Ципрофлоксацин (500 мг)

Ципрофлоксацин

Ципрофлоксацин

Жүйелі қолдануға арналған инфекцияға қарсы препараттар. Жүйелі қолдануға арналған бактерияға қарсы препараттар. Микробқа қарсы препараттар – хинолон туындылары. Фторхинолондар. Ципрофлоксацин

АТХ коды J01M A02

Сезімтал микроорганизмдер туғызған инфекциялық-қабыну аурулары:

- грам-теріс микроорганизмдер туғызған төменгі тыныс жолдарының инфекциялары (өкпенің созылмалы обструкциялық ауруының өршуі, муковисцидоз немесе бронхоэктазалар кезіндегі бронх-өкпе инфекциялары, пневмония)

- созылмалы іріңді ортаңғы отит

- созылмалы синуситттің өршуі, әсіресе, оны грам-теріс бактериялар туғызған болса

- несеп шығару жолдарының инфекциялары

- жыныс мүшелерінің инфекциялары (Neisseria gonorrhoeae сезімтал штаммдары туғызған гонококкты уретрит және цервицит, орхоэпидимит, кіші жамбас ағзаларының қабыну аурулары, Neisseria gonorrhoeae сезімтал штаммдары туғызған жағдайларды қоса)

- құрсақ қуысының инфекциялары (асқазан-ішек жолының бактериялық инфекциялары)

- интраабдоминальді инфекциялар

- сүйектер мен буындардың инфекциялары (остеомиелит, сепсистік артрит)

- терінің және жұмсақ тіндердің инфекциялары

- Neisseria meпiпgitidis туғызған инвазиялық инфекциялар профилактикасы

- сібір ойық жарасының өкпелік түрінің профилактикасы және оны емдеу.

Қолданудың басталуына дейінгі қажетті мәліметтер тізбесі

- ципрофлоксацинге, басқа фторхинолондарға, препараттың қосымша компоненттеріне аса жоғары сезімталдық;

- тизанидинмен бір мезгілде қабылдау (артериялық қысымның айқын төмендеуі, ұйқышылдық қаупі);

- балалар мен 18 жасқа дейінгі жасөспірімдер (қаңқаның қалыптасу үдерісінің аяқталуына дейін);

- жүктілік және лактация кезеңі

- глюкоза-6-фосфатдегидрогеназа тапшылығы

- миокард инфарктісі

Қолдану кезіндегі қажетті сақтандыру шаралары

Ципрофлоксацин, әсіресе, егде жастағы адамдарда, бүйрек аурулары бар пациенттерде; жүйелі кортикостероидтармен ем алатын пациенттерде; ағзалар трансплантациясынан кейінгі пациенттерде ерекше сақтықпен пайдаланылу керек. Осы науқастарда фторхинолондық және хинолондық антибиотиктермен емдеу нәтижесінде туындауы мүмкін сіңірлердің зақымдану қаупі жоғары.

Ципрофлоксацин препараты пайдаланылмайды:

- ауыр емес және бактерияға қарсы ем жүргізусіз өтуі мүмкін инфекцияларды (мысалы, ауыз-жұтқыншақ инфекциялары) емдеуде;

- бактериялық емес инфекцияларды, мысалы, бактериялық емес (созылмалы) простатитті емдеуде;

- саяхатшы диареясын немесе төменгі несеп жолдарының қайталамалы инфекцияларын (қуық шегінен тыс таралмайтын инфекциялар) болдырмау үшін;

- орташа бактериялық инфекцияларды емдеу үшін, егер әдетте ұсынылатын бактерияға қарсы басқа дәрілерді пайдалану мүмкін болмағанда.

Ауыр инфекциялар және/немесе грам-оң және анаэробты бактериялар туғызған инфекциялар

Ауыр инфекцияларды, стафилококктар немесе анаэробты бактериялар туғызған инфекцияларды емдеу үшін ципрофлоксацин тиісті бактерияға қарсы дәрілермен біріктірілімде қолданылу керек.

Стрептококк инфекциялары (Streptococcus pneumoniae қоса)

Ципрофлоксацин, Streptococcus pneumoniae тобының бактерияларына қатысты тиімділігінің жеткіліксіздігіне орай, пневмококк инфекцияларын емдеу үшін ұсынылмайды.

Несеп жолының инфекциялары

Орхоэпидидимит және кіші жамбас ағзаларының қабыну ауруларын фторхинолонға төзімді Neisseria gonorrhoeae туғызуы мүмкін. Ципрофлоксацинге төзімді Neisseria gonorrhoeae штаммдары жоққа шығарылатын клиникалық жағдайларды қоспағанда, ципрофлоксацин бактерияға қарсы басқа тиісті препараттармен бір мезгілде тағайындалу керек. Егер 3 күн өткен соң клиникалық жақсару басталмаса, емді қайта қарау керек.

Операциядан кейінгі интраабдоминальді инфекцияларды емдеу кезіндегі ципрофлоксацин тиімділігі туралы деректер шектеулі.

Кардиальді бұзылулар

Ципрофлоксацин электрокардиограммада QT аралығының ұзаруымен астасады. Егде жастағы пациенттер препараттың QT аралығына әсер етуіне аса сезімтал болуы мүмкін. Ципрофлоксацин QT аралығының ұзаруын туындата алатын қатарлас препараттармен (мысалы, аритмияға қарсы IА немесе III класс препараттары, трициклды антидепрессанттар, макролидтер, антипсихотиктер) және атап көрсетілген жай-күйлердің қауіп факторлары бар науқастарға (мысалы, анамнезде QT ұзаруы, түзетілмеген гипокалиемия) сақтықпен қолданылу керек.

