Энфин

Энфин

Налбуфин

Инъекцияға арналған ерітінді, 5 мг/мл және 10 мг/мл, 1 мл

Бір мл ерітіндінің құрамында

белсенді зат

налбуфин гидрохлориді - 5 мг және 10 мг,

қосымша заттар: натрий хлориді, натрий цитраты, сусыз лимон қышқылы, натрий гидроксиді, хлорсутек қышқылы, инъекцияға арналған су.

Бөгде механикалық қоспаларсыз, мөлдір, түссіз сұйықтық.

Жүйке жүйесі. Анальгетиктер. Апиындар. Морфин туындылары. Налбуфин.

АТХ коды N02AF02

Фармакокинетикасы

В/і енгізген кезде әсері 2-3 минуттан соң, т/а немесе б/і енгізген кезде - 10-15 минуттан соң дамиды. Ең жоғарғы әсері - 30-60 минуттан соң, әсер ету ұзақтығы т/а немесе б/і енгізген кезде төзімділік жоқ болса - 3-6 сағат, в/і енгізген кезде - 3-4 сағат. Бауырда метаболизденеді. Метаболиттер түрінде өтпен, азғантай мөлшерде — несеппен шығарылады. Плацентарлық бөгет арқылы өтеді, босану кезінде жаңа туған сәбиде тыныстың тарылуын туғызуы мүмкін. Емшек сүтіне экскрецияланады. Жартылай шығарылу кезеңі – 2,5–3 сағат.

Фармакодинамикасы

Апиындық рецепторлардың агонист-антагонисі (каппа- және дельта-рецепторлардың агонисі және µ-апиындық рецепторлардың антагонисі). Каппа-апиындық рецепторлар арқылы эндогендік антиноцицептивтік жүйені белсендіреді, ОЖЖ әр түрлі деңгейлеріндегі ауыру импульстерінің нейронаралық берілісін бұзады. Мидың жоғарғы бөліктеріне әсер ете отырып, ауырудың эмоционалдық айқындығын өзгертеді. Шартты рефлекстерді тежейді, седативтік әсер береді, дисфорияны, миозды тудырады, құсу орталығын қоздырады. Морфин, тримеперидин, фентанилге қарағанда, тыныс алу орталығын азырақ дәрежеде бәсеңдетеді және АІЖ моторикасына әсер етеді. Гемодинамикаға әсер етпейді. Гистаминдік реакцияның туындау қаупі, сондай-ақ үйренісу мен апиынға тәуелділіктің даму қаупі апиындық агонистерге қарағанда, бақыланатын қолдану кезінде айтарлықтай төмен.

– анестезия кезінде қосымша дәрі ретінде, операция алдындағы және операциядан соң ауыруды басу үшін, акушерлік тәжірибеде босанулар кезінде ауыруды басу үшін

– қарқындылығы орташа және айқын дәрежелі ауыру синдромын басу үшін

Қатаң түрде дәрігердің тағайындауымен.

Ересектер үшін әдеттегі ұсынылатын дозасы дене салмағы 70 кг пациенттер үшін 10-нан 20 мг дейінді құрайды, бұл дене салмағына 0,1 - 0,3 мг / кг баламалы. Бұл дозасын вена ішіне, бұлшықет ішіне немесе тері астына енгізуге болады, әр 4-6 сағат сайын қайталап енгізуге болады. Ересектер үшін ең жоғарғы бір реттік дозасы 20 мг (0,3 мг/кг) аспауы тиіс, ең жоғарғы тәуліктік дозасы - 2.4 мг/кг. Тағайындалу ұзақтығы - 3 күннен аспайды.

Егде жастағы адамдар

Егде жастағы пациенттерге сақтықпен тағайындайды, препаратты ең төменгі тиімді дозасымен тағайындау керек.

Балалар

Педиатрияда қолданылуы жөніндегі мәліметтердің шектеулілігіне байланысты, препаратты 18 жасқа дейінгі балаларға қолдану ұсынылмайды.

