псориаздық артрит): аптасына 10-25 мг дозаларда көктамыр ішіне тамшылатып немесе бұлшықет ішіне. Дозаны әдетте біртіндеп өсіреді, оңтайлы клиникалық әсерге қол жеткізілгенде дозаны тиімді, төменірек дозаға дейін азайта бастайды.

Ревматоидты артрит: бастапқы доза әдетте аптасына бір рет бір мезетте көктамыр ішіне немесе бұлшықет ішіне енгізілетін 7,5 мг құрайды. Оңтайлы әсерге қол жеткізу үшін апталық доза жоғарылатылуы мүмкін, мұндайда ол 20 мг-ден аспауы тиіс. Оңтайлы клиникалық әсерге қол жеткізілген кезде, дозаны тиімді, төменірек дозаға дейін азайта бастаған жөн. Емдеудің оңтайлы ұзақтығы анықталған жоқ.

Ювенильді созылмалы артрит: балаларға аптасына 10-30 мг/м2 дозада. Әдеттегі тиімді доза аптасына 10 мг/м2 болып табылады. Бастапқыда препаратты жартылай дозада қолданады. Жағымдылығы жақсы болған жағдайда бір аптадан кейін толық дозаны қолданады.

Цитостатиктерді (соның ішінде метотрексатты) балаларға иммуносупрессивтік ем ретінде қолданғанда (псориазда, ревматоидты артритте, жасөспірімдік созылмалы артритте) оларды қолданудың пайдасы мен қаупінің арақатынасын мұқият тексерген жөн.

Жағымсыз әсерлері

сүйек кемігіндегі қан түзудің тежелуі, лейкопения, нейтропения, агранулоцитоз, лимфопения (әсіресе Т-лимфоциттер), тромбоцитопения, анемия (соның ішінде апластикалық), панцитопения, эозинофилия, гипогаммаглобулинемия, септицемия, геморрагиялар

жұқпалы ауруларға қарсы тұрудың төмендеуі, оппортунистік жұқпалар (интерстициальді плазможасушалық пневмония, пневмония, нокардиоз, гистоплазмоз, криптококкоз, белдемелі теміреткі, қарапайым ұшық, гепатит, цитомегаловирусты жұқпа, цитомегаловирусты пневмонияны қоса), кейде өліммен аяқталу (өліммен аяқталатын сепсис)

анорексия, жүректің айнуы, құсу, мукозит, стоматит, гингивит, глоссит, фарингит, энтерит, диарея, эрозивті-ойық жаралы зақымдану және асқазан-ішек жолынан қан кету (соның ішінде мелена, гематемезис), энтерит, ұзақ уақыт күн сайын қолданғанда – бауыр функциясының бұзылуы (жедел гепатит, перипортальді фиброз және бауыр циррозы, бауыр қызметінің жеткіліксіздігі, гипоальбуминемия, «бауыр» трансаминазалары белсенділігінің жоғарылауы, бауыр некрозы, бауырдың майлы дистрофиясы), панкреатит

энцефалопатия, соның ішінде лейкоэнцефалопатия (әсіресе көп реттік дозаны интратекальді түрде енгізгенде, сондай-ақ бас аймағына сәуле емін қабылдаған науқастарда), қатты қажығыштық, әлсіздік, ұйқышылдық, сананың шатасуы, деменция, атаксия, афазия, тремор, ашушаңдық, әдеттен тыс краниальді сезімталдық, құрысулар, кома, сирек жағдайларда – өліммен аяқталу; жоғары дозаларда қолданған кезде – когнитивті функциялардың транзиторлы бұзылуы; интратекальді түрде енгізуден болған жедел жағымсыз құбылыстар  бас айналу, көру сезімінің анық болмауы, бас ауыру, арқа тұсының ауыруы, желке бұлшықеттерінің сіресуі, құрысулар, гемипарез, парез, бұлшықеттердің түйілгіштігі, Гийен-Барре синдромы, жұлын-ми сұйықтығы қысымының артуы, параплегия, жүйкелердің салдануы, церебральді функцияның бұзылуы

