Бофен

• русский
• қазақша

• Скачать инструкцию медикамента

Саудалық атауы

Бофен

Халықаралық патенттелмеген атауы

Ибупрофен

Дәрілік түрі

Ішуге арналған суспензия, 100 мг/5 мл

Құрамы

1 мл суспензияның құрамында

белсенді зат – 20 мг ибупрофен (100% құрғақ затқа шаққанда),

қосымша заттар: натрий бензоаты (Е 211), глицерин, сұйық мальтит, натрий сахарині, натрий цитраты, лимон қышқылы моногидраты, натрий хлориді, полисорбат 80, ксантан шайыры, апельсин хош иістендіргіші, тазартылған су.

Сипаттамасы

Апельсинге тән иісі бар ақ немесе ақ дерлік түсті суспензия.

Фармакотерапиялық тобы

Қабынуға қарсы стероидты емес және ревматизмге қарсы дәрілер. Пропион қышқылының туындылары. Ибупрофен.

АТХ коды М01А Е01

Фармакологиялық қасиеттері

Фармакокинетикасы

Ішке қабылдағаннан кейін ибупрофен ас қорыту жолында сіңеді және аздаған уақыт аралығынан кейін әсер ете бастайды. Препараттың әсері 8 сағатқа дейін созылады.

Фармакодинамикасы

Препарат ыстықты түсіретін, қабынуға қарсы және ауыруды басатын әсер береді. Әсер ету механизмі температуралық реакциялардың, қабынудың және ауырудың медиаторлары – простагландиндер синтезінің тежелуі болып табылады.

Қолданылуы

- 3 айлықтан (дене салмағы кем дегенде 5 кг) бастап 12 жасқа дейінгі балаларда, иммунизациядан кейінгі қызбаны, жедел респираторлық вирус инфекцияларын, тұмауды қоса, шығу тегі әртүрлі қызбаны симптоматикалық емдеуде,

- бас ауырғанда, тіс ауырғанда, тамақ ауырғанда, тіс жарғанда, тісті жұлғаннан кейін, байламдар созылғанда және басқа да ауыру түрлерінде, соның ішінде генезі қабынудан болғанда.

Қолдану тәсілі және дозалары

Пероральді түрде қысқа мерзімдік қолдану үшін.

Әрбір қолдану алдында суспензияны шайқап араластырған жөн.

Дозасы нәрестенің жасына және дене салмағына байланысты. Тәуліктік дозасы нәрестенің дене салмағының әр кг шаққанда 20-30 мг құрайды. Бір реттік дозасы дене салмағының әр кг шаққанда 5-10 мг құрауы тиіс.

Ең жоғары тәуліктік дозасы дене салмағының әр кг шаққанда 30 мг-ден аспауы тиіс.

Қызбада және ауырғанда қолдану керек:

3-тен 6 айлыққа дейінгі балаларға – әрбір 8 сағат сайын 2,5 мл суспензиядан (50 мг), бірақ тәулігіне 3 реттен көп емес, тәуліктік дозасы 7,5 мл (150 мг) құрайды;

6-дан 12 айлыққа дейін – әрбір 6-8 сағат сайын 2,5 мл суспензиядан (50 мг), бірақ тәулігіне 4 реттен көп емес, тәуліктік дозасы 10 мл (200 мг) құрайды;

1 жастан 3 жасқа дейін – әрбір 8 сағат сайын 5 мл суспензиядан (100 мг), бірақ тәулігіне 3 реттен көп емес, тәуліктік дозасы 15 мл (300 мг) құрайды;

4 жастан 6 жасқа дейін – әрбір 8 сағат сайын 7,5 мл суспензиядан (150 мг), бірақ тәулігіне 3 реттен көп емес, тәуліктік дозасы – 22,5 мл-ден көп емес (450 мг);

7 жастан 9 жасқа дейін –10 мл суспензиядан (200 мг) (тәулігіне 600 мг) тәулігіне 3 рет;

10 жастан 12 жасқа дейін –15 мл суспензиядан (300 мг) (тәулігіне 900 мг) тәулігіне 3 рет.

