Аризил (5 мг)
Инструкция
-
русский
-
қазақша
Саудалық атауы
Аризил
Халықаралық патенттелмеген атауы
Донепезил
Дәрілік түрі
Үлбірлі қабықпен қапталған таблеткалар 5 мг, 10 мг
Құрамы
Бір таблетканың құрамында
белсенді зат - 5.0 мг, 10.0 мг донепезил гидрохлориді,
қосымша заттар:
5 мг таблеткалар: лактоза моногидраты, микрокристалды целлюлоза (Авицел РН-101), құрғақ крахмал, гидроксипропилцеллюлоза (Клуцел ЛФ), гидроксипропилцеллюлозаның төменгі алмастырғышы LH-2165.00, тальк, магний стеараты,
10 мг таблеткалар: лактоза моногидраты, микрокристалды целлюлоза (Авицел РН-101), құрғақ крахмал, гидроксипропилцеллюлоза (Клуцел ЛФ), гидроксипропилцеллюлозаның төменгі алмастырғышы LH-2165.00, тальк, магний стеараты,
қабықтың құрамы:
5 мг таблеткалар: опадри ақ 03F58607#: соның ішінде гипромеллоза 2910 (Е 464), тальк (Е 553 b), макрогол/ПЭГ (E 1521), титанның қостотығы (Е 171);
10 мг таблеткалар: опадри сары 03F82510#: соның ішінде гипромеллоза 2910 (Е 464), тальк (Е 553 b), макрогол/ПЭГ (E 1521), титанның қостотығы (Е 171), темірдің (III) сары тотығы (Е 172)
Сипаттамасы
5 мг таблеткалар: дөңгелек, екі беті дөңес, ақ түсті үлбірлі қабықпен қапталған, екі жағы тегіс таблеткалар
10 мг таблеткалар: дөңгелек, екі беті дөңес, сары түсті үлбірлі қабықпен қапталған, екі жағы тегіс таблеткалар
Фармакотерапиялық тобы
Деменцияны емдеуге арналған препараттар. Холинэстераза тежегіштері.
Психоаналептиктер. Донепезил.
АТХ коды N06DA02
Фармакологиялық қасиеттері
Фармакокинетикасы
Қан плазмасындағы ең жоғарғы концентрациясына ішке қабылдағаннан кейін шамамен 3 - 4 сағаттан соң жетеді. Ас ішу донепезилдің сіңуіне әсер етпейді. Плазмадағы концентрациялары мен «концентрация-уақыт» қисығы астындағы ауданы (AUC) дозасына пропорциональді артады. Қан плазмасынан жартылай шығарылу кезеңі шамамен 70 сағатты құрайды, бір реттік дозаларда жүйелі қолданғанда тепе-теңдік концентрациясына, әдетте, емдеу басталғаннан кейін 3 апта ішінде жетеді. Тепе-теңдік жағдайына жеткеннен кейін қан плазмасындағы донепезилдің концентрациясы бір күн ішінде аз өзгереді. Қан плазмасы ақуыздарымен байланысы 95%-ға жуық. Оның белсенді метаболиті 6-О-дезметилдонепезилдің плазма ақуыздарымен байланысуы туралы деректер жоқ. Донепезилдің организмнің түрлі тіндерінде таралуы жеткіліксіз зерттелген. Донепезил және/немесе оның метаболиттері организмде 10 күннен астам сақталуы мүмкін деп шамаланады.
Донепезил гидрохлориді Р450 (CYP450) цитохромының 2D6 және 3A4 изоферменттерінің көмегімен метаболизденеді. Өзгеріссіз күйде де, метаболиттер түрінде де бөлініп шығады. Дозасының шамамен 57%-ы несепте (17% өзгемеген донепезил) және 14,5%-ы нәжісте анықталады. Донепезил гидрохлоридінің радиобелсенді 14С-мен таңбаланған бір реттік 5 мг дозасын қабылдағаннан кейін плазманың радиобелсенділігі донепезил гидрохлоридінің (30%), 6-О-десметилдонепезилдің (11 %, донепезил гидрохлоридіне ұқсас белсенділік танытатын бірден-бір метаболит), донепезил-цис-N-оксидтің (9%), 5-О-десметилдонепезилдің (7%) және 5-О-десметилдонепезилглюкуронидтің (3%) есебінен қалыптасады. Донепезил гидрохлориді және/немесе оның метаболиттерінің энтерогепатикалық рециркуляциясына қатысты деректер жоқ.
Жыныстық, нәсілдік ерекшелік, шылым шегу донепезил гидрохлоридінің плазмадағы концентрациясына елеулі әсер етпейді. Донепезил гидрохлоридінің плазмадағы концентрациялары, шамамен 70 сағатты құрайтын жартылай шығарылу кезеңімен төмендейді.
