Анальгин (500 мг, Борисовский завод медицинских препаратов ОАО)

• русский
• қазақша

• Скачать инструкцию медикамента

Саудалық атауы

Анальгин

Халықаралық патенттелмеген атауы

Метамизол натрий

Дәрілік түрі

500 мг таблеткалар

Құрамы

Бір таблетканың құрамында

белсенді зат - 500 мг метамизол натрий,

қосымша заттар: тальк, натрий лаурилсульфаты, кальций стеараты, картоп крахмалы.

Сипаттамасы

Сызығы мен ойығы бар, жайпақ цилиндрлі, ақ немесе сарғыш реңді, ақ түсті таблеткалар

Фармакотерапиялық тобы

Анальгетиктер. Анальгетиктер – басқа да антипиретиктер. Пиразолондар. Натрий метамизолы.

АТХ коды N02ВВ02

Фармакологиялық қасиетері

Фармакокинетикасы

Ішке қабылдағаннан кейін метамизол натрий жылдам сіңеді және асқазан-ішек жолдарында белсенді метаболит 4-метиламино-антипирин түзе отырып, гидролизденеді, ол сіңгеннен кейін 4-формил-амино-антипиринге және басқа метаболиттерге метаболизденеді. Ішке қабылдағаннан кейін әсерінің басталуы 30-дан 60 минутқа дейін ауытқиды, ең жоғары концентрациясына қабылдағаннан кейін 2 сағаттан соң жетеді. Ішек қабырғаларында белсенді метаболит түзумен гидролизденеді – өзгермеген метамизол қанда болмайды. Белсенді метаболиттің ақуыздармен байланысу деңгейі 50-60 % құрайды. Бауырда ыдырайды. Бүйрек арқылы экскрецияланады.

Фармакодинамикасы

Анальгин ауыруды басатын, ыстықты түсіретін және әлсіз қабынуға қарсы әсер етеді. Пиразолон туындысы болып табылады.

Циклооксигеназаның белсенділігін басады, простагландиндердің, эндоперекистердің, оттегінің белсенді радикалдарының түзілуін азайтады.

Ганглиобульбарлы және спиноталамикалық жолдармен ауыру импульстарының берілуін азайтады, ауыру сезімталдығының таламикалық орталығының қозғыштығының шегін жоғарылатады. Жылудың берілуін арттырады.

Қолданылуы

- әртүрлі шығу тегімен орташа және төмен қарқындылықтағы ауыру синдромында (оның ішінде бас ауыруында, тіс ауыруында, радикулит кезіндегі ауыруларда, миозитте, невралгияда, миалгияда, артралгияда, жарақаттарда)

- басқа ыстықты түсіретін дәрілік заттардан әсер болмағанда, жоғары температурада

Қолдану тәсілі және дозалары

Препаратты тамақтанудан кейін, ішу арқылы қолданады. Таблеткаларды судың жеткілікті мөлшерімен ішу керек.

Ересектерге және 15 жастан үлкен балаларға күніне 2-3 рет 250-500 мг-ден (½-1 таблеткадан) тағайындайды. Ересектерге арналған ең жоғарғы доза: бір реттік - 1г (2 таблетка), тәуліктік доза - 3г-ден (6 таблетка) аспайды. Ауыру мен қызбаны бақылайтын ең төмен тиімді дозасын таңдау керек.

Ауыруды басатын дәрі ретінде қабылдау ұзақтығы 5 күннен және ыстықты түсіретін дәрі ретінде қабылдау ұзақтығы 3 күннен аспауы керек.

Препараттың тәуліктік дозасын немесе емдеу ұзақтығын арттыруды тек дәрігердің бақылауымен ғана жүргізуге болады.

Егде емделушілер. Егде емделушілерде метаболиттердің шығарылуы баяулау мүмкіндігіне байланысты дозасын төмендету керек.

Бүйрек функциясы төмендегенде және креатинин клиренсі бұзылуында доза төмендетілуі керек, өйткені метаболиттердің шығарылуы баяулауы мүмкін.

Бүйрек немесе бауыр функциясының бұзылуы

Бүйрек немесе бауыр функциясы төмендегенде жоғары дозаларын қабылдауға болмайды. Дозасын төмендетпей қысқа мерзімде қолдануға болады. Ұзақ уақыт қолдануға болмайды.