Иммунизациядан кейінгі қызбада қолдану керек:

3-6 айлық жастағы балаларға – 2,5 мл (50 мг), қажет болғанда – 6 сағаттан кейін тағы 2,5 мл (50 мг), бірақ 24 сағат ішінде 5 мл-ден (100 мг) көп емес.

3 айлықтан 6 айлыққа дейінгі балалар үшін – егер болған симптомдар ауру басталғаннан бастап 24 сағат ішінде препаратты қабылдағаннан кейін күшейсе немесе сақталса, дереу дәрігерге қаралған жөн.

Балалар үшін 6 айлықтан бастап – емдеу ұзақтығы ауру барысына байланысты және әдетте 3 тәулікті құрайды, егер қызба 3 тәулік ішінде қайтпаса немесе симптомдар нашарласа, дәрігерге қаралу керек.

Препаратты балаларға тек 3 айлықтан бастап және дене салмағы кем дегенде 5 кг болғанда қолданған жөн. 7 жасқа дейінгі балаларға препаратты тек дәрігердің бақылауымен ғана қолдану керек.

Жағымсыз әсерлері

Жағымсыз әсерлері, симптомдарды бақылау үшін қажетті ең қысқа мерзім ішінде тиімді ең төмен дозаны пайдалана отырып, барынша азайтылуы мүмкін.

Жиі емес (  1/1000-нан  1/100 дейін)

- аса жоғары сезімталдық реакциялары, соның ішінде әртүрлі тері бөртпелері (соның ішінде папулездік), есекжем және қышыну

- жүректің айнуы, жайсыздық сезімі немесе эпигастрия тұсында ауыру, диспепсия

Сирек (  1/10000-нан  1/1000 дейін)

- құсу, метеоризм, диарея, іш қату, тәбеттің өзгеруі (соның ішінде анорексия), ауыздың кеберсуі, қыжыл, глоссит, эзофагит, гастрит, дуоденит

- бас ауыру, бас айналу, ұйқысыздық, ұйқышылдық, эмоциональді құбылмалылық, ашушаңдық, күйгелектік, үрейленушілік, дімкәстік, шаршау

- құлақтың шуылдауы

Өте сирек (> 1/10 000)

- беттің, тілдің, көмейдің ісінуін қоса, анафилактоидтық/анафилаксиялық реакциялар, ентігумен Квинке ісінуі, тахикардия, артериялық гипотензиямен бірге, анафилаксиялық шок

- бронх демікпесі, бронх демікпесі симптомдарының өршуі, бронхтың түйілуі

- эксфолиативтік және буллездік дерматиттер (Стивенс-Джонсон синдромын, полиморфты эритеманы және уытты эпидермальді некролизді қоса)

- психомоторлық қозу

- естудің бұзылуы, естуден айырылу, вертиго

- конъюнктивит, көздің шырышты қабығының құрғауы

-  желке бұлшықетінің сіресуімен, бас ауырумен, жүректің айнуымен, құсумен, қызбамен, бағдардан адасумен бірге – әдетте аутоиммундық аурулары (жүйелік қызыл жегі, дәнекер тінінің диффуздық аурулары сияқты) бар пациенттерде асептикалық менингит

- асқазан-ішек жолының эрозивті-ойық жаралы зақымданулары (соның ішінде ойық жаралы стоматит, асқазанның ойық жарасы), тесілулер немесе асқазан-ішектік қан кетулер (соның ішінде ректальді қан кету), мелена, гематемезис, кейде өліммен аяқталатын, ойық жаралы колиттің өршуі және Крон ауруы

- бауыр функциясының бұзылуы, әсіресе ұзақ қолданғанда, гепатит, сарғаю, гепато-ренальді синдром, гепатонекроз, бауыр функциясының бұзылуы түрінде

