Триттико®
Инструкция
-
русский
-
қазақша
Саудалық атауы
Триттико
Халықаралық патенттелмеген атауы
Тразодон
Дәрілік түрі
Босап шығуы ұзаққа созылатын таблеткалар, 150 мг
Құрамы
Бір таблетканың құрамында
белсенді зат - 150 мг тразодон гидрохлориді,
қосымша заттар: сахароза, карнауб балауызы, повидон, магний стеараты.
Сипаттамасы
Екі жақ бетінде қатарласқан екі сызығы бар сопақша пішінді, ақ түстен сарғыш реңді ақ түске дейінгі таблеткалар.
Фармакотерапиялық тобы
Психоаналептиктер. Басқа да антидепрессанттар.
АТХ коды N06AX05
Фармакологиялық қасиеттері
Фармакокинетикасы
Ішке қабылдағаннан кейін препараттың асқазан-ішек жолынан (АІЖ) сіңуі жоғары. Тразодонды тамақтану кезінде немесе тамақтанып болу бойына қабылдау оның сіңу жылдамдығын баяулатады, препараттың қан плазмасындағы ең жоғары концентрациясын төмендетеді және ең жоғары концентрацияға жету уақытын (әрі қарай TСmax) арттырады. Препараттың TCmax оны ішке қабылдағаннан кейін ½ - 2 сағаттан соң жетеді.
Препарат гистогематикалық бөгеттер арқылы, сондай-ақ тіндер мен сұйықтықтарға (өтке, сілекейге, емшек сүтіне) өтеді.
Плазма ақуыздарымен байланысуы – 89-95%.
Тразодон бауырда метаболизденеді, белсенді метаболиті - 1-м-хлорофенилпиперазин. Жартылай шығарылу кезеңі 3 – 6 сағатқа тең, екінші кезеңде – 5-9 сағат. Метаболизденген препараттың үлкен бөлігінің шығарылуы бүйректер арқылы жүзеге асады, несеппен бірге – 75%-ға жуығы және қабылдағаннан кейін 98 сағат өткен соң толық аяқталады, өтпен бірге 20%-ға жуығы шығарылады.
Фармакодинамикасы
Триттико, триазолопиридиннің туындысы бола отырып, көбіне депрессияға қарсы әсері, біршама седативтік және анксиолитикалық әсері бар.
Үрейленудің психикалық (аффективті қобалжушылық, тітіркенгіштік, қорқу, ұйқысыздық) және соматикалық симптомдарына (жүректің қағуы, бас ауыру, бұлшықеттің ауыруы, несеп шығарудың жиілеуі, тершеңдік, гипервентиляция) тез әсер етеді.
Триттико депрессиясы бар науқастарда ұйқы бұзылғанда тиімді, ұйқының тереңдігін және ұзақтығын арттырады, оның физиологиялық құрылымын және сапасын қалпына келтіреді.
Триттико эмоциональді жағдайды тұрақтандырады, көңіл-күйді жақсартады, созылмалы маскүнемдікке шалдыққан емделушілерде алкогольдік абстинентті синдром кезеңінде, сондай-ақ ремиссия кезеңінде алкогольге патологиялық құмарлықты азайтады. Бензодиазепин туындыларына тәуелді емделушілердегі абстинентті синдромда үрей тудыратын депрессивтік жағдайды және ұйқының бұзылуын емдеуде Триттико тиімді. Ремиссия кезеңінде бензодиазепиндер Триттикоға толық алмастырылуы мүмкін.
Депрессияға шалдыққан науқастарда да, сондай-ақ депрессияға шалдықпаған адамдарда да либидоның және потенцияның қалпына келуіне мүмкіндік береді.
Триттиконың әсер ету механизмі серотониндік рецепторлардың кейбір қосалқы типтеріне аффинділігінің жоғары болуымен байланысты, Триттико олармен қосалқы типіне, сондай-ақ серотонинді кері қармап қалуды тежейтін арнайы қабілетіне байланысты антагонистік немесе агонистік өзара әсерге түседі.
Норадреналинді және дофаминді бейтарап қармап қалуға ықпалы аз.
Қолданылуы
Мыналар қатарласа жүретін немесе қатарласа жүрмейтін депрессивті бұзылуларда:
- үрейлену
- ұйқының бұзылуы
- жыныстық қызметтің этиологиясы органикалық емес бұзылуы
Қолдану тәсілі және дозалары
Препарат тек ересектерге ғана арналған.
