Алтебрел (Этанерцепт)

Алтебрел

Этанерцепт

Дәрілік түрі, дозасы

Тері астына енгізуге арналған ерітінді, 25 мг және 50 мг

Антинеопластикалық және иммуномодуляциялайтын препараттар. Иммуносупрессанттар. Альфа-ісіктер некрозы факторының (ІНФ-ɑ) тежегіштері. Этанерцепт.

АТХ коды L04АВ01

Ересектер

- ревматоидты артрит

Алтебрел ауруды модификациялайтын ревматизмге қарсы базистік препараттарға, метотрексатты қоса (қарсы көрсетілімдері болмаса), жауап жеткіліксіз болғанда ересек пациенттерде орташа және ауыр дәрежедегі белсенді түрінде ревматоидты артритті емдеу үшін метотрексатпен біріктірілімде ересек пациенттерде қолдануға көрсетілген.

Алтебрелді метотрексат жақпаушылығы жағдайында немесе метотрексатпен емдеуді жалғастыру мақсатқа сай болмағанда монотерапия түрінде тағайындауға болады.

Препарат бұрын метотрексатпен ем қабылдамаған ересектерде ауыр, белсенді және үдемелі ревматоидты артритті емдеу үшін көрсетілген.

Алтебрел монотерапия түрінде немесе метотрексатпен біріктірілімде рентгенография көмегімен анықталған буындар зақымдануының үдеу жылдамдығын төмендететіні және функционалдық статусты жақсартатыны көрсетілген.

- шорбуынданатын спондилит

Дәстүрлі емге жауабы жеткіліксіз болған ауыр белсенді шорбуынданатын спондилит бар ересектерді емдеу.

- рентгенологиялық өзгерістерсіз аксиальді спондилоартрит

Қабынуға қарсы стероидты емес дәрілер (ҚҚСД) тиімділігі жеткіліксіз болған CРА жоғарылау деңгейі және/немесе магнитті-резонансты томография (МРТ) деректері айғақтайтын қабынудың объективті белгілерімен рентгенологиялық өзгерістерсіз ауыр аксиальді спондилоартрит бар ересек пациенттерді емдеу.

- псориазды артрит

Ауруды модификациялайтын базистік ревматизмге қарсы препараттармен емге жауап талапқа сай болмағанда ересектердегі белсенді және үдемелі псориазды артритті емдеу.

Алтебрелдің псориазды артрит бар пациенттерде функционалдық статусты жақсартатыны және буындардың симметриялық зақымдануымен аурудың полиартикулярлық қосалқы типтері бар пациенттерде рентгенография деректері бойынша шеткері буындар зақымдануының үдеу жылдамдығын төмендететіні көрсетілген.

- түйіндақты псориаз

Циклоспорин, метотрексат немесе псорален және ұзын толқынды ультракүлгін A сәулеленуін (ПУВА-терапия) қоса, жүйелі емнің басқа түрлеріне жауап бермеген, оларға қарсы көрсетілімдері немесе жақпаушылығы болатын орташа немесе ауыр түйіндақты псориаз бар ересектерді емдеу.

Балалар

- 2 жастан үлкен балалардағы ювенильді идиопатиялық артрит (ЮИА)

Метотрексат жеткілікті әсерін көрсетпеген немесе жағымдылығы нашар болған 2 жастан үлкен балаларда және жасөспірімдерде полиартритті (ревматоидты факторға талдауы оң немесе теріс) және жайылған олигоартритті емдеу.

Метотрексат жеткілікті әсерін көрсетпеген немесе жағымдылығы нашар болған балаларда 12 жастан бастап псориазды артритті емдеу.

Дәстүрлі ем жеткілікті әсерін көрсетпеген немесе жағымдылығы нашар болған балаларда 12 жастан бастап энтезитпен байланысты артритті емдеу.

Алтебрелдің 2 жасқа толмаған балаларда қолданылуы зерттелмеген.- балалардағы түйіндақты псориаз

Басқа жүйелі еммен немесе фототерапиямен жай-күйі жеткіліксіз бақыланатын немесе басқа жүйелі ем немесе фототерапия жақпаушылығы байқалған балаларда 6 жастан бастап және жасөспірімдерде созылмалы ауыр түйіндақты псориазды емдеу.

Қолданудың басталуына дейін қажетті мәліметтер тізбесі

• әсер етуші затқа немесе 6.1 бөлімінде тізбеленген қосымша заттардың кез келгеніне аса жоғары сезімталдық

• сепсис немесе сепсистің даму қаупі

• белсенді инфекция, созылмалы немесе шоғырланған инфекцияларды қоса (оның ішінде туберкулез)

• жүктілік және лактация кезеңі

• тірі вакциналармен бір мезгілде қолдану

• анакинрамен бір мезгілде емдеу

• абатацептпен бір мезгілде емдеу

• «түйіндақты псориаз» көрсетілімі үшін 6 жасқа дейінгі балалар

• 2 жасқа толмаған балалар

Сақтықпен: демиелинизациялаушы аурулар, жүректің іркілісті жеткіліксіздігі, иммундық тапшылық күйлері, қан дискразиясы, инфекциялар дамуына немесе белсенуіне бейімдейтін аурулар (қант диабеті, гепатиттер және т.б.), сульфасалазинмен бір мезгілде қолдану, 65 жастан асқан пациенттер

Қолдану кезіндегі қажетті сақтандыру шаралары

Биологиялық дәрілік препараттардың қадағалануын жақсарту мақсатында енгізілген препараттың саудалық атауы мен серия нөмірі пациенттің медициналық картасына анық жазылған болуы (немесе көрсетілуі) тиіс.

Инфекциялар

Алтебрелмен емдеу алдында, ем кезінде және одан кейін этанерцепт орташа жартылай шығарылу кезеңінің 70 сағатқа жуық (7-ден 300 сағатқа дейін) созылатынын назарға алып, пациенттерде инфекциялар бар-жоғын тексеру керек.

Этанерцептті қолдану кезінде инвазиялық зеңді инфекцияларды, листериоз және легионеллезді қоса, күрделі инфекциялар, сепсис, туберкулез және оппортунистік инфекциялар тіркелді. Осы инфекцияларды бактериялар, микобактериялар, зеңдер, вирустар және паразиттер (қарапайымдарды қоса) тудырды. Кейбір жағдайларда белгілі бір зеңді немесе басқа оппортунистік инфекциялар танылмады, бұл қажетті емдеуді өз уақытында бастауға мүмкіндік бермеді, ал кейде өліммен аяқталуға алып келді. Пациенттерде инфекциялар бар-жоғын бағалау кезінде пациентте оппортунистік инфекциялардың даму (мысалы, эндемиялық микоздармен зақымдану көзімен жанасу) қаупін ескеру керек.

Алтебрел препаратымен емдеу кезінде жаңа инфекциялар дамыған пациенттерге мұқият қадағалау жүргізген жөн. Егер пациентте күрделі инфекция дамыса, Алтебрел препаратын қолдану тоқтатылуы тиіс. Алтебрел қолданудың қауіпсіздігі мен тиімділігі созылмалы инфекциялары бар пациенттерде бағаланбады. Дәрігерлер анамнезінде қайталамалы немесе созылмалы инфекциялар немесе асқынып кеткен немесе нашар бақыланатын диабет сияқты инфекцияға бейімдеуі мүмкін негізгі аурулары болған пациенттерде Алтебрел препаратын қолдану мәселесін қарастырғанда сақтық танытуы тиіс.

Туберкулез

Этанерцептпен ем қабылдаған пациенттерде милиарлы туберкулез бен өкпеден тыс орныққан туберкулезді қоса, белсенді туберкулез жағдайлары хабарланды.

