Танфлекс С горячий напиток
Инструкция
-
русский
-
қазақша
Саудалық атауы
Танфлекс С ыстық сусын
Халықаралық патенттелмеген атауы
Жоқ
Дәрілік түрі
Ішке қабылдау үшін ерітінді дайындауға арналған ұнтақ
Құрамы
Бір таблетканың құрамында
белсенді зат: 10 мг фенилэфрин гидрохлориді, 20 мг фенирамин малеаты, 50 мг аскорбин қышқылы, 500 мг парацетамол.
қосымша заттар: лимон хош иістендіргіші, сукралоза, сусыз лимон қышқылы, сусыз натрий дигидроген цитраты, макрогол 8000 (микрондалған полиэтиленгликоль 8000), маннитол SD 200, D&C Сары №10 (Е 104).
Сипаттамасы
Бөгде бөлшектері жоқ ақ немесе ақшыл ұнтақ тәрізді қоспа.
Фармакотерапиялық тобы
Жүйке жүйесі. Анальгетиктер. Анальгетиктер – басқа антипиретиктер. Анилидтер. Парацетамол, біріктірілімдер, психолептиктерді қоспағанда.
АТХ коды N02ВЕ51
Фармакологиялық қасиеттері
Фармакокинетикасы
Сіңуі
Парацетамол
Пероральді түрде қабылдаудан кейін парацетамол көбінесе жіңішке ішекте пассивті диффузия жолымен тез және іс жүзінде толық сіңеді. Ішектің босауы пероральді түрде қабылданған парацетамолдың сіңуінде жылдамдықты лимиттеуші кезең болып табылады. Пероральді түрде қабылдаудан кейін әдетте ең жоғары шектегі плазмалық концентрацияларға 0.5-1.5 сағаттан соң жетеді. Бауырда әртүрлі дәрежеде алғашқы метаболизмге ұшырайды. Ересектерде пероральді биожетімділігі қабылданған парацетамолдың мөлшеріне байланысты, 500 мг қабылдағаннан кейінгі 63%-дан бастап 1-2 г (таблетка түрінде) қабылдағаннан кейінгі шамамен 90%-ға дейін артады.
Фенилэфрин гидрохлориді
Моноаминооксидазаның әсер етуімен фенилфэрин гидрохлориді асқазан-ішек жолынан біркелкі сіңбейді.
Фенирамин малеаты
Пероральді түрде қабылдағаннан кейін фенирамин малеаты жақсы сіңеді, әсер етуі 15-60 минуттан соң дамиды және ең жоғары шегіне 3-6 сағаттан соң жетеді.
Аскорбин қышқылы
Аскорбин қышқылы белсенді тасымалдаушы арқылы асқазан-ішек жолынан оңай сіңеді. Сіңу дәрежесі асқазан-ішек жолының аурулары бар болғанда және жоғары дозаларды қабылдағанда төмендейді.
Таралуы
Парацетамол
Парацетамол тін сұйықтықтарына шамамен 0.95 л/кг таралу көлемімен тепе-тең таралады. Балалардағы және ересектердегі таралу кинетикасы (Vd/F) ересектердегі осындайға ұқсас. Плазма ақуыздарымен байланысуы төмен.
Фенилэфрин гидрохлориді
Пероральді түрде қабылдағанда фенилэфрин гидрохлориді назальді деконгестанттардың тиімділігін сақтайды, сондай-ақ мұрынның шырышты қабықтарының қантамырларына жүйелік қан айналымы арқылы өтеді.
Фенирамин малеаты
Фенирамин плазма ақуыздарымен шамамен 70%-ға байланысады. Ол орталық жүйке жүйесін қоса, тіндерге кеңінен таралады. Плацента арқылы өтеді және емшек сүтімен экскрецияланады.
Аскорбин қышқылы
Плазма ақуыздарымен 25%-ға байланысады. Аскорбин қышқылы тіндерге кеңінен таралады және көбіне бездердің тіндеріне жиналады. Плацента арқылы өтеді және емшек сүтімен экскрецияланады.
