Эмерон (Нимесулид)

Эмерон

Нимесулид

Дәрілік түрі, дозасы

Ішке қабылдау үшін суспензия дайындауға арналған түйіршіктер, 100 мг

Бұлшықет-қаңқа жүйесі. Қабынуға қарсы және ревматизмге қарсы препараттар. Қабынуға қарсы және ревматизмге қарсы стероидты емес препараттар. Басқа қабынуға қарсы стероидты емес және ревматизмге қарсы препараттар. Нимесулид

АТХ коды: M01AX17

- жедел ауырсынуларды емдеу

- бастапқы дисменореяны емдеу.

Эмерон препаратын екінші қатардағы препарат ретінде ғана тағайындау қажет. Нимесулидпен емдеу туралы шешім әрбір пациент үшін барлық қауіптерді бағалау негізінде қабылдануы тиіс.

Қолдануды бастағанға дейін қажетті мәліметтер тізбесі

- әсер етуші затқа немесе 6.1-бөлімде атап көрсетілген қосымша заттардың кез келгеніне аса жоғары сезімталдық

- ацетилсалицил қышқылын немесе басқа да қабынуға қарсы стероидты емес препараттарды (ҚҚСП) қабылдауға байланысты бұрын байқалған аса жоғары сезімталдық реакциялары (мысалы, бронх түйілуі, есекжем, ринит, мұрындағы полиптер)

- бұрын болған нимесулидке гепауытты реакциялар

- бауыр үшін әлеуетті уытты басқа дәрілерді қатар қабылдау, алкоголизм, есірткіге тәуелділік

-алдыңғы ҚҚСП емдеумен байланысты анамнездегі асқазан-ішектен қан кетулер немесе тесілу

- асқыну сатысындағы асқазанның немесе он екі елі ішектің ойық жарасы, анамнезде ойық жараның, тесілудің немесе асқазан-ішек жолында қан кетудің болуы

- цереброваскулярлық қан кетулер немесе қан ұюының басқа да жедел бұзылулары

- қан ұюының ауыр бұзылулары

- ауыр жүрек жеткіліксіздігі

- ауыр бүйрек жеткіліксіздігі

- бауыр жеткіліксіздігі

- қызба және/немесе тұмау симптомдары бар пациенттер

- 12 жасқа дейінгі балалар

- жүктіліктің үшінші триместрі және бала емізу кезеңі

- тұқым қуалайтын фруктозаны көтере алмаушылық немесе глюкоза-галактоза мальабсорбциясы.

Қолданған кездегі қажетті сақтық шаралары

Нимесулидті басқа ҚҚСП-мен, оның ішінде циклооксигеназа-2 селективті тежегіштерімен бірге қолданудан аулақ болу керек. Екі ҚҚСП бір мезгілде қолдануға жол берілмейді. Эмерон препаратымен емдеу кезінде пациент басқа анальгетиктерді қабылдаудан бас тартуы керек.

Бақыланбайтын артериялық гипертензиясы, іркілісті жүрек жеткіліксіздігі, анықталған жүрек ишемиясы диагнозы, шеткері артерия аурулары, цереброваскулярлық аурулары бар пациенттерді пайда/қауіп арақатынасын мұқият қарастырғаннан кейін ғана Эмерон препаратымен емдеуге болады.

Осындай тәсіл жүрек-қан тамырлары ауруларының (мысалы, артериялық гипертензия, гиперлипидемия, қант диабеті және темекі шегу) қауіп факторлары бар пациенттерді ұзақ емдеуді бастар алдында қажет.

Нимесулид тромбоциттердің функциясын бұзуы мүмкін болғандықтан, геморрагиялық диатезі бар пациенттерде оны сақтықпен қолдану керек, бірақ жүрек-қантамыр ауруларының алдын алу үшін Эмерон ацетилсалицил қышқылын алмастыра алмайды.