Алтебрелмен емдеуді бастар алдында барлық пациенттер белсенді немесе белсенді емес (жасырын) туберкулездің бар-жоғы тұрғысынан тексеруден өтуі тиіс. Бұл тексеруде туберкулез ауруының жеке тарихы немесе туберкулезбен науқастармен осының алдында болуы мүмкін қарым-қатынастар және бұрын жүргізілген және/немесе қазіргі уақытта жүргізіліп жатқан иммунодепрессиялық ем деректері толық жиналған медициналық анамнез қамтылуы тиіс. Пациенттердің бәрінде қолайлы скрининг тестілерін, яғни туберкулиндік тері сынамасын өткізу және кеуде қуысы ағзаларының рентгенографиясын түсіру керек (жергілікті ұсынымдарды пайдалануға болады). Пациентке арналған жадынамада осы талдаулар жасалғаны жөнінде жазба түсіруге кеңес беріледі. Препаратты тағайындайтын медициналық қызметкерлерге, әсіресе, ауыр науқас пациенттерде немесе иммунитеті әлсіреген пациенттерде туберкулиндік тері сынамасының жалған-теріс нәтижелерінің қаупі туралы ескертіледі.

Белсенді туберкулез диагностикаланған жағдайда препарат тағайындалмауы тиіс. Егер белсенді емес (жасырын) туберкулез диагнозы қойылса, Алтебрелді қолданудың басталуына дейін және жергілікті талаптарға сәйкес туберкулезге қарсы препаратпен жасырын туберкулезді емдеуді бастау қажет. Бұл жағдайда Алтебрелмен ем пайдасы мен қаупінің арақатынасын өте мұқият таразылау керек.

Пациенттердің бәрі Алтебрелмен емдеу кезінде немесе одан кейін туберкулезді айғақтайтын белгілер/симптомдар (мысалы, тұрақты жөтел, әлсіздік/салмақ жоғалту және температураның аздаған көтерілуі) пайда болған жағдайда медициналық көмекке жүгіну қажеттілігінен хабардар болуы тиіс.

В гепатитінің қайта белсенділенуі

Этанерцептті қоса, ІНФ (ісік некрозы факторы) антагонистерін вирусқа қарсы басқа еммен бірге қабылдаған бұрын инфекция жұқтырған пациенттерде B гепатиті вирусының (ВГВ) қайта белсенділену жағдайлары хабарланды. Оларға HBc антиденелеріне тест нәтижесі оң, бірақ HBsAg антигеніне тест нәтижесі теріс пациенттерде B гепатитінің қайта белсенділенуі туралы хабарламалар жатады. Алтебрелмен емдеуді бастар алдында пациенттерде ВГB инфекциясының бар-жоғын тексеру керек. B гепатиті вирусына тест нәтижесі оң пациенттерге осы ауруды емдеу тәжірибесі бар дәрігер кеңесінен өту ұсынылады. Бұрын ВГВ инфекциясын жұқтырған пациенттерде Алтебрелмен емдеуді абайлап жүргізген жөн. Осындай пациенттерге бүкіл ем кезеңі бойына және емдеуді тоқтатудан кейін бірнеше апта бойы белсенді ВГВ инфекциясының белгілері мен симптомдарын анықтау мақсатында қадағалау жүргізген жөн. ВГB инфекциясын жұқтырған пациенттерді ІНФ антагонистерімен біріктірілген вирусқа қарсы препараттармен емдеу деректері жеткіліксіз. ВГB инфекциясын жұқтырған пациенттерге Алтебрел қабылдауды тоқтату және тиісті демеуші еммен вирусқа қарсы тиімді емдеуді бастау керек.

C гепатиті ағымының нашарлауы

Этанерцептпен ем қабылдаған пациенттерде C гепатитінің өршу жағдайлары тіркелді. Алтебрел анамнезінде C гепатиті болған пациенттерде сақтықпен қолданылу керек.

Анакинрамен қатарлас емдеу

Этанерцепт пен анакинраны бір мезгілде қолдану, этанерцепт монотерапиясымен салыстырғанда, күрделі инфекциялар мен нейтропения қаупінің артуымен қатар жүрді. Бұл біріктірілімді қолдану клиникалық пайдасының артуын көріністемеді, сондықтан Алтебрелді анакинрамен біріктіріп қолдану ұсынылмайды.

Абатацептпен қатарлас емдеу

Абатацепт пен этанерцептті бір мезгілде қолдану күрделі жағымсыз құбылыстар жиілігінің артуына алып келді. Бұл біріктірілімді қолдану клиникалық пайда артуын көріністемеді, сондықтан да ұсынылмайды.

Аллергиялық реакциялар

Алдын ала толтырылған шприцтің инесіне арналған қорғағыш қалпақша құрамында латекс (табиғи құрғақ каучук) бар, бұл онымен манипуляциялар жасау немесе латекске белгілі немесе болжамды сезімталдығы бар тұлғаларда Алтебрелді енгізу кезінде аса жоғары сезімталдық реакцияларын туғызуы мүмкін.

Этанерцептті қолданумен байланысты аллергиялық реакциялар жағдайлары жиі тіркелді. Аллергиялық реакциялар ангионевроздық ісіну мен есекжемді қамтыды; сонымен қатар күрделі реакциялар хабарланды. Күрделі аллергиялық немесе анафилаксиялық реакция туындаған жағдайда Алтебрелмен емді дереу тоқтату және тиісті емдеуді бастау керек.

Иммуносупрессия

Этанерцептті қоса, ІНФ антагонистерін қолдану кезінде организмнің инфекциялар мен қатерлі жаңа түзілімдерге қарсы қорғаныс күштерінің зақымданулары болуы мүмкін, өйткені ІНФ қабынуға түрткі болады және жасушалық иммундық жауапты модуляциялайды. Этанерцептпен ем қабылдаған ревматоидты артрит бар ересек пациенттерде баяу типті аса жоғары сезімталдықтың төмендеуіне, иммуноглобулиндер деңгейлерінің төмендеуіне және эффекторлық жасушалар шоғырларының жалпы санының өзгеруіне дәлелдер табылмады.

Ювенильді идиопатиялық артрит бар екі пациентте желшешек инфекциясы, сондай-ақ асқынуларсыз басылған асептикалық менингитті көрсететін белгілер мен симптомдар дамыды. Желшешек вирусының әсер ету деңгейі елеулі пациенттер Алтебрелмен емді уақытша тоқтата тұру және желшешекке қарсы иммуноглобулинмен профилактикалық емдеу мәселесін қарастыру керек.

Этанерцептті иммунодепрессия бар пациенттерде қолданудың қауіпсіздігі мен тиімділігін бағалау жүргізілмеді.

Қатерлі және лимфопролиферациялық аурулар

Ауқымды және гемопоэздік қатерлі ісіктер (тері обырын қоспағанда)

Алтебрел қолдану кезінде алуан түрі қатерлі жаңа түзілімдер (сүт безінің және өкпенің обырын, сондай-ақ лимфоманы қоса) жағдайлары тіркелді.

ІНФ антагонистерінің бақыланатын клиникалық зерттеулерінде лимфомалар бақылау тобымен салыстырғанда, ІНФ антагонистерімен ем қабылдаған пациенттер арасында көптеп байқалды. Алайда, ол жағдайлар сирек болды, және плацебо қабылдаған пациенттерді кейінгі қадағалау кезеңі ІНФ антагонистерімен ем қабылдағандардағыға қарағанда қысқарақ болды. Препаратты тіркеуден кейін қолдану кезеңінде ІНФ антагонистерімен ем қабылдаған пациенттерде лейкемия жағдайлары анықталды. Ревматоидтық артриті бар, ауруы ұзақ, қабыну белсенділігі жоғары, онысы қауіпке баға беруді қиындататын пациенттерде лимфомалар мен лейкемиялар дамуының фондық қаупі жоғарылайды.

Этанерцептті қоса, ІНФ антагонистерімен ем қабылдаған балалар жасындағы пациенттер, жасөспірімдер және жастау (22 жасқа дейінгі) ересектерде (≤ 18 жастан бастап емделген) қатерлі жаңа түзілімдер тіркелді, олардың кейбіреуі өліммен аяқталды. Жағдайлардың жартысына жуығында лимфомалар болды. Басқа жағдайлар алуан түрлі қатерлі жаңа түзілімдерді және әдетте иммунодепрессиямен байланысты сирек қатерлі жаңа түзілімдерді қамтыды. ІНФ антагонистерімен ем қабылдаған балалар мен жасөспірімдерде қатерлі жаңа түзілімдердің даму қаупін жоққа шығаруға болмайды.

