Энбрел (25 мг)

• русский
• қазақша

• Скачать инструкцию медикамента

Саудалық атауы

Энбрел

Халықаралық патенттелмеген атауы

Этанерцепт

Дәрілік түрі

Тері астына енгізуге арналған 25 мг, 50 мг ерітінді

Құрамы

Бір еккіштің ішінде

белсенді зат - 23,5 мг немесе 47,0 мг этанерцепт,

қосымша заттар: L-аргинин гидрохлориді, натрий хлориді, сахароза, натрий гидрофосфат дигидраты, натрий дигидрофосфат дигидраты, инъекцияға арналған су.

Сипаттамасы

Мөлдір немесе cәл бозаңданатын түссіз немесе ашық-сары сұйықтық

Фармакотерапиялық тобы

Иммунодепрессанттар. Альфа ісіктерінің некрозы ((ТNF- alfa) факторының тежегіштері. Этанерcепт.

АТХ коды L04АВ01

Фармакологиялық қасиеттері

Фармакокинетикасы

Этанерцепт теріастылық инъекция жасалған жерден баяу сіңіріліп, Энбрелдің бір реттік дозасынан кейін шамамен 48 сағаттан соң ең жоғары концентрациясына жетеді. Абсолютті биожетімділігі 76% құрайды. Энбрел дозасын аптасына екі рет енгізгенде бір реттік дозасынан кейін байқалуынан екі есе көп жоғары тепе-тең концентрацияларына жетеді. Тері астына бір реттік 25 мг Энбрел енгізілгеннен кейін плазмадағы орташа ең жоғары концентрациясы 1,65±0,66 мкг/мл, «концентрация-уақыт» қисығы астындағы ауданы (AUC) 235±96,6 мкг· сағ./мл болды. Дозалар шектерінде клиренсінің көріністі қанығуы байқалмаған.

Этанерцепт концентрациясының уақытқа тәуелділігі биэкспоненциальді қисықпен сипатталады.

Таралу көлемінің орташа мәні 7,6 л құрайды, осы тұста таралу көлемі тепе-тең жағдайда 10,4 л құрайды.

Организмнен этанерцепт баяу шығарылады. Жартылай шығарылу кезеңі (Т1/2) 80 сағатқа жуық құрайды. Ревматоидты артриті бар емделушілерде клиренсі шамамен сағатына 0,066 л тең, бұл дені сау еріктілердегі 0,11 л/сағат мәнінен біршама төмен. Этанерцепт фармакокинетикалық сипаттамалары ревматоидты артритпен, шорбуынданған спондилоартритпен және псориазбен науқастарда ұқсас.

Энбрелдің аптасына бір рет 50 мг дозасы аптасына екі рет енгізілген 25 мг дозаға биоэквивалентті.

Жедел бүйрек немесе бауыр жеткіліксіздігі бар емделушілерде этанерцепт концентрациясының өсуі байқалмайды.

Ерлердегі және әйелдердегі этанерцепт фармакокинетикасында айқын айырмашылықтар жоқ.

Егде жастағы емделушілер

65-тен 87 жасқа дейінгі емделушілер тобында этанерцепт клиренсі мен болжанатын таралу көлемі 65 жасқа толмаған емделушілердегімен ұқсас.

Ювенильді идиопатиялық полиартриті бар балалар

Сарысудағы концентрациялар бейіні ревматоидты артриті бар ересек емделушілердегісіне ұқсас. Түрленуі жасы үлкен балаларда (10-17 жас) және ересек емделушілерде сарысудағы этанерцепт деңгейі шамамен бірдей, ал жасы кіші балаларда ол едәуір төмен болады деп жорамалдауға мүмкіндік береді.

Псориазы бар балалар

Қан сарысуындағы этанерцепт орташа концентрациялары, тиісінше, 12-48 апта бойы аптасына бір рет 0,8 мг/кг (аптасына ең жоғары дозасы 50 мг) және аптасына 2 рет 0,4 мг/кг дозада (аптасына ең жоғары дозасы 50 мг) Энбрел алған псориазға шалдыққан 4-тен 17 жасқа дейінгі балаларда және ювенильді идиопатиялық полиартриті бар балаларда ұқсас болды (1,6-2,1 мкг/мл). Осы көрсеткіштің мәні Энбрел аптасына 2 рет 25 мг дозада енгізілген псориазға шалдыққан ересек емделушілердегімен сәйкес болды.

Фармакодинамикасы

Альфа-ісік некрозының факторы (TNF-α, ІНФ-α) ревматоидты артритте қабыну үдерісін демейтін негізгі цитокин болып табылады. Псориаздық артриті бар науқастарда синовиальді қабықтарында және псориазды түйіндақтарында, сондай-ақ шорбуынданған спондилиті бар науқастардың плазмасы мен синовиальді тіндерінде ІНФ-α деңгейінің жоғарылауы болды. Этанерцепт өзінің жасуша беткейіндегі рецепторларымен ІНФ-α байланысуының бәсекелес тежегіші болып табылады, осылайша, ІНФ-α биологиялық белсенділігін тежейді. ІНФ-α мен лимфотоксин қабыну цитокиндеріне жатады, олар жасушалар беткейіндегі анық айырмашылығы бар екі ісік некрозы факторының рецепторлары: 55-килодальтон (р55) және 75-килодальтонмен (р75) байланысады (ІНФР). Екі ІНФР да организмде жарғақшамен байланысқан және бос түрлерде болады. Еритін ІНФР ІНФ-α биологиялық белсенділігін реттейді.