Донепезилдің фармакокинетикасы егде жастағы дені сау сыналушыларда және Альцгеймер ауруы бар емделушілерде арнайы зерттелмеген. Препараттың емделушілер қаны плазмасындағы орташа концентрацииялары дені сау ерікті жастардағы осындайға сәйкес.
Бауыр функциясының жеңіл немесе орташа бұзылуы бар емделушілерде донепезилдің қан плазмасындағы тепе-теңдік концентрациясы артады. AUC орташа мәні 48%-ға және Cmax орташа мәні 39%-ға артқан.
Фармакодинамикасы
Аризил – ацетилхолинэстеразаның спецификалық және қайтымды тежегіші, ол холинэстеразаның мида көп болатын типі болып табылады. Препарат негізінен орталық жүйке жүйесінен тыс болатын бутирилхолинэстеразаға қарағанда бұл ферментті 1000 еседен астам күштірек тежейді. Препаратты 5 мг немесе 10 мг дозаларда бір рет қабылдағаннан кейін эритроциттер жарғақшаларында өлшенген ацетилхолинэстераза белсенділігін бәсеңдету дәрежесі сәйкесінше 63,6% және 77.3% құраған. Эритроциттердегі ацетилхолинэстеразаның тежелуі донепезилдің әсерінен ADAS-cog шкаласының (Альцгеймер ауруы кезіндегі когнитивтік функцияларды бағалау шкаласы) өзгерістерімен өзара байланыста болады. Аризилді қатарлас неврологиялық аурулардың ағымын өзгерту қабілеті зерттелмеген. Осылайша, препарат мұндай аурулардың үдеуіне әсер етеді деп есептеуге болмайды.
Қолданылуы
- ауырлығы жеңіл немесе орташа Альцгеймер ауруын симптоматикалық емдеуде
Қолдану тәсілі және дозалары
Препаратты қатаң түрде дәрігердің тағайындауы бойынша қолданады!
Препаратты кешке ұйықтар алдында ішке қабылдау керек. Ересектер мен егде жастағы емделушілерге препаратты тәулігіне 1 рет 5 мг бастапқы дозасында тағайындайды. Емдеудің ерте клиникалық әсерін бағалау және донепезилдің тепе-теңдік концентрациясына жету үшін, бастапқы 5 мг дозада қабылдауды 1 ай бойы жалғастыра беру керек. Препараттың қабылдануын ұдайы бақылап отыру қажет. Бір айдан кейін қажет болса, тәулігіне 10 мг дейін (1 қабылдау) арттыруға болады. Ұсынылатын ең жоғарғы тәуліктік дозасы 10 мг. Күніне 10 мг асатын дозасымен клиникалық зерттеулер жүргізілмеген.
Бауыр және бүйрек функциясының бұзылулары кезінде дозаларын түзету қажет емес.
Бауыр функциясының жеңіл немесе орташа бұзылуында экспозициясының арту мүмкіндігіне байланысты, дозасын арттыруды жекелей көтере алмаушылықты ескере отырып орындау керек.
Емдеу курсының ұзақтығын емдеуші дәрігер анықтайды.
Жағымсыз әсерлері
Анағұрлым жиі кездесетін жағымсыз әсерлері – диарея, бұлшықет түйілулері, шаршау, жүрек айнуы, құсу, ұйқысыздық, көп жағдайларда бұл құбылыстар басылады және препаратты енгізуді тоқтатуды қажет етпейді.
Өте жиі (≥ 1/10)
- жүрек айнуы, құсу, диарея
- бас ауыруы, ұйқысыздық, шаршау
Жиі (≥ 1/100 - <1/10)
- естен танулар, бас айналуы, қажығыштық
- елестеулер, қозу, озбыр мінез-құлық, қорқынышты түс көрулер (олар дозасын төмендеткеннен немесе препаратты тоқтатқаннан кейін басылады)
- анорексия, құсу, асқазан бұзылысы
- несепті ұстай алмау
- бөртпе, терінің қышынуы
- бұлшықет түйілулері
- тұмау
- әр түрлі жерлердің ауыруы
Жиі емес (≥ 1/1000 - ≤ 1/100)
- қан сарысуындағы бұлшықет кретининфосфокиназасы концентрациясының елеусіз жоғарылауы
- брадикардия
- құрысу ұстамалары
- асқазан-ішектен қан кету, асқазан мен он екі елі ішектің ойық жарасы
Сирек (≥ 1/10000 - ≤ 1/1000)
- синоатриальді және атриовентрикулярлық блокада
- экстрапирамидалық симптомдар
- бауыр функциясының бұзылуы, соның ішінде гепатит
Өте сирек
- қатерлі нейролептикалық синдром
Қолдануға болмайтын жағдайлар
- донепезилге, пиперидин туындыларына және препараттың басқа компоненттеріне жоғары сезімталдық
- жүктілік және лактация кезеңі
- балалар мен 18 жасқа дейінгі жасөспірімдерге
Дәрілермен өзара әрекеттесуі
Аризил және/немесе оның метаболиттері теофиллиннің, варфариннің, циметидиннің немесе дигоксиннің метаболизмін бәсеңдетпейді.