Препаратқа жоғары сезімталдық

Кейбір жағдайларда аса жоғары сезімталдық пен аллергиялық реакцияларды ципрофлоксацинді бірінші қолданудан кейін-ақ байқауға болады, бұл туралы дереу дәрігерге хабарлау керек.

Бірлі-жарым жағдайларда анафилаксиялық/анафилактоидтық реакциялар пациенттің өміріне қатерлі шок күйіне дейін үдеуі мүмкін. Кейбір жағдайларда ципрофлоксацин қабылдауды тоқтата тұру және дереу дәрі-дәрмекпен ем (анафилаксиялық шокты емдеу) жүргізу қажет.

Асқазан-ішек жолы

Емдеу кезінде немесе одан кейін ауыр және орныққан диарея туындаған жағдайда ол жөнінде дәрігерге хабарлау керек, өйткені бұл симптом дереу емдеуді талап ететін ауыр асқазан-ішек ауруын бүркемелеуі мүмкін (мысалы, жалған жарғақшалы колит, бұл өмірге қатер төндіруі, өліммен аяқталуға ұласуы мүмкін. Осындай жағдайларда ципрофлоксацин қабылдауды тоқтату және тиісті ем қолдануды бастау қажет. Перистальтиканы бәсеңдететін дәрілік заттар қарсы көрсетілімді.

Бактерияға қарсы препараттардың бәрін дерлік пайдалану кезінде, оның ішінде ципрофлоксацин пайдаланылғанда ауырлығы бойынша жеңіл диареядан өлімге ұшырататын колитке дейін өзгеріп отыруы мүмкін Clostridium Difficile туғызған антибиотикпен астасқан диарея жағдайлары белгілі. Бактерияға қарсы препараттармен емдеу жуан ішектің қалыпты флорасының өзгеруін туындатады, өз кезегінде, бұл шектен тыс Clostridium Difficile көбеюіне әкеледі.

Clostridium Difficile антибиотикпен астасқан диарея дамуына ықпал ететін А және В токсиндерін өндіреді. Clostridium Difficile көп мөлшерде токсин өндіреді, қоздырғыштың микробқа қарсы емге төзімді болып кетуі мүмкін екендіктен, ауруға көп шалдығуды және өлімге ұшырауды және колэктомия жасау қажеттілігін туындатады. Антибиотиктер қолданудан кейін диареясы болатын пациенттердің бәрінде Clostridium Difficile туғызған антибиотикпен астасқан диареяның туындау мүмкіндігін есте ұстау қажет. Бактерияға қарсы препараттарды енгізуден кейін екі ай ішінде Clostridium Difficile туғызған антибиотикпен астасқан диареяның дамуы мүмкін екендіктен, мұқият дәрі-дәрмектік анамнез жинау қажет. Егер Clostridium Difficile туғызған антибиотикпен астасқан диарея диагнозы қарастырылса немесе расталса, Clostridium Difficile әсер етпейтін антибиотиктер пайдалануды тоқтату қажет болуы мүмкін. Клиникалық деректерге байланысты, су-электролит теңгеріміне түзету жүргізіп, ақуыз препараттарын қосымша енгізу, Clostridium Difficile сезімтал болатын бактерияға қарсы препараттарды қолдану қажеттілігін қарастыру қажет. Хирургиялық араласу қажеттілігі де туындауы мүмкін.

Ципрофлоксацин қабылдау кезінде пациент өміріне қатер төндіретін бауыр некрозының және бауыр жеткіліксіздігінің даму жағдайлары хабарланды. Бауыр ауруының қандай да бір белгілері мен симптомдары білінген жағдайда (анорексия, сарғаю, күңгірт несеп, қышыну немесе алдыңғы құрсақ жақтауының ширығуы сияқты), емдеуді тоқтату керек. Сонымен қатар, трансаминазалар, сілтілі фосфатаза деңгейінің уақытша жоғарылауын, холестаздық сарғаюдың дамуын, әсіресе, осының алдында бауыр зақымдануы болған пациенттерде анықтауға болады.

Қаңқа-бұлшықет жүйесі

Жалпы, ципрофлоксацинді анамнезінде сіңір аурулары және хинолиндер қолданумен байланысты бұзылыстары бар пациенттерде қолдануға болмайды. Осыған қарамастан, сирек жағдайларда қоздырғыштың микробиологиялық зерттеуінен және пайда/қауіп арақатынасын бағалаудан кейін, атап айтқанда – микробиологиялық зерттеулер нәтижелері ципрофлоксациннің қолданылуын ақтап шыққанда, стандартты ем тиімсіз болған немесе бактериялық төзімділік жағдайында осы пациенттерде жекелеген ауыр инфекциялық үдерістерді емдеу үшін ципрофлоксацин тағайындауға болады. Ципрофлоксацин қолдану кезінде, емдеудің алғашқы 48 сағатында кейде екіжақты тендинит немесе сіңірлердің (әсіресе, ахилл сіңірінің) жарылуы туындауы мүмкін. Егде жастағы пациенттерде немесе кортикостероидтарды бір мезгілде қабылдайтын пациенттерде тендинопатия қаупі жоғары болуы мүмкін. Тендиниттің кез келген белгілері туындағанда (мысалы, ауырсынулы ісіну, қабыну) ципрофлоксацин қолдануды тоқтату керек. Зақымданған аяқ-қолдың тыныштығын қамтамасыз ету керек.

