Берлиприл 5 (Enalapril)

Берлиприл 5

Эналаприл

Дәрілік түрі, дозасы

Таблеткалар, 5 мг

Жүрек-қантамыр жүйесі. Ренин-ангиотензин жүйесіне әсер ететін препараттар. Ангиотензин өзгертуші фермент (АӨФ) тежегіштері, қарапайымдар. Ангиотензин өзгертуші фермент (АӨФ) тежегіштері, қарапайымдар. Эналаприл

АТХ коды C09AA02.

Берлиприл 5 аурулары мен жай-күйлеріне байланысты ересектер мен балаларды емдеуге көрсетілген (төменнен және «Дозалау режимі» бөлімінен қараңыз):

• артериялық гипертензияны емдеу
• симптомдары болатын жүрек жеткіліксіздігін емдеу
• сол жақ қарыншаның симптомсыз дисфункциясы бар (сол жақ қарыншаның лықсыту фракциясы (СҚЛФ) ≤35%) пациенттерде симптомдары болатын жүрек жеткіліксіздігінің профилактикасы.

Егде жастағы адамдарда, бүйрек функциясының бұзылуы бар немесе диуретиктер қабылдайтын пациенттерде доза бүйрек функциясына сәйкес таңдалуы тиіс.

Берлиприл 5, осы жас тобында деректерінің болмауына орай, жаңа туған нәрестелерге және шумақтық сүзілу дәрежесі < 30 мл/мин/1,73 м2 педиатриялық пациенттерге ұсынылмайды.

Жүктіліктің бірінші триместрінде АӨФ тежегіштерін пайдалану ұсынылмайды, ал екінші және үшінші триместрлерде қарсы көрсетілімді.

Берлиприл 5 шала туған нәрестелерге немесе босанудан кейінгі алғашқы бірнеше аптада бала емізу кезінде қолдануға ұсынылмайды.

Қолданудың басталуына дейін қажетті мәліметтер тізбесі

- белсенді затқа, құрамы бөлімінде тізбеленген қосымша заттардың кез келгеніне немесе ангиотензин өзгертуші ферменттің (АӨФ) кез келген басқа тежегіштеріне аса жоғары сезімталдық

- галактоза жеткіліксіздігінің, Lapp лактаза тапшылығының немесе глюкоза-галактоза мальабсорбциясының сирек тұқым қуалайтын аурулары бар пациенттер

- осының алдында АӨФ тежегіштерімен емдеуге байланысты ангионевроздық ісінудің анамнезде болуы

- тұқым қуалайтын немесе идиопатиялық ангионевроздық ісіну

- қант диабеті және бүйрек функциясының бұзылуы бар пациенттерде (креатинин клиренсі < 60 мл/мин/1,73 м2) Берлиприл® препаратын және құрамында алискирен бар өнімдерді бірге қабылдау қарсы көрсетілімді

- жүктіліктің 2 және 3 триместрлері

- лактация кезеңі

- сакубитрил/валсартанмен бір мезгілде қабылдау: Берлиприл® препаратын соңғы қабылданған сакубитрил/валсартан дозасынан кейін 36 сағаттан ерте бастауға болмайды

Қолдану кезіндегі қажетті сақтандыру шаралары

Симптоматикалық артериялық гипотония

Асқынбаған артериялық гипертензияда артериялық гипотония сирек байқалады.

Организмде, мысалы, диуретиктермен емдеу, тұзы барынша азайтылған тамақтану, диализ, іш өту немесе құсу салдарынан болатын сұйықтық жетіспеуінде («Дәрілермен өзара әрекеттесуі» және «Жағымсыз реакциялар» бөлімдерін қараңыз) артериялық гипертензиядан зардап шегіп жүрген пациенттерде Берлиприл® препаратымен емдеу кезінде симптоматикалық артериялық гипотония жиірек дамиды. Бүйрек жеткіліксіздігімен қатар жүретін немесе онсыз жүрек жеткіліксіздігі бар пациенттерде симптоматикалық артериялық гипотония байқалды. Атап айтқанда, бұл ілмектік диуретиктердің қабылдап жүрген жоғары дозаларынан, гипонатриемия немесе бүйрек функциясының төмендеуінен ауруының ауырлық дәрежесі көрініс беретін жүрек жеткіліксіздігі ауыр пациенттерге қатысты болуы мүмкін. Осындай пациенттерді емдеуді – егер Берлиприл® препаратының және/немесе диуретиктің жаңа дозасын таңдауға тура келсе – дәрігердің бақылауымен бастау және жүргізу қажет. Осыған ұқсас нұсқауларды артериялық қысымның шамадан тыс төмендеуі миокард инфарктісіне немесе ми қан айналымының жедел бұзылуына әкелуі мүмкін ишемиялық жүрек ауруы немесе ми тамырларының патологиясы бар пациенттерге қатысты қолдануға болады.

Артериялық гипотония дамыған жағдайда пациентті жату қалпына көшіру және егер қажет болса, натрий хлориді ерітіндісінің венаішілік инфузиясын жасау керек. Өтпелі гипотониялық реакция, әдетте, артериялық қысымды қалыпқа түсіруден кейін (айналымдағы қан көлемін толықтыру көмегімен) кедергісіз жүргізуге болатын әріқарай емдеуге қарсы көрсетілімді емес.

Артериялық қысымы қалыпты немесе төмен болатын жүрек жеткіліксіздігінен зардап шегіп жүрген кейбір пациенттерде Берлиприл® препаратының ықпал етуімен жүйелі артериялық қысымның одан әрі төмендеу орын алуы мүмкін. Осындай әсері күтілетін сипатта болады, ал әдетте, ол емдеуді тоқтатуға себеп болмайды. Егер артериялық гипотензия симптомдық бола бастаса, Берлиприл® препаратының және/немесе диуретик дозасын төмендету және/немесе препаратты тоқтату қажеттілігі туындауы мүмкін.

Басқа вазодилататорлар жағдайындағы сияқты, сол жақ қарыншасында клапандарының және шығару жолы аумағының обструкциясы орын алатын пациенттерде АӨФ тежегіштерін қолдану кезінде ерекше сақтануға кеңес беріледі; кардиогенді шок және шығару жолы аумағындағы елеулі гемодинамикалық кедергі кезінде осы препараттарды қолданылмау керек.