Биотрансформациясы
Парацетамол
Парацетамол көбіне бауырда метаболизденеді. Бауырда және бүйректе парацетамол әдетте Р450 цитохромының микросомальді ферменттерінің (негізінен CYP2E1 және CYP3A4) әсер етуімен гидроксилденген метаболиттерге (N-ацетил-р-бензохинонимин) дейін метаболизденеді. Парацетамолдың уыттылығы конъюгация арқылы нивелирленетініне қарамастан, ол артық дозалану әсерінен жиналуы және тіндердің зақымдануына әкелуі мүмкін. Қабылданатын парацетамолдың шамамен 10%-ы Р450 цитохромы оксидазаларының аралас жүйесімен қосалқы жол арқылы ацетамидохинонның реактивті метаболитіне дейін айналады. Осы метаболит глутатионмен тез байланысады және цистеинмен және меркаптопуринмен конъюгат ретінде экскрецияланады. Парацетамолдың үлкен мөлшерін қабылдау бауырлық глутатионның таусылып, гепатоцитте ацетаминохинонның шамадан тыс жиналуына әкеледі, ол өмірлік маңызды гепатоцеллюлярлы макромолекулалармен ковалетті түрде байланысады. Артық дозаланған кезде осы бауыр некрозына әкеп соғуы мүмкін. Балаларда (3-10 жастағы) және жаңа туған нәрестелерде (0-2 күндік) парацетамолдың негізгі метаболиті парацетамол сульфаты болып табылады.
Фенилэфрин гидрохлориді
Фенилэфрин ішекте және бауырда моноаминооксидазалармен алғашқы метаболизмге ұшырайды. Асқазан-ішек жолынан биожетімділігі төмендейді.
Фенирамин малеаты
Фенирамин тез және ауқымды түрде метаболизденеді. Ішек қабырғасында алғашқы метаболимге ұшырайды, содан соң бауыр арқылы алғашқы рет өтеді. N-деалкилдену жолымен метаболиттерге айналады.
Аскорбин қышқылы
Аскорбин қышқылының көп бөлігі дегидроаскорбин қышқылына қайтымды түрде айналады. Қалған бөлігі аскорбин-2-сульфат және қымыздық қышқылы сияқты белсенді емес метаболиттерге дейін метаболизденеді, олар несеппен бірге экскрецияланады.
Элиминациясы
Парацетамол
Пероральді түрде қабылдағаннан кейін парацетамолдың жартылай шығарылу кезеңі 1.5-2.5 сағатты құрайды. Дозаның 80%-дан көбі 24 сағат ішінде несеппен экскрецияланады. Бауыр немесе бүйрек дисфункциясы бар пациенттерде элиминация кезеңінің өте ұзағырақ екендігі байқалады. Бауыр ферменттерінің ықпалымен трансформацияланудан кейін парацетамол тек бүйрек арқылы, көбіне глюкурон және күкірт қышқылымен конъюгаттар түрінде шығарылады. Тек 1-3%-ы ғана өзгермеген бос күйінде шығарылады.
Фенилэфрин гидрохлориді
Фенилэфрин сульфатты конъюгаттар түрінде несеппен толық экскрецияланады.
Фенирамин малеаты
Хлорфенирамин малеаты метаболиттер түрінде 24 сағат ішінде несеппен экскрецияланады.
Аскорбин қышқылы
Жоғары дозаларда қабылдағанда аскорбин қышқылы метаболиттер түрінде несеппен бірге экскрецияланады.
Дозаға тәуелділігі/тәуелсіздігі
Парацетамол
Гепатоцеллюлярлық зақымданулар парацетамол метаболиттерінің реактивті формаларының бауырдың жасушалық ақуыздарымен байланысуы арқылы дамиды. Емдік дозаларда қабылдағанда осы метаболиттер глютатионмен байланысып, уытты емес конъюгаттар түзеді. Көлемді артық дозаланғанда бауырдың сульфгидрильді донаторларының (глютатионның түзілуіне түрткі болатын) таусылуы, уытты метаболиттердің жиналуы, бауыр жасушаларының некрозданып, кейіннен бауыр комасына әкелетін бауыр дисфункциясының өршуі орын алады. Тиісті дозаларда қабылдағанда фармакокинетика параметрлері дозаға тәуелді болып табылады.