Көрудің бұзылулары

Егер көрудің бұлыңғырлануы немесе көз тарапынан басқа бұзылулар болса, офтальмолог кеңесіне жүгінген жөн.

Жүйке жүйесі

Эпилепсиямен науқастар және анамнезінде орталық жүйке жүйесі функциясының бұзылулары бар пациенттер (мысалы, құрысу шегінің төмендеуі, анамнездегі құрысулар, церебральді қан айналымы қарқынының азаюы, ми құрылымының өзгерістері немесе инсульт), егер күтілетін пайдасы болжамды қаупінен басым болса ғана, ципрофлоксацин қабылдауға болады, өйткені ондай науқастар орталық жүйке жүйесі тарапынан болуы мүмкін жағымсыз реакцияларға орай, қауіп тобына жатады.

Кейбір жағдайларда орталық жүйке жүйесі тарапынан болатын жағымсыз реакциялар ципрофлоксацинді алғаш қабылдаудан кейін-ақ байқалады. Бірлі-жарым жағдайларда депрессия немесе психоз пациенттің өміріне қатер төндіретін жай-күйге дейін үдеуі мүмкін. Ондай жағдайларда ципрофлоксацин қабылдауды тоқтату және дереу дәрігерге хабарлау қажет.

Ципрофлоксацин қабылдаған пациенттерде полиневропатия жағдайлары хабарланды (бөлек немесе біріктірілімде тіркелген ауыру, ашыту, сенсорлық бұзылыстар немесе бұлшықет әлсіздігі сияқты неврологиялық симптомдар негізінде).

Невропатия симптомдары, атап айтқанда, ауыру, ашыту, шымылдатуды сезіну, ұйып қалу және/немесе әлсіздік болатын пациенттер, қайтымсыз жай-күйлердің дамуынан сақтану мақсатында, ципрофлоксацин қолдануды тоқтату керек.

Тері және тері асты шелі

Ципрофлоксациннің фотосезімталдық реакцияларының туындауына түрткі болатыны дәлелденді, сондықтан ципрофлоксацин қабылдайтын пациенттер қатты түсетін күн сәулесінен немесе ультракүлгінді сәулеленуден сақтануы тиіс. Фотосезімталдық реакциялары туындағанда (сол сияқты күнге күйіп қалғанда) ципрофлоксацинмен емді тоқтату керек.

Р450 цитохромы

Ципрофлоксациннің Р450 цитохромы 1А2 ферменттерінің орташа әсер ететін тежегіші екені белгілі. Ципрофлоксацин мен осыған ұқсас ферменттік жолмен метаболизденетін препараттарды (теофиллин, метилксантин, кофеин, дулоксетин, клозапин сияқты) бір мезгілде қолданғанда сақ болу керек. Қан сарысуындағы осы препараттар концентрацияларының жоғарылауы олардың ципрофлоксацинмен метаболизмдік клиренсінің бәсеңдеуімен байланысты, бұл спецификалық жағымсыз әсерлер туғызуы мүмкін.

Зертханалық талдаулар нәтижелеріне әсері

Ципрофлоксацин микобактериялар өсіріндісінің өсуін бәсеңдету жолымен Mycobacterium spp. себу нәтижелеріне in vitro ықпал ете алады, бұл ципрофлоксацин қабылдайтын пациенттерден алынған себуді талдаудың жалған теріс нәтижелеріне әкелуі мүмкін.

Ципрофлоксацин грам-оң немесе анаэробты бактериялар туғызған ауыр инфекцияларды емдеу үшін монотерапия ретінде қолданылмайды.

Саяхатшы диареясы

Ципрофлоксацинді таңдау кезінде пациент сапарлап барған елдердегі ципрофлоксацинге қоздырғыштардың төзімділігі туралы ақпаратты есепке алу керек.

Сүйектер мен буындар инфекциялары

Микробиологиялық зерттеу нәтижелеріне қарай, ципрофлоксацинді микробқа қарсы басқа дәрілермен біріктірілімде қолдану керек.

Сібір ойық жарасының өкпелік түрі

Дәрігер сібір ойық жарасын емдеудің ұлттық және/немесе халықаралық хаттамаларына сәйкес әрекет етуі тиіс.

Ципрофлоксацин гравис миастениясы бар пациенттерде абайлап қолданылады. Ципрофлоксацин мен метотрексатты бір мезгілде тағайындау ұсынылмайды.

Несеп жолының асқынған инфекциялары және пиелонефрит

Басқаша емдеу мүмкін болмағанда, ципрофлоксацин қолданумен несеп жолы инфекцияларын емдеу мүмкіндігін қарастыру керек. Емдеу микробиологиялық зерттеу нәтижелеріне негізделуі тиіс.

Бүйрек және несеп бөлу жүйесі

Ципрофлоксацин қолданумен байланысты кристаллурия хабарланды. Ципрофлоксацин қабылдап жүрген пациенттер жеткілікті мөлшерде сұйықтық ішуі тиіс. Несептің шектен тыс сілтіленуінен сақтану керек.

Басқа спецификалық ауыр инфекциялар

Басқаша емдеуді қолдануға болмағанда немесе жалпыға ортақ емдеу тиімсіз болып шыққанда, ресми ұсынымдарға сәйкес немесе пайда/қауіп арақатынасын мұқият бағалаудан кейін басқа ауыр инфекциялар кезінде микробиологиялық зерттеу нәтижелері бойынша ципрофлоксацин қолдануды ақтап алуға болады.