Осы пациенттер үшін, сондай-ақ асқазан-ішектің жағымсыз әсерлерінің қаупін арттыратын ҚҚСП тобындағы аспириннің немесе басқа да препараттардың төмен дозаларын қабылдайтын пациенттер үшін қорғағыш құралдарын (мизопростол немесе протонды помпа тежегіштері) қолдану мүмкіндігін қарастыру қажет.

Эмерон препаратын асқазан-ішек жолдарының аурулары, оның ішінде пептидтік ойық жарасы бар, анамнезінде асқазан-ішек жолынан қан кету , спецификалық емес ойық жаралы колит және Крон аурулары бар пациенттерге сақтықпен тағайындау керек, өйткені бұл аурулар өршуі мүмкін.

Басқа дәрілік препараттармен өзара әрекеттесуі

Басқа да қабынуға қарсы стероидты емес препараттар (ҚҚСП): құрамында нимесулид бар дәрілік заттарды кез келген қабынуға қарсы дозаларда ацетилсалицил қышқылын қоса, басқа ҚҚСП-мен бір мезгілде қолдану ұсынылмайды (бір қабылдауға ≥1 г немесе жалпы тәуліктік дозада ≥ 3 г).

Антикоагулянттар: ҚҚСП варфарин сияқты антикоагулянттардың әсерін күшейтуі мүмкін. Варфаринді, осы тектес антикоагулянттарды немесе ацетилсалицил қышқылын қабылдайтын пациенттерде нимесулидпен бір мезгілде қолданғанда қан кетудің даму қаупі жоғары, сондықтан осы біріктірілімді қолдану ұсынылмайды, ал қан ұюының ауыр бұзылулары бар пациенттерге оны қолдануға болмайды. Егер біріктірілген емді болдырмау мүмкін болмаса, қанның ұю көрсеткіштерін мұқият бақылау қажет.

Антиагреганттар мен серотонинді кері қармайтын селективті тежегіштер (СКҚСТ): антиагреганттар мен СКҚСТ асқазан-ішек жолынан қан кету қаупін арттырады.

Диуретиктер, ангиотензин-өзгертуші фермент (АӨФ) тежегіштері, ангиотензин II антагонистері: ҚҚСП диуретиктер мен басқа да гипотензивті препараттардың тиімділігін төмендетуі мүмкін. Бүйрек функциясы төмендеген кейбір пациенттерде (мысалы, сусыздану кезінде немесе бүйрек функциясы бұзылған егде пациенттерде), ҚҚСП-ны АӨФ тежегіштерімен немесе ангиотензин II рецепторларының блокаторларымен бір мезгілде тағайындау бүйрек функциясының нашарлауын (жедел бүйрек жеткіліксіздігіне дейін) туындатуы мүмкін, ол негізінен қайтымды сипатқа ие. Препараттардың бұл біріктірілімі әсіресе егде жастағы пациенттерге сақтықпен тағайындалуы керек.

Пациенттер сұйықтықтың жеткілікті мөлшерін алуы тиіс және біріктірілген ем басталғаннан кейін және оны жүргізу процесінде кезең-кезеңімен бүйрек функциясын бақылау қажеттілігін анықтау керек.

Диуретиктер: дені сау еріктілерде нимесулид натрийдің шығарылуына және аз дәрежеде калийдің шығарылуына фуросемидтің әсерін уақытша төмендетіп, несеп айдайтын әсерін азайтты.

Бүйрек немесе жүрек жеткіліксіздігі бар пациенттерде фуросемид пен Эмерон препаратын бір мезгілде қолданғанда сақтық қажет.

ҚҚСП литий клиренсін төмендетеді, бұл плазмадағы литий деңгейінің жоғарылауына және оның уытты әсерінің дамуына әкеледі. Эмерон препаратын литий препараттарын бір мезгілде қабылдайтын пациенттерге тағайындаған кезде қан плазмасындағы литий деңгейіне жиі бақылау жүргізу қажет.