Әрбір жиілік тобында жағымсыз құбылыстар ауырлығының азаю ретімен берілген. Жиілігі былай жіктелген:

Өте жиі (≥ 1/10); жиі (≥ 1/100 - <1/10 дейін); кейде (≥ 1/1000 - <1/100 дейін); сирек (≥ 1/10 000 - <1/1000 дейін); өте сирек (<1/10000), жиілігі белгісіз (Бағасын қолжетімді деректерден анықтау мүмкін емес)

Өте жиі:

- седативті әсер

Жиі:

- жабысқақ тер, жүрек айнуы/құсу, бас айналуы/вертиго, ауыздың құрғауы, бас ауыруы

Сирек:

- ашушаңдық, депрессия, қозу жай-күйі, жылау, эйфория, масаю сезімі, өшпенділік, әдеттен тыс түстер, сананың шатасуы, әлсіздік, елестеулер, дисфория, ауырлық сезімі, ұю, шаншу, дереализация, өзін-өзі танымау, сандырақтау, дисфория және елестеулер пентазоцинді қабылдаған кездегіден азырақ;

- гипертония, гипотония, брадикардия, тахикардия;

- бұрап ауыру, диспепсия, ауыздың кермек татуы;

- тыныстың тарылуы, ентігу, демікпе;

- қышыну, күйдіру, есекжем;

- сөйлеудің бұзылуы, несеп шығаруға императивті қысылу, көздің бұлдырауы, гиперемия және ысыну мен терінің қызаруы.

Аллергиялық реакциялар

- налбуфинді қолданғаннан кейін анафилаксиялық /анафилактоидты және басқа күрделі аса жоғары сезімталдық реакциялары туралы хабарланады; шұғыл демеуші ем қажет болуы мүмкін. Бұл реакциялар шокты, респираторлық дистресс-синдромды, тыныс алудың тоқтауын, брадикардияны, жүректің тоқтауын, гипотензияны немесе көмейдің ісінуін қамтуы мүмкін. Бұл аллергиялық реакциялардың кейбіреулері өмірге қауіп төндіруі мүмкін. Аллергиялық типтегі реакциялар туралы басқа да хабарларға стридор, бронх түйілуі, қырылдау, ісінулер, бөртпе, қышыну, жүрек айнуы, құсу, тершеңдік, әлсіздік және діріл жатады.

Жиілігі белгісіз (Бағасын қолжетімді деректерден анықтау мүмкін емес)

Келесі жағымсыз реакциялар налбуфинді постмаркетингтік кезеңде пайдалану барысында анықталған, жиіліктерін анықтау немесе дәрілік заттың әсерімен себеп-салдарлық байланысын нақтылау мүмкін емес:

- іштің ауыруы, гипертермия, сана деңгейінің төмендеуі немесе естен тану, ұйқышылдық, тремор, үрейлену, өкпенің ісінуі, қозу, құрысулар және инъекция орнындағы ауыру, ісіну, қызару, күйдіру сияқты реакциялар, және ысыну.

Налбуфинмен емдеуден ауыр аллергиялық реакция салдарынан өлім туралы хабарланған. Аналары босану кезінде налбуфин қабылдағанда шарананың өлімі туралы хабарланған.

Серотониндік синдром

- серотониндік синдромның, өмір үшін әлеуетті қаупі бар жай-күйдің туындау жағдайлары апиындарды серотонинергиялық препараттармен бір мезгілде пайдаланған кезде хабарланған.

Бүйрекүсті безі жеткіліксіздігі

- бүйрекүсті безі жеткіліксіздігі жағдайлары апиындарды бір айдан астам уақыт пайдаланғаннан кейін жиірек байқалды.

Дәрілік затты шамадан тыс пайдалану және тәуелділік

Налбуфин шамадан тыс пайдалануға, тәуелділікке және қылмыстық ауытқуларға түрткі болуы мүмкін.

Апиындарды қабылдайтын барлық пациенттерге шамадан тыс пайдаланудың, тәуелділіктің белгілеріне мұқият мониторинг қажет, өйткені апиындық анальгетиктерді пайдаланудың тіпті тиісті медициналық қолдану кезінде де тәуелділікке ұшырату қаупі бар.

