АЛВО-ВАЛС Н (80/12,5 мг)
Инструкция
-
русский
-
қазақша
Саудалық атауы
Алво-Валс Н
Халықаралық патенттелмеген атауы
Жоқ
Дәрілік түрі
Үлбірлі қабықпен қапталған 80/12.5 мг, 160/12.5 мг, 160/25 мг таблеткалар
Құрамы
Бір таблетканың құрамында
белсенді заттар: 80 мг валсартан / 12,5 мг гидрохлортиазид
160 мг валсартан / 12,5 мг гидрохлортиазид
160 мг валсартан / 25 мг гидрохлортиазид,
қосымша заттар: микрокристалды целлюлоза, сусыз коллоидты кремнийдің қостотығы, сорбитол, магний карбонаты 90, жүгері крахмалы, повидон (К-30), натрий стеарил фумараты, натрий лаурилсульфаты, кросповидон (А типі), сусыз коллоидты кремнийдің қостотығы (Аэросил 200)
қабықтың құрамы:
80\12,5
Опадрай® OY-L-28900 (лактоза моногидраты, гипромелоза, титанның қостотығы Е 171, макрогол 4000, темірдің қызыл тотығы Е172)
160\12,5
Опадрай® OY-L-28900 (лактоза моногидраты, гипромелоза, титанның қостотығы Е 171, макрогол 4000, темірдің қызыл тотығы Е172, темірдің қоңыр тотығы Е172)
160\25мг
Опадрай® OY-L-28900 (лактоза моногидраты, гипромелоза, титанның қостотығы Е 171, макрогол 4000, темірдің сары тотығы Е 172, темірдің қоңыр тотығы Е172)
Сипаттамасы
Цилиндр пішінді, екі беті дөңес, қызғылт түсті үлбірлі қабықпен қапталған таблеткалар (80 мг/12.5 мг үшін)
Цилиндр пішінді, екі беті дөңес, қызыл түсті үлбірлі қабықпен қапталған таблеткалар (160 мг/12.5 мг үшін)
Цилиндр пішінді, екі беті дөңес, қоңыр түсті үлбірлі қабықпен қапталған таблеткалар (160 мг/25 мг үшін)
Фармакотерапиялық тобы
Ренин-ангиотензин жүйесіне әсер ететін препараттар. Диуретиктермен біріктірілген ангиотензин II антагонистері. Диуретиктермен біріктірілген валсартан.
ATХ коды C09 DA03
Фармакологиялық қасиеттері
Фармакокинетикасы
Валсартан
Валсартанның сіңуі жылдам жүреді, алайда сіңу дәрежесі ауқымды шектерде ауытқиды. Биожетімділігінің орта шамасы 23% құрайды. Валсартанның фармакокинетикалық қисығы төмендеуге бейім мультиэкспоненциальді сипат (t1/2 < 1 сағат және t1/2 9 сағатқа жуық) иеленген.
Валсартан кинетикасының сипаты дозаға байланысты. Препаратты қайталап қолданғанда кинетикалық көрсеткіштерінің өзгеруі болмайды. Препаратты күніне бір рет қабылдағанда жинақталуы мардымсыз.
Валсартан қан сарысуының ақуыздарымен, көбінесе альбуминдермен 94-97% байланысады. Тепе-тең таралу көлемі төмен (17 л жуық). Бауырдағы қан ағымымен салыстырғанда (30 л/сағатқа жуық), валсартанның плазмалық клиренсі салыстырмалы түрде баяу жүреді ( 2 л/сағатқа жуық). Валсартанның нәжіспен шығарылуы (ішке қабылданған доза шамасынан) 83% құрайды. Көбінесе өзгеріссіз күйде 17%-ға жуығы несеппен шығарылады.
Валсартан ас ішумен тағайындалғанда, препарат қабылданғаннан кейін шамамен 8-ші сағаттан бастап плазмадағы валсартан концентрациясы оны ашқарынға қабылдаған жағдайда да, тамақпен бірге қабылдаған жағдайда да бірдей болғанымен, «концентрация-уақыт» қисығы астындағы ауданы (AUC) 48% ұлғаяды. «Концентрация-уақыт» қисығы астындағы ауданының азаюы емдік тиімділігінің клиникалық мәнді төмендеуімен қатар жүрмейді.
