Атенолол (50 мг)

• русский
• қазақша

• Скачать инструкцию медикамента

Дәрілік заттың медицинада қолданылуы

жөніндегі нұсқаулық

АТЕНОЛОЛ

Саудалық атауы

Атенолол

Халықаралық патенттелмеген атауы

Атенолол

Дәрілік түрі

Қабықпен қапталған 50мг таблеткалар

Құрамы

Бір таблетканың құрамында

белсенді зат – атенолол, 50 мг

қосымша заттар: бидай крахмалы, лактоза моногидраты, натрий карбоксиметилкрахмалы, коповидон VA 64, монокристалды целлюлоза, тальк, магний стеараты, коллоидты кремнийдің қостотығы 200

қабық құрамы: Опадрай сары OY-GM-22920 (гипромеллоза 2910 15 cP, полидекстроза, титанның қостотығы Е 171, макрогол 4000, темірдің сары тотығы Е 172).

Сипаттамасы

Екі беті дөңес, дөңгелек, сары түсті қабықпен қапталған таблеткалар

Фармакотерапиялық тобы

Селективті бета - бөгегіштер

АТЖ коды С 07AB 03

Фармакологиялық қасиеттері

Фармакокинетикасы

Ішке қабылдағаннан кейін АІЖ-нан сіңуі шамамен 40-50% құрайды, Сmax 2-4 сағаттан соң жеткізіледі. Плазма ақуыздарымен байланысуы болымсыз (3%-ға жуық). Мардымсыз бөлігі бауырда метаболизденеді және 90%-ға жуығы бүйрекпен өзгермеген күйде шығарылады. Плазмадан жартылай шығарылу кезеңі 6-7 сағат құрайды. Атенолол аздаған дәрежеде тіндерге өтеді, майда ерігіштігінің әлсіздігіне орай, мидағы концентрациялары көп емес.

Фармакодинамикасы

Атенолол – ішкі симпатомиметикалық белсенділіксіз және жарғақшаны тұрақтандыратын әсері жоқ кардиоселективті бета1-адренобөгегіш. Симпатикалық иннервацияның және қанда айналысқа түсетін катехоламиндердің жүректі көтермелеу әсерін азайтады. Антиангиналық, гипотензиялық және аритмияға қарсы ықпал етеді. Синустық түйіннің автоматизмін азайтады, жүрек жиырылуының жиілігін сиретеді, атриовентрикулярлық өткізгіштікті баяулатады, миокардтың оттегінде жиырылуын және қозуын кемітеді. Жарғақша тұрақтандыратын белсенділігі жоқ. Орташа емдік дозаларда қолданғанда бронхтардың тегіс бұлшықетіне және шеткергі артерияларға, іріктелмеген бета1-адренобөгегіштерден гөрі, аз айқындылықта әсерін тигізеді.

Қолданылуы

- артериялық гипертензияда

- стенокардияда (тұрақсыз және тұрақты)

- жүрек қызметі ырғағының бұзылуында

- миокард инфарктінде

Қолдану тәсілі және дозалары

Атенолол шайналмай, жеткілікті сұйықтық мөлшерімен іше отырып, ішке қабылданады.

Артериялық гипертензия: бастапқы доза тәулігіне бір рет 25-тен 50 мг-ге дейін құрайды, қажет болса, 1-2 аптадан кейін дозаны, әркімнің жеке тұтынуына және көтере алуына қарай, 100 мг көбейтеді.

Стенокардия: бастапқы доза тәулігіне бір рет 25-50 мг құрайды; тиімділігіне қарай дозаны біртіндеп 100 мг-ге дейін көбейтеді, қажет жағдайда және жақсы көтерімді болғанда тәулігіне бір дүркін немесе екі рет тәулігіне 50 мг-ден қабылдауға болады. Дозаны арттырғанда тиімділігінің жоғарылау ықтималдығы аз.

Жүрек қызметі ырғағының бұзылуы: бастапқы доза тәулігіне бір рет 50 мг құрайды. Қажет болса, бір аптадан кейін тәуліктік дозаны бір қабылдауға 100 мг көбейтуге болады.

Миокард инфарктісі: препаратпен инъекциялық емдеу жақсы көтерімді болса, соңғы көктамырішілік дозаны енгізгеннен кейін 15 минуттан соң 50 мг қабылдайды. Сосын соңғы көктамырішілік енгізуден кейін 12 сағаттан соң ішке 50 мг және тағы 12 сағаттан соң 100 мг қабылдайды. Кешеуілдеген сатыда алдын алу ретінде дозаны, көтерімділігіне және емдік тиімділігіне қарай, әркімге жеке белгілейді, әдетте ол тәулігіне бір дүркін 100 мг құрайды.