- панкреатит

- цистит, дизурия, гиперкалиемияның, гиперурикемияның, азотемияның дамуымен, креатинин клиренсінің төмендеуімен болатын бүйрек функциясының бұзылуы, олигурия/полиурия, ісінулер, бүйрек функциясының жедел жеткліксіздігі (әсіресе бұрыннан бүйрек функциясының елеулі бұзылулары бар пациенттерде), тубулярлық некроз, папиллярлық некроз (әсіресе ұзақ қолданған кезде қан сарысуындағы мочевина деңгейінің жоғарылауымен астасқан), әртүрлі формадағы уытты нефропатия, соның ішінде интерстициальді нефрит, гломерулонефрит, нефриттік синдром, нефроздық синдром, гематурия, протеинурия

- қан түзудің бұзылуы (анемия, соның ішінде гемолиздік, апластикалық анемия, гематокриттің және гемоглобин деңгейінің төмендеуі, лейкопения, пурпуралы/онсыз тромбоцитопения, пурпура, панцитопения, нейтропения, агранулоцитоз, эозинофилия), көгерулер, тромбоциттердің қайтымды агрегациясы, өкпелік эозинофилия. Алғашқы белгілері: қызба, тамақтың ауыруы, ауыз қуысының шырышты қабығының эрозиялары, тұмау тәрізді симптомдар, қатты қажудың сезілуі, қан кетулер, соның ішінде мұрыннан, экхимоздар, меноррагиялар. Ибупрофенмен ұзақ емделген кезде қан көрінісін бақылаған жөн.

Жиілігі белгісіз (қолда бар деректермен баға беру мүмкін емес)

- спецификалық емес аллергиялық реакциялар

- фотосенсибилизация, алопеция, терінің түлеуі, тершеңдіктің ұлғаюы

- көру жүйкесінің уытты невриті, көздің анық көрмеуі, көрудің нашарлауы, скотома, уыттық амблиопия, диплопия, түрлі түсті қабылдаудың өзгеруі

- депрессия, сананың шатасуы, елестеулер

- құрысулар, парестезиялар, цереброваскулярлық асқынулар, кома

- ауыр терілік инфекциялар және желшешек кезінде жұмсақ тіндер тарапынан асқынулар

- сұйықтықтың іркілуі, ісінулер, артериялық гипотензия/гипертензия, жүректің қағуы, аритмиялар (соның ішінде синустық тахикардия/брадикардия), жүрек функциясының жеткіліксіздігі, әдетте жүрек функциясы бұзылған пациенттерде. Клиникалық зерттеулер және эпидемиологиялық деректер ибупрофенді, әсіресе жоғары дозаларда (тәулігіне 2400 мг) қолдану және ұзақ мерзімдік емде артериялық тромбоз қаупінің аздаған жоғарылауымен және оның салдарымен (мысалы, миокард инфарктісі немесе инсульт) байланысты болуы мүмкін екендігін көрсетеді.

- эндокриндік жүйеде және метаболизмде өзгерулер, тыныстың тарылуы, апноэ, өкпенің кардиогендік емес ісінуі, пневмония, альвеолит, ринит.

Бофенді қабылдауды кез келген жағымсыз реакция пайда болған кезде тоқтатқан және дәрігерге дереу қаралған жөн.

Қолдануға болмайтын жағдайлар

- ибупрофенге немесе препараттың басқа компоненттеріне жоғары сезімталдық

- ацетилсалицил қышқылына немесе қабынуға қарсы стероидты емес басқа препараттарға жоғары сезімталдық

- басқа ҚҚСД-мен, соның ішінде циклооксигеназа-2 селективті тежегіштерімен бір мезгілде қолдану

- асқазанның ойық жара ауруы/ белсенді түрде қан кету немесе қайталанудың анамнезде болуы (ойық жара ауруының немесе қан кетудің екі және одан көбірек айқын көріністері)

- аса жоғары сезімталдық реакциялары (мысалы, демікпе, ринит, ангионевроздық ісіну немесе есекжем), олар ибупрофенді, ацетилсалицил қышқылын (аспиринді) немесе басқа да ҚҚСД қолданғаннан кейін ертерек байқалды

- қан түзудің немесе қанның ұюының бұзылулары

- цереброваскулярлық немесе басқа да қан кетулер

- анамнезде бұған дейін ҚҚСД емдеумен байланысты, асқазан-ішектік қан кетулер/тесілулер

