Эль Ева 28 дней™

• русский
• қазақша

• Скачать инструкцию медикамента

Саудалық атауы

Эль Ева 28 күнТМ

Халықаралық патенттелмеген атауы

Жоқ

Дәрілік түрі

Қантты қабықпен қапталған таблеткалар

Құрамы

Бір таблетканың құрамында

белсенді заттар: 0.15 мг левоноргестрел,

0.03 мг этинилэстрадиол

Қоңыр түсті бір таблетканың құрамында

белсенді зат: 75 мг темір фумараты,

қосымша заттар: повидон, екі орын басқан кальций фосфаты, жүгері крахмалы, лактоза, тазартылған тальк, магний стеараты, натрий крахмалы гликоллаты, коллоидты сусыз кремний;

қабықтың құрамы: сахароза, шеллак, изопропилді спирт, магний карбонаты, гуммиарабик, титанның қостотығы Е171, ақ ара балауызы, карнауб балауызы, желатин, сансет сары Е110, қанқызыл 4 R, индигокармин Е 132.

Сипаттамасы

Дөңгелек пішінді, екі жақ беті дөңес, ақ түсті қантты қабықпен қапталған таблеткалар.

Дөңгелек пішінді, екі жақ беті дөңес, қоңыр түсті қантты қабықпен қапталған таблеткалар.

Фармакотерапиялық тобы

Жүйелі қолдануға арналған гормональді контрацептивтер. Прогестагендер мен эстрогендер.

ATЖ коды G03AB03

Фармакологиялық қасиеттері

Фармакокинетикасы

Левоноргестрел / Этинилэстрадиол

Сіңуі:

Левоноргестрел ішке қабылдағаннан кейін жылдам және толық сіңеді (биожетімділігі 100%-ға жуық құрайды) және алғашқы өту әсеріне ұшырамайды. Этинилэстрадиол асқазан-ішек жолынан (АІЖ) жылдам сіңеді, бірақ ішек шырышында метаболизмнің күшеюіне орай және бауыр арқылы өткенде этинилэстрадиолдың нақтылы биожетімділігі ішу арқылы қабылдағаннан кейін шамамен 40%-50%-ға жуық құрайды.

Таралуы:

Левоноргестрел плазмада негізінен жыныс гормондарын байланыстыратын глобулинмен байланысады (SHBG). Этинилэстрадиол плазма альбуминдерімен 97% байланысады. Этинилэстрадиол жыныс гормондарын байланыстыратын глобулинмен (SHBG) байланыспайды, бірақ оның синтезін көтермелейді.

Метаболизмі:

Левоноргестрел: плазмада айналатын метаболиттердің көпшілігі, олар 3a, 5β-тетрагидролевоноргестрел сульфаттары, препарат шығарылатын кездегідей негізінен глюкуронидтер түрінде жүреді. Өзгермеген левоноргестрелдің аздаған мөлшері де 17β-сульфат түрінде плазмада айналады. Метаболикалық клиренс жылдамдығы әртүрлі тұлғаларда бірнеше есе ерекшеленуі мүмкін, емделушілердегі левоноргестрел концентрациясының үлкен ауытқуы осымен түсіндіріледі.

Этинилэстрадиол: P450 цитохромы (CYP3A4) ферментінің есебінен 2-гидроксилдену негізгі тотығу реакциясы болып табылады. 2-гидроксиметаболит несеппен және нәжіспен шығарылғанша метилдену және глюкурондану жолымен әріқарай өзгерістерге ұшырайды. P450 цитохромының (CYP3A) деңгейі әртүрлі тұлғаларда айрықша ерекшеленеді, бұл этинилэстрадиолдың 2-гидроксилдену жылдамдығындағы айырмашылықты түсіндіреді.

Шығарылуы:

Левоноргестрел мен оның метаболиттері негізінен несеппен шығарылады. Этинилэстрадиолдың жартылай шығарылу кезеңі шамамен 21.2 + 9.3 сағат құрайды. Этинилэстрадиол несеппен және нәжіспен глюкуронидтер мен сульфаттар түрінде шығарылады, препарат энтерогепатиялық айналымға ұшырайды.