Басқа ақпарат

Глибенкламидпен, теофилинмен, варфаринмен, дигоксинмен, циметидинмен және антацидтік препараттармен (мысалы, алюминий және магний гидроксидінің біріктірілімі) ықтималды өзара әрекеттесуін анықтау мақсатында зерттеулер жүргізілді. Клиникалық маңызды өзара әрекеттесу байқалмады.

Нимесулид CYP2C9 басады. Нимесулидпен бір мезгілде қолданғанда осы ферменттің субстраты болып табылатын препараттардың плазмадағы концентрациясы жоғарылауы мүмкін.

Эмерон препаратын метотрексатты қолданудан 24 сағат бұрын немесе одан кейін тағайындағанда сақ болу керек, өйткені мұндай жағдайларда плазмадағы метотрексат деңгейі жоғарылауы және оның уытты әсерін тудыруы мүмкін.

Бүйрек простагландиндеріне әсер етуіне байланысты, оларға нимесулид те жататын простагландинсинтетаза тежегіштері циклоспориндердің нефроуыттылығын арттыруы мүмкін.

Зерттеулер көрсеткендей, нимесулид толбутамид, салицил және вальпрой қышқылымен байланысқан жерлерден шығарылады. Алайда, оның плазмадағы деңгейіне ықтималды әсеріне қарамастан, осы өзара әрекеттесулердің клиникалық маңыздылығы анықталған жоқ.

Кортикостероидтар: кортикостероидтар асқазан-ішек жолынан ойық жаралар мен қан кетудің даму қаупін арттырады.

Арнайы ескертулер

Жағымсыз әсерлерді симптомдарды бақылау үшін қажетті ең аз қолдану ұзақтығымен ең төмен тиімді дозаны пайдалану арқылы азайтуға болады және ешқандай жағдайда 15 күннен аспайды. Егер оң нәтиже болмаса, емдеуді тоқтатыңыз.

Бауырға әсері: сирек жағдайларда құрамында нимесулид бар дәрілік заттарды қолданумен байланысты өліммен аяқталудың өте сирек жағдайларын қоса, бауыр тарапынан күрделі реакциялар хабарланды. Эмерон препаратымен емдеу кезеңінде бауырдың зақымдану симптомдарына ұқсас симптомдары (мысалы, анорексия, жүрек айну, құсу, іштің ауыруы, қажу, несептің күңгірттенуі) байқалатын пациенттерге, сондай-ақ бауыр функциясының зертханалық көрсеткіштерінің қалыпты мәндерінен ауытқулары бар пациенттерге препаратты қабылдауды тоқтату қажет. Нимесулидті мұндай пациенттерге қайта тағайындауға болмайды. Бауырдың зақымдануы туралы хабарланды (көп жағдайда қайтымды), тіпті препараттың қысқа мерзімді әсерінен кейін.

Басқа ҚҚСП-ны бір мезгілде қолдану: нимесулидті басқа ҚҚСП-мен, оның ішінде циклооксигеназа-2 селективті тежегіштерімен бірге қолданудан аулақ болу керек. Екі ҚҚСП бір мезгілде қолдануға жол берілмейді. Нимесулидті қолдану кезеңінде тұмауға немесе суық тиюге ұқсас симптомдар дамыған пациенттер препаратты қабылдауды тоқтатып, шұғыл түрде дәрігерге қаралуы тиіс.

Асқазан-ішек жолына әсері: барлық ҚҚСП қолдануға байланысты асқазан-ішек жолдарынан қан кету, ойық жара және тесілуі туралы хабарланған болатын (оның ішінде өліммен аяқталған), олар емдеудің кез келген уақытында дамуы мүмкін және симптомдармен-ізашарлармен немесе оларсыз, анамнезінде асқазан-ішек жолы тарапынан күрделі бұзылулар немесе оларсыз пациенттің өміріне қауіп төндіруі мүмкін. Егде жастағы адамдарда және анамнезінде лейкемиясы бар пациенттерде, әсіресе егер ол қан кетумен немесе тесілумен асқынған болса, асқазан-ішектен қан кету, ойық жара немесе тесілу қаупі ҚҚСП-ның барынша жоғары дозаларында көбірек болады. Бұл пациенттерді ең төменгі тиімді дозамен емдеуді бастау қажет.