- бауыр, бүйрек функцияларының ауыр бұзылуы; жүрек функциясының жеткіліксіздігі;

- естудің нашарлауы

- тұқым қуалайтын фруктоза жақпаушылығы

- жүктіліктің III триместрі

- 3 айлыққа дейінгі балалар

Дәрілермен өзара әрекеттесуі

Ибупрофенді, басқа да ҚҚСД сияқты, мыналармен біріктіріп қолданбаған жөн:

аспиринмен: дәрігер аспирин (тәулігіне 75 мг-ден аспайтын дозада) тағайындаған жағдайлардан басқасында, жағымсыз реакциялардың пайда болу қаупін арттыруы мүмкін болғандықтан.

Сульфонилмочевина препараттарымен және фенитоинмен: әсері күшеюі мүмкін.

Антикоагулянттармен: ҚҚСД варфарин сияқты антикоагулянттардың емдік әсерін арттыруы мүмкін.

Литиймен: осы препараттардың бүйректік экскрециясының төмендеуіне байланысты қан плазмасындағы олардың деңгейі жоғарылауы мүмкін.

Метотрексатпен: метотрексаттың өзекшелік секрециясы азаюы мүмкін, сондықтан оның қандағы концентрациясы және гематоуыттылығы артады.

Циклоспорин: нефроуыттылық қаупі ұлғаяды.

Гипертензияға қарсы препараттармен (АӨФ тежегіштері және ангиотензин II антагонистері) және диуретиктермен: олардың әсері бәсеңдеуі мүмкін. Бүйрек функциясы бұзылған кейбір пациенттерде (мысалы, сусызданған немесе бүйрек функциясы әлсіз егде жастағы пациенттерде) АӨФ тежегіштерін немесе ангиотензин II антагонистерін, және циклооксигеназаны тежейтін препараттарды бір мезгілде қолдану бүйрек функциясының ықтимал жедел жеткіліксіздігін қоса, бүйрек функциясның әрі қарай нашарлауына әкеп соғуы мүмкін, ол әдетте қайтымды сипатқа ие. Сондықтан мұндай біріктірілімдерді, әсіресе егде жастағы пациенттерде, сақтықпен тағайындаған жөн. Ұзақ емдеу қажет болған кезде пациентке адекватты ем жүргізген және біріктірілген емнің бас кезінде, содан кейін әрі қарай белгілі бір мерзіммен бүйрек функциясына мониторинг жүргізу жөніндегі мәселені қарастырған жөн. Диуретиктер ҚҚСД-нің нефроуытты әсер ету қаупін арттыруы мүмкін.

Кортикостероидтармен (соның ішінде глюкокортикоидтармен): жағымсыз реакциялардың пайда болу, әсіресе асқазан-ішектік ойық жараның түзілу және қан кетулер қаупін арттыруы мүмкін.

Жүрек гликозидтерімен (соның ішінде дигоксинмен): жүрек функциясының жеткіліксіздігін өршітуі, шумақтық сүзілу жылдамдығын төмендетуі және қан плазмасында гликозидтер деңгейін арттыруы мүмкін.

Антитромбоцитарлық дәрілермен және серотониннің селективті тежегіштерімен: асқазан-ішектік қан кетулердің пайда болу қаупі ұлғаюы мүмкін.

Кальциневрин тежегіштерімен (циклоспоринмен, такролимуспен): ҚҚСД осы препараттардың нефроуыттылығын бүйрек простагландиндеріне ықпал ету арқылы арттырады.

Мифепристонмен: мифепристонды қолданғаннан кейін 8-12 күн ішінде ҚҚСД қабылдамаған жөн, бұл соңғысының әсер етуінің азаюына әкелуі мүмкін.

Зидовудинмен: зидовудинмен және ибупрофенмен емді қатар қолданып жүрген, АИТВ жұқтырған пациенттерде гемартроздар және гематомалар қаупі жоғарылайды.

