Церетон® (250 мг/мл)
Инструкция
-
русский
-
қазақша
Саудалық атауы
Церетон®
Халықаралық патенттелмеген атауы
Холин альфосцераты
Дәрілік түрі
Көктамыр ішіне және бұлшықет ішіне енгізуге арналған 250 мг/мл ерітінді
Құрамы
Бір ампуланың (4 мл) ішінде
белсенді зат - 100 % затқа шаққанда холин альфосцераты 1000 мг,
қосымша зат - инъекцияға арналған су.
Сипаттамасы
Түссіз мөлдір сұйықтық
Фармакотерапиялық тобы
Жүйке жүйесі ауруларын емдеуге арналған басқа да препараттар. Парасимпатомиметиктер. Басқа да парасимпатомиметиктер. Холин альфосцерат
АТХ коды N07AX02
Фармакологиялық қасиеттері
Фармакокинетикасы
Гематоэнцефалдық бөгет арқылы оңай өтеді, 85 %-ы көміртек қостотығы түрінде өкпе арқылы жеңіл сыртқа шығарылады, қалған мөлшері (15 %) бүйрекпен және ішек арқылы шығарылады.
Фармакодинамикасы
Ноотропты дәрі. Құрамында 40,5% метаболизмдік қорғалған холині бар орталықтық холин көтермелегіші. Метаболизмдік қорғаныс мида холиннің бөлінуіне мүмкіндік береді. Нейрондық жарғақшалардағы ацетилхолин және фосфатидилхолин синтезін қамтамасыз етеді, орталық жүйке жүйесіндегі қан ағымын жақсартады және метаболизмдік үдерістерді күшейтеді, ретикулярлы формацияны белсендіреді. Мидың жарақатты зақымданған жағындағы қан ағымының сызықтық жылдамдығын арттырады, мидың кенеттен болатын биоэлектрлік белсендірілуінің кеңістік-уақыт сипаттамалары қалыптаcуына, ошақтық неврологиялық симптомдардың кері дамуына және сананың қалпына келуіне ықпал етеді; ми қантамырларының ауруларына (дисциркуляторлық энцефалопатия және ми қан айналымы бұзылуының қалдық құбылыстары) шалдыққан науқастардың танымдық және мінез-құлық реакцияларына оң әсер көрсетеді. Нейрондар жарғақшаларының фосфолипидті құрамының өзгеруі және холинергиялық белсенділіктің төмендеуі сияқты инволюциялық психоорганикалық синдромның патогенетикалық факторларына профилактикалық және түзетуші әсер етеді. Физиологиялық жағдайларда ацетилхолиннің дозаға тәуелді шығарылуын көтермелейді; фосфатидилхолиннің (жарғақшалық фосфолипидтің) синтезіне қатыса отырып, синапстық берілісті, нейрональді жарғақшалар иілгіштігін, рецепторлар функциясын жақсартады. Репродуктивтік циклге ықпалын тигізбейді және тератогенді, мутагенді әсері жоқ.
Қолданылуы
- бас сүйек-мидың ауыр жарақатынан және ишемиялық инсульттен кейінгі жедел және қалпына келу кезеңінде, ошақты ми жартышарының симптоматикасы немесе ми бағаны зақымдануының симптомдарымен бірге жүретін геморрагиялық инсульттің қалпына келу кезеңінде
- мидың дегенеративті және инволюциялық өзгерістері аясындағы психоорганикалық синдромда
- когнитивті бұзылыстар (ойлау функциясының, жадының бұзылуы, сананың шатасуы, бағдарсыздық, уәждің, ынтаның және зейін шоғырландыру қабілетінің төмендеуі), оның ішінде деменция және энцефалопатияда
- қарттық жалған меланхолияда
Қолдану тәсілі және дозалары
Тек дәрігердің тағайындауымен ғана қолдану керек.