Фенилэфрин гидрохлориді
Деректер жоқ.
Фенирамин малеаты
Кинетика параметрлері дозаға тәуелді болып табылады.
Аскорбин қышқылы
˃200 мг дозада қабылдағанда аскорбин қышқылының фармакокинетикалық параметрлері дозаға тәуелді болып табылады.
Фармакодинамикасы
Парацетамол
Анальгетикалық әсері: анальгетикалық әсер ету механизмі ақырына дейін анықталған жоқ. Парацетамол орталық жүйке жүйесінде көбіне простагландиндер синтезін тежей отырып және аз дәрежеде импульстар генерациясын блокадалау жолымен шеткері әсері арқылы ықпал етуі мүмкін. Шеткері әсері простагландиндер синтезінің тежелуі немесе механикалық және химиялық тітіркендіргіштерге ауыру рецепторларының сезімталдығын өршітетін басқа заттар синтезінің немесе әсерінің тежелуі нәтижесінде де дамуы мүмкін.
Қызуды төмендететін әсері: парацетамол тері арқылы қан ағынының артуына, терлеуге әкелетін шеткері вазодилатацияны және жылудың жоғалуын туындататын гипоталамуста жылуды реттейтін орталыққа ықпал ету жолымен әсер ететіндігін көрсетуі мүмкін. Орталық әсері гипоталамуста простагландиндер синтезінің тежелуін қамтуы мүмкін.
Фенилэфрин гидрохлориді
Фенилэфрин гидрохлориді көбіне адренергиялық рецепторларға әсер ететін симпатомиметикалық зат болып табылады. Назальді деконгестант ретінде, ол жоғарғы тыныс алу жолдарының шырышты қабықтарының ісінуін жояды, назальді обструкция симптомдарын және вазоконстрикторлы әсер ету арқылы ауаның қуыстарға өтуін жеңілдетеді.
Фенирамин малеаты
Фенирамин малеаты алкиламин туындысы болып табылатын потенциалды антигистаминдік зат болып табылады. Сондай-ақ оның антихолинергиялық белсенділігі бар. Н1-гистаминдік белсенділігінің арқасында, ол мұрынның бітелуі, жас ағу және түшкіру сияқты жоғарғы тыныс алу жолдарының аллергиялық симптомдарын уақытша жояды. Препаратты қолдану кезінде әсер ететін симпатомиметикалық жеңілдеу түрінде жеткілікті емдік әсер білдіретін антигистаминдік компонент болып табылады.
Аскорбин қышқылы
Аскорбин қышқылы суық тию ауруларының және жедел вирустық инфекциялардың басында дамуы мүмкін С дәрумені тапшылығының орнын толтыру мақсатында, суық тиюді емдеу үшін қолданылатын біріктірілген препараттардың әдеттегі компоненті болып табылады. Аскорбин қышқылы коллагенді өндіру және тіндерді қалпына келтіру үшін қажетті дәрумен болып табылады. Дегидроаскорбин қышқылына дейін қайтымды тотығады. Қышқылдың екі түрі де тотығу-тотықсыздану үдерістеріне жатады. С дәрумені тирозиннің, көмірсулардың, норадреналиннің, гистаминнің, фенилаланиннің және темірдің метаболизмімен байланысты. Аскорбин қышқылының қатысуымен организмнің инфекцияларға қарсылығын, серотониннің гидроксилденуін, қантамырлардың тұтастығын және функциясын және жасушалық тыныс алуды демеуді және т.б. қамтамасыз ететін липидтердің, ақуыздардың және карнитиннің синтезделу үдерістері жүреді.
Қолданылуы
- Танфлекс С ыстық сусын тұмауда, суық тиіп ауырғанда және синуситте мұрынның бітелуі, бас ауыру, қызба, дененің ауыру симптомдарын жеңілдету үшін қолданылады.
Қолдану тәсілі және дозалары
Егде жастағыларға, ересектерге және 12 жастан асқан балаларға әрбір 4-6 сағат сайын 1 сашеден қабылдау ұсынылады. Қабылданатын сашелердің ең жоғары мөлшері күніне 6-дан аспауы тиіс. 12 жасқа толмаған балаларда препарат дәрігердің нұсқауымен ғана қолданылуы мүмкін. 7 күннен көбірек қабылдағанда тиімділігі болмаған жағдайда дәрігерге қаралу қажет.