Хинолонды антибиотиктермен: құрысулардың пайда болу қаупі ұлғаюы мүмкін.

Пробенецидпен, сульфинпиразонмен: ибупрофенмен бір мезгілде қолдану соңғысының организмнен шығарылуын кідіртуі мүмкін.

Аминогликозидтермен: ҚҚСД аминогликозидтердің шығарылуын азайтуы мүмкін.

Холестираминмен: бір мезгілде тағайындаған кезде асқазан-ішек жолында ибупрофеннің сіңуін азайтуы мүмкін. Клиникалық маңыздылығы белгісіз.

Антидепресанттармен, клопидогрелмен, прасугрелмен, гепаринмен, пентоксифиллинмен, дәрілік шөптердің (мысалы, Гинкго билоба) экстрактілерімен: ҚҚСД-мен, соның ішінде ибупрофенмен бірге қолданғанда қан кетулер қаупі ұлғаюы мүмкін.

CYP2C9 тежегіштері: фармакокинетикалық өзара әрекеттесулер болуы мүмкін: ибупрофеннің (CYP2C9 субстраты) әсер ету уақыты (экспозициясы) артады. Күшті CYP2C9 тежегіштерімен (вориконазол, флуконазол сияқты) бір уақытта қолданғанда, әсіресе ибупрофеннің жоғары дозаларында ибупрофеннің дозасын азайту керектігін ескерген жөн.

Алискиренмен, α-адреноблокаторлармен, β-адреноблокаторлармен, кальций өзектерінің блокаторларымен, клонидинмен, метилдопамен, нитраттармен: ҚҚСД олардың гипотензиялық әсеріне қарсы әсер береді.

Айрықша нұсқаулар

Препаратты қолдануды бастар алдында дәрігерден кеңес алған жөн!

Жағымсыз реакциялар қаупін азайту үшін ауру симптомдарын жою үшін қажетті ең аз мерзім ішінде тиімді ең төмен дозаны қолдану керек.

Ибупрофен инфекциялардың белгілерін бүркемелеуі мүмкін.

Желшешекте, терінің ауыр инфекциялық зақымдануы және жұмсақ тін тарапынан асқынулардың мүмкін екендігіне байланысты, ибупрофенді қолдануға жол бермеу ұсынылады.

ҚҚСД, соның ішінде ибупрофенді қолдану, бронх демікпесінен, тыныс жолдарының созылмалы обстукциялық ауруларынан, аллергиялық аурулардан зардап шегіп жүрген немесе осы аурулардың бұған дейінгі тарихы бар пациенттерде бронх демікпесін, демікпе ұстамаларын, мұрынның шырышты қабығының ісінуін өршітуі мүмкін. Ауыр жедел аса жоғары сезімталдық реакциялары, соның ішінде анафилаксиялық шок сирек байқалды. Аса жоғары сезімталдық реакцияларының алғашқы белгілерінде Бофен препаратын қолдануды тоқтатқан жөн.

Мына адамдарға ибупрофенді қолданған кезде сақтық таныту қажет:

• аса жоғары сезімталдық реакциялары көрінісі сияқты жүйелік қызыл жегісі және дәнекер тінінің басқа да диффуздық аурулары бар асептикалық менингиттің жоғары даму қаупіне байланысты. Асептикалық менингит осындай созылмалы аурулары болмаған пациенттерде де байқалды;

• аса жоғары сезімталдық реакцияларының туындау қаупінің жоғары қаупіне байланысты, асқынған аллергологиялық анамнезі бар адамдарда;

• бауыр дисфункциясы бар адамдарда – бауыр функциясы бұзылғанда артериялық қысымның жоғарылауы және/немесе жүрек функциясының жеткіліксіздігі өршуі мүмкін және/немесе организмде сұйықтықтың іркілуі пайда болуы мүмкін.

Анамнезінде артериялық гипретензиясы және/немесе жүрек функциясының іркілген бірқалыпты, немесе орташа жеткіліксіздігі бар пациенттерде ұзақ емдеуді сақтықпен бастаған жөн (дәрігердің кеңесі қажет), өйткені ибупрофенмен емдеген кезде, басқа ҚҚСД сияқты, сұйықтықтың іркілу, артериялық гипертензия және ісіну жағдайлары жөнінде мәлімделді.