ІНФ-α және лимфотоксин көбіне гомотримерлер ретінде болады, олардың биологиялық белсенділігі жасушалар беткейінде болатын ІНФР айқасу тігісіне байланысты. Этанерцепт сияқты димерлі еритін рецепторлардың ІНФ-α-мен тектестігі мономерлі рецепторларға қарағанда көбірек, сондықтан да ІНФ-α-ның өзінің жасушалық рецепторларымен байланыстыратын едәуір өте күшті бәсекелес тежегіштері болып табылады. Бұдан басқа, Fc иммуноглобулині аумағын димерлі рецептор құрылымындағы байланысу элементі ретінде пайдалану сарысудан жартылай шығарылу кезеңін ұзартады.

Ревматоидты артритте және шорбуынданған спондилитте буындардағы патологиялық өзгерістердің едәуір бөлігі, сондай-ақ терідегі псориаздық түйіндақтар түріндегі өзгерістер ІНФ-α бақыланатын жүйеге тартылатын қабыну молекулаларының әсер етуі есебінен пайда болады. Этанерцепт әсер ету механизмі, көрінісі бойынша, жасуша беткейіндегі ІНФ-α рецепторларымен ІНФ-α байланысуының бәсекелі тежелісімен жүзеге асады. Осылайша, этанерцепт ІНФ-α арқылы жасушалық жауаптан сақтандырып, ІНФ-α биологиялық белсенділігінің жойылуына ықпал етеді. Этанерцепт дабылдарды төмен қарай жіберуші қосымша молекулалармен (мысалы, цитокиндер, адгезивтік молекулалар немесе протеиназалар) бақыланатын биологиялық жауаптарды түрлендіруі де мүмкін. Әрі бұл жауаптар ІНФ-α көтермелеуі де, бақылауы да мүмкін.

Псориаздық артритпен науқастарда Энбрел дене белсенділігін жақсартады және шеткергі буындардың зақымдануының даму ықтималдылығын азайтады.

Энбрел препаратымен емдеуді тоқтатқаннан кейін бір ай ішінде ауру өршуі мүмкін. Емдеуді тоқтатқаннан кейін 24 ай ішінде препаратты қайта тағайындау тиімділігі емдеуді үзбеген науқастардағы тиімділікпен салыстырмалы.

Қолданылуы

- ревматоидты артритте

Метотрексатпен біріктірілген Энбрел ересектерге, метотрексатты қоса, қабынуға қарсы базистік препараттарға (ҚҚБП) жауап талапқа сай болмағанда ауырлығы орташа және жоғары дәрежелі белсенді ревматоидты артритті емдеуде тағайындалады.

Энбрелді метотрексат тиімсіз немесе көтерімсіз болған жағдайда монотерапия түрінде тағайындауға болады.

Энбрел бұрын метотрексатпен ем алмаған ересектердегі ауыр, белсенді және үдемелі ревматоидты артритті емдеу үшін көрсетілген.

- ювенильді идиопатиялық полиартритте

Метотрексат тиімділігінің жеткіліксіздігі немесе көтерімсіздігі байқалған 4-17 жас аралығындағы балалар мен жасөспірімдерде белсенді ювенильді идиопатиялық полиартритті емдеу.

- псориаздық артритте

ҚҚБП еміне жауабы талапқа сай болмаған ересектерде белсенді және үдемелі псориаздық артритті емдеу.

- шорбуынданған спондилитте

Дәстүрлі емнен елеулі жақсару болмаған, ауыр белсенді шорбуынданған спондилиті бар ересектерді емдеу.

- псориазда

Қарсы көрсетілімдері немесе циклоспорин, метотрексат немесе PUVA-терапия қамтылатын басқа да жүйелік емдеуді көтере алмаушылығы бар, айқындылығы орташа және ауыр дәрежелі псориазға шалдыққан ересектерді емдеу.

Көтере алмаушылығы немесе басқа да жүйелік емдерге немесе фототерапияға жеткіліксіз жауабы байқалған, айқындылығы ауыр дәрежедегі созылмалы псориазы бар 8 жастағы және одан үлкен балаларды емдеу.

Қолдану тәсілі және дозалары

Тері астына.

Энбрелмен емдеуді ревматоидты артрит, ювенильді идиопатиялық полиартрит, псориаздық артрит, шорбуынданған спондилит немесе псориазды анықтау және емдеу тәжірибесі бар дәрігер тағайындауы және бақылауы тиіс.

Дайын ерітінді түріндегі 25 мг (0,5 мл препараты бар бір реттік еккіш) және 50 мг (1,0 мл препараты бар бір реттік еккіш) Энбрел дене салмағы 62,5 кг-ден көп емделушілер үшін пайдаланылады. Дене салмағы 62,5 кг-ден аз емделушілерде ерітінді дайындауға арналған лиофилизатты пайдаланған жөн.

Препаратты енгізер алдында осы бөлімнің соңында болатын қолданылуы жөніндегі нұсқаулықты ұқыпты меңгеріп алу қажет.