Бүйрек қызметінің бұзылуы бар науқастар үшін дозалау режимі: бүйрек жеткіліксіздігі бар науқастарда Атенолол дозасын креатинин клиренсінің мәндеріне қарай белгілейді.

Егде жастағы науқастар: егде емделушілерде жас ұлғаюымен және препараттың әдеттегі емдік дозаларына сезімталдықтың жоғарылауымен байланысты бүйрек қызметінің функционалдық төмендеуіне орай, дозаны азайту қажет болады.

Атенололмен ұзақ уақыт емдегеннен кейін қабылдауды дозаны біртіндеп азайтумен тоқтатуға болады, өйткені препаратты күрт тоқтату стенокардияның өршуімен коронарлық ишемияға, тіпті миокард инфарктісіне әкелуі мүмкін.

Жағымсыз әсерлері

- гипотония, брадикардия, синкоп, АV өткізгіштігінің бұзылуы, бұрыннан бар жүрек жеткіліксіздігінің ушығуы, аракідік ақсаңдауы және Рейно синдромы бар науқастар ахуалының нашарлауы

- әлсіздік, бас айналу, бас ауыру, ұйқының бұзылуы және қорқыныштар, депрессия және елестеулер, көңіл-күйдің бұзылуы, парестезиялар

- бронх түйілуі, диспноэ

- диарея, ауыздың кеберсуі, жүрек айну, іштің ауыруы, іш қату, метеоризм; бірлі-жарым жағдайларда гепатиттің дамуы және бауыр қызметінің бұзылуы мүмкін

- бұрыннан бар псориаздың өршуі немесе псориазға ұқсас бөртпенің көрініс беруі, терінің аллергиялық реакциялары (эритема, қышыма, экзантема), алопеция

- жылдам өтетін бұлшықет әлсіздігі, балтырлардың құрысуы, парестезиялар, аяқ-қолдардың мұздауы

- диабетиктердегі глюкоза көтерімділігінің нашарлауы, гипогликемия белгілерінің бүркемеленуі, май алмасудың бұзылуы (тығыздығы төмен липопротеиндер деңгейінің азаюы, плазмадағы триглицеридтердің артуы), трансаминазалар мен холестаздардың жоғарылауы

- потенцияның төмендеуі

- бейімділігі бар емделушілерде бронх обструкциясы белгілерінің пайда болуы мүмкін

- тері бөлінісінің күшеюі, конъюнктивит, көз жасы сұйықтығы сөлінісінің азаюы, терінің қызаруы.

Жағымсыз құбылыстар көпшілік жағдайларда әлсіз көріністелген және өтпелі сипат иеленген. Олар, әдеттегіше, емдеудің басында болады және ағза дағдыланғанша жалғасады. Дозаны азайту және емдеуді тоқтату сирек талап етіледі.

Қолдануға болмайтын жағдайлар

- препаратқа жоғары сезімталдықта

- II Б-II сатысындағы созылмалы жүрек жеткіліксіздігінде, жедел жүрек жеткіліксіздігінде

- кардиогенді шокта

- артериялық гипотензияда

- метаболикалық ацидозда

- феохромоцитомада

- ІІ және ІІІ дәрежелі АV бөгелісі, синоатриальді бөгеліс, синустық түйін әлсіздігінің синдромы

- брадикардияда

- шеткергі тамырлардың синдромдары және аурулары (Рейно синдромы, Бюргер ауруы, диабеттік ангиопатия және т.б.)

- балаларға және 18 жасқа дейінгі жасөспірімдерге

Дәрілермен өзара әрекеттесуі

Атенололды диуретиктермен, нитраттармен, гипертензияға қарсы басқа препараттармен бір мезгілде қолданғанда гипотензиялық әсері күшейеді; эрготамин, ксантин туындыларымен, ҚҚСП-мен – атенолол тіимділігі азаяды; резерпинмен, метилдопамен, клонидинмен, гуанфацинмен, верапамилмен, дилтиаземмен – айқын брадикардия және/немесе гипотензия болуы мүмкін; жүрек гликозидтерімен – АV өткізгіштігін бәсеңдету әсері күшеюі мүмкін.

Атенололмен бір мезгілде қолданғанда инсулиннің, ішу арқылы қабылданатын гипогликемиялық препараттардың әсері күшейеді.

Ингаляциялық наркозға арналған дәрілерді қолдану атенолол әсерінің аясында миокард қызметінің бәсеңдеу және артериялық гипотензияның даму қаупін арттырады.

Айрықша нұсқаулар

Бүйректің бөліп шығару қызметінің айқын бұзылулары бар емделушілерде, егде жастағы емделушілерде тиреотоксикоз кезінде сақтықпен қолданған дұрыс.