Жоғарыда аталғандарынан басқа, спецификалық ауыр инфекциялар жағдайында ципрофлоксацин қолдану клиникалық зерттеулер барысында бағаланбады, ал клиникалық тәжірибе шектеулі. Сонымен, осындай инфекциялары бар пациенттерді емдеуде сақтық шарасын қадағалауға кеңес беріледі.

Төзімділік

Ципрофлоксацинмен емдеу курсы кезінде немесе одан кейін клиникалық анықталған асқын инфекциямен немесе онсыз төзімді бактериялар бөлінуі мүмкін. Ұзақ емдеу курстары кезінде және ауруханаішілік инфекцияларды және/немесе Staphylococcus және Pseudomonas түрлері туғызған инфекцияларды емдегенде ципрофлоксацинге төзімді бактериялардың белгілі бір бөліну қаупі болуы мүмкін.

Аневризма және қолқаның ажырауы

Фторхинолондар қолданудан кейін, әсіресе, егде жастағы пациенттерде аневризманың және қолқа ажырауының жоғары даму қаупі хабарланды. Анамнезінде аневризма бар, не аневризмасы және/немесе қолқаның ажырауы, сондай-ақ басқа қауіп факторлары немесе аневризманың және/немесе қолқа ажырауының дамуына бейімдейтін жай-күйлері (мысалы, Марфан синдромы, тамырлық типті Элерс-Данло синдромы, Такаясу артерииті, алып жасушалы артериит, Бехчет ауруы, артериялық гипертензия, атеросклероз) бар пациенттерде фторхинолондарды пайда-қауіп арақатынасын мұқият бағалаудан және емнің мүмкін болатын басқа нұсқаларын қарастырудан кейін ғана қолдану керек.

Іштің, кеуденің немесе арқаның кенеттен ауыруы білінген жағдайда пациенттер шұғыл көмек бөлімшесіндегі дәрігерге дереу қаралу керек.

Гипогликемия

Барлық хинолондар жағдайындағы сияқты, әдетте, пероральді гипогликемиялық дәрімен (мысалы, глибенкламидпен) немесе инсулинмен қатарлас ем алып жүрген диабеті бар пациенттерде, гипогликемия мен гипергликемияны қоса, қандағы глюкоза деңгейінің бұзылулары хабарланды. Диабетпен науқастарда қандағы глюкоза деңгейіне мониторинг ұсынылады.

Басқа дәрілік препараттармен өзара әрекеттесуі

QT аралығының ұзаруында ципрофлоксациннің аддитивті әсері болатындықтан, ципрофлоксацин мен аритмияға қарсы IА немесе III класс препараттарын, трициклды антидепрессанттар, макролидтер, антипсихотиктерді бір мезгілде қолдану кезінде сақ болу керек.

Хелатты кешен түзілуі

Ципрофлоксацин (пероральді) мен құрамында көп валентті катиондар бар дәрілік заттарды, минералдық қоспаларды (мысалы, кальций, магний, алюминий, темір), фосфат байланыстыратын полимерлерді (мысалы, севеламер, лантан карбонаты), сукральфаттар немесе антацидтерді, сондай-ақ құрамында магний, алюминий немесе кальций бар буферлік сыйымдылығы үлкен препараттармен (мысалы, диданозин таблеткалары) бір мезгілде қолданғанда ципрофлоксацин сіңірілуі төмендейді. Осыған орай, ципрофлоксацинді осы препараттарды қабылдауға дейін 1-2 сағат бұрын немесе қабылдаудан кейін 4 сағаттан соң қабылдау керек.

Осы шектеу Н2-рецепторлар блокаторларының класына жататын антацидтерге қатысты емес.

Сүт және басқа тағам өнімдері

Ципрофлоксацин және сүт немесе минералдармен құнарланған өнімдерді (сүт, йогурт кальций мөлшері мол апельсин шырыны) бір мезгілде қабылдаудан сақтану керек. Құрамында кальцийдің едәуір шамасы бар қалған өнімдер ципрофлоксациннің сіңуіне әсер етпейді.

Пробенецuд

Пробенецид ципрофлоксациннің өтпен шығарылуын баяулатады. Құрамында пробенецид пен ципрофлоксацин бар дәрілік заттарды бір мезгілде қолдану қан плазмасында ципрофлоксацин концентрациясының жоғарылауына әкеледі. Пробенецид ципрофлоксациннің бүйректік секрециясына ықпал етеді.

Метоклопрамид

Метоклопрамид ципрофлоксациннің сіңуін жеделдетеді (пероральді қабылдау кезінде), бұл препараттың қан плазмасындағы ең жоғары концентрациясына жетуге дейінгі уақыттың қысқаруына алып келеді. Ципрофлоксациннің биожетімділігіне ешқандай әсері байқалмады.

Омепразол

Ципрофлоксацин мен құрамында омепразол бар дәрілік заттарды бір мезгілде қолдану ципрофлоксацин Сmax және «концентрация-уақыт арақатынасының қисық астындағы ауданы (AUC)» көрсеткішінің болымсыз төмендеуіне әкеледі.

Тuзанидин

Гипотензиялық және тыныштандыратын жағымсыз реакциялар қан сарысуында тизанидин концентрациясының жоғарылауымен астасады. Сондықтан, ципрофлоксацин мен құрамында тизанидин бар дәрілік заттарды бір мезгілде қолдану қарсы көрсетілімді.