Пациентке тиісті баға беру, тағайындау тәжірибесінің дұрыстығы, емге мезгіл-мезгіл қайта баға беріп отыру және дұрыс дозалау мен сақтау апиындық препараттарды шамадан тыс пайдалануды шектеуге көмектесетін тиісті шаралар болып табылады.

Налбуфинді шамадан тыс пайдалануға байланысты қауіптер

Налбуфинді шамадан тыс пайдалану артық дозалану және өлім қаупін тудырады. Налбуфинді алкогольмен және басқа орталық жүйке жүйесі депрессанттарымен бір мезгілде шамадан тыс тұтынған кезде қауіп ұлғаяды.

Есірткілерді парентеральді түрде шамадан тыс тұтыну әдетте гепатит және АИТВ сияқты инфекциялық аурулардың берілуімен байланысты.

Болжамды жағымсыз реакциялары туралы хабарлар

Препараттың болжамды жағымсыз реакциялары туралы деректер ұсыну дәрілік заттың пайда/қауіп арақатынасына ұдайы мониторинг жүргізуге мүмкіндік беретін өте маңызды кезең болып табылады. Медицина қызметкерлері кез келген болжамды жағымсыз реакциялар туралы ақпаратты нұсқаулықтың соңында берілген байланыс деректері, сондай-ақ ұлттық ақпарат жинау жүйесі арқылы ұсынуы керек.

– препаратқа немесе препараттың кез келген ингредиентіне аса жоғары сезімталдық

– тыныс алу мен ОЖЖ айқын бәсеңдеуі

– эпидуральді және жұлын анестезиясы кезінде

– бүйрек пен бауырдың ауыр жеткіліксіздігі

– эпилепсиялық синдром, бассүйекішілік гипертензия; бассүйек-ми жарақаты, жедел алкогольдік жағдайлар, алкогольдік психоз; құрсақ қуысы ағзаларының жедел хирургиялық аурулары (диагноз қойылғанға дейін); гепатобилиарлық жүйеге операциялық араласулар (Одди сфинктерінің түйілуі болуы мүмкін)

– морфин тәрізді препараттарға дәрілік тәуелділік (морфин, промедол, фентанил) — тоқтату синдромы дамуы мүмкін; цефалоспориндерден, линкозаминдерден, пенициллиндерден болған жалғанжарғақшалы колит аясындағы диарея; уытты диспепсия

– сақтықпен: егде жас, кахексия, бауыр және бүйрек жеткіліксіздігі, тыныс алу жеткіліксіздігі (соның ішінде өкпенің созылмалы обструкциялық ауруларында, уремияда), мерзімінен бұрын босану және ұрықтың жетілмей қалу ықтималдығы; өттас ауруы, ішектің ауыр қабыну аурулары, бронх демікпесі, аритмия, артериялық гипертензия, гипотиреоз, қуықасты безінің гиперплазиясы, несеп шығару арнасының стенозы; суицидке бейімділік, эмоционалдық құбылмалылық; әлсіз науқастар.

– Препаратты хирургиялық құрсақ синдромы кезінде сәйкесінше диагностика жүргізбей қолдану ұсынылмайды, өйткені налбуфин гидрохлориді оның көріністерін бүркемелеуі мүмкін.

Аддитивті фармакологиялық әсеріне орай, басқа апиындық анальгетиктерді, бензодиазепиндерді немесе басқа алкоголь сияқты ОЖЖ депрессанттарын, басқа седативті/ұйықтататын дәрілерді, анксиолитиктерді, транквилизаторларды, миорелаксанттарды, жалпы анестетиктерді, психозға қарсы дәрілерді немесе басқа апиындарды бір мезгілде пайдалану тыныс алудың бәсеңдеу, терең седативті әсер, кома немесе өлім қаупін ұлғайтуы мүмкін.