Танфлекс С ыстық сусын тек пероральді түрде қолдануға арналған.
Сашенің ішіндегісін стаканға салып, ыстық суда араластыру арқылы еріту және ыстықтай ішу керек.
Ерекше популяцииялар
Препаратты бүйрек/бауыр функциясының жеткіліксіздігі бар пациенттерге қолданбаған жөн.
Бала пациенттер
12 жастан кіші балаларда препарат дәрігердің нұсқауымен ғана қолданылуы мүмкін.
Егде жастағы (≥65 жас) пациенттер
Егде пациенттер үшін ұсынылатын доза ересектерге арналған дозаға ұқсас болып табылады.
Жағымсыз әсерлері
Жағымсыз реакциялардың даму жиілігі былайша жіктелген: өте жиі (≥1/10), жиі (≥1/100, <1/10), жиі емес (≥1/1 000, <1/100), сирек (≥1/10 000, <1/1 000), өте сирек (<1/10 000), белгісіз (қолда бар деректер бойынша жиілігіне талдау жасау мүмкін емес).
Иммундық жүйе тарапынан:
Жиі емес: аса жоғары сезімталдық, есекжем, қышыну
Белгісіз: анафилаксиялық реакция, Стивенс-Джонсон синдромы (уытты эпидермальді некролиз), ангионевроздық ісіну және терінің аса жоғары сезімталдық реакциялары, бөртпені қоса.
Психикалық бұзылулар:
Жиі: күйгелектік, ұйқысыздық
Жиі емес: қажығыштық, бөртпе, ажитация
Сирек: елестеулер (әсіресе балаларда), параноидты сандырақ, қатты қозғыштық
Жүйке жүйесі тарапынан:
Жиі емес: бас ауыру
Белгісіз: ашушаңдық, мазасыздық
Жүрек-қантамыр жүйесі тарапынан:
Сирек: жүрек функциясының жеткіліксіздігі, тахикардия, жүрек қағуының күшеюі, стенокардия, ырғақтың басқа да бұзылулары
Қантамырлық бұзылулар:
Сирек: артериялық қысымның жоғарылауы
Респираторлық аппарат тарапынан:
Өте сирек: демікпе, диспноэ, сырылдар
Белгісіз: бронхтың түйілуі
Асқазан-ішек жолы тарапынан:
Жиі: ауыз ішінің құрғауы, жүректің айнуы, құсу
Жиі емес: абдоминальді ауыру, диспепсия, керілу
Сирек: диарея, метеоризм, констипация
Гепатобилиарлық бұзылулар:
Белгісіз: бауыр аурулары
Тері жабыны және теріасты тіндері тарапынан:
Жиі емес: экзема, қышыну, есекжем
Сирек: тітіркендіретін/онсыз тері бөртпесі, аса жоғары сезімталдық реакциялары, басқа симпатомиметиктермен айқаспалы сезімталдық реакциялары, аллергиялық дерматит*
*фенилэфринмен емдеу кезінде бронхтың түйілуі және ангионевроздық ісіну сияқты жүйелік симптомдар дамитын/онсыз терінің әртүрлі аллергиялық реакцияларының дамығаны жөнінде мәлімделді.
Несеп шығару жүйесі тарапынан:
Жиі емес: дизурия, еркектерде несеп шығарудың кідіруі (бұрыннан бар простатаның ұлғаюы жеделдетуші фактор болуы мүмкін)
Өте сирек: несептің бөлініп шығуының төмендеуі, мочевинаның сарысулық деңгейінің жоғарылауы, папиллярлық некроз, ісінулердің күшті дамуы, гематурия, протеинурия.
