Фамо® (40 мг)

• русский
• қазақша

• Скачать инструкцию медикамента

Саудалық атауы

ФАМО®

Халықаралық патенттелмеген атауы

Фамотидин

Дәрілік түрі

Yлбірлі қабықпен қапталған 40мг таблеткалар,

Құрамы

Бір таблетканың құрамында

белсенді зат – 40 мг фамотидин,

қосымша заттар: жүгері крахмалы, лактоза моногидраты, микрокристалды целлюлоза РН 102, магний стеараты, Коллоидты кремнийдің қостотығы (Аэросил 200),

SepifilumТМ 5021 Red қабықтың құрамы: метилгидроксипропилцеллюлоза, микрокристалды целлюлоза, макрогол – 40 ОЕ стеараты, титанның қостотығы (Е 171), темірдің (III) қызыл тотығы (Е 172), тазартылған су.

Сипаттамасы

Екі жағы дөңес, бір бетінде сызығы бар, кірпіш түстес үлбірлі қабықпен қапталған дөңгелек таблеткалар.

Фармакотерапиялық тобы

Қышқылдықтың бұзылуына байланысты ауруларды емдеуге арналған препараттар. Ойық жараға қарсы препараттар және гастроэзофагеальді рефлюксті емдеуге арналған препараттар (GORD). Н2-гистаминдік рецепторлардың блокаторлары. Фамотидин

АТХ коды А02ВА03

Фармакологиялық қасиеттері

Фармакокинетикасы

ФАМО® ішке қабылдағанда асқазан ішек жолдарынан тез cіңеді, бірақ толық емес. Қан плазмасындағы ең жоғары концентрациясына (Сmax) 2 сағаттан кейін жетеді. Биожетімділігі - 40-45 % құрайды және тамақ болғанда болмашы ғана өзгереді. Қан ақуыздарымен байланысуы 15-20 % құрайды. Қан плазмасынан жартылай шығарылу кезеңі (T1/2) шамамен 3 сағатты құрайды және бүйрек қызметі бұзылған науқастарда бұл мерзім ұзарады. Белсенді заттың аз бөлігі фамотидин S-оксидін түзе отырып, бауырда метаболизденеді. Жартылый ыдырау уақыты 2,5-3,5 сағат. Фамотидин бауыр мен бүйрек арқылы шығарылады. Дозаның 25 - 30 %-ы өзгермеген түрде несеппен шығарылады.

Фармакодинамикасы

ФАМО® - H2-гистаминдік рецепторларының антогонисі болып табылады және асқазан сөлінің бөлінуін бәсеңдетеді. Фамотидин тұз қышқылының негізгі және түнгі сөлінісін тежейді. Фамотидин ашқарынға немесе тамақтан кейін қолданғанда, қан сарысуындағы гастриннің деңгейіне әсер етпейді немесе аз ғана әсер етеді. Фамотидин асқазаннан тамақтың шығарылуына және ұйқы безінің экзокриндік қызметіне әсер етпейді.

Қолданылуы

- функционалдық диспепсияда (қыжылдау, эпигастрий аймағының ауыруы)

- гастроэзофагеальді рефлюкс ауруында (ГЭРА)

- асқазан мен он екі елі ішектің ойық жара ауруында

- Золлингер-Эллисон синдромында

Қолдану тәсілі және дозалары

Он екі елі ішектің ойық жара ауруы асқынуында ішу арқылы қолдануға ұсынылатын доза – 40 мг күніне бір рет ұйықтар алдында. Емнің ұзақтығы - 4-8 апта. Қайталанатын дуоденальді ойық жарада ішу арқылы қолдануға ұсынылатын доза – 20 мг күніне бір рет ұйықтар алдында.

Асқазанның ойық жара ауруының жеңіл ағымында ішу арқылы қолдануға ұсынылатын доза – 40 мг күніне бір рет ұйықтар алдында. Емнің ұзақтығы 6-8 апта.

