Цитогем (1000 мг)

• русский
• қазақша

• Скачать инструкцию медикамента

Саудалық атауы

Цитогем

Халықаралық патенттелмеген атауы

Гемцитабин

Дәрілік түрі

Инфузия үшін ерітінді дайындауға арналған 1000 мг лиофилизат

Құрамы

Әр құтының ішінде:

белсенді зат – 1000 мг гемцитабинге баламалы 1138.525 мг гемцитабин гидрохлориді,

қосымша заттар: маннитол, натрий ацетаты, натрий гидроксиді, инъекцияға арналған су

Сипаттамасы

Шелпек түріндегі ақ немесе ақ дерлік түсті лиофилизацияланған ұнтақ немесе кеуекті масса немесе бос сусымалы ұнтақ.

Фармакотерапиялық тобы

Ісікке қарсы препараттар. Антиметаболиттер. Пиримидин аналогтары. Гемцитабин

АТХ коды L 01 ВС 05

Фармакологиялық қасиеттері

Фармакокинетикасы

Гемцитабиннің фармакокинетикасы дозасына тәуелді. Көктамыр ішіне енгізгеннен кейін гемцитабин бүкіл организмге жылдам таралады, плазма ақуыздарымен байланысуы елеусіз (10%-дан аз). Таралу көлемі инфузия ұзақтығына (қысқа уақыт ішінде енгізгенде – 50 л/м2, ұзақ уақыт енгізгенде – 370 л/м2) және жынысқа тәуелді. Ерлерде таралу көлемі 15.6 л/м2, әйелдерде – 11.3 л/м2 құрайды.

Қысқа мерзімді инфузия кезіндегі жартылай шығарылу кезеңі 32-ден 94 минутқа дейін, ұзақ инфузия кезінде – жас шамасы мен жынысқа байланысты 245-638 минутты құрайды. Белсенді метаболитінің терминальді фазасының жартылай шығарылу кезеңі (шеткергі қанның мононуклеарлық жасушаларынан) - 1,7 – 19,4 сағат.

Бауыр, бүйрек, қан жасушаларында цитидиндеаминаза ферментімен урацилдің белсенді емес метаболитінің (2’-дезокси-2’, 2’-дифторуридин) түзілуіне дейін сатылай метаболизденеді. Бұл метаболитінің қандағы ең жоғарғы концентрациясына (Сmax) инфузиядан кейін 30 минуттан соң жетеді.

Урацил метаболиті түрінде бүйрекпен (92 – 98%), 1%-дан азы - нәжіспен; өзгеріссіз күйде бүйрекпен дозасының 1%-ы шығарылады.

Фармакодинамикасы

Цитогем ісікке қарсы препарат болып табылады. Гемцитабиннің цитоуытты әсеріне оның нуклеозидкиназалардың қатысуымен жасушаішілік биоөзгерісі нәтижесінде түзілетін белсенді метаболиттері – ди- және трифосфаттық нуклеозидтердің біріккен әсері түрткі болады.

Гемцитабин дифосфаты ДНҚ синтезі үшін қажетті дезоксинуклеозидтрифосфаттардың түзілу реакциясын катализдейтін рибонуклеотидредуктазаны тежейді. Гемцитабин трифосфаты ДНҚ-ға қосылады және оның ары қарай синтезі тоқтайды, бұл кезде ДНҚ репарациясына мүмкіндік жоқ. Т-лимфобласттық жасушаларда гемцитабин жасушалар өлімін бағдарламалайтын факторлардың бірі болып табылатын интернуклеосомалық ДНҚ-фрагментациясын индукциялайды.

Әсері фазалық спецификалылыққа ие: жасушалардың S-фазадағы тіршілік етуін тоқтатады және жасушалар ісіктерінің G1/S-фазадағы үдеуін бөгейді.

