Эрдомед (175 мг/5 мл)

МНН: Эрдостеин
Производитель: Медиком Интернэшнл с. р. о.
Анатомо-терапевтическо-химическая классификация: Erdosteine
Номер регистрации в РК: № РК-ЛС-5№013171
Период регистрации: 09.06.2015 - 09.06.2020

Инструкция

Саудалық атауы

Эрдомед

Халықаралық патенттелмеген атауы

Эрдостеин

Дәрілік түрі

Ішке қабылдау үшін суспензия дайындауға арналған түйіршіктер (175 мг/5 мл), 50 г

Құрамы

1 құтының құрамында

белсенді зат – 3,5 г эрдостеин,

қосымша заттар: сахароза, натрий бензоаты, натрий крахмал гликоляты, аспартам, натрий сахаринаты, апельсин хош иістендіргіші

Сипаттамасы

Апельсинге тән иісі бар, ұсақ, сусымалы, ақ түйіршіктер. Түйіршіктерді суда еріткеннен кейін сұрғылт реңді ақ түсті суспензия түзіледі.

Фармакотерапиялық тобы

Суық тию симптомдары мен жөтелді қайтаруға арналған препараттар. Қақырық түсіретін препараттар. Муколитиктер. Эрдостеин.

АТХ коды R05CB15

 

Фармакологиялық қасиеттері

Фармакокинетикасы

Асқазан-ішек жолында тез сіңіріледі және бауырда үш белсенді метаболитке дейін метаболизденеді, олардың ішінде өте маңыздысы – N-тиодигликоль-ил-гомоцистеин (Метаболит 1 немесе М1). Жартылай шығарылу уақыты – 5 сағаттан астам. Препаратты қайталап қолдану немесе тамақтану фармакокинетикалық параметрлеріне ықпалын тигізбейді. Препараттың ең жоғары концентрациясы – 3,46 мкг/мл; препараттың қан плазмасында ең жоғары концентрациясына жету уақыты – 1,48 сағат; «концентрация-уақыт» қисығы астындағы аудан (АUС) (0-24 сағ.) – 12,09. Эрдостеиннің 64,5-ы қан плазмасы ақуыздарымен байланысады. Препарат бейорганикалық сульфат түрінде бүйректер арқылы және нәжіспен бірге шығарылады.

Бауыр функциясы бұзылған жағдайда препараттың ең жоғары концентрация көрсеткіштері мен АUС жоғарылағаны білінеді. Бауыр функциясының бұзылуы айқын болған кезде жартылай шығарылу уақыты артуы мүмкін. Бүйрек функциясының жеткіліксіздігінде метаболиттер жиналып қалуы мүмкін.

Фармакодинамикасы

Эрдомед тиімділігі белсенді метаболиттердің әсеріне негізделген препарат болып табылады. Метаболиттердің тиол топтары гликопротеиндердің талшықтарын бір-бірімен байланыстыратын дисульфидтік жалғағыш көпірлерді үзеді, бұл қақырықтың созылғыштығын және тұтқырлығын азайтады. Нәтижесі тыныс алу жолдарынан секреттің бөлінуін жеңілдетуі және тыныс алу жолдарының жоғарғы және төменгі бөлімдерінен шырыштың және шырышты-іріңді бөліністердің жойылуын қамтамасыз ететін мукоцилиарлы жүйенің тиімділігін арттыруы болып табылады.

Эрдостеин амин топтары арқылы оттегінің бос радикалдарына жергілікті қарама-қайшы әсер етеді және шылымқорларда альфа-1-антитрипсиннің басылуына кедергі жасайды, сөйтіп созылмалы шылымқорлықта темекі түтінінің зақымдағыш әсерін төмендетеді. Эрдостеин тыныс жолдарының созылмалы обструкциялық ауруына шалдыққан науқастарда тыныс жолдарының шырышты қабығында А иммуноглобулиннің концентрациясын арттырады, сондай-ақ темекі түтінінің гранулоциттердің функциясына басым әсерін төмендетеді. Біріктіріп қолданған кезде эрдостеин бронх секретінде амоксициллиннің концентрациясын арттырады.

Препаратпен емдеу әсері емнің 3-4 тәулігіне қарай дамиды. Эрдостеинде осындай бос SН-радикалдар болмайды, сондықтан препарат асқазан-ішек жолын зақымдамайды және ас қорыту жүйесі тарапынан болатын жағымсыз әсерлерінің плацебо әсерлерінен айырмашылығы жоқ.

 

Қолданылуы

  • тыныс жолдарының жедел қабыну ауруларында (ринит, синусит, ларингофарингит, жедел бронхит)

  • тыныс жолдарының созылмалы аурулары асқынғанда (созылмалы бронхит, өкпенің созылмалы обструкциялық аурулары, асқын секреторлық демікпе, бронхоэктаз ауруы, шылымқорлардағы созылмалы бронхит (маусымдық асқынуларды қосқанда)

  • шығу тегі бактериялық бронхиттің асқынуы кезінде антибиотиктермен біріктіріп емдеуде

  • пневмония және хирургиялық араласымнан кейінгі ішінара ателектаздың алдын алуда.

Қолдану тәсілі және дозалары

Ересектер

8,5 мл-ден (300 мг) күніне екі рет. Дене салмағына қарай дозалау: дене салмағының әр кг шаққанда 10 мг күніне екі рет.