Жалпы бұзылулар:
Өте сирек: ісінулер, шеткері ісінулер
Клиникалық бақылаулар:
Өте сирек: бауырдың функциональді сынамасы деңгейінің жоғарылауы, гематокрит және гемоглобин деңгейлерінің төмендеуі
Қолдануға болмайтын жағдайлар
- препараттың кез келген белсенді немесе қосымша компонентіне аса жоғары сезімталдық;
- аса жоғары сезімтал пациенттер немесе препаратты қабылдаудан 2 апта бұрын моноаминооксидаза тежегіштерін, трициклді антидепрессанттарды, серотонинді кері қармайтын селективті тежегіштерді (СКҚСТ) немесе β-блокаторларды қабылдаған пациенттер;
- бауыр және бүйрек функциясының бұзылуы;
- қант диабеті;
- гипертиреоз;
- кардиоваскулярлық бұзылулар;
- басқа симпатомиметикалық деконгестанттармен қатар қолдану;
- феохромоцитома;
- жабық бұрышты глаукома;
- простата аденомасы немесе несеп шығарған кезде қуықтың толық босамауы;
- қуықтың обструкциясы;
- пилородуоденальді обструкция;
- ішекті стеноздайтын ойық жара ауруы;
- респираторлық бұзылыстардың даму қаупі бар пациенттер;
- жүктілік;
- лактация кезеңі;
- 12 жасқа дейінгі балалар
Дәрілермен өзара әрекеттесуі
Парацетамол
Парацетамолдың сіңу жылдамдығы метоклопрамидті немесе домперидонды қабылдаған кезде жоғарылайды және пропантелинді немесе холестираминді қабылдаған кезде төмендейді. 3 типті серотонин рецепорларының антагонистері трописетрон және гранисетрон парацетамолдың анальгетикалық әсерін фармакодинамикалық өзара әрекеттесулер арқылы толық тежеуі мүмкін. Парацетамолды және азидотимидинді (АЗТ-зидовудин) бірге қолдану нейтрофилдер санының төмендеуіне (нейтропения) тенденцияны арттырады. Демек, парацетамол және АЗТ препараттарын дәрігердің тағайындауынсыз бірге қабылдау ұсынылмайды.
Шілтерлі шайқурай (Hypericum perforatum) қанда парацетамолдың деңгейін төмендетуі мүмкін. Варфариннің және басқа да кумариндердің антикоагулянттық потенциалы парацетамолды ұзақ уақыт күн сайын қолданғанда жоғарылап, қан кетулердің даму қаупінің ұлғаюына әкелуі мүмкін. Сирек жағдайларда елеулі ықпал етулер байқалмайды.
Фенилэфрин гидрохлориді
МАО тежегіштерін және МАО қайтымды тежегіштерін қабылдап жүрген пациенттерге Танфлекс С ыстық сусын препаратын қолданбаған жөн. Трициклді антидепрессанттармен, тәбетті басатын препараттармен, симпатомиметикалық препараттармен (деконгестанттармен, тәбетті басатын препараттармен, және амфетамин тәріздес психостимуляторлармен) және симпатомиметикалық аминдердің катаболизміне ықпалын тигізетін МАО тежегіштерімен (фуразолидонды қоса) бірге қолдану кейбір жағдайларда артериялық қысымның жоғарылауына әкелуі мүмкін («Қолдануға болмайтын жағдайлар» бөлімін қараңыз). Моклобемидпен және окситоцинмен қатар қолдану артериялық қысымның жоғарылауына әкелуі мүмкін. Танфлекс С ыстық сусын құрамында псевдоэфедрин бар болғандықтан, бретилий, бетанидин, гуанетидин, дебризохин, метилдопа, α- және β-блокаторлар сияқты гипотензивтік препараттардың әсері ішінара нивелирленеді («Айрықша нұсқаулар» бөлімін қараңыз). Жүрек гликозидтері және эрготаминді алкалоидтар ырғақтың бұзылуын және эрготизмнің даму қаупін туындатуы мүмкін.
Фенирамин малеаты
Алкогольмен және классикалық антигистаминдік препараттармен (седативті әсері бар) бірге қолдағанда седацияның даму қаупі ұлғаяды. Седативті реакциялар седативті емес антигистаминдік препараттармен бірге қабылдаған кезде аз дәрежеде көрініс береді. Жергілікті қолдануға арналған (ингаляциялықты қоса) антигистаминдік препараттар осындай реакцияларды туындатпайды. Фенирамин малеатының эпилепсияға қарсы препараттармен және ұйқыны реттейтін және үрейленуді емдеуге арналған препараттармен біріктірілімін сақтықпен қабылдаған жөн.