Гидрохлортиазид
Гидрохлортиазидтің сіңуі жылдам жүреді (tmax - 2 сағатқа жуық). Соңғы фазасының жартылай шығарылу кезеңі 6-15 сағат құрайды.
Емдік дозалар ауқымында орташа AUC шамасы дозаға байланысты арта түседі және дозаның арттырылуына тура пропорционал болады. Қайта тағайындалған кездерде гидрохлортиазид фармакокинетикасы өзгермейді; тәулігіне бір рет тағайындалғанда жинақталуы мардымсыз.
Гидрохлортиазид қан сарысуы ақуыздарымен, көбінесе альбуминдермен 40-70 % байланысады.
Гидрохлортиазид биожетімділігі 60-80% құрайды. Несеппен шығарылуы: дозаның 95%-дан астамы өзгеріссіз күйде және 4%-ға жуығы гидролизат - 2-амин-4-хлор-m-бензенедисульфонамид түрінде жүзеге асады.
Валсартан/гидрохлортиазид
Валсартанмен бірге қолданғанда гидрохлортиазидтің жүйелік биожетімділігі шамамен 30% азаяды. Гидрохлортиазидті бір мезгілде тағайындау, өз тарапынан, валсартан кинетикасына елеулі әсер көрсетпейді. Өзара әрекеттесудің болуы валсартан мен гидрохлортиазидті біріктіріп қолдану тиімділігіне ықпалын тигізбейді. Осы біріктірілімнің гипертензияға қарсы айрықша тиімділігі анықталған, ол компоненттердің әрқайсысында әсерінің өз алдына бөлек артуымен көрініс береді.
Науқастардың жекелеген топтарындағы фармакокинетикасы
Егде жастағы науқастар
Егде жастағы науқастарда (дені сауларда да, артериялық гипертониядан зардап шегушілерде де) гидрохлортиазидтің жүйелік клиренсі жастардағыдан төмен.
Бүйрек функциясы бұзылған науқастар
Креатинин клиренсі 30-70 мл/мин науқастарға дозаны реттеу қажет емес.
Қазіргі уақытта бүйрек функциясының бұзылулары айқын науқастарда (креатинин клиренсі 30 мл/мин аз) және гемодиализде жүрген науқастарда Алво-Валс Н қолдану жөнінде деректер жоқ.
Бауыр функциясы бұзылған науқастар
Бауыр жеткіліксіздігі жеңіл (n=6) және орташа (n=5) науқастарда валсартанның жүйелік әсері дені саулардағыдан 2 есе көбірек. Валсартан дозасы 80 мг-ден аспауы тиіс.
Фармакодинамикасы
Алво-Валс Н – құрамына ангиотензин II рецепторларының антагонисі және тиазидті диуретик кіретін гипертензияға қарсы препарат.
Ренин-ангиотензин-альдостерон жүйесінің (РААЖ) белсенді гормоны ангиотензин-өзгертуші фермент (АӨФ) қатысуымен ангиотензин I түзілетін ангиотензин II болып табылады. Ангиотензин II әртүрлі тіндердегі жасушалық жарғақшаларда орналасқан спецификалық рецепторлармен байланысады. Ол алғашқы кезекте артериялық қысымды реттеуге әрі тікелей, әрі жанама қатысу қамтылатын физиологиялық әсерлердің кең ауқымын иеленеді. Қуатты тамыр тарылтқыш зат бола отырып, ангиотензин II тіке прессорлық жауап туындатады. Бұдан басқа, ол альдостерон сөлінісін көтермелеп, натрий іркілісіне ықпал етеді.
Валсартан – ішке қабылдауға арналған ангиотензин II рецепторларының белсенді және спецификалық антагонисі. Ол ангиотензин II белгілі әсерлері үшін жауапты AT1 қосалқы тип рецепторларына таңдамалы әсер етеді. Ангиотензин II жоғарылаған сарысулық деңгейлері валсартанның АТ1 рецепторларын бөгеуі салдарынан бос АТ2-рецепторларын көтермелейді, бұл АТ1-рецепторлар әсерін теңестіреді. Валсартан AT1 қосалқы тип рецепторларына қатысты қанша болса да айқын агонистік белсенділік танытпайды.