Бүйрек функциясы төмендеген пациенттерде (креатинин клиренсі < 80 мл/мин) эналаприл малеатының бастапқы дозасын пациенттің креатинин клиренсіне байланысты таңдау керек. Демеуші доза пациенттің емдеуге реакциясына қарай таңдалады. Осындай пациенттерде калий мен сарысу креатининін бақылау оларды әдеттегі медициналық қадағалау шеңберінде дағдылы ағымда болады.

Атап айтқанда, ауыр жүрек жеткіліксіздігі немесе осы патология негізінде жатқан, бүйрек артерияларының стенозын қоса, бүйрек аурулары бар пациенттерде эналаприл малеатын қолданумен өзара байланысты бүйрек жеткіліксіздігі хабарланды. Эналаприл малеатымен емдеу кезіндегі бүйрек жеткіліксіздігі, диагнозы дер мезгілінде қойылса және тиісті емдеу жүргізілсе, әдетте, қайтымды сипатта болады.

Бүйректің айқын патологиясынсыз артериялық гипертензиядан зардап шегіп жүрген кейбір пациенттерде эналаприл малеатының диуретикпен біріктірілімі сарысудағы креатинин мен мочевина деңгейінің жоғарылауына әкелуі мүмкін. Бұл жағдайда эналаприл малеатының дозасын төмендету және/немесе диуретикті тоқтату қажет болуы мүмкін. Осындай пациенттерде бірінші кезекте бүйрек артериясының стенозын жоққа шығару қажет («Реноваскулярлық гипертензия» қосалқы бөлімін қараңыз).

Бүйрек артерияларының екі жақты стенозы немесе жалғыз жұмыс істейтін бүйректің бүйректік артерия стенозы бар пациенттерді АӨФ тежегіштерімен емдеу артериялық қысымды түсіретін немесе бүйрек жеткіліксіздігін дамытатын ерекше қауіп төндіреді. Бұл ретте сарысу креатинині көрсеткіштерінің жеңіл ғана өзгерістерімен жиі көрініс беретін бүйрек функциясының жоғалуы болуы мүмкін. Осындай пациенттерге препарат тұрақты медициналық қадағалаумен және төмен дозада тағайындалады, одан кейін бүйрек функциясын бақылай отырып, абайлап арттырады.

Берлиприл® препаратын таяуда бүйрек трансплантациясы жасалған пациенттерде қолдану тәжірибесі жоқ. Сондықтан осындай пациенттерді Берлиприл® препаратымен емдеу ұсынылмайды.

Сирек жағдайларда АӨФ тежегіштерін қолдану холестаздық сарғаю немесе гепатиттен басталған және күрт дамитын бауыр некрозымен және (кейде) өліммен аяқталған синдроммен қатар жүрді. Осы синдром патогенезі белгісіз. АӨФ тежегіштерімен емдеу аясында сарғаю дамитын немесе бауыр ферменттерінің деңгейі едәуір артатын пациенттерге АӨФ тежегіштерін тоқтатып, тиісті емдеуді тағайындау қажет.

Нейтропения/агранулоцитоз

АӨФ тежегіштерін қабылдайтын пациенттерде нейтропения/ агранулоцитоз, тромбоцитопения және анемия дамуы хабарланды. Қалыпты бүйрек функциясында және түрткі болатын басқа факторлар болмағанда нейтропения сирек туындайды. Эналаприл малеаты, әсіресе, осының алдындағы бүйрек функциясының бұзылуы бар пациенттерде иммунодепрессанттар, аллопуринол немесе прокаинамидпен емдегенде немесе жоғарыда аталған факторлар бірігуінде коллагеноздар аясында тамырлар зақымдануы бар пациенттерге сақтықпен тағайындалу керек. Осы пациенттердің кейбіреуінде ауыр инфекциялық аурулар пайда болды, оларға кейбір жағдайларда антибиотиктермен қарқынды ем дарымады. Емдеу кезінде осындай пациенттерде лейкоциттік формула мезгіл-мезгіл тексеріледі; осы орайда пациенттердің бәріне инфекцияның кез келген белгілері туралы дәрігерге хабарлауға кеңес беріледі.

АӨФ тежегіштерімен, атап айтқанда, Берлиприл® препаратымен емдеу кезінде бет, аяқ-қол, ерін, тіл, көмекей және/немесе көмейдің ангионевроздық ісінуінің дамуы хабарланды. Осындай ісіну емдеу аясында кез келген сәтте дамуы мүмкін. Бұл жағдайда Берлиприл® препаратын қабылдауды дереу тоқтатып, ал пациентті барлық симптомдар толық басылғанша медициналық қадағалауда ұстау керек. Тіпті егер қатарлас тыныс алу жеткіліксіздігінсіз ангионевроздық ісіну тек тілді зақымдаса да, антигистаминдік дәрілермен және кортикостероидтармен емдеу жеткіліксіз болуы мүмкін екендіктен пациенттің жай-күйін ұзақ уақыт қадағалау қажет.

Сирек жағдайларда көмей немесе тілдің ангионевроздық ісінуімен байланысты пациенттердің өлімі туралы хабарланды. Тіл, көмекей немесе көмей ісінуінде, әсіресе, тыныс жолдарына операция жасалған пациенттерде тыныс жолдары обструкциясының қаупі жоғары. Егер тілді, дауыс саңылауын немесе көмейді ісіну жайласа және тыныс жолдарының обструкциясын тудыруы мүмкін болса, шұғыл талапқа сай емделуді бастау керек, ем өзінде 1: 1000 (0,3-0,5 мл) эпинефрин ерітіндісін тері астына енгізуді және (немесе) тыныс жолдарының өткізгіштігін қамтамасыз ету шараларын қабылдауды қамтуы мүмкін.

Қара нәсіл өкілдерінде, АӨФ тежегіштерін алған қалған пациенттермен салыстырғанда, ангионевроздық ісінудің өте жиі жағдайлары болды.

