Амлодикард (5 мг)

Амлодикард

Амлодипин

2.5 мг, 5 мг және 10 мг таблеткалар

Бір таблетканың құрамында

белсенді зат - 3.475 мг, 6.950 мг және 13.900 мг амлодипин бесилаты (2.500 мг, 5.000 мг және 10.000 мг амлодипинге баламалы);

қосымша заттар: микрокристалды целлюлоза, натрий крахмалының гликоляты (А типі) (Гликолиз), магний стеараты, сусыз коллоидты кремнийдің қостотығы (аэросил).

Ақ немесе ақ дерлік түсті, беті жалпақ цилиндрлі дөңгелек пішінді, сызығы және екі жақты ойығы бар таблеткалар.

«Баяу» кальций өзектерінің селективті блокаторлары. Дигидропиридин туындылары. Амлодипин.

АТХ коды С08СА01

Сіңуі

Емдік дозаларда ішке қабылдағаннан кейін амлодипин жақсы сіңіріліп, қабылдаудан кейін 6-12 сағаттан соң ең жоғары концентрациясына жетеді. Абсолюттік биожетімділігі 64 - 80% құрайды. Таралу көлемі шамамен 21 л/кг тең. Қан плазмасы ақуыздарымен байланысуы шамамен 97,5% құрайды. Тамақ ішу амлодипиннің сіңуіне ықпалын тигізбейді, гематоэнцефалдық бөгет арқылы өтеді.

Биотрансформациясы және элиминациясы

Қан плазмасынан жартылай шыарылу кезеңі (Т1/2) 35 - 50 сағатқа жуықты құрайды, ол препараттың тәулігіне бір рет тағайындауға сәйкес келеді. Қан плазмасында тепе-тең тұрақты концентрацияға амлодипинді 7-8 күн ұдайы қабылдағаннан кейін жетеді, ол бауырда метаболизденіп, белсенді емес метаболиттер түзеді; бастапқы препараттың 10%-ы және метаболиттердің 60%-ы несеппен бірге шығарылады. Емшек сүтімен шығарылуы белгісіз. Гемодиализ барысында шығарылмайды.

Егде жастағы пациенттерде қолданылуы

Қан плазмасында амлодипинннің ең жоғары шектегі концентрацияға жету уақыты егде жастағылар мен жас пациенттерде ұқсас. Егде жастағы пациенттерде амлодипиннің клиренсінің төмендеуге түр бар, бұл AUC пен жартылай шығарылу кезеңінің артуына әкеледі. Жүрек функциясының іркілген жеткіліксіздігі бар пациенттерде AUC пен жартылай шығарылу кезеңінің артуы зерттелетін тұрғындардың жас тобындағы күтілетін мәндеріне сәйкес келді.

Педиатрияда қолданылуы 

Дене салмағының медианасы 45 кг болатын пациенттердегі клиренс көрсеткіштері ер балаларда сағатына 23,7 л және қыз балаларда сағатына 17,6 л құрады. Бұл көрсеткіштер дене салмағы 70 кг ересек адам үшін сағатына 24,8 л тең жарияланған есептік мәнге жақын ауқымда болады. Дене салмағы 45 кг пациенттер үшін таралуының орташа есептік көлемі 1130 л (25,11 л/кг) құрады. Препарат дозалар арасындағы 24 сағаттық аралық ішінде артериялық қысымды сақтады, мұндайда препарат концентрациясының ең жоғарыдан төменге дейін ауытқуы препараттың гипотензиялық әсеріне аздаған ықпалын тигізді. Ересектерде ертеректе байқалған фармакокинетикасымен салыстырғанда, нәтижелері препаратты тәулігіне бір рет жиілікпен қабылдау керек екендігін көрсетеді.

Фармакодинамикасы

Амлодикард препаратының белсенді заты – амлодипин дигидропиридиннің туындысы болып табылады. Дигидропиридинді рецепторлармен байланыса отырып, "баяу" кальций өзектерін (кальций иондарының түсу антагонисі) бөгейді, кальцийдің жүрек пен қантамырдың тегіс бұлшықеттері жасушаларының ішіне (кардиомиоциттерге қарағанда үлкен дәрежеде – қантамырлардың тегіс бұлшықет жасушаларына) трансжарғақшалық өтуін тежейді.