Ересектер
Препаратты тамақтан 30 минут бұрын немесе тамақтан кейін 2-4 сағаттан соң ішке қабылдаған жөн. Тамақтан кейін қабылдағанда жағымсыз әсерлердің пайда болуы баяулайды (қайтадан сіңуі жоғарылайды және плазмадағы концентрацияның жоғары шегі төмендейді). Таблеткаларды шайнамай, судың жеткілікті мөлшерімен ішіп қабылдаған жөн.
Таблеткалар қолайлы дозаны таңдау мақсатында аурудың ауырлығына, науқастың жасына және жалпы жағдайына байланысты 3 бөлікке бөлінуі мүмкін.
Препараттың бастапқы дозасы – 50-100 мг, тамақтан кейін ұйқыға жатар алдында бір рет қабылданады. 4-ші күні дозаны 150 мг-ға дейін арттыруға болады. Қолайлы емдік әсерге қол жеткізу мақсатында дозаны әрі қарай, қолайлы доза алынғанша, әрбір 3-4 күн сайын тәулігіне 50 мг-ға арттырады. 150 мг-нан астам тәуліктік доза 2 қабылдауға бөлінуі тиіс, мұндайда аздау дозасы түскі тамақтан кейін, ал негізгісі ұйқыға жатар алдында қабылданады.
Амбулаториялық науқастар үшін ең жоғары тәуліктік доза – 450 мг.
Стационардағы науқастар үшін ең жоғары тәуліктік доза – 600 мг.
Егде жастағы адамдар
Егде жастағы және әлсіз емделушілер үшін бастапқы доза – тәулігіне бөлінген дозаларда немесе ұйқыға жатар алдында бір рет 100 мг-ға дейін. Ол препараттың тиімділігіне және жағымдылығына байланысты дәрігердің бақылауымен арттырылуы мүмкін. Әдетте тәулігіне 300 мг-нан асатын доза қажет болмайды.
Бауыр қызметінің жеткіліксіздігі бар науқастар
Триттико қарқынды бауырлық метаболизмнен өтеді.
Бауыр қызметі бұзылған науқастар, әсіресе, бауыр қызметі ауыр бұзылған жағдайда,Триттиконы қабылдаған кезде сақ болуы керек. Бауыр қызметін ұдайы бақылап отыру қажет.
Бүйрек қызметінің жеткіліксіздігі бар науқастар
Әдеттегідей, дозаны әр адамға жеке таңдап алу қажет, алайда бүйрек қызметінің бұзылуы ауыр болатын науқастар Триттиконы қабылдаған кезде сақтық танытуы керек.
Триттико препаратын емдік циклдерде кем дегенде бір ай ұзақтықпен қолданған жөн.
Балалар
Триттиконың 18 жасқа толмаған балалар үшін қауіпсіздігі анықталған жоқ. Сондықтан препаратты балаларға және жасөспірімдерге қолдануға болмайды.
Жағымсыз әсерлері
Ықтимал
- қатты қажығыштық, әлсіздік, ұйқышылдық, қозу, бас ауыру, бас айналу, қырағылықтың нашарлауы, бағыттан адасу, діріл, жадының нашарлауы, миоклонус, экспрессивті афазия, парестезиялар, дистония, эпилепсиялық ұстамалар, нарколептикалық қатерлі синдром
- суицидальді ойлар, немесе суицидальді мінез, жағдайдың шиеленісуі, мания, үрейлену сезімі, күйгелектік, ажитация (әдетте делирийге дейін қозады), делирий, агрессивті реакция
- тоқтатудың абстинентті синдромы
- мұрынның бітелуі, диспноэ
- жүрек қағуының жиілеуі, АҚ төмендеуі, препараттың адренолитикалық әсерінен болған ортостатикалық гипертензия (әсіресе вазомоторлы тұрақсыздығы бар адамдарда), аритмия, қарыншалық экстрасистолалар, тахикардия, соның ішінде қарыншалық пароксизмальді экстрасистола, өткізгіштіктің нашарлауы, брадикардия, ЭКГ-де бұзылулар (QT аралығының ұзаруы)
- тәбеттің төмендеуі немесе жоғарылауы, анорексия, ауыз ішінің құрғауы және ашуы, дәм сезінудің өзгеруі, сілекей бөлінуінің күшеюі, жүректің айнуы, құсу, диарея, іштің ауыруы, салмақтың жоғалуы, гастроэнтерит, ішектің салданып бітелісі
- аяқ-қолдардың ауыруы, арқаның ауыруы, миалгиялар, артралгиялар
- несеп шығарудың бұзылуы
- қышыну, эритематозды бөртпе
- тұмауға ұқсас синдром, кеуденің ауыруы, қызба жағдайы
- лейкопения, нейтропения, агранулоцитоз, тромбоцитопения, эозинофилия (әдетте елеусіз), анемия
- антидиуретикалық гормонның талапқа сай емес секрециялану синдромы
- бауыр ферменттері мөлшерінің жоғарылауы
- гипергидроз
- көздің тітіркенуі
- приапизм (осы жағымсыз әсер байқалған науқастар препарат қабылдауды дереу тоқтатуы және дәрігерге қаралуы тиіс)
Қолдануға болмайтын жағдайлар
- белсенді затқа немесе кез келген қосымша затқа асқын сезімталдық
- алкогольдік немесе гипноздық уыттану
- жүрек қызметінің жедел жеткіліксіздігі
- жүктілік және лактация кезеңі
Дәрілермен өзара әрекеттесуі
Антипсихоздық, гипнозды, седативтік, анксиолитикалық және антигистаминдік дәрілердің седативтік әсерлері күшеюі мүмкін, осы жағдайларда дозаны төмендету қажет.