Бұл препараттарды емдеудің ықтимал балама нұсқалары талапқа сай болмаған пациенттерге қолдану үшін резервтік қатарлас тағайындау: дозалануын және ұзақтығын ең төменгі қажеттісіне дейін шектеңіз. Пациенттерде тыныс алудың бәсеңдеуінің және седацияның белгілері бар-жоғын мұқият қадағалаңыз [Айрықша нұсқауларды қараңыз).

Серотонинергиялық препараттар:

Апиындарды серотонинергиялық нейротрансмиттерлік жүйеге ықпал ететін, серотонинді кері қармаудың іріктелген тежегіштері (СКҚІТ), серотонинді және норэпинефринді кері қармаудың іріктелген тежегіштері (SNRIs), үшциклдық антидепрессанттар (TCAs), триптандар, 5-HT3 рецепторларының антагонистері, серотониннің нейротрансмиттерлік жүйесіне ықпал ететін дәрілік заттар (мысалы, миртазапин, тразодон, трамадол) және моноаминоксидаза (МАО), тежегіштер (психикалық бұзылыстарды емдеуге арналғандар, сондай-ақ линезолид және метиленді көкті вена ішіне енгізу сияқты басқалары) сияқты басқа дәрілік заттармен бір мезгілде қабылдау серотониндік синдромға әкеліп соқты (Айрықша нұсқаулар бөлімін қараңыз).

Егер бір мезгілде қолдану қажет деп саналса, пациентті мұқият бақылаңыз, әсіресе емдеуді бастаған кезде және дозаны түзеткенде. Егер серотониндік синдромға күдік туса, налбуфин енгізуді тоқтатыңыз.

Бұлшықет релаксанттары:

Налбуфин миорелаксанттардың қаңқа бұлшықеттеріне жүйке-бұлшықетті бөгегіш әсерін күшейтуі және тыныс алудың бәсеңдеу дәрежесін арттыруы мүмкін. Пациенттерде күткендегіден көбірек болуы мүмкін тыныс алудың бәсеңдеу белгілерінің бар-жоғына мониторинг керек, және қажет болса налбуфеннің және/немесе миорелаксанттың дозасын азайтыңыз.

Диуретиктер

Апиындар антидиуретикалық гормонның шығарылуын тудырып, диуретиктердің тиімділігін азайтуы мүмкін. Пациенттерде диурездің азаюының және/немесе артериялық қысымға әсер ету белгілерінің бар-жоғына мониторинг керек және диуретиктің дозасын қажетіне қарай арттыру керек.

Моноаминоксидаза (MAO) тежегіштері

MAO (мысалы, фенелзиннің, транилципроминнің, линезолидтің) апиындармен өзара әрекеттесуі серотониндік синдром немесе апиындық уыттылық (мысалы, тыныс алудың бәсеңдеуі, кома) түрінде білінуі мүмкін. МАО қабылдайтын пациенттерге немесе емдеуді тоқтатқаннан кейін 14 күннің ішінде налбуфинді пайдалану ұсынылмайды.

Егер апиынды шұғыл пайдалану қажет болса, тесттік дозаларды пайдаланыңыз және ауыруды емдеуге арналған аз дозаларды жиі титрлеңіз, бұл кезде артериялық қысымды және ОЖЖ мен тыныс алудың бәсеңдеу белгілері мен симптомдарын мұқият қадағалаңыз.

Этанол налбуфиннің орталық жүйке жүйесін бәсеңдеткіш әсерін күшейтеді.

Антидпрессанттармен пайдаланған кезде бір немесе екі препараттың да дозасы азайтылуы тиіс.

Ауыруды бәсеңдететін әсерін және басқа апиындық аналгетиктердің тыныс алуды бәсеңдетуін ішінара төмендетеді. Есірткіге тәуелділік аясында налтрексон «тоқтату синдромы» симптомдарының дамуын жеделдетеді (енгізгеннен кейін 5 минуттан соң және 48 сағатқа дейін жалғасуы, қайтуы қиын болуы мүмкін).