Анамнезінде басқа этиологиядағы ангионевроздық ісіну болған пациенттер АӨФ тежегіштері тағайындалғанда осы асқыну бойынша жоғары қауіп тобына түседі.

Ангионевроздық ісінудің жоғары қаупіне орай, АӨФ тежегіштерін сакубитрил/валсартанмен бір мезгілде қабылдау қарсы көрсетілімді. Сакубитрил/валсартанмен емдеу Берлиприл® препаратының соңғы дозасын қабылдаудан кейін 36 сағат өтпей тұрып басталмауы тиіс. Берлиприл® препаратымен емдеу соңғы қабылданған сакубитрил/валсартан дозасынан кейін 36 сағат өтуінен ерте басталмауы тиіс («Қолдануға болмайтын жағдайлар» және «Дәрілермен өзара әрекеттесулер» бөлімдерін қараңыз).

АӨФ тежегіштерін рацемадотрилмен, mTOR тежегіштерімен (мысалы, сиролимус, эверолимус, темсиролимуспен) және вилдаглиптинмен бір мезгілде қолдану ангионевроздық ісіну қаупінің (мысалы, тыныс алу жеткіліксіздігімен немесе онсыз тыныс жолдарының немесе тілдің ісінуі) артуына әкелуі мүмкін. АӨФ тежегіштерін қабылдап жүрген пациентте рацекадотрилмен, mTOR тежегіштерімен (мысалы, сиролимус, эверолимус, темсиролимуспен) және вильдаглиптинмен қабылдау басталғанда сақ болу керек.

Ангионевроздық ісінудің жоғары даму қаупі (мысалы, тыныс алудың бұзылуымен немесе онсыз тыныс жолдарының немесе тілдің ісінуі) АӨФ тежегіштерін альтеплазамен бірге қолданғанда (тромболитикалық ем кезінде) анықталды.

АӨФ тежегіштерін қабылдаған пациенттерде сирек жағдайларда жарғақ қанатты жәндіктер уымен десенсибилизациялау кезінде өмірге қатерлі анафилактоидты реакциялар байқалды. Осындай реакциялардан әр десенсибилизация шарасы алдында АӨФ тежегіштерін уақытша тоқтату арқылы сақтануға болады.

ТТЛП аферезіндегі анафилактоидты реакциялар

Сирек жағдайларда АӨФ тежегіштерін қабылдаған пациенттерде декстран сульфатымен тығыздығы төмен липопротеиндер (ТТЛП) аферезін жасау кезінде өмірге қатерлі анафилактоидты реакциялар байқалды. Егер ТТЛП аферезі көрсетілсе, АӨФ тежегішін артериялық гипертензия немесе жүрек жеткіліксіздігінде емдеуге арналған өзге дәрілік препараттармен уақытша ауыстыру керек.

АӨФ тежегіштерін қабылдаған пациенттерде өткізу қабілеті жоғары жарғақшалармен (мысалы, AN 69®) гемодиализ жүргізілгенде анафилактоидты реакциялар дамуы хабарланды. Гемодиализ қажет болса, басқа типті диализ жарғақшаларын пайдалану немесе гипотензиялық дәрілердің басқа класынан препарат тағайындау ұсынылады.

Қант диабетінен зардап шегіп және диабетке қарсы пероральді препараттармен немесе инсулинмен емделіп жүрген пациенттерге АӨФ тежегіштерімен емдеудің басында, әсіресе, атап көрсетілген препараттарды бір мезгілде қабылдаудың алғашқы айында қан глюкозасы көрсеткіштерін мұқият бақылау қажеттілігінен хабардар ету керек («Дәрілермен өзара әрекеттесуі» бөлімін қараңыз).

АӨФ тежегіштерін қолдану аясындағы жөтел жөнінде хабарламалар бар. Емді тоқтатудан кейін басылатын қақырықсыз, тұрақты жөтел тән. Жөтелге дифференциялық диагноз қою кезінде АӨФ тежегіштерімен емдеуден туындаған жөтелді де ескеру керек.

Ауқымды операциялық араласу немесе артериялық қысымды төмендететін препараттар көмегімен анестезия жасалатын пациенттерде эналаприл малеаты рениннің компенсаторлық секрециясына реакция ретінде ангиотензин II өндірілуін тежейді. Осы себепті артериялық гипотония дамуында оны айналымдағы қан көлемін толықтыру жолымен түзетуге болады.

Басқа дәрілік препараттармен өзара әрекеттесуі

Ангионевроздық ісінудің даму қаупін арттыратын дәрілік заттар

АӨФ тежегіштерін сакубитрил/валсартанмен бір мезгілде қолдану қарсы көрсетілімді, өйткені бұл ангионевроздық ісінудің даму қаупін арттырады.

АӨФ тежегіштерін рацекадотрилмен, mTOR тежегіштерімен (мысалы, сиролимус, эверолимус, темсиролимуспен) және вилдаглиптинмен бір мезгілде қолдану ангионевроздық ісіну қаупінің артуына әкелуі мүмкін.

АӨФ тежегіштері диуретик тудырған калий жоғалуын азайтады. Калий жинақтаушы диуретиктер (мысалы, спиронолактон, эплеренон, триамтерен немесе амилоид), калий қоспалары немесе құрамында калий бар ас тұзын алмастырғыштар сарысуда калий концентрациясының едәуір жоғарылауына әкелуі мүмкін. Егер гипокалиемия салдарынан осы препараттарды бірге қолдану көрсетілсе, онда оларды сақтықпен пайдалану және сарысулық калий концентрациясын жүйелі бақылап отыру керек.

Сарысудағы калий деңгейі, әдетте, қалып шегінде қалса да, эналаприл алатын кейбір пациенттерде гиперкалиемия туындауы мүмкін. Калий жинақтаушы диуретиктер (мысалы, спиронолактон, триамтерен немесе амилорид), калий қоспалары немесе құрамында калий бар тұз алмастырғыштар сарысуда калийдің едәуір көбеюіне әкелуі мүмкін.