Валсартан ангиотензин I ангиотензин II айналдырып, брадикининді ыдырататын кининаза II атауымен де белгілі АӨФ-ті тежемейді. Брадикининнен болатын қандай да бір жағымсыз әсерлер байқалмайды. Құрғақ жөтелдің даму жиілігі валсартан алатын науқастарда АӨФ тежегішін алатын науқастардағыдан төмен. Валсартан басқа гормондар рецепторларын немесе жүрек-қантамыр жүйесінің функциясын реттеуде маңызды орын алатын ион өзектерін бөгемейді және өзара әрекеттесуге түспейді.
Артериялық гипертониясы бар науқастар валсартанмен емделгенде тамыр соғу жиілігінің өзгеруімен қатар жүрмейтін артериялық қысымның төмендеуі болады.
Препараттың бір реттік дозасын ішке қабылдау үшін тағайындағаннан кейін науқастардың көпшілігінде гипертензияға қарсы әсер ете бастауы 2 сағат шегінде білінді, ал артериялық қысымның (АҚ) барынша төмендеуіне 4-6 сағат шегінде жетті. Препарат қабылданғаннан кейін гипертензияға қарсы әсері 24 сағаттан артық сақталады. Қайта тағайындаулар кезінде препарат қабылданған дозасына қарамастан АҚ барынша төмендеуіне, әдетте, 2-4 апта шегінде жетеді және ұзаққа созылатын ем барысында жеткен деңгейінде сақталады. Гидрохлортиазидпен біріктірілген кезде АҚ-ның сенімді қосымша төмендеуіне жетуге болады.
Тиазидті диуретиктер әсерінің іске қосылу нүктесі дистальді иректелген бүйрек өзекшелерінің қыртысты бөлігі болып табылады, онда диуретиктер әсеріне жоғары сезімтал рецепторлар орналасқан, әрі сол жерде Na және Cl иондары тасымалының бәсеңдеуі болады. Тиазидтердің әсер ету механизмі Na+Cl- сорғысының бәсеңдеуімен байланысты, көрінісі бойынша, Cl-тасымал орындары үшін бәсекелесу есебінен жүреді. Осының нәтижесінде натрий және хлор иондарының сыртқа шығарылуы шамамен бірдей дәрежеде артады. Диуретиктік әсерінің нәтижесінде айналымдағы плазма көлемінің азаюы байқалады, соның салдарынан ренин белсенділігі, альдостерон сөлінісі, калийдің несеппен шығарылуы, соған сәйкес, сарысудағы калий концентрациясының төмендеуі жоғарылайды. Ренин мен альдостерон арасындағы өзара байланыс ангиотензин II арқылы жүзеге асады, сондықтан ангиотензин II рецепторларының антагонисін тағайындау тиазидті диуретик қолданумен байланысты калий жоғалтуды азайтады.
Валсартанның плазма ақуыздарымен байланысу дәрежесі жоғары және гемодиализ кезінде шығарылмайды. Гидрохлортиазид, керісінше, организмнен гемодиализ кезінде шығарылады.
Гидрохлортиазидтің бүйрекпен шығарылуы бүйрек өзекшелерінің саңылауында баяу сүзіліс және белсенді сөлініс жолымен жүзеге асады. Бүйрек функциясының жағдайы гидрохлортиазид фармакокинетикасында үлкен рөл атқарады, бұл препараттың бүйрекпен ғана шығарылатынын ескерсек, толығымен түсінікті.