Ересектер

Ревматоидты артрит

Ұсынылатын доза 3-4 күн аралықпен аптасына екі реттік 25 мг Энбрелді құрайды. Баламалы дозасы – аптасына бір рет 50 мг.

Псориаздық артрит

Ұсынылатын доза 3-4 күн аралықпен аптасына екі рет 25 мг немесе аптасына бір рет 50 мг Энбрелді құрайды.

Шорбуынданған спондилит

Ұсынылатын доза – аптасына екі рет 25 мг немесе аптасына бір рет 50 мг Энбрел.

Псориаз

Ұсынылатын доза – аптасына екі рет 25 мг немесе аптасына бір рет 50 мг Энбрел.

Балама ретінде 12 аптадан аспайтын кезеңде аптасына екі рет 50 мг Энбрел тағайындауға болады. Емдеуді жалғастыру қажет болса, Энбрелді аптасына екі рет 25 мг немесе аптасына бір рет 50 мг дозада тағайындауға болады. Энбрелмен емдеуді ремиссияға жеткенше, әдетте, 24 аптадан асырмай жүргізген жөн. Егер 12 апта емделуден кейін симптомдардың оң динамикасы байқалмаса, препарат енгізуді тоқтату керек.

Энбрелді қайта тағайындау қажет болса, жоғарыда көрсетілген емдеу ұзақтығын сақтаған дұрыс. Аптасына екі рет 25 мг доза немесе аптасына бір рет 50 мг доза тағайындау ұсынылады.

Ем ұзақтығы кейбір науқастарда 24 аптадан асып кетуі мүмкін.

Егде жастағы емделушілер (65 жас және одан асқан)

Дозаны да, қолдану тәсілін де түзету қажет емес.

Балалар (дене салмағы 62,5 кг-ден көп)

Дене салмағы 62,5 кг-ден аз балаларда Энбрелді 25 мг-ден аз дозада енгізуге мүмкіндік беретін тері астына енгізу үшін ерітінді дайындауға арналған лиофилизат дәрілік түрінде пайдалану керек.

Ювенильді идиопатиялық артрит (4 жастағы және одан үлкен балалар)

Доза дене салмағына 0,4 мг/кг есебінен белгіленеді (ең жоғары бір реттік дозасы 25 мг). Препарат дозалар арасындағы 3-4 күн аралықтармен аптасына екі рет енгізіледі.

Псориаз (8 жастағы және одан үлкен балалар)

Доза дене салмағына 0,8 мг/кг есебінен белгіленеді (ең жоғары бір реттік дозасы 50 мг). Препарат ремиссияға жеткенше, әдетте, 24 аптадан асырмай аптасына бір рет енгізіледі. Егер 12 апта емделгеннен кейін симптомдардың оң динамикасы байқалмаса, препаратпен емдеуді тоқтату керек.

Энбрелді қайта тағайындау қажет болса, жоғарыда көрсетілген емдеу ұзақтығын сақтаған жөн. Препарат дозасы – аптасына бір рет дене салмағына 0,8 мг/кг (ең жоғары бір реттік дозасы 50 мг). Кейбір жағдайларда емдеу ұзақтығы 24 аптадан көп құрауы мүмкін.

Бүйрек және бауыр функциясының бұзылуы

Дозаны түзету қажет емес.

Энбрел препаратының инъекциясына арналған ерітіндіні дайындау және енгізу жөніндегі нұсқаулық

Инъекцияға дайындау

Бұл препаратты бір еккіште немесе құтыда кез келген басқа препараттармен араластыруға болмайды!

Энбрел препаратымен алдын ала толтырылған еккіштері бар картон қорапты тоңазытқыштан шығарып, жұмыс жасайтын таза, жарық жақсы түсетін, тегіс беткейге қойыңыз.

Алдын ала толтырылған бір еккішті алыңыз. Еккішті сілкімеңіз. Алдын ала толтырылған еккіштердің қалғанын салып, картон қорапты тоңазытқышқа қайта қойыңыз.

Ішінде Энбрел ерітіндісі бар еккішті бөлме температурасына дейін жылыту үшін 15-30 минут қойып қойыңыз. Еккіштегі ине қалпақшасын, ол бөлме температурасына жеткенше, АЛЫП ТАСТАМАҢЫЗ. Энбрелді қандай да бір басқа тәсілмен (мысалы, микротолқынды пешпен немесе ыстық сумен) жылытпаңыз.

Қолыңызды жылы суға сабындап жуыңыз.

Еккіштегі ерітіндінің мөлдір немесе сәл бозаңданатынына, түссіз немесе ашық-сары, көрінетін бөлшектерінің жоқ дерлік екеніне көз жеткізіңіз. Керісінше жағдайда ерітіндіні енгізбеңіз.

Энбрел препаратымен алдын ала толтырылған басқа еккішті пайдаланыңыз.

Сізге, сонымен бірге: спирт сүрткісі, ол жинаққа кіреді, және мақта немесе дәке тампон керек болады.

Инъекция орнын таңдау

Энбрел препаратын келесі анатомиялық аймақтарға тері астына енгізу ұсынылады: (1) санның алдыңғы жақтағы үштен бірінің ортасына; (2) кіндіктен диаметрі 5 см аумақтан тыс, алдыңғы құрсақ қабырғасына; және (3) иықтың сырт жағына (1 суретті қара). Егер Сіз инъекцияны өзіңіз жасайтын болсаңыз, препаратты иықтың сыртқы жағына енгізбеген жөн.