Аскорбин қышқылы
Ішуге арналған контрацептивтер С дәруменінің сарысулық деңгейін төмендетеді. Ацетилсалицил қышқылы, дисульфирам, мексилетин, темір, фенитоин, барбитураттар және тетрациклин С дәруменінің элиминациясын арттырады. Аскорбин қышқылы флуфеназинмен және варфаринмен өзара әрекеттесуге түседі.
Аскорбин қышқылының жоғары дозаларын қабылдау несептің қышқылдылығының жоғарылауына әкеледі, ол қышқылдық рН препараттардың өзекшелік кері сіңуіне, олардың деңгейінің жоғарылауына және жағымсыз реакциялардың дамуына әкеледі. Сілтілік рН препараттарды қабылдау олардың кері сіңуінің төмендеуіне және емдік әсерінің төмендеуіне әкеледі.
Ерекше популяциялар
Арнайы зерттеулер жүргізілген жоқ.
Бала пациенттер
Зерттеулер жүргізілген жоқ.
Айрықша нұсқаулар
Бүлінген пакеттердегі дәріні пайдаланбаған жөн, ұсынылған дозаны арттыруға және препаратты 3 күннен артық қабылдауға болмайды.
Бауырдың уытты зақымдануына жол бермеу үшін препаратты алкоголь ішімдіктерін қолданумен біріктірмеген жөн.
Ұзақ уақыт бойы қабылданатын парацетамолдың үлкен дозалары бауыр функциясының қайтымсыз жеткіліксіздігімен бірге анальгетикалық нефропатияны туындатуы мүмкін.
Қуықасты бездерінің гипертрофиясы және қалқанша без аурулары бар болған кезде препаратты сақтықпен қабылдаған жөн. Фенилэферин спортшыларда допинг-бақылау кезінде жалғаноң нәтиже беруі мүмкін.
Фенилэфриннің қантамырларды тарылтатын ықтимал әсеріне байланысты, осы препаратты 70 жастан асқан пациенттерге сақтықпен қолданған жөн.
Аскорбин қышқылының жоғары дозаларын қабылдау несепте оксалаттар деңгейінің жоғарылауына әкеледі, бұл бүйректе кальций оксалатының түзілуіне әкелуі мүмкін. Бүйрек функциясы төмендеген немесе анамнезінде тастары бар пациенттерде осы құбылыстар дамуы мүмкін.
Үлкен дозаларды қабылдау гемохроматозы, талассемиясы, полицитемиясы, лейкемиясы немесе сидеробластты анемиясы бар пациенттерде қауіпсіз емес, өйткені аскорбин қышқылы темірдің сіңуін арттырады. Темірдің мөлшері шамадан тыс болғанда аскорбин қышқылы ең аз мөлшерде қабылдануы тиіс.
Аскорбин қышқылын қабылдау глюкозо-6-фосфат дегидрогеназа (Г6ФД) жеткіліксіздігі бар пациенттерде гемолизге әкеп соғуы мүмкін, сондықтан оны қолданған кезде сақ болу қажет.
Көлік құралын немесе потенциалды қауіпті механизмдерді басқару қабілетіне дәрілік заттың ықпал ету ерекшеліктері
Препаратты қабылдаған кезде автомобильді немесе басқа да механизмдерді басқару ұсынылмайды, өйткені препарат транквилизаторларды және тыныштандырғыш дәрілерді қабылдаған кезде күшейетін ұйқышылдықты туындатуы мүмкін.
Жүктілік және лактация кезеңі
Жүктілік кезінде Танфлекс С ыстық сусын препараты дәрігердің тағайындауынсыз қолданылмауы тиіс.
Лактация кезінде Танфлекс С ыстық сусын препаратын дәрігердің тиісті нұсқауынсыз қолдану ұсынылмайды. Фенилэфрин және аскорбин қышқылы емшек сүтіне өтеді.