Тері обыры

Этанерцептті қоса, ІНФ антагонистерімен ем қабылдаған пациенттерде меланома және терінің меланомалы емес обыры (ТМЕО) жағдайлары тіркелді. Этанерцепт қабылдаған пациенттерде Меркель карциномасының өте сирек жағдайлары тіркелді. Пациенттерге, әсіресе, тері обырын туындататын қауіп факторлары барларға теріні мезгіл-мезгіл тексеруден өткізу ұсынылады.

Бақыланатын клиникалық зерттеулердің нәтижелері бойынша бақылау тобының пациенттерімен салыстырғанда, этанерцептті қабылдаған пациенттерде, әсіресе, псориазы бар пациенттерде, ТМЕО саны көп байқалды.

Вакцинация

Алтебрел препаратымен бір мезгілде тірі вакциналарды қолдануға

болмайды. Алтебрел препаратымен ем қабылдап жүрген пациенттерге тірі

вакциналардан инфекцияның екіншілік берілісі туралы деректер жоқ.

Аутоантиденелер түзілуі

Этанерцептпен емдеу аутоиммундық антиденелердің түзілуіне алып келуі мүмкін.

Гематологиялық реакциялар

Этанерцептпен ем қабылдаған пациенттерде кейбіреуі өліммен аяқталған панцитопенияның сирек жағдайлары және аплазиялық анемияның өте сирек жағдайлары тіркелді. Анамнезінде жасушалық қан құрамының патологиялық өзгерістері болған пациенттерді Этанерцептпен емдегенде сақ болу керек. Барлық пациенттерге және ата-аналарына/қамқоршыларына, егер Алтебрелмен емдеу кезінде пациентте жасушалық қан құрамының патологиялық өзгерістерін немесе инфекцияны көрсететін белгілер мен симптомдар (мысалы, температураның тұрақты көтерілуі, тамақтың ауыруы, қанталаулар түзілуі, қан кету және бозару) туындаса, дереу дәрігерге қаралуға кеңес беру керек. Осындай пациенттерді, жалпы қан талдауын жасауды қоса, дереу тексеруден өткізу керек. Егер жасушалық қан құрамының патологиялық өзгерісі расталса, Алтебрел тоқтатылу керек.

Неврологиялық бұзылулар

Алтебрелмен ем қабылдаған пациенттерде демиелинизациялаушы аурулардың сирек жағдайлары тіркелді. Бұдан бөлек, шеткері демиелинизациялаушы полинейропатияның (Гийен-Барре синдромын, созылмалы қабынумен жүретін демиелинизациялаушы полинейропатияны, демиелинизациялаушы полинейропатияны және мультифокальді қозғалыс нейропатиясын қоса) сирек жағдайлары тіркелді. Жайылған склероз бар пациенттерде Этанерцептпен емді бағалауға клиникалық зерттеулер жүргізілмеуіне қарамастан, жайылған склероз бар пациенттердегі басқа ІНФ антагонистерінің клиникалық зерттеулері ауру белсенділігінің жоғарылауын көрсетті. Демиелинизациялаушы ауруы бұрыннан бар немесе таяуда дамыған пациенттерге немесе демиелинизациялаушы аурудың даму қаупі жоғары топқа жататын пациенттерге Алтебрел тағайындалғанда, неврологиялық тексеруді қоса, пайда және қауіп арақатынасына мұқият бағалау жүргізу ұсынылады.

Біріктірілген ем

Этанерцепттің метотрексатпен біріктірілімде қолдану кезіндегі қауіпсіздік бейіні Алтебрел мен метотрексатты монотерапия түрінде қолдану кезінде анықталған бейіндеріне ұқсас болды. Этанерцепттің ауруды модификациялайтын ревматизмге қарсы базистік басқа препараттармен (АМРҚБП) біріктірілімде қолдану кезіндегі ұзақ мерзімді қауіпсіздігі анықталмады.

Этанерцептті псориазды емдеуге арналған жүйелі емнің немесе фототерапияның басқа түрлерімен біріктірілімде қолдану зерттелмеген.

Басқа дәрілік препараттармен өзара әрекеттесуі

Анакинрамен қатарлас емдеу

Алтебрел мен анакинраны бір мезгілде қолдану, Алтебрелмен немесе анакинрамен монотерапия түрінде ем қабылдаған пациенттермен салыстырғанда, күрделі инфекциялар қаупінің артуымен қатар жүрді (ретроспективті деректер).

Негізгі емдеуді метотрексатпен қабылдаған ересек пациенттерде, Алтебрел мен анакинраны қабылдаған пациенттерде күрделі инфекциялар мен нейтропенияның Алтебрелмен ем қабылдаған пациенттердегіден өте жоғары жиілігі байқалды. Алтебрел мен анакинраны біріктіріп қолдану клиникалық пайдасын көріністемеді, сондықтан да ұсынылмайды.

Абатацептпен қатарлас емдеу

Абатацепт пен Алтебрелді бір мезгілде қолдану күрделі жағымсыз құбылыстар жиілігінің артуына алып келді. Осы біріктірілімді қолдану клиникалық пайдасын көріністемеді, бұл біріктірілімді қолдану ұсынылмайды.

Сульфасалазинмен қатарлас емдеу

Этанерцепт қосылған сульфасалазиннің белгіленген дозаларын алған ересек пациенттерде, препараттарды біріктіріп қолданған пациенттерде монотерапия түрінде этанерцепт немесе сульфасалазинмен ем қабылдаған пациенттермен салыстырғанда, лейкоциттердің орташа санының статистикалық мәнді төмендеуі байқалды. Осы өзара әрекеттесудің клиникалық маңыздылығы белгісіз. Дәрігерлер сульфасалазинмен біріктіріп емдеу мүмкіндігін қарастырғанда сақтық шарасын қадағалауы тиіс.

Өзара әрекеттесулердің болмауы

Алтебрелді глюкокортикоидтармен, салицилаттармен (сульфасалазинді қоспағанда), қабынуға қарсы стероидты емес дәрілермен (ҚҚСД), ауыруды басатын дәрілермен немесе метотрексатпен бірге қолдану кезінде өзара әрекеттесулер байқалмады.

Метотрексат, дигоксин және варфаринді бір мезгілде қолдану кезінде клиникалық мәнді фармакокинетикалық дәрілік өзара әрекеттесулер байқалмады.

Арнайы сақтандырулар

Бүйрек және бауыр функциясының бұзылуы

Бүйрек немесе бауыр функциясының бұзылуы бар пациенттерге препарат дозасын түзету қажет емес; осындай пациенттерде препаратты қолданудың клиникалық тәжірибесі шектеулі.

Жүректің созылмалы жеткіліксіздігі (жүректің іркілісті жеткіліксіздігі)

Дәрігерлер Алтебрелді жүректің созылмалы жеткіліксіздігі (ЖСЖ) бар пациенттерде қолданғанда сақ болу керек. Тіркеуден кейінгі кезең уақытында этанерцепт қабылдаған пациенттерде ЖСЖ өршіген жағдайлар тіркелді, осы орайда олардың кейбіреуінде ЖСЖ түрткі болатын факторлар анықталды, ал басқаларында - анықталмады. Сонымен қатар, анамнезінде жүрек-қантамыр аурулары болмаған пациенттердегі ЖСЖ қоса, ЖСЖ туындауы туралы саны жағынан мардымсыз (< 0,1%) хабарламалар болды. Осы пациенттердің кейбірі 50 жастан асқандар болды. Этанерцепттің ЖСЖ емдеуінде қолданылуы бағаланған ауқымды екі клиникалық зерттеу тиімділігінің болмау себебінен мерзімінен бұрын тоқтатылды. Осы зерттеулер деректері түбегейлі қорытындылар жасауға мүмкіндік бермесе де, олардың бірінің деректерінде этанерцептпен ем қабылдаған пациенттерде ЖСЖ нашарлау үрдісі болуы мүмкін деп жорамалданады.