Дигоксинмен немесе циметидинмен бір мезгілде қолданғанда донепезил гидрохлоридінің метаболизмі өзгермейді.
Зертханалық зерттеулер, Р450 цитохромының 3А4 және елеусіз дәрежеде 2D6 изоферменттері донепезил метаболизміне тартылғанын көрсетті.
Зертхана жағдайларында жүргізілген дәрілермен өзара әрекеттесулерін зерттеулер, кетоконазол мен хинидин, сәйкесінше CYP3A4 және 2D6 тежегіштері донепезилдің метаболизмін бәсеңдететінін көрсетеді. Сондықтан итраконазол және эритромицин сияқты осы және басқа CYP3A4 тежегіштері, және флуоксетин сияқты CYP2D6 тежегіштері, донепезил метаболизмін бәсеңдетуі мүмкін. Дені сау еріктілерді зерттеуде кетоконазол донепезил концентрациясының орташа мәндерін шамамен 30%-ға арттырған.
Ферменттер индукторлары (рифампицин, фенитоин, карбамазепин және этанол) донепезилдің деңгейін төмендетуі мүмкін. Алайда мұндай тежегіштік немесе индукциялау әсері белгісіз, сондықтан препараттардың мұндай біріктірілімдерін сақтықпен қолдану керек. Аризил антихолинергиялық белсенділігі бар препараттармен өзара әрекеттесуі мүмкін. Сондай-ақ, Аризил сукцинилхолинмен, басқа миорелаксанттармен немесе холинергиялық рецепторлардың және жүрек өткізгіштігіне әсер ететін бета-блокаторлардың антагонистерімен бір мезгілде қабылдағанда, синергиялық әсерге ие.
Аризилді басқа холиномиметиктермен және гликопирролат сияқты төртіншілік антихолинергиялық препараттармен бір мезгілде қолданғанда, артериялық қысымның және жүректің жиырылу жиілігінің атипиялық өзгерген жағдайлары сипатталған.
Айрықша нұсқаулар
Емдеуді Альцгеймер типті деменциямен науқастарды емдеуде тәжірибесі бар дәрігер маман тағайындауы және жүргізуі тиіс. Аурудың диагнозы жалпыға ортақ критерийлерге сәйкес (мысалы, DSM IV, ICD 10) қойылуы тиіс. Емдеуді тек дәрілік заттардың қабылдануын қадағалап отыруға қабілетті адам бар болса ғана жүргізуге болады. Емдеу жүйелі түрде бағалануы тиіс емдік әсері болғанша жүргізіледі. Емдік әсері болмаса, препаратты қабылдауды тоқтату қажет. Аризилмен емдеуге жекелей реакцияны болжап айту мүмкін емес. Препаратты тоқтатқаннан кейін оның әсері біртіндеп және баяу жоғалады. Препаратты күрт тоқтатқан жағдайдағы тоқтату синдромы туралы деректер жоқ.
Альцгеймер типті деменцияның ауыр түрімен немесе жады бұзылуы бар (мысалы, когнитивтік функцияның жас шамасына байланысты төмендеуінде) емделушілерде Аризилдың тиімділігі анықталмаған. Холинэстераза тежегіші бола отырып, Аризил жалпы анестезия жүргізуде бұлшықет релаксациясының сукцинилхолиндік типін күшейтуі мүмкін. Сондай-ақ, жүректің жиырылу жиілігіне ваготониялық әсер беруі (брадикардия туғызуы) мүмкін. Мұндай әсерінің мүмкіндігін синустық түйін әлсіздігі немесе синоатриальді немесе атриовентрикулярлық блокада сияқты басқа суправентрикулярлық өткізгіштік бұзылулары кезінде ескеру керек. Естен тану және құрысулар жағдайлары туралы хабарланған. Мұндай емделушілерді тексеру кезінде блокаданың немесе ұзақ синустық тоқталыстың болу мүмкіндігін ескеру қажет.
Ойық жараның даму қаупі жоғары емделушілерге (мысалы, сырартқысында ойық жара ауруы бар немесе қабынуға қарсы стероидты емес препараттарды (ҚҚСП) қабылдап жүрген емделушілерге) сақтық таныту керек.
Алайда донепезилді клиникалық зерттеулерде плацебомен салыстырғанда пептикалық ойық жаралардың немесе асқазан-ішектен қан кетулердің даму жиілігін арттырғаны анықталмаған.