1 сурет.

Инъекция жасалатын жерлерді ауыстырып отырады. Инъекция орындарының арасындағы қашықтық кемінде 3 см болуы тиіс. Терінің зақымданған немесе қызарған бөліктеріне препарат енгізбеңіз. Терінің фиброзды өзгерістері (тыртықтар, қатайған жерлер), жолақтары (созылған) немесе гематомалары (көгерген жерлер) бар аумақтарға салмаңыз (Алдыңғы инъекциялардың орындарын белгілеуге болады).

Псориаз болғанда препаратты тура терінің қалыңдаған, қызарған бөліктеріне немесе қабыршақтанған ошақтарға («псориаздық түйіндақтарға») енгізуге болмайды.

Тері бөлігін дайындау және Энбрел ерітіндісін енгізу

Энбрел ерітіндісі енгізілетін жерді спиртке батырылған тампонмен айналдыра ысқылай өңдеңіз. Терінің өңделген бөлігіне инъекция жасалғанша ештеңе ТИГІЗБЕҢІЗ.

Еккіштегі инеден қалпағын күшпен тартып, шешіп алыңыз (2 суретті қараңыз). Инені бүлдіріп алмау үшін қалпағын майыстырмай және бұрамай абайлап алыңыз.

Қалпағын алған кезде ине ұшында сұйықтық тамшысы пайда болуы мүмкін; бұл бола береді. Инеге тиіспеңіз және қандай да бір басқа беткейге тигізіп алмаңыз. Поршеньге тиіспеңіз және оны қыспаңыз. Бұл еккіштен сұйықтықтың шығып кетуіне әкелуі мүмкін.

2 сурет.

Терінің өңделген беті кепкеннен кейін, бір қолмен тері қыртысын жиырып алып, екінші қолмен еккішті карандаш сияқты ұстаңыз.

Инені 45°-тан 90° дейін бұрыштай ұстап, тез, қысқа қимылмен тері астына түгел енгізіңіз. Әріқарай сіз инені енгізгенде оны ыңғайлы етіп (көлбеу бұрыш) ұстайсыз (3 суретті қараңыз). Инені өте баяу немесе шектен тыс күшпен енгізбеңіз.

3сурет.

Ине теріге түгел кіргеннен кейін, сіз жиыра ұстап тұрған тері қатпарын жіберуге болады. Босаған қолыңызбен еккіштің негізін өзгеріссіз күйде ұстап тұрыңыз. Сосын поршеньді басуды ұдайы аздап күшейте отырып, ерітіндіні баяу енгізе бастаңыз. Еккіштегі ерітіндіні түгел енгізіңіз (4 суретті қараңыз).

4 сурет

Ерітінді түгел енгізілгеннен кейін, инені теріден суырып алыңыз. Инені енгізу жүргізген кездегідей бұрыш жасап, шығарып алыңыз. Инъекция жасалған жер аздап қанауы мүмкін. Инъекция жасалған жерге мақта немесе дәке тампонды 10 секунд басып тұрыңыз. Енгізген жерді сүртпеңіз. Қажет болса, енгізілген жерге таңғыш салуға болады.

Қалдықтарды жою

Алдын ала толтырылған еккіш тек бір рет қолдануға арналған.

Еккіш пен инені ЕШҚАШАН қайта пайдаланбаңыз. Инеге қалпағын ЕШҚАШАН қайтадан кигізбеңіз. Ине мен еккішті Сіздің дәрігеріңіздің немесе медбикеңіздің берген нұсқауларына сәйкес жойыңыз.

Егер Сіздің сұрақтарыңыз бар болса, Энбрел препаратымен жұмыс істейтін дәрігерге немесе медбикеге жүгініңіз.

Жағымсыз әсерлері

Өте жиі (>1/10)

- жұқпалар (жоғарғы тыныс жолдары жұқпаларын, циститтерді, тері жұқпаларын қоса)

- инъекциядан кейінгі жергілікті реакциялар (қан кетуді, теріастылық гематома түзілуін, эритема, қышыну, ауыру, ісінуді қоса)

Жиі (> 1/100, < 1/10)

- аллергиялық реакциялар, аутоантиденелердің түзілуі

- қышыну

- қызба

Жиі емес (>1/1000, <1/100)

- күрделі жұқпалар (пневмония, флегмона, сепсистік артрит, сепсисті қоса)

- тромбоцитопения

- өкпенің интерстициальді аурулары (пневмонит пен өкпе фиброзын қоса)

- меланомаға жатпайтын тері обыры (МЖПТО), есекжем, бөртпе, псориаз (ауру дебютін және негізінен табандар мен алақандардың пустулезді зақымдануын қоса)

- увеит

Сирек (>1/10.000, <1/1000)

- туберкулез, оппортунистік жұқпалар (инвазиялық, зеңді, протозойлық, бактериялық және атипиялық микобактериялық жұқпаларды қоса)

- анемия, лейкопения, нейтропения, панцитопения

- меланома

- ауыр аллергиялық/анафилактикалық реакциялар (ангионевротикалық ісінуді, бронх түйілуін қоса)