Алкогольдік гепатит

Алтебрелді пациенттерде алкогольдік гепатитті емдеу үшін қолдануға болмайды. Дәрігерлер Алтебрелді орташа немесе ауыр алкогольдік гепатиттен де зардап шегіп жүрген пациенттерде қолдану кезінде сақтық шарасын қадағалау керек.

Вегенер гранулематозы

Алтебрел Вегенер гранулематозын емдеу үшін қолдануға ұсынылмайды.

Қант диабеті себебінен емдеуден өтетін пациенттердегі гипогликемия

Қант диабетіне қарсы дәрілік препаратты қабылдаған пациенттерде этанерцептпен емнің басталуынан кейін осы пациенттердің кейбіреуінде диабетке қарсы препарат дозасын төмендету қажеттілігін тудырған гипогликемия жағдайлары тіркелді.

Пациенттердің ерекше топтары

Егде жастағы пациенттер

Ревматоидты артрит, псориазды артрит және шорбуынданатын спондилит кезінде этанерцепт қабылдаған 65  жас шамасындағы және одан асқан пациенттерде, жастау пациенттермен салыстырғанда, жағымсыз құбылыстар, күрделі жағымсыз құбылыстар және күрделі инфекциялардың ортақ өзгешеліктері байқалмады. Алайда, егде жастағы пациенттерді емдеу кезінде сақтық шарасын қадағалау әрі, әсіресе, инфекциялар жағдайларына көңіл бөлу керек.

Балалар жасындағы пациенттер

Вакцинация

Алтебрелмен ем басталуына дейін балалар жасындағы пациенттерге, егер бұл мүмкін болса, қолданыстағы Иммунизациялау бойынша ұлттық нұсқауларға сәйкес қажетті екпелердің бәрін салуға кеңес беріледі.

Ювенильді идиопатиялық артрит (ЮИА) бар пациенттердегі ішектің қабыну ауруы (ІҚА) және увеит

Алтебрелмен ем қабылдаған ЮИА бар пациенттерде ІҚА және увеиттің сирек жағдайлары тіркелді.

Балаларда қолдану

Алтебрел полиартрит немесе жайылған олигоартрит бар 2 жасқа толмаған балаларда, энтезитті немесе псориазды артрит бар 12 жасқа толмаған балаларда, сондай-ақ түйіндақты псориаз бар 6 жасқа толмаған балаларда қолдануға қолайсыз.

Натрий мөлшері

Алтебрел құрамында 0,138 ммоль/мл натрий бар, яғни препарат натрийден бос болып саналады. Натрий мөлшері төмен диетаны ұстанып жүрген пациенттерге бұл дәрілік препараттың құрамында натрий жоқ екенін хабарлауға болады.

Жүктілік немесе лактация кезінде

Алтебрел жүктілік кезінде тек айқын қажеттілігі болса ғана қолданылу керек. Егер Сіз жүкті болсаңыз, жүкті болуым мүмкін деп ойласаңыз немесе жүктілікті жоспарлап жүрсеңіз, Сізге дәрігермен кеңесу керек.

Егер Сіз жүктілік кезінде Алтебрел қабылдасаңыз, Сіздің сәбиіңізде инфекциялық аурулардың даму қаупі жоғары болуы мүмкін. Бір зерттеуде, аналары жүктілік кезінде Алтебрел немесе ұқсас дәрілік заттарды (ІНФ антагонистері) қабылдамаған балалармен салыстырғанда, аналары жүктілік кезінде Алтебрел препаратын қабылдаған балаларда даму ақаулары көбірек тіркелді, алайда, даму ақауларының нақты типтері мәлімделмеді. Басқа зерттеуде аналары жүктілік кезінде Алтебрел қабылдаған балаларда туа біткен ақаулардың жоғары даму қаупі анықталмады. Сіздің дәрігеріңіз Сізге емдеу артықшылықтарының Сіздің балаңыз үшін ықтималды қауіптен асып түсу-түспеуі жөнінде шешім қабылдауға көмектеседі. Жаңа туған нәрестені емдейтін дәрігерлерге және басқа медициналық қызметкерлерге оның анасы жүктілік кезінде Алтебрел қабылдағанын осы жаңа туған нәрестеге қандай да бір екпелер тағайындалуына дейін мәлімдеу өте маңызды.

Этанерцепт тері астына енгізілген соң әйелдің емшек сүтіне өтетіні анықталды. Иммуноглобулиндер, көптеген дәрілік препараттар сияқты, әйел сүтіне бөлінуі мүмкін болғандықтан, емшекпен қоректенудің сәби үшін пайдасы мен емнің әйел үшін пайдасын ескере отырып, бала емізуді тоқтату немесе Алтебрелмен емді тоқтату шешімін қабылдау қажет.

Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Автокөлікті және күрделі механизмдерді басқару қабілетіне ықпал ету зерттеулері жүргізілмеді.

Қолдану жөніндегі нұсқаулар

Алтебрелмен емдеуді ревматоидты артрит, ювенильді идиопатиялық артрит, псориазды артрит, шорбуынданатын спондилит, рентгенологиялық өзгерістерсіз аксиальді спондилоартрит, түйіндақты псориаз немесе балалардағы түйіндақты псориазды диагностикалау және емдеу тәжірибесі бар дәрігер тағайындауы және бақылап отыруы тиіс. Алтебрел препаратымен ем қабылдап жүрген пациенттер дәрілік препаратты медициналық қолдану жөніндегі нұсқаулықтағы (Қосымша парақ) 1-Қосымшамен мұқият танысып шығуы керек.

Алтебрел 25 мг және 50 мг дозаларда шығарылады.

Дозалау режимі

Ересектер

- ревматоидты артрит

Алтебрелдің ересек пациенттерге ұсынылатын дозасы аптасына екі рет 25 мг немесе аптасына бір рет 50 мг құрайды.

- псориазды артрит, шорбуынданатын спондилит және рентгенологиялық өзгерістеріз аксиальді спондилоартрит.

Алтебрелдің ұсынылатын дозасы аптасына екі рет 25 мг немесе аптасына бір рет 50 мг құрайды.

Жоғарыда көрсетілген барлық көрсетілімдер үшін жүргізілген зерттеулер клиникалық жауапқа, әдетте, емдеудің 12 аптасына дейінгі кезең ішінде жетуге болатынын айғақтайды. Осы кезең ішінде емдеуге жауап бермеген пациенттер үшін емді жалғастыру мәселесін мұқият қарастыру керек.

- түйіндақты псориаз

Алтебрелдің ұсынылатын дозасы аптасына екі рет 25 мг немесе аптасына бір рет 50 мг құрайды. Препаратты 12 аптаға дейін аптасына екі рет 50 мг дозада, ал одан кейін емдеуші дәрігердің ұйғаруы бойынша, аптасына екі рет 25 мг немесе аптасына бір рет 50 мг дозада қолдануға болатын емдеу сызбасына рұқсат етіледі. Алтебрел ремиссияға жеткенше (24 аптаға дейін) қолданылу керек. Кейбір ересек пациенттерде препаратты қолдануды 24 апта өткеннен кейін де жалғастыруға болады. Препаратты 12 апталық кезең бойы қабылдаудан кейін жай-күйі жақсармаған пациенттер үшін әріқарай емдеудің мақсатқа сай болу мәселесін қарастыру керек. Алтебрел препаратымен емдеуді жаңғырту көрсетілген жағдайларда емдеу ұзақтығын емдеуші дәрігер жоғарыда көрсетілген ұсынымдар негізінде белгілейді.

Препаратты аптасына екі рет 25 мг немесе аптасына бір рет 50 мг дозада қолдану керек.

Пациенттердің ерекше топтары

Бүйрек және бауыр функциясының бұзылуы бар пациенттер

Препараттың дозасын түзету қажет емес.