эозинофилиямен жиі астасатын жедел немесе созылмалы интерстициальді пневмонит (соның ішінде фатальді), өкпенің жедел ісінуі, альвеолит, өкпе фиброзы, өкпе жұқпаларының өршуі, өкпенің созылмалы обструкциялық ауруы (ӨСОА), тыныс қызметінің жеткіліксіздігі, кеуденің плевриттен болған ауруы, плевраның қалыңдауы

перикардит, перикардиальді жалқық, артериялық қысымның төмендеуі, тромбоэмболия (соның ішінде артериялық тромбоз, церебральді қантамырлардың тромбозы, тереңдегі көктамырлардың тромбозы, торлы қабық көктамырларының тромбозы, тромбофлебит, өкпе эмболиясы)

бүйрек қызметінің жеткіліксіздігі, цистит, нефропатия, бүйрек функциясының бұзылуы (бүйрек қызметінің жеткіліксіздігі, азотемия, соның ішінде креатинин деңгейінің жоғарылауы, гематурия, протеинемия), ауыр нефропатия

овогенездің, сперматогенездің бұзылуы (соның ішінде транзиторлы олигоспермия), либидоның төмендеуі/импотенция, фертильділіктің өзгеруі, дисменорея, гинекомастия, бедеулік, аборт, ұрық дамуының бұзылуы, вагинит, қынаптың ойық жаралануы

тері эритемасы және/немесе бөртпе, терінің қышуы, есекжем, телеангиоэктазиялар, фурункулез, депигментация немесе гиперпигментация, безеулер, терінің қабыршақтануы, фолликулит, алопеция, экхимоз, фотосезімталдықтың артуы, терінің ойық жаралануы және некрозы, эксфолиативті дерматит, радиациялық дерматиттің өршуі

конъюнктивит, көз жасының шамадан тыс бөлінуі, катаракта, жарықтан қорқу, көрудің нашарлауы, соның ішінде өткінші соқырлық (жоғары дозаларда)

құлақтың шыңылдауы

қызба, қалтырау, бөртпе, есекжем, анафилаксия, анафилактоидтық реакциялар, көп пішінді эритема (соның ішінде Стивенс-Джонсон синдромы), уытты эпидермальді некролиз (Лайелл синдромы)

артралгия, миалгия, остеопороз, остеонекроз, сынулар

дімкәстік, васкулит, метаболикалық өзгерулер, қант диабеті, лимфома (соның ішінде қайтымды), ісік лизисі синдромы (соның ішінде гиперурикемия)

Қолдануға болмайтын жағдайлар

метотрексатқа және/немесе препараттың кез келген компонентіне жоғары сезімталдық

айқын анемия, лейкопения, нейтропения, тромбоцитопения

зерттеулермен айғақталған иммунитет тапшылығы синдромы немесе оның айқын көріністері

жедел және созылмалы ауыр жұқпалы аурулар

бүйрек қызметінің айқын жеткіліксіздігі (креатинин клиренсі минутына 20 мл-ден аз) және/немесе бауыр қызметінің жеткіліксіздігі

маскүнемдік

жүктілік және бала емізу кезеңі

аптасына 15 мг және одан көбірек дозада метотрексатты ацетилсалицил қышқылымен бірге қолдану

Дәрілермен өзара әрекеттесуі

Веро-метотрексатты (жоғары дозаларда) қабынуға қарсы стероидты емес препараттармен (ҚҚСП), ацетилсалицил қышқылын және басқа да салицилаттарды, азапропазонды, диклофенакті, индометацинді және кетопрофенді қоса, бір мезгілде қолданғанда метотрексаттың уыттылығы күшеюі мүмкін, бірқатар жағдайларда ауыр уытты әсер болуы, кейде өліммен аяқталуы ықтимал. Арнайы сақтық шараларын орындағанда және тиісті мониторинг жүргізгенде метотрексат төмен дозаларда (аптасына 7,5-15 мг) ҚҚСП-пен біріктіріліп, атап айтқанда ревматоидты артритті емдеуде қолданылуы мүмкін.

Сульфаниламидтерді, сульфонилмочевина туындыларын, фенитоинді, фенилбутазонды, аминобензой қышқылын, пириметаминді немесе триметопримді, бірқатар антибиотиктерді (тетрациклиндер, хлорамфеникол және пара-аминобензой қышқылы), әсері тікелей емес антикоагулянттарды және гиполипидемиялық препараттарды (холестирамин) бір мезгілде қолдану метотрексаттың уыттылығын күшейтеді.