Ішу арқылы қабылданатын контрацептивтердің, фенитоиннің, карбамазепиннің және барбитураттардың бауырға әсерін антидепрессанттардың метаболизмі күшейтеді, мұндайда циметидин және басқа да антипсихоздық дәрілер оны тоқтатады.
Цитохром ферменттерінің тежегіштері
Триттиконы және цитохромның эритромицин, кетоконазол, итраконазол, ритонавир, индинавит және нефазадон сияқты тежегіштерін бір мезгілде қолданған кезде фармакологиялық өзара әрекеттесу болады.
Цитохромдар тежегіштері плазмада тразодон концентрациясының едәуір артуына мүмкіндік беруі мүмкін.
Триттиконы және цитохромдардың күшті әсер ететін тежегіштерін бірге қабылдамаған жөн немесе препараттың аз дозасын тағайындау керек.
Карбамазепин
Тразодонның плазмадағы концентрациясы карбамазепинді қатарластыра қабылдағанда азаяды. Карбамазепинді қатарластыра қолдану тразодонның және оның белсенді метаболиті метахлорфенилпиперазиннің, тиісінше, 76%-ға және 60%-ға азаюына әкеледі. Сондықтан Триттико мен карбамазепинді бірге қабылдап жүрген науқастар, жоғары дозаларды қолдану қажетілігіне баға беру үшін, қалтқысыз бақылауда болуы тиіс.
Трициклдік антидепрессанттар
Триттико мен үшциклдік антидепрессанттарды, өзара әрекеттесу қаупі бар болғандықтан, бір мезгілде қолдануға болмайды. Серотонинергиялық синдром және жүрек-қантамыр жүйесі тарапынан жағымсыз реакциялар пайда болуы мүмкін.
Флуоксетин
Триттико мен флуоксетинді бір мезгілде қабылдағанда плазмада тразодон мөлшері деңгейінің артуы және жағымсыз реакциялардың пайда болуының сирек жағдайлары тіркелген. Олардың фармакокинетикалық өзара әрекеттесуінің механизмі анық емес. Осы фармакодинамикалық өзара әрекеттесудің нәтижесі серотонинді синдром болуы мүмкін.
Моноаминооксидаза (МАО) тежегіштері
Триттико мен моноаминоксидаза тежегіштерін бір мезгілде тағайындауға, сондай-ақ Триттиконы моноаминоксидаза тежегіштерін тоқтатқаннан кейін екі аптадан ертерек тағайындауға үзілді-кесілді болмайды. Сонымен қатар моноаминоксидаза тежегіштерін препаратты тоқтатқаннан кейін бір аптадан ертерек тағайындауға болмайды, өйткені МАО тежегіштері Триттиконың жағымсыз әсерлерінің пайда болу қаупін арттырады.
Фенотиазиндер
Триттиконы фенотиазиндермен (хлорпромазин, флуфеназин, левомепромазин, перфеназин) бір мезгілде қабылдағанда ауыр ортостатикалық гипертензия байқалды.
Миорелаксанттар және газ тәрізді анестетиктер
Триттико миорелаксанттардың және газ тәрізді анестетиктердің әсерін күшейтуі мүмкін.