Егде жастағы пациенттер

Препарат дозасын түзету қажет емес. Дозалау режимі мен қолдану тәсілі 18-64 жас шамасындағы ересек пациенттердегі сияқты.

Балалар

Алтебрел 25 мг алдын ала толтырылған шприцтегі және 50 мг алдын ала толтырылған шприцтегі ерітінді түрінде шығарылады. Балаларда Алтебрел препаратының дозасы пациенттің дене салмағына қарай есептеледі. Дене салмағы 62,5 кг-нан аз пациенттер үшін препараттың дозасын мг/кг санап жоғары дәлдікпен таңдау керек.

Алтебрел препаратының 2 жасқа толмаған балалардағы қауіпсіздігі мен тиімділігі анықталмаған.

Деректер жоқ.

- 2 жастан асқан балалардағы ювенильді идиопатиялық артрит

Препараттың ұсынылатын дозасы келесі инъекциялар арасында 3-4 күн үзіліс болатын аптасына екі рет теріастылық инъекция түрінде, 0,4 мг/кг (ең жоғары бір реттік 25 мг дозасына дейін) немесе аптасына бір рет 0,8 мг/кг (ең жоғары бір реттік 50 мг дозасына дейін) құрайды. 4 ай өткенде ешқандай жауап туындамаған пациенттерде емдеуді тоқтату мүмкіндігін қарастыру керек.

Дене салмағы 62,5 кг-нан аз балалар үшін Алтебрелді дозалаудың дәлдігі алдын ала толтырылған шприцтегі белгілеу арқылы жеңілдетіледі, белгілеу препаратты 0,02 мл дәлдігімен енгізуге мүмкіндік береді, бұл этанерцепттің 1 мг/0,02 мл сәйкес келеді.

Мысалы, баланың дене салмағы 16 кг. Аптасына екі рет енгізілетін 0,4 мг/кг дозасы тағайындалған болса, осы балаға 6,4 мг этанерцепт немесе 0,128 мл Алтебрел бар бір иньекцияны енгізу керек. (0,1 бір толық белгі + 0,1 мен 0,2 арасындағы бір аралық белгіге немесе 6 ең кіші бөліктерге сәйкес келеді - төмендегі белгілеу суретін қараңыз).

25 мг дозасына арналған белгілер – ең кіші бөліктің дәлдігі 0,02 мл (1 мг этанерцепт) болып табылады.

50 мг дозасына арналған белгілер – ең кіші бөліктің дәлдігі 0,02 мл (1 мг этанерцепт) болып табылады.

Ресми клиникалық зерттеулер 2-ден 3 жасқа дейінгі балаларда жүргізілмеді. Дегенмен де, пациенттер тізілімінен алынған қауіпсіздігі жөніндегі шектеулі деректер 2-ден 3 жасқа дейінгі балалардағы қауіпсіздік бейінінің ересектер мен 4 жастағы және одан үлкен балалардағы апта сайын тері астына 0,8 мг/кг дозада қолдану кезіндегі бейініне ұқсас екенін айғақтайды.

Алтебрелді 2 жасқа толмаған балаларда «ювенильді идиопатиялық артрит» көрсетілімі бойынша қолдану көрсетілмеген.

- балалардағы (6 жастағы және одан үлкен) түйіндақты псориаз

Ұсынылатын доза 24 аптаға дейінгі ұзақтықпен аптасына бір рет 0,8 мг/кг (ең көбі дозасына 50 мг) құрайды. 12 апта өткеннен кейін емге жауап болмаған пациенттерде емдеуді тоқтату керек.

Алтебрел препаратымен емдеуді жаңғырту көрсетілген жағдайларда емдеу ұзақтығын жоғарыда көрсетілген ұсынымдар негізінде белгілуе керек. Препарат дозасы аптасына бір рет 0,8 мг/кг (ең жоғары бір реттік 50 мг дозасына дейін) құрауы тиіс.

Әдетте, Алтебрелді 6 жасқа толмаған балаларда «түйіндақты псориаз» көрсетілімі бойынша пайдалану көрсетілмеген.

Енгізу әдісі және жолы

Алтебрел тері астына инъекция арқылы енгізіледі.

Алтебрел инъекциясын енгізу техникасы осы нұсқаулық соңында 1 қосымшада келтіріледі.

Артық дозалану жағдайда қабылдау қажет болатын шаралар

Егер Сіз Алтебрелді керегінен көбірек пайдалансаңыз (бір рет тым көп мөлшерде енгізу немесе керектісінен де жиірек қолдану жағдайындағы сияқты), кейінге қалдырмастан емдеуші дәрігерге немесе фармацевтке хабарласыңыз. Препараты бар картон қорапты, егер ол тіпті бос болса да, үнемі өзіңізбен ұстап жүріңіз.

Дәрілік препараттың бір немесе бірнеше дозаларын өткізіп алу кезіндегі қажетті шаралар

Егер Сіз препаратты уақытында енгізуді ұмытып кетсеңіз, Сізге оны бұл жөнінде еске түскен бойда енгізу керек. Келесі доза кестеде келесі күнге тағайындалған жағдайда, жасалмаған инъекцияны өткізіп жіберуге болады. Препарат инъекциясын әдеттегі кестеге сәйкес жалғастырыңыз. Егер Сіз келесі инъекцияны қашан жасау керегін ұмытсаңыз, өткізіп алғанының орнын толтыру мақсатында екі есе дозасын (екі дозаны сол бір күнде) енгізбеңіз.

Тоқтату симптомдары қаупінің болуына көрсетілім

Емді тоқтатқан жағдайда симптомдар қайталануы мүмкін.

Дәрілік препаратты қолдану тәсілін түсіндіру үшін медициналық қызметкеріне кеңесіне жүгіну жөніндегі ұсынымдар

Егер Сізде осы препаратты қолдану жөнінде қосымша сауалдар туындаса, өз емдеуші дәрігеріңізбен кеңесіңіз.

ДП стандартты қолдану кезінде көрініс беретін жағымсыз реакциялар сипаттамасы және осы жағдайда қабылдау керек шаралар

Ең көп таралған жағымсыз реакцияларға инъекция орнындағы реакциялар (инъекция орнындағы ауырсыну, домбығу, қышыну, қызару және қан кету сияқты), инфекциялар (жоғарғы тыныс жолдарының инфекциялары, бронхит, қуық инфекциялары және тері инфекциялары сияқты), аллергиялық реакциялар, антиденелер түзілуі, қышыну және температураның көтерілуі жатады.

Этанерцептті пайдалану кезінде күрделі жағымсыз реакциялар да тіркелді. Этанерцепт сияқты ІНФ антагонистері иммундық жүйеге теріс ықпал етеді, әрі оларды қолдану организмнің инфекциялар мен қатерлі жаңа түзілімдерге қатысты қорғаныс жүйесіне теріс әсерін тигізу мүмкін. Алынған хабарламалар өлімге ұшыратқан және өмірге қатерлі инфекциялар мен сепсис жағдайларын қамтыды. Сонымен қатар этанерцепт қолдану кезінде сүт безінің, өкпенің, терінің және лимфа түйіндерінің обырын (лимфома) қоса, әртүрлі қатерлі жаңа түзілімдер туындаған жағдайлар да тіркелді.

Күрделі гематологиялық, неврологиялық және аутоиммундық реакциялар жағдайлары да тіркелді. Оларға панцитопения туралы сирек хабарламалар және аплазиялық анемия туралы өте сирек хабарламалар жатады. Этанерцепт қолдану кезінде орталық және шеткері демиелинизациялаушы аурулар, тиісінше, сирек және өте сирек байқалды Жегі, жегімен байланысты патологиялық жай-күйлер және васкулиттің сирек жағдайлары тіркелді.