Пробенецид және пенициллиндер бүйрек-өзекшелік тасымалды азайтады; осы дәрілік заттарды және метотрексатты бір мезгілде тағайындағанда емделушілердің жағдайын мұқият бақылаған жөн.

Метотрексатты нефроуытты және гепатоуытты потенциалы бар басқа дәрілік заттармен (этанолды қоса) бірге тағайындамаған жөн.

Метотрексат ацитретин метаболиті этретинатпен өзара әрекеттескенде гепатиттің даму қаупінің арту жағдайлары болған. Осыған байланысты метотрексатты ацитретинмен бірге қолданбау керек.

Ретиноидтар, азатиоприн, сульфасалазин гепатоуыттылықтың даму қаупін арттырады.

Құрамында фолий қышқылы және оның туындылары бар поливитаминді препараттар Веро-метотрексатпен емдеудің тиімділігін төмендетуі мүмкін.

L-аспарагиназа метотрексаттың антагонисі болып табылады.

Динитроген оксидін қолданып анестезия жүргізу алдын ала болжанбайтын ауыр миелосупрессияның және стоматиттің дамуына әкеп соғуы мүмкін.

Амиодаронды Веро‑метотрексатпен ем қабылдап жүрген емделушілерге тағайындау теріні ойық жара қылуы мүмкін.

Метотрексат теофиллин клиренсін төмендетеді.

Метотрексат жүйеалды метаболизмге ықпалын тигізіп, меркаптопуриннің биожетімділігін арттыруы мүмкін.

Метотрексат протонды помпа тежегіштерімен (омепразол, пантопразол) өзара әрекеттесуі мүмкін. Омепразол метотрексаттың клиренсін төмендетуі мүмкін, бұл метотрексаттың уытты концентрациясының пайда болуына әкеледі.

Псориазы немесе зеңді микозы бар, метотрексатты PUVA-еммен (ұзынтолқынды ультракүлгін А сәулені фотосенсибилизатор псораленмен біріктіріп емдеу) біріктіріп қабылдап жүрген бірнеше емделушілерде тері обыры байқалды.

Эритроцитарлы массаны және метотрексатты бір мезгілде енгізгенде сақ болған жөн.

Радиоеммен біріктіру жұмсақ тіндердің некрозы және остеонекроз қаупін арттыруы мүмкін.

Метотрексат вакцинацияға иммунологиялық жауапты төмендетуі мүмкін. Тірі вакцинамен бір мезгілде енгізген кезде ауыр антигендік реакциялар дамуы мүмкін.

Айрықша нұсқаулар

Веро-метотрексатпен емдеуді химиотерапиялық препараттарды қолдану тәжірибесі бар дәрігердің ғана бақылауымен жүзеге асырылғаны жөн. Дәрігер дәрілік заттың әртүрлі сипаттамалары және оның клиникалық бейіні жөнінде хабардар болуы тиіс.

Ауыр жағымсыз реакциялардың пайда болу қаупіне байланысты, дәрігер емделушіні метотрексатпен емдеудің потенциалды қаупінен хабардар етуі және оның жағдайына ұдайы мониторинг жасауды қамтамасыз етуі тиіс.

Метотрексатпен емдеу ауыр жағымсыз реакцияларға, кейде өліммен аяқталуға әкеп соғуы мүмкін. Жағымсыз реакциялар емнің кез келген сәтінде пайда болуы мүмкін, емделушілерді мұқият тексеру және жағымсыз реакциялардың ерте белгілері мен симптомдары жөнінде ақпарат беру қажет. Жағымсыз әсерлер пайда болған кезде дозаны азайтқан немесе метотрексатпен емдеуді тоқтатқан және тиісті қосымша ем тағайындаған жөн. Метотрексатпен емдеуді қайта бастауды, дәрілік затты қолдану қажеттілігіне және жағымсыз әсерлердің қайтадан пайда болу мүмкіндігіне баға бере отырып, сақтықпен жүзеге асырған жөн.

Веро-метотрексатпен емдеуді бастағанға дейін, бастаған кезде және аяқтағаннан кейін, организм ағзалары және жүйелері қызметтерінің бұзылуын анықтау мақсатында, шеткергі қан көрсеткіштеріне, бауыр мен бүйрек функцияларына баға беру, кеуде қуысына рентгенологиялық зерттеу жүргізу қажет.