Бақыланбайтын артериялық гипертензиясы, жүрек функциясының іркілген жеткіліксіздігі, жүректің тұрақты ишемиялық ауруы, шеткері артериялардың аурулары және/немесе цереброваскулярлық патологиясы бар пациенттерге ибупрофенді пайда/қаупі арақатынасын мұқият талдағаннан кейін ғана тағайындайды.

Ибупрофенді, әсіресе жоғары дозаларда (тәулігіне 2400 мг), қолдану, сондай-ақ ұзақ емдеу артериялық тромбоздық асқынулар (мысалы, миокард инфарктісі немесе инсульт) қаупінің аздап ұлғаюына әкелуі мүмкін. Жүрек-қантамыр асқынулары қаупінің (артериялық гипертензия, гиперлипидемия, қант диабеті, шылым шегу сияқты) айқын факторлары бар пациенттерге ҚҚСД ұзақ емдеуді тек мұқият қарастырылғаннан кейін ғана тағайындаған жөн.

Асқазан-ішектік қан кету, тесілу, ойық жаралар қаупі анамнезінде ойық жарасы бар пациенттерде ҚҚСД дозаларын арттырған кезде, әсіресе олар, егер қан кетумен немесе тесілумен асқынса, және егде жастағы пациенттерде ұлғаяды. Бұл пациенттер емдеуді өте аз дозалардан бастауы тиіс. Гастроуыттылық немесе қан кетулер қаупін арттыруы мүмкін пероральді кортикостероидтар немесе антикоагулянттар (мысалы, варфарин) немесе антитромбоцитарлық дәрілер (мысалы, аспирин) сияқты препараттарды қатар қабылдап жүрген пациенттерді емдеген кезде сақтық танытқан жөн. Осы пациенттерді, сондай-ақ ацетилсалицил қышқылының (аспириннің) төмен дозаларын немесе асқазан-ішек жолы үшін қауіпті арттыруы мүмкін басқа да дәрілік заттарды қатар қолдануды керек ететін пациенттерді ұзақ емдегенде дәрігер мизопростолмен немесе протонды помпа тежегіштерімен біріктірілген ем тағайындауды қарастырғаны жөн. Анамнезінде асқазан-ішек бұзылыстары бар пациенттерге, әсіресе егде жастағы пациенттерге асқазан-ішек жолы тарапынан кез келген әдеттен тыс симптомдар (көбіне қан кету) жөнінде, әсіресе емнің бас кезінде болатын асқазан-ішектік қан кету жөнінде мәлімдеген жөн. Ибупрофен қабылдап жүрген пациенттерде асқазан-ішектік қан кетулер немесе ойық жара болғанда емдеуді дереу тоқтату керек.

Ибупрофен, басқа да ҚҚСД сияқты, дені сау адамдарда тромбоциттердің агрегациясына ықпалын тигізуі және қан кету уақытын ұзартуы мүмкін.

Ибупрофенді сусыздану дәрежесі едәуір болатын пациенттерге сақтықпен қолданған жөн, өйткені бүйрек функциясының бұзылу және бүйрек функциясы жеткіліксіздігінің даму қаупі бар.

ҚҚСД қабылдау нефроуыттылыққа, простагландиндер синтезінің дозаға байланысты төмендеуіне әкелуі және бүйректегі қан айналымы бұзылғандықтан, бүйрек функциясы жеткіліксіздігінің дамуын өршітуі мүмкін. Мұндай пациенттерде бүйрек функциясын бақылау қажет. ҚҚСД-мен емдеуді тоқтатқаннан кейін бүйрек функциясы әдетте қалпына келеді.