Теофuллин

Ципрофлоксацин мен құрамында теофиллин бар дәрілік заттарды бір мезгілде қолдану қан плазмасында теофиллин концентрациясының қолайсыз жоғарылауына әкелуі мүмкін, бұл жағымсыз реакциялардың дамуын туындатуы мүмкін. Сирек жағдайларда жағымсыз реакциялар өмірге қатер төндіруі немесе өліммен аяқталуы мүмкін. Егер осы препараттарды бір мезгілде қолданбауға болмаса, қан сарысуындағы теофиллин концентрациясын бақылап отыру және оның дозасын талапқа сай азайту керек.

Ксантиннің басқа туындылары

Ципрофлоксацин мен құрамында кофеин немесе пентоксифиллин (оксипентифиллин) бар дәрілерді бір мезгілде қолданудан кейін қан сарысуындағы осы ксантиндер концентрацияларының жоғарылауы хабарланды.

Метотрексат

Ципрофлоксацин бір мезгілде тағайындалғанда метотрексаттың тубулярлы тасымалы (бүйрек метаболизмі) баяулауы мүмкін, бұл қан плазмасындағы метотрексат концентрациясының жоғарылауына әкелуі мүмкін. Осы орайда, метотрексат туғызған жағымсыз уытты реакциялардың туындау ықтималдығы артуы мүмкін. Ципрофлоксацин мен метотрексатты бір мезгілде тағайындау ұсынылмайды.

Қабынуға қарсы стероидты емес дәрілер

Хинолондардың (гираза тежегіштерінің) және кейбір қабынуға қарсы стероидты емес препараттардың (ацетилсалицил қышқылынан басқа) өте жоғары дозаларын біріктіріп қолдану құрысуларға түрткі болуы мүмкін.

Циклоспорин

Ципрофлоксацин мен циклоспорин бір мезгілде қолданылғанда сарысулық креатинин концентрациясының транзиторлы жоғарылауы байқалды. Сондықтан, осындай пациенттерге сарысулық креатинин концентрациясы көрсеткішін жүйелі (аптасына екі рет) бақылау қажет.

К дәруменінің антагонистері

Ципрофлоксацин мен К дәруменінің антагонисін бір мезгілде қолданғанда соңғысының антикоагулянттық әсері күшеюі мүмкін. Қауіп дәрежесі инфекцияның негізгі түріне, науқастың жасына, жалпы жай-күйіне қарай өзгеріп отыруы мүмкін, сондықтан ципрофлоксациннің халықаралық қалыптасқан қатынас (ХҚҚ) мәндерінің артуына әсерін нақты бағалау қиын. Ципрофлоксацин мен К дәруменінің антагонисін (варфарин, аценокумарол, фенпрокумон немесе флуиндион) бір мезгілде енгізу кезінде және одан кейін бірден жүйелі ХҚҚ бақылауын жүргізген жөн. Бактерияға қарсы препараттар, атап айтқанда, фторхинолондар қабылдаған пациенттерде оральді антикоагулянттар белсенділігінің жоғарылауы жөнінде хабарламалар бар.

Дулоксетин

Клиникалық деректердің болмауына қарамастан, ципрофлоксацин мен дулоксетин қолдану кезінде өзара әрекеттесу мүмкіндігін болжауға болады.

Ропинирол

Ципрофлоксацинмен бірге енгізу кезінде және одан кейін бірден ропинирол жағымсыз әсерлеріне мониторинг өткізу және дозасын тиісінше түзету ұсынылады.

Лидокаин

Құрамында лидокаин бар дәрілік заттар мен ципрофлоксацинді, орташа әсер ететін CYP450 1А2 изоэнзимінің тежегішін бір мезгілде қолдану лидокаин клиренсінің азаюына алып келеді. Лидокаин жағымдылығы жақсы болса да, оны ципрофлоксацинмен бір мезгілде қолданудан кейін жағымсыз реакциялармен қатар жүруі мүмкін белгілі бір өзара әрекеттесуін байқауға болады.

Клозапин

Клозапин мен ципрофлоксацинді 7 күн бойы 250 мг дозада бір мезгілде қолданғанда клозапин мен N-десметилклозапин сарысулық концентрацияларының жоғарылауы байқалды. Пациенттің жай-күйін бақылап отыру, ал қажет болса, клозапинді ципрофлоксацинмен бірге қолданған уақытта және біріктірілген ем аяқталған соң қысқа уақыт ішінде оның дозалау режимін түзету керек.

Силденафил

Дені сау еріктілерде 500 мг дозадағы ципрофлоксацин мен 50 мг дозадағы силденафил бір мезгілде қолданылғанда силденафил Сmax және AUС 2 есе артуы білінді. Осыған орай, аталған біріктірілімді «қауіп-пайда» арақатынасын бағалаудан кейін ғана қолдануға болады.

Фенuтоин

Ципрофлоксацин мен фенитоинді бір мезгілде тағайындау фенитоиннің сарысулық концентрацияларының жоғарылауына немесе төмендеуіне әкелуі мүмкін, сондықтан препараттардың деңгейлеріне мониторинг өткізу ұсынылады.

Қант төмендететін пероральді дәрілер

Диабетке қарсы пероральді препараттарды, әсіресе, сульфонилмочевинаны (мысалы, глибенкламид, глимепирид) бір мезгілде қолданғанда гипогликемия туралы хабарламалар болды, ол диабетке қарсы пероральді дәрілер әсерін ципрофлоксациннің күшейтуімен байланысты болуы ықтимал.