- құрысулар, жайылған склерозда немесе көру жүйкесінің невриті және көлденең миелит сияқты жергілікті демиелинизация жағдайында байқалғандармен ұқсас ОЖЖ демиелинизация құбылыстары

- бауыр ферменттері белсенділігінің жоғарылауы, аутоиммундық гепатит

- васкулиттің терілік түрлері (лейкоцитокласты васкулитті қоса), Стивенс-Джонсон синдромы, мультиформалы эритема

- жеделге жуық қызыл жегінің терілік көріністері, дискоидты қызыл жегі, жегі тәрізді синдром

- іркілісті жүрек жеткіліксіздігі (ЖІЖ) ағымының нашарлауы

Өте сирек (<1/10.000)

- апластикалық анемия

- уытты эпидермалық некролиз

Бірлі-жарым жағдайлар (жиілігін анықтау мүмкін емес)

- макрофагтардың белсенділену синдромы

- Меркель жасушаларынан болатын карцинома

- анти-нейтрофильді цитоплазмалық серопозитивті васкулит

Қосымша ақпарат

Ересектердегі жағымсыз реакциялар

Ревматоидты артриті бар науқастарда, бақыланатын клиникалық зерттеулер барысында жағымсыз реакциялар дамуына орай, препаратты тоқтату жиілігі Энбрел мен плацебо алған емделушілерде салыстырмалы болды. Энбрелмен емделу аясында ең көп таралғандары препаратты енгізген жердегі реакциялар болды.

Балалардағы жағымсыз реакциялар

Ювенильді идиопатиялық полиартриті бар балалардағы жағымсыз реакциялар жиілігі мен түрлері ревматоидты артриті бар ересек емделушілерде байқалғандарына ұқсас болды. Ересектерден айырмашылықтары және қосымша деректері төменде берілген.

Ювенильді идиопатиялық артриті бар емделушілердегі клиникалық зерттеулерде байқалған жұқпалар айқындылығы жеңіл және орташа дәрежеде болды, ал олардың түрлері әдетте амбулаторлық науқастар арасында кездескендеріне қайшы келген жоқ. Ауыр қолайсыз құбылыстар туралы хабарламаларда асқынусыз басылған асептикалық менингит симптомдарымен желшешек, аппендицит, гастроэнтерит, депрессия/ тұлғалық бұзылыстар, терінің ойық жаралары, эзофагит/гастрит, А тобы стрептококктары туғызған асептикалық шок, І типті қант диабеті және жұмсақ тіндердің жұқпалары мен операциядан кейінгі жаралар қамтылды. Осы емделушілерде макрофагтардың белсенділену синдромы жөнінде 4 хабарлама тіркелген.

Псориазға шалдыққан балалардағы жағымсыз реакциялар жиілігі мен түрлері ересек емделушілерде байқалғандарымен ұқсас болды.

Қолдануға болмайтын жағдайлар

- этанерцепт немесе дәрілік түрдің кез келген басқа компонентіне жоғары сезімталдық

- сепсис немесе сепсистің пайда болу қаупі

- белсенді жұқпа, созылмалы немесе оқшауланған жұқпаларды (соның ішінде туберкулез) қоса

- жүктілік және лактация кезеңі

- дене салмағы 62,5 кг-ден аз емделушілер

Сақтықпен

Демиелинизациялаушы аурулар, іркілісті жүрек жеткіліксіздігі, иммунитет тапшылығы жағдайлары, қан дискразиясы, жұқпалардың дамуына немесе белсенділенуіне бейім аурулар (қант диабеті, гепатиттер және т.б.).

Дәрілермен өзара әрекеттесуі

Энбрелді анакинрамен үйлестіріп қолдану

Ересек емделушілерде Энбрел мен анакинраны біріктіріп емдеу аясында, тек Энбрел енгізілген емделушілермен салыстырғанда, күрделі жұқпалар және нейтропения жиілігінің едәуір жоғарылауы байқалды.

Энбрел мен анакинраны бірге қабылдау клиникалық артықшылықтарын көрсетпеген, сондықтан да ұсынылмайды.

Энбрелді абатацептпен үйлестіріп қолдану

Абатацепт пен Энбрелді бір мезгілде тағайындау күрделі қолайсыз құбылыстар жиілігінің ұлғаюымен қатар жүрді. Дәрілік препараттардың осы біріктірілімінің клиникалық артықшылықтары көріністелмеген, сондықтан да ұсынылмайды.

Энбрелді сульфасалазинмен үйлестіріп қолдану

Сульфасалазинмен емделу аясында Энбрел енгізілген науқастарда, тек Энбрелді немесе сульфасалазинді ғана қабылдаған емделушілермен салыстырғанда, лейкоциттердің орташа санының едәуір азаюы баяндалған.

Өзара әрекеттесудің болмауы

Энбрел глюкокортикостероидтармен, салицилаттармен (сульфасалазинді қоспағанда), қабынуға қарсы стероидты емес препараттармен (ҚҚСП), анальгетиктермен бірге тағайындалғанда қолайсыз өзара әрекеттесу байқалмаған.

Метотрексат

Метотрексат этанерцепт фармакокинетикасына ықпалын тигізбейді. Энбрелдің метотрексат фармакокинетикасына ықпалы адамда зерттелмеген.

Дигоксин

Фармакокинетикасына клиникалық тұрғыдан өзара ықпал етуі байқалмаған.

