Ципрофарм

• русский
• қазақша

• Скачать инструкцию медикамента

Саудалық атауы

Ципрофарм

Халықаралық патенттелмеген атауы

Ципрофлоксацин

Дәрілік түрі

0,3% 10 мл көз/құлақ тамшы дәрісі

Құрамы

1 мл ерітіндінің құрамында

белсенді зат - 3,0 мг ципрофлоксацин гидрохлориді ципрофлоксацинге шаққанда

қосымша заттар: бензалконий хлориді, натрий дигидрофосфатының дигидраты, сорбит, инъекцияға арналған су.

Сипаттамасы

Сәл сарғыш-жасылдау мөлдір сұйықтық

Фармакотерапиялық тобы

Офтальмологиялық және отологиялық ауруларды емдеуге арналған препараттар. Микробтарға қарсы препараттар.

АТЖ коды S03АА07

Фармакологиялық қасиеттері

Фармакокинетикасы

Препаратты жергілікті қолданған кезде әсер етуші заттың емдік концентрациясына көз тіндері мен биологиялық сұйықтықтарында немесе құлақ тіндерінде жетеді. Плазмада көз тамшыларын пайдаланған кезде Cmax – 5 нг/мл аздау. Орташа концентрациясы – 2,5 нг/мл төмендеу.

Фармакодинамикасы

Фторхинолон тобының әсер ету ауқымы кең микробтарға қарсы дәрісі. Механизмі ДНҚ синтезін, жасушалардың өсуі мен бөлінуін бұзу арқылы ДНК-гираза бактериясын бәсеңдетуге негізделген бактерицидті әсерге ие.

Грамтеріс бактерияларға қатысты анағұрлым белсенділіктегі микробтарға қарсы кең ауқымды әсері және аздау айқындылықтағы анаэробтарға қатысты ықпалы бар. Грамтеріс көптеген бактерияларға қатысты белсенділігі жоғары: Pseudomonas aeruginosa, Haemophilus influenzae, Escherichia coli, Shigella spp., Salmonella spp., Neisseria meningitidis, N. gonorrhoeae. Көп Staphylococcus spp. штаммдарына (пенициллиназа, төзімді метицилин өндіретін және өндірмейтін,), кейбір Enterococcus spp., сондай-ақ Campylobacter spp., Legionella spp., Mycoplasma spp., Chlamidia spp., Mycobacterium spp. штаммдарына қатысты белсенді. Ципрофлоксацин бета-лактамаза өндіретін бактерияларға қатысты белсенді болады.

Қолданылуы

Препаратқа сезімтал қоздырғыштар туындатқан көз және құлақтың жұқпалы-қабыну аурулары:

• көз және оның қосалқыларының жұқпалары: конъюнктивит, кератит, мөлдір қабықтың ойық жаралары

• офтальмологиядағы операциядан кейінгі жұқпалы асқынулардың алдын алуда

• сыртқы құлақтың жедел отиті, операциядан кейінгі жұқпалы асқынуларды емдеуде

Қолдану тәсілі және дозалары

Офтальмологияда қолданылуы

Егде жастағы емделушілерді қоса, ересектерде қолдану.

Мөлдір қабықтың ойық жарасы:

1-ші күн: ауыратын көзге алғашқы 6 сағат бойы әрбір 15 минут сайын 1 тамшыдан, содан соң ояу жүрген уақытта әрбір 30 минут сайын 1 тамшыдан тамызу керек.

2-ші күні: ауыратын көзге ояу жүрген уақытта сағат сайын 1 тамшыдан тамызу керек.

3-ші күннен 14- күнге дейін ауыратын көзге ояу жүрген уақытта әрбір 4 сағат сайын тамызу керек.

Емдеуді 14 күннен артық уақытқа жалғастыру қажет болса, дозалау сызбасын дәрігер белгілейді.

Көз және оның қосалқыларының жұқпалары:

Стандартты доза әрбір зақымданған көздің конъюнктивальді қабына 1-2 тамшыдан күніне 4 рет. Ауыр жұқпалар кезінде доза әрбір 2 сағат сайын 1-2 тамшы болуы мүмкін. Жағдайы жақсарғаннан кейін дозасы мен тамызу жиілігін азайтады. Емдеу ұзақтығы 5-10 күннен аспауы тиіс.

Тамызғаннан кейін қабақты қатты жабу немесе мұрын-жас окклюзиясы ұсынылады. Бұл көзге енгізілген дәрінің жүйелі сіңуін төмендетеді, сонысымен жүйелік жағымсыз әсерлер ықтималдығын азайтады.

Басқа жергілікті офтальмологиялық препараттармен қатарлас ем жүргізу жағдайында оларды қолданудың арасында 10-15 минуттық аралықты сақтау қажет.

Балалар. Балаларға дозаны 8 жастан бастап, ересектердікіндей белгілейді.