Арнайы сақтандырулар

Келесі жай-күйлерде сақтықпен қолдану керек:

Ми тамырларының айқын атеросклерозы, ми қан айналымының бұзылуы, психикалық аурулар (депрессия, психоз), эпилепсия, мидың органикалық зақымданулары немесе инсульт, құрысу дайындығы шегінің төмендеуі (немесе анамнездегі құрысу ұстамалары), бүйректің және/немесе бауырдың айқын жеткіліксіздігі, егде жас, хинолондармен бұрын жүргізілген емдеу кезінде сіңірлердің зақымдануы, QT аралығының ұзару немесе «пируэт» типті аритмияның даму қаупінің артуы (мысалы, QT аралығының туа біткен ұзару синдромы, жүрек аурулары (жүрек жеткіліксіздігі, миокард инфарктісі, брадикардия), электролит теңгерімсіздігі (мысалы, гипокалиемия, гипомагниемия кезінде), QT аралығын ұзартатын дәрілік препараттарды (оның ішінде аритмияға қарсы IA және III класс, трициклды антидепрессанттар, макролидтер, нейролептиктер) бір мезгілде қолдану, CYP450 цитохромы 1A2 изоферменттерінің тежегіштерімен (оның ішінде теофиллин, метилксантин, кофеин, дулоксетин, клозапин, ропинирол, оланзапин) бір мезгілде қолдану, gravis миастениясы, глюкоза-6-фосфатдегидрогеназа тапшылығы.

Педиатрияда қолдану

Муковисцидоз бар балаларда (5-17 жас аралығындағы) Pseudomonas aeruginosa туғызған өкпе асқынуларын емдеуден, E. coli туғызған несеп шығару жолдарының асқынған инфекцияларын және пиелонефрит (1-7 жас аралығындағы) пен жанасудан кейінгі сібір ойық жарасын емдеуден тыс, басқа көрсетілімдер бойынша ципрофлоксацин қолдану зерттелмеді. Балаларға басқа көрсетілімдер бойынша ципрофлоксацин қолданудың клиникалық тәжірибесі шектеулі.

Буындар және/немесе жуық орналасқан тіндер тарапынан жағымсыз әсерлердің даму ықтималдығына орай, «қауіп-пайда» арақатынасын мұқият бағалаудан кейін ғана ципрофлоксацинмен емдеуді тағайындауға болады.

Балалар мен жасөспірімдерге ципрофлоксацин қолдануды ресми нұсқауларға сәйкес жүргізген жөн. Кистозды фиброзбен және/немесе ауыр инфекциялармен науқас балалар мен жасөспірімдерге ем жүргізу тәжірибесі бар дәрігер ғана ципрофлоксацин қолданумен емдеу жүргізуі тиіс.

Жүктілік немесе лактация кезінде

Ципрофлоксацинді пациенттердің осы санатында қолдану тәжірибесінің жоқ екенін ескеріп, оны жүкті және бала емізетін әйелдерге қолдануға болмайды.

Сынақтар деректеріне сүйеніп, тератогенді әсерлерінің (мальформациялар) мүмкіндігі расталмаса да, жаңа туған нәрестелердегі буын шеміршектерінің зақымдану ықтималдығын толық жоққа шығаруға болмайды.

Ципрофлоксацин емшек сүтіне өтеді. Жаңа туған нәрестелердің буын шеміршектерінің ықтималды зақымдану қаупіне орай, ципрофлоксацинді бала емізу кезінде қолдануға болмайды.

Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Препарат тіпті қатаң түрде дәрігер нұсқаулары бойынша қабылданса да, ол автокөлікті немесе басқа механизмдерді басқаруға кедергі келтіруі мүмкін реакция шапшаңдығына әсер ете алады. Бұл, әсіресе, препаратты алкогольмен қатар қабылдау кезінде сипатты.

Қолдану жөніндегі нұсқаулар

Дозалау режимі

Бактерияға қарсы дәрілерді талапқа сай қолдануға қатысты ресми нұсқауларды қадағалау қажет.

Ересектер

Балалар және жасөспірімдер

Егде жастағы (> 65 жас) пациенттер үшін дозалау режимі 

Егде жастағы пациенттерді емдеу кезінде аурудың ауырлық дәрежесіне және креатинин клиренсіне қарай ципрофлоксациннің мүмкіндігінше төмен дозаларын қолдануға болады.

Бүйрек немесе бауыр функциясының бұзылуларында дозалау режимі Бүйрек функциясының бұзылуы бар пациенттер үшін ұсынылған бастапқы және демеуші дозалары

Бауыр функциясының бұзылуы бар пациенттерде дозаны түзету қажет емес.

Бүйрек және/немесе бауыр функциясының бұзылулары бар балаларда дозалануы зерттелмеді.

Енгізу әдісі және жолы

Қабықпен қапталған ципрофлоксацин таблеткаларын аздаған сұйықтық мөлшерімен іше отырып, шайнамай жұту керек.

Ауру ауыр түрде өтсе немесе басқа себептер бойынша ципрофлоксацин таблеткаларын қабылдау мүмкін болмаса (мысалы, егер науқас энтеральді қоректеніп жүрсе), ципрофлоксациннің инъекциялық түріне ауысу ұсынылады. Инъекция курсынан кейін емдеуді ципрофлоксацин таблеткаларын қолданумен жалғастыруға болады.

Қабылдау уақыты көрсетілген қолдану жиілігі

Қабықпен қапталған ципрофлоксацин таблеткаларын ас ішуге байланыссыз қабылдауға болады.

