ЦЕРРЕПАРИН

ЦЕРРЕПАРИН

Цилостазол

Дәрілік түрі, дозалануы

Таблеткалар, 100 мг

Қан және қан түзу ағзалары. Тромбозға қарсы препараттар. Гепаринді қоспағанда, тромбоциттер агрегациясының тежегіштері. Цилостазол.

ATХ коды В01АС23

- қозғалмаған кезде ауырмайтын және шеткері тіндердің некрозының белгілері (Фонтейн жіктемесі бойынша ІІ сатыдағы шерткері артериялар аурулары) жоқ, мезгіл-мезгіл ақсаңдайтын пациенттерде ең үлкен жүріп өтетін қашықтықты және ауырусыз жүріп өтетін қашықтықты арттыру үшін.

- өмір сүру салтын өзгерту (шылым шегуді тоқтатуды және бақылаумен жүргізілетін физикалық оңалдыру бағдарламасын қоса) және мезгіл-мезгіл ақсақтық симптомдарын жеңілдету үшін басқа да араласымдар жеткіліксіз болып шыққан, мезгіл-мезгіл ақсаңдайтын пациенттерде екінші қатарлы ем ретінде.

Қолдануға дейінгі қажетті мәліметтер тізімі

- цилостазолға немесе препараттың кез келген компонентіне жоғары сезімталдық

- бүйрек функциясының ауыр жеткіліксіздігі (креатинин клиренсі ≤ 25 мл/мин)

- бауыр функциясының орташа немесе ауыр жеткіліксіздігі

- қан кетулерге бейімділік (мысалы, асқазанның және он екі елі ішектің ойық жара ауруының өршу сатысы), жуық арада (соңғы 6 ай ішінде) болған геморрагиялық инсульт, пролиферациялық диабеттік ретинопатия, нашар бақыланатын артериялық гипертензия)

- жүрек функциясының созылмалы жеткіліксіздігі

- анамнезде қарыншалық тахикардияның, қарыншалар фибрилляциясының немесе политопты қарыншалық экстрасистолияның болуы (аритмияға қарсы адекватты емнің болуынан немесе жоқтығынан тыс)

- QT аралығының ұзаруы

- анамнезде ауыр тахиаритмияның болуы

- тұрақсыз стенокардия немесе миокард инфарктісі (соңғы 6 ай ішінде), коронарлы артериялардағы инвазиялық араласым (соңғы 6 ай ішінде)

- екі немесе одан көбірек қосымша антиагреганттық немесе антикоагулянттық дәрілік заттарды (мысалы, ацетилсалицил қышқылын, клопидогрелді, гепаринді, варфаринді, аценокумаролды, дабигатранды, ривароксабанды немесе апиксабанды) бір мезгілде қабылдау

- жүктілік және емшек емізу кезеңі

- 18 жасқа дейінгі балалар мен жасөспірімдер

Сақтықпен

- бауыр функциясының орташа жеткіліксіздігі бар пациенттерге

- жүректің созылмалы ишемиялық ауруы бар пациенттерге (атап айтқанда, тұрақты стенокардия кернеуінде)

- жүрекшелік немесе қарыншалық экстрасистолиясы, жүрекшелердің фибрилляциясы немесе жүрекшелердің жыпылықтауы бар пациенттерге

- қант диабеті бар пациенттерге (көзішілік қан құйылулардың жоғары қаупі)

- CYP3A4 немесе CYP2C19 блокаторларын қабылдап жүрген пациенттерге. Мұндай жағдайларда цилостазолдың дозасын тәулігіне екі рет 50 мг дейін азайту қажет

- артериялық қысымды төмендететін дәрілік препараттарды қабылдап жүрген пациенттерге

- қанның ұйығыштығын төмендететін дәрілік препараттарды қабылдап жүрген пациенттерге.

Қолдану кезіндегі қажетті сақтық шаралары

Цилостазолмен емдеуді бастар алдында хирургиялық реваскуляризация немесе консервативтік ем сияқты емдеудің басқа тәсілдерін тағайындау мүмкіндігіне баға беру керек.

