Таллитон® (25 мг)
Инструкция
-
русский
-
қазақша
Саудалық атауы
Таллитон®
Халықаралық патенттелмеген атауы
Карведилол
Дәрілік түрі
6,25 мг, 12,5 мг, 25 мг таблеткалар
Құрамы
Бір таблетканың құрамында
белсенді зат - 6,25 мг, 12,5 мг, 25 мг карведилол бар,
қосымша заттар: лактоза моногидраты, кросповидон, сахароза, кремнийдің коллоидты сусыз қостотығы, повидон К-25, магний стеараты.
6,25 мг таблеткалар: хинолинді сары (Е104)
12,5 мг таблеткалар: "Күн батар түстес" сары (Е110).
Сипаттамасы
Ақшыл-сары түсті, жайпақ беткейімен, сопақша пішінді, бір жағында ойығы, сызығы бар және екінші жағында Е әрпі мен 341 нөмірі ойылып жазылған, иіссіз немесе иіссіз дерлік таблеткалар (6,25 мг доза үшін)
Ақшыл-қызыл сары түсті, күңгірт түсті дақтары болуы мүмкін, жайпақ беткейімен, дөңгелек пішінді, бір жағында ойығы, сызығы бар және екінші жағында Е әрпі мен 342 нөмірі ойылып жазылған, иіссіз немесе иіссіз дерлік таблеткалар (12,5 мг доза үшін).
Ақ немесе ақ дерлік түсті, жайпақ беткейімен, дөңгелек пішінді, бір жағында ойығы, сызығы бар және екінші жағында Е әрпі мен 343 нөмірі ойылып жазылған, иіссіз немесе иіссіз дерлік таблеткалар (25 мг доза үшін).
Фармакотерапиялық тобы
Бета-адреноблокаторлар. Альфа- және бета-блокаторлар. Карведилол.
АТХ коды С07АG02
Фармакологиялық қасиеттері
Фармакокинетикасы
Карведилол асқазан-ішек жолынан жылдам сіңеді. Бұл препарат бауыр арқылы алғашқы өткенде қарқынды метаболизмге ұшырайды, және оның биожетімділігі ішу арқылы қабылданғанда шамамен 25% құрайды.
Қан сарысуындағы ең жоғары концентрациясына ішке қабылдағаннан кейін шамамен 1 сағаттан соң жетеді. Аспен бірге қабылдау биожетімділігі мен плазмадағы ең жоғары концентрациясына әсер етпейді, бірақ плазмада ең жоғары концентрациясына жету уақытын ұзартуы мүмкін. Карведилол жоғары липофильділікке ие және қан плазмасының ақуыздарