Эриус®

• русский
• қазақша

• Скачать инструкцию медикамента

Саудалық атауы

Эриус®

Халықаралық патенттелмеген атауы

Дезлоратадин

Дәрілік түрі

Қабықпен қапталған 5 мг таблеткалар

Құрамы

Бір таблетканың құрамында

белсенді зат – 5 мг дезлоратадин,

қосымша заттар: екі орын басқан кальций фосфаты, микрокристалды целлюлоза, жүгері крахмалы, тальк,

қабық: опадрай II көк (лактоза моногидраты, гидроксипропилметилцеллюлоза, титанның қостотығы, полиэтиленгликоль, көгілдір алюминий лагы FD&C №2 (индиготин (Е 132)), түссіз опадрай YS-1-19025-A (гидроксипропилметилцеллюлоза, полиэтиленгликоль), карнауб балауызы, ақ балауыз.

Сипаттамасы

Дөңгелек, екі беті дөңес, бір жағында «SP» логотипі бар, ашық-көгілдір түсті қабықпен қапталған таблеткалар.

Фармакотерапиялық тобы

Жүйелі әсер ететін антигистаминдік препараттар. Жүйелі әсер ететін басқа да антигистаминдік препараттар. Дезлоратадин.

АТХ коды R06AX27

Фармакологиялық қасиеттері

Фармакокинетикасы

Дезлоратадин қан плазмасында қабылдаған соң 30 минут ішінде анықтала бастайды. Дезлоратадин плазмадағы ең жоғары концентрациясы деңгейіне орташа алғанда 3 сағаттан соң жетеді, жартылай шығарылу кезеңі орташа алғанда 27 сағатты құрайды. Дезлоратадиннің жинақталу дәрежесі оның жартылай шығарылу кезеңіне (шамамен 27 сағат) және қолдану жиілігіне (тәулігіне бір рет) сәйкес келеді. Дезлоратадиннің биожетімділігі 5-тен 20 мг дейінгі диапазондағы дозаға пропорционал болған. Қарқынды метаболизмге ұшырайды. Дезлоратадин метаболизмінің негізгі жолы – глюкуронидпен қосылған 3-ОН-дезлоратадинді түзе отырып 3 күйде гидроксилдену. Гематоэнцефалдық бөгет арқылы өтпейді. Дезлоратадин плазма ақуыздарымен орташа (83-87) байланысады. Дезлоратадинді 14 күн бойы тәулігіне бір рет 5-тен 20 мг дейінгі дозада қолданғанда препараттың елеулі клиникалық жинақталу белгілері байқалмаған. Таблеткалар мен шәрбат түріндегі препараттың биоэквиваленттілігі анықталған. Тамақ (майлы жоғары калориялы таңертеңгі тамақ) немесе грейпфрут шырыны дезлоратадиннің таралуына ықпал етпейтіні анықталды.

Дезлоратадин организмнен глюкуронидтік қосылыс түрінде шығарылады. Дозаның аздаған бөлігі өзгермеген күйінде нәжіспен және несеппен шығарылады.

Фармакодинамикасы

Дезлоратадин седативті әсері жоқ, шеткергі гистаминдік Н1-рецепторлардың селективті бөгегіші болып табылады. Дезлоратадин лоратадиннің алғашқы белсенді метаболиті. Салыстырмалы дозаларда дезлоратадин мен лоратадиннің (дезлоратадиннің концентрациясын ескере отырып) уыттылығының сапалық немесе сандық айырмашылықтары анықталмаған. Ішу арқылы қабылдағаннан кейін Эриус® шеткергі Н1-гистаминдік рецепторларын селективті бөгейді және гематоэнцефалдық бөгет арқылы өтпейді. Эриус® гистаминге қарсы белсенділігінен бөлек аллергияға қарсы және қабынуға қарсы әсер етеді. Эриус® аллергиялық қабынудың дамуы негізінде жатқан әр түрлі реакциялар каскадын, атап айтқанда:

• қабынуға қарсы цитокиндердің бөлінуін;

• қабынуға қарсы хемокиндердің бөлінуін;

• полиморфты ядролық нейтрофильдермен белсендірілген супероксидті анионның өндірілуін;

• эозинофильдердің адгезиясы мен хемотаксисін;

• адгезия молекулаларының экспрессиясын;

• гистаминнің, простагландиннің және лейкотриеннің тәуелді бөлінісін;

• жедел аллергиялық бронх түйілуін бәсеңдететіні анықталған.

