Аналергин Д
Инструкция
-
русский
-
қазақша
Саудалық атауы
Аналергин-Д
Халықаралық патенттелмеген атауы
Дезлоратадин
Дәрілік түрі
Үлбірлі қабықпен қапталған таблеткалар, 5 мг
Құрамы
Бір таблетканың құрамында
белсенді зат - 5 мг дезлоратадин,
қосымша заттар: микрокристалды целлюлоза, желатинделген крахмал, коллоидты кремнийдің қостотығы, тальк
қабық: Опадри ІІ 32В30506 blue (лактоза моногидраты, гипромеллоза 15 сР Е464, индигокармин (Е132), титанның қостотығы (Е171), макрогол 400)
Сипаттамасы
Дөңгелек пішінді, екі беті дөңес, үлбірлі қабықпен қапталған, көгілдір түсті, бір жағында ақ түсті «DC5» өрнегі бар таблеткалар.
Фармакотерапиялық тобы
Жүйелі әсер ететін антигистаминдік препараттар. Жүйелі әсер ететін басқа антигистаминдік препараттар. Дезлоратадин.
АТХ коды R06AХ27
Фармакологиялық қасиеттері
Фармакокинетикасы
Сіңуі
Препаратты ішке қабылдағаннан кейін дезлоратадин асқазан-ішек жолынан (АІЖ) жақсы сіңіріледі, сонымен қатар дезлоратадиннің қан плазмасында анықталатын концентрацияларына 30 минут ішінде, ал плазмадағы ең жоғарғы концентрациясына (Cmax) - шамамен 3 сағаттан соң жетеді. Ас немесе алкоголь ішу іс жүзінде препараттың фармакологиялық қасиеттерін өзгертпейді.
Таралуы
Дезлоратадиннің плазма ақуыздарымен байланысуы 83-87% құрайды. 5 мг-ден 20 мг дейінгі дозада 14 күн бойы тәулігіне 1 рет қолданғанда дезлоратадиннің клиникалық маңызды жинақталу белгілері анықталмаған. Бір мезгілде ас ішу немесе грейпфрут шырынын бір мезгілде қолдану дезлоратадиннің таралуына (7,5 мг дозада тәулігіне 1 рет қабылдағанда) әсер етпейді. Гематоэнцефалдық бөгет (ГЭБ) арқылы өтпейді.
Метаболизмі
Глюкуронидпен байланысқан 3-ОН-дезлоратадин түзе отырып гидроксилдену арқылы қарқынды метаболизмге ұшырайды. CYP3A4 және CYP2D6 изоферменттерінің тежегіші болып табылмайды және Р-гликопротеин субстраты немесе тежегіші болып табылмайды.
Шығарылуы
Организмнен глюкуронидтік қосылыс түрінде және азғантай мөлшерде өзгермеген күйде шығарылады, азғантай бөлігі бүйрекпен (2%) және нәжіс массаларымен (7%) шығарылады. Жартылай шығарылу кезеңі (T1/2) орташа алғанда 27 сағатты (20-30 сағат) құрайды.
Фармакодинамикасы
Ұзақ әсер ететін антигистаминдік препарат, Н1-гистаминдік шеткергі рецепторлардың блокаторы. Дезлоратадин лоратадиннің бастапқы белсенді метаболиті болып табылады. Аллергиялық қабыну реакцияларының каскадын, соның ішінде ИЛ-4, ИЛ-6, ИЛ-8, ИЛ-13 интерлейкиндерін қоса, қабыну цитокиндерінің босап шығуын, қабыну хемокиндерінің босап шығуын, супероксидтік аниондардың белсенділенген полиморфты ядролы нейтрофилдерден өндірілуін, эозинофилдердің адгезиясы мен хемотаксисін, Р-селектин, IgE негіз болған гистаминнің, простагландин D2 мен лейкотриен С4 босап шығуы сияқты адгезия молекулаларының бөлініп шығуын тежейді. Осылайша, аллергиялық реакциялардың дамуының алдын алады және ағымын жеңілдетеді, қышынуға қарсы және экссудатқа қарсы әсерге ие, қылтамырлардың өткізгіштігін азайтады, тіндердің ісінуі, тегіс бұлшықет түйілуі дамуының алдын алады.
Препарат орталық жүйке жүйесіне (ОЖЖ) әсер етпейді, іс жүзінде седативтік әсері жоқ (ұйқышылдық тудырмайды) және психомоторлық реакциялардың жылдамдығына әсер етпейді, электрокардиограммада (ЭКГ) QT аралығының ұзаруын тудырмайды.
Дезлоратадиннің әсері ішке қабылдағаннан кейін 30 минут ішінде басталады және 24 сағат бойына созылады.