Гипотензиялық және антиангинальді әсер береді.  Амлодикардтың гипотензиялық әсерінің механизмі қантамырлардағы тегіс бұлшықеттерге тікелей босаңсытатын әсер беруімен жүзеге асады. Амлодикардтың антиангинальді толық әсері әлі де зерттелген жоқ, бірақ жалпы ишемиялық жүктеменің төмендеуі әсер етудің келесі екі механизмі есебінен жүреді:

1) амлодипин шеткергі артериолаларды кеңейтеді және сөйтіп, жүректің жұмысына қарсы бағытталған жалпы шеткергі кедергіні (кейінгі жүктемені) төмендетеді. Жүректің жиырылу жиілігі тұрақты күйінде қалатын болғандықтан, бұл энергияны қажет етудің және миокардтың оттегіні қажет етуінің төмендеуіне әкеледі.

2) амлодипин негізгі коронарлы артерияларды және артериолаларды миокардтың қалыпты, сонымен қатар ишемияланған аймақтарында да кеңейтеді, бұл вазоспазмдық стенокардиясы (Принцметал стенокардиясы) бар науқастарда миокардқа оттегінің түсуін арттырады және темекі тартудан туындайтын коронарлы спазмға жол бермейді.

Артериялық гипертензиясы бар науқастарда Амлодикардтың бір реттік тәуліктік дозасы артериялық қысымның 24 сағат бойы, "жатқан", сонымен қатар "түрегеліп тұрған" кезде де төмендеуін қамтамасыз етеді. Амлодикард әсерінің баяу басталуының арқасында, ол артериялық қысымның күрт төмендеуін туындатпайды.

Стенокардиясы бар науқастарда препараттың бір реттік тәуліктік дозасы дене жүктемесіне төзімділікті арттырады, дене жүктемесі аясында стенокардия ұстамасының және ST сегменті (1 мм-ге) депрессиясының дамуын кідіртеді, стенокардия ұстамаларының жиілігін және нитроглицеринді пайдалануды азайтады.

Амлодикардты қабылдау қандай да болмасын жағымсыз метаболизмдік әсерлермен немесе қан плазмасының липидтік параметрлерінің өзгеруімен қатар жүрген жоқ; препарат демікпесі, диабеті немесе подаграсы бар пациенттерде қолданылуы мүмкін.

Жүрек-қантамыр аурулары (қантамырлардың біреуі және артериялардың 3-уі және одан көбірегінің стенозына дейін зақымданған коронарлы атеросклерозды және күре тамыр артерияларының атеросклерозын қоса) бар, коронарлы артериялардың терілік транслюминальді ангиопластикасы (ТЛП) арқылы миокард инфарктісін бастан кешкен немесе стенокардиядан зардап шегіп жүрген пациенттерде Амлодикардты қолдану күре тамыр артериялары интима-медиясының қалыңдауының дамуына жол бермейді. Сондай-ақ Амлодикардты қолдану  жүрек-қантамырлар себебінен болатын өлімді, миокард инфарктісін, инсультті, ТЛП, аорта-коронарлы шунттауды едәуір төмендетеді, тұрақсыз стенокардияға және жүрек функциясының үдеген созылмалы жеткіліксіздігіне (ЖСЖ) байланысты ауруханаға жатқызу санының азаюына әкеледі, коронарлы қан ағынын қалпына келтіруге бағытталған араласымдар жиілігін төмендетеді.

Бала жастағы (6-дан 17жасқа дейін) пациенттерде қолданылуы

6-дан 17 жасқа дейінгі бала пациенттерге қолданғанда артериялық гипертензиясы бар 268 пациентте Амлодикардтың тиімді болғаны көрсетілді. Бастапқы жағдаймен салыстырғанда тәулігіне бір рет 5 мг қабылдау систолалық және диастолалық артериялық қысымның статистикалық тұрғыдан маңызды төмендеуіне әкелді. Жас топтарын талдау 6-дан 13 жасқа дейінгі жас пациенттердегі тиімділік көрсеткіштерінің 14-тен 17 жасқа дейінгі жасы үлкенірек пациенттердегі көрсеткіштерге ұқсас екендігін көрсетті.