Препаратты аш қарынға қабылдау белсенді заттың сіңірілуін жеделдетеді. Ондай жағдайда қабықпен қапталған ципрофлоксацин таблеткаларын сүт өнімдерімен немесе минералдармен құнарланған сусындармен (сүт; йогурт; кальциймен құнарланған апельсин шырыны) бір мезгілде қабылдауға болмайды. Алайда, рацион құрамындағы кальций ципрофлоксацин сіңуіне елеулі әсер етпейді.

Емдеу ұзақтығы

«Дозалау режимі» бөлімін қараңыз.

Артық дозалану жағдайында қабылдау қажет болатын шаралар

Симптомдары: бас айналу, тремор, бас ауыру, шаршау, құрысулар, елестеулер, сананың шатасуы, абдоминальді жайсыздану, бүйрек және бауыр жеткіліксіздігі, кристаллурия және гематурия.

Пероральді қабылдау кезіндегі артық дозалану жағдайында бірнеше жағдайда бүйрек паренхимасына қайтымды уытты әсер етуі болды.

12 г ципрофлоксацин қабылдау салдарынан артық дозаланудың орташа уыттылық симптомдарына әкелгені хабарланды. 16 г дозасында жедел артық дозалану жедел бүйрек жеткіліксіздігінің дамуына әкелді.

Емі: асқазанды шаю, құстыратын заттарды қолдану, көп мөлшерде сұйықтық енгізу, кристаллурияны болдырмау мақсатында несептің қышқылды реакциясын қалыптастыру.

Сондай-ақ бүйрек функциясын қадағалау және құрамында ципрофлоксацин сіңірілуін төмендететін магний немесе кальций бар антацидтер қабылдау ұсынылады.

Гемодиализ немесе перитонеальді диализ көмегімен ципрофлоксациннің аздаған мөлшері (<10%) ғана шығарылады.

Дәрілік препараттың бір немесе бірнеше дозасын өткізіп алу кезіндегі қажетті шаралар

Егер Сіз кезекті дозаны қабылдауды ұмытып кетсеңіз, оны мүмкіндігінше тезірек қабылдаңыз. Алайда, егер препараттың кезекті дозасын қабылдау уақыты келіп қалса, өткізіп алған дозаны қабылдап жіберіңіз және әдеттегіше қабылдауды жалғастырыңыз. Өткізіп алған дозаның орнын толтыру үшін екі есе дозасын қабылдамаңыз!

Тоқтату симптомдары қаупінің болуына көрсетілім

Егер Сіздің дәрігеріңіз Сізге бұл жөнінде айтпаса, препарат қабылдауды тоқтатпаңыз.

Өзіңізді жақсы сезінгеніңіз үшін ғана препарат қабылдауды тоқтатпаңыз. Егер Сіз қабылдауды тым ерте тоқтатып қойсаңыз, Сіздің жай-күйіңіз нашарлауы мүмкін.

Препарат қабылдауды тағайындалған курс аяқталатын сәтке дейін жалғастырыңыз.

Дәрілік препаратты қолдану тәсілін түсіндіру үшін медициналық қызметкер кеңесіне жүгіну жөніндегі нұсқаулар

Осы препаратты қолдану бойынша қандай да бір қосымша сұрақтар туындаса, өз емдеуші дәрігеріңізбен кеңесіңіз.

ДП стандартты қолдану кезінде көрініс беретін жағымсыз реакциялар сипаттамасы және осы жағдайда қабылдау керек шаралар

Төменде тізбеленген жағымсыз реакциялар келесі үлгіде жіктелген: «өте жиі» (>10), «жиі» (≥ 1% - < 10%), «жиі емес» (≥ 0.1% - < 1%), «сирек» (≥ 0.01% - < 0.1%), «өте сирек» (< 0.01%), жиілігі белгісіз. Тек маркетингтен кейінгі қадағалау барысында тіркелген және жиілігі бағаланбаған жағымсыз реакциялар «белгісіз» болып таңбаланды (қолда бар деректер негізінде бағалау мүмкін емес).

Жиі

- жүрек айну

- диарея

Жиі емес

- микоздық асқын инфекциялар

- эозинофилия

- тәбет төмендеуі

- психомоторлық аса жоғары белсенділік/ажитация

- бас ауыру, бас айналу, ұйқының бұзылуы, дәм сезу бұзылыстары

- құсу, іштің ауыруы, диспепсия, метеоризм

- «бауыр» трансаминазалары белсенділігінің жоғарылауы, билирубин концентрациясының жоғарылауы

- бөртпе, қышыну, есекжем

- артралгия, қаңқа-бұлшықет ауыруы (оның ішінде, қол-аяқтың ауыруы, арқаның ауыруы, кеуденің ауыруы)

- бүйрек функциясының бұзылуы

- қандағы сілтілік фосфатаза белсенділігінің жоғарылауы

- астения, қызба

Сирек

- лейкопения, анемия, нейтропения, лейкоцитоз, тромбоцитопения, тромбоцитемия

- аллергиялық реакциялар, аллергиялық ісіну/ангионевроздық ісіну

- гипергликемия, гипогликемия

- сананың шатасуы және бағдардан жаңылу, үрейлену мінез-құлқы, түс көрудің бұзылуы (түнгі қорқынышты түстер), депрессия (суицидтік әрекеттер/ойлар сияқты өзін-өзі зақым келтіруді мақсат ететін мінез-құлықтың күшеюі, сондай-ақ суицидке талпыну немесе жүзеге асқан суицид), елестеулер

- парестезиялар және дизестезиялар, гипестезиялар, тремор, құрысулар (эпилепсия ұстамаларын қоса), вертиго