Берлиприл® триметоприм мен котримоксазол (триметоприм/сульфаметоксазол) сияқты қан сарысуында калий деңгейін арттыратын басқа агенттермен бірге енгізілгенде де сақ болу керек, себебі триметопримнің амилорид сияқты калий жинақтаушы диуретик ретінде әрекет ететіні белгілі. Демек, Берлиприл® препаратын жоғарыда атап көрсетілген препараттармен біріктіру ұсынылмайды. Егер бір мезгілде қолдану тағайындалса, олар сақтықпен және қан сарысуындағы калийді жиі мониторингтеумен пайдаланылуы тиіс.

Циклоспорин

Гиперкалиемия АӨФ тежегіштерін циклоспоринмен бір мезгілде қолданғанда туындауы мүмкін. Сарысудағы калий деңгейіне мониторинг өткізу ұсынылады.

Гепарин

Гиперкалиемия АӨФ тежегіштерін гепаринмен бір мезгілде қолданғанда туындауы мүмкін. Сарысудағы калий деңгейіне мониторинг өткізу ұсынылады.

Клиникалық сынақтар деректері АӨФ тежегіштері мен ангиотензин II рецепторларының блокаторларын немесе алискиренді бірге қолданумен байланысты ренин-ангиотензин-альдостерон жүйесін (РААЖ) қосарлы бөгеудің, РААЖ тарапына әсер ететін бір дәріні пайдаланумен салыстырғанда, артериялық гипотензия, гиперкалиемия және бүйрек функциясының төмендеуі (оның ішінде жедел бүйрек жеткіліксіздігі) сияқты жағымсыз құбылыстар жиілігінің артуына әкелетінін көрсетеді.

Осының алдында жоғары дозаларда диуретиктермен емдеу эналаприлмен емнің басында гиповолемияға әкелуі және осылайша артериялық гипотензияның даму қаупін арттыруы мүмкін. Гипотензиялық әсерлерді диуретиктерді тоқтату, тұтынатын сұйықтық немесе тұз мөлшерін көбейту арқылы немесе эналаприлді бастапқы төмен дозаларда тағайындау жолымен әлсіретуге болады.

Ангионевроздық ісінудің жоғары даму қаупі АӨФ тежегіштерін бір мезгілде қабылдау кезінде альтеплаза қабылдаған пациенттерде сипатталды.

Бірге қолданғанда эналаприлдің гипотензиялық әсерлері күшеюі мүмкін. Нитроглицеринмен және басқа нитраттармен немесе басқа вазодилататорлармен бір мезгілде қолдану да артериялық қысымның одан әрі төмендеуіне әкелуі мүмкін.

АӨФ тежегіштерімен бір мезгілде қолдану кезінде сарысуда литий концентрациясының өтпелі артуы және оның уытты әсерлері хабарланды. Тиазидті қатар диуретиктерімен және АӨФ тежегіштерімен бір мезгілде емделгенде сарысуда литий концентрациясы жоғарылауы мүмкін және сол арқылы литиймен уыттану қаупі артады. Сондықтан эналаприл мен литийді бірге қолдану ұсынылмайды; егер осы біріктірілім қажет болса, сарысулық литий деңгейін мұқият бақылау керек.

Наркоз жасау үшін АӨФ тежегіштерін белгілі бір дәрілермен, трициклды антидепрессанттармен және нейролептиктермен бір мезгілде қолдану артериялық қысым төмендеуін күшейтуі мүмкін.

ҚҚСДЗ ұзақ емдеуі АӨФ тежегіштерінің гипотензиялық әсерін әлсіретуі мүмкін.

ҚҚСДЗ әсерлері, ЦОГ-2 тежегіштерін (циклооксигеназа-2 селективті тежегіштері) және АӨФ тежегіштерін қоса, сарысулық калий деңгейінің жоғарылауына қатысты аддитивті болады және бүйрек функциясының нашарлауына әкелуі мүмкін. Әдетте, осы әсерлері қайтымды. Сирек жағдайларда, әсіресе, бүйрек функциясының бұзылуы бар пациенттерде (мысалы, егде жастағы немесе айналымдағы қан көлемі азаюы, оның ішінде диуретиктермен қарқынды ем салдарынан болған пациенттерде) жедел бүйрек жеткіліксіздігі дамиды. Пациенттер сұйықтықты жеткілікті мөлшерде алуы тиіс, ал бірлескен ем басталған соң және одан кейін мезгіл-мезгіл бүйрек функциясын мұқият бақылап отыру керек.

АӨФ тежегіштерін, оның ішінде эналаприлді құрамында алтын (натрий ауротиомалаты) бар инъекциялық препараттармен бір мезгілде қолданғанда бетке қан тебу, жүрек айну, құсу және артериялық гипотензия сияқты симптомдарды қамтитын сирек нитритоидты реакциялар туындауы хабарланды.

Симпатомиметиктер АӨФ тежегіштерінің гипотензиялық әсерін әлсіретуі мүмкін.

Эпидемиологиялық зерттеулер деректері бойынша АӨФ тежегіштерін және диабетке қарсы препараттарды (инсулин, пероральді гипогликемиялық препараттар) бірге қолдану қандағы глюкоза деңгейінің шамадан тыс төмендеуімен және гипогликемия қаупінің артуымен қатар жүруі мүмкін. Оның осындай бірлескен емдеудің алғашқы апталарында және бүйрек функциясының бұзылуында ықтималдығы зор.

Алкоголь

Алкоголь АӨФ тежегіштерінің гипотензиялық әсерін күшейтеді.

Эналаприлді ацетилсалицил қышқылымен (кардиологиялық дозаларда), тромболитиктермен және бета-блокаторлармен бірге тағайындау қауіпті емес.