Фармакологиялық әсер ету механизмінің есебінен цилостазол тахикардияны, жүректің қағуын, тахиаритмияны және/немесе артериялық гипотензияны туындатуы мүмкін. Цилостазолды қабылдаған кезде жүректің жиырылу жиілігі минутына 5-7 соғуға артуы мүмкін. Қауіп тобының пациенттерінде (мысалы, тұрақты стеокардиясы бар пациенттерде) жүректің жиырылу жиілігі стенокардияның ұстамасын өршітуі мүмкін. Мұндай пациенттердің жағдайын мұқият бақылау қажет.

Цилостазолды жүрекшелік немесе қарыншалық экстрасистолиясы бар пациенттерге, сондай-ақ жүрек фибрилляциясы немесе жүрекшенің жыпылықтауы бар пациенттерге тағайындағанда сақтық таныту қажет.

Қан кетулердің немесе аздаған соғылулардан «көгерулердің» (теріасты гематомаларының) пайда болуының кез келген жағдайы туралы мәлімдеп отыруды пациенттерге алдын ала ескерту қажет. Көздің торқабығында қан құйылу пайда болған жағдайда цилостазол қабылдауды тоқтату керек.

Цилостазол тромбоциттер агрегациясының тежегіші болып табылатындықтан, хирургиялық араласымдарда (тісті жұлу сияқты кіші инвазиялық емшараларды қоса) қан кетулер қаупі жоғарылайды.

Жоспарлы хирургиялық араласымдарда (егер антиагреганттық әсер ұнамсыз болса) цилостазол қабылдауды операциядан 5 күн бұрын тоқтату керек.

Тромбоцитопенияны, лейкопенияны, агранулоцитозды, панцитопенияны немесе апластикалық анемияны қоса, гематологиялық бұзылулардың сирек немесе өте сирек жағдайлары туралы мәлімделді. Көптеген жағдайларда бұл бұзылулар цилостазолды қабылдауды тоқтатқаннан кейін қайтты. Алайда кейбір жағдайларда панцитопения және апластикалық анемия өліммен аяқталуға әкелді.

Пациентке жоғары қызба (пирексия) және баспа сияқты гематологиялық асқынулардың ерте көріністері болуы мүмкін кез келген симптомдарды дәрігерге дереу мәлімдеу керектігін алдын ала ескерткен жөн. Инфекцияға күдіктенгенде немесе гематологиялық асқынулардың клиникалық симптомдары пайда болғанда қанға толық талдау жасау керек. Клиникалық симптомдар немесе зертханалық гематологиялық асқынулар пайда болған жағдайда цилостазол қабылдауды дереу тоқтатқан жөн.

Цилостазолды артериялық қысымды төмендететін (рефлекторлық тахикардия дамитын аддитивті гипотензиялық әсері болуы мүмкін), сондай-ақ қанның ұйығыштығын азайтатын немесе тромбоциттердің агрегациясын тежейтін дәрілік препараттармен бірге қолданғанда сақтық таныту керек.

Басқа дәрілік препараттармен өзара әрекеттесуі

Ацетилсалицил қышқылы

Цилостазолды және ацетилсалицил қышқылын қысқа мерзімдік (≤ 4 күн бойы) бір мезгілде қолдану, ацетилсалицил қышқылының монотерапиясымен салыстырғанда, ex vivo жағдайларда тромбоциттердің АДФ-индукцияланған агрегациясының 23-25%-ға бөгеттелуінің артуына әкеледі.

Клопидогрел және басқа антиагрегантты дәрілік заттар

Дені сау адамдарға жүргізілген зерттеулерде цилостазолды клопидогрелмен бір мезгілде қолдану тромбоциттердің санына, протромбинді уақытқа (ПУ) және белсенділендірілген ішінара тромбопластиндік уақытқа (БІТУ) ешқандай ықпалын тигізген жоқ. Клопидогрелді монотерапия ретінде де, сонымен бірге цилостазолмен біріктіріп те қолданғанда дені сау адамдарда қан кету уақыты артты. Цилостазолды қабылдау қан кету уақытының қосымша елеулі артуына әкелген жоқ. Дегенмен, цилостазолды тромбоциттердің агрегациясын тежейтін кез келген препаратпен бір мезгілде қолданғанда сақтық таныту ұсынылады. Қан кету уақытын ұдайы бақылау ұсынылады. Цилостазолды антиагреганттық және/немесе антикоагулянттық екі және одан көбірек дәрілік заттарды бір мезгілде қабылдап жүрген пациенттерге қолдануға болмайды.