Өте жиі

• инфекция (жоғарғы тыныс жолдарының инфекциясын, бронхит, цистит және тері инфекциясын қоса) *

• инъекция орнындағы реакциялар (қан кетуді, көгерулер түзілуін, эритема, қышыну, ауырсыну мен домбығуды қоса) *

Жиі

• аллергиялық реакциялар («Тері және теріасты тіндері тарапынан бұзылулар» қараңыз, аутоантиденелердің түзілуі)*

• қышыну, бөртпе

• пирексия

Жиі емес

• күрделі инфекциялар (пневмония, панникулит, бактериялық артрит, сепсис және паразиттік инфекцияларды қоса) *

• терінің меланомалық емес қатерлі ісіктері *

• тромбоцитопения, анемия, лейкопения, нейтропения

• васкулит (нейтрофилге қарсы цитоплазмалық антиденелер түзілуімен васкулиттерді қоса)

• увеит, склерит

• жүректің созылмалы жеткіліксіздігі симптомдарының ушығуы

• бауыр ферменттері деңгейінің жоғарылауы *

• ангионевроздық ісіну, псориаз (алғаш туындағанын немесе бұрыннан барының ушығуын, сондай-ақ көбінесе алақан мен табанның зақымдануымен пустулалық псориазды қоса), есекжем, псориаз тәрізді бөртпелер

Сирек

• туберкулез, оппортунистік инфекциялар (инвазиялық зеңді, протозойлық, бактериялық, атиптік микобактериялық, вирустық инфекциялар мен Legionella тектес бактериялар тудырған инфекцияларды қоса)*

• қатерлі меланома, лимфома, лейкоз

• панцитопения *

• күрделі аллергиялық/анафилаксиялық реакциялар (ангионевроздық ісінуді, бронх түйілуін қоса), саркоидоз

• жайылған склерозды немесе көру жүйкесінің невриті, көлденең миелит сияқты жергілікті демиелинизациялаушы ауруды айғақтайтын ОЖЖ демиелинизациялайтын патологиялық үдеріс құбылыстары, шеткері демиелинизациялаушы аурулар, Гийен- Барре синдромын, созылмалы қабынумен жүретін демиелинизациялаушы полинейропатияны, демиелинизациялаушы полинейропатияны және мультифокальді моторлық нейропатияны қоса, құрысу ұстамасы.

• жүректің алғаш анықталған созылмалы жеткіліксіздігі (ЖСЖ)

• өкпенің интерстициальді ауруы (пневмония мен өкпе фиброзын қоса)*

• аутоиммундық гепатит *

• Стивенс-Джонсон синдромы, тері васкулиті (гиперергиялықты қоса), полиморфты эритема, лихеноидтық реакциялар

• терідегі қызыл жегі, терідегі жеделге жуық қызыл жегі, жегі тәрізді синдром

Өте сирек

• аплазиялық анемия *

• уытты эпидермалық некролиз

Белгісіз (қолда бар деректер негізінде бағалау мүмкін емес)

• В гепатиті вирусының қайта белсенділенуі, листериоз

• Меркель карциномасы, Капоши саркомасы

• гематофагоцитарлық лимфогистиоцитоз (макрофагтардың белсенділену синдромы) *

• дерматомиозит симптомдарының күшеюі

Жекелеген жағымсыз реакциялар сипаттамасы

Қатерлі және лимфопролиферациялық аурулар

Ревматоидты артрит, псориазды артрит, шорбуынданатын спондилит және псориаз бар пациенттерде алуан түрлі қатерлі жаңа түзілімдер туындаған жағдайлар байқалды.

Бақыланатын зерттеудің 2 жылы ішінде метотрексатпен біріктірілімде этанерцепт алған 231 пациентті қоса, клиникалық сынақтарда шамамен 6 жыл бойы этанерцепт алған ревматоидты артрит бар 4114 пациентте әртүрлі типтегі жүз жиырма тоғыз (129) жаңа қатерлі жаңа түзілім байқалды. Осы клиникалық сынақтардағы байқалған көрсеткіштер мен жиіліктер зерттелетін популяция үшін күтілетіндерге ұқсас болды. Осы клиникалық сынақтардағы байқалған көрсеткіштер мен жиіліктер зерттелетін қауым үшін күтілетіндеріне ұқсас болды. Ұзақтығы 2 жылға жуық клиникалық зерттеулерде этанерцепт алған псориазды артрит бар 240 науқастың қатысуымен, жалпы жиынтығы 2 қатерлі жаңа түзілім тіркелді. Шорбуынданатын спондилитпен 351 науқаспен 2 жылдан астам уақыт бойы жүргізілген клиникалық зерттеулерде этанерцепт қабылдаған пациенттерде 6 қатерлі жаңа түзілім тіркелді. Қзақтығы 2,5 жылға дейін салыстырмалы жасырын және ашық зерттеулерде этанерцепт алған түйіндақты псориазбен 2711 науқас тобында 30 қатерлі ісік және 43 терінің меланомалы емес обыры тіркелді.

Ревматоидты артрит, псориазды артрит, шорбуынданатын спондилит және псориаз кезіндегі клиникалық сынақтарда этанерцепт алған 7416 пациент тобында 18 лимфома тіркелді.

Маркетингтен кейінгі кезеңде әртүрлі қатерлі жаңа түзілімдер (сүт безінің, өкпенің обырын және лимфоманы қоса) туралы хабарламалар да алынды.

Инъекция орнындағы реакциялар

Этанерцепт алған ревматизмдік аурулар бар пациенттерде, плацебомен салыстырғанда, инъекция орнындағы реакциялардың кездесу жиілігі едәуір жоғары болды (9% қарсы 36%). Инъекция орнында реакциялар, әдетте, бірінші айда пайда болды. Орташа ұзақтығы шамамен 3-тен 5 күнге дейін созылды. Көпшілік жағдайларда этанерцепт қабылдаған пациенттерде инъекция орнында реакциялар туындағанда емдеу жүргізілмеген, ал пациенттердің көпшілігі кортикостероидтар сияқты жергілікті қолдануға арналған дәрілерді немесе пероральді антигистаминдік препараттарды пайдаланды. Бұдан бөлек, кейбір пациенттерде инъекция орнындағы реакциялар қайтадан туындады, оларға алдыңғы инъекция орындарында реакциялардың бір мезгілде пайда болуымен қатар соңғы инъекция салған жердегі тері реакциясы тән болды. Бұл реакциялар, әдетте, қысқа мерзімді болды және емдеу кезнде қайтадан туындамады.

Бақыланатын зерттеулерде түйіндақты псориаз бар пациенттерде этанерцепт қабылдаған пациенттердің 13,6% шамасында алғашқы 12 апта емделу кезінде, плацебо алған пациенттердің 3,4%-мен салыстырғанда, инъекция орнындағы реакциялар дамыды.Күрделі инфекциялар

Плацебо-бақыланатын зерттеулерде күрделі инфекциялар (өлімге ұшырататын, өмірге қатерлі немесе ауруханаға жатқызуды немесе вена ішіне антибиотиктер қолдануды талап ететін) жиілігінің артуы байқалмады. Этанерцептті 48 айға дейінгі мерзімде қабылдаған ревматоидты артрит бар пациенттердің 6,3%-да тіркелген күрделі инфекциялар абсцесс (орналасуы әртүрлі), бактериемия, бронхит, бурсит, панникулит, холецистит, диарея, дивертикулит, эндокардит (болжамды), гастроэнтерит, B гепатиті, герпес зостер, аяқтағы ойық жара, ауыз қуысының инфекциясы, остеомиелит, отит, перитонит, пневмония, пиелонефрит, сепсис, сепсистік артрит, синусит, тері инфекциясы, терінің ойық жарасы, несеп шығару жолдарының инфекциясы, васкулит және жарақаттық инфекцияны қамтиды. Екі жылдық бақыланатын зерттеуде этанерцептпен монотерапия, метотрексатпен монотерапия немесе этарнепцепт метотрексатпен біріктірілімде қолданылғанда күрделі инфекциялар жиілігі түрлі емдеу топтарында ұқсас болды. Дегенмен де, этанерцептті метотрексатпен біріктірілімде қолданудың инфекциялар жиілігінің артуымен қатар жүруі мүмкін екенін жоққа шығаруға болмайды.