Арнайы сақтандырулар

Сарысудағы калий деңгейі

Эналаприлді қоса, АӨФ тежегіштерін қабылдаған кейбір пациенттерде сарысуда калий деңгейінің артуы байқалды. АӨФ тежегіштері альдостерон босатылуын тежейтіндіктен гиперкалиемияны тудыруы мүмкін. Әсері, әдетте, бүйрек функциясы қалыпты пациенттерде шамалы. Алайда, бүйрек функциясының бұзылуы бар пациенттерде және/немесе калий қоспаларын (тұз алмастырғыштарын қоса), калий жинақтаушы диуретиктер, триметоприм немесе ко-тримоксазол (сондай-ақ триметоприм/сульфаметоксазол ретінде белгілі), гепарин, циклоспорин және әсіресе альдостерон антагонистерін немесе ангиотензин рецепторларының блокаторларын қабылдайтын пациенттерде гиперкалиемия туындауы мүмкін. Калий жинақтаушы диуретиктер, триметоприм, котримоксазол және калий қоспаларын АӨФ тежегіштерін қабылдайтын пациенттерде сақтықпен пайдалану керек (ангиотензин рецепторларының блокаторлары үшін «Ренин-ангиотензин-альдостерон жүйесін қосарлы бөгеу» (РААЖ) туралы осы бөлімнен қараңыз).

Сарысудағы калий деңгейіне жүйелі мониторинг өткізу ұсынылады («Дәрілермен өзара әрекеттесу» бөлімін қараңыз).

Әріқарай гиперкалиемияны дамытатын қауіп факторларына мыналар жатады

• бүйрек жеткіліксіздігі, бүйрек функциясының нашарлауы

• жас шамасы (> 70 жас)

• қант диабеті

• гипоальдостеронизм

• ағымдағы оқиғалар, атап айтқанда, сусыздану, жедел жүрек декомпенсациясы, метаболизмдік ацидоз.

• калий жинақтаушы диуретиктерді (мысалы, спиронолактон, эплеренон, триамтерен немесе амилорид), калий қоспаларын немесе құрамында калий бар тұз алмастырғыштарды немесе сарысудағы калий деңгейінің жоғарылауымен байланысты басқа белсенді заттарды (мысалы, гепарин, ко-тримоксазол, сондай-ақ триметоприм/сульфаметоксазол ретінде белгілі) бір мезгілде қолдану.

• калий қоспаларын, калий жинақтаушы диуретиктерді немесе құрамында калий бар тұз алмастырғыштарын, әсіресе, бүйрек функциясының бұзылуы бар пациенттерде пайдалану

Гиперкалиемия күрделі, кейде өлімге ұшырататын аритмиялар тудыруы мүмкін.

Жалпы, литий препараттарын эналаприлмен біріктіру ұсынылмайды.

АӨФ тежегіштерін, ангиотензин ІІ рецепторларының блокаторларын немесе алискиренді қатарлас қолдану артериялық гипотензия, гиперкалиемияның даму қаупін және бүйрек функциясының төмендеуін (оның ішінде жедел бүйрек жеткіліксіздігін) арттырады. Сондықтан АӨФ тежегіштерін, ангиотензин ІІ рецепторларының блокаторларын немесе алискиренді бірге қолданғанда РААЖ қосарлы бөгеуі ұсынылмайды.

Егер қосарлы бөгеумен ем абсолютті қажет болса, ол тек маманның қадағалауымен, сондай-ақ бүйрек функциясын, электролиттер мөлшерін және артериялық қысымды мұқият қадағалау аясында жүргізілуі тиіс.

Диабеттік нефропатия бар пациенттерде АӨФ тежегіштерін және ангиотензин II рецепторларының блокаторларын бірге қолдану қарсы көрсетілімді.

Лактоза

Берлиприл® препаратында лактоза бар. Сондықтан, сирек кездесетін тұқым қуалайтын галактоза жақпаушылығынан, организмде лактаза тапшылығынан немесе глюкоза-галактоза малабсорбциясы синдромынан зардап шегіп жүрген пациенттерге бұл препаратты қабылдауға болмайды. Берлиприл® препаратының бір таблеткасында лактоза мөлшері 200 мг-ден асырылмайды.

Артериялық гипертензиядан зардап шегетін 6 жастан үлкен балаларда препаратты қолдануға қатысты тиімділігі мен жағымдылығы жөнінде деректер шектеулі. Басқа көрсетілімдерге қатысты мәліметтер жоқ. 2 айдан асқан сәбилер үшін фармакокинетика деректері шектеулі («Қолдану жөніндегі нұсқаулар» бөлімін де қараңыз). Берлиприл® препаратын артериялық гипертензиядан өзгеше көрсетілімдер бойынша балаларды емдеу кезінде қолдану ұсынылмайды.

Эналаприл, тиісті мәліметтер болмауына орай, жаңа туған нәрестелерге және шумақтық сүзілу дәрежесі < 30 мл/мин/1,73 м2 болатын педиатриялық бейіндегі пациенттерге ұсынылмайды («Қолдану тәсілі және дозалары» бөлімін қараңыз).

АӨФ тежегіштерін жүктілік кезінде тағайындауға болмайды.

Жүктілікті жоспарлайтын пациент әйелдерге АӨФ тежегіштерімен ұзақ емдеу қажет болса, қауіпсіздігі дәлелденген баламалы гипотензиялық препараттармен емдеу көрсетілген.

Жүктілік басталған жағдайда АӨФ тежегіштерін қабылдауды дереу тоқтатып, ал қажет болса, баламалы дәрілермен емделуді бастау керек («Қолдануға болмайтын жағдайлар» және «Жүктілік және лактация кезінде қолдану» бөлімдерін қараңыз).

Эпидемиологиялық деректер жүктіліктің бірінші триместрінде АӨФ тежегіштерін қабылдау салдарынан болатын тератогенез қаупіне қатысты талассыз болып табылмайды, алайда қауіптің болымсыз артуы жоққа шығарылмайды.

АӨФ тежегіштерімен ұзақ уақыт емдеу қажет болса, жүктілікті жоспарлаған пациент әйелдерге қолдану қауіпсіздігі дәлелденген гипотензиялық препараттармен баламалы емдеу ұсынылады.

Жүктілік басталған жағдайда АӨФ тежегіштерін қабылдауды дереу тоқтату және қажет болса, баламалы дәрілермен емдеуді бастау керек.