Қолданылуы

- өкпенің ұсақжасушалы емес обырында

- қуық обырында

- ұйқы безінің обырында

Қолдану тәсілі және дозалары

Қуық обырында монотерапия кезінде Цитогемді көктамыр ішіне әр 28 күн сайын 1, 8 және 15-ші күндері 1,25 г/м2 дозада тамшылатып 30 минут бойы енгізеді. Цитогемді цисплатинмен біріктіріп әр 28 күндік циклдің 1, 8 және 15-ші күндері 1 г/м2 дозада енгізеді. Цисплатинді әр 28 күндік циклдің 1 (цитогемнен кейін бірден) немесе 2-ші күні 70 мг/м2 дозада енгізеді.

Өкпенің ұсақжасушалы емес обырында монотерапия кезінде цитогемді көктамыр ішіне 3 апта бойы аптасына 1 рет 1 г/м2 дозада 30 минут бойы тамшылатып енгізіп, ары қарай бір апталық үзіліс жасайды. Содан кейін осыған ұқсас 4-апталық циклдерін қайталайды.

Цисплатинмен біріктіріліп операбельді емес, жергілікті үдемелі обыры (IIIA және IIIB сатысындағы) немесе метастаздық (IV саты) өкпенің ұсақжасушалы емес обыры бар бірінші қатардағы науқастарды емдеу үшін көрсетілген. Цитогемді көктамыр ішіне әр 21 күндік циклдің 1 және 8 күндері 1.25 г/м2 дозада немесе әр 28 күндік циклдің 1, 8 және 15-ші күндері 1 г/м2 дозада тамшылатып енгізеді.

Цисплатинді көктамыр ішіне гемцитабинді құйғаннан кейін 100 мг/м2 дозада күніне 1 рет енгізеді.

Ұйқы безінің обырында Цитогемді көктамыр ішіне 7 апта бойы аптасына 1 рет 1 г/м2 дозада 30 минут бойы тамшылатып енгізеді, ары қарай бір апталық үзіліс жасайды. Келесі циклдерінде инъекцияны 3 апта бойы аптасына 1 рет жүргізіп, ары қарай бір апталық үзіліс жасайды.

Ерітіндіні дайындау ережелері

Ерітіндіні дайындау үшін 0.9% натрий хлоридінің ерітіндісін ған қолдану керек.

1000 мг препаратты еріту үшін құтыға 25 мл кем емес инъекцияға арналған 0.9% натрий хлоридінің ерітіндісін қосады. Құтыны лиофилизацияланған ұнтақ толық ерігенге дейін сілкиді. Цитогемнің ең жоғарғы концентрациясы 40 мг/мл аспауы тиіс. Цитогемнің концентрациясы 40 мг/мл асатын ерітінділер толық ерімей қалуы мүмкін.

Құрамында препараттың сәйкесінше дозасы бар Цитогемнің дайындалған ерітіндісін 30 минут бойы көктамыр ішіне құю үшін енгізер алдында 0.9% инъекцияға арналған натрий хлориді ерітіндісінің жеткілікті мөлшерімен сұйылтады.

Парентеральді енгізер алдында дайындалған ерітіндіде механикалық қоспалардың бар-жоқтығы мен түсінің өзгерген-өзгермегендігін көзбен қарап тексеру қажет.

Өкпе обырымен немесе өкпе метастаздарымен науқастарда тыныс алу жүйесі тарапынан жағымсыз әсерлер қаупі арта түседі. Пневмониттің алғашқы белгілері пайда болса немесе өкпеде инфильтраттар пайда болса, Цитогеммен емдеуді тоқтату керек.

Егер науқаста гемцитабинмен емдеу кезінде қан талдауында өзгерістер анықталса, гемцитабиннің де, цисплатиннің де дозасын түзету ұсынылады. Гемцитабиннің дозасын түзету кезінде емдеу күні анықталған гранулоциттер мен тромбоциттер деңгейін ескеру қажет. Гемцитабинді қабылдап жүрген науқастарға тромбоциттер саны есептелген толық қан талдауын тағайындау қажет. Егер сүйек кемігі қызметінің бәсеңдегені анықталса, емді төмендегі ұсынымдарға сәйкес өзгерту немесе тоқтата тұру керек.