Қолданылуы
- Ересектердегі эссенциялы гипертензия, соның ішінде валсартанмен немесе гидрохлортиазидпен монотерапия кезінде артериялық қысымды талапқа сай бақылауға алудың сәті түспейтін эссенциялы гипертензиясы бар науқастарды емдеу үшін
Қолдану тәсілі және дозалары
Ұсынылатын Алво-Валс Н дозасы – күн сайын, ас ішуге байланыссыз, тәулігіне бір рет 1 таблеткадан. Қажет болса, дозаны 160 мг валсартан мен 25 мг гидрохлортиазидке дейін арттыруға болады. Гипертензияға қарсы ең жоғары әсері емделудің алғашқы 2-4 аптасында байқалады. Дегенмен, кейбір емделушілерде емдеуге 4-8 апта қажет болады. Бұл дозаны титрлеу кезінде назарға алынуы тиіс. Бүйрек функциясының бұзылу айқындылығы әлсіз немесе орташа болатын науқастарда (ШСЖ 30 мл/мин) препарат дозасын өзгерту талап етілмейді. Құрамында гидрохлоротиазид болуына байланысты, Алво-Валс Н препаратын ануриясы бар емделушілерге қолдануға болмайды және ауыр бүйрек жеткіліксіздігі бар емделушілерде (ШСЖ < 30 мл/мин ) сақтықпен қолданылуы тиіс. Тиазидті диуретиктер ауыр бүйрек жеткіліксіздігінде (ШСЖ < 30 мл/мин) монотерапия ретінде тиімсіз, бірақ ілмектік диуретиктермен біріктірілімде абайлап қолдануда тіпті ШСЖ < 30 мл/мин емделушілерде пайдалы әсер етуі мүмкін. Қатарлас холестаз құбылыстарынсыз, шығу тегі билиарлы емес әлсіз немесе орташа айқын бауыр жеткіліксіздігі бар науқастар үшін валсартан дозасы 80 мг-ден аспауы тиіс. Сондай-ақ препарат дозасын айқындығы әлсіз немесе орташа бауыр жеткіліксіздігі бар науқастарда өзгерту талап етілмейді. Құрамында гидрохлоротиазид болуына байланысты, Алво-Валс Н препараты ауыр бауыр жеткіліксіздігі бар емделушілерде ерекше сақтықпен қолданылуы тиіс. Құрамында валсартан болуына байланысты, Алво-Валс Н препараты билиарлық обструкциялық бұзылулары бар емделушілерде ерекше сақтықпен қолданылуы тиіс.
Жағымсыз әсерлері
Жағымсыз реакциялардың пайда болу жиілігін бағалауға мынадай градациялар пайдаланылды: «өте жиі» - 1/10, «жиі» - 1/100-ден < 1/10-ға дейін, «жиі емес» - 1/1000-нан < 1/100-ге дейін, «сирек» - 1/10000-нан < 1/1000-ға дейін, «өте сирек» – < 1/10000.
Алво-Валс Н қолданған кезде болатын жағымсыз әсерлер жиілігі
Жиі емес
- дегидратация
- парестезия
- көрудің нашарлауы
- құлақтың шуылдауы
- гипотензия
- жөтел
- миалгия
- шаршау
Өте сирек
- бас айналу
- диарея
- артралгия
Жиілігі белгісіз
- естен тану
- кардиогенді емес өкпе ісінуі
- бүйрек функциясының бұзылуы
- несеп қышқылы деңгейінің, қан сарысуындағы билирубин мен креатининнің жоғарылауы, гипокалиемия, гипонатриемия, қандағы мочевина азоты деңгейінің көтерілуі, нейтропения.
Келесі қолайсыз құбылыстар, олардың препарат қабылдаумен байланысына қарамастан, гипертензиясы бар науқастарда жүргізілген клиникалық зерттеулер кезінде де байқалды: абдоминальді ауыру, іштің жоғарғы тұсының ауыруы, мазасыздық, артрит, астения, арқаның ауыруы, бронхит, жедел бронхит, кеуденің ауыруы, постуральді бас айналу, диспепсия, диспноэ, ауыздың кеберсуі, мұрыннан қан кету, эректильді дисфункция, гастроэнтерит, бас ауыру, гипергидроз, гипестезия, тұмау, ұйқысыздық, байламдардың созылуы, бұлшықеттер түйілуі, бұлшықеттердің тартылуы, мұрынға шырыш жиналуы, назофарингит, жүрек айну, мойынның ауыруы, ісіну, шеткергі ісіну, ортаңғы құлақ отиті, аяқ-қолдың ауыруы, жүректің жиі соғуы, тамақтың, көмейдің ауыруы, поллакиурия, гипертермия, синусит, ұйқышылдық, тахикардия, жоғарғы тыныс алу жолдарының инфекциялары, несеп шығару жолдарының инфекциялары, вертиго, вирустық инфекциялар, көрудің нашарлауы.