Золлингер-Эллисон синдромында ішу арқылы қолдануға ұсынылатын доза - 20 мг әр 6 сағат сайын. Ерекше жағдайларда, науқастың жағдайына қарай дозаны әр 6 сағат сайын 160 мг-ға дейін арттыруға болады. Емнің ұзақтығы емделушінің жағдайы мен аурудың ауырлығына байланысты.

Гастроэзофагеальді рефлюкс ауруында (ГЭРА) ішу арқылы қабылдауға ұсынылатын доза күніне екі рет 20 мг немесе 40 мг, емдеу ұзақтығы 12 аптаға дейін.

Helicobacter pylori астасқан ойық жара ауруы мен ГЭРА кезінде ФАМО® кешенді эрадикациялық ем құрамында пайдаланылуы тиіс.

Бүйрек жеткіліксіздігі (креатинин клиренсі <30 мл/мин аз) бар науқастарда ұсынылатын дозаны тәулігіне 20 мг дейін төмендетуге немесе дозаны төмендетпей, қабылдау арасындағы аралықты 36-48 сағатқа дейін ұзартуға болады.

Қажет болғанда антацидтермен бірге қолдануға болады.

Жағымсыз әсерлері

- бас ауыру, бас айналу

- анафилаксия, беттің немесе көздің ісінуі, есекжем, бөртпе, конъюнктивит

- құрысулар, психика бұзылыстары, елестеулер, сананың шатасуы, қозу, депрессия, мазасыздық, либидоның төмендеуі, парестезиялар, ұйқысыздық, ұйқышылдық, үрейлену сезімі

- бронх түйілуі

- аритмия, жүректің қатты соғуы, атриовентрикулярлық блок

- құлақтың шуылдауы, дәм сезудің бұзылуы

- қызба, астения, шаршау

- холестатикалық сарғаю, құсу, жүрек айну, іш аймағындағы жайсыздық, анорексия, ауыздың құрғауы, іш қату, диарея, қандағы трансаминазалардың жоғарлауы

сирек

- агранулоцитоз, панцитопения, лейкопения, тромбоцитопения

- импотенция, гинекомастия, ысынулар.

өте сирек

- токсидермия, шаштың түсуі, безеу, қышыну, терінің құрғауы, акне, алопеция, уртикарлық бөрту, уытты эпидермальді некролиз, Квинке ісінуі

- бұлшықеттер құрысуларын қоса сүйек-бұлшықеттердің ауыруы, қатты жоғары емес қызба, артралгия

Қолдануға болмайтын жағдайлар

- препарат компоненттерінің кез келгеніне және басқа Н2-рецепторларының антагонистеріне аса жоғары сезімталдық

- бауыр циррозы

- тұқым қуалайтын фруктозаны көтере алмаушылық, Lapp-лактаза ферменті тапшылығы, глюкоза-галактоза мальабсорбциясы

- жүктілік және лактация кезеңі

- балалар және 18 жасқа дейінгі жасөспірімдер

Дәрілермен өзара әрекеттесуі

Фамотидиннің метоболизденген микросомальді бауыр ферменттері қосылыстарымен өзара маңызды әрекеттесулері жоқ.

ФАМО® мен кетоконазолды бір мезгілде қолданғанда кетоконазол мен итраконазолдың сіңуі азаюы мүмкін.

Антацидтер мен сукральфат сіңірілуді баяулатады. ФАМО®-ны антацидтік препараттармен қолданған жағдайда оларды қабылдау арасындағы үзіліс 1-2 сағаттан кем болмауы тиіс.

ФАМО® феназонның, аминофеназонның, диазепамның, гексобарбиталдың, пропранололдың, лидокаиннің, фенитоинның, аминофиллиннің, теофиллиннің, тікелей емес антикоагулянттардың, үшциклдік антидепрессанттардың, глипизидтің, буформиннің, метопрололдың, метронидазолдың, кофеиннің бауырдағы метаболизмін бәсеңдетеді. Амоксициллин және клавулан қышқылының сіңуін жоғарылатады.

Сүйек кемігін бәсеңдететін дәрілік заттар нейтропенияның даму қаупін арттырады.

Айрықша нұсқаулар

ФАМО® препаратымен емделу барысындағы клиникалық жақсару малигнизацияны жоққа шығармайды.