Сарысудағы трансаминазалар мен креатининді қоса, бүйрек пен бауыр функциясын зертханалық анықтауды емдеу басталғанға дейін де, емдеу кезінде де жүргізеді. Гемцитабинді бүйрек және бауыр функциясының бұзылуы бар науқастарға сақтықпен енгізеді.

Егер ұсынылатын дозасы алғашқы цикл бойына жақсы көтерімді болса (сәйкесінше гранулоциттердің абсолюттік саны ГАС және тромбоциттердің төменгі деңгейі 1500 х 106/л жоғары және 100000 х 106/л болса), келесі циклді жүргізгенде дозаларын 1250 мг/м2 дейін арттыруға болады және егер ем жақсы көтерімді болса, ары қарай дозасын 1500 мг/м2 дейін арттыруға болады.

Күрделі (3 немесе 4 дәрежелі) гематологиялық емес уыттылық дамыған жағдайда, шаштың түсуінен, жүрек айнуы/құсудан бөлек, цисплатинмен біріктіріп гемцитобинмен емдеу кезінде жүргізілуі немесе 50 %ға азайтылуы тиіс. Цисплатинмен біріктіріп емдеу кезінде, қан сарысуындағы креатинин, калий, кальций және магний деңгейін мұқит бақылауға алу керек (цисплатинмен біріктіріп гемцитабинмен емдеу кезінде креатинин уыттылығының 3 /4 дәрежесі цисплатинмен емдеудегі 2 %-ға қарсы 5 % құрауы тиіс).

Жағымсыз әсерлері

- миелосупрессия (анемия, лейкопения, тромбоцитопения), петехиялар, гипотензия, аритмия, инсульт, гипертензия, миокард инфарктісі, қан кету, жүрек жеткіліксіздігі

- бронхоспастикалық реакциялар (ентігу, тыныстың тарылуы, кеуде қуысының қысылуы), өкпе паренхимасына уытты әсері немесе пневмонит (жөтел, ентігу), өкпе ісінуі (жөтел, тыныстың тарылуы), жедел респираторлық дистресс - синдром

- жүрек айнуы, құсу, диарея, стоматит, трансаминазалар мен сілтілік фосфатаза белсенділігінің жоғарылауы, гипербилирубинемия

- протеинурия, шеткергі ісінулер (аяқ, қол саусақтарының немесе тобықтың), жайылған ісінулер, бүйрек жеткіліксіздігі, сілтілік фосфатаза белсенділігінің жоғарылауы, гематурия, гемолитиктік-уремиялық синдром

- бөртпе, алопеция, тері бөртпесі, терінің қышынуы, десквамация және булездік бөртпе

- тұмау тәрізді синдром (қызба, бас ауыруы, арқаның ауыруы, қалтырау, миалгия, әлсіздік, анорексия, катаральді құбылыстар, тершеңдік)

- салдарлы бактериялық жұқпалар

- парестезия

- инъекция орнында экстравазат түзілуі (тітіркену, ауыру немес қызару)

- ұйқышылдық

- Гассер ауруы (нәжістің қарамай тәрізді болуы, несепте немесе нәжісте қанның болуы, дене температурасының жоғарылауы, несеп шығарудың артуы немес төмендеуі, терідегі нүктелік қызыл дақтар, беттің, аяқ, қол саусақтарының немесе тобықтың ісінуі, әдеттен тыс қан кетулер немесе қан құйылулар, әдеттен тыс шаршау немесе әлсіздік, аққабықтың немесе терінің сарғаюы)