Варфарин

Фармакокинетикасына клиникалық мәнді өзара ықпалы болмаған.

Вакцинация

Энбрелмен емделу аясында тірі вакциналар енгізуге болмайды. Энбрел алатын емделушілерге тірі вакцина арқылы жұқпаның екінші қайтара жұғуы жөнінде деректер жоқ. Ювенильді идиопатиялық артриті бар емделушілер Энбрелмен емделу басталғанша, егер мүмкін болса, екпелердің қолданымдағы ұлттық күнтізбесіне сәйкес барлық екпелерді алуға кеңес беріледі.

Айрықша нұсқаулар

Жұқпалар

Науқастар Энбрел тағайындалғанша, емделу барысында және Энбрелмен емдеу курсы аяқталғаннан кейін шамамен 80 сағатқа (7-300 сағат) тең болатын этанерцепт жартылай шығарылу кезеңінің орташа ұзақтығын ескеріп, жұқпаның бар-жоғы тұрғысынан тексерілуі тиіс.

Энбрел пайдаланылғанда сепсис, туберкулез және ауыр жұқпалар, соның ішінде инвазиялық зеңді жұқпаларды қоса, оппортунистік жұқпалар жөнінде хабарланды. Науқастарды тексергенде оларда оппортунистік жұқпалардың, мысалы, эндемиялық микоздардың дамуы мүмкін екеніне көңіл бөлу керек.

Энбрелмен емделу аясында жаңа жұқпалар дамыған емделушілер мұқият бақылауда болуы тиіс. Егер емделушіде ауыр жұқпа дамыса, Энбрел қабылдауды үзген жөн. Энбрелді сыртартқысында жиі немесе созылмалы жұқпалары бар немесе негізгі ауруы, мысалы, үдемелі немесе жұқпа дамуына ықпал ететін нашар бақыланатын диабеті болған емделушілерге мейлінше сақтықпен тағайындау керек.

Созылмалы жұқпалары бар емделушілердегі Энбрел қауіпсіздігі мен тиімділігі бағаланбаған.

Туберкулез

Белсенді туберкулез жағдайларына милиарлы туберкулез және өкпеден тыс туберкулез жатады.

Энбрел тағайындалғанша барлық науқастар белсенді немесе жасырын туберкулез тұрғысынан тексеруден өтуі тиіс. Тексеруде туберкулез ауруына қатысты медицина тарихын немесе бұрын туберкулезбен ауырған науқастармен болған қарым-қатынасты жіті зерттеу және осыған дейінгі немесе ағымдағы иммуносупрессиялық ем туралы деректер қамтылуы тиіс.

Науқастардың бәрінде тиісті скрининг шаралары (жергілікті талаптарға сәйкес), атап айтқанда, теріге туберкулиндік тест және өкпе рентгенографиясы жасалуы тиіс. Туберкулиндік тестінің, әсіресе, ауыр науқастарда немесе иммуно-скомпрометирленген статусы бар емделушілерде жалған-теріс болуы мүмкін екенін ескеру керек.

Белсенді туберкулез диагностикаланған жағдайда Энбрел тағайындалмауы тиіс. Белсенді емес туберкулез диагнозында Энбрелмен емдеуді бастар алдында туберкулезге қарсы стандартты ем тағайындау жорамалданады. Мұндай жағдайда Энбрелмен емдеудің пайда және қауіп арақатынасына тиянақты талдау жасалуы тиіс.

Барлық науқастар Энбрелмен емделу аясында немесе одан кейін туберкулезге тән шағымдар немесе симптомдар (мысалы, тоқтаусыз жөтел, салмақ жоғалту, субфебрилитет) білінгенде дәрігерге қаралудың мақсатқа болатынынан ақпараттануы тиіс.

В гепатиті вирусының белсенділенуі

Энбрелді қоса, ІНФ-α тежегіштерін алатын тасымалдаушы науқастарда В гепатиті вирусының белсенділену жағдайлары хабарланды. Энбрелді В гепатитімен аурудың жоғары қауіп тобына кіретін науқастарға тағайындар алдында тиісті диагностикалық ізденіс жүргізу қажет. Энбрелді В гепатиті вирусын тасымалдаушы науқастарға тағайындағанда ерекше сақ болу керек. Оларда осы ауру симптомдары білінгенде спецификалық ем жүргізу мүмкіндігі талқыланады.

С гепатитінің өршуі

Нақты себеп-салдарлы байланысы анықталмаса да, Энбрелмен емделу кезінде С гепатитінің өршу жағдайлары тіркелген.

Аллергиялық реакциялар

Аллергиялық реакциялар Энбрел қабылдаумен жиі қатарласады. Аллергиялық, соның ішінде ауыр ағымды реакцияларға ангионевротикалық ісіну және есекжем жатады. Кез келген ауыр аллергиялық немесе анафилактикалық реакцияларда Энбрел қабылдауды дереу тоқтатып, тиісті ем қабылдауды бастаған дұрыс.

Иммуносупрессия

Анти-ІНФ-α, соның ішінде Энбрелмен емдеуде, адам организмінің жұқпаларға және қатерлі жаңа түзілімдерге қарсы қорғаныс механизмдері бәсеңдеу мүмкіндігі бар, өйткені ІНФ-α қабыну үдерісіне қатысады және жасушалық иммундық жауапты түрлендіреді.