Препарат компоненттерінің бірін қабылдаған кезде хабарланған жағымсыз әсерлер Алво-Валс Н қабылдау кезінде де байқалуы мүмкін.
Валсартан қабылдау кезіндегі жағымсыз әсерлер жиілігі
Жиі емес
- вертиго
- абдоминальді ауыру
Жиілігі белгісіз
- гемоглобин, гематокрит деңгейінің төмендеуі, тромбоцитопения
- аса жоғары сезімталдықтың басқа реакциялары/аллергиялық реакциялар, сарысу құю ауруын қоса
- қандағы калий деңгейінің көтерілуі
- васкулит
- ангионевроздық ісіну, қышыну, бөрту
- бүйрек жеткіліксіздігі
Келесі қолайсыз құбылыстар, олардың препарат қабылдаумен байланысына қарамастан, гипертензиясы бар науқастарда жүргізілген клиникалық зерттеулер кезінде де байқалды: артралгия, астения, арқаның ауыруы, диарея, бас айналу, бас ауыруы, ұйқысыздық, либидо төмендеуі, жүрек айну, ісіну, фарингит, синусит, жоғарғы тыныс алу жолдарының инфекциялары, вирустық инфекциялар.
Гидрохлортиазид қолдану кезіндегі жағымсыз әсерлер жиілігі
Өте жиі
- қандағы липидтер деңгейінің артуы (негізінен жоғары дозалар қабылдаған кезде)
Жиі
- гипомагниемия, гиперурикемия
- есекжем және бөртпенің басқа түрлері
- тәбеттің төмендеуі, орташа жүрек айну және құсу
- алкоголь, анестетиктер немесе тыныштандырғыш дәрілердің әсерінен күшейіп кететін ортостатикалық гипотензия
- импотенция
Сирек
- гиперкальциемия, гипергликемия, глюкозурия және диабеттік метаболизмдік статус нашарлауы
- фотосезімталдық реакциялары
- абдоминальді жайсыздық, іш қату, диарея
- холестаз немесе сарғаю
- аритмия
- бас ауыру, бас айналу, ұйқының бұзылуы, депрессия және парестезия
- көрудің нашарлауы, әсіресе емдеудің алғашқы бірнеше аптасында
- тромбоцитопения кейде пурпурамен
Өте сирек
- гипохлоремиялық алкалоз
- некроздаушы васкулит және уытты эпидермалық некролиз, жүйелі қызыл жегіге ұқсайтын тері реакциялары, жүйелі қызыл жегінің тері көріністерінің өршуі
- панкреатит
- лейкопения, агранулоцитоз, сүйек кемігі функциясының бұзылулары, гемолитикалық анемия
- аса жоғары сезімталдық реакциялары – респираторлық дистресс синдром, пневмония мен өкпенің ісінуін қоса
Жиілігі белгісіз
- мультиформалы эритема
- жедел жабық бұрышты глаукома
- апластикалық анемия
- жедел бүйрек жеткіліксіздігі, бүйрек функциясының бұзылуы
- гипертермия, астения, бұлшықеттер түйілуі
Қолдануға болмайтын жағдайлар
-
препарат компоненттерінің біріне және басқа сульфонамидтерге жоғары сезімталдық
-
жүктіліктің екінші және үшінші триместрінде
-
бауыр функциясының ауыр бұзылулары, билиарлы цирроз және холестаз
-
анурия, бүйрек функциясының ауыр бұзылулары (креатинин клиренсі
< 30 мл/мин)
-
талапқа сай емдеуге рефрактерлі гипокалиемия, гипонатриемия, гиперкальциемия, гиперурикемия
-
алғашқы гиперальдостеронизм
-
подагра
-
18 жасқа дейінгі балалар мен жасөспірімдерге
2 типті қант диабеті бар емделушілерде ангиотензин рецепторларының антагонистерін валсартанды, немесе АӨФ тежегіштерін алискиренмен қоса бір уақытта қолдану.