Пероральді антикоагулянттар

Клиникалық зерттеулерде цилостазолды бір реттік қабылдау варфариннің метаболизмін тежеген жоқ және қанның ұйығыштығының көрсеткіштеріне (ПУ, БІТУ, қан кету уақыты) ықпалын тигізген жоқ. Дегенмен, цилостазолды кез келген антикоагулянтты препаратпен бір мезгілде қолданғанда сақтық таныту ұсынылады. Цилостазолды антиагреганттық және/немесе антикоагулянттық екі және одан көбірек дәрілік заттарды бір мезгілде қабылдап жүрген пациенттерге қолдануға болмайды.

Р-450 цитохромы изоферменттерінің тежегіштері

Бауырда цилостазол, негізінен, Р-450 цитохромының, көбінесе CYP3А4 және CYP2С19 және, аз дәрежеде, CYP1A2 ферменттерінің әсер етуімен метаболизденеді. Тромбоциттердің агрегациясын тежеу қабілеті бойынша цилостазолдан 4-7 есе басым дегидроцилостазол негізінен CYP3А4 қатысуымен түзіледі деп саналады. Тромбоциттердің агрегациясын тежеу қабілетінің айқындылығы бес есе аз болатын 4`-транс-гидроксицилостазол негізінен CYP2С19 әсер етуімен түзіледі. Сәйкесінше, CYP3А4 тежейтін (мысалы, кейбір макролидтер [эритромицин, кларитромицин], зеңге қарсы азольді препараттар [кетоконазол, итраконазол], протеаза тежегіштері) және CYP2С19 тежейтін препараттар (мысалы, протонды помпа тежегіштері [омепразол, эзомепразол]) цилостазолдың жалпы фармакологиялық белсенділігін арттырады және оның жағымсыз әсерлерінің күшеюіне мүмкіндік беруі мүмкін. Сәйкесінше, CYP3А4 немесе CYP2С19 күшті тежегіштерін қабылдап жүрген пациенттерге цилостазолды тәулігіне 2 рет 50 мг дозада тағайындау ұсынылады.

Цилостазолды эритромицинмен (CYP3А4 күшті тежегіші) бір мезгілде қабылдағанда цилостазолдың, дегидроцилостазолдың және 4`-транс-гидроксицилостазолдың AUC көрсеткіштері, сәйкесінше, 72%-ға, 6%-ға және 119%-ға артады. AUC көрсеткіштерінің өзгерулері негізінде эритромицинмен бір мезгілде қолданғанда цилостазолдың фармакологиялық белсенділігінің 34%-ға артатындығы анықталды.

Цилостазолды кетоконазолмен (CYP3А4 күшті тежегіші) бір мезгілде қабылдағанда цилостазолдың AUC көрсеткіші 117%-ға артады, дегидроцилостазолдың AUC көрсеткіші 15%-ға азаяды, 4`-транс-гидроксицилостазолдың AUC көрсеткіші 87%-ға артады. AUC көрсеткіштерінің өзгерулері негізінде кетоконазолмен бір мезгілде қолданғанда цилостазолдың жалпы фармакологиялық белсенділігінің 34%-ға артатындығы анықталды.

Цилостазолды дилтиаземмен (CYP3А4 әлсіз тежегіші) бір мезгілде қабылдағанда цилостазолдың, дегидроцилостазолдың және 4`-транс-гидроксицилостазолдың AUC көрсеткіштері, сәйкесінше, 44%-ға, 4%-ға және 43%-ға артады. AUC көрсеткіштерінің өзгерулері негізінде дилтиземмен бір мезгілде қолданғанда цилостазолдың жалпы фармакологиялық белсенділігінің 19%-ға артатындығы анықталды. Дилтиаземмен бір мезгілде қолданғанда цилостазолдың дозаны түзетудің қажеті жоқ.