Алайда ревматоидты артриті бар ересек науқастарда Энбрелмен емделу аясында кеш білінетін аса жоғары сезімталдық бәсеңсіген, иммуноглобулин деңгейі түсіп кеткен немесе эффектор-жасушалар тобы саны жағынан өзгерген жағдайлар анықталмаған.

Ювенильді идиопатиялық артриті бар балаларда сирек жағдайларда асқынусыз басылған желшешек және асептикалық менингит симптомдары дамыды. Бұрын желшешекке шалдыққандармен қарым-қатынаста болған емделушілерде Энбрел қабылдауды уақытша тоқтатып, Varicella Zoster вирусына қарсы иммуноглобулинмен алдын алу емін тағайындау керек.

Қатерлі және лимфопролиферациялық аурулар

Постмаркетингтік кезеңде әртүрлі қатерлі жаңа түзілімдер (сүт безінің және өкпенің карциномасын, сондай-ақ лимфоманы қоса) туралы есептер алынды.

Лимфома ІНФ-α тежегіштерін қабылдайтын емделушілерде оларды алмаған науқастардағыдан жиірек диагностикаланды. Басқа жағынан алғанда, бұл жағдайлар сирек болды, ал плацебо-топтағы науқастарды бақылау кезеңі ІНФ-α тежегіштерімен ем алып жүрген емделушілердегіден қысқа болды. Оның үстіне, ұзаққа созылған ревматоидты артриті, белсенділігі жоғары қабыну ауруы бар емделушілерде лимфоманың пайда болу қаупі жоғары болады, ол қауіптің бағалануын қиындатады. Қазіргізамандық ілімдерге сәйкес, ІНФ-α тежегіштерін алатын емделушілерде лимфомалардың немесе басқа қатерлі жаңа түзілімдердің даму қаупінің болуы мүмкін екенін жоққа шығаруға болмайды.

Меланомаға жатпайтын тері обыры (МЖТО)

Энбрелді қоса, ІНФ-α тежегіштерімен ем алып жүрген науқастарда МЖТО тіркелген. МЖТО көбінесе псориазы бар науқастарда анықталды. Қауіп тобына кіретін барлық емделушілер үшін тері жабындарын жүйелі тексеріп отыру ұсынылады.

Аутоиммундық антиденелер түзілуі

Энбрелмен емдеу аутоиммундық антиденелердің түзілуімен қатар жүруі мүмкін. Бұл антиденелер бейтараптандырушыларға жатпайды және әдетте тез жоғалады. Антиденелердің түзілуі мен препараттың клиникалық тиімділігі, сондай-ақ жағымсыз реакциялардың даму жиілігі арасында өзара байланыс болмаған. Оң ревматоидты факторы бар ревматоидты артритке шалдыққандарды қоса, науқастарда жегі тәрізді синдроммен немесе қызыл жегінің баяу өрбитін түріне немесе қызыл жегінің дискоидты түріне ұқсас бөртпемен біріккен қосымша аутоантиденелер түзілген бірлі-жарым жағдайлар (клиникалық тексеру және биопсия деректері) байқалды.

Гематологиялық реакциялар

Энбрел алатын емделушілерде панцитопенияның сирек жағдайлары және апластикалық анемияның, соның ішінде өліммен аяқталған өте сирек жағдайлары хабарланды. Энбрелді сыртартқысында қан дискразиясы бар емделушілерге тағайындағанда сақтық таныту керек. Барлық емделушілерге, олардың туысқандары/күтіп-бағушыларына, егер емделушіде Эмбрел қабылдау кезінде жұқпаларға және гематологиялық бұзылуларға тән белгілер мен симптомдар (мысалы, ұзаққа созылған қызба, баспа, көгерулер, қан кету, бозару) дамыса, олардың медициналық жәрдемге жүгінгендері жөн екені мәлім болуы тиіс. Мұндай емделушілерде, толық қан талдауын қоса, тексеру өткізу ұсынылады. Дискразия диагнозы расталғанда Энбрелмен емдеуді тоқтату керек.

ОЖЖ зақымдануы

Энбрел алатын ересек емделушілерде демиелинизациядан туындаған ОЖЖ бұзылуының бірнеше жағдайлары тіркелген. Энбрел жайылған склерозы бар науқастарда зерттелмесе де, басқа да ІНФ тежегіштерін осы қатарласқан ауру тұсында зерттеу оның өршуі мүмкін екенін көрсетті.

Осының алдында немесе таяуда демиелинизациялаушы ауру ұстамасы болған немесе демиелинизациялаушы аурудың даму қаупі жоғары емделушілерде Энбрелді тағайындар алдында, неврологиялық статусты қоса, қауіп/артықшылығын тиянақты бағалау ұсынылады.

Біріктірілген ем

Энбрел мен метотрексат біріктірілімі қауіпсіздігін зерттегенде күтпеген нәтижелер бермеген. Осы көрсеткішті ұзақ мерзімді зерттеу жалғасуда. Метотрексатпен бірге тағайындалған Энбрел қауіпсіздігі туралы деректер әр бөлек алынған Энбрел мен метотрексаттың қауіпсіздігі жөніндегі жүйелі есептер деректеріне ұқсас болды. Энбрелді басқа ҚҚБП-мен қабылдау кезінде ұзақ мерзімді қауіпсіздігі зерттелмеген.