Дәрілермен өзара әрекеттесуі
Гипертензияға қарсы басқа препараттармен бірге қолданғанда гипертензияға қарсы әсерінің күшеюі мүмкін.
Калий тұздарын, калий жинақтаушы диуретиктерді, құрамында калий бар ас тұзының алмастырғыштарын немесе қандағы калий концентрациясының жоғарылауын туындататын кез келген өзге дәрілік препараттарды (мысалы, гепарин, циклоспориндер, АӨФ тежегіштері) бір мезгілде қолдану сақтық шараларын қадағалауды, атап айтқанда, қандағы калий концентрациясын жиі анықтап отыруды талап етеді.
Литий препараттарын АӨФ тежегіштерімен немесе тиазидті диуретиктермен бір мезгілде тағайындағанда сарысудағы литий концентрациясының қайтымды жоғарылауы, осыған орай, уыттану көріністерінің күшеюі болды. Валсартан мен литий препараттарын бірге қолдану тәжірибесі әзірге жоқ, сондықтан бұл жағдайда сарысудағы литий концентрациясын бақылау ұсынылады.
Келесі дәрілік заттар: циметидин, варфарин, фуросемид, дигоксин, атенолол, индометацин, гидрохлортиазид, амлодипин, глибенкламид қолдану аясында валсартанмен монотерапия жүргізген кезде клиникалық мәнді өзара әрекеттесу болмаған.
Алво-Валс Н құрамына тиазидті диуретик кіретіндіктен, мынадай дәрілік өзара әрекеттесулердің болу мүмкіндігі зор.
Тиазидтер кураре тәрізді миорелаксанттар әсерін әлеуеттендіреді.
Қабынуға қарсы стероидты емес дәрілермен (ҚҚСД) бір мезгілде қолданғанда (мысалы, салицил қышқылының туындылары, индометацин) Алво-Валс Н тиазидті компонентінің диуретиктік және гипертензияға қарсы әсерінің азаюы мүмкін. Қатарлас гиповолемия жедел бүйрек жеткіліксіздігінің дамуына алып келеді.
Салуретиктер, кортикостероидтар, аденокортикотропты гормон (АКТГ), амфотерицин, карбеноксолон, пенициллин G және салицил қышқылының туындылары бір мезгілде тағайындалғанда гипокалиемияның даму қаупі артады.
Тиазидті диуретиктер, гликозидтік уыттану кезінде, өз кезегінде, аритмияның даму қаупін арттыратын гипокалиемия немесе гипомагниемия сияқты қолайсыз әсерлерді туындатады.
Несеп айдайтын тиазидті дәрілермен емдеу глюкозаға төзімділікке ықпал етеді. Диабетке қарсы дәрілік препараттар дозаларын реттеу талап етіледі.
Метформин, гидрохлоротиазидпен байланысты бүйректің болжамды қызмет атқару жеткіліксіздігінен туындайтын сүт ацидозының даму қаупіне орай, алдын ала сақтанумен пайдаланылуы тиіс.
Тиазидті диуретиктерді бір мезгілде тағайындау мынадай құбылыстарға: аллопуринолға жоғары сезімталдық реакциясы жиілігінің ұлғаюына; амантадиннің жағымсыз әсерлерінің даму қаупінің артуына; диазоксидтің гипергликемиялық әсерінің күшеюіне; цитоуытты препараттардың (мысалы, циклофосфамид, метотрексат) бүйрекпен аз шығарылуына және олардың миелосупрессиялық әсерінің әлеуеттенуіне алып келеді.
Тиазидті диуретик биожетімділігінің артуы холиноблокаторлар (мысалы, атропин, бипериден) бір мезгілде тағайындалғанда байқалады, көрінісі бойынша, бұл асқазан-ішек жолының қозғалыс белсенділігінің төмендеуімен және асқазанның баяу босатылуымен байланысты.
Тиазидті диуретик пен метилдопа бір мезгілде тағайындалғанда гемолитикалық анемияның даму жағдайлары жөнінде хабарланды.
Холестирамин тиазидті диуретиктердің сіңуін азайтады.
Тиазидті диуретиктер D витаминімен немесе кальций тұздарымен бірге қолданылғанда сарысудағы кальций концентрациясының әлеуетті көтерілуі мүмкін.