Темір фумараты

Сіңуі: Темір асқазан-ішек жолынан әркелкі және толық емес, негізінен он екі елі және аш ішектен сіңеді. Сіңуі темір тапшылығы болғанда немесе ашқарынға қабылдағанда артады, бірақ темір депосы аса қаныққан кезде төмендейді. Ішке қабылдағаннан кейін темірдің полимальтозды кешенінің сіңуі темір сульфатының сіңуімен салыстырмалы болады.

Метаболизмі және шығарылуы: Сіңгеннен кейін темірдің үлкен бөлігі трансферринмен байланысады және сүйек кемігіне ауысады, онда темір гемоглобин құрамына кіреді; темірдің қалған бөлігі депода ферритин немесе гемосидерин түрінде немесе миоглобин құрамында болады; темірдің аз бөлігі гем-құрамды ферменттер құрамына кіреді немесе трансферринмен байланысқан күйде плазмада болады.

Шығарылуы: организмнен темірдің аздаған мөлшері ғана шығарылады, өйткені гемоглобин молекуласы бұзылғанда босап шығатын үлкен бөлігі қайта пайдаланылады.

Фармакодинамикасы

Эль ЕваТМ 28 күн - ұрықтануға қарсы біріктірілген дәрілер гонадотропиндерді бәсеңдету арқылы әсер етеді. Негізгі әсер ету механизмі овуляцияны бәсеңдету, яғни аналық жасушаның аналық бездерден шығуын бәсеңдету болып саналса да, сонымен бірге препарат жатыр мойыны шырышының сипатты өзгерісін (бұл сперманың жатырға түсуін қиындатады) және эндометрийдің өзгеруін (ол аналық жасушаны имплантациялау мүмкіндігін азайтады) туындатады.

Темір фумараты – темір сульфатымен (20%) және темір глюконатымен салыстырғанда (13%) гематин тұзында (33%) темір мөлшері көп болатын темірдің органикалық кешені.

Қолданылуы

- әйелдердегі жүктіліктен сақтану

- дисменорея, функционалдық овариальді кисталар

- фиброаденома және сүт безінің фиброзды кисталары

- эндометрий обырының және аналық бездер обырының алдын алу.

Қолдану тәсілі және дозалары

Қолдану жөніндегі нұсқаулар:

- «Эль Ева 28 күн» препаратын алғаш қолданғанда етеккір басталғаннан кейін алғашқы дүйсенбіден бастап қабылдайды

- егер етеккір дүйсенбіде басталса, алғашқы таблетканы сол күні қабылдайды

- бір ақ түсті таблеткадан күн сайын бірізді 21 күн бойы, сосын бір қоңыр түсті таблеткадан күн сайын бірізді 7 күн ішінде қабылдайды

- «тоқтату синдромынан» болатын қан кету, әдетте, ақ түсті таблеткалар қабылдауды тоқтатқаннан кейін үш күн ішінде пайда болады және жаңа қаптамадан қабылдау басталатын сәтке дейін жалғасады

- бірінші қабылдау циклы кезінде препараттың контрацептивтік сенімділігіне ақ таблеткаларды үзбей 7 күн бойы қабылдағаннан кейін ғана сенуге болады. Алғашқы 7 күнде контрацепцияның гормональді емес (бөгеу) қосымша әдістерін пайдалану керек.

- кейінгі 28-күндік курсты (және кейінгі курстардың бәрін) аптаның бірінші курсты қабылдау басталған күнінен (дүйсенбіден) мына сызба бойынша бастайды: 21 күн ақ түсті таблеткалар қабылдау және 7 күн қоңыр түсті таблеткалар қабылдау.

Қолдану тәсілі:

- 1 таблеткадан күн сайын белгілі бір уақытта, дұрысы - кешкі ас кезінде немесе ұйықтар алдында қабылдау дұрысырақ,

- бөліністер немесе жүрек айну байқалса да, препаратты қабылдауды тоқтатпау керек,

- жыныстық қатынаста жиі болмаса да, таблеткалар қабылдауды өткізіп алмаған жөн,

- бірде-бір таблетканы қабылдауды ұмытпау немесе өткізіп алмау керек.