ҚҚСД қолданғанда эксфолиативтік дерматитті, Стивенс-Джонсон синдромын, уытты эпидермальді некролизті қоса, күрделі тері реакциялары, кейбіреулерінің өліммен аяқталғаны жөнінде өте сирек мәлімделді. Көптеген жағдайларда осы реакциялар емдеудің алғашқы айында пайда болды. Тері бөртпелері, шырышты қабықтардың зақымдану алғаш білінгенде немесе аса жоғары сезімталдықтың кез келген алғашқы белгілерінде Бофенді қабылдауды тоқтату қажет.

Ұсынылған дозаларды арттырмаған жөн.

Жүктілік және лактация кезеңі

Препаратты дене салмағы кем дегенде 5 кг болатын 3 айлық балалар мен 12 жасқа дейінгі балаларға ғана қолдану керек.

ҚҚСД, соның ішінде ибупрофенді қолданған кезде простагландиндер синтезінің бәсеңдеуі жүктілік барысына және/немесе ұрық/шарананың дамуына жағымсыз ықпалын тигізуі мүмкін. Эпидемиологиялық зерттеу деректері жүктіліктің ерте мерзімдерінде простагландиндер синтезінің тежегіштерін қолданған кезде түсік тастау, жүрек-қантамыр жүйесі дамуының туа біткен кемістіктері және гастрошизис дамуының жоғары қаупін көрсетеді. Жүрек-қантамыр жүйесі ақауларының абсолюттік қаупі 1%-дан аздан 1,5%-ға дейін ұлғаяды. Қауіп дозаның артуымен және емдеудің ұзаққа созылуымен ұлғаяды деп есептеледі. Препарат жүктіліктің І және ІІ триместрлерінде немесе босану кезінде, егер ана үшін күтілетін пайдасы шарана үшін потенциалды қаупінен едәуір басым болған жағдайда ғана, қолданылуы мүмкін.

Жүктіліктің ІІІ триместрі ішінде простагландиндер синтезінің кез келген тежегіштерін қолданған кезде шаранаға келесі әсерлері болуы мүмкін:

- жүрек-өкпе уыттылығы (шарананың артериялық түтігінің мезгілінен ерте жабылуымен және өкпелік гипертензиямен);

- бүйрек функциясының бұзылуы, ол олигогидроамниоздың дамуымен бүйрек функциясының жеткіліксіздігіне дейін өршуі мүмкін.

Сондай-ақ жүктіліктің соңында ибупрофенді қолдану мыналары туындатуы мүмкін:

- қан кету уақытының ұзаруы, агрегацияға қарсы әсері, ол тіпті өте төмен дозаларда да ана мен нәрестеде қан кету қаупінің жоғарылауымен бірге туындауы мүмкін;

- жатырдың жиырылғыштық функциясының бәсеңдеуі, ол босану ұзақтығының кідіруіне немесе артуына әкелуі мүмкін.

Сондықтан ибупрофенді жүктіліктің ІІІ триместрінде қолдануға болмайды.

Шектеулі зерттеулердің нәтижелері бойынша, емшек сүтіне ибупрофеннің аздаған мөлшері өтетіні байқалды. Препаратты емшек емізу кезеңінде қолдану ұсынылмайды.

Көлік құралын немесе потенциалды қауіпті механизмдерді басқару қабілетіне дәрілік заттың ықпал ету ерекшеліктері

Препаратты тек 12 жасқа дейінгі балаларға ғана қолдану керек.

Артық дозалануы

Балаларға дене салмағының әр кг шаққанда 400 мг-ден жоғары дозада қолдану уыттану симптомдарын туындатуы мүмкін. Артық дозаланғандағы жартылай шығарылу кезеңі 1,5-3 сағатты құрайды.

Симптомдары: қабылданған препараттың мөлшеріне және қабылдағаннан кейін өткен уақытқа байланысты, бірақ жекелей ракцияларды жоққа шығаруға болмайды. Көптеген жағдайларда – іштің ауыруы, жүректің айнуы, құсу, іш өту. Құлақ ішінің шуылдауы, әлсіздік, ұйқышылдық, бас ауыру және асқазан-ішектік қан кетулер болуы мүмкін.