100 мг цилостазолды 240 мл грейпфрут шырынымен (ішектік CYP3А4 тежегіші) бір мезгілде бір реттік қабылдағанда цилостазолдың фармакокинетикалық көрсеткіштерінің елеулі өзгерістері білінген жоқ. Цилостазолдың дозасын түзетудің қажеті жоқ. Дегенмен, грейфрут шырынын көп мөлшерде қабылдау цилостазолдың фармакокинетикасына ықпалын тигізуі мүмкін.

Цилостазолды омепразолмен (CYP2С19 күшті тежегіші) бір мезгілде қабылдағанда цилостазолдың және дегидроцилостазолдың AUC көрсеткіштері, сәйкесінше, 22%-ға және 68%-ға артады, мұндайда 4`-транс-гидроксицилостазолдың AUC көрсеткіші 36%-ға азаяды. AUC көрсеткіштерінің өзгерулері негізінде омепразолмен бір мезгілде қолданғанда цилостазолдың жалпы фармакологиялық белсенділігінің 47%-ға артатындығы анықталды. Омепразолмен бір мезгілде қолданғанда цилостазолдың дозасын тәулігіне 2 рет 50 мг-ге дейін азайту ұсынылады.

Р-450 цитохромы изоферменттерінің субстраттары

Цилостазол ловастатиннің (CYP3A4 субстраты) және оның бета-гидроксильді метаболитінің AUC көрсеткіштерін 70%-ға арттырады. Цилостазолды емдік ауқымы тар CYP3A4 субстраттарымен (цизаприд, галофантрин, пимозид, қастауыш алкалоидтары сияқты) бір мезгілде қолданғанда сақтық таныту ұсынылады.

Сондай-ақ цилостазолды CYP3A4 (симвастатин, аторвастатин және ловастатин) қатысуымен метаболизденетін ГМГ-КоА-редуктаза тежегіштерімен (статиндермен) бір мезгілде қолданғанда сақтық таныту ұсынылады.

Р-450 цитохромы изоферменттерінің индукторлары

CYP3A4 және CYP2C19 белсенділігін арттыратын препараттардың (карбамазепин, фенитоин, рифампицин, шілтерлі шайқурай препараттары сияқты) циластазолдың фармакокинетикасына әсері зерттелген жоқ. Бір мезгілде қабылдағанда цилостазолдың антиагреганттық әсері теориялық тұрғыдан төмендеуі мүмкін, сондықтан қан кету уақытын ұдайы бақылау қажет. Клиникалық зерттеулерде шылым шегу (CYP1A2 белсенділігін күшейтетін фактор) қан плазмасында цилостазолдың концентрациясын 18%-ға азайтатыны анықталды.

Басқа да дәрілік заттар

Цилостазолды артериялық қысымды төмендететін кез келген препараттармен бір мезгілде қолданғанда сақ болу қажет, өйткені рефлекторлық тахикардия дамитын аддитивті гипотензиялық әсер болуы мүмкін.

Арнайы ескертулер

Педиатрияда қолданылуы

Бала жасындағы пациенттер үшін осы препараттың қауіпсіздігі және тиімділігі анықталған жоқ.

Жүктілік

Жүкті әйелдерге цилостазолды қолдану туралы деректер жоқ.

Жүктілік кезінде цилостазолды қолдануға болмайды.

Лактация

Адамның емшек сүтіне цилостазолдың өтетін-өтпейтіндігі белгісі. Жаңа туған нәрестеге ықтимал жағымсыз әсерімен байланысты, емшек емізу кезінде цилостазолды қолдануға болмайды.

Көлік құралдарын және потенциалды қауіпті механизмдерді басқару қабілетіне дәрілік заттың ықпал ету ерекшеліктері

Цилостазол бас айналуды туындатуы мүмкін. Емделу кезеңінде көлік құралдарын басқарғанда немесе жұмыс жасағанда сақтық таныту ұсынылады.

Қолдану жөніндегі нұсқаулар

Дозалау режимі

Цилостазолдың ұсынылатын дозасы тәулігіне екі рет 100 мг құрайды.