Балалар

Дозалау тәртібі емделушінің дене салмағының және жасының негізінде былайша анықталады:

15–20 кг (3-тен 6 жасқа дейін): 2,5 мл күніне екі рет;

21–30 кг (7-тен 12 жасқа дейін): 5 мл күніне екі рет;

30 кг-ден жоғары (12 жастан асқан): 5 мл күніне үш рет.

Дайындау әдісі:

Құтының ішіндегісіне (құрғақ түйіршіктер) қайнаған суды құтыдағы арнайы белгіге дейін құйыңыз. Біркелкі суспензия пайда болғанша мұқият сілкіңіз. Құты ішіндегісінің деңгейін тексеріп көріңіз және (егер қажет болса) су қосып, құтыны тағы сілкіңіз. Дайын суспензияны, егер тоңазытқышта 2-8оС температурада сақталатын болса, ең көп дегенде 10 күн бойы пайдалануға болады.

Әр қолдану алдында сілку керек!

Емдеу курсы ауру симптомдары жоғалғанға дейін әдетте 5 күнді құрайды.

Жағымсыз әсерлері

Сирек

  • қыжыл, жүрек айнуы, диарея

  • аллергиялық реакциялар: терінің қызаруы, есекжем.

Емді бастаған кезде өте сирек

  • агевзия (дәм сезгіштігінің жоғалуы) немесе дисгевзия (дәм сезгіштігінің өзгеруі).

Қолдануға болмайтын жағдайлар

  • препараттың құрамына кіретін компоненттерге немесе бос SН-радикалдары бар заттарға белгілі асқын сезімталдық

  • 3 жасқа дейінгі балалар

  • бауыр функциясының бұзылуы

  • бүйрек функциясының жеткіліксіздігі (креатинин клиренсі 25 мл/мин)

  • гомоцистеинурия (препарат гомоцистеиннің көзі, сондықтан бос метиониннің мөлшері төмен емдәмде жүрген емделушілерде амин қышқылдарының метаболизмі бұзылуы мүмкін)

  • фенилкетонурия (пакеттер және суспензиялар үшін ғана, өйткені осы дәрілік түрлердің құрамына аспартам кіреді).

Дәрілермен өзара әрекеттесуі

Біріктіріп қолданған кезде Эрдостеин бронх секретінде амоксициллиннің концентрациясын арттырады. Будесонидпен және сальбутамолмен синергиялық әсері дәлелденген.

Айрықша нұсқаулар

Жөтелге қарсы еммен бірге тиімсіз қолданған кезде бронхтарда сұйық секрет жиналып қалуы және супержұқпа немесе бронхтың түйілуі дамуы мүмкін. Бүйрек функциясының жеткіліксіздігінде метаболиттер жиналып қалуы мүмкін. Бауыр функциясының бұзылуы айқын болған кезде жартылай шығарылу кезеңі артуы мүмкін. Егер 5 күн ішінде жағдайдың оңды динамикасы болмаса немесе нашарласа, емдеуші дәрігерге қаралу керек.

Жүктілік және лактация

Жүктілік және бала емізу кезеңінде қолдану жөнінде тәжірибе шектеулі. Сондықтан препаратты жүктілік және лактация кезеңінде қолдану ұсынылмайды.

Дәрілік заттың көлік құралдарын немесе қауіптілігі зор механизмдерді басқару қабілетіне әсер ету ерекшеліктері

Препарат автокөлікті немесе басқа механизмдерді басқару қабілетіне әсер етпейді.

Артық дозалануы

Препараттың артық дозалану жағдайлары туралы хабарланбаған, артық дозаланғанда симптоматикалық ем жүргізу ұсынылады.

Шығарылу түрі және қаптамасы

50 г препараттан полиэтилен төсемі бар алюминий қақпақпен герметикалық тығындалған қоңыр III типті мөлдір шыны құтыға салынған.

1 құтыдан медицинада қолданылуы жөніндегі мемлекеттік және орыс тіліндегі нұсқаулықпен және өлшеуіш стақанмен бірге картон қорапшаға салынады.

Сақтау шарттары

25оС-ден аспайтын температурада сақтау керек.

Дайындалған суспензияны 10 күннен асырмай тоңазытқышта 2 – 8о С температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Қаптамасында көрсетілген жарамдылық мерзімі өткеннен кейін препаратты пайдалануға болмайды.

Босатылу шарттары

Рецепт арқылы

Өндіруші

«Медиком Интернэшнл с.р.о.», Чех Республикасы.

Мекенжайы: Paterni 7, 635 00 Brno, Czech Republic/Чех Республикасы, 635 00 Брно, Патержни к-сі 7.

Тіркеу куәлігі иесінің атауы мен елі

«Медиком Интернэшнл с.р.о.», Чех Республикасы

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы

«Си Эс Си Лтд» ЖАҚ ҚР өкілдігі:

050051, Алматы қ., Достық д-лы, 105,

телефон/факс: +7(727)317 14 64;

e-mail: gulmira.pharm@yahoo.com

 

Прикрепленные файлы

163678761477976483_ru.doc 53 кб
166585911477977647_kz.doc 55.5 кб

Отправить прикрепленные файлы на почту

Источники

Национальный центр экспертизы лекарственных средств, изделий медицинского назначения и медицинской техники