Амиодарон-Акри®

• русский
• қазақша

• Скачать инструкцию медикамента

Саудалық атауы

Амиодарон-Акри®

Халықаралық патенттелмеген атауы

Амиодарон

Дәрілік түрі

200 мг таблеткалар

Құрамы

Бір таблетканың құрамында

белсенді зат - 200 мг амиодарон гидрохлориді,

қосымша заттар: картоп крахмалы, микрокристалды целлюлоза, магний стеараты, кросповидон (Коллидон CL-M), кремнийдің коллоидты қостотығы, гипромеллоза (гидроксипропилметилцеллюлоза).

Сипаттамасы

Ақ түстен сұрғыш немесе ақ сары реңді ақ түске дейінгі, жалпақ цилиндрлі, кертігі және сайы бар таблеткалар. Сәл «мәрмәрлі» болуы мүмкін.

Фармакотерапиялық тобы

Аритмияға қарсы ІІІ класс препараттары.

ATЖ коды C01BD01

Фармакологиялық қасиеттері

Фармакокинетикасы

Сіңуі баяу және құбылмалы - 30-50 %, биожетімділігі - 30-50 %. Қан плазмасында ең жоғары концентрация (Cmax) 4-7 сағаттан кейін білінеді. Емдік плазмалық концентрация диапазоны – 1-2,5 мг/л (бірақ дозаны анықтаған кезде клиникалық көрінісін де ескеру қажет). Таралу көлемі – 60 л, бұл оның тіндерге күшті таралатындығын дәлелдейді. Майда ерігіштігі жоғары болады, май тіндерінде және қанмен жабдықталған ағзалардағы концентрациялары жоғары (қан плазмасына қарағанда, май тіндерінде, бауырда, бүйректерде, миокардта жоғары болады – тиісінше, 300, 200, 50 және 34 есе). Амиодарон фармакокинетикасының ерекшелігі препаратты жоғары жүктеме дозаларда қолдану қажеттілігіне себепші болады. Гематоэнцефалдық бөгет (ГЭБ) және плацента (10-50%) арқылы өтеді, емшек сүтімен бірге секрецияланады (ана қабылдаған дозаның 25%-ы). Қан плазмасы ақуыздарымен байланысы – 95% (альбуминмен 62%-ы, бета-липопротеиндермен 33,5%-ы).

Бауырда метаболизденеді. Негізгі метаболиті - дезэтиламиодарон – фармакологиялық тұрғыдан белсенді және негізгі қосылыстың аритмияға қарсы әсерін күшейтуі мүмкін. Сондай-ақ иодсыздандыру жолымен де ықтимал (300 мг дозада элементарлы йодтың шамамен 9 мг-ы бөлініп шығады). Ұзақ уақыт емдеген кезде йодтың концентрациясы амиодарон концентрациясының 60-80%-на жетуі мүмкін.

Жиналу қабілетін және осыған байланысты фармакокинетикалық параметрлеріндегі өзгерістің үлкендігін ескерсек, жартылай шығарылу кезеңі (T1/2) жөніндегі деректер қарама-қайшы. Ішу арқылы қабылдағаннан кейін амиодаронның шығарылуы 2 кезеңмен жүзеге асады: T1/2 бастапқы кезеңі - 4-21 сағат, екінші кезеңінде - 25-110 күн. Ішу арқылы ұзақ уақыт қабылдағаннан кейін орташа T1/2 – 40  күн (бұл дозаны таңдауда маңызды мәнге ие, өйткені жаңа плазмалық концентрацияны тұрақтандыру үшін, қалай болғанда да, 1 ай қажет, бұл кезде толық шығарылуы 4 айдан астамға созылуы мүмкін). Өтпен бірге (85-95 %) шығарылады, қабылданған дозаның 1%-дан азы бүйректер арқылы шығарылады (сондықтан бүйрек қызметі бұзылған кезде дозаны өзгерту қажет емес). Амиодарон және оның метаболиттері диализге ұшырамайды.