-​ артериялық гипертензияда

- Принцметал стенокардиясында

- созылмалы тұрақты стенокардияда

Артериялық гипертензияда және стенокардияда әдеттегі бастапқы доза 5 мг құрайды, науқастың жекелей реакциясына байланысты оны ең жоғары 10 мг-ге дейін арттыруға болады.

Емдеу курсын емдуші дәрігер белгілейді.

Амлодикард ішке, тәулігіне бір рет, судың қажетті мөлшерімен (100 мл) ішіп қабылданады.

Тиазидтік диуретикті, бета-блокаторларды және ангиотензин өзгертуші фермент тежегіштерін қатар қабылдағанда Амлодикардтың дозасын түзету қажет емес.

Егде жастағы адамдарда қолданылуы

Дозалаудың әдеттегі режимі ұсынылады.

Препарат дозасын түзету қажет емес.

Балаларда қолданылуы

6–17 жастағы балалар үшін ұсынылатын гипертензияға қарсы пероральді доза тәулігіне бір рет 2.5-тен 5 мг-ге дейінді құрайды. Тәулігіне 5 мг-ден жоғары дозалар пациенттердің осы популяциясында зерттелген жоқ.

Амлодикардтың 6 жасқа толмаған  балалардағы артериялық қысымға әсері белгісіз.

Бауыр функциясы бұзылған пациенттерде қолданылуы

Кальцийдің басқа агонистері жағдайындағы сияқты, амлодипиннің жартылай шығарылу кезеңі бауыр функциясы бұзылған пациенттерде ұзарады; мұндай пациенттер үшін дозалауға қатысты нұсқаулар белгіленген жоқ. Осыған байланысты бұл препарат бауыр функциясы бұзылған пациенттерде сақтықпен қолданылуы тиіс.

Бүйрек функциясы бұзылған пациенттерде қолданылуы

Бүйрек функциясы бұзылған пациенттерде Амлодикард әдеттегі дозаларда қолданылуы мүмкін. Қан плазмасында амлодипин концентрацияларының өзгерулері бүйрек функциясының бұзылу қарқындылығына байланысты емес. Амлодикард диализге келмейді, алайда Т1/2 аздап артуы мүмкін екендігін ескеру қажет.

Тиазидтік диуретиктерді, бета-адреноблокаторларды немесе ангиотензин-өзгертуші фермент (АӨФ) тежегіштерін бір мезгілде қолданғанда Амлодикардтың дозалану режимін өзгерту қажет емес.  

Амлодикардтың жағымдылығы жақсы.

Өте жиі

- бас ауыру, бас айналу

- ұйқышылдық

- жүрек қағуының жиілеуі

- беттің қызаруы

- іштің ауыруы, жүректің айнуы

- қажығыштық

- ісінулер

Препаратты тіркеуден кейін қолданғанда байқалған жағымсыз әсерлер

Жиілігі аз

- лейкопения, тромбоцитопения

- гипергликемия

- ұйқысыздық, көңіл-күйдің құбылмалылығы

- гипестезия/парастезия, шеткергі нейропатия, естен тану, дисгевзия,

тремор

- көру жітілігінің төмендеуі

- құлақтың шыңылдауы

- гипертония, гипотония, васкулит

- жөтел, ентігу, ринит

- ауыздың кеберсуі, диспепсия (гастритті қоса), гипертрофиялық гингивит,

панкреатит, құсу, нәжістің өзгеруі

- алопеция, гипергидроз, пурпура, тері түсінің өзгеруі, есекжем

- артралгиялар, арқаның ауыруы, бұлшықет түйілулері, миалгиялар

- поллакиурия, несеп шығарудың бұзылыстары, никтурия

- гинекомастия, эректильді дисфункция

- жалпы әлсіздік, жайсыздық, ауыру

- салмақтың артуы/төмендеуі

Сирек

- аллергиялық реакциялар, терінің қышуын, бөртпені, Квинке ісінуін, мультиформалы эритеманы қоса