Жағымсыз әсерлері

Сирек

- жүрек айнуы, құсу, анорексия, асқазан маңының ауыруы, метеоризм, іш қатуы, диарея

- бас ауыруы, бас айналуы, қозу, ашуланшақтық

- аллергиялық реакциялар (тері бөртпесі, қышыну, ангионевротикалық ісіну),

мультиформалы экссудативті эритема (Стивенс-Джонсон синдромы),

уытты эпидермальді некролиз (Лайелл синдромы), бронхоспастикалық синдром, анафилактикалық шок

- парестезиялар, құлақтағы шуыл, көрудің бұзылуы, тремор, депрессия

- агранулоцитоз, лейкопения, анемия, тромбоцитопения (ұзақ уақыт қолданғанда)

- артериялық гипотензия, жүрек ырғағының бұзылуы

- олигурия, анурия, протеинурия, бүйрек функциясының бұзылуы,

интерстициальді нефрит

Қолдануға болмайтын жағдайлар

• метамизол натрий және пиразолонның басқа туындыларына немесе пиразолидиндерге (агранулоцитоз анықталған емделушілерді қоса) немесе таблеткалардың кез келген басқа компоненттеріне жоғары сезімталдық

– 15 жасқа дейінгі балаларға

• жүктілік және лактация кезеңі

• сыртартқысында аспириндік демікпе немесе қабынуға қарсы стероидты емес дәрілер және анальгетиктер (есекжем, ангионевротикалық ісіну) жақпайтын синдром;

– сүйек кемігі функциясының бұзылуы (мысалы, цитостатиктермен емделуден кейін) немесе қан түзу жүйесінің аурулары;

– тұқым қуалайтын гемолитикалық анемия, глюкозо-6-фосфатдегидрогеназаның тапшылығымен байланысты;

– систолалық артериялық қысымы 100 мм с.б. төмен науқастарға жедел мезгіл мезгіл порфирияда (порфирия ұстамасының пайда болу қаупінде).

Дәрілермен өзара әрекеттесуі

Этанол − этанолдың тыныштандыратын әсері күшейеді.

Хлорпромазин немесе фенотиазиннің басқа туындылары – бір мезгілде қолдану айқын гипотермияның дамуына әкелуі мүмкін.

Рентгеноконтрастылы заттар, коллоидты қан алмастырғыштар және пенициллинді Анальгинмен емделуде қабылдауға болмайды.

Циклоспорин − бір мезгілде қолданғанда қандағы циклоспориннің концентрациясы төмендейді.

Пероральді гипогликемиялық препараттар, тікелей емес антикоагулянттар, глюкокортикостероидтар (ГКС) және индометацин – Анальгин осы препараттардың белсенділігін олардың ақуызбен байланысын ығыстыру жолымен жоғарылатады.

Фенилбутазон, барбитураттар және басқа да бауырдың микросомальді ферменттерінің индукторлары бір мезгілде қолданғанда Анальгиннің тиімділігін төмендетеді.

Есірткілік емес анальгетиктер, үшциклді антидепрессанттар, гормональді контрацептивтер және аллопуринол - Анальгинді осы препараттармен бір мезгілде қолдану оның уыттылығының күшеюіне әкелуі мүмкін.

Седативті дәрілер және транквилизаторлар (сибазон, триоксазин, валокордин) Анальгиннің ауыруды басатын әсерін күшейтеді.

Кодеин, антигистаминдік дәрілер және пропранолол Анальгиннің әсерін күшейтеді.

Сульфаниламидті қантты төмендететін препараттармен (гипогликемиялық әсерін күшейтеді) және диуретиктермен (фуросемид) бір мезгілде қолданғанда сақтық шараларын сақтау керек.

Миелоуытты дәрілік заттар, тиамазол және сарколизин гематоуыттылығының күшеюіне әкеледі.

Айрықша нұсқаулар

Агранулоцитоз

Анальгинмен емдеу барысында температураның көтерілуімен, ауыз қуысы мен жұтқыншақ шырышының қабынуымен (некротикалық стоматитпен, іріңді-некротикалық баспамен), мұрын шырышының қабынуымен (гайморитпен), СОЭ жоғарылауымен көрініс бере отырып, емделушінің жалпы жай-күйі күтпеген жерден нашарлаған жағдайда анальгинді қабылдауды дереу тоқтату қажет, өйткені бұл симптомдар агранулоцитоздың өршуімен байланысты болуы ықтимал.

Препаратты дереу тоқтату және дәрігердің кеңесі қажет.

Анальгинге ауыр анафилактоидты реакциялардың даму қаупі төмендегілермен емделушілерде айтарлықтай жоғарылайды:

– есірткілік емес анальгетиктерге демікпе синдромымен немесе ангионевротикалық ісінумен

– қатар жүретін риносинуситпен және мұрын полипімен, созылмалы есекжеммен бронх демікпесінде

– бояғыштарды (тартразин) және консерванттарды (бензоаттар) көтере алмаушылықпен.