Құты ұшы мен ерітіндінің ластануын болдырмас үшін сақ болу керек және қабаққа, оған таяу жатқан бөліктерге немесе басқа беткейлерге құтының ұшын тигізбеу қажет.

Отологияда қолдану

Ересектер, егде жастағы емделушілерді қоса алғанда

Ципрофарм препаратының дозасы есту жолына күніне екі рет 4 тамшыны құрайды. Құлақ тампонын қолдану қажет болатын ересек емделушілер үшін дозаны тек бірінші қолдану кезінде ғана екі еселеуге (яғни 8 тамшы) болады. 8 жастан асқан балаларға

Дозасы есту жолына күніне екі рет 3 тамшыны құрайды.

Емдеу ұзақтығы 5-10 күннен аспауы тиіс. Кейбір жағдайларда емдеуді ұзартуға болады, бірақ ондай кезде жергілікті микрофлора сезімталдығын тексеру қажет.

Басқа жергілікті дәрілік заттармен қатарлас ем жүргізу жағдайында оларды қолданудың арасында 10-15 минуттық аралықты сақтау қажет.

Құты ұшы мен ерітіндінің ластануын болдырмас үшін сақ болу керек және құлақ қалқанына немесе есту жолына, дененің таяу жатқан бөліктеріне немесе басқа беткейлерге құтының ұшын тигізбеу қажет.

Сыртқы есту жолын мұқият тазалау керек. Вестибулярлық көтермелеуді болдырмас үшін ерітіндіні бөлме температурасында немесе дене температурасында енгізу ұсынылады. Емделуші ауыратын құлағына қатысты алғанда, ауырмайтын құлағы жағымен қырынан жатуы тиіс. Мүмкіндігінше осы күйінде 5 – 10 минут жатқаны дұрыс.

Жағымсыз әсерлері

Көру ағзалары жағынан бұзылулар

Жиі

• жайсыздықты сезіну, ақ өңездену (препаратты жиі қолданған кезде мөлдір қабықтың ойық жарасы бар емделушілерде байқалған).

Өңезденуі, әдетте емді бастағаннан кейінгі 24 сағаттан 7 күнге дейінгі кезеңде пайда болып, не бірден, немесе ем басталғаннан кейін 13 күн ішінде жоғалып кеткен.

– бөтен денені сезіну, қабыршықтардың/кристалдардың түзілуі

• қышу, ашыту, аздап ауыру және конъюнктива гиперемиясы

Жекелеген жағдайларда

• мөлдір қабықтың боялуы, кератопатия/кератит

• аллергиялық реакциялар

• қабақтың ісінуі, жас ағу, жарықтан қорқу, мөлдір қабық инфильтрациясы және көру өткірлігінің төмендеуі

Есту ағзалары жағынан бұзылулар

Жиі

• қышу, ашыту, дабыл жарғағы аймағының аздап ауыруы

Жекелеген жағдайларда

• құлақтың шыңылдауы

Басқалары

• ауыздың кермек татуы, жүрек айну, бас ауыру

• дерматит

• супержұқпаның дамуы

Қолдануға болмайтын жағдайлар

• хинолондар немесе ерітіндінің қосымша ингредиенттеріне жоғары сезімталдық

• көздің вирустық және зеңдік аурулары

• 8 жасқа дейінгі балалар

Дәрілермен өзара әрекеттесуі

Кейбір жүйелі хинолиндерді бір мезгілде қолдану қан плазмасында теофиллин концентрациясының жоғарылауына әкелетіні, кофеин метаболизміне әсер ететіні және варфарин мен оның туындылары сияқты ішу арқылы қабылданатын антикоагулянттардың әсерін күшейтетіні жайлы мәліметтер бар.

Циклоспоринді жүйелік ципрофлоксацинмен бірге қабылдаған емделушілердің қан сарысуында креатинин деңгейі уақытша жоғарылаған. Ципрофарм сілтілік ерітінділермен (негіздермен) үйлесімсіз.

Айрықша нұсқаулар

Көз тамшы дәрісі түріндегі ерітінді көзішілік инъекцияға арналмаған. Басқа да офтальмологиялық дәрілік заттарды пайдаланған кезде оларды енгізудің арасындағы аралық 5 минуттан кем болмауы тиіс.

Теріде бөртудің алғашқы белгілері немесе басқа жоғары сезімталдық реакция белгілері пайда бола бастағанда Ципрофарм препаратын тоқтатқан жөн.

Хинолондарды жүйелі қолданған емделушілерде жоғары сезімталдық реакцияларының (анафилактикалық реакциялар) көңіл аударатын, ал кейде тіптен өлімге соқтырған оқиғалары туралы хабарланған, әрі кейбір емделушілерде бірінші дозадан кейін-ақ болған. Кейбір реакциялар жүрек-тамыр коллапсы, естен тану, шаншу, жұтқыншақ немесе беттің ісінуі, диспноэ, есекжем немесе қышумен қатар жүрген. Ауыр анафилактикалық реакциялар эпинефрин және оттегімен емдеу, көктамыр ішіне құю, көктамыр ішіне антигистаминдік препараттарды, тамыр тарылтатын кортикостероидтарды, аминдерді енгізу, клиникалық көрсетілімдерге сәйкес өкпенің жасанды желдетілуін қоса алғандағы басқа да реанимациялық іс-шараларды қолдана отырып, кідірусіз емдеуді талап етеді.