Фармакодинамикасы

Амиодарон-Акри – аритмияға қарсы III класс препараты (реполяризация тежегіші). Антиангинальді, коронарлық қантамырларын кеңейтетін, альфа- және бета-адренобөгегіш, тиреотропты және гипотензивті әсері бар.

Аритмияға қарсы әсері миокардтың электрофизиологиялық үдерістеріне ықпал етуімен жүзеге асады. Кардиомиоциттер әсерінің потенциалын ұзартады, жүрекшелердің, қарыншалардың, атриовентрикулярлы (AV) түйіннің, Гис шоғырының және Пуркинье талшықтарының тиімді рефрактерлі кезеңін, қозуды өткізудің үстеме жолдарын арттырады.

«Шапшаң» натрий өзекшелерін бөгей отырып, І класс антиаритмиктеріне тән әсер етеді. Синусты түйін жасушалары мембранасының баяу (диастолалық) деполяризациясын тежеп, брадикардияны тудырады және AV өткізгіштікті төмендетеді.

Антиангинальді әсері коронарлық қантамырды кеңейтетін және антиадренергиялық әсерге, миокардқа оттегі қажеттілігінің азаюына себепші болады. Жүрек-қантамыр жүйесінің альфа- және бета-адренорецепторларын тежеуге ықпал етеді (оларды толық бөгемей-ақ). Симпатикалық жүйке жүйесі гиперстимуляциясына, коронарлық қантамырлардың кернеуіне сезімталдықты азайтады. Коронарлық қан ағысын арттырады, жүректің жиырылу жиілігін сиретеді, миокардтың энергетикалық қорын арттырады (креатинсульфат, аденозин және гликоген мөлшерін арттыру есебінен).

Өзінің құрылымы жөнінен тиреоидты гормондарға ұқсас. Йодтың мөлшері оның молекуласының 37%-ға жуығын құрайды. Тиреоидты гормондардың алмасуына ықпалын тигізеді, Т3-тің Т4-ке айналуын тежейді (тироксин-5-дейодиназа тосқауылы) және осы гормондарды кардиоциттердің және гепатоциттердің ұстап қалуын бөгейді, бұл тиреоидтық гормондардың миокардты ширату ықпалының әлсіреуіне әкеледі (Т3 тапшылығы оның өнімінің көбеюіне және тиреотоксикозға әкеп соқтыруы мүмкін). Әсерінің басталуы (тіпті «жүктеме» дозаларды қолданғанның өзінде) – 2-3 күннен 2-3 айға дейін, әсер ету ұзақтығы бірнеше аптадан бірнеше айға дейін өзгеріп отырады (оны қабылдауды тоқтатқаннан кейін 9 ай бойы қан плазмасынан табылады).

Қолданылуы

• Вольф-Паркинсон-Уайт синдромымен (WPW), жүрекшелердің жыпылықтау пароксизмдерімен және лүпілдеуімен; жүрекшелік және қарыншалық экстрасистолиямен; парасистолиямен, Шагас миокардиті бар науқастардағы қарыншалық аритмиялармен байланысты жүрек ырғағының бұзылуын емдеуге және алдын алуға

• қарыншалар мен жүрекшелер фибрилляциясының қайталануына жол бермеуге

• қарыншалық тахикардияны емдеуге

• жүрекше жыпылықтаған және лүпілдеген кезде синустық ырғақты қалпына келтіру мақсатында қарыншаүстілік тахикардияны емдеуге

• егер сыртартқысында бұрын аритмия көріністерінің білінгені бар болса, миокард инфарктінен кейін қалпына келтіру кезеңінде.

Қолдану тәсілі және дозалары

Таблеткаларды ас қабылдау кезінде немесе қабылдағаннан кейін, сұйықтықтың жеткілікті мөлшерімен ішіп, бүтіндей қабылдайды.

Дозалау режимі әр адамға жекелей белгіленеді және оны дәрігер түзетеді.