Эозинофилиямен жиі астасқан жедел немесе созылмалы интерстициальді пневмонит дамуы мүмкін. Симптомдар әдетте диспноэні, жөтелді (атап айтқанда, құрғақ жөтел) және қызбаны қамтиды. Емделушілерді пневмониттің туындау мүмкіндігі және персистерленетін жөтел немесе диспноэ болған кезде дәрігерге қаралу қажеттілігі жөнінде хабардар еткен жөн.

Емделушіде өкпе ауруы бар болған жағдайда метотрексат қабылдауды тоқтатқан және жұқпаның пайда болу қаупінің бар-жоқтығын анықтау үшін, емделушінің жағдайын мұқият тексерген жөн. Метотрексатты қолданумен индукцияланған өкпе ауруларының пайда болуына күдіктенген жағдайда, кортикостероидтармен емдеуді бастау және метотрексатпен емдеу мүмкіндігін тоқтата тұру қажет. Тыныс алу жүйесі ауруларының симптомдары бар болған жағдайда Pneumocystis carinii қоздырғыштарынан туындаған пневмоцистті пневмонияның дамуы мүмкін екендігіне көңіл бөлген жөн.

Дегидратацияда, табиғаты вирустық, зеңдік немесе бактериялық жұқпалы ауруларда, асқазанның ойық жарасында, ойық жаралы колитте, әлсіздік жағдайында, подаграда немесе уратты нефроуролитиазде, бұған дейін сыртартқысында сәулемен немесе химиялық ем қабылдаған болса, балаларды және егде жастағы адамдарды емдегенде сақтықпен қолдану керек.

Метотрексатпен емдеуді бастағанға дейін плевральді немесе перитонеальді жалқық пен асцитті жойған жөн.

Веро-метотрексат цитоуытты препарат болып табылады, сондықтан онымен жұмыс жасағанда сақ болу қажет.

Метотрексаттың жоғары дозаларын енгізген кезде уытты реакциялардың алғашқы белгілерін ерте анықтау үшін емделушінің жағдайына мұқият бақылау жасау қажет.

Интратекальді түрде енгізгенде сақ болу керек. Интратекальді түрде енгізгенде ұсынылған дозаны арттыру жүйелік уыттылықтың айқын біліністерінің пайда болу қаупін едәуір арттырады. Сирек жағдайларда интратекальді түрде енгізуден кейін ісік лизисінің синдромы байқалды.

Жоғары дозадағы (2 г/м2 және одан жоғары дозада) емді, стационар жағдайында қан плазмасындағы метотрексат концентрациясын бақылай отырып, тек тәжірибелі химиотерапевт ғана жүргізуі тиіс. Енгізуден кейін 22 сағаттан соң бастапқы мәнімен салыстырғанда қан плазмасындағы метотрексат мөлшерінің 2 есе төмендеуі қалыпты деп саналады. Креатининнің (бастапқыдан 50%-ға және одан астамға) және/немесе билирубиннің плазмалық концентрацияларының жоғарылауы қарқынды уытсыздандыру емін қажет етеді.

Метотрексат негізінен бүйрек арқылы шығарылады. Метотрексатпен емдеуді бастағанға дейін, емдеу кезінде және аяқтағаннан кейін бүйрек функциясын бақылаған жөн. Бүйрек функциясының едәуір бұзылулары тіркелгенде препаратты сақтықпен қолдану керек. Бүйрек функциясы бұзылған емделушілерде метотрексат дозасын төмендету қажет.

Препараттың жоғары дозаларын тағайындау бүйрек өзекшелерінде метотрексаттың және оның метаболиттерінің преципитациясына әкелуі мүмкін. Бүйрек функциясы бұзылған емделушілерде метотрексатты қолдану уытты заттар мөлшерінің жиналып қалуына әкеп соғуы немесе нефроуыттылықты өршітуі мүмкін. Бүйрек функциясының бұзылуы дозаға байланысты. Бұзылу қаупі бүйрек функциясы төмендеген немесе сусызданған науқастарда, сондай-ақ басқа нефроуытты препараттарды қабылдап жүрген науқастарда жоғарылаған.