Іркілісті жүрек жеткіліксіздігі (ІЖЖ)

ІЖЖ бар емделушілерге Энбрел тағайындауға қатысты сақтану шараларын қабылдау керек. Бірқатар зерттеулер деректері Энбрел алатын емделушілерде ІЖЖ ағымының нашарлауы мүмкін деп болжам жасауға мүмкіндік береді.

Алкогольді гепатит

Энбрелді ауру ағымы орташа-ауыр және ауыр өтетін алкогольді гепатиті бар емделушілерге тағайындағанда ерекше сақтық таныту керек.

Вегенер гранулематозы

Энбрел алған науқастарда теріден тыс орналасқан әртүрлі типтегі қатерлі ісіктердің даму жиілігі бақылау тобынан едәуір жоғары болды. Сондықтан Энбрел Вегенер гранулематозымен науқастарды емдеу үшін ұсынылмайды.

Диабетпен науқастардағы гипогликемия

Диабетті емдеуге арналған препараттар алған емделушілерде Энбрелмен емдеу басталғаннан кейін гипогликемия жағдайлары хабарланды. Бұл кейбір науқастарда диабетке қарсы препараттар қабылдауды қысқарту қажеттілігін туындатты.

Ювенильді идиопатиялық артритпен (ЮИА) науқастардағы ішектің қабыну аурулары (ІҚА)

Энбрелмен ем алған ЮИА бар емделушілерде ішектің қабыну аурулары хабарланған. Ішек қабынуының клиникалық көріністері ЮИА бар емделушілерді емдемеген кездеде байқалғанмен, Энбрелмен себепті-салдарлы байланысы айқындалмаған.

Жүктілік және лактация кезеңі

Жүкті әйелдерге Энбрелмен емдеу ұсынылмайды, өйткені осы препаратты жүкті әйелдерде қолдану тәжірибесі жоқ. Бала туу жасындағы әйелдерге Энбрелмен емделу кезінде жүктілікті жоспарлауға болмайды.

Этанерцепттің емшек сүтімен бірге бөлініп шығуы белгісіз. Иммуноглобулиндер, басқа да көптеген препараттар сияқты, адамның сүтімен бөлінуі мүмкін екендіктен, не бала емізуді тоқтату, не емшекпен қоректендіру кезінде Энбрел қабылдауды тоқтату керек.

Дәрілік заттың көлік құралын және қауіптілігі зор басқа механизмдерді басқару қабілетіне әсер ету ерекшеліктері

Автокөлікті және күрделі механизмдерді басқару қабілетіне әсер етуіне зерттеулер жүргізілмеген.

Артық дозалануы

Ревматоидты артриті бар емделушілерді емдегенде шектік уытты дозасынан асырылуы тіркелмеген. Көктамыр ішіне енгізілген ең жоғары дозасы 32 мг/м2 құрап, кейіннен аптасына екі рет тері астына 16 мг/м енгізуге ұласқан. Ревматоидты артриті бар бір емделуші өз бетінше 3 апта бойы аптасына екі рет тері астына 62 мг Энбрелді қателесіп енгізгенде қолайсыз әсерлері білінбеген.

Симптомдары: жағымсыз әсерлердің күшеюі.

Емі: симптоматикалық. Энбрелге арналған арнайы у қайтарғы белгісіз.

Шығарылу түрі және қаптамасы

Екі қабатты қалпақшамен жабылған тот баспайтын болат инемен, саусаққа арналған пластик тірекпен және резеңке тығыздағышы бар шток-поршенмен жабдықталған мөлдір, түссіз шыныдан (І тип) жасалған бір рет пайдалануға арналған еккіштерде 0,5 мл (25 мг) немесе 1,0 мл (50 мг) препараттан.

4 еккіштен жеке қапталған 4 спирт сүрткісімен жиынтықта алюминий фольгамен баспаланған пластик қаптамада.

1 пластик қаптамадан медицинада қолданылуы жөнінде мемлекеттік және орыс тілдеріндегі нұсқаулықпен бірге картон пәшкеге салынған.

Сақтау шарттары

2 оС-ден 8 °С-ге дейінгі температурада сақтау керек. Мұздатып қатыруға болмайды.

Балалардың қолы жетпейтін жерде сақтау керек!

Сақтау мерзімі

3 жыл

Қаптамасында көрсетілген жарамдылық мерзімі өткеннен кейін пайдалануға болмайды.

Дәріханадан босатылу шарттары

Рецепт арқылы

Өндіруші

Пфайзер Ирландия Фармасьютикалс,

Грейндж Касл Бизнес ПаркКлондалкинДублин 22, Ирландия

Қаптаушы:

Вайет Фармасьютикалc

Нью Лэйн, Хавант, Хэмпшир, P09 2NG,

Ұлыбритания

Тіркеу куәлігінің иесі

Пфайзер Эйч Си пи Корпорэйшн, АҚШ

Қазақстан Республикасы аумағында тұтынушылардан өнім сапасына қатысты шағымдар қабылдайтын ұйымның мекенжайы:

«Пфайзер Эйч-Си-Пи корпорэйшн» (АҚШ) компаниясының өкілдігі

Алматы қ., Абылай хан д-лы, 141

тел. (727) 272-27-01

факс (727) 272-04-06