Жүктіліктің екінші және үшінші триместрінде АӨФ тежегіштерін қабылдау фетоуыттылық әсерлерімен (бүйрек функциясының нашарлауы, қағанақ суының аздығы, бассүйектер оссификациясының баяулауы) қатар жүреді, ал жаңа туған нәрестелерде бүйрек жеткіліксіздігінің, гипотония мен гиперкалиемияның дамуына түрткі болады.

Шаранада бүйрек функциясының төмендеу көрінісі ретінде қағанақ суының аздығы болжамды орын алуы мүмкін; ол аяқ-қол контрактурасына, краниоцефалиялық деформацияларға немесе өкпе гипоплазиясына әкелуі мүмкін.

Жүктіліктің екінші және үшінші триместрінде АӨФ тежегішін қолданған жағдайда бүйрек функциясын және шарананың бассүйек күйін тексеру үшін пациент әйелдерге ультрадыбыстық зерттеу жүргізген жөн.

Аналары АӨФ тежегіштерін қабылдаған жаңа туған нәрестелер болжамды артериялық гипотония тұрғысынан қадағалануы тиіс («Қолдануға болмайтын жағдайлар» және «Арнайы сақтандырулар» бөлімдерін қараңыз).

Кейбір фармакокинетикалық деректер АӨФ тежегіштерінің аздаған концентрацияда ана сүтінде болатынын растайды.

АӨФ тежегіштерінің мардымсыз концентрациясының клиникалық мәнді еместігіне қарамастан, дегенмен де, сәбиде жағымсыз әсерлердің туындау қаупінің (жүрек-қантамыр жүйесіне және бүйрек функциясына әсерінің) болуына, сондай-ақ пациенттердің осы тобында Берлиприл® препаратын клиникалық қолдану тәжірибесінің жеткіліксіздігіне орай, нәресте шала туған жағдайда немесе олардың өмірінің алғашқы апталарында, егер сәби ана сүтімен қоректеніп жүрсе, ем жүргізу ұсынылмайды.

Осы жастан үлкен балаларға қатысты, Берлиприл® препаратын аса қажет болған және сәбиді жағымсыз реакциялар тұрғысынан медициналық қадағалап отырған жағдайда ғана бала емізетін ананың пайдалануына рұқсат етіледі.

Берлиприл® препаратының адам фертильділігіне әсер етуіне қатысты зерттеулер жүргізілмеді.

Егеуқұйрықтарда жүргізілген тұқым өрбіту функциясына қатысты уыттылығын зерттеулер нәтижелері эналаприл фертильділікке және тұқым өрбіту жүйесінің функциясына ықпал етпейді деп жорамалдау мүмкіндігін береді.

Басқа АӨФ тежегіштері жағдайындағы сияқты, эналаприлдің гипотензиялық әсері қара нәсіл өкілдерінде, осы қауымда төмен ренин деңгейінің көп таралуына орай, басқа пациенттердегіден азырақ білінуі мүмкін.

Препараттың көлік құралын немесе қауіптілігі зор мехнаизмдерді басқару қабілетіне әсер ету ерекшеліктері

Көлік құралдарын жүргізу немесе механизмдер қызметін көрсету кезінде кейде бас айналу немесе шаршау туындауы мүмкін екенін ескеру керек.

Қолдану жөніндегі нұсқаулар

Дозалау режимі

Дозаны пациенттің жай-күйіне («Арнайы сақтандырулар» бөлімін қараңыз) және препараттың артериялық қысым деңгейіне әсер етуіне қарай әркімге жеке таңдау керек.

Ас ішу эналаприл малеатының сіңуіне ықпал етпейді.

Артериялық гипертония

Бастапқы доза артериялық гипертензияның ауырлық дәрежесіне және пациенттің жай-күйіне қарай 5 мг-ден ең жоғары 20 мг дейін құрайды (төменнен қараңыз). Берлиприл® тәулігіне бір рет тағайындалады. Жеңіл дәрежедегі артериялық гипертензияда ұсынылатын бастапқы доза 5-10 мг құрайды. Ренин-ангиотензин-альдостерон жүйесінің айқын белсенділенуі бар пациенттерде (мысалы, реноваскулярлық артериялық гипертензия, организмде тұз және/немесе сұйықтық жетіспеушілігі, жүрек қызметінің декомпенсациясы немесе ауыр артериялық гипертензия кезінде) емдеудің басында артериялық қысымның шамадан тыс түсіп кетуі орын алуы мүмкін. Осындай пациенттерді емдеуді 5 мг немесе одан төмен дозадан бастау, сондай-ақ мұқият дәрігерлік қадағалау ұсынылады.

Осының алдында жоғары дозаларда диуретиктермен ем кезінде гиповолемия дамуы мүмкін, осы тұста эналаприлмен емдеудің басында артериялық гипотония қауіптілігі болады. Осындай пациенттерді емдеуді 5 мг немесе одан төмен дозадан бастау ұсынылады. Мүмкіндігінше, Берлиприл® препаратымен емдеуді бастар алдында диуретиктерді 2-3 күн тоқтату керек. Бүйрек функциясын және сарысудағы калий деңгейін бақылау ұсынылады.

Әдеттегі демеуші доза тәулігіне 20 мг құрайды. Ең жоғары демеуші доза тәулігіне 40 мг құрайды.

Симптомдық жүрек жеткіліксіздігінде жүргізілетін емдеуде Берлиприл® препараты диуретиктерге және көрсетілімдері болғанда оймақгүл препараттарына немесе бета-блокаторларға қосымша қолданылады. Симптомдық жүрек жеткіліксіздігі немесе сол жақ қарыншаның симптомсыз дисфункциясы бар пациенттер үшін Берлиприл® препаратының бастапқы дозасы 2,5 мг құрайды. Емдеудің басында препараттың артериялық қысымға әсерін айқындау үшін емді мұқият дәрігерлік бақылаумен бастау керек. Егер жүрек жеткіліксіздігінде Берлиприл® препаратымен емдеу басталған соң симптомдық артериялық гипотония туындамаса немесе ол жоғалса, препарат дозасын 20 мг құрайтын жалпы қабылданған демеуші дозаға дейін біртіндеп арттыру керек. Демеуші дозаны бір рет қабылдау үшін есептеуге немесе жағымдылығына қарай екі қабылдауға бөлуге болады. Дозаны осылай титрлеуді 2-4 апта бойы өткізу ұсынылады. Тәулігіне 40 мг құрайтын ең жоғары доза екі қабылдауға бөлінеді.