Арттырылған және жоғары дозалардағы Веро-метотрексатпен емдеу кезінде несептің рН бақылау қажет: енгізген күні және әрі қарай 2-3 күн несептің реакциясы сілтілі болуы тиіс.

Бұған 40 мл 4,2% натрий гидрокарбонаты ерітіндісінен және 400-800 мл 0,9% натрий хлориді ерітіндісінен тұратын қоспаны көктамыр ішіне тамшылатып енгізу арқылы немесе 500 мг ацетазоламидті емделетін күн қарсаңында, емдеген күні немесе әрі қарай 2-3 күн пероральді түрде 4 рет қабылдағанда қол жеткізіледі. Арттырылған және жоғары дозалардағы метотрексатпен емдеуді күшейтілген гидратациямен (тәулігіне 2 л сұйықтыққа дейін) біріктіру қажет.

Метотрексатты протонды помпа тежегіштерімен ем қабылдап жүрген емделушілерге абайлап тағайындау керек. Метотрексаттың фармакокинетикасының (көп жағдайларда жоғары дозаларда) жарияланған популяциялық зерттеулерінде метотрексаттың және/немесе оның метаболиті гидроксиметотрексаттың қан сарысуындағы концентрациясының жоғарылау және болу уақытының арту ықтималдылығы және метотрексатты протонды помпа тежегіштерімен, мысалы, омепразолмен, эзомепразолмен және пантопразолмен бірге қолданғанда, оның ықтимал уытты әсерлері жөнінде болжамдар ұсынылады.

Псориазды емдеу үшін метотрексатты сырқатының түрі ауыр, емнің басқа түрлерімен емдеуге келмейтін науқастарға, бірақ диагнозы биопсия әдісімен дәлелденген және/немесе дерматологиялық кеңес алғаннан кейін ғана тағайындайды.

Метотрексатты иммуносупрессиялық емде қолданғанда (ревматоидты артритте, ювенильді созылмалы артритте) ацетилсалицил қышқылы мен диклофенакті бір мезгілде тағайындамаған жөн (өліммен аяқталуды қоса, ауыр жағымсыз реакциялар туралы мәлімдемелер түсті); қабынуға қарсы стероидты емес препараттармен (ҚҚСП) біріктіріп емдеу қажет болғанда әсер етуі қысқа ҚҚСП қолданған жөн. Метотрексаттың уытты әсерін азайту үшін метотрексатты қолданғаннан кейін аптасына 5-10 мг дозада немесе метотрексатты қолданудан бос күндері тәулігіне 1 мг-ден фолий қышқылын тағайындайды. Емдеу кезеңінде алкоголь, кофеин және антифолаттық белсенділігі бар дәрілік заттарды қабылдауға болмайды.

Метотрексаттың төмен дозаларын қабылдап жүрген емделушілерде қатерлі лимфомалар пайда болуы мүмкін; мұндай жағдайларда емдеу тоқтатылуы тиіс. Лимфоманың кездейсоқ регрессиялық белгілері жоқ болғанда цитоуытты ем жүргізу қажет.

Сирек жағдайларда метотрексат пен фолий қышқылының антагонистерін, мысалы, триметопримді/сульфометоксазолды біріктіріп қолдану нәтижесінде жедел мегалобластты панцитопения тіркелді.

Веро-метотрексатпен емдеу үдерісінде уыттану симптомдарын дер кезінде анықтау үшін емді бастағанға дейін, емдеу кезінде және емдеуді аяқтағаннан кейін шеткергі қан көрсеткіштерін (аптасына 1 рет) бақылау қажет. Лейкоциттер немесе тромбоциттер деңгейлері едәуір төмендеген жағдайда метотрексатпен емдеуді дереу тоқтатқан жөн. Емделушілер жұқпаның барлық симптомдары немесе белгілері жөнінде емдеуші дәрігерге бірден мәлімдегені жөн. Қан түзілуі қатты тежелген жағдайда емделушіге қанның формалық элементтерін құю қажет болуы мүмкін.