Дозалау режимі:

Ақ түсті 1 таблеткадан 21 күн бойы күн сайын қабылдайды, сосын қоңыр түсті 1 таблеткадан 7 күн бойы күн сайын қабылдайды.

Дозаны өткізіп алған жағдайда:

Егер ақ түсті 1 таблетка қабылдауды өткізіп алса:

• Таблетканы есіңізге түскен бойда қабылдаңыз. Келесі таблетканы әдеттегі уақытта қабылдайды. Бұл екі таблетканы бір күнде қабылдауға болатынын білдіреді.

• Секспен айналысқан кезде контрацепциялық бөгеу әдісін пайдаланудың қажеті жоқ.

  Егер қабылдаудың бірінші немесе екінші аптасында ақ түсті 2 таблетканы бірізді қабылдауды өткізіп алса (бірінші немесе екінші қатардың таблеткалары):

• 2 таблетканы есіңізге түскен бойда және 2 таблетканы келесі күні қабылдаңыз.

• Әріқарай күніне 1 таблеткадан ағымдағы қаптама біткенше қабылдайды.

• Таблеткалар қабылдауды өткізіп алғаннан кейін 7 күндік кезеңде секспен айналысатын болсаңыз, СІЗДІҢ ЖҮКТІ БОЛУЫҢЫЗ МҮМКІН. Осы 7 күн ішінде контрацепцияның бөгеу әдісін (мүшеқаптар және/немесе спермицидтер) пайдалану ҚАЖЕТ.

  Егер үшінші аптада ақ түсті 2 таблетканы бірізді қабылдау өткізіп алынса (үшінші қатардың таблеткалары):

• Таблетканы есіңізге түскенде ҚАБЫЛДАМАҢЫЗ, ағымдағы қаптаманы АЯҚТАМАҢЫЗ.

• Тағы 5 күн күтіңіз. Бұл таблеткалар қабылданбайтын 1 аптаны құрайды.

• Сосын, сізде қан кету әлі жалғасып жатса да, 8-ШІ КҮНІ жаңа қаптамадан қабылдауды бастаңыз.

• Таблеткаларсыз 7-күндік кезеңде және жаңа қаптамадан таблеткалар қабылдаудың алғашқы 7 күні ішінде қосымша контрацепциялық бөгеу әдісін пайдаланыңыз.

  Егер ақ түсті 3 немесе одан да көп таблетканы бірізді қабылдау өткізіп алынса (алғашқы 3 апта ішінде):

• Таблетканы есіңізге түскенде ҚАБЫЛДАМАҢЫЗ, ағымдағы қаптаманы АЯҚТАМАҢЫЗ.

• Тағы 4 күн күтіңіз. Бұл таблеткалар қабылданбайтын 1 аптаны құрайды.

• Сосын, сізде қан кету әлі жалғасып жатса да, 8-ШІ КҮНІ жаңа қаптама қабылдауды бастаңыз.

• Таблеткаларсыз 7-күндік кезеңде және жаңа қаптамадан таблеткалар қабылдайтын алғашқы 7 күн ішінде қосымша контрацепциялық бөгеу әдісін пайдаланыңыз.

  Егер 4 апта кезінде қоңыр түсті 7 таблетканың кез келгенін қабылдау өткізіп алынса:

• Өткізіп алынған таблеткаларды ТАСТАҢЫЗ.

• Қаптама біткенше күн сайын 1 таблеткадан қабылдауды жалғастырыңыз.

  Егер сіз жаңа қаптама қабылдауды дер кезінде бастасаңыз, сізге қосымша контрацепциялық бөгеу әдісін пайдалану қажет емес.

  Егер сіз қаптамадан кез келген таблетка қабылдауды өткізіп алсаңыз, ал күтілген етеккір болмаса, дәрігерге қаралыңыз. Дәрігер рұқсат еткенше таблеткалар қабылдамаңыз.

  Ең жоғары бір реттік доза: 1 таблетка.

  Ең жоғары тәуліктік доза: 1 таблетка.