Қанықтыратын доза тәулігіне 2-3 қабылдауға бөлінген 600 мг (3 таблетка) құрайды. Емделу курсы – 8-15 күн. Қажет болған кезде Амиодарон-Акри препаратының дозасын қысқа кезеңге және ЭКГ-ні бақылай отырып, тәулігіне 800-1200 мг-ға (4-6 таблетка) дейін арттыруға болады. Қанығу белгілеріне қол жеткізілгеннен кейін демеуші емге көшеді.

Демеуші доза. Демеуші ем кезінде емделушінің жекелей реакциясына байланысты тиімді өте төмен доза қолданылады және ол әдетте тәулігіне 1-2 қабылданатын 200-400 мг (1-2 таблетка) құрайды. Мүмкін болған жағдайларда препаратты әрбір 5 күн қабылдаудан кейін екі күндік үзіліс жасайды.

Орташа емдік бір реттік доза – 200 мг.

Орташа емдік тәуліктік доза – 400 мг.

Ең жоғары бір реттік доза – 400 мг.

Ең жоғары тәуліктік доза – 1200 мг.

Жағымсыз әсерлері

Өте жиі (≥ 10)

- жүректің айнуы

- құсу

- дәмнің бұзылуы

- іш қату

- метеоризм

- диарея

- эпигастральді аймақтың ауыруы

- мөлдір қабық эпителийінде липофусциннің жиналуы (мұндайда жиі субъективті шағымдар жоқ, бірақ егер едәуір жиналып қалса және қарашықты ішінара толтырса, түрлі түсті ореолдың немесе сұлбалардың анық болмауына шағымдар болуы мүмкін)

- увеит

- фотосенсибилизация (тері гиперемиясы)

Жиі (>1/100, <1/10)

- синусты брадикардия (холинолитиктерге рефрактерлі)

- ұзақ уақыт қолданғанда - уытты гепатит, холестаз, бауыр қызметінің жеткіліксіздігі, жөтел, ентігу, альвеолярлы және/немесе интерстициальді пневмонит, пневмония, өкпелердің фиброзы, плеврит, апноэ

- Т3 қалыпты немесе аздап айқын төмендеген кезде Т4 деңгейінің жоғарылауы (қалқанша без қызметінің бұзылуының клиникалық белгілері жоқ болған кезде емдеуді тоқтатпаған жөн). Ұзақ уақыт қолданған кезде гипотиреоз немесе гипертиреоз дамуы мүмкін (препаратты тоқтату қажет)

- терінің қорғасын-көк немесе көгілдір түсті пигментациясы (ұзақ уақыт қолданған кезде), емдеуді тоқтатқаннан кейін пигментация 10-14 күн ішінде баяу жоғалады

- діріл

- экстрапирамидті бұзылулар

- ұйқының бұзылуы

Өте жиі емес (>1/1 000, <1/100)

- синоатриальді тосқауыл

- АV блокада

- бет терісіне қан «тебулер»

- аритмогендік әсер

Сирек (>1/10 000, <1/1 000)

- ұзақ уақыт қолданған кезде шеткергі нейропатия, миопатия (препаратты тоқтатқаннан кейін симптомдар қайтымды)

Өте сирек (<1/10 000)

- цирроз

- бронхтың түйілуі (әсіресе тыныс қызметінің жеткіліксіздігі ауыр немесе бронх демікпесі бар науқастарда)

- жедел респираторлы дистресс-синдром, кейде өлім-жітіммен аяқталатын және кейде тура хирургиялық араласымнан кейін (оттегінің жоғары дозаларымен өзара әрекеттесуі мүмкін деп болжанады)

- торқабықтың микросыдырылуы

- көру жүйкесінің невриті

- диурезге қарсы гормонның талапқа сай емес секрециясы синдромының дамуы

- тері бөртпесі, соның ішінде эксфолиативті дерматит

- алопеция

- бас ауыру

- жалпы әлсіздік

- бас айналу

- депрессия

- шаршау сезімі

- парестезиялар

- есту елестері

- жадының нашарлауы

- мишық атаксиясы

- бас сүйекішілік қатерсіз гипертензия (мидың жалған ісігі)