Ауыр бүйрек жеткіліксіздігі (креатинин клиренсі <10 мл/мин) бар емделушілерге дозаларды қабылдау арасындағы аралықтарды ұзарту немесе барынша төмен дозалар ұсынылады

ФАМО® асқазан карциномасымен байланысты симптомдарды бүркемелеуі мүмкін, сондықтан емдеу алдында қатерлі ісіктің жоқтығына көз жеткізу керек.

ФАМО®-ны біртіндеп тоқтату керек, себебі қабылдауды бірден тоқтатқан кезде "рикошет" синдромының даму қаупі бар.

ФАМО® препаратымен ұзақ емделгенде, сонымен қатар стресс кезінде жұқпаның одан әрі таралуымен асқазанның бактериялық зақымдануы мүмкін.

ФАМО®-ны итраконазол мен кетоконазолды қабылдағаннан кейін 2 сағаттан соң қабылдаған жөн, себебі олардың сіңуін едәуір төмендетеді.

ФАМО® пентагастрин мен гистаминнің асқазанның қышқыл түзу қызметіне ықпал етуіне қарсы әсер етуі мүмкін, сондықтан аталған препараттарды қабылдау аралығы 24 сағаттан кем болмауы тиіс.

ФАМО® жалған теріс нәтижелерге әкеле отырып, гистаминге тері реакциясын басуы мүмкін, сондықтан оны дереу типтегі аллергиялық тері реакциясын анықтауға арналған диагностикалық тері сынамаларын жүргізер алдында тоқтату керек.

Емдеу кезінде асқазанның шырышты қабатын тітіркендіретін тағамдарды, сусындарды және басқа дәрілік заттарды қолданбаған жөн.

Егде науқастарға дозаны түзету қажет емес.

Педиатрияда қолданылуы

Бұл дәрілік түр балаларда және 18 жасқа дейінгі жасөспірімдерде пайдаланылмайды.

Жүктілік және лактация

Қауіпсіздік жөніндегі деректердің жоқ болуына байланысты препарат жүктілік кезінде қолданылмайды.

Фамотидин емшек сүтімен бөлінеді, қауіпсіздігі бойынша зерттеулердің болмауына байланысты препарат бала емізетін аналарға тағайындалмайды.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

ФАМО® препаратын қолдану кезінде бас айналу, сананың шатасуы, елестеулер, ұйқышылдық сияқты жағымсыз әсерлердің дамуы мүмкін, осыған байланысты емделіп жүрген уақытта көлік құралын немесе қауіптілігі зор механизмдерді басқарудан бас тарта тұрған жөн.

Артық дозалануы

Симптомдары: препараттың жағымсыз әсерлерінің күшеюі.

Емі: асқазанды шаюмен, симптоматикалық ем.

Шығарылу түрі және қаптамасы

10 немесе 14 таблеткадан ПВХ үлбірден және баспалы алюминий фольгадан жасалған пішінді ұяшықты қаптамада.

1 (14 таблетка үшін) және 1 немесе 3 (10 таблетка үшін) пішінді қаптамадан қолданылуы жөніндегі мемлекеттік және орыс тілдеріндегі нұсқаулықпен бірге өндіруші фирманың голограммасы бар картон пәшкеге салынады.

Сақтау шарттары

25°С-ден аспайтын температурада, құрғақ, жарықтан қорғалған жерде сақтау керек. Балалардың қолы жетпейтін жерде сақтау керек!

Сақтау мерзімі

4 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

«Нобел Алматы Фармацевтикалық Фабрикасы» АҚ

Қазақстан Республикасы

Алматы қ., Шевченко к-сі 162 Е.

Тіркеу куәлігінің иесі

«Нобел Алматы Фармацевтикалық Фабрикасы» АҚ

Қазақстан Республикасы

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы:

«Нобел Алматы Фармацевтикалық Фабрикасы» АҚ

Қазақстан Республикасы, Алматы қ., Шевченко к-сі 162 Е.

Телефон нөмірі: (+7 727) 399-50-50

Факс нөмірі: (+7 727) 399-60-60

Электронды поштасы nobel@nobel.kz