Гипотензивтік препараттар
Триттико кейбір гипотензивтік препараттардың әсерін күшейтуі мүмкін және әдетте олардың дозаларын төмендетуді қажет етеді.
Антигистаминдік препараттар және холинолитикалық белсенділігі бар дәрілік заттар Триттиконың антихолинергиялық әсерін күшейтеді.
Триттиконы дигоксинмен және фенитоинмен бірге қолданғанда осы препараттардың қан плазмасындағы концентрациясы артады.
Триттиконы кейбір шайқурай сияқты дәрілік өсімдігі бар препараттармен бірге қабылдағанда жағымсыз әсерлер өте жиі болуы мүмкін.
Триттикомен және варфаринмен ем қабылдаған науқастарда протромбинді уақыттың өзгеру жағдайлары тіркелген.
Айрықша нұсқаулар
Балаларға және 18 жасқа дейінгі жасөспірімдерге қолданылуы
Әдеттегідей, Триттиконы балалар және 18 жасқа дейінгі жасөспірімдер қабылдамағандары жөн.
Балалардың және жасөспірімдердің қатысуымен жүргізілген клиникалық зерттеулерде өзіне-өзі қол жұмсауға мінез-құлық көрсету жағдайлары (суицидке әрекет ету, суицидальді ойлар) және өшпенділік (елеулі агрессивтілік, жанжалды мінез-құлық таныту және кектену) көбіне антидепрессанттармен емделіп жүргендерде плацебо қабылдағандардан гөрі жиі байқалды.
Бәрінен бұрын, балалар мен жасөспірімдерде өсуін, жетілуін, когнитивтік және мінез-құлығының дамуын қоса Триттиконың кейіннен болатын салдарының қауіпсіздігі жөнінде деректер жоқ.
Суицид/суицидальді ойлар немесе клиникалық тұрғыдан нашарлау
Суицидальді ойлар, дене мүшесін зақымдау және суицид қаупінің жоғарылауымен байланысты депрессия. Қауіп ауру едәуір басылғанша болады. Емдеудің алғашқы бірнеше аптасы немесе одан да көп уақыт ішінде жақсара қоймайтындықтан, науқастарды жақсарғанға дейін қалтқысыз бақылуға алған жөн. Клиникалық тәжірибе суицид қаупі сауығудың әсіресе ерте кезеңдерінде өсуі мүмкін екендігін көрсетеді.
Суицидальді әрекеттер қаупін, әсіресе емнің бас кезінде, төмендету үшін емделушіге әрбір келген сайын тағайындалатын Триттико дозасы біртіндеп азайтылуы тиіс.
Препаратты сыртартқысында айқындылығы әртүрлі дәрежедегі AV-блокадасы, миокард инфарктісі (қалпына келудің ерте кезеңінде), артериялық гипертензиясы бар (гипотензивтік препараттар дозасын түзету қажет етілуі мүмкін), қарыншалық аритмия, приапизм көрсетілген, бүйрек және/немесе бауыр қызметінің жеткіліксіздігі бар емделушілерге абайлап тағайындаған жөн.
Қуықасты безінің гипертрофиясына шалдыққан, несептің бөлініп шығуы бұзылған, жабық бұрышты глаукомасы, гипертиреозы бар емделушілерге дозаны белгілеуге аса көңіл бөлу және оларды жүйелі бақылап отыру керек.
Ұзаққа созылатын және талапқа сай емес эрекциялар пайда болған жағдайда дәрігерге қаралған жөн.
Триттиконы қолданған кезде лейкоциттер мөлшері біршама төмендеуі мүмкін, айқын лейкопения жағдайларынан басқасында, ол арнайы емдеуді қажет етпейді. Пайда болатын агранулоцитоз тұмауға тән симптомдарда білінуі мүмкін. Сондықтан шеткергі қанға, әсіресе жұтынған кезде тамақ ауырғанда және қызба пайда болғанда, тексеру жүргізу керек.
Шизофрениясы немесе әртүрлі психикалық бұзылулары бар науқастарда антидепрессанттар психоздық симптомдарды өршітуі мүмкін. Параноидальді ойлар өте қарқынды түрде дамуы мүмкін. Триттикомен емдеу кезінде депрессивтік ұстамалар маниакальді-депрессивті жағдайдан маниакальді психозға дейін құбылуы мүмкін. Осындай жағдайларда емдеуді тоқтату қажет.