Антихолинергиялық белсенділігі бар дәрілік заттар, диареяға қарсы препараттар, соның ішінде лоперамид, ішек парезіне әкелуі мүмкін іш қатуының, несептің іркілуі мен ОЖЖ бәсеңдеуінің даму қаупін арттырады. Налбуфинді пайдаланған кезде пациенттерде несеп іркілуінің немесе асқазан моторикасы төмендеуінің белгілері бар-жоғына мониторинг қажет.

Налбуфин артериялық қысымды төмендететін дәрілік заттардың, соның ішінде ганглиоблокаторлардың, диуретиктердің гипотензивтік әсерін күшейтеді. Метоклопрамидтің тиімділігін төмендетеді.

Үйлесімсіздігі. Басқа инъекциялық ерітінділермен бір шприцте араластырмау керек.

Налбуфин гидрохлориді 0,9% натрий хлориді ерітіндісімен, 5% Хартман ерітіндісімен үйлесімді.

Налбуфинді жалпы анестезияға қосымша ретінде тек, вена ішіне пайдалануға, анестезия мен реанимацияға арнайы үйретілген мамандар ғана енгізуі тиіс. Налбуфин, реанимациялық жабдықтар, интубациялау мен ӨЖЖ арналған жабдықтар, оттегі оңай қолжетімді жерде болуы тиіс.

Препараттың дозасы мен енгізу жиілігі дәрігермен кеңеспей арттырылмауы тиіс, 3 күннен артық қолданбаған дұрыс, өйткені налбуфин психикалық және физикалық тәуелділік туғызуы мүмкін.

Налбуфинді басқа есірткілермен пайдалану басқа апиынды аналгетиктердің әсерін төмендетуі мүмкін, препаратты ұзақ уақыт бойы қолдану тоқтату белгілерін немесе симптомдарын туғызуы мүмкін.

Налбуфин бауырда метаболизденеді және бүйрекпен шығарылады, бүйрек және бауыр жеткіліксіздігі бар науқастарда сақтықпен пайдалану керек. Препаратты жүрек айнуы мен құсу туындаған миокард инфарктісі бар пациенттерде сақтықпен қолдану керек.

Пациенттерде өт жолдарына операция жасау кезінде сақтықпен пайдалану керек, өйткені бұл Одди сфинктерінің түйілуін тудыруы мүмкін.

Педиатрияда қолданылуы

18 жасқа дейінгі балаларда қолданылуының қауіпсіздігі туралы мәліметтер жеткіліксіз.

Жүктілік және лактация кезеңі

Апиындық анальгетиктерді жүктілік кезінде ұзақ қолдану жаңа туған нәрестелерде апиындардың тоқтату синдромын тудыруы мүмкін.

Жүкті әйелдерде налбуфинге қатысты қолда бар деректер есірткілермен байланысты күрделі туа біткен ақаулар және түсік тастау қаупі туралы ақпарат беру үшін жеткіліксіз.

Налбуфинді босану кезінде тағайындаған кезде шарананың ауыр брадикардиясы туралы хабарланған. Налоксон бұл әсерлерді тоқтатуы мүмкін. Жүктіліктің ерте мерзімдерінде шарана брадикардиясы туралы ешқандай хабарлар болмаса да, мұның орын алуы ықтимал. Сондықтан налбуфинді жүктілік кезінде, әлеуетті пайдалары шарана үшін қаупінен басым түскен, және шарана мониторингі, шаранаға кез келген әлеуетті қолайсыз әсерін анықтау мен басқару сияқты тиісті шаралар қабылданған жағдайда ғана пайдалану керек.

Босану

Налбуфиннің плаценталық трансфузиясы жоғары, жылдам әрі құбылмалы, ал ана мен шарана арасындағы арақатынас диапазоны 1: 0,37-ден 1: 6-ға дейін құрайды. Анасына босану кезінде налбуфинді енгізгеннен кейін хабарланған шарана мен жаңа туған нәресте үшін қолайсыз салдарлары шарана брадикардиясын, туған кездегі тыныс алудың бәсеңдеуін, апноэні, цианозды және гипотонияны қамтиды. Бұл оқиғалардың кейбіреулері өмірге қауіпті болды.