Этанерцепт қабылдаған пациенттер мен ұзақтығы 24 аптаға дейін плацебо-бақыланатын зерттеулерде түйіндақты псориазды емдеу үшін плацебо алған пациенттер арасында инфекция жұқтыру көрсеткіштерінде айырмашылықтар болмады. Этанерцептпен емделген пациенттер қақтығысатын күрделі инфекцияларға тіндердің қабынуы, гастроэнтерит, пневмония, холецистит, остеомиелит, гастрит, аппендицит, стрептококкты фасциит, миозит, сепсистік шок, дивертикулит және абсцесс қамтылды. Псориаздық артриттің салыстырмалы жасырын және ашық зерттеулерінде 1 пациент күрделі инфекция (пневмония) туралы мәлімдеді.

Этанерцепт қолдану кезінде бактериялар, микобактериялар (оның ішінде, туберкулез), вирустар мен зеңдер тудырған күрделі және өлімге ұшырататын инфекциялар тіркелді. Кейбіреуі, ревматоидты артриттен тыс негізгі бейімдеуші аурулары (мысалы, қант диабеті, жүректің іркілісті жеткіліксіздігі, анамнезіндегі белсенді немесе созылмалы инфекциялары) бар пациенттерде этанерцептпен емдеу басталған соң бірнеше апта ішінде тіркелді. Этанерцептпен емдеу сепсис диагностикаланған пациенттердегі өлімге ұшырауды арттыруы мүмкін.

Этанерцептті қолданумен байланысты оппортунистік инфекциялар, оның ішінде инвазиялық зеңді, паразиттік (протозойлық түрлерін қоса), вирустық (белдемелі герпесті қоса) және бактериялық (Listeria мен Legionella қоса), сондай-ақ атиптік микобактериялық инфекциялар жағдайлары тіркелді. Клиникалық сынақтар деректері біріктірілген жинақта этанерцепт қабылдаған 15 402 пациент үшін оппортунистік инфекциялардың жалпы жиілігі 0,09% құрады. Экспозицияға түзетілген жиілік 100 пациент-жылға шаққанда 0,06 оқиғадан құралды. Препаратты қолдану кезінде бүкіл әлемдегі оппортунистік инфекциялардың барлық клиникалық жағдайларының жартысына жуығы инвазиялық зеңді инфекциялармен байланысты болды. Инвазиялық зең инфекцияларды бәрінен жиірек Candida, Pneumocystis, Aspergillus және Histoplasma тудырды. Инвазиялық зең инфекциялары, оппортунистік инфекциялар дамыған пациенттер арасындағы өліммен аяқталған оқиғаларының жартысынан көбіне себеп болды. Өліммен аяқталған оқиғалардың көпшілігі Pneumocystis тудырған пневмония, анықталмаған жүйелі зең инфекциясы және аспергиллез бар пациенттерде тіркелді.

АутоантиденелерЕресек пациенттердің қан сарысуының үлгілері аутоантиденелерді анықтау мақсатында бірнеше уақыт нүктелерінде талданды. Антинуклеарлы антиденелерге (AHA) талдау жасалған ревматоидты артрит бар пациенттер арасында жаңа AHA (≥ 1 : 40) этанерцепт (11%) алғандарда, плацебо алғандарға қарағанда (5%), жиірек анықталды. Екі тізбекті ДНҚ жаңа антиденелері өндірілген пациенттердің пайыздық үлесі радиоиммунологиялық талдау көмегімен (плацебо алған пациенттердің 4%-ымен салыстырғанда, этанерцептпен ем қабылдаған пациенттердің 15%-ы) және Crithidia luciliae жасушаларына жасалған иммунофлуоресценттік талдау көмегімен (плацебо алған пациенттерде екі тізбекті ДНҚ антиденелерінің болмауымен салыстырғанда, этанерцептпен ем қабылдаған пациенттердің 3%-ы) бағалау кезінде де жоғары болды. Алтебрелмен ұзақ уақыт емдеудің аутоиммундық аурулардың дамуына әсері белгісіз. Кардиолипинге қарсы антиденелер өндірілген этанерцептпен ем қабылдаған пациенттер үлесі, плацебо алған пациенттермен салыстырғанда, ұқсас үлгіде көбейді. Этанерцептпен ұзақ емдеудің аутоиммундық аурулар дамуына әсері белгісіз.

Ревматоидтық факторға талдау нәтижесі оң пациенттерді қоса, жегі тәрізді синдромның немесе бөртулердің туындауымен бір мезгілде басқа аутоантиденелер өндірілген пациенттерде сирек жағдайлар тіркелді, бұл клиникалық көріністері мен биопсия бойынша терінің жеделге жуық қызыл жегісіне немесе дискоидты қызыл жегіге сәйкес келеді.

Панцитопения және аплазиялық анемия

Этанерцепт қолдану кезінде кейбіреуі өліммен аяқталған панцитопения және аплазиялық анемия жағдайлары тіркелді.

Өкпенің интерстициальді ауруы

Этанерцепт бақыланатын клиникалық зерттеулерде барлық көрсетілімдер бойынша қатарлас метотрексатсыз этанерцепт қабылдаған пациенттерде өкпенің интерстициальді ауруларының жиілігі (ауруға шалдығу үлесі) 0,06% (сирек) құрады. Этанерцептпен және метотрексатпен қатар емдеуге мүмкіндік берген бақыланатын клиникалық сынақтарда өкпенің интерстициальді ауруларының жиілігі (ауруға шалдығу үлесі) 0,47% (сирек) болды. Этанерцепт қолдану кезінде кейбіреулері өліммен аяқталған өкпенің интерстициальді ауруы (пневмония мен өкпе фиброзын қоса) жағдайлары тіркелді.

Анакинрамен қатарлас емдеу

Ересек пациенттер этанерцептпен және анакинрамен қатарлас емделген зерттеулерде, монотерапия түрінде этанерцепт қолданумен салыстырғанда, күрделі инфекциялардың өте жоғары жиілігі байқалды, ал пациенттердің 2%-ында нейтропения (нейтрофилдердің абсолютті саны  1000/мм3) дамыды. Нейтропения кезінде бір пациентте ауруханаға жатқызудан кейін басылған панникулит дамыды.

Бауыр ферменттері деңгейінің жоғарылауы

Этанерцепт препаратының бақыланатын клиникалық зерттеулерінің салыстырмалы жасырын кезеңдері кезінде барлық көрсетілімдерінде метотрексатпен қатарлас емдеусіз этанерцептті қабылдап жүрген пациенттерде бауыр ферменттері деңгейлерінің жоғарылауы түріндегі жағымсыз құбылыстардың туындау жиілігі (ауруға шалдығу үлесі) 0,54 % құрады (туындау жиілігінің санаты «жиі емес»). Этанерцептпен және метотрексатпен қатар емдеуге мүмкіндік берген бақыланатын клиникалық зерттеулердің жасырын салыстырмалы кезеңдерінде бауыр ферменттері деңгейінің жоғарылауын білдіретін жағымсыз құбылыстардың туындау жиілігі (ауруға шалдығу үлесі) 4,18% - ды құрады (туындау жиілігінің санаты "жиі").

Аутоиммундық гепатит

Этанерцепттің бақыланатын клиникалық зерттеулерінде барлық көрсетілімдер кезінде метотрексатпен қатарлас емсіз этанерцепт алатын пациенттерде аутоиммундық гепатиттің туындау жиілігі (ауруға шалдығу үлесі) 0,02% - ды құрады (туындау жиілігінің санаты "сирек"). Этанерцептпен және метотрексатпен қатар емдеу мүмкіндігі бар бақыланатын клиникалық зерттеулерде аутоиммундық гепатиттің пайда болу жиілігі (ауруға шалдығу үлесі) 0,24% - ды құрады (туындау жиілігінің санаты «жиі емес»).