- көру бұзылыстары

- құлақтың шуылдауы, естімей қалу, естудің нашарлауы

- тахикардия

- вазодилатация, артериялық қысымның төмендеуі

- бетке қан «тебуін» сезіну

- естен тану күйлері

- тыныс алудың бұзылуы (бронх түйілуін қоса)

- антибиотикпен астасқан колит (аса сирек жағдайларда өліммен аяқталу мүмкіндігімен)

- бауыр функциясының бұзылуы, холестаздық сарғаю, гепатит (инфекциялық емес)

- фотосенсибилизация

- миалгия, артрит, бұлшықет тонусының жоғарылауы, бұлшықеттердің құрысуы

- бүйрек жеткіліксіздігі, гематурия, кристаллурия, тубулоинтерстициальді нефрит

- амилаза белсенділігінің жоғарылауы, протромбин деңгейінің қалып шегінен ауытқуы

- ісінулер, тершеңдік (гипергидроз)

Өте сирек

- гемолиздік анемия, агранулоцитоз, панцитопения (өмірге қауіпті), сүйек кемігінің бәсеңдеуі (өмірге қауіпті)

- анафилаксиялық реакциялар, анафилаксиялық шок (өмірге қатерлі), сарысу құю ауруы

- психоздық реакциялар (суицидтік әрекеттер/ойлар сияқты өзін-өзі зақымдаудың күшеюі, сондай-ақ суицидке талпыну немесе жүзеге асқан суицид)

- бас сақинасы, қимыл үйлесімінің бұзылуы, иіс сезудің бұзылуы

- бассүйекішілік гипертензия (мидың жалған туморозды симптоматикасы)

- түс ажырату қабілетінің бұзылуы

- васкулит

- панкреатит

- бауыр тіндерінің (аса сирек жағдайларда өмірге қатерлі бауыр жеткілкісіздігіне дейін үдейтін) некрозы

- петехиялар, мультиформалы эритеманың шағын түрлері, түйінді эритема, Стивенс-Джонсон синдромы (қатерлі экссудаттық эритема), оның ішінде өмірге зор қатерлі түрі, Лайелл синдромы (уытты эпидермалық некролиз), оның ішінде өмірге зор қатерлі түрі

- бұлшықет әлсіздігі, тендинит, сіңірлердің үзілуі (көбінесе ахилл), миастения симптомдарының өршуі

Жиілігі белгісіз (қолда бар деректер негізінде бағалау мүмкін емес)

- шеткері нейропатия және полинейропатия

- QT аралығының ұзаруы, қарыншалық аритмиялар (оның ішінде «пируэт» типті), жиірек QT аралығы ұзаруының дамуына бейімділігі бар пациенттерде

- жедел жайылған пустулезді экзантема

- жедел жайылған экзантематозды пустулез (ЖЖЭП), эозинофилиямен және дәрілерге аса жоғары сезімталдық синдромымен (DRESS) көрініс беретін аса жоғары сезімталдық

- ХҚҚ жоғарылауы (К дәрумені антагонистерін қабылдайтын пациенттерде)

- диурезге қарсы гормонның талапқа сай емес секрециясы синдромы (SIADH)

- гипогликемиялық кома

Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға жағымсыз реакциялар (әсерлер) жөніндегі ақпараттық деректер базасына тікелей хабарласу керек

Қазақстан Республикасы Денсаулық сақтау министрлігі Тауарлар мен көрсетілетін қызметтердің сапасы мен қауіпсіздігін бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

Дәрілік препараттың құрамы

Бір таблетканың құрамында

белсенді зат: ципрофлоксацин гидрохлориді (ципрофлоксацинге шаққанда)

– 250 мг және 500 мг;

қосымша заттар: микрокристалды целлюлоза, картоп крахмалы, жүгері крахмалы, гипромеллоза, тальк, натрий кроскармеллозасы, магний стеараты, сусыз коллоидты кремнийдің қостотығы, полиэтиленгликоль 6000 (макрогол 6000), титанның қостотығы (Е 171), полисорбат 80.

Сыртқы түрінің, иісінің, дәмінің сипаттамасы

Шығарылу түрі және қаптамасы

Поливинилхлоридті үлбірден және алюминий фольга негізіндегі қаптамалық орамдық материалдан жасалған пішінді ұяшықты қаптамада 10 таблеткадан.

Пішінді ұяшықты 1 қаптамадан медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынады.

3 жыл

Жарамдылық мерзімі өткеннен кейін қолдануға болмайды!

Түпнұсқалық қаптамасында, 25ºС-ден аспайтын температурада сақтау керек.

Балалардың қолы жетпейтін жерде сақтау керек!

Рецепт арқылы

Өндіруші туралы мәліметтер

«Технолог» ЖАҚ

Украина, 20300, Черкасская обл., Умань қ., Старая прорезная к-сі, 8.

тел./факс: +38-(04744) 4-03-02

E-mail: info@technolog.ua

Web site: www.lekhim.ua/tehnolog

Тіркеу куәлігінің ұстаушысы

«Технолог» ЖАҚ

Украина, 20300, Черкасская обл., Умань қ., Старая прорезная к-сі, 8.

тел./факс: +38-(04744) 4-03-02

E-mail: info@technolog.ua

Web site: www.lekhim.ua/tehnolog

Қазақстан Республикасы аумағында тұтынушылардан дәрілік заттар сапасына қатысты шағымдар (ұсыныстар) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

«L-Фарма» ЖШС

050061, Қазақстан Республикасы, Алматы қ., «Тастақ-1» ы/а, 3 үй

тел./факс: (727) 374-88-75, 374-88-72

elfarma@rambler.ru