Жағымсыз әсерлері

- жүрек айну, құсу, диарея

- қатты шаршау, бас ауыру

- сүт бездерінің кернеуі

- дене салмағының және либидоның өзгеруі

- көңіл-күйдің түсуі

- хлоазма

- етеккіраралық қан кетулер

- жанаспалы линзалар тағу кезіндегі шағымдар

Сирек

- қандағы триглицеридтер, глюкоза деңгейінің жоғарылауы, глюкозаға төзімділіктің төмендеуі

- артериялық қысымның көтерілуі

- өкпе эмболиясы, тромбоэмболиялар, миокард инфарктісі, инсульт, торқабық тромбозы, мезентериальді тромбоз, кіші жамбас астауы мүшелерінің, аяқтардың тромбозы, аяқтағы терең көктамырлар тромбофлебиті, терең көктамырлар тромбофлебиті

- гепатит, өт қабының аурулары, сарғаю

- тері бөртпесі, шаштың түсуі

- қынап сөлінісінің өзгеруі, қынаптық кандидоз

Қолдануға болмайтын жағдайлар

Келесі жай-күйлерде әйелдерге ішуге арналған ұрықтануға қарсы дәрілерді тағайындалмайды:

- препараттың кез келген құрамдас бөлігіне жоғары сезімталдық

- тромбофлебит, соның ішінде терең көктамырлар тромбофлебиті және сыртартқыдағы тромбоэмболиялық үдерістер

- ми тамырларының немесе коронарлық артериялардың аурулары (қазіргі уақытта бар немесе бұрын байқалған)

- тромбогенді асқынулары бар жүректің клапанды ақаулары

- тиісінше емделмеген артериялық гипертензия

- микроангиопатиялар бар қант диабеті

- ошақтық неврологиялық белгілер қатары бар бас ауырулары

- ұзақ иммобилизация қажет болатын хирургиялық операциялардан кейінгі жай-күйлер

- кеуде обыры немесе одан күдіктену, немесе сыртартқыдағы кеуде обыры

- эндометрий обыры немесе басқа да эстрогенге тәуелді жаңа түзілімдердің болуы немесе күдік тудыруы

- шығу тегі белгісіз патологиялық қынаптық қан кету

- жүктілердің холестатикалық сары ауруы немесе препаратты қабылдағаннан кейін дамитын сары ауру

- аденома немесе бауыр обыры, сондай-ақ бауырдың жедел аурулары

- жүктілік немесе жүктілікке күдіктену

- темір препараттары гемохроматоз немесе гемосидероз кезінде қарсы көрсетілімді

- 18 жасқа дейінгі балалық және жасөспірімдік кезең

Дәрілермен өзара әрекеттесуі

Фармацевтикалық өзара әрекеттесуі

Левоноргестрел / Этинилэстрадиол

Құрамында кейбір синтетикалық эстрогендер бар (мысалы, этинилэстрадиол) ұрықтануға қарсы біріктірілген гормональді дәрілер басқа препараттар метаболизмін бәсеңдете алады. Ұрықтануға қарсы біріктірілген дәрілермен бірге қолданғанда циклоспорин, преднизолон және теофиллиннің плазмалық концентрацияларының жоғарылауы жөнінде хабарланған.

Фармакодинамикалық өзара әрекеттесуі

Левоноргестрел / Этинилэстрадиол

Антибиотиктермен, құрысуға қарсы және басқа да ұрықтануға қарсы стероидты дәрілер метаболизмін арттыратын препараттармен бірге қолданғанда ішу арқылы қабылданатын ұрықтануға қарсы дәрілердің тиімділігі төмендейді. Бұл қалаусыз жүктіліктің дамуына немесе қатты қан кетуге әкелуі мүмкін. Мұндай препараттарға рифампин, барбитураттар, фенилбутазон, фенитоин, карбамазепин, фелбамат, окскарбазепин, топирамат және гризеофульвин жатады.