- гепатит, сарғаю, бауыр ферменттері деңгейінің жоғарылауы (негізінен холестазға тән құбылыстар байқалды)

Кальций өзектерінің басқа блокаторларын қолданған кездегі сияқты, келесі жағымсыз құбылыстарды, олар туралы мәлімдемелердің сирек болғанына қарамастан, негізгі аурудың табиғи ағымынан бөліп қарау мүмкін емес:

- миокард инфарктісі

- аритмиялар (соның ішінде брадикардия, қарыншалық тахикардия және жыпылықтағыш аритмия)

- кеуденің ауыруы

Бала жастағы (6–17 жас) пациенттер

Балалардағы жағымсыз құбылыстар ересектерде байқалғандарға ұқсас болды. Көбіне төменде берілген жағымсыз құбылыстар жөнінде мәлімделді.

- бас ауыру, бас айналу

- вазодилатация

- мұрыннан қан кету

- іштің ауыруы

- жалпы әлсіздік

-​ амлодипинге және дигидропиридиннің басқа туындыларына, сондай-ақ препараттың құрамына кіретін қосымша заттарға жоғары сезімталдық

Амлодикардты тиазидтік диуретиктермен, альфа-адреноблокаторлармен, бета-блокаторлармен, ангиотензин - өзгертуші фермент тежегіштерімен, әсер етуі ұзаққа созылатын нитраттармен, сублингвальді нитроглицеринмен, қабынуға қарсы стероидты емес препараттармен, антибиотиктермен және пероральді гипогликемиялық дәрілік препараттармен бірге тағайындау қауіпсіз.

Іn vitro зерттеу деректері Амлодикардтың дигоксин, фенитоин, варфарин немесе индометацин сияқты препараттардың қан плазмасы ақуыздарымен байланысуына ықпалын тигізбейтінін көрсетеді.

Симвастатин

10 мг доза Амлодикардты және 80 мг доза симвастатинді бірге көп реттік қабылдау, симвастатинмен монотерапиямен салыстырғанда, симвастатин экспозициясының 77%-ға артуына әкелді. Сондықтан амлодипин қабылдап жүрген пациенттерде симвастатиннің ең жоғары дозасы тәулігіне 20 мг-ге дейін болуы тиіс.

Грейпфрут шырыны

240 мл грейпфрут шырынын 10 мг Амлодикардтың бір реттік пероральді дозасымен бір мезгілде қолдану амлодипиннің фармакокинетикасына маңызды ықпалын тигізген жоқ. Зерттеу амлодипиннің метаболизміне жауапты негізгі фермент – CYP3A4-тің генетикалық полиморфизмінің ықпалын білуге мүмкіндік берген жоқ, сондықтан Амлодикардты грейпфрутпен немесе грейпфрут шырынымен бірге қолдану ұсынылмайды, өйткені биожетімділігі жоғарылауы мүмкін, бұл артериялық қысымы жоғары кейбір пациенттерде кенеттен болатын гипотензиялық әсерді туындатуы мүмкін.

CYP3A4 тежегіштері

Тәуліктік 180 мг доза дилтиаземді 5 мг Амлодикардпен бір мезгілде қолдану артериялық гипертензиясы бар егде жастағы (69 - 87 жас) пациенттерде амлодипиннің жүйелік әсерінің 57%-ға артуына әкелді. Эритромицинді бір мезгілде қолданғанда дені сау (18-ден 43 жасқа дейінгі) адамдарда амлодипиннің жүйелік әсері айтарлықтай өзгерген жоқ (AUC артуы 22%). Осы деректердің клиникалық маңызы анықталмаса да, егде жастағы адамдарда фармакокинетикалық өзгерулер өте айқынырақ болуы мүмкін.

CYP3A4 күшті тежегіштері (мысалы, кетоконазол, итраконазол, ритонавир), дилтиаземге қарағанда, Амлодикардтың плзмалық концентрацияларын үлкен дәрежеде арттыруы мүмкін. Сондықтан Амлодикардты CYP3A4 тежегіштерімен бірге сақтықпен пайдаланған жөн.