Қабылдау уақыты көрсетілген қолдану жиілігі

Цилостазолды тамақ ішуден 30 минут бұрын қабылдау керек. Цилостазолды тамақтану кезінде қабылдағанда қан плазмасында препараттың ең жоғары концентрациясының (Cmax) артуы білінеді, бұл жағымсыз құбылыстар санының жоғарылауымен астасуы мүмкін.

Емдеу ұзақтығы

Цилостазолмен емдеуді мезгіл-мезгіл ақсақтықты емдеу тәжірибесі бар дәрігердің бақылауымен бастау керек. Дәрігер пациенттің жағдайына 3 ай емдегеннен кейін қайталап баға беруі тиіс. Егер цилостазолмен емдеу адекватты әсер бермесе, немесе мезгіл-мезгіл ақсақтық симптомдары айқындылығының азаюы байқалмаса, цилостазол қолдануды тоқтату және емдеудің басқа әдістерін қарастыру керек.

Цилостазолмен ем қабылдап жүрген пациенттер өмір сүру салтын өзгерту жөніндегі нұсқауларды (шылым шегуден бас тарту, дене жаттығулары) орындауы және жүрек-қантамырлық асқынулар қаупін азайтуға бағытталған дәрі-дәрмектік ем (гиполипидемиялық және антиагреганттық дәрілік заттарды қабылдау) қабылдауды жалғастыруы тиіс. Цилостазол аталған емдеуді алмастырушы болып табылмайды.

Цилостазолды пациенттердің ерекше топтарында қолдану

Егде жас

Егде жастағы пациенттерде цилостазолдың дозасын өзгертуге арнайы талаптар жоқ.

Бүйрек функциясының жеткіліксіздігі

Креатинин клиренсі > 25 мл/мин пациенттерде дозаны өзгерту қажет емес. Цилостазолды креатинин клиренсі < 25 мл/мин пациенттерге қолдануға болмайды.

Бауыр функциясының жеткіліксіздігі

Бауыр функциясының жеңіл жеткіліксіздігі бар пациенттерде дозаны өзгертудің қажеті жоқ. Бауыр функциясының орташа және ауыр жеткіліксіздігі бар пациенттерде цилостазолды қолдану жөнінде деректер жоқ. Цилостазол бауырдың микросомальді тотығу ферменттерімен елеулі дәрежеде метаболизденетін болғандықтан, препаратты бауыр функциясының орташа және ауыр жеткіліксіздігі бар пациенттерде қолдануға болмайды.

CYP3A4 немесе CYP2C19 күшті тежегіштерін бір мезгілде қабылдау

CYP3A4-ке күшті бөгеттеуші әсер ететін препараттарды (мысалы, кейбір макролидтер), немесе CYP2C19-ға күшті бөгеттеуші әсер ететін препараттарды (мысалы, омепразол) қабылдап жүрген пациенттерде цилостазолдың дозасын тәулігіне екі рет 50 мг-ге дейін азайту керек.

Артық дозалану жағдайында қабылдау қажет шаралар

Симптомдары: бастың қатты ауыруы, диарея, тахикардия және, жүрек ырғағының бұзылулары болуы ықтимал.

Емі: симптоматикалық ем.

Дәрілік препаратты қабылдамас бұрын дәрігерге немесе фармацевтке кеңес алуға жүгініңіз.

ДП стандартты қолдану кезінде көрініс беретін жағымсыз реакциялар сипаттамасы және осы жағдайда қабылдау керек шаралар

Өте жиі

- бас ауыру

- диарея, нәжістің бұзылуы

Жиі

- экхимоз

- ісінулер (шеткері ісінулер, беттің ісінуі), анорексия

- бас айналу

- жүректің қағуы, тахикардия, стенокардия, аритмия, қарыншалық

экстрасистолалар

- көзге қан құйылулар, асқазан-ішектің қан кетулер

- ринит, фарингит

- бөртпе, қышыну

- кеуденің ауыруы, астения

- жүректің айнуы, құсу, диспепсия, метеоризм, іштің ауыруы

Жиі емес

- анемия

- аллергиялық реакциялар

- гипергликемия, қант диабеті

- мазасыздық, ұйқысыздық, ұйқының бұзылуы (әдеттен тыс түс көрулер)