Босану кезінде анаға налоксонды енгізу кей жағдайларда бұл әсерлерді қалпына келтірді. Шарананың айқын әрі ұзақ брадикардиясы туралы хабарлар бар. Шарананың брадикардиясымен байланысты тұрақты неврологиялық зақымдану басталуы мүмкін. Сондай-ақ налбуфинді қолданумен байланысты шарананың жүрек ырғағының синусоидальді көрінісі туралы хабарланған. Сондықтан налбуфинді босану кезінде әлеуетті пайдасы нәресте үшін қаупінен басым түсетін болса ғана пайдалану керек. Налбуфинді пайдаланған кезде жаңа туған нәрестелерді тыныс алудың бәсеңдеуіне, апноэге, брадикардияға және аритмияларға қатысты бақылау керек.

Апиындар плаценталық бөгет арқылы өтеді және жаңа туған нәрестелерде тыныс алудың бәсеңдеуі мен психофизиологиялық әсерлерді туғызуы мүмкін. Налоксон сияқты апиындық антагонист, жаңа туған нәрестелерде апиыннан болған тыныс алудың бәсеңдеуін тоқтату үшін қолжетімді болуы тиіс. Ауырғанды басатын басқа әдістер бұдан гөрі қолайлы болып табылса, налбуфин жүкті әйелдер үшін босану кезінде немесе тура босанар алдында ұсынылмайды. Апиындық анальгетиктер, соның ішінде налбуфин, жатырдың жиырылу күшін, ұзақтығын және жиілігін уақытша азайтатын әсерлердің көмегімен босануды ұзаққа созуы мүмкін. Алайда бұл әсер бірізді болып табылмайды және жатыр мойнының кеңею жылдамдығының артуымен қайтуы мүмкін, ол босанудың қысқаруына әкеледі. Шамадан тыс седативті әсердің және тыныс алудың бәсеңдеуінің белгілері бар болса, босану кезінде апиындық анальгетиктердің әсеріне ұшыраған жаңа туған нәрестелерге мониторинг қажет.

Лактация

Шектеулі деректер налбуфиннің (налбуфин гидрохлоридінің) ана сүтіне бөлінетінін айғақтайды, бірақ аздаған мөлшерде ғана (енгізілген дозаның 1%-нан аз) және клиникалық әсері елеусіз. Емшек сүті арқылы налбуфиннің әсеріне ұшыраған балаларды шамадан тыс седацияға және тыныс алудың бәсеңдеуіне қатысты бақылау қажет. Тоқтату симптомдары емшек еметін балаларда апиындық анальгетикті тоқтатқанда немесе емшек емізуді тоқтатқанда пайда болуы мүмкін.

Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Автокөлік және басқа механизмдерді басқару қабілетіне әсерін бағалауға қатысты зерттеулер жүргізілген жоқ. Көлік құралдары мен зейін қоюды қажет ететін басқа механизмдерді басқарудан бас тарту керек. Налбуфин седативтік әсер береді, бас айналуын және көрудің бұзылуын туғызады.

Клиникалық көрінісі

Налбуфиннің өзімен ғана жедел артық дозалану тыныс алудың бәсеңдеуімен және дисфориямен білінеді. Налбуфиннің басқа апиындармен немесе ОЖЖ депрессанттарымен артық дозалануы тыныс алудың бәсеңдеуімен, мелшиюге немесе комаға дейін үдейтін ұйқышылдықпен, қаңқа бұлшықеттерінің босаңдығымен, суық әрі жабысқақ терімен, қарашықтардың тарылуымен, ал кейбір жағдайларда өкпенің ісінуімен, брадикардиямен, гипотониямен, тыныс жолдарының ішінара немесе толық обструкциясымен, әдеттен тыс қорылдаумен немесе өліммен көрініс беруі мүмкін.

Артық дозаланған жағдайдағы гипоксия кезінде миозға қарағанда, мидриазды көрудің ықтималдығы басым.