Артық дозалануы
Парацетамол
Ересектерде 7.5-10 г (немесе ˃150 мг/кг) доза қабылдаған кезде бауырдың уытты зақымдануы дамуы мүмкін. Алкогольмен бауырдың циррозды емес зақымдануы бар пациенттерде парацетамолдың артық дозалануы азырақ зиян келтіреді. Балаларда артық дозаланудан кейін бауырдың зақымдануы біршама сирек құбылыс. Бауыр жасушалары зақымданатын парацетамолдың артық дозалануы кезінде парацетамолдың жартылай шығарылу кезеңі ересектерде қалыпты жағдайда 2 сағаттан бастап 4 сағатқа дейін және одан көбірекке ұзарады. 14С-амидопиринді пероральді түрде қабылдағаннан кейін 14СО2 экскрециясының төмендеуі, плазмалық концентрация, жартылай шығарылу кезеңі және функциональді бауыр сынамасы, парацетамолдың артық дозалануына қарағанда, бауыр жасушалары зақымдануының аз дәрежесімен өзара байланысты. Жедел өзекшелік некроз салдарынан бүйрек функциясының жеткіліксіздігі парацетамол-индукцияланған бауыр функциясының фульминантты жеткіліксіздігінің дамуына әкелуі мүмкін. Алайда, осы себептен болатын даму жиілігі, басқа себептерден болатын бауыр функциясының фульминантты жеткіліксіздігі дамыған пациенттерге қарағанда, өте жоғары болмайды. Сирек жағдайларда, бауырға тиімді ең төмен уытты әсеріне қарамастан, парацетамолды 2-10 күн қабылдағаннан кейін өзекшелік некроз дамуы мүмкін. Парацетамол артық дозаланған жағдайда алкогольді созылмалы пайдаланған пациенттерде жедел панкреатиттің даму жағдайлары жөнінде мәлімделді. Жедел артық дозалануға қосымша парацетамолдың күн сайын артық дозалануынан кейін бауырдың зақымдану және нефроуыттылық симптомдары байқалды.
Симптомдары және белгілері: парацетамолдың артық дозалануының алғашқы белгілеріне бозару, анорексия, жүректің айнуы және құсу жатады. Бауыр некрозы парацетамолдың артық дозалануының дозаға тәуелді асқынуы болып табылады. Артық дозаланудан кейін 1-6 күн ішінде айқын клиникалық симптомдар жоқ болғанда бауыр ферменттерінің жоғарылауы және протромбинді уақыттың 12-18 сағатқа дейін созылуы байқалады.
Емі: кешірек болатын гепатоуыттылық сиптомдары дамуының профилактикасы үшін, парацетамолдың артық дозлануын дереу емдеу қажет. Осы мақсатта сіңу дәрежесін төмендетуге қатысты шараларды (асқазанды шаю немесе белсендірілген көмір қабылдау) жүргізеді, вена ішіне N-ацетилцистеин енгізеді немесе метионинді пероральді түрде қабылдайды. Егер пациентте құсу байқалса немесе белсендірілген көмірмен конъюгация болса, метионинді қабылдамаған жөн. Парацетамолды ең жоғары плазмалық концентрациясына жеткізуді артық дозаланудан кейін 4 сағатқа дейін ұзартуға болады. Демек, гепатоуыттылыққа жол бермеу үшін, препаратты қабылдағаннан кейін, ең жоқ дегенде, 4 сағат бойы парацетамолдың плазмалық концентрациясын қадағалау қажет. Парацетамол қанда сақталғанда немесе препаратты қабылдағаннан кейін ұзақ уаыт өткен жағдайда демеуші шаралар (әрі қарай метионинді пероральді түрде қабылдау немесе N-ацетилцистеинді вена ішіне енгізу) қажет. Ұзақ уақыт бойы алкогольге тәуелді немесе тамақтанудың созылмалы жеткіліксіздігі бар, бауыр ферменттерін индукциялайтын дәрілік препараттарды қабылдап жүрген пациенттерге қабылдап жүрген N-ацетилцистеиннің дозасын 30-50%-ға төмендету ұсынылады. Осы пациенттер парацетамолдың уытты әсеріне сезімталдау болуы мүмкін. Бауыр функциясының фульминантты жеткіліксіздігі мамандандырылған шараларды қажет етеді.