- миокард инфарктісі, жүрекшелердің фибрилляциясы, жүрек функциясының созылмалы жеткіліксіздігі, қарыншаүстілік тахикардия, қарыншалық тахикардия, синкопальді жағдай

- ысынулар, артериялық гипертензия, артериялық гипотензия, бассүйекішілік қан құйылу, өкпеден қан кету, бұлшықетішілік гематомалар, тыныс алу жолдарынан қан кету, тері астына қан құйылу

- ентігу (диспноэ), пневмония, жөтел

- гастрит

- экзема, тері бөртпелері, Стивенс-Джонсон синдромы, уытты эпидермальді некролиз, есекжем

- миалгия

- қалтырау, дімкәстік

Сирек

- қан кету уақытының артуы, тромбоцитоз

- бүйрек функциясының жеткіліксіздігі, бүйрек функциясының бұзылуы

Жиілігі белгісіз:

- қан кетулерге бейімділік, тромбоцитопения, гранулоцитопения,

агранулоцитоз, лейкопения, панцитопения, апластикалық анемия

- парез, гипестезия

- конъюнктивит

- құлақтағы шуыл

- интерстициальді пневмония

- гепатит, бауыр функциясы көрсеткіштерінің қалыпты мәндерден ауытқуы, сарғаю

- гематурия, поллакиурия

- гипертермия, ауыру

- қанда несеп қышқылы мөлшерінің жоғарылауы, қанда мочевина мөлшерінің жоғарылауы, қанда креатинин мөлшерінің жоғарылауы

Жағымсыз дәрілік реакциялар туындаған жағдайда медицина қызметкеріне, фармацевтикалық қызметкерге немесе, дәрілік препараттардың тиімді еместігі туралы мәлімдемелерді қоса, дәрілік препараттарға жағымсыз реакциялар (әсерлер) жөнінде деректердің ақпараттық базасына тікелей хабарлау керек

Қазақстан Республикасы Денсаулық сақтау министрлігі Тауарлар мен көрсетілетін қызметтердің сапасы мен қауіпсіздігін бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

Дәрілік препараттың құрамы

Бір таблетканың құрамында

белсенді зат – цилостазол, 100 мг

қосымша заттар: сорбитол (E-420), тальк, микрокристалды целлюлоза, кросповидон, кальций кроскармеллозасы, кремнийдің сусыз коллоидты қостотығы, магний стеараты, стеарин қышқылы.

Сыртқы түрінің, иісінің, дәмінің сипаттамасы

Ақ және ақ дерлік түсті, беті жалпақ, бір жақ бетінде «С100» өрнегі бар дөңгелек пішінді таблеткалар.

Шығарылу түрі және қаптамасы

Алюминий фольгадан, полиамидтен, алюминийден және поливинилхлоридтен жасалған пішінді ұяшықты қамтамаға 14 таблеткадан салынған.

Пішінді ұяшықты 4 қаптама медициналық қолдану жөнінде қазақ және орыс тілдеріндегі нұсқаулықпен бірге картон қорапшаға салынған.

36 ай.

Жарамдылық мерзімі өткеннен кейін қолдануға болмайды!

25°С-ден аспайтын температурада сақтау керек.

Балалардың қолы жетпейтін жерде сақтау керек!

Рецепт арқылы

Өндіруші туралы мәлімет

Laboratorios Normon, S.A., Ronda de Valdecarrizo, 6 – 28760, Tres Cantos - Мадрид (Испания)

Тіркеу куәлігінің ұстаушысы

«Новатор Фарма» ЖШС, 8 Shepherd Market, офис 21 Лондон, Ұлыбритания

Тұтынушылардан дәрілік заттың сапасы жөніндегі шағымдарды (ұсыныстарды) Қазақстан Республикасы аумағында қабылдайтын және тіркеуден кейін дәрілік заттың қауіпсіздігін бақылауға жауапты ұйымның атауы, мекенжайы және байланыс жасау деректері (телефон, факс, электронды пошта)

«Новатор Фарма» ЖШС Қазақстан, Қазақстан Республикасы, Алматы қаласы, Масаншы көшесі 23/10, Тел: + 7 727 978 6077

novatorpharma2@bk.ru