Метотрексат иммунодепрессивті белсенділікке ие, осыған байланысты оны пайдалану онымен бір мезгілде тағайындалған вакцинацияға организмнің иммунологиялық жауабын төмендетуі мүмкін. Емделушінің иммунологиялық жауабы маңызды болған жағдайларда метотрексаттың иммуносупрессиялық әсерін ескерген жөн. Әдеттегідей, тірі вирус вакциналарымен иммунизация жасауға болмайды.

Диарея және ойық жаралы стоматит дамығанда метотрексатпен емдеуді тоқтату қажет, керісінше жағдайда бұл геморрагиялық энтериттің дамуына және, ішектің тесілуі салдарынан, науқастың өліміне әкеп соғуы мүмкін.

Метотрексат әсіресе жоғары дозаларда қолданған жағдайда немесе ұзақ емдегенде гепатоуытты әсерді тудыруы мүмкін. Осыған байланысты бауырдың патологиялық өзгерулері асқазан-ішек жолы немесе қан жүйесі тарапынан уыттылықтың бұған дейінгі белгілерінсіз дамуы мүмкін, емдеуді бастағанға дейін бауыр функциясының көрсеткіштерін және оларды емделу үдерісінде үнемі бақылап отыру өте-мөте маңызды. Бауыр функцияларының ауыр бұзылулары байқалған кезде метотрексатты қолдануды кем дегенде 2 апта тоқтатқан жөн. Метотрексаттың жиынтық дозасының мәні 1,5 г-ден асқан жағдайда гепатологиялық уыттылық дамуы мүмкін деп саналғанда, бауыр биопсиясы жүргізілуі мүмкін. Бауыр функциясы бұзылған науқастарда метотрексаттың шығарылу кезеңі ұлғайған, сондықтан мұндай науқастарда емді, төмендетілген дозаларды қолдана отырып, аса сақтықпен жүргізген жөн. Гепатоуытты потенциалы бар басқа заттармен (этанолды қоса) біріктіріп қолданбау керек.

Метотрексатпен емдеу нәтижесінде кейде өлімге әкеп соғатын, емдеуді тоқтатқаннан кейін жоғалатын, ауыр жоғары сезімталдық реакциялары (уытты эпидермальді некролиз, Стивенс-Джонсон синдромы, эксфолиативті дерматит, тері некрозы, көп пішінді эритема, васкулит және теріде ауқымды герпес түріндегі бөртпелер) дамуы мүмкін.

Жүктілік және лактация

Веро-метотрексатты жүктілік және бала емізу кезеңінде қолдануға болмайды.

Метотрексаттың тератогендік әсері бар, оны қолдану ұрықтың өліміне және/немесе туа біткен аномалияларға әкеп соғады. Сондықтан, метотрексатты бала көтере алатын жастағы әйелдерге, метотрексатпен емдеудің пайдасы оны қолданған кездегі қаупінен басым болған жағдайларды қоспағанда, тағайындауға болмайды.

Метотрексат емделу кезінде гаметогенезге де ықпалын тигізеді және фертильділіктің төмендеуіне әкеп соғуы мүмкін, бұл емдеуді тоқтатуға себеп бола алады. Ұрпақ өрбіте алатын жастағы еркектер және әйелдер метотрексатпен емделу кезінде кемінде 6 ай бойы контрацепцияның сенімді әдістерін қолданғандары жөн.

Дәрілік заттың көлік құралдарын немесе қауіпті механизмдерді басқару қабілетіне ықпал ету ерекшеліктері

Препараттың кейбір жағымсыз әсерлері көлік құралдарын басқару немесе зейінді жұмылдыруды және психомоторлы реакциялардың шапшаңдығын қажет ететін қауіпті қызмет түрлерімен айналысуға теріс әсерін тигізуі мүмкін. Осы қызмет түрлерімен айналысқан кезде сақ болған жөн.

Артық дозалануы

Симптомдары: жоқ, плазмадағы метотрексаттың концентрациялары бойынша анықталады.