Хинолондар класының дәрілік заттарын жүйелі қолдану кезінде тікелей күн сәулесінің әсеріне ұшыраған емделушілерде күнге ауыр күю түріндегі ауырлықтың орташадан ауыр дәрежесіне дейінгі фотоуытты әсері айқындалған. Күн сәулесінің шамадан тыс әсер етуінен сақтану керек. Фотоуыттылық пайда болған жағдайда емді тоқтату керек.

Кез келген басқа антибактериялық препараттар секілді, ципрофлоксацинді ұзақ қолдану, зеңдерді қоса алғанда, оған сезімталдығы жоқ микроорганизмдердің өсу белсенділігіне әкелуі мүмкін.

Супержұқпа туындаған кезде тиісті ем жүргізген жөн.

Ципрофарм көз/құлақ тамшы дәрісінің құрамында тітіркендіруді туғызуы мүмкін консервант түріндегі бензалконий хлориді бар. Бұл консерванттың жұмсақ жанаспалы линзаларды түссіздендіретіні де белгілі, сондықтан емделушілер Ципрофарм препаратын қолданар алдында жанаспалы линзаны алып, Ципрофарм препаратын тамызғаннан соң жанаспалы линзаны қайтадан салмас бұрын 15 минуттай күте тұруы тиіс.

Жалпы қабылданған ереже бойынша, көз жұқпалары болған кезде жанаспалы линзаны пайдаланбаған дұрыс.

Отитті емдеуге Ципрофарм препаратын қолданған кезде басқа емдік іс-шараларды (антибиотиктерді жүйелі қолдану, хирургиялық ем және т.б.) қолдану қажеттілігін дер кезінде белгілеу үшін емделушілерді медициналық тексеруден өткізу ұсынылады.

Препаратты жүктілік және лактация кезеңінде қолдану

Жүкті әйелдерге бақыланатын зерттеулер жүргізілмегендіктен, Ципрофармды жүктілік кезінде тек анасы үшін болжамды пайдасы ұрыққа төнетін ықтимал қауіптен асып түскенде ғана қолданған жөн.

Жергілікті қолданғаннан кейін ципрофлоксациннің емшек сүтіне енетін-енбейтіндігі туралы мәліметтер жоқ. Сондықтан Ципрофармды емшекпен емізетін аналарға тағайындаған кезде сақ болу керек.

Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Басқа тамшыларды қолдану жағдайларындағы сияқты уақытша айқын көрмеу немесе көрудің басқа да бұзылулары автокөлікті немесе басқа механизмдерді басқару қабілетіне әсер етуі мүмкін. Егер айқын көрмейтіндей болса, емделуші автокөлікті немесе басқа механизмдерді басқаруды көруі толық қалпына келгенше күте тұруы қажет. Ципрофарм препаратын құлаққа қолданғаннан кейін автокөлікті басқару немесе басқа механизмдермен жұмыс істеу қабілетіне ықпал ететін қандай да бір әсерлер туралы хабарланбаған.

Артық дозалануы

Көзге жергілікті қолданған кезде Ципрофарм препаратының артық дозалануы жағдайында көзді жылы сумен жуу қажет.

Құлаққа жергілікті қолданған кезде препараттың артық дозалануы жағдайында емделуші жатып, бір жақ қырына бұрып және құлағынан артық сұйықтық ағып кеткенше күтуі қажет.

Шығарылу түрі және қаптамасы

10 мл-ден полиэтилен құтыларда. Құты медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салынады.

Сақтау шарттары

Жарықтан қорғалған жерде, 8 ºС-ден 25 С-ге дейінгі температурада сақтау керек.

Мұздатып қатыруға болмайды.

Балалардың қолы жетпейтін жерде сақтау керек!

Сақтау мерзімі

3 жыл

Құты ашылғаннан кейінгі сақтау мерзімі – 28 тәулік.

Қаптамасында көрсетілген жарамдылық мерзімі өткеннен кейін препаратты қолдануға болмайды.

Дәріханалардан босатылу шарттары

Рецепт арқылы

Өндіруші

“Фармак” ЖАҚ

Мекенжайы: Украина, 04080, Киев қ., Фрунзе к-сі, 63.

Тіркеу куәлігі иесінің атауы мен елі

“Фармак” ЖАҚ, Украина

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы

Қазақстан Республикасы, 050009 Алматы қ., Абай к-сі, 157 5 кеңсе

Тел/факс: +7 (727) 250 66 23, электронды поштасы: Djatlova88@mail.ru