Адонис-бром (Adonis glycosides in combination)

• русский
• қазақша

• Скачать инструкцию медикамента

Саудалық атауы

Адонис-бром

Халықаралық патенттелмеген атауы

Жоқ

Дәрілік түрі

Қабықпен қапталған таблеткалар

Құрамы

Бір таблетканың құрамында

белсенді заттар – ылғалдылығы 25% , белсенділігі 170 ЛЕД қою адонис сығындысы - 69,07 мг; калий бромиді - 250 мг,

қосымша заттар: негізгі магний карбонаты, картоп крахмалы, тальк, кальций стеараты;

қабықтың құрамы: адвантий префед (құрамында: гипромеллоза, кополивидон, полиэтиленгликоль, каприлді капринді триглецирид, полидекстроза (Е 1200), титанның қостотығы (Е 171), темірдің сары тотығы (Е 172))

Сипаттамасы

Екі беті дөңес сары түсті қабықпен қапталған таблеткалар. Көлденең қимасында 2 қабат көрінеді.

Фармакотерапиялық тобы

Басқа да жүрек гликозидтері.

АТХ коды C01AX

Фармакологиялық қасиеттері

Фармакокинетикасы

Ішке қабылдағаннан кейін белсенді компоненттері жылдам және айтарлықтай толық сіңеді. Цимарин (гликозид адониса) мен бромид-иондардың ең жоғары концентрациясына қабылдаудан кейін 1-2 сағат өткенде жетеді. Биожетімділігі цимарин үшін 47% және бромид-иондары үшін 96% жуықты құрайды. Қанда цимариннің 51-59% жуығы плазма ақуыздарымен байланысқан күйде айналымда болады. Бромид-иондар плазма ақуыздарымен іс жүзінде байланыспайды.

Организмде цимарин мен бромид-иондар негізінен жасуша сыртындағы сұйықтықта біркелкі таралады. Жұлын сұйықтығында бромид-ион мен цимариннің концентрациясы оның плазмадағы концентрациясының 37% құрайды. Бромид-иондар метаболизмге ұшырамайды, цимарин бауырда және ішектің қабырғасында ішінара биотрансформацияланады.

Бромид-иондардың және цимариннің бөлініп шығуы негізінен бүйрек арқылы жүзеге асады.

Бромид-иондар негізінен гломерулярлық сүзіліс жолымен шығарылады, бірақ хлорид-иондармен бәсекелесе отырып одан кейінгі өзекшелік қайта сіңуге ұшырайды. Бромид-иондардың жартылай шығарылу кезеңі орташа алғанда 11,9±1,4 тәулік және тұзды тұтыну дәрежесіне байланысты (натрий хлоридін тұтыну артқанда қысқарады). Бромид-иондар шығарылуының қосымша жолдары ішек, тер мен сүт бездері болып табылады.

Цимарин метаболиттер мен өзгермеген заттар түрінде (енгізілген дозаның 21% жуығы) шығарылады. Тәулікті шығарылу коэффициенті 50% құрайды. Жартылай шығарылу кезеңі 13-23 сағатқа жуық.

Фармакодинамикасы

Жеңіл кардиотоникалық және седативті әсер ететін өсімдік тектес дәрілік зат.