Қолданылуы
- маусымдық (поллиноз) және жыл бойғы аллергиялық ринитте (түшкіруді, мұрынның бітелуін, мұрынның қышуын, таңдайдың қышуын, көздің қышуын және қызаруын, көзден жас парлауды басу немесе жеңілдету үшін).
- созылмалы идиопатиялық есекжемде (терінің қышынуын, бөртуін азайту немесе басу үшін)
Қолдану тәсілі және дозалары
Ішке, ас ішуге байланыссыз, тәуліктің бір мезгілінде. Таблетканы тұтастай, шайнамай, аздаған сумен іше отырып жұту керек.
Ересектер мен 12 жастан асқан балаларға: тәулігіне 1 рет 5 мг-ден.
Жағымсыз әсерлері
Жиі ( >1%, <10%)
- қатты қажу
Жиі емес (≥1/1000, <1/100)
- бас ауыруы
- ауыздың құрғауы
Сирек (≥1/10 000, <1/1000)
- бөртпе, соның ішінде есекжем, ангионевротикалық ісіну, диспноэ, анафилактикалық шок
- бас айналуы, ұйқышылдық, ұйқысыздық, психомоторлық аса жоғары белсенділік, құрысулар, елестеулер
- тахикардия, жүректің қағуы сезімі
- жүрек айнуы, құсу, диспепсия, диарея, іштің ауыруы, «бауыр трансаминазалары» белсенділігінің жоғарылауы, билирубин концентрациясының жоғарылауы, гепатит
- миалгия
Қолдануға болмайтын жағдайлар
- дезлоратадинге немесе препараттың басқа компоненттеріне жоғары сезімталдық
- жүктілік және лактация кееңі
- 12 жасқа дейінгі балаларға
- тұқым қуалайтын лактоза/галактозаны көтере алмаушылық, лактаза тапшылығы, глюкоза/галактоза мальабсорбциясы
Дәрілермен өзара әрекеттесуі
Басқа дәрілік препараттармен клиникалық маңызды өзара әрекеттесуі анықталмаған.
Дезлоратадин этанолдың ОЖЖ-ға әсерін күшейтпейді.
Ас ішу препараттың тиімділігіне әсер етпейді.
Айрықша нұсқаулар
Бүйректің ауыр жеткіліксіздігі кезінде сақтықпен қолдану керек.
Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері
Орталық жүйке жүйесі тарапынан ұйқышылдық, бас айналуы, елестеулер сияқты жағымсыз реакциялар дамыса, жоғары зейін шоғырландыру мен психомоторлық реакциялардың жылдамдығын талап ететін жұмыстарды орындау ұсынылмайды.
Артық дозалануы
Симптомдары: ұсынылғанынан 5 есе асатын дозасын қабылдау қандай-да бір симптомдарының пайда болуына алып келмеген.
Клиникалық зерттеулер барысында ересектер мен жасөспірімдерде дезлоратадинді 14 күн бойы 20 мг дозада күн сайын қолдану жүрек-қантамыр жүйесі тарапынан статистикалық немесе клиникалық маңызды өзгерістермен қатар жүрмеген.
Клиникалық-фармакологиялық зерттеуде дезлоратадинді тәулігіне 45 мг дозада (ұсынылғанынан 9 есе жоғары) 10 күн бойы қолдану QT аралығының ұзаруын туғызған жоқ және күрделі жағымсыз әсерлерінің пайда болуымен қатар жүрген жоқ.
Емі: асқазанды шаю, белсендірілген көмірді қабылдау; қажет болса – симптоматикалық ем. Дезлоратадин гемодиализ кезінде шығарылмайды, перитонеальді диализдің тиімділігі анықталмаған.
Шығарылу түрі және қаптамасы
10 таблеткадан алюминий фольга мен поливинилхлоридті үлбірден жасалған пішінді ұяшықты қаптамада.
1 пішінді ұяшықты қаптамадан медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салынған.
Сақтау шарттары
Құрғақ, жарықтан қорғалған жерде, 25˚С-ден аспайтын температурада сақтау керек.
Балалардың қолы жетпейтін жерде сақтау керек!
Сақтау мерзімі
2 жыл
Қаптамасында көрсетілген жарамдылық мерзімі өткеннен кейін пайдалануға болмайды.
Дәріханалардан босатылу шарттары
Рецепт арқылы
Өндіруші
Teva Pharmaceutical Works Private Limited Company, Венгрия
Тіркеу куәлігінің иесі
«Тeva Pharmaceutical Industries Ltd», Израиль
Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы:
«ратиофарм Қазақстан» ЖШС
050040, Қазақстан Республикасы
Алматы қ., Әл-Фараби даңғылы 19,
Нұрлы Тау бизнес орталығы 1Б, 603 кеңсе
Телефон, факс (727) 311-09-15; 311-07-34
E-mail teva@teva.co.il