Ампициллин және тетрациклиндер сияқты антибиотиктермен бірге қолданғанда контрацептивтік тиімділік болмайтын және қатты қан кету болатын бірнеше жағдайлар жөнінде хабарланған. Алайда ұрықтануға қарсы біріктірілген дәрілер мен осы антибиотиктер арасындағы өзара әрекеттесулердің клинико-фармакологиялық зерттеулері қарама-қайшы.

Темір фумараты

Аллопуринол және темір фумаратын бірге қолдану темірдің бауырда артық мөлшерде жиналуына әкеп соқтырады.

Фармакокинетикалық өзара әрекеттесуі

Левоноргестрел / Этинилэстрадиол

АИВ-қа қарсы протеазаның кейбір тежегіштерін ұрықтануға қарсы біріктіріп ішуге арналған дәрілермен бір мезгілде қолдануға зерттеулер жүргізілген; кейбір жағдайларда эстрогендер мен прогестиндердің плазмалық деңгейлерінің едәуір өзгеруі (артуы немесе төмендеуі) болды. АИВ-қа қарсы протеаза тежегіштерін бірге қолдану ұрықтануға қарсы біріктіріп ішуге арналған дәрілердің қауіпсіздігі мен тиімділігіне әсер етеді.

Құрамында Шілтерленген шайқурай (Hypericum perforatum) бар шөптен жасалған дәрілер бауыр ферменттерін (P450 цитохромы) және p-гликопротеин тасымалдануын индукциялайды, сондай-ақ ұрықтануға қарсы стероидты дәрілердің тиімділігін төмендетіп, бұл профузиялық қан кетуді туындатады.

Аторвастатин мен құрамында этинилэстрадиол бар кейбір ұрықтануға қарсы біріктірілген препараттарды бір мезгілде қолдану этинилэстрадиолдың AUC мәнін («концентрация-уақыт» қисығы астындағы аумақ) шамамен 20% арттырады.

Аскорбин қышқылы және ацетаминофен, ықтималды түрде, конъюгацияны бәсеңдету есебінен этинилэстрадиолдың плазмалық деңгейлерін арттырады. Итраконазол немесе кетоконазол сияқты CYP 3A4 тежегіштері гормондардың плазмалық деңгейлерін жоғарылатады.

Ұрықтануға қарсы біріктірілген дәрілермен бір мезгілде қолданғанда конъюгация индукциясының нәтижесінде ацетаминофеннің плазмалық концентрацияларының төмендеуі және темазепам, салицил қышқылы, морфин және клофибрат клиренсінің жоғарылауы жөнінде хабарланған.

Темір фумараты

Антацидтер, Е витамині, холестирамин, панкреатин және сульфасалазинді темір фумаратымен бірге қолдану темірдің сіңуін азайтады.

Темір фумараты бір мезгілде қолданғанда тетрациклин, фторхинолондар мен леводопаның сіңуін төмендетеді.

Айрықша нұсқаулар

Препаратты қабылдау курсын бастар алдында жалпы дәрігерлік және гинекологиялық тексеруден өту қажет. Артериялық қысымды өлшеу, несепте глюкозаның болуына зертханалық тексеру жүргізу, бауыр қызметін бақылау, сүт бездерін тексеру және жүктіліктің бар-жоғын анықтау үшін қынап жағындысына цитологиялық талдау жасау қажет.

Препаратты келесі аурулар болғанда қолдану кезінде ерекше сақ болу талап етіледі: қант диабеті, шығу тегі ишемиялық емес жүрек аурулары, гипертония, бүйрек қызметінің бұзылуы, көктамырлардың варикозды кеңеюі, флебиттер, отосклероз, жайылған склероз, эпилепсия, кіші хорея, интермиттирлеуші порфирия, латентті тетания, астма, жатырдың қатерсіз ісігі, эндометриоз немесе мастопатия.

Препаратты қолдану кезеңінде шамамен әр 6 ай сайын дәрігерлік тексеруден өту қажет.

Вирустық гепатитті өткергеннен кейін (бауыр қызметі қалыптанғаннан кейін) ұрықтануға қарсы гормональді дәрілерді ішу арқылы сауыққаннан кейін 6 айдан соң қолдануға болады.