Адонис-бромның әсері адонис (көктемгі жалынгүл) сығындысының құрамына енетін цимариннің полярлы гликозидтерінің (гликозидтер жалпы мөлшерінің 1-10%) және адонитоксиннің (гликозидер жалпы мөлшерінің 3-20%), сондай-ақ бромид-иондарына байланысты. Бромид-иондар γ-аминмай қышқылымен өзара әрекеттескеннен кейін бромидтің және хлорид-иондардың жасушаға түсуі мен нейрондар белсенділігінің төмендеуін қамтамасыз ете отырып ГАМКА-рецептордың хлорлы өзекшесін тұрақтандырады. Цимарин ГАМКА-рецептордың танылатын нейростероидты учскелерімен өзара әрекеттеседі және γ-аминмай қышқылының әсеріне оның сезімталдығын жоғарылатады. Нейрон мен миокард жарғақшасында цимарин Na+/K+-АТФаза жұмысын бөгейді, бұл натрий иондарының жасушалардан шығарылуына кедергі келтіреді. Жасушаішілік натрийдің жоғарылауы кальцийдің жасушадан шығарылу үдерісін бұзады және миокардтың жиырылғыш белсенділігін арттырады. Адонис-бром негізінен систолалық компоненттің есебінен әлсіз кардиотоникалық әсер етеді: жүректің жиырылу күшін (оң инотропты әсерді) және миокардың қозғыштығын (оң батмотропты әсерді) арттырады. Диастолалық әсері едәуір әлсіз байқалады және жүректің жиырылу жиілігінің (теріс хоронотропты әсер) және импульстердің миокард арқылы өтуінің (теріс дромотропты әсер) едәуір төмендеуін туғызады. Адонис-бром ми қыртысындағы тежелу үдерістерін шоғырландырады және күшейтеді. Орталық жүйке жүйесіндегі қозу және тежелу үдерістері аралығындағы тепе-теңдікті қалпына келтіреді.

Қолданылуы

Жиынтық емнің құрамында

• созылмалы жүрек жеткіліксіздігінің бастапқы формаларында (NYHA бойынша I класс)

• неврастенияда, невроздар, истерияда

• қарқынды дене жүктемелері мен стресстер аясындағы қатты ашушаңдықта, ұйқысыздықта

• вегетоқантамырлық дистонияда

Қолдану тәсілі мен дозалары

Тәулігіне 3 рет 1 таблеткадан ішке қабылдауға тағайындайды. Емдеу курсын емдеуші дәрігер анықтайды. Креатинин клиренсі қалыпты көрсеткіштің 50%-нан төмен бүйрек қызметі бұзылуында бір реттік дозаны 2 есе азайту немесе препаратты қабылдау аралықтарын 12 сағатқа дейін ұзарту ұсынылады.

Жағымсыз әсерлері

• брадикардия, аритмия (бигеминия түріндегі экстрасистолия)

• бас ауыруы, мазасыздық, ұйқышылдық, депрессия жағдайлары, көрудің бұзылуы, сылбырлық, тежеліс, әлсіздік, ұйқышылдық, сөйлеудің баяулауы, ауыр жағдайларда – бромизм симптомдары (препаратты артық дозалағанда)

• жүрек айнуы, құсу, гастралгия, тәбеттің төмендеуі, диарея

• аллергиялық реакциялар.

Қолдануға болмайтын жағдайлар

• адониске, бромидтерге жоғары сезімталдық

• депрессия

• тыныс алу жеткіліксіздігі

• созылмалы жүрек жеткіліксіздігі (NYHA бойынша II-IV класс)

• бауыр және бүйрек жеткіліксіздігінің ауыр түрлері

• асқазан мен он екі елі ішектің эрозиясы, ойық жаралары

• жүрек гликозидтерін қабылдау

• дигиталисті уыттану

• гиперкальциемия, гипокалиемия

• брадикардия, әртүрлі дәрежедегі атриовентрикулярлық блокада немесе аритмияның қарыншалық формасы, Адамс-Стокс-Морганти синдромы

• стенокардия, миокард инфаркты

Дәрілермен өзара әрекеттесуі

Бір мезгілде қолданған кезде басқа жүрек гликозидтерінің (тырнақгүл, строфант пен меруертгүл препараттарының) уытты әсерлері күшеюі ықтимал.

Бір мезгілде қолданған кезде IA класының аритмияға қарсы дәрілерінің (хинидин, прокаинамид, дизопирамид), кальций препараттарының, іш жүргізетін дәрілердің және глюкокортикостероидтардың емдік және уытты әсерлерін күшейтеді.