Өте күрделі улануларда бас айналу, мәңгіру, тыныстың бәсеңдеуі/апноэ, цианоз, ентігу, нистагм, көрудің нашарлауы, кейде қозу, құрысулар, бағдардан адасу, есінен айырылу, кома сияқты нейроуыттылық симптомдар байқалады.

Ауыр улануларда – елеулі артериялық гипотензия, брадикардия/тахикардия, жүрекшелердің фибрилляциясы, гиперкалиемия, метаболизмдік ацидоз, протромбин уақыты ұзаруы мүмкін, бүйрек функциясының жедел жеткіліксіздігі, бауырдың зақымдануы. Бронх демікпесі бар науқастарда демікпе симптомдары өршуі мүмкін.

Емі: симптоматикалық және демеуші болуы тиіс, сондай-ақ тыныс алу жолдарының өткізгіштігін қамтамасыз ету керек. Асқазанды шаю (қабылдағаннан кейін 1 сағат ішінде ғана), белсендірілген көмір, сілтілік сусын, қарқындатылған диурез ұсынылады. Бұлшықеттердің жиі немесе ұзаққа созылған түйілулерінде диазепам немесе лоразепам енгізген жөн. Бронх демікпесінде бронходилататорларды қолдану керек. Пациенттің жағдайын тұрақтандыру үшін жүрек қызметінің көрсеткіштеріне және өмір сүрудің негізгі көрсеткіштеріне мониторинг жүргізу қажет. Гемодиализ тиімді емес.

Шығарылу түрі және қаптамасы

Алғаш ашылғаны бақыланатын қақпағы бар жиынтықтағы полимерлі банкіде немесе полимерлі құтыда 100 мл препараттан. Банкіге немесе құтыға полиграфиялық тәсілмен дайындалған мөрі бар заттаңба жапсырылған. Банкі немесе құты препараттың медициналық қолдану жөніндегі мемлекеттік және орыс тілдеріндегі нұсқаулығымен және дозалайтын қасығымен бірге картон қорапшаға салынған.

Алғаш ашылғаны бақыланатын қақпағы бар шыны құтыда 100 мл препараттан. Құтыға полиграфиялық тәсілмен дайындалған мөрі бар заттаңба жапсырылған. Құты препараттың медициналық қолдану жөніндегі мемлекеттік және орыс тілдеріндегі нұсқаулығымен және дозалайтын қасығымен бірге картон қорапшаға салынған.

Сақтау шарттары

Түпнұсқалық қаптамасында, 25оС-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл.

Құты ашылғаннан кейін препаратты сақтау мерзімі 25°С-ден аспайтын температурадада 30 тәулік.

Қаптамасында көрсетілген жарамдылық мерзімі өткеннен кейін қолдануға болмайды!

Дәріханалардан босатылу шарттары

Рецептісіз

Өндіруші

«“Борщагов химия-фармацевтикалық зауыты” ғылыми-өндірістік орталығы» жариялық акционерлік қоғамы,

03134, Украина, Киев қ-сы, Мир к-сі 17.

Тіркеу куәлігінің иесі

«“Борщагов химия-фармацевтикалық зауыты” ғылыми-өндірістік орталығы» жариялық акционерлік қоғамы, Украина

Тұтынушылардан өнім сапасы жөніндегі шағымдарды Қазақстан Республикасы аумағында қабылдайтын ұйымның мекенжайы

Қазақстан Республикасындағы аумағындағы «Борщагов ХФЗ» ЖАҚ өкілдігі

050063, Алматы қ., Әуезов ауданы, «Жетісу-3» ы/а, 25 үй, 27 кеңсе

Факс: +7(272) 313-23-34;

E-mail: vadimt58@list.ru

Тіркеуден кейін дәрілік заттың қауіпсіздігін бақылауға жауапты ұйымның мекенжайы

Қазақстан Республикасындағы аумағындағы «Борщагов ХФЗ» ЖАҚ өкілдігі

050063, Алматы қ., Әуезов ауданы, «Жетісу-3» ы/а, 25 үй, 27 кеңсе

Факс: +7(272) 313-23-34

E-mail: vadimt58@list.ru