Циклоспоринді бір мезгілде тағайындау гиперурикемияның даму қаупін және подаграның өршуін еске түсіретін белгілердің пайда болуын арттырады.
Тиазидті диуретиктер, гидрохлоротиазидтерді қоса, кураре туындыларының (тубокурарин) әсерін күшейтеді.
Спирт, ауыруды басатын және тыныштандыратын дәрілер бір мезгілде қолданғанда ортостатикалық гипотензияның күшеюіне алып келеді.
Айрықша нұсқаулар
Қан сарысуы электролиттері теңгерімінің өзгерістері
Алво-Валс Н калий тұздарымен, калий жинақтаушы диуретиктермен, құрамында калий бар ас тұзының алмастырғыштарымен, сондай-ақ қандағы калий концентрациясының жоғарылауын туындататын дәрілік препараттармен (мысалы, гепарин) бір мезгілде қолданылған кезде сақ болу керек.
Тиазидті диуретиктермен емдеу кезінде гипокалиемияның дамуы жөнінде хабарламалар бар. Қандағы калий концентрациясын жиі бақылау ұсынылады.
Тиазидті диуретиктер қолданылғанда гипонатриемия және гипохлоремиялық алкалоз дамуы мүмкін. Тиазидтер магнийдің несеппен көп шығарылуын туғызады, бұл гипомагниемияға алып келеді.
Организмдегі натрий және/немесе айналымдағы қан көлемі (АҚК) тапшылығы
Организмінде АҚК және/немесе натрий тапшылығы айқын, мысалы, диуретиктердің жоғары дозаларын алатын емделушілерде, сирек жағдайларда Алво-Валс Н емінің басында артериялық гипотензия пайда болады. Алво-Валс Н емін бастар алдында организмдегі натрий мөлшеріне және/немесе айналымдағы қан көлеміне, мысалы, диуретик дозасын азайту арқылы реттеу жүргізген жөн.
Бүйрек артериясының стенозы
Алво-Валс Н бүйрек артериясының бір жақты немесе екі жақты стенозы немесе жалғыз бүйрек стенозы бар емделушілерде гипертензияны емдеу үшін пайдаланылмауы тиіс, өйткені осындай емделушілерде қандағы мочевина және сарысулық креатинин деңгейлері көтерілуі мүмкін.
Бүйрек функциясының бұзылуы
Бүйрек функциясы бұзылған, креатинин клиренсі ≥ 30 мл/мин құрайтын науқастарға препарат дозасын ретке келтіру қажет емес.
Бауыр функциясының бұзылуы
Бауыр функциясының әлсіз немесе орташа айқын бұзылулары бар науқастарда холестаз құбылыстары болмаған кезде ұсынылатын доза - 80 мг 12.5 мг.
Қант диабеті
Инсулиннің немесе ішуге арналған қант төмендететін препарат дозасын реттеу талап етіледі.
Жүйелі қызыл жегі
Тиазидті диуретиктердің жүйелі қызыл жегіні өршітіп жіберуі жөнінде хабарламалар бар.
Басқа метаболизмдік бұзылыстар
Тиазидті диуретиктер глюкозаға төзімділіктің өзгеруін, сондай-ақ қан сарысуындағы холестерин, триглицеридтер және несеп қышқылы концентрацияларының жоғарылауын туғызады.
Жедел жабық бұрышты глаукома
Гидрохлоротиазид, сульфонамид бола отырып, жедел өтпелі миопия мен жедел жабық бұрышты глаукомаға алып келетін идиосинкразиялық реакцияны туындатады. Симптомдар көру өткірлігінің кемуін немесе көздің ауыруын қамтиды және препарат қабылдау басталғаннан кейін бірнеше сағаттан бір аптаға дейін жалғасады. Емделмеген жедел жабық бұрышты глаукома көрмей қалуға ұшыратады.
Бастапқы емдеуде гидрохлоротиазид қабылдау шұғыл тоқтатылады. Егер көзішілік қысым бақыланбаған күйде қалатын жағдайда, дәрі дәрмектік немесе хирургиялық емдеу мүмкіндігін қарастыру қажет. Жабық бұрышты глаукоманы дамытатын қауіп факторы сыртартқыдағы сульфонамидтерге немесе пенициллиндерге аллергия болуы мүмкін.