Ұрықтануға қарсы гормональді дәрілерді ішу арқылы ұзақ уақыт қолданғаннан кейін бауырдың сирек сипаттағы қатерсіз, ал одан да сирек жағдайларда қатерлі ісігі түзілуі мүмкін, олар жекелеген жағдайларда құрсақ қуысындағы өмірге қауіпті қан кетуге әкеледі. Іштің жоғарғы бөлігінде айқын ауырсыну, бауырдың үлкеюі пайда болғанда немесе интраперитонеальді қан кету белгілері білінгенде бауыр ісігінің болуына күдік туындауы мүмкін. Бұл жағдайда препарат қабылдауды тоқтату қажет.

Эпидемиологиялық зерттеулердің ауқымды санында аналық бездер, эндометрий, жатыр мойыны обырының және ұрықтануға қарсы біріктірілген дәрілерді ішу арқылы қабылдайтын әйелдер арасында сүт бездері обырының пайда болу жиілігі зерттелді. Зерттеулер және ішу арқылы қабылданатын ұрықтануға қарсы біріктірілген дәрілер әйелдерді аналық бездер және эндометрий обырынан қорғайтынын дәлелдеді.

Кейбір зерттеулер ұрықтануға қарсы біріктірілген дәрілерді ішу арқылы ұзақ қабылдаған әйелдер арасында жатыр мойынының обыры жиілігінің жоғарылауын тапты, бірақ нәтижелері біржақты емес. Жатыр мойыны обырының түзілуінде сексуалдық мінез-құлық пен басқа факторлардың алатын орны бар, сондықтан жатыр мойыны обыры мен ұрықтануға қарсы біріктірілген дәрілерді ішу арқылы қолдану арасындағы байланыс анық емес.

35 жасқа жетпеген әйелдер арасында сүт бездері обырының пайда болу жиілігінің жоғарылауы болды, әрі бұл қауіп ұрықтануға қарсы гормональді дәрілерді ішу арқылы қабылдау ұзақтығына қарай арта түседі. Бұған қарамастан, сүт бездері обырының пайда болу ықтималдығы аз және бұл ықтималдық гормондар дозасы аз препараттарды қолданумен төмендейді. Бұл аз қауіп, аналық бездер мен эндометрий обырынан қорғануды қоса, ішу арқылы қабылданатын біріктірілген контрацептивтік дәрілердің оң әсерлерімен салыстырылады.

Қан кету болмаған кезде жүктілікті жоққа шығару қажет.

Бауыр қызметінің бұзылуы болғанда, әр 2-3 ай сайын дәрігерлік бақылаудан өту қажет.

Етеккіраралық қан кету пайда болғанда препаратты қабылдауды жалғастыру керек, өйткені көпшілік жағдайларда бұл қан кету өздігінен тоқтайды. Егер етеккіраралық қан кетулер жоғалмаса немесе қайталана берсе, жыныс мүшелерінің зақымдануын жоққа шығару үшін медициналық тексеру жүргізу керек.

Құсу немесе іш өту жағдайында препаратты қабылдауды контрацепцияның басқа гормональді емес әдісін қосымша қолданумен жалғастырған жөн.

Құрамында эстроген бар контрацептивтік дәрілерді ішу арқылы қабылдайтын әйелдер арасында тромбоэмболиялық аурулардың (инсульт, миокард инфарктісі, субарахноидальді геморрагия) даму қаупі артуы мүмкін.

Кез келген ұрықтануға қарсы біріктірілген препаратты ішу арқылы қолдану көктамырлық тромбоэмболиялық аурулар қаупін жоғарылатады. Осы аурулар қаупі препараттарды қабылдаудың алғашқы жылында жоғары шегіне жетеді. Бұл жоғары қауіп жүктілік кезінде табылған көктамырлық тромбоэмболиялық аурулар қаупінен аз, ол 100 000 жүктілікке 60 жағдайдан келеді. Бұл жағдайлардың 1-2%-ы өліммен аяқталады.

Тромбоэмболиялық аурулардың пайда болу ықтималдығы құрамында 30 мкг этинилэстрадиол мен левоноргестрел бар контрацептивтік дәрілерді ішу арқылы қолданғанда - жылына 100 000 әйелге 20 жағдайдан.