Бір мезгілде қолдану: осы пациенттер үшін, сондай-ақ асқазан-ішектің жағымсыз әсерлерінің қаупін арттыратын ҚҚСП тобындағы аспириннің немесе басқа да препараттардың төмен дозаларын қабылдайтын пациенттер үшін қорғағыш құралдарын (мизопростол немесе протонды помпа тежегіштері) қолдану мүмкіндігін қарастыру қажет.

Егде жастағы адамдар: егде жастағы пациенттерде жағымсыз реакциялардың, әсіресе асқазан-ішектен қан кету және тесілуінің жоғарылауы байқалады, олар өлімге әкелуі мүмкін.

Анамнезінде ерекше асқазан-ішек уыттылығының көріністері бар пациенттер, әсіресе егде жастағы адамдар, әсіресе емдеудің басында, асқазан-ішек жолы тарапынан кез келген ерекше симптомдар туралы (әсіресе асқазан-ішектен қан кету туралы) хабарлауы тиіс.

Ойық жараның немесе қан кетудің даму қаупін арттыруы мүмкін препараттарды бір мезгілде қабылдайтын пациенттерге сақтықпен қарау керек, мысалы, пероральді кортикостероидтар, варфарин сияқты антикоагулянттар, серотонинді кері қармайтын селективті тежегіштер немесе аспирин сияқты антиагреганттар.

Нимесулид қабылдайтын пациенттерде асқазан-ішек жолының қан кетуі немесе ойық жарасы дамыған жағдайда Эмерон препаратымен емдеуді дереу тоқтатып, шұғыл түрде дәрігерге қаралуқажет .

Жүрек-қантамыр және цереброваскулярлық жүйелер тарапынан бұзылулар: анамнезінде артериялық гипертензиясы немесе нимесулидті қолдану кезінде жеңіл немесе орташа айқын дәрежедегі іркілісті жүрек жеткіліксіздігі бар пациенттерде сұйықтықтың іркілуі және ісінудің дамуы туралы хабарланды.

Клиникалық зерттеулер мен эпидемиологиялық деректер кейбір ҚҚСП (әсіресе жоғары дозалар және ұзақ уақыт) пайдалану артериялық тромбоздың (мысалы, миокард инфарктісі немесе инсульт) шамалы жоғары қаупін беретіндігін көрсетеді. Эмерон үшін мұндай қауіпті болдырмау үшін деректер жеткіліксіз.

Егде жастағы пациенттер: егде жастағы пациенттер асқазан-ішектен қан кетуді және тесілуін, бүйрек, жүрек немесе бауыр жеткіліксіздігін қоса, ҚҚСП жағымсыз әсерлеріне ерекше сезімтал. Сондықтан оларға клиникалық мониторинг жүргізу ұсынылады.

Тері реакциялары: ҚҚСП қолдануға байланысты эксфолиативтік дерматитті, Стивенс-Джонсон синдромын және уытты эпидермальді некролизді қоса, кейбіреуі өте сирек өліммен аяқталған ауыр тері реакциялары туралы хабарланды. Емдеудің бастапқы кезеңдерінде пациенттерде тері реакцияларының қаупі төмен болады, көп жағдайда реакциялардың басталуы емнің бірінші айында байқалады. Тері бөртпесі, шырышты қабықтардың зақымдануы немесе аса жоғары сезімталдықтың кез келген басқа белгілері алғаш пайда болған кезде Эмерон препаратын қабылдауды тоқтатып, шұғыл түрде дәрігерге қаралу қажет.