Фенилэфрин гидрохлориді
Симптомдары: артық дозалану белгілері жағымсыз реакциялар бөлімінде сипатталғандармен ұқсас. Қосымша ретінде гипертензия симптомдары дамуы мүмкін және, рефлекторлы брадикардия да болуы ықтимал. Ауыр жағдайларда сананың шатасуы, елестеулер, құрысулар және аритмия дамуы мүмкін. Бұған қосымша, фенилэфриннің күрделі уыттылығының дамуы үшін парацетамолмен уыттылықтың дамуы үшін қажетті дозадан көп есе артық дозалар қажет болады.
Емі: адекватты ем жүргізу қажет. Ауыр гипотензия фентоламин сияқты α-адреноблокаторлармен емдеуді қажет етеді.
Фенирамин малеаты
Тәуліктік дозадан 3-5 есе артық дозаларды пероральді түрде пайдалану уыттанудың дамуына әкеледі. Балалар антигистаминдердің антихолинергиялық уытты әсеріне өте сезімтал келеді. Симптомдар мен белгілері седацияны, ОЖЖ парадоксальді қозуын, уытты психозды, құрысуларды, апноэні, антихолинергиялық біліністерді, дистонияны, аритмияны және коллапсты қамтиды. Өлімге әкелетін доза дене салмағының әр кг шаққанда 25-50 мг құрайды. Қажет болған жағдайда өмірлік қызметтерді демеуге қатысты негізгі және спецификалық шаралар жүргізіледі. Ырғақсыз қарыншалар фибрилляциясы кезінде дефибрилляцияны бастау қажет. Артық дозалану симптомдарының дамуы антихолинергиялық әсерлердің салдарынан кешірек дамуы мүмкін болғандықтан, симптомдары жоқ пациенттер, ең жоқ дегенде, 6-8 сағат бойы бақылауда болуы тиіс. Гипотензия және аритмия қарқынды емді қажет етеді. Бақылау кезеңінде кома, құрысулар, гипертермия және тахикардия дамуы мүмкін.
Аскорбин қышқылы
Аскорбин қышқылын жоғары дозаларда (˃3000 мг) қабылдау асқазан-ішек тарапынан өткінші осмостық диарея, жүректің айнуы, және абдоминальді ауыру сияқты симптомдардың дамуына әкеп соғуы мүмкін. Аскорбин қышқылының артық дозалануының ықпалы парацетамолдың артық дозалануының ықпалын күшейтеді, бұл бауырдың ауыр уыттануының дамуына әкеледі.
Шығарылу түрі және қаптамасы
Көп қабатты үлбірден: полиэтилентерефталаттан/алюминий фольгадан/тығыздығы төмен полиэтиленнен жасалған сашеге 5.0 г ұнтақтан салынған.
10 саше медициналық қолдану жөнінде мемлекеттік және орыс тілдеріндегі нұсқаулықпен бірге картон қорапшаға салынған.
Сақтау шарттары
Құрғақ, жарықтан қорғалған жерде, 25˚С-ден аспайтын температурада сақтау керек. Балалардың қолы жетпейтін жерде сақтау керек!
Сақтау мерзімі
2 жыл
Жарамдылық мерзімі өткеннен кейін қолдануға болмайды.
Дәріханалардан босатылу шарттары
Рецептісіз
Өндіруші/Қаптаушы
«ABDI IBRAHIM» Стамбул, Түркия
Өндіріс алаңы: Orhan Gazi Mahallesi, Tunç Caddesi No:3, Esenyurt/İstanbul TURKEY
Бас кеңсе: Reşitpaşa Mahallesi Eski Büyükdere Caddesi No:4, Maslak-Sarıyer – 34467 İstanbul/TURKEY
Тіркеу куәлігінің иесі
«ABDI IBRAHIM» Стамбул, Түркия
Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын және тіркеуден кейін дәрілік заттың қауіпсіздігін бақылауға жауапты ұйымның атауы, мекенжайы және байланыс деректері:
«Абди Ибрахим Глобал Фарм» ЖШС, Қазақстан Республикасы, Алматы обл., Іле ауд., Өндіріс аймағы 282, тел.: +7 (727) 356-11-00, 8-800-070-1100, электронды пошта: info@aigp.kz