Жүрек-қан тамыр жүйесінің патологиясы бар адамдарда қолдану

Әсіресе систолалық қысымының деңгейі сынап бағаны бойынша 100 мм төмен немесе қан айналымының тұрақсыздығында (мысалы, миокард инфарктінде, көптеген жарақаттарда, басталған шокта), сыртартқысында бүйрек ауруларымен (пиелонефрит, гломерулонефрит) емделушілердің гемодинамикасына мұқият бақылау жасау қажет.

Іштің жедел ауыруы

Оның себептерін анықтағанша анальгинді іштің жедел ауыруын бәсеңдету үшін қолдануға болмайды.

Алкогольді шектен тыс қолданғанда сақтықпен тағайындайды.

Анальгиннің биотрансформациялық өнімдерінің несеппен шығарылуы несепті қызыл түске бояуы мүмкін, оның клиникалық мәні жоқ және ол препаратты тоқтатқаннан кейін қайтады.

Жүктілік және лактация

Метамизол натрийді жүктілік кезінде қолданудың қауіпсіздігі жөнінде жеткілікті деректер жоқ. Метамизол натрий простагландиндер синтезінің әлсіз тежегіші болып табылады, артериялық түтіктің уақытынан бұрын жабылу және перинатальді асқынулар мүмкіндігі жоққа шығарылмайды. Метамизол натрийдің метаболиттері емшек сүтіне бөлінетін болғандықтан анальгинді лактация кезінде қолдануға болмайды. Сирек жағдайларда анальгинді қабылдағаннан кейін 48 сағаттан соң емшекпен қоректендіруге болады.

Автокөлікті басқару немесе техникамен жұмыс жасау қабілетіне әсері

Анальгинді қабылдау автокөлікті басқару немесе әлеуетті қауіпті механизмдерді басқару қабілетіне әсер етпейді, бірақ оны ұзақ уақыт бойы қолдануда абай болу керек.

Артық дозалануы

Симптомдары: гипотермия, артериялық қысымның айтарлықтай төмендеуі, жүректің қағуы, ентігу, құлақтағы шуыл, жүрек айнуы, құсу, гастралгия, әлсіздік, олигурия, анурия, ұйқышылдық, сандырақтау, естен тану, тахикардия, құрысу синдромы; жедел агранулоцитоз, геморрагиялық синдром, жедел бүйрек және бауыр жеткіліксіздігі, тыныс алу бұлшықеттерінің салдануы дамуы мүмкін.

Емі: құсуды шақыру, асқазанды зондпен шаю, тұзды іш жүргізетіндерді белсендірілген көмірді тағайындау. Қарқынды диурез, гемодиализ жүргізу, қанды сілтілендіру, өмірлік маңызы бар функцияларын демеуге бағытталған симптоматикалық ем. Құрысу синдромы дамыған жағдайда диазепам мен жылдам әсер ететін барбитураттарды көктамыр ішіне енгізеді.

Шығарылу түрі және қаптамасы

МЕМСТ 25250-88 бойынша поливинилхлоридті үлбірден және МЕМСТ 745-2003 бойынша лакпен басылған алюминий фольгадан жасалған пішінді ұяшықты қаптамаға 10 таблеткадан салынған.

2 пішінді ұяшықты қаптама медицинада қолданылуы жөніндегі мемлекеттік және орыс тілдеріндегі нұсқаулықпен бірге картон қорапшаға салынған.

10 таблеткадан ТУ РБ 00916408.001-94 бойынша қағаз және картон негізіндегі біріктірілген материалдан жасалған пішінді ұяшықсыз қаптамаларға салынған.

Пішінді ұяшықсыз қаптамалар медицинада қолданылуы жөніндегі мемлекеттік және орыс тілдеріндегі нұсқаулықтардың сәйкес санымен бірге топтық қаптамаға салынады.

Топтық қаптама және тасымалдайтын ыдыс МЕМСТ 17768-90 сәйкес.

Сақтау шарттары

Құрғақ, жарықтан қорғалған жерде, 25 ºС-ден аспайтын температурада.

Балалардың қолы жетпейтін жерде сақтау керек.

Сақтау мерзімі

5 жыл

Жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецептісіз

Өндіруші

«Борисов медициналық препараттар зауыты» ашық акционерлік қоғамы, Беларусь Республикасы, Минск обл., Борисов қ., Чапаев көшесі, 64/27

тел/факс 8-(10375177)744280

Тіркеу куәлігінің иесі

«Борисов медициналық препараттар зауыты» ашық акционерлік қоғамы, Беларусь Республикасы

Тұтынушылардан өнім (тауар) сапасына қатысты шағымдарды Қазақстан Республикасы аумағында қабылдайтын ұйымның мекенжайы:

«Борисов медициналық препараттар зауыты» ашық акционерлік қоғамы, Беларусь Республикасы, Минск обл., Борисов қ., Чапаев көшесі, 64/27

тел/факс 8-(10375177) 744280, электронды поштасы market@borimed.com