- ангионевротикалық ісіну

- «бауыр» трансаминазасы белсенділігінің жоғарылауы

- ұзақ уақыт қолданған кезде – тромбоцитопения, гемолитикалық және апластикалық анемия

- эпидидимит

- либидоның төмендеуі

- потенцияның бұзылуы

- васкулит

- бүйректің зақымданып, креатинин деңгейінің жоғарылауы

Жиілігі белгісіз:

- ұзақ уақыт қолданған кезде – жүрек қызметінің созылмалы жеткіліксіздігі симптомдарының үдеуі, «пируэт» типіндегі тахикардия, аритмия барысының ауырлауы немесе оның пайда болуы

- өкпеден қан кету

Қолдануға болмайтын жағдайлар

• йодқа, амиодаронға немесе препараттың басқа да компоненттеріне жоғары сезімталдықта

• синусты брадикардияда және синоатриальді бөгелісте

• синустық түйін әлсіздігі синдромында (кардиостимулятор жоқ болған кезде)

• атриовентрикулярлы бөгелістің II – III дәрежесінде, кардиостимуляторлар жоқ болған жағдайда қарыншаішілік өткізгіштік бұзылғанда (екі- және үш шоғырлық тосқауылдар)

• кардиогенді шокта, коллапста, айқын артериялық гипотензияда

• қалқанша без қызметі бұзылғанда (гипо- және гипертиреозда)

• гипокалиемияда

• жүрек қызметінің айқын жеткіліксіздігінде

• өкпелердің интерстициальді ауруларында

• жүктілікте және лактация кезеңінде (емшек емізуге)

• балаларға және 18 жасқа дейінгі жасөспірімдерге (тиімділігі және қауіпсіздігі анықталған жоқ)

Қолдануға болмайтын біріктірулер

• полиморфты қарыншалық типті «пируэт» түріндегі тахикардияны тудыруға қабілетті препараттармен бірге;

• аритмияға қарсы I А класына жататын дәрілермен (хинидинмен, дизопирамидпен); аритмияға қарсы ІІІ класқа жататын дәрілермен (соталолмен, дофетилидпен, ибутилидпен); бепридилмен (оларды амиодаронмен біріктірген кезде қарыншалық тахикардияның, атап айтқанда «пируэт» типіндегі өліммен аяқталатын қарыншалық тахикардияның даму қаупі артады және синустық брадикардияға, синустық түйіннің бөгелісіне және АV өткізгіштіктің бұзылуына бейімділігі артады);

• басқа да (аритмияға қарсы емес) препараттармен, мысалы, винкаминмен; кейбір нейролептиктермен: фенотиазиндер (хлорпромазин, циамемазин, левомепромазин, тиоридазин, трифлуоперазин), бензамидтер (амисульприд, сультоприд, сульприд, тиаприд, вералиприд), бутирофенондар (дроперидол, галоперидол), басқа да нейролептиктер (пимозид); цизаприд; макролидтік антибиотиктер, атап айтқанда көктамыр ішіне енгізгенде эритромицин, спирамицин; азолдар; парентеральді түрде енгізгенде пентамидин; дифеманил метилсульфаты; мизоластин (оларды амиодаронмен біріктірген кезде қарыншалық тахикардияның, атап айтқанда «пируэт» типіндегі өліммен аяқталатын қарыншалық тахикардияның даму қаупі артады);

• МАО тежегіштерімен бірге.

Сақтықпен

Препаратты бауыр қызметінің жеткіліксіздігі, бронх демікпесі бар науқастарға, егде жастағы емделушілерге (айқын брадикардияның даму қаупі жоғары), жүрек қызметінің созылмалы жеткіліксіздігінде, атриовентрикулярлы бөгелістің І дәрежесінде қолданғанда сақ болған жөн.