Емделу кезінде алкоголь қолдануды тоқтата тұрған жөн.
Триттико препаратында сахароза бар, сондықтан тұқым қуалаған, іштен туа біткен фруктоза жақпаушылығы, глюкоза-галактозаның сіңуі бұзылған немесе сахараза-изомальтаза жеткіліксіздігі бар науқастар осы дәрілік затты қабылдамағаны жөн.
Дәрілік заттың көлікті басқару қабілетіне және қауіпті механизмдермен жұмыс жасауға ықпал ету ерекшеліктері
Зейінді жұмылдыруды және психомоторлы реакциялардың шапшаңдығын қажет ететін қауіпті қызмет түрлерімен айналысуды тоқтата тұрған жөн, өйткені препараттың анксиолитикалық және седативтік белсенді әсері бар.
Артық дозалануы
Симптомдары: ұйқышылдық, бас айналу, жүректің айнуы, құсу, жағымсыз әсерлердің жиілеуі және ауырлауы. Өте ауыр жағдайларда тахикардия, артериялық гипотензия, гипонатриемия, құрысулар, тыныс алудың бұзылуы, кома болуы мүмкін.
Емдеу: препарат үшін өзіне тән арнайы у қайтарғысы жоқ. Артық дозаланған жағдайда 1 г-нан астам тразодон қабылдағандарға бір сағат ішінде белсенділендірілген көмір тағайындауды қарастырған жөн. Шамадан тыс дозаны қабылдағаннан кейін бір сағат ішінде асқазанды шаюды альтернативті түрде тағайындауға болады.
Артық дозаланған жағдайда науқас препаратты қабылдағаннан кейін, ең кемінде, 6-12 сағат бойы қалтқысыз бақылануы тиіс. Тамыр соғысын және артериялық қысымды бақылау қажет етіледі.
Құрысу пайда болған жағдайда көктамыр ішіне диазепам (дене салмағының әр кг-на шаққанда 0,1-0,3 мг) немесе лоразепам (4 мг) енгізу керек. Егер аталған шаралар құрысуды бақылауға мүмкіндік бермесе, онда көктамыр ішіне фентоин енгізуге болады.
Шығарылу түрі және қаптамасы
10 немесе 20 таблетка поливинилхлоридті үлбірден және алюминий фольгадан жасалған пішінді ұяшықты қаптамаға салынған.
20 таблеткалық пішінді ұяшықты 1 қаптама немесе 10 таблеткалық пішінді ұяшықты 2 қаптама медицинада қолданылуы жөнінде мемлекеттік және орыс тілдеріндегі нұсқаулықпен бірге картон пәшкеге салынған.
20 таблеткалық пішінді ұяшықты 3 қаптама немесе 10 таблеткалық пішінді ұяшықты 6 қаптама медицинада қолданылуы жөнінде мемлекеттік және орыс тілдеріндегі нұсқаулықпен бірге картон пәшкеге салынған.
Сақтау мерзімі
3 жыл Жарамдылық мерзімі өткеннен кейін пайдалануға болмайды
Сақтау шарттары
250С-ден аспайтын температурада сақтау керек.
Балалардың қолы жетпейтін жерде сақтау керек!
Дәріханадан босатылу шарттары
Рецепт арқылы
Өндіруші
Азиенде Кимике Риуните Анжелини Франческо А.К.Р.А.Ф. С.п.А. /
Aziende Chimiche Riunite Angelini Francesco A.C.R.A.F. S.p.A.
Мекенжайы: Виа Вeккиа дел Пиноккио, 22 – 60100 Анкона, Италия /
Via Vecchia del Pinocchio, 22 – 60100 Ancona, Italy
Тіркеу куәлігінің иесі
Азиенде Кимике Риуните Анжелини Франческо А.К.Р.А.Ф. С.п.А. /
Aziende Chimiche Riunite Angelini Francesco - А.C.R.A.F. S.p.A.
Мекенжайы: Виале Амелия 70, Рим, Италия / Viale Amelia, 70, Rome (RM), Italy
Тұтынушылардан өнім (тауар) сапасы жөнінде шағымдарды Қазақстан Республикасы аумағында қабылдайтын ұйымның мекенжайы
ҚР-дағы “Си Эс Си Лтд” ЖАҚ өкілдігі:
050051, Алматы қ-сы, Достық д-лы,105,
телефон/ факс: +7(727) 317 14 64
e-mail : gulmira.pharm@yahoo.com