Фертильділікке әсері: нимесулидті қолдану фертильділікке әсер етуі мүмкін және жүкті болуға тырысатын әйелдерге ұсынылмайды. Ұрықтану проблемалары бар немесе жүктіліктің басталу мүмкіндігіне тексеруден өткен әйелдер Эмерон препаратымен емдеуді тоқтату мүмкіндігін қарастыруы қажет.

Эмерон препаратының құрамында сахароза бар, сондықтан оны тұқым қуалайтын фруктозаның жақпаушылығында, глюкоза/галактоза мальабсорбциясында, сахараза-изомальтаза тапшылығында қолдануға болмайды. Сахарозаның болуына байланысты ұзақ уақыт (екі немесе одан да көп апта) қолданған кезде суспензия тістерге зиянды әсер етуі мүмкін.

Педиатрияда қолдану

Эмерон препаратын 12 жасқа дейінгі балаларға қолдануға болмайды.

Жүктілік немесе лактация кезінде

Жүктілік: Эмерон препаратын жүктіліктің соңғы триместрінде қолдануға болмайды. Эмерон препаратын басқа ҚҚСП сияқты қолдану жүкті болуға тырысатын әйелдерге ұсынылмайды.

Простагландин синтезін басу жүктілікке немесе шарананың дамуына теріс әсер етуі мүмкін. Препаратты жүктіліктің ерте кезеңінде қолданғаннан кейін, зерттеу нәтижелері түсік тастау, жүрек ақаулары және іштің алдыңғы жақтауы ақауларының жоғарылау қаупін көрсетеді. Жүрек ақауының абсолютті даму қаупі 1% - дан шамамен 1,5% - ға дейін өсті. Дозаның жоғарылауымен және емдеу ұзақтығымен қауіп жоғарылайды деп саналады. Эмерон препаратын жүкті әйелдерде қолдану туралы жеткілікті деректер жоқ.

Егер Эмерон препаратын жүкті болуға тырысатын әйел немесе жүктіліктің бірінші немесе екінші триместрінде қабылдаса, дозасы мен емдеу ұзақтығы мүмкіндігінше төмен болуы тиіс.

Жүктіліктің үшінші триместрінде простагландин синтезінің барлық тежегіштері шаранада мыналарды туындатуы мүмкін:

жүрек-өкпе уыттылығы (артериялық түтіктің мерзімінен бұрын жабылуымен және өкпе артериясы жүйесіндегі гипертензиямен);

- судың азаюы дамуымен бүйрек жеткіліксіздігіне дейін үдеуі мүмкін бүйрек функциясының бұзылуы.

Жүктіліктің соңында анасы мен балада:

тіпті өте төмен дозаларды қолданғанда да қан кету уақыты ұзаруы мүмкін;

- жатырдың жиырылу қызметінің бәсеңдеуі, босану ұзақтығының кідіруіне немесе ұзаруына әкеледі.

Сондықтан Эмерон препаратын жүктіліктің үшінші триместрінде қолдануға болмайды.

Бала емізу: Эмерон препаратының емшек сүтімен шығарылатыны белгісіз, сондықтан оны бала емізетін аналарға қолдануға болмайды.

Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Нимесулидтің көлік жүргізу немесе механизмдермен жұмыс істеу қабілетіне әсерін зерттейтін зерттеулер жүргізілген жоқ. Алайда, Эмерон препаратын қабылдағаннан кейін бас айналу және ұйқышылдық дамитын пациенттер автомобильді басқарудан немесе қозғалмалы механизмдермен жұмыс жүргізуден бас тарту керек.

Қолдану жөніндегі нұсқаулар

Дозалау режимі

Жағымсыз жанама әсерлерді барынша азайту үшін емдеудің ең аз ұзақтығында ең аз тиімді дозаны қабылдау керек.