Емі: арнайы у қайтарғысын – қан түзу жүйесіне метотрексаттың уытты әсерін бейтараптандыратын кальций фолинатын енгізу. Метотрексаттың үлкен дозаларымен артық дозаланған жағдайда 12 сағат бойы 75 мг дозаға дейінгі кальций фолинатымен көктамырішілік инфузия, содан кейін әрбір 6 сағат сайын 4 рет 12 мг бұлшықетішілік енгізу ұсынылады. Метотрексаттың орташа дозаларының жағымсыз әсерлерін бейтараптандыру үшін әрбір 6 сағат сайын 4 рет 6-12 мг кальций фолинат бұлшықет ішіне енгізілуі мүмкін. Метотрексаттың дозасына тең немесе одан асатын дозада кальций фолинатын енгізу мүмкіндігінше баяу, дұрысы алғашқы сағат ішінде, бірақ жағымсыз әсерлер дамығаннан кейін 4 сағаттан кешіктірмей жүзеге асырылуы (әйтпесе кальций фолинаты тиімсіз болады) керек; кейінгі дозаларды қажетіне қарай, қан сарысуындағы метотрексат концентрациясына байланысты енгізеді. Бүйрек өзекшелерінде метотрексаттің және/немесе оның метаболиттерінің преципитациясына жол бермеу үшін организмді гидратациялау және несепті сілтілендіру жүргізіледі, бұл метотрексаттың шығарылуын жылдамдатады.

Интратекальді түрде енгізгенде болатын артық дозалану кезінде, артық дозалануы анықталу бойына бірден, жұлын-ми сұйықтығын тез дренаждауды қамтамасыз ету үшін люмбальді пункцияны қайталап жүргізген жөн, вентрикулолюмбальді перфузиямен нейрохирургиялық араласым жүргізілуі мүмкін. Барлық осы емшараларды қарқынды демеуші ем және кальций фолинатының үлкен дозаларын жүйелік енгізу аясында жасаған жөн. Демеуші ем шараларына қан элементтерін құю және бүйректік диализ жатады. Метотрексаттың тиімді клиренсі ағынының жылдамдығы жоғары болатын аппаратты пайдаланып жасалған жедел интермиттирлеуші диализ кезінде болуы ықтимал.

Назар аударыңыз: кальций фолинатын интратекальді түрде енгізуге болмайды!

Шығарылу түрі және қаптамасы

Резеңке тығынмен нығыздап тығындалған, алюминий немесе алюмо-пластик қалпақшамен қаусырылған бейтарап шыны құтыларда 5 мг/мл доза үшін 2 мл-ден немесе 10 мг/мл доза үшін 5 мл-ден.

Құтыға заттаңбалық немесе жазу қағазынан жасалған, немесе өздігінен желімденетін заттаңба жапсырылған.

1 құтыдан медицинада қолданылуы жөнінде мемлекеттік және орыс тілдеріндегі нұсқаулықпен бірге тұтынушылар ыдысына арналған картон қорапшаға салынған.

5 немесе 10 құтыдан медицинада қолданылуы жөнінде мемлекеттік және орыс тілдеріндегі нұсқаулықпен бірге тұтынушылар ыдысына арналған картоннан жасалған, перделері немесе арнайы ұялары бар қорапшаға салынған.

Сақтау шарттары

Жарықтан қорғалған жерде, 25 °С-ден аспайтын температурада сақтау керек

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін препаратты қолдануға болмайды.

Дәріханадан босатылу шарттары

Рецепт арқылы

Өндіруші

«ЛЭНС-Фарм» ЖШҚ, Ресей Федерациясы.

Заңды мекенжайы: 601125, Владимир обл., Петушин ауд., Вольгинский кенті, 67 корпус

Өндірістің және шағымдарды қабылдау мекенжайы: 601125, Ресей, Владимир обл., Петушин ауд., Вольгинский кенті, 95 корпус және 67 корпус, тел. (49243) 7‑17‑53

Тіркеу куәлігі иесі

«ЛЭНС-Фарм» ЖШҚ, Ресей Федерациясы

Тұтынушылардан өнім (тауар) сапасы жөніндегі шағымдарды Қазақстан Республикасы аумағында қабылдайтын ұйымның мекенжайы

«ВЕРОФАРМ» ЖШС, Қазақстан Республикасы

Алматы қ-сы, Сайын к-сі, 30 үй, 116 кеңсе

тел.: (727) 273-1634, (727) 230-09-09

 

Прикрепленные файлы

365660201477976691_ru.doc 116.5 кб
945254311477977849_kz.doc 139.5 кб

Отправить прикрепленные файлы на почту

Источники

Национальный центр экспертизы лекарственных средств, изделий медицинского назначения и медицинской техники