Кейбір факторлар тромбоэмболиялық аурулардың пайда болу қаупін жоғарылатады (мысалы: темекі тарту, семіру, көктамырлардың варикозды кеңеюі, жүрек-қантамыр аурулары, қант диабеті, бас сақинасы). Қабылдау курсын бастар алдында және осы факторлар болған кезде таңдалған ұрықтануға қарсы біріктірілген дәрінің әйелге сай келетінін бағалау қажет.

Біріктірілген контрацептивтік дәрілерді ішу арқылы қолданумен байланысты тромбоэмболиялық аурулардың пайда болу қаупі жас ұлғаюымен жоғарылап, шылым шегумен ушыға түседі. Сондықтан, 35 жастан асқан әйелдерге темекі тартудан толық бас тарту ұсынылады.

Тромбоэмболиялық аурулардың дамуында жас кездегі және отбасылық сыртартқыдағы тромбоэмболиялық аурулардың болуы, сондай-ақ гемостаздың бұзылуы рөл атқарады.

Препарат қабылдауды мына жағдайларда дереу тоқтату керек:

• алғаш рет білінген немесе күшейген бас сақинасы тәрізді немесе әдеттен тыс қатты айқын білінген бас ауруы жағдайында; көру өткірлігі мен сезім ұшқырлығының жедел нашарлауында; тромбозға немесе инфарктқа күдік туындағанда;

• артериялық қысым күрт көтерілгенде; сары аурудың немесе сарғаюсыз гепатиттің дамуында; жайылған қышыма пайда болғанда; эпилепсияда немесе эпилепсиялық ұстамалар жиілегенде;

• жоспарланған операция алдында (операцияға дейін 4 апта бұрын); ұзақ иммобилизация кезінде (мысалы, жарақаттанудан кейін) және жүкті болғанда.

Қызыл-қоңыр түсті таблеткалар препаратты үздіксіз қабылдауды қамтамасыз етуге арналған. Олардың құрамында темір тапшылықты анемияны емдеу үшін жеткілікті дозадағы темір фумараты бар, бірақ темірдің бұл дозасын құрамында темір бар басқа препараттарды тағайындағанда есепке алу керек.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Препараттың автокөлікті немесе басқа мәшинелерді басқару қабілетіне әсер ету мүмкіндігіне зерттеулер жүргізілмеген.

Артық дозаланғанда

Белгілері: әйелдердегі жүрек айну және қынаптық қан кету.

Емдеу: арнайы у қайтарғысы жоқ, белгісіне қарай емдеу.

Шығарылу түрі және қаптамасы

28 таблеткадан (ақ түсті 21 таблетка және қоңыр түсті 7 таблетка) ПВХ үлбірінен және алюминий фольгадан жасалған күнтізбелі пішінді ұяшықты қаптамаға салады.

1 пішінді қаптамадан медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салады.

Сақтау шарттары

Құрғақ, салқын жерде, 250C-ден аспайтын температурада сақтау керек.

Балалардың қолы жетпейтін жерде сақтау керек!

Жарамдылық мерзімі

2 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

Plethico Pharmaceuticals Ltd/ Плетхико Фармасьютикалз Лтд

Тұрғылықты мекенжайы:

Ф-25, Индастриал Истейт, Горва, Барода – 390 016, Үндістан

Заңды мекенжайы:

37/37А, Индастриал Истейт, Полограунд, Индор (М.П.), 452 015, Үндістан.

Тіркеу куәлігінің иесі

Plethico Pharmaceuticals Ltd/ Плетхико Фармасьютикалз Лтд, Үндістан.

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы

ҚР-дағы «Резлов ЛТД» ЖШС өкілдігі, Қарағанды қ., Ермеков к-сі

100009 Қарағанды қ., Ермеков к-сі, 110/2

Тел.: /7212/ 481644, 431534, 43-15-63,48-17-67; тел./факс: /7212/ 48 17 44;

e-mail: rezlov_ltd@mail.ru, rezlov-ltd@rambler.ru