Ересектер: тамақтанғаннан кейін тәулігіне екі рет 1 пакеттен (100 мг нимесулид).

Балалар: құрамында нимесулид бар дәрілік препараттарды 12 жасқа дейінгі балаларға қолдануға болмайды.

Жасөспірімдер (12 жастан 18 жасқа дейін): бұл пациенттер үшін дозаны өзгерту қажет емес.

Бауыр жеткіліксіздігі бар пациенттер: бауыр жеткіліксіздігі бар пациенттер үшін Эмерон препаратын қолдануға болмайды.

Бүйрек жеткіліксіздігі бар пациенттер: жеңіл және орташа айқын бүйрек жеткіліксіздігі бар пациенттерге дозаны түзету талап етілмейді, ауыр бүйрек жеткіліксіздігі бар пациенттерге Эмерон препаратын тағайындауға болмайды.

Енгізу әдісі мен жолы

Ішке қабылдау үшін. Пакеттің ішіндегісін сұйылтып, бір стақан газдалмаған суда араластыру керек. Суспензияны сұйылтқаннан кейін бірден ішу керек.

Емдеу ұзақтығы

Эмерон препаратымен емдеу курсының ең жоғары ұзақтығы-15 күн.

Артық дозаланған жағдайда қабылдануы тиіс шаралар

Симптомдары: ҚҚСП жедел артық дозалану симптомдары әдетте апатиямен, ұйқышылдықпен, жүрек айнуымен, құсумен және эпигастрий аймағындағы ауырсынумен шектеледі, олар әдетте демеуші ем жүргізген кезде қайтады. Асқазан-ішектен қан кету дамуы мүмкін. Сирек жағдайларда артериялық қысымның жоғарылауы, жедел бүйрек жеткіліксіздігі, тыныс алудың бәсеңдеуі және кома болуы мүмкін. ҚҚСП емдік дозаларын қабылдау кезінде және осы препараттардың артық дозалануы кезінде анафилактоидты реакциялардың дамуы туралы хабарламалар келіп түсті.

Емі: ҚҚСП артық дозаланған жағдайда симптоматикалық және демеуші ем жүргізіледі. Спецификалық антидот жоқ. Нимесулидті гемодиализ жолымен шығаруға қатысты деректер жоқ, алайда плазма ақуыздарымен байланыстырудың жоғары деңгейі негізінде (97,5% - ға дейін) препараттың артық дозалануы кезінде диализ тиімділігі аз болады деген қорытынды жасауға болады. Артық дозалану симптомдары болған кезде немесе препараттың үлкен дозасын қабылдағаннан кейін, қабылдағаннан кейінгі алғашқы 4 сағат ішінде пациенттерге құстыру және/немесе белсендірілген көмір (ересектер үшін 60-100 грамм) қабылдауды және/немесе осмостық іш жүргізетін дәрілерді қабылдауды қолдануға болады. Препаратты қан ақуыздарымен байланысу деңгейінің жоғарылауына байланысты қарқынды диурез, несептің сілтіленуі, гемодиализ немесе гемоперфузия тиімсіз болуы мүмкін. Бүйрек пен бауыр функциясын бақылау керек.

Дәрілік препаратты қолдану тәсілін түсіндіру үшін медицина қызметкеріне кеңес алуға жүгіну бойынша ұсынымдар

Дәрілік препаратты қолдану тәсілін түсіндіру үшін медицина қызметкерінен кеңес алу ұсынылады

ДП стандартты қолданған кезде байқалатын жағымсыз реакциялардың сипаттамасы және осы жағдайда қабылдауға тиісті шаралар

Жиі

- диарея, жүрек айнуы, құсу

- бауыр ферменттері деңгейінің жоғарылауы

Жиі емес

- бас айналу, артериялық гипертензия, ентігу, ісіну

- іш қату, метеоризм, асқазан-ішектен қан кету, 12-елі ішектің ойық жарасы және тесілуі, асқазанның ойық жарасы және тесілуі

- қышыну, бөртпе, қатты терлеу .