CYP3A4 индукторлары

CYP3A4 индукторларының Амлодикардқа ықпалы жөнінде деректер жоқ. CYP3A4 индукторларын (мысалы, рифампицинді немесе шайқурай (hypericum perforatum) препараттарын бір мезгілде қолдану плазмада амлодипиннің концентрациясын едәуір төмендетуі мүмкін. Сондықтан Амлодикардты CYP3A4 индукторларымен бірге сақтықпен пайдаланған жөн.

Келесі зерттеулерде төменде берілгендерді бір мезгілде қолданғанда Амлодикардтың да, зерттелген басқа препараттың да фармакокинетикасында ешқандай айтарлықтай өзгерулер болған жоқ.

Басқа дәрілік заттардың Амлодикардқа ықпалына жүргізілген арнайы зерттеулер

Циметидин

Амлодикардты циметидинмен бір мезгілде тағайындау амлодипиннің фармакокинетикасын өзгертпейді.

Алюминий/Магний (антацид)

Алюминий/магний антацидтерін Амлодикардтың бір реттік дозасымен бір мезгілде қолдану Амлодикардтың фармакокинетикасына елеулі ықпалын тигізген жоқ.

Силденафил (Виагра)

Бір реттік 100 мг доза силденафил артериялық гипертониясы бар пациенттерде Амлодикардтың фармакокинетикалық параметрлеріне ықпалын тигізген жоқ. Амлодикард пен силденафил біріктірілімін қолданғанда әрбір препарат қан қысымын төмендетуге өздігінен әсерін тигізді.

Амлодикардтың басқа дәрілік препараттарға ықпалына жүргізілген арнайы зерттеулер

Аторвастатин

Көп реттік 10 мг доза Амлодикардты және 80 мг аторвастатинді бір мезгілде қолдану тепе-тең жағдайда аторвастатиннің фармакокинетикалық параметрлерінің елеулі өзгерулеріне әкелген жоқ.

Дигоксин

Амлодикардты дигоксинмен бір мезгілде қолдану сарысудағы дигоксин концентрациясын немесе дигоксиннің бүйректік клиренсін өзгерткен жоқ.

Этанол (спирт)

10 мг Амлодикардтың бір реттік және көп реттік дозалары этанолдың фармакокинетикасына елеулі ықпалын тигізген жоқ.

Варфарин

Амлодипинді варфаринмен бір мезгілде қолдану варфариннің әсер етуімен протромбин уақытының өзгеру жауабын өзгерткен жоқ.

Циклоспорин

Циклоспоринмен фармакокинетикалық зерттеулер Амлодикардтың циклоспориннің фармакокинетикасын айтарлықтай өзгертпейтінін көрсетті.

Амлодикардты синустық түйін әлсіздігі синдромы, митральді стенозы, гипертрофиялық обструкциялық кардиомиопатиясы, артериялық гипотензиясы бар науқастар қабылдағанда сақтық танытуы қажет.

Зерттеулерде Амлодикардты қолданумен байланысты зертханалық тестілерде клиникалық тұрғыдан ешқандай ауытқулар байқалған жоқ.

Ауруханаға жатқызуды қажет ететін жағымсыз әсерлердің біршама жеткілікті ауыр жағдайлары Амлодикардты пайдалануға қатысты тіркелді. Көптеген жағдайларда себептік-салдарлық байланысы анықталмады.

Бауыр функциясы бұзылған пациенттерде қолданылуы

Кальцийдің басқа антагонистері жағдайындағы сияқты, Амлодикардтың жартылай шығарылу кезеңі бауыр функциясы бұзылған пациенттерде ұзарады. Осыған байланысты бұл препарат мұндай пациеттерде сақтықпен қолданылуы тиіс.

Жүктілік және лактация кезеңі

Амлодикардты жүктілік және бала емізу кезінде қолданудың қауіпсіздігі анықталған жоқ, сондықтан жүктілік кезінде ана үшін пайдасы шарана мен жаңа туған нәресте үшін қаупінен басым болған жағдайда ғана қолданылуы мүмкін.  

Көлік құралын немесе қауіпті механизмдерді басқару қабілетіне дәрілік заттың ықпал ету ерекшеліктері

Амлодикардтың ықтимал жағымсыз әсерлерін ескеріп, автомобильді басқарғанда немесе қауіпті механизмдермен жұмыс жасағанда сақтық танытқан жөн.  