Эриус® гематоэнцефалдық бөгет арқылы өтпейді, ұйқыны келтірмейді және психомоторлық қызметке әсер етпейді.

Қолданылуы

• поллиноз, аллергиялық ринит (түшкіру, мұрыннан сұйықтық бөлінуі, қышыну, ісіну мен мұрын бітелуі, сондай-ақ көздің қышуы, жас ағу мен көздің қызаруы, таңдай аймағының қышуы мен жөтел)

• есекжем (тері қышынуы симптомдарын, бөртпелерді кетіру үшін).

Қолдану тәсілі және дозалары

Ішке. Ересектер – 1 таблеткадан (5 мг) тәулігіне 1 рет. Таблетканы шайнамастан, бүтіндей, сумен ішіп жұту керек. Препаратты мүмкіндігінше үнемі тәуліктің белгілі бір уақытында тамақ ішумен байланыстырмай, қабылдаған дұрыс. Емдеу курсын дәрігер әр адамға жеке белгілейді.

Жағымсыз әсерлері

- қатты шаршағыштық

- ауыздың құрғауы

- бас ауыру, елестеулер, бас айналу, ұйқышылдық, ұйқысыздық

- психомоторлы асқын белсенділік, құрысулар

- тахикардия, жүректің қағуы

- абдоминальді ауырулар

- жүрек айну, құсу, диспепсия, диарея

- бауыр ферменттері белсенділігінің жоғарылауы, билирубин концентрациясының жоғарылауы, гепатит

- аса жоғары сезімталдық реакциялары (анафилаксия, ауқымды есекжем, есекжем, ентігу, бөртпе сияқты).

Қолдануға болмайтын жағдайлар

• препарат компоненттеріне немесе лоратадинге аса жоғары сезімталдық

• жүктілік пен лактация кезеңі

• 18 жасқа дейінгі балалар

Дәрілермен өзара әрекеттесуі

Басқа дәрілік заттармен өзара әрекеттесуі анықталмаған. Тамақтану препараттың тиімділігіне әсер етпейді. Эриус® этанолдың психомоторлық функцияны бәсеңдеткіш әсерін күшейтпейді.

Айрықша нұсқаулар

Эриусты® ауыр бүйрек жеткіліксіздігінде абайлап қолдану керек.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Эриустың® автомобильді басқару немесе күрделі техникалық құрылғылармен жұмыс істеу қабілетіне әсері анықталмаған. Алайда, препаратты қабылдағаннан кейін сирек жағдайларда ұйқышылдық байқалған, ол автокөлікті басқару және басқа да механизмдермен жұмыс істеу қабілетіне әсер етуі мүмкін.

Артық дозалануы

Симптомдары: 25 мг асатын дозаны қабылдау қандай да бір симптомдардың пайда болуын туғызбаған.

Емі: асқазанды шаю, одан кейін сіңіргіш зат ретінде белсенділендірілген көмір қабылдау және симптоматикалық ем тағайындау. Эриус гемодиализдің көмегімен шығарылмайды.

Шығарылу түрі және қаптамасы

10 таблеткадан винилді жабынымен алюминий фольгадан жасалған пішінді ұяшықты қаптамада.

1 пішінді қаптама медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салынған.

Сақтау шарттары

2°С-ден 30°С-ге дейінгі температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

Шеринг-Плау Лабо Н.В., Бельгия

Тіркеу куәлігінің иесі

Шеринг-Плау Сентрал Ист АГ, Швейцария

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы:

Шеринг-Плау Сентрал Ист АГ компаниясының Қазақстандағы өкілдігі,

Алматы қ., Достық д-лы, 38, «Кең дала» бизнес орталығы, 5 қабат

Тел. +7(727)330-42-66

Факс +7(727)321-60-47

эл. почта: dpoccis2@merck.com