- Лайелл синдромы және Стивенс-Джонсон синдромы

Қолдануға болмайтын жағдайлар

- препарат компоненттеріне аса жоғары сезімталдық

- миелосупрессия

- бауыр мен бүйрек функциясының ауыр бұзылулары

- вирустық (желшешек, белдеулік теміреткі) және басқа да жұқпалар

- жүктілік және лактация кезеңі

- 18 жасқа дейінгі балалар мен жасөспірімдерге

Дәрілермен өзара әрекеттесуі

Сүйек кемігі функциясының бәсеңдеуін туғызатын басқа препараттар мен сәулемен емдеу сүйек кемігінің функциясын әлеуеттендіреді және аддитивті бәсеңдетеді. Азатиоприн, хлорамбуцил, глюкокортикоидтар, циклофосфамид, циклоспорин, меркаптурин және басқа иммунодепрессивтік дәрілер жұқпа қаупін арттырады. Тірі вирустық вакциналарды енгізгенде вакцина вирусы репликациясының интенсификациясы және жағымсыз әсерлерінің күшеюі, белсенділігі жойылған вакциналарды енгізгенде - вирусқа қарсы антиденелердің өндірілуі бәсеңдеуі мүмкін.

Айрықша нұсқаулар

Цитогемді қолдануды қан көрсеткіштерін қатаң бақылай отырып жүргізу керек (2 аптада 1 рет). Лейкоциттер саны <1500/мм3 және тромбоциттер саны <100000/мм3 азайса міндетті түрде дозасын түзету керек. Препаратты тоқтату үшін көрсетілім лейкоциттер санының <500/мм3 және тромбоциттер санының <50000/мм3 азаюы болып табылады.

Гематологиялық емес уыттылығын анықтау үшін науқасқа жүйелі түрде тексеру жүргізу және бауыр мен бүйрек функциясына бақылау жүргізу қажет. Уыттылық дәрежесіне байланысты дозасын әр цикл барысында немесе жаңа цикл басталғанда сатылай төмендетуге болады.

Препаратты кезекті енгізуді кейінге қалдыру туралы шешімді дәрігер қабылдауы және дәрігердің уытты белгілер динамикасына берген клиникалық бағасына негізделуі тиіс.

Гемцитабиннің клиренсі мен жартылай шығарылу кезеңі жас ұлғая келе өзгереді, бірақ егде жастағы емделушілерде дозасын түзету қажеттілігі жоқ.

Цитогем тудырған пневмонит расталған немесе күдіктенген жағдайда, емдеуді дереу тоқтату керек.

Бала көтеретін жастағы әйелдер контрацепцияның тиімді әдістерін (тератогендік әсерінің мүмкіндігі) пайдалануы тиіс.

Егде жастағы адамдарда (қанға уытты әсерінің қаупі жоғары), бұрын цитоуытты препараттарды немесе сәулемен ем қабылдаған науқастарда сақтықпен қолданады.

Емдеу кезінде вирустық вакциналармен вакцинациялауды жүргізу ұсынылмайды. Вирустық вакциналарды препаратты қолдануды тоқтатқаннан кейін кемінде 3 ай - 1 жылдан кейін тағайындауға болады. Науқастармен жақын араласатын адамдарды, әсіресе отбасы мүшелерін полиомиелитке қарсы ішілетін вакцинамен иммунизациялауды кейінге қалдыру керек.

Сүйек кемігінің бәсеңдеу белгілерінің, әдеттен тыс қан кетулердің немесе қан құйылулардың, нәжістің қарамай тәрізді болуы, несепте немесе нәжісте қанның немесе теріде нүктелік қызыл дақтардың пайда болуы дәрігердің дереу кеңес беруін қажет етеді.

Стоматологиялық араласуларды емдеу басталғанға дейін аяқтау немесе қан көрінісі қалыпқа түскенге дейін кейінге қалдыра тұру қажет. Емдеу барысында тіс щеткасын, жіптер немесе тіс тазартыштарды пайдаланғанда сақ болу керек.

Цитогемді аптасына 1 реттен жиі қолданғанда немесе 60 минуттан астам уақыт бойы инфузия жүргізгенде, Цитогеммен емдеумен байланысты жағымсыз әсерлер жиірек білінуі және айқынырақ болуы мүмкін.

Цитостатиктермен алдыңғы емдеу лейкопения мен тромбоцитопенияның (лейкоциттер мен тромбоциттер санының үдемелі төмендеуі емдеу аяқталғаннан кейін орын алуы мүмкін) жиілігі мен ауырлығын арттырады.