Балалардағы жағымсыз реакциялар

Ювенильді идиопатиялық артрит бар балалар жасындағы пациенттердегі жағымсыз әсерлер

Жалпы алғанда, ювенильді идиопатиялық артрит бар балалар жасындағы пациенттерде жағымсыз құбылыстар жиілігі мен типі бойынша ересектерде байқалғандарымен ұқсас болды. Ересектерден өзгешелеіктері мен өзіне тән басқа ерекшеліктері келесі тармақтарда талқыланады.

Клиникалық зерттеулерде ювенильді идиопатиялық артрит бар 2-ден 18 жасқа дейінгі пациенттерде байқалған инфекциялар типтері әдетте, ауырлығы жеңіл және орташа дәрежеде болды және әдетте, балалар жасындағы пациенттердің амбулаторлық қауымында байқалатындармен ұқсас болды. Ауыр жағымсыз құбылыстар туралы хабарламалар асқынуларсыз басылған асептикалық менингит белгілерімен және симптомдарымен болатын желшешек, аппендицит, гастроэнтерит, депрессия/тұлғалық бұзылыстарды, терінің ойық жараларын, эзофагит/гастрит, А тобы стрептококтары тудырған сепсистік шок, I типті қант диабетін және жұмсақ тіндердің инфекциялары мен операциядан кейінгі жарақаттық инфекцияны қамтыды.

Ювенильді идиопатиялық артрит бар 4-тен 17 жасқа дейінгі балаларда жүргізілген бір зерттеуде 69 баланың 43-інде (62%) этанерцептпен емдеу кезінде 3 ай зерттеуден (1 бөлім, ашық) кейін инфекция тіркелді, осы орайда инфекциялар жиілігі мен ауырлық дәрежесі қосымша ашық емнің 12 айлық фазасын аяқтаған 58 пациенттегісіне ұқсас болды. Ювенильді идиопатиялық артрит бар пациенттердегі жағымсыз құбылыстар типтері мен үлестері ревматоидты артрит бар ересек пациенттердегі этанерцепт зерттеулеріндегі осындаймен ұқсас болды, осы орайдар көпшілігінің ауырлығы орташа дәрежеде болды. Бірнеше жағымсыз құбылыс, этанерцепт 3 ай бойы қабылданған ювенильді идиопатиялық артрит бар 69 пациентте, ревматоидты артрит бар 349 ересек пациентпен салыстырғанда, жиірек тіркелді. Бұл құбылыстар бас ауыруын (пациенттердің 19%-ы, пациент-жылға 1,7 құбылыс), жүрек айнуын (9%, пациент-жылға 1,0 құбылыс), іш ауыруын (19%, пациент-жылға 0,74 құбылыс) және құсуды (13%, пациент-жылға 0,74 құбылыс) қамтыды.

Ювенильді идиопатиялық артриттің клиникалық зерттеулерінде макрофагтар белсенуі синдромының 4 жағдайы тіркелді.

Тіркеуден кейінгі кезеңде этанерцепт қолданылғанда этанерцептпен ем қабылдаған ЮИА бар пациенттерде, препарат қайта тағайындалғанда реакциялар жаңғыруын айғақтайтын жағдайлардың өте мардымсыз санын қоса, ішектің қабыну ауруы мен увеит жағдайлары тіркелді.

Түйіндақты псориаз бар балалар жасындағы пациенттердегі жағымсыз әсерлер

Түйіндақты псориаз бар 4-тен 17 жасқа дейінгі балаларда тіркелген жағымсыз құбылыстар түйіндақты псориаз бар ересектердегісіне ұқсас болды.

Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаны қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей хабарласу қажет

Қазақстан Республикасы Денсаулық сақтау министрлігі Медициналық және фармацевтикалық бақылау комитетінің «Дәрілік заттар мен медициналық бұйымдарды ұлттық сараптау орталығы» ШЖҚ РМК

http://www.ndda.kz

Қосымша мәліметтер

Дәрілік препарат құрамы

Препараттың бір дозасының құрамында

белсенді зат – 25,0 мг немесе 50,0 мг этанерцепт,

қосымша заттар: натрий хлориді, сукроза, L-аргинин гидрохлориді,

натрий гидрофосфат дигидраты, натрий дигидрофосфат дигидраты,

инъекцияға арналған су.

Сыртқы түрінің, иісінің, дәмінің сипаттамасы

Іс жүзінде бөлшектерден бос түссізден сәл сарғыш түске дейінгі мөлдір немесе мөлдір дерлік ерітінді.

Шығарылу түрі және қаптамасы

0.5 мл (25 мг) немесе 1.0 мл (50 мг) препараттан екі қабатты қалпақшамен жабылған тот баспайтын болат инемен, саусаққа арналған полипропилен тірекпен және полиизопреннен резеңке тығыздағышы бар шток-поршенмен жабдықталған мөлдір, түссіз шыныдан (І тип) жасалған бір рет пайдалануға арналған шприцтерде.

4 шприцтен медициналық қолдану жөніндегі қазақ және орыс тілдеріндегі нұсқаулықпен бірге қорапшаның ішінде шприцтерді бекітуге арналған картоннан жасалған ұстағыш-бөлгішпен жабдықталған картон қорапшаға салынады.

Әр қорапша алғашқы ашылуын бақылауға арналған голограммасы бар стикермен баспаланған.

2 жыл.

Жарамдылық мерзімі өткеннен кейін қолдануға болмайды!

2-ден 8 °С-ге дейінгі температурада сақтау керек. Жарықтан қорғау үшін түпнұсқалық қаптамасында сақтау керек.

25 °С-ден аспайтын температурада төрт аптадан асырмай бір рет сақтауға болады, содан кейін препаратты  тоңазытқышқа қайта салуға рұқсат етілмейді.

Балалардың қолы жетпейтін жерде сақтау керек!

Рецепт арқылы

Өндіруші туралы мәліметтер

AryoGen Pharmed,

No. 140, Corner of Tajbakhsh St., 24 Km Tehran-Karaj Makhsous road, Альборз, И.Р. Иран

тел: +98 26 36106480-4, +98 26 36104644

Электронды пошта: contact@aryogen.com

Тіркеу куәлігінің ұстаушысы

AryoGen Pharmed,

No. 140, Corner of Tajbakhsh St., 24 Km Tehran-Karaj Makhsous road, Альборз, И.Р. Иран

тел: +98 26 36106480-4, +98 26 36104644

Электронды пошта: contact@aryogen.com

Қазақстан Республикасы аумағында тұтынушылардан дәрілік заттар сапасына қатысты шағымдар (ұсыныстар) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

«Saa Pharma» ЖШС

050010, Алматы қ, Достық д-лы, 38, № 705 кеңсе, KDC бизнес орталығы

тел.: + 7 (727) 345 10 12, ұялы: +7 (701) 922-60-63,

электронды пошта: info@saapharma.kz

1 қосымша.

Алтебрел ерітіндісін дайындау және инъекциясын енгізу техникасы

Инъекцияға дайындық

Бұл препаратты кез келген басқа препараттармен бір шприцте немесе құтыда араластыруға болмайды!

1 ҚАДАМ:

Шприцтегі ерітіндінің мөлдір, түссіз немесе ашық сары, көрінетін бөлшектері жоқ дерлік екеніне көз жеткізіңіз. Сіз ерітіндідегі кішкентай ақ бөлшектерді байқауыңыз мүмкін. Осы бөлшектер заттан түзіледі, бұл қалыпты жайт. Егер ерітінді бұлыңғыр немесе түссізденген немесе құрамында ірі немесе түсті бөлшектер бар болса немесе алдын ала толтырылған шприц жарылған немесе сынған сияқты болса, оны ЕНГІЗБЕҢІЗ.

2 ҚАДАМ: Инъекция орындарын таңдау және дайындау

1 сурет

3 ҚАДАМ: Алтебрелді алдын ала толтырылған шприцтен енгізу

Инъекция жасауға дайын болмайынша инеден қалпақшасын ШЕШПЕҢІЗ.

2 сурет

4 ҚАДАМ: Қалдықтарды утилизациялау

Егер Сізде сұрақтар болса, Алтебрел препаратымен жұмыс істейтін дәрігерге немесе медбикеге хабарласуды өтінеміз.