Сирек

- анемия, эозинофилия, гиперкалиемия

- жоғары сезімталдық

- қорқыныш сезімі, күйгелектік, түнгі қорқынышты түстер

- анық көрмеу

- тахикардия

- геморрагия, артериялық қысымның құбылмалылығы, қан кернеулер

- эритема, дерматит

- дизурия, гематурия

- дімкәстік, астения.

Өте сирек

- тромбоцитопения, панцитопения, пурпура

- бас ауыруы, ұйқышылдық, энцефалопатия (Рейе синдромы), көрудің бұзылуы, вертиго, гипотермия

- демікпе, бронх түйілуі

- гастрит, іштің ауыруы, диспепсия, стоматит, қара нәжіс

- гепатит, өліммен аяқталуды қоса, шұғыл (фульминанттық) гепатит, сарғаю, холестаз

- есекжем, ангионевроздық ісіну, беттің ісінуі, полиформалы эритема, Стивенс-Джонсон синдромы, уытты эпидермальді некролиз

- несеп шығарудың іркілуі, бүйрек жеткіліксіздігі, олигурия, интерстициальді нефрит.

Белгісіз (қолда бар деректер негізінде бағалау мүмкін емес)

- анафилаксия.

Жағымсыз дәрілік реакциялар туындаған кезде медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаны қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей жүгіну қажет

Қазақстан Республикасы Денсаулық сақтау министрлігі Медициналық және фармацевтикалық бақылау комитетінің «Дәрілік заттар мен медициналық бұйымдарды ұлттық сараптау орталығы» ШЖҚ РМК

http://www.ndda.kz

Қосымша мәліметтер

Дәрілік препараттың құрамы

Бір пакеттің ішінде

белсенді зат-нимесулид 100 мг,

қосымша заттар: сахароза, мальтодекстрин, лимон қышқылы, апельсин хош иістендіргіші.

Сыртқы түрінің, иісінің, дәмінің сипаттамасы

Апельсин дәмі бар оңай ағатын сарғыш түйіршіктер.

Суспензиядан кейін - өзіне тән апельсин дәмі бар мөлдір немесе сәл бозаңданатын бозғылт сары суспензия

Шығарылу түрі және қаптамасы

2 г препараттан қағаздан, алюминий және полиэтилен үлбірден жасалған термодәнекерленген үш қабатты пакетке салынған.

30 пакеттен медициналық қолдану жөніндегі қазақ және орыс тілдеріндегі нұсқаулықпен бірге литографталған картон қорапшаға салынады.

Сақтау мерзімі 3 жыл

Жарамдылық мерзімі өткеннен кейін қолдануға болмайды!

25 ºС-ден аспайтын температурада сақтау керек.

Балалардың қолы жетпейтін жерде сақтау керек!

Дәрігердің рецептісі арқылы

Өндіруші туралы мәліметтер

FINE FOODS PHARMACEUTICALS N.T.M. S.p.A, VIA GRIGNANO, 43 –24041 BREMBATE (BG), Италия, тел : +39 035 4821382, эл. пошта info@finefoods.it

Тіркеу куәлігінің ұстаушысы

VEGAPHARM LLP,

Unit 18, 53 Norman Road, Greenwich Centre Business Park, Лондон, SE10 9QF, Ұлыбритания.

тел : +44-203-598-2050,

эл. пошта info@vegapharm.com

Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын және  дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

"Cepheus Medical" (Цефей Медикал) ЖШС: 050000, Қазақстан Республикасы, Алматы Әл-Фараби даңғылы, үй 7, ЖК «Нурлы Тау»,, телефон: +7 (727) 300 69 71, +7 777 175 00 99 (тәулік бойы) электронды пошта: cepheusmedical@gmail.com