Жүрек жеткіліксіздігі/Инфаркттан кейінгі жай-күй
Бүйрегінің функциясы ренин-ангиотензин-альдостерон жүйесінің белсенділігіне тәуелденетін жүрек жеткіліксіздігі ауыр науқастарда АӨФ тежегіштерімен және ангиотензин рецепторларының антагонистерімен емдеу олигуриямен және/немесе азотемияның артуымен (сирек) және/немесе өліммен аяқталатын жедел бүйрек жеткіліксіздігімен жүруі мүмкін. Жүрек жеткіліксіздігі бар және инфаркттан кейінгі жай-күйдегі емделушілердің ахуалын бағалағанда бүйрек функциясының жағдайына баға беру үнемі қамтылуы тиіс.
Препарат құрамында лактоза бар болғандықтан, оны туа біткен галактоза көтере алмаушылығы, глюкоза және галактоза мальабсорбциясы синдромы және лактаза тапшылығы бар науқастарға тағайындауға болмайды.
Монотерапиямен салыстырғанда валсартанды қоса алғанда, ангиотензин рецепторлары тежегіштерін РАЖ әсер ететін басқа да препараттарымен бір уақытта қолдану гипотензия, гиперкалиемия жиілігі ұлғаюына және бүйрек функциясы өзгерістеріне байланысты. РАЖ әсер ететін валсартан және басқа да препараттар қабылдайтын науқастарда артериялық қысымды, бүйрек функциясын және электролиттерді бақылау ұсынылады.
Көлік құралын немесе қауіптілігі зор механизмдерді басқару қабілетіне әсер ету ерекшеліктері
Алво-Валс Н тағайындалғанда, гипертензияға қарсы басқа дәрілер сияқты, автокөлік жүргізу және қауіптілігі зор механизмдерді басқару кезінде сақтық шарасын қадағалау ұсынылады.
Артық дозалануы
Симптомдары - валсартанның артық дозалануының негізгі көрінісі айқын артериялық гипотензия болып табылады. Гидрохлортиазидтің артық дозалануы жүрек айнуын, ұйқышылдықты, гиповолемияны, жүрек аритмияларымен және бұлшықеттер түйілуімен байланысты электролиттік теңгерім бұзылуын туғызуы мүмкін.
Емі – егер препарат таяуда қабылданса, құстырып, белсенділендірілген көмір берген жөн. Гипотензия кезінде әдеттегі емдеу әдісі - көктамыр ішіне физиологиялық ерітінді енгізу.
Валсартанды, оның қан плазмасы ақуыздарымен едәуір байланысуы себепті, организмнен гемодиализ арқылы шығаруға болмайды. Сонымен қатар, организмнен гидрохлортиазидті шығаруда гемодиализ тиімді.
Шығарылу түрі және қаптамасы
14 таблеткадан ПВХ/ПЭ/ПЭВДХ үлбірден және алюминий фольгадан жасалған пішінді ұяшықты қаптамаға қапталады.
2 пішінді ұяшықты қаптамадан медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынады.
Сақтау шарттары
25 0С-ден аспайтын температурада сақтау керек.
Балалардың қолы жетпейтін жерде сақтау керек!
Сақтау мерзімі
3 жыл
Қаптамасында көрсетілген жарамдылық мерзімі өткеннен кейін қолдануға болмайды.
Дәріханалардан босатылу шарттары
Рецепт арқылы
Өндіруші
Лабораториз ЛИКОНСА, С.А., Испания
Тіркеу куәлігі иесінің атауы және елі
Алвоген ИПКо С.ар.Л, Люксембург
Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы
«Алвоген Фарма Трейдинг Юроп ЕООД» өкілдігі
050026, Алматы қ-сы, Бөгенбай батыр к-сі 241, «Ордабасы» бизнес орталығы, 507 кеңсе, тел: 378 22 82, факс: 378 21 55
Электрондық поштасы: Sholpan.Yensebayeva@alvogen.com;
сайт: www.alvogen.com