Симптомдары: артериялық қысым айқын төмендеп, рефлекторлы тахикардия және шамадан тыс шеткергі вазодилатация дамуы мүмкін (айқын және тұрақты артериялық гипотензияның пайда болуы, соның ішінде шоктың дамуы және өліммен аяқталу орын алуы мүмкін, осындай жағдайлар жөнінде мәліметтердің жоқ екендігіне қарамастан).

Емі: белсендірілген көмір тағайындау (Амлодикардтың 10 мг дозасын қабылдағаннан кейін бірден немесе екі сағат ішінде амлодипиннің сіңірілуінің едәуір азайғаны білінді). Кейбір жағдайларда асқазанды шаю өзін ақтауы мүмкін. Амлодипиннің артық дозалануы салдарынан клиникалық тұрғыдан маңызды гипотензия, жүрек және тыныс алу функцияларына үнемі мониторингті, аяқ-қолды көтеруді, айналымдағы сұйықтық көлеміне және шығарылатын несепке көңіл бөлуді қоса, белсенді жүрек-қантамырлық демеуді қажет етеді. Қантамырлық тонустың және артериялық қысымның қалпына келуіне, егер қолданылуына қарсы көрсетілімдер жоқ болса, вазоконстриктор мүмкіндік беруі мүмкін. Кальций глюконатын көктамырішілік енгізу кальций өзектерінің бөгеу әсерінің қайтуына ықпал етуі мүмкін.

Қантамырлық тонустың және АҚ қалпына келуі үшін, егер қарсы көрсетілімдері жоқ болса, қантамырларды тарылатын препараттар (допамин, норадреналин) пайдалы болуы мүмкін. Кальций глюконатын көктамырішілік енгізу пайдаланылады, ол кальций өзектерінің бөгетіне қарсы әсер беруге жәрдем болуы мүмкін. Амлодикард қан сарысуының ақуыздарымен елеулі дәрежеде байланысатын болғандықтан – гемодиализдің пайдалы болуы екіталай.

Шығарылу түрі және қаптамасы

Поливинилхлоридті немесе соған ұқсас импортты үлбірден және лакталған баспалы алюминий немесе соған ұқсас импортты фольгадан жасалған пішінді ұяшықты қаптамаға 10 таблеткадан салынған.

Пішінді ұяшықты 3 қаптама медициналық қолдану жөнінде мемлекеттік және орыс тілдеріндегі нұсқаулықпен бірге тұтынушылық ыдысына арналған картон қорапшаға немесе соған ұқсас импортты қорапшаға салынған.

Бірінші немесе екінші қаптамасы медициналық қолдану жөнінде мемлекеттік және орыс тілдеріндегі нұсқаулықтың тиісінше санымен бірге гофрланған картон жәшікке салынған.

Құрғақ, жарықтан қорғалған жерде, 25 С-ден аспайтын температурада сақтау керек.

Балалардың қолы жетпейтін жерде сақтау керек!

4 жыл

Жарамдылық мерзімі өткеннен кейін пайдалануға болмайды.

Рецепт арқылы

Өндіруші

«Павлодар фармацевтикалық зауыты» ЖШС,

Қазақстан, Павлодар қ., 140011, Қамзин к-сі, 33

Қаптаушы ұйым

«Павлодар фармацевтикалық зауыты» ЖШС,

Қазақстан, Павлодар қ., 140011, Қамзин к-сі, 33

«Павлодар фармацевтикалық зауыты» ЖШС, Қазақстан

Тұтынушылардан өнім (тауар) сапасы жөніндегі шағымдарды Қазақстан Республикасы аумағында қабылдайтын және тіркеуден кейін дәрілік заттың қауіпсіздігін бақылауға жауапты ұйымның мекенжайы

«Павлодар фармацевтикалық зауыты» ЖШС, Қазақстан, Павлодар қ., 140011, Қамзин к-сі, 33, тел./факс: 8 (7182) 61-79-63/61-79-62, pfz.registration01-pp@romat.kz