Дәрілермен өзара әрекеттесуі

Амиодарон дәрілік заттардың көбімен өзара әрекеттеседі. Жартылай шығарылу кезеңінің үлкен болуына байланысты, өзара әрекеттесудің пайда болу мүмкіндігі тек бір мезгілде қолданылатын дәрілік заттармен ғана емес, сонымен қатар амиодаронмен емдеуді тоқтатқаннан кейін қолданылатын дәрілік заттармен де болуы мүмкін.

Ұсынылмайтын біріктірулер:

- галофантринмен, пентамидинмен, астемизолмен, терфенадинмен, лумефантринмен, трициклді антидепрессанттармен бірге, өйткені QT аралығы ұзаруы мүмкін, ол қарыншалық ырғақтың бұзылу қаупін, атап айтқанда «пируэт» типіндегі тахикардия қаупін арттырады;

- бета-адренобөгегіштермен, «баяу» кальций өзекшелерінің кейбір бөгегіштерімен (верапамил, дилтиазем) бірге, өйткені автоматизмнің (брадикардия) және өткізгіштіктің бұзылулары дамуы мүмкін;

- гипокалиемияны тудыруы мүмкін іш жүргізетін дәрілермен бірге, өйткені «пируэт» типіндегі қарыншалық тахикардияның (torsade de pointe) даму қаупі артады;

- фторхинолондармен бірге (атап айтқанда моксифлоксацинмен) – QT аралығы ұзаруы мүмкін.

Сақтық жасалуға тиісті біріктірулер:

- гипокалиемияны тудыратын препараттармен (диуретиктер, жүйелік глюкокортикостероидтар, тетракозактид, пентамидин, В амфотерицин (көктамыр ішіне) бірге, өйткені «пируэт» типіндегі қарыншалық тахикардия (torsade de pointe) дамуы мүмкін;

- ішке қабылдауға арналған антикоагулянттармен бірге, өйткені қан кетудің даму қаупі артады (протромбин деңгейін бақылау және антикоагулянттар дозасын түзету қажет);

- жүрек гликозидтерімен бірге, өйткені автоматизмнің бұзылуы (брадикардия білінеді) және жүрекше-қарыншалық өткізгіштіктің бұзылуы байқалуы мүмкін. Бұдан басқа, қан плазмасында дигоксин концентрациялары, оның клиренсінің төмендеуі есебінен, артуы мүмкін (қан плазмасындағы дигоксин концентрациясына бақылау жүргізу, ЭКГ-ні бақылау қажет);

- фенитоинмен, циклоспоринмен бірге, олардың қан плазмасының концентрациялары артуы мүмкін (қан плазмасындағы фенитоин немесе циклоспорин концентрацияларын бақылаған жөн);

• колестирамин амиодаронның сіңуін, жартылай шығарылу кезеңін және концентрациясын азайтады;

• циметидин амиодарон метаболизмін баяулатады, бұл қан плазмасындағы амиодарон концентрациясын арттыруы мүмкін;

• ингаляциялық анестезияға арналған дәрілер, оксигенотерапия брадикардияның (атропинге төзімді), артериялық гипотензияның даму, өткізгіштіктің бұзылу, ҚМК-нің төмендеу қаупін арттырады;

• амиодарон натрий йодидінің (131-I, 123-I) және натрий пертехнетатының (99mTc) қалқанша безге сіңуін төмендетуі мүмкін;

• литиймен біріктіріп қолдану гипотиреоз қаупін арттырады;

• амиодарон метотрексаттың уыттылығын арттырады;

• рифампицин қан сарысуында амиодарон деңгейін төмендетеді (бауырдағы метаболизм жылдамдайды);

• амиодарон будесонидтің метаболизмін баяулатады, ол нәтижесінде Кушинг синдромының пайда болуына әкелуі мүмкін;

• АИВ-протеаза тежегіштері (ампренавир, индинавир, нелфинавир, ритонавир) – қан сарысуында амиодарон концентрациясын, аритмияның даму қаупін арттырады;

• симвастатин (дозаға байланысты жағымсыз әсерлер қаупі күшейеді) рабдомиолиз типінде. Симвастатин дозасы тәулігіне 20 мг-нан аспауы тиіс. Егер осындай дозада емдік әсерге қол жеткізілмесе, осындай типте өзара әрекеттеспейтін басқа статинге көшкен жөн;