Артық дозалануын емдеу

Артық дозалану жағдайында тыныс жолдарының өткізгіштігін қалпына келтіру және қорғау әрекеттеріне, сондай-ақ, қажет болса, өкпені қосымша немесе жасанды желдетуге басымдық беріледі. Айналымдық шокты және өкпенің ісінуін емдеген кезде нұсқауларға сәйкес басқа да демеуші шаралар (оттегіні және тамыр тарылтатын агенттерді қоса) қолданылады. Жүректің тоқтауы немесе аритмия реанимациялық шаралардың кеңейтілген кешенін қолдануды қажет етеді.

Апиындардың антагонистері, налоксон немесе налмефен, апиындардың артық дозалануынан туындаған тыныс алудың бәсеңдеуінің спецификалық антидоттары болып табылады. Налбуфин гидрохлоридінің артық дозалануына қатысты алғанда салдарлы болған, тыныс алудың немесе қанайналымның клиникалық мәні бар бәсеңдеуінде апиындардың антагонисін енгізеді. Апиындық антагонистерді налбуфин гидрохлоридінің артық дозалануынан туындаған тыныс алудың немесе қанайналымның клиникалық мәні бар бәсеңдеуі болмаған кезде тағайындамау керек.

Апиындарды тоқтатудың ұзақтығы налбуфин әсерінің ұзақтығынан аз болады деп күтілетіндіктен, өздігінен тыныс алу сенімді түрде қалпына келгенге дейін пациентті мұқият бақылау керек. Егер апиындық антагониске жауабы оңтайлы болмаса немесе қысқа мерзімдік сипат алса, препаратқа ұсынылған ақпаратқа сәйкес қосымша антагонист енгізіледі.

Апиындарға физикалық тәуелділігі бар пациентте антагонистің ұсынылған әдеттегі дозасын енгізу жедел тоқтату синдромын жылдамдатады. Тоқтату симптомдарының айқындылық дәрежесі физикалық тәуелділікке және енгізілген антагонистің дозасына байланысты болады. Физикалық тәуелділігі бар пациенттегі тыныс алудың ауыр бәсеңдеуін емдеуге шешім қабылдаған кезде, антагонисті енгізуді сақтықпен әрі антагонистің аз дозаларымен титрлеу арқылы бастау керек.

Шығарылу түрі және қаптамасы

1 мл-ден янтарь түсті І типті шыныдан жасалған ампулаларда. 5 ампуладан пластиктен жасалған пішінді ұяшықты қаптамада.

1 пішінді ұяшықты қаптамадан медициналық қолдану жөніндегі мемлекеттік және орыс тілдеріндегі нұсқаулықпен бірге картоннан жасалған қорапқа салынады.

Жарықтан қорғалған жерде, 25 °С температурада сақтау керек.

Мұздатып қатыруға болмайды.

Балалардың қолы жетпейтін жерде сақтау керек!

3 жыл

Жарамдылық мерзімі өткеннен кейін қолдануға болмайды.

Рецепт арқылы

Өндіруші

Стериль-Джин Лайф Сайенсиз (Р) Лтд, Үндістан

Steril-Gene Life Sciences (P) Ltd, Үндістан

No.45, Mangalam Main Road, Mangalam Village, Villianur Commune, Puducherry – 605110

Тіркеу куәлігінің ұстаушысы

«LS Pharm» (ЛС Фарм) ЖШС, Қазақстан

Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын ұйымның атауы, мекенжайы және байланыс деректері (телефон, факс, электронды пошта):

LS Pharm ЖШС, Қазақстан

Алматы қ., Медеу ауданы, Н. Назарбаев даңғылы 118/128 Бөгенбай батыр к-сі қиылысы, 3-кеңсе, пошта индексі 050000

Қазақстан Республикасы аумағында дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта):

ConsultAsia ЖШС, Қазақстан, Алматы қ.

Шевченко к-сі 165 Б

тел./факс:  +7(727) 379 42 58

+77051708825

e-mail: pv@consultingasia.kz