Донепезил гидрохлоридін пайдаланып жүргізілген клиникалық зерттеулерде мұндай деректер жоқ болса да, холиномиметиктер қуықтың обструкциясын туғызуы мүмкін.
Холиномиметиктер жайылған құрысуларды туғызуы мүмкін деп болжанады, алайда құрысулар Альцгеймер ауруының көрінісі болуы да мүмкін. Холиномиметиктер экстрапирамидалық бұзылыстарды ушықтыруы немесе төмендетуі мүмкін.
Препаратты сыртартқысында бронх демікпесі немесе өкпенің обструкциялық аурулары бар науқастарға тағайындағанда ерекше сақ болу керек.
Аризилді басқа ацетилхолинестераза тежегіштерімен, холинергиялық жүйе агонистерімен немесе антагонистерімен бір мезгілде қабылдамау керек.
Препаратты бауыр функциясының ауыр бұзылулары бар емделушілерде қолданылуы жөніндегі мәліметтер жоқ. Бауыр функциясының шығу тегі анықталмаған бұзылуы кезінде Аризил препаратын тоқтату мүмкіндігін қарастыру керек.
Препараттың құрамында лактоза бар. Галактозаны көтере алмаушылықтың сирек тұқым қуалайтын мәселелері, Лапп лактазасы тапшылығы немесе глюкоза галактоза сіңуінің бұзылуы бар емделушілерге бұл дәріні қабылдамау керек.
Көлік құралдарын және қауіптілігі зор механизмдерді басқару қабілетіне ықпал ету ерекшеліктері
Альцгеймер типті деменция автокөлік немесе басқа механизмдерді басқару қабілетінің бұзылуымен қатар жүруі мүмкін. Бұдан өзге, Аризил негізінен емдеудің басында немесе дозасын арттырғанда шаршау сезімін, бас айналуы және бұлшықет құрысуларын туғызуы мүмкін. Емделушінің көлік құралын немесе қауіптілігі зор механизмдерді басқару қабілетіне дәрігер баға беруі тиіс
Артық дозалануы
Симптомдары: холинергиялық криз (айқын жүрек айнуы, құсу, сілекей ағуы, терлеу, брадикардия, артериялық гипотензия, тыныстың тарылуы, коллапс және құрысулар). Тыныс алу бұлшықеттері зақымданғанда өліммен аяқталуы мүмкін бұлшықет әлсіздігі күшеюі ықтимал.
Емі: жалпы демеуші ем тағайындау керек. У қайтарғы ретінде үшіншілік антихолинергиялық препараттарды, мысалы, атропинді бастапқы 1-2 мг дозада көктамыр ішіне тағайындайды, сосын дозасын клиникалық әсеріне байланысты таңдайды. Донепезил гидрохлоридінің және/немесе оның метаболиттерінің диализдің (гемодиализ, перитонеальді диализ немесе гемофильтрациялау) көмегімен шығарылатыны туралы мәліметтер жоқ.
Шығарылу түрі және қаптамасы
Үлбірлі қабықпен қапталған таблеткалар 5мг, 10мг.
10 таблеткадан алюминий фольгадан жасалған (5 мг және 10 мг үшін) пішінді ұяшықты қаптамаға салынған.
3 пішінді қаптамадан медицинада қолданылуы жөніндегі мемлекеттік және орыс тілдеріндегі нұсқаулықпен бірге картоннан жасалған пәшкеге салынады.
Сақтау шарттары
Құрғақ, жарықтан қорғалған жерде, 30 ° С-ден аспайтын температурада сақтау керек.
Балалардың қолы жетпейтін жерде сақтау керек!
Сақтау мерзімі
3 жыл
Жарамдылық мерзімі өткеннен кейін пайдалануға болмайды.
Дәріханалардан босатылу шарттары
Рецепт арқылы
Өндіруші
Sun Pharmaceutical Industries Ltd.
Заңды мекенжайы:
Acme Plaza, Andheri-Kurla Road,
Andheri (E), Mumbai 400 059, Үндістан
Өндірістің орналасқан мекенжайы:
Survey №214, Plot №20, Government Industrial Area, Phase II, Silvassa-396 230, U.T of D&NH, Үндістан.
Тіркеу куәлігі иесінің атауы мен елі
Sun Pharmaceutical Industries Ltd, Үндістан
Қазақстан Республикасы аумағында тұтынушылардан өнім (тауар) сапасы жөніндегі шағымдарды қабылдайтын ұйымның мекенжайы:
050004, Алматы қ., Төлебаев к-сі, 38, 5 қабат
Тел. (727) 250-92-35, факс (727) 250-33-64
regulatory@intelsoft.kz, sunalmaty@intelsoft.kz