Жүрек жеткіліксіздігі/ сол жақ қарыншаның симптомсыз дисфункциясын емдеу кезінде ұсынылатын Берлиприл® препаратының дозасын титрлеу:

* бүйрек жеткіліксіздігі бар немесе диуретиктермен емделіп жүрген пациенттер жағдайында ерекше сақтану шараларын қадағалау («Арнайы сақтандырулар» бөлімін қараңыз)

Берлиприл® препаратымен ем басталуына дейін және одан кейін аз уақыт бұрын артериялық қысым мен бүйрек функциясына мұқият бақылау жүргізу керек («Арнайы сақтандырулар» бөлімін қараңыз), өйткені артериялық гипотония және (сирек) кейінгі бүйрек жеткіліксіздігі туралы хабарланды. Диуретиктермен емдеуде жүрген пациенттер үшін, егер мүмкін болса, Берлиприл® препаратымен емдеуді бастар алдында осы препараттар дозасын төмендету керек. Берлиприл® препаратымен емнің басындағы гипотониялық реакция Берлиприл® препаратымен ұзақ уақыт емдеу кезінде де осындай реакциялар орын алатынын білдірмейді және осы препаратпен одан әрі емдеу жоққа шығарылмайды. Сондай-ақ, сарысулық калий деңгейін және бүйрек функциясын бақылап отыру керек.

Әдетте, эналаприлді қабылдаулар арасындағы үзілістерді ұзарту және/немесе оның дозасын төмендету керек.

**«Арнайы сақтандырулар» бөлімін қараңыз

Эналаприлат диализбен шығарылады. Диализ жүргізілуінен бос күндері доза артериялық қысымның төмендеу дәрежесіне байланысты.

Дозаны егде жастағы пациенттердің бүйрек функциясының жағдайына байланысты таңдау керек («Арнайы сақтандырулар» бөлімін қараңыз).

Педиатриялық бейін пациенттері

Берлиприл® препаратын артериялық гипертензиядан зардап шегіп жүрген балалар мен жасөспірімдерде қолдануға қатысты клиникалық зерттеулер деректері шектеулі («Арнайы сақтандырулар» бөлімін қараңыз).

Егер пациент таблеткаларды жұтуға қабілетті болған жағдайда, дозаны пациенттің жай-күйіне және артериялық қысымның төмендеу дәрежесіне қарай әркімге жеке таңдау керек. Дене салмағы 20-дан <50 кг дейінгі пациенттерге ұсынылатын бастапқы доза 2,5 мг, ал дене салмағы ≥ 50 кг пациенттер үшін 5 мг құрайды. Берлиприл® тәулігіне бір рет қабылданады. Дозаны пациенттің қажеттіліктеріне қарай таңдау керек; осы ретте дене салмағы 20-дан <50 кг дейінгі пациенттер үшін 20 мг/тәулік және дене салмағы ≥ 50 кг пациенттер үшін 40 мг/тәулік дозаны құрайтын ең жоғары дозадан асыруға болмайды («Арнайы сақтандырулар» бөлімін қараңыз).

Берлиприл® препаратын, тиісті мәліметтер болмауына орай, жаңа туған нәрестелер мен шумақтық сүзілу көрсеткіші < 30 мл/мин/1,73 м2 болатын балаларды емдеуге пайдалану ұсынылмайды.

Енгізу әдісі және жолы

Ішке қабылдау үшін. Таблеткаларды тең дозаларда екі жартыға бөлуге болады.

Артық дозалану жағдайында қабылдау қажет болатын шаралар

Адамда осы препараттың артық дозалану деректері шектеулі. Бүгінгі таңда артық дозаланудың ең көп жиі кездесетін белгісі таблеткаларды қабылдаудан кейін шамамен алты сағаттан соң басталатын және ренин-ангиотензин жүйесін бөгеумен және мелшиюмен қатар жүретін айқын артериялық гипотензия болып табылады. АӨФ тежегіштерімен артық дозаланғанда келесі симптомдар дамуы мүмкін: жедел тамыр жеткіліксіздігі, электролиттік теңгерім бұзылулары, бүйрек жеткіліксіздігі, асқын желдетілу, тахикардия, жүрек қағу, брадикардия, бас айналу, үрейлі күй және жөтел.

Ішке 300 мг және 440 мг эналаприл қабылдаудан кейін, әдетте, препаратты емдік дозаларда қабылдаудан кейін байқалатын деңгеймен салыстырғанда, эналаприл малеатының сарысулық деңгей көрсеткіштерінің, тиісінше, 100 және 200 есе асып кету жағдайлары хабарланды.

Артық дозалану кезінде емдеу үшін физиологиялық ерітіндінің венаішілік инфузиясы ұсынылады. Артериялық гипотензия дамуында пациентті шокқа қарсы қалыпта жатқызу керек. Мүмкіндік болса, ангиотензин II инфузиясын жасау және/немесе катехоламиндерді вена ішіне енгізу дұрыс. Егер қабылдау сәтінен біраз уақыт өтсе, эналаприл малеатын организмнен шығару шараларын қолдану (мысалы, құстыру, асқазанды шаю, абсорбенттер мен натрий сульфатын енгізу) керек. Эналаприлатты гемодиализ көмегімен қан арнасынан шығаруға болады («Арнайы сақтандырулар» бөлімін қараңыз). Тұрақты брадикардияда кардиостимулятор пайдаланумен ем көрсетілген. Осы ретте өмірлік маңызды көрсеткіштерге, сондай-ақ сарысудағы электролиттер мен креатинин деңгейіне үздіксіз бақылау орнату керек.

Дәрілік препаратты қолдану жөнінде сауалдар туындаса, кеңес алу үшін медициналық қызметкерге хабарласу қажет.