Бензодиазепиннің, құрысуға қарсы және седативтік-гипнотикалық дәрілердің нейролептикалық дәрілердің және алкогольдің ОЖЖ-не жағымсыз әсерін күшейтеді.

Галотанды анестезия Адонис-бром қабылдайтын емделушілердің организміндегі бромид-иондардың деңгейін жоғарылатады және оның тиімділігі мен уытты әсерін күшейтеді.

Тұзды тағамды қабылдау бромидтердің несеппен шығуының артуын туындатады және препараттың тиімділігін әлсіретеді.

Айрықша нұсқаулар

Адонис-броммен емделу кезеңінде тұз мөлшері аз емдәмді ұстану қажет (натрий хлоридін тұтынуды шектеу керек).

Педиатрияда қолдану

Дәрілік затты балаларға қолданудың қауіпсіздігі мен тиімділігі анықталмаған. Препаратты балалық жаста қолдануға болмайды.

Жүктілік пен лактация кезеңі

Бромид-иондар плацента арқылы жеңіл өтеді және емшек сүтімен бөлініп шығады. Адонис-бромды жүктілік кезінде күтілетін пайда ұрыққа ықтимал қауіптен артқан жағдайда ғана қабылдау мүмкін болады. Адонис-бромды лактация кезінде тағайындау қажет болғанда емдеудің барлық кезеңі ішінде және одан кейін 1 ай бойы баланы емшектен шығару керек.

Дәрілік заттың автокөлікті жүргізу мен қауіптілігі зор механизмдерді басқару қабілетіне әсер ету ерекшеліктері

Адонис-бромды қабылдау емделушінің автокөлік құралдарын немесе басқа операторлық құралдарды басқару қабілетін бұзады.

Артық дозалануы

Симптомдары: айқын брадикардия, политопты экстрасистолия, бигеминия немесе тригеминия, жүрекше-қарыншалық өткізгіштіктің баяулауы; ауыр жағдайларда – қарыншалардың дірілі, жүректің тоқтап қалуы.

Емі : жүрек гликозидтерінің артық дозалануымен байланысты уыттануда, дәрілік затты қабылдауда үзіліс жасайды, қажет болғанда калий препараттарын және антиаритмиялық препараттарды тағайындайды.

Қарқынды диурезді жүргізу және бромид-иондардың шығарылуын жеделдету үшін диуретиктерді қолдануға болмайды, өйткені бұл орайда адонис гликозидтерінің уытты әсерінің қаупі артады.

Шығарылу түрі мен қаптамасы

10 таблеткадан поливинилхлоридті үлбір мен баспалы лакталған алюминий фольгадан жасалған пішінді ұяшықты қаптамаға салынған.

3 пішінді ұяшықты қаптамадан медицинада қолданылуы жөніндегі мемлекеттік және орыс тіліндегі нұсқаулықпен бірге картоннан жасалған пәшкеге салынған.

Сақтау шарттары

Құрғақ, жарықтан қорғалған жерде, 25 ºС-ден аспайтын температурада.

Балалардың қолы жетпейтін жерде сақтау керек!

Сақтау мерзімі

2 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

«Борисов медициналық препараттар зауыты» ашық акционерлік қоғамы,

Беларусь Республикасы, Минск обл., Борисов қаласы, Чапаев көшесі, 64/27, тел/факс 8-(10375177)744280.

Тіркеу куәлігінің иесі

«Борисов медициналық препараттар зауыты» ашық акционерлік қоғамы, Беларусь Республикасы.

Қазақстан Республикасының аумағында тұтынушылардан өнімнің (тауардың) сапасы жөнінде шағымдарды қабылдайтын ұйымның мекенжайы:

«Борисов медициналық препараттар зауыты» ашық акционерлік қоғамы,

Беларусь Республикасы, Минск обл., Борисов қаласы, Чапаев көшесі, 64/27,

тел/факс 8-(10375177) 744280, электрондық поштасы: market@borimed.com

.