• фотосенсибилизацияны тудыратын дәрілік заттар, аддитивті фотосенсибилизациялаушы әсер білдіреді;

• грейпфрут шырыны амиодаронның AUC және Cmax мәндерін, тиісінше, 50%-ға және 84%-ға арттырады;

• фентанил – брадикардия дамуы, АҚ және жүректің лықсуы төмендеу қаупі;

• жергілікті анестезияға арналған лидокаин және ішке амиодарон – синусты брадикардияның даму қаупі;

• дизопирамид, фторхинолондар, макролидті антибиотиктер, азолдар – QT аралығының ұзару қаупі;

• Р450 3А4 цитохромының жәрдемімен метаболизденетін мына препараттармен бірге: фентанил, лидокаин, такролимус, силденафил, мидазолам, триазолам, эрготамин, статиндер.

Айрықша нұсқаулар

Емдеуді бастар алдында, сондай-ақ әрбір 3 ай сайын ЭКГ бақылау жүргізу қажет, мұндайда егде жастағы емделушілерде өте айқын брадикардия білінетіндігін ескеру қажет, сондай-ақ өкпелерге рентгенологиялық тексеру жүргізу, қалқанша без (гормондардың мөлшеріне), бауыр қызметтеріне (ферменттерге) баға беру қажет. Жағымсыз әсерлердің жиілігі мен ауырлығы препараттың дозасына байланысты, сондықтан тиімді өте аз демеуші дозаларды қолданған жөн.

Амиодарон-Акри препаратын қолданған кезде ЭКГ-де өзгеріс болуы мүмкін: QT аралығының ұзарып, U тісшесі пайда болуы мүмкін. II және III дәрежелі атриовентрикулярлы бөгеліс, синоатриальді бөгелісі, сондай-ақ Гис шоғыры аяқтарының бөгелісі пайда болған кезде Амиодарон-Акри препаратымен емдеуді дереу тоқтатқан жөн.

Ентігудің үдеуі және өнімі жоқ жөтел өкпелердің зақымдану белгілері болуы мүмкін. Көкірек шаршысына рентгенологиялық зерттеу және өкпе қызметіне сынама жүргізу керек (әрбір 6 ай сайын және өкпе ауруларының клиникалық белгілері дамыған жағдайда).

Емдеуді бастар алдында қан плазмасындағы электролиттер мөлшерін анықтау қажет. Амиодарон-Акри препаратымен емдеу кезеңінде бауыр ферменттері белсенділігіне жүйелі бақылау жүргізеді. Емделу кезеңінде мезгіл-мезгіл ЭКГ-ге (QRS кешенінің еніне және QT аралығының ұзаруына), трансаминазаларға талдау жүргізеді (олардың бастапқыда жоғары болған белсенділігі 3 есе артқан кезде немесе қосарланған кезде дозаны ем толық тоқтатылғанша азайтады).

Емделу үдерісінде офтальмологиялық зерттеулер жүргізген жөн (мөлдір қабықта елеулі жиналудың білінуі және көрудің нашарлауы амиодаронды тоқтатуды қажет етеді). Тоқтатқан кезде ырғақтың бұзылуы қайталануы мүмкін.

Жүктілік кезінде және лактация кезеңінде жүрек ырғағының өмірге қатер төндіретін бұзылуларында ғана, аритмияға қарсы басқа ем тиімсіз болғанда (ұрықтың қалқанша без қызметінің бұзылуын тудырады), қолданылады.

Тоқтатқаннан кейін фармакодинамикалық әсер 10-30 күн бойы сақталады.