Цитогемді арнайы үйретілген медицина қызметкері инъекция ерітінділерін дайындау, сұйылту (стерильді бокста бір реттік хирургиялық қолғаптар мен бетперделерді пайдалана отырып) және инелерді, еккіштерді, құтыларды, ампулалар мен пайдаланылмаған препарат қалдықтарын жою кезіндегі белгіленген сақтық шараларын сақтай отырып қолдануы тиіс.

Цитогем тері мен шырышты қабықтарға байқаусызда тиіп кетсе, зақымданған жерді дереу сабынды сумен немесе сәйкесінше қатты су ағынымен мұқият жуып тастау қажет.

Дәрілік заттың көлік құралдарын немесе қауіптілігі зор механизмдерді басқару қабілетіне әсер ету ерекшеліктері

Жағымсыз әсерлердің (ұйқышылдық) пайда болу мүмкіндігіне байланысты, жоғары зейін шоғырландыру мен психикалық және қимыл-қозғалыс реакциядарының жылдамдығын қажет ететін қауіптілігі зор қызмет түрлерінен бас тарту керек.

Артық дозалануы

Симптомдары: сүйек кемігі функциясының бәсеңдеуі (анемия, лейкопения немесе нейтропения, жұқпамен бірге болуы мүмкін, тромбоцитопения), парестезия (саусақтардың немесе табандардың ұю сезімі), айқын тері бөртпесі.

Емі: симптоматикалық, қанның формалық элементтерінің санына мониторинг жүргізеді, қажет болса демеуші ем тағайындайды. Сүйек кемігінің функциясы қатты бәсеңдеген кезде қажетті қан компоненттерін құюға болады. Дамып келе жатқан лейкопениясы бар науқастарды жұқпа белгілерін анықтау үшін қадағалап отырады, қажет болса антибиотиктерді тағайындайды. Нейтропениямен науқастарға дене температурасы жоғарылағанда әсер ету ауқымы кең антибиотиктерді бактериологиялық зерттеулер мен тиісті диагностикалық тестілер нәтижелері алынғанға дейін эмпирикалық түрде тағайындайды. Арнайы у қайтарғысы жоқ.

Шығарылу түрі және қаптамасы

Препаратты 1000 мг белсенді затқа сәйкес келетін мөлшерде, резеңке қоспадан жасалған бромбутил тығындармен тұмшаланып тығындалған және ілгешекті пайдаланып алюминий қалпақшалармен қаусырылған сыйымдылығы 50 мл, I типті АҚШФ құтыларына салады.

Құтыға қағаздан жасалған заттаңба жапсырылады.

1 құтыдан медицинада қолданылуы жөніндегі мемлекеттік және орыс тілдеріндегі нұсқаулықпен бірге картоннан жасалған пәшкеге салады.

1 және 3 пәшкеден картоннан жасалған қорапқа салады.

Сақтау шарттары

Құрғақ, салқын жерде, 25 0С-ге дейінгі температурада сақтау керек.

Мұздатып қатыруға болмайды.

Дайын ерітіндіні 15 - 250С температурада 24 сағат бойы сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

Д-р Редди’с Лабораторис Лимитед. № 137, 138 және 146 учаске, S.V.CO-OP,

Индастриал Эстейт, Болларам, Джинарам Мандал, Медак ауданы,

Aндхра Прадеш, Үндістан

Тіркеу куәлігі иесінің атауы: «Д-р Редди’с Лабораторис Лимитед», Үндістан

Қазақстан Республикасы аумағында тұтынушылардан өнім сапасына қатысты шағымдарды қабылдайтын ұйымның мекенжайы

Қазақстан Республикасындағы «Д-р Редди’с Лабораторис Лимитед» компаниясының өкілдігі, 050057, Алматы қ., 22 линия к-сі, 45,

7 абонент жәшігі, тел: 8(727)3941688, факс: 8(727)3941294