Атенололды қолданғанда көз жасы сұйықтығы өнімінің азаюы мүмкін, бұл жанаспалы линзалар пайдаланатын емделушілер үшін маңызды. Атенолол мен клонидинді біріктіріп қолдануды тоқтатқанда клонидинмен емдеуді атенололды тоқтатқаннан кейін тағы бірнеше күн жалғастырады, керісінше жағдайда айқын артериялық гипертензияның пайда болуы мүмкін.

Атенолол алатын емделушілерде ингаляциялық наркоз жасау қажет болғанда, наркоз жүргізгенге дейін бірнеше күн бұрын атенолол қабылдауды тоқтату немесе наркозға арналған инотроптық теріс әсер етуі мейлінше аз дәріні іріктеу қажет.

Дәрілік препарат құрамында лактоза бар, бұл оны лактозалық жеткіліксіздігі, галактоземиясы немесе глюкоза/галактозалық мальабсорбция синдромы бар емделушілер үшін сәйкессіз етеді.

Препарат құрамында бидай крахмалы бар, сондықтан оны глютенді энтеропатиясы бар науқастарға қабылдауға болмайды.

Жүктілік және лактация кезеңі

Бета-бөгегіштер плаценталық бөгет арқылы өтеді және гипогликемияның, тыныс алу бұзылуының, жаңа туған нәресте мен ұрықтағы брадикардия мен гипотонияның даму қаупін арттырады. Ұрық дамуының жатырішілік іркілісі болуы мүмкін. Осы себептермен Атенолол, дәрігер ұрықты қатаң бақылауға алатын, әрі пайда/қауіп арақатынасын мұқият бағалағаннан кейін нақтылы қажет болатын жағдайларды қоспағанда, жүктілік кезінде қолданылмайды.

Атенолол ана сүтімен бөлінеді, сондықтан лактация кезеңінде қолдану қажет болғанда емшекпен қоректендіруді тоқтату ұсынылады; егер бұл мүмкін болмаса, еметін сәбидің жай-күйін мұқият медициналық бақылаумен қамтамасыз ету керек.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Жоғары зейін шоғырландыруды талап ететін қызметтегі емделушілерде атенололды амбулаторлық қолдану жөніндегі мәселені тек әркімнің жеке реакциясын бағалаудан кейін ғана шешкен жөн.

Артық дозаланғанда

Белгілері: ауыр гипотония, брадикардия және әртүрлі дәрежедегі АV бөгелісі (соның ішінде жүректің тоқтап қалуы), жүрек жеткіліксіздігі және кардиогенді шок, қол мен аяқ саусақтарының мұздауы және көгеруі, бас айналу, бронх түйілуі, құсу, естен тану.

Емі: препарат қабылдауды дереу тоқтатады. Асқазанды шаю, белсенділендірілген көмір, тазалағыш дәрілерді енгізу. Қарқынды емдеу жағдайларында гемодинамика көрсеткіштерін тұрақты бақылау және реттеу. Шектен тыс брадикардияда атропин болюсін (0,5- 2,0 мг) көктамыр ішіне енгізеді. Қажет болса, осыдан кейін глюкагон болюсін (10 мг) көктамыр ішіне енгізуге болады. Дәрі-дәрмектер нәтиже бермейтін брадикардияда ырғақ жетекшісін уақытша орнату ұсынылады. Ауыр гипотонияда – көктамырішілік құюлар және катехоламиндерді (добутамин немесе дофамин) қолдану. Симптоматиканың ауырлығына қарай изопреналин, орципреналин, оймақгүл гликозидтерін де пайдалануға болады.

Бронх түйілуі жағдайында бета 2 – агонистерін (изопротеренол және/немесе аминофиллин) енгізеді. Атенололды диализ арқылы шығаруға болады.

Шығарылу түрі және қаптамасы

Қабықпен қапталған таблеткалар.

10 таблеткадан поливинилхлоридті үлбірден және алюминий фольгадан жасалған пішінді ұяшықты қаптамаға салады.

3 пішінді қаптамадан медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салынған.

Сақтау шарттары

Құрғақ және жарықтан қорғалған жерде, 25ºС-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Препаратты қаптамасында көрсетілген жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

Балканфарма-Дупница АД

2600 Дупница қ., Болгария

“Самоковское шоссе” к-сі № 3

тел.: +359/701 58 196, факс: +359/701 58 555

Тұтынушылардан өнім сапасы жөнінде шағымдарды Қазақстан Республикасы аумағында қабылдайтын ұйымның мекенжайы

Алматы қаласындағы «Актавис Интернешнл Лтд.» өкілдігі

Қазақстан Республикасы, 050009, Алматы қ., Мұқанов к-сі 241- 1 А.

Тел./факс: 8 (727) 313 74 30, 313 74 31;

Электронды поштасы: actavis@actavis.kz; сайт: www.actavis.com