Препараттың құрамында йод бар, сондықтан қалқанша безде радиоактивті йодтың жиналуына жасалған тест нәтижелеріне ықпалын тигізуі мүмкін. Сондықтан емдеуді бастар алдында, оны жүргізу кезінде және емдеуді аяқтағаннан кейін бірнеше ай бойы қалқанша без қызметіне зерттеу жүргізу қажет. Хирургиялық араласым, сондай-ақ оксигенотерапия жүргізер алдында Амиодарон-Акри препаратын қолданғаны жөнінде дәрігерге алдын ала ескерту қажет, өйткені операциядан кейінгі кезеңде ересектерде жедел респираторлы дистресс-синдромы дамыған сирек жағдайлар байқалған.

Фотосенсибилизацияның дамуын болдырмау үшін емделушілер күн көзінде болмағаны немесе қорғанудың тиімді шараларын қолданғаны жөн.

Жалпы анестезия жүргізу кезінде препаратты қолданған кезде сақ болған жөн, брадикардияның дамуы, артериялық қысымның төмендеу, өткізгіштіктің бұзылуы және жүректің қан айдау көлемінің азаю қаупі болуы мүмкін.

Жүктілік және лактация кезеңі

Жүктіліктің II және III триместрінде қолдануға болмайды, өйткені бұл кезеңде жаңа туған қалқанша безі йодты жинақтай бастайды және амиодаронды осы кезеңде қолдану, йод концентрациясының артуына байланысты, гипотиреоздың дамуын өршітуі мүмкін.

Амиодарон емшек сүтімен бірге елеулі мөлшерде бөлініп шығады, сондықтан препаратты лактация кезеңінде қолдануға болмайды.

Дәрілік заттың көлікті немесе қауіпті механизмдерді басқару қабілетіне ықпал ету ерекшеліктері

Амиодарон-Акри препаратымен емдеу кезеңінде автокөлікті жүргізуді және зейінді жұмылдыруды және психомоторлы реакциялардың шапшаңдығын арттыруды қажет ететін қауіпті қызмет түрлерімен айналысуды тоқтата тұрған жөн.

Артық дозаланғанда

Аритмогенді әсер түрінде уыттылық пайда болған жағдайда препаратты тоқтатады.

Симптомдары: артериялық қысымның төмендеуі, синусты брадикардия, аритмиялар, атриовентрикулярлы бөгеліс, бауыр қызметінің бұзылуы.

Емдеу: егер препарат жақын арада қабылданған болса, асқазанды шаю және белсенділендірілген көмір қабылдау. Қалған жағдайларда симптоматикалық ем жүргізіледі. Өзіне тән у қайтарғысы жоқ, гемодиализ тиімді емес, амиодарон және оның метаболиттері диализ кезінде жойылмайды. Брадикардия дамыған кезде атропин, бета1-адреностимуляторлар, ауыр жағдайларда кардиостимуляция тағайындалуы мүмкін.

Шығарылу түрі және қаптамасы

200 мг таблеткалар.

10 таблетка поливинилхлоридті үлбірден және баспалық, лакталған алюминий фольгадан жасалған пішінді ұяшықты қаптамада.

Пішінді ұяшықты 3 қаптама медицинада қолданылуы жөнінде мемлекеттік және орыс тілдеріндегі нұсқаулықпен бірге картон пәшкеге салынған.

Сақтау шарттары

Құрғақ, жарықтан қорғалған жерде, 25 C-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін қолдануға болмайды.

Дәріханадан босатылу шарттары

Рецепт арқылы

Өндіруші

"АКРИХИН" ААҚ, Ресей Федерациясы,

142450, Мәскеу облысы, Ногинский ауданы, Старая Купавна қ-сы,

Киров к-сі, 29.

Телефон/факс: (495) 702-95-03.

Тіркеу куәлігінің иесі

"АКРИХИН" ААҚ, Ресей Федерациясы

Тұтынушылардан өнім (тауар) сапасы жөнінде шағымдарды Қазақстан Республикасы аумағында қабылдайтын ұйымның мекенжайы:

"АКРИХИН" ААҚ, Ресей Федерациясы,

142450, Мәскеу облысы, Ногинский ауданы, Старая Купавна қ-сы,

Киров к-сі, 29.

Телефон/факс: (495) 702-95-03.