ДП стандартты қолдану кезінде көрініс беретін жағымсыз реакциялар сипаттамасы және осы жағдайда қабылдау керек шаралар

Жағымсыз құбылыстар жиілігін белгілеу келесі критерийлерге сәйкес жүргізіледі: өте жиі (≥1/10), жиі (≥1/100-ден <1/10 дейін), жиі емес (≥1/1000-нан <1/100 дейін), сирек (≥1/10000-нан <1/1000 дейін), өте сирек (<1/10 000), белгісіз (қолда бар деректер негізінде бағалау мүмкін емес)

Өте жиі:

- көрудің бұлыңғырлануы

- бас айналу

- жүрек айну

- жөтел

- астения

Жиі:

- бас ауыру, депрессия

- гипотензия, оның ішінде ортостаздық гипотензия, синкопе, кеуде қуысы аумағындағы ауырсыну, жүрек ырғағының бұзылулары, стенокардия, тахикардия.

- диспноэ

- диарея, іштің ауыруы, дәм сезу қабілетінің өзгеруі

- бөртпе, аса жоғары сезімталдық/ангионевроздық ісіну: бет, аяқ-қол, ерін, тіл, көмекей және/немесе көмейдің ангионевроздық ісіну жағдайлары сипатталды, Квинке ісінуі хабарланған

- қалжырау

- гиперкалиемия, сарысулық креатинин концентрациясының жоғарылауы

Кейде:

- анемия (оның ішінде аплазиялық және гемолиздік).

- гипогликемия

- сананың шатасуы, ұйқышылдық, ұйқысыздық, қатты қозу, парестезиялар, бас айналу

- ортостаздық артериялық гипотензия, қан кернеулер, жүрек қағу, миокард инфарктісі немесе ми қан айналымының жедел бұзылуы, ықтималды түрде, қауіп тобындағы пациенттерде ауыр артериялық гипотония аясында

- ринорея, тамақтың ауыруы немесе дауыс қарлығуы, бронх түйілуі /демікпе

- ішек бітелісі, панкреатит, құсу, диспепсиялық бұзылыстар, іш қату, анорексия, асқазан тітіркенуі, ауыз кеберсуі, пептидтік ойық жаралар

- профуздық тер бөлінісі, терінің қышынуы, есекжем, алопеция

- бүйрек функциясының бұзылуы, бүйрек жеткіліксіздігі, протеинурия

- импотенция

- бұлшықеттер құрысуы, бетке қан тебу, құлақтағы шуыл, әлсіздік және дене температурасының көтерілуі, жалпы мазасыздықтар.

- қанда мочевина концентрациясының жоғарылауы, гипонатриемия

Сирек:

- нейтропения, гемоглобин концентрациясының төмендеуі, гематокрит төмендеуі, тромбоцитопения, агранулоцитоз, сүйек кемігі функциясының бәсеңдеуі, панцитопения, лимфаденопатия, аутоиммундық аурулар

- әдеттен тыс түстер көру, ұйқы бұзылулары

- Рейно ауруы

- өкпедегі инфильтраттар, ринит, аллергиялық альвеолит/ эозинофилиялық пневмония

- стоматит/ афтозды стоматит, глоссит.

- бауыр жеткіліксіздігі, гепатит (гепатоцеллюлярлы немесе холестаздық), некрозды гепатит, холестаз (оның ішінде сарғаюмен)

- полиморфты эритема, Стивенс-Джонсон синдромы, эксфолиативті дерматит, уытты эпидермалық некролиз, сулы бөртпе, эритродермия

Келесі жағымсыз әсерлердің кейбірімен немесе бәрімен: қызба, серозит, васкулит, миалгия/миозит, артралгия/артрит, ядроға қарсы оң антиденелер (ANA), ЭШЖ жоғарылауы, эозинофилия және лейкоцитозбен қатар жүруі мүмкін симптомдар кешені хабарланды. Тері бөртпесі, фотосенсибилизация немесе басқа тері көріністері орын алуы мүмкін.

- олигурия

- гинекомастия

- бауыр ферменттері белсенділігінің жоғарылауы, сарысулық билирубин концентрациясының жоғарылауы

Өте сирек:

- ангионевроздық ішек ісінуі

Белгісіз:

- диурезге қарсы гормонның талапқа сай емес секреция синдромы (SIADH)

Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек

Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Қосымша мәліметтер

Дәрілік препарат құрамы

Бір таблетканың құрамында

белсенді зат – 5 мг эналаприл малеаты,

қосымша заттар: лактоза моногидраты, жеңіл магний карбонаты, желатин, сусыз коллоидты кремнийдің қостотығы, натрий крахмал гликоляты (А типі), магний стеараты.

Сыртқы түрінің, иісінің, дәмінің сипаттамасы

Екі беті сәл дөңес, бір жағында ойығы және сызығы бар ақ дерлік түсті таблеткалар

Шығарылу түрі және қаптамасы

10 таблеткадан алюминий композиттік пішінді ұяшықты қаптамаға салынады және қатты алюминий фольгамен герметикаланады.

Пішінді 3 қаптамадан медициналық қолдану жөніндегі қазақ және орыс тілдеріндегі нұсқаулықпен бірге картон қорапшаға салады.

3 жыл

Жарамдылық мерзімі өткеннен кейін қолдануға болмайды.

25°С-ден аспайтын температурада сақтау керек.

Ылғалдан қорғау үшін түпнұсқалық қаптамасында сақтау керек.

Балалардың қолы жетпейтін жерде сақтау керек!

Рецепт арқылы

Өндіруші туралы мәліметтер

Берлин-Хеми АГ (Менарини Групп)

Глиникер Вег 125

12489 Берлин, Германия

Қазақстан Республикасы аумағында тұтынушылардан дәрілік заттар сапасына қатысты шағымдар (ұсыныстар) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

«Berlin-Chemie/A.Menarini Distribution Kazakhstan (Берлин-Хеми/ А. Менарини Дистрибьюшн Қазақстан)» ЖШС

050051, Алматы қ., Луганский к-сі 54, № 2 коттедж

Телефон нөмірі: +7 727 2446183, 2446184, 2446185

Факс нөмірі: +7 727 2446180

Электронды пошта: Kazakhstan@berlin-chemie.com