Жедел жағдайларда көктамыр ішіне (баяу) немесе бұлшықет ішіне терең (баяу) тәулігіне 1000 мг (1 ампула) 10 -15 күн бойы енгізеді.
Жағымсыз әсерлері
- ауыз қуысы шырышты қабығының құрғауы, фарингит, жүрек айнуы, іштің қатуы, диарея
- бас ауыруы, бас айналуы, ұйқышылдық, ұйқысыздық, озбырлық, үрей, ашушаңдық, ми ишемиясы, құрысулар
- аллергиялық реакциялар (бөртпе, есекжем)
- несеп шығарудың жиілеуі
- енгізген орнының ауыруы
Қолдануға болмайтын жағдайлар
- препаратқа жоғары сезімталдық
- геморрагиялық инсульт (жедел сатысы)
- жүктілік және лактация кезеңі
- 18 жасқа дейінгі балалар мен жасөспірімдер
Дәрілермен өзара әрекеттесуі
Басқа препараттармен айтарлықтай өзара әрекеттесулері анықталмаған.
Айрықша нұсқаулар
Педиатрияда қолданылуы
Препараттың балаларға қолданылуы жөніндегі клиникалық тәжірибе жеткіліксіз. Препаратты педиатрияда қолдану ұсынылмайды.
Дәрілік заттың көлік құралдарын немесе қауіптілігі зор механизмдерді басқару қабілетіне ықпал ету ерекшеліктері
Церетон® психомоторлық реакциялардың жылдамдығына теріс әсер ететіні жөнінде мәліметтер жоқ болса да, емдеу кезінде жоғары зейін шоғырландыруды және психомоторлық реакциялардың жылдамдығын талап ететін көлік немесе қауіптілігі зор механизмдерді басқарғанда сақ болу керек.
Артық дозалануы
Симптомдары: препараттың жағымсыз әсерлерінің күшеюі.
Емі: симптоматикалық ем.
Шығарылу түрі және қаптамасы
Көктамыр ішіне және бұлшықет ішіне енгізуге арналған 250 мг/мл ерітінді.
4 мл-ден түрлі түсті сындыру сақинасы немесе түрлі түсті нүктесі мен кертігі бар түссіз шыныдан жасалған ампулаларға құйылады. Ампулаларға қосымша бір, екі немесе үш түрлі түсті сақина және/немесе екі өлшемді штрих-код және/немесе әріптік-сандық кодпен немесе қосымша түрлі түсті сақиналарсыз, екі өлшемді штрих-код, әріптік-сандық кодпен болады.
3 немесе 5 ампуладан поливинилхлоридті үлбірден және алюминий фольгадан немесе полимер үлбірден жасалған немесе фольгасыз және үлбірсіз пішінді ұяшықты қаптамаға салынады.
1 немесе 2 пішінді ұяшықты қаптамадан медицинада қолданылуы жөніндегі мемлекеттік және орыс тілдеріндегі нұсқаулықпен бірге картон қорапшаға салынған.
Сақтау шарттары
Жарықтан қорғалған жерде, 25 С-ден аспайтын температурада сақтау керек.
Балалардың қолы жетпейтін жерде сақтау керек!
Сақтау мерзімі
5 жыл
Жарамдылық мерзімі өткеннен кейін қолдануға болмайды.
Дәріханалардан босатылу шарттары
Рецепт арқылы
Өндіруші
«ФармФирма «Сотекс» ЖАҚ, Ресей
141345, Мәскеу облысы, Сергиев-Посад муниципалдық ауданы,
Березняков елді мекені,
Беликово кенті, 11 үй
Тел./факс: (495) 956-29-30.
Тіркеу куәлігінің иесі
«ФармФирма «Сотекс» ЖАҚ, Ресей
Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы:
«Tipkey» ЖК, 050004, ҚР, Алматы, Абылай хан даңғылы 60, 720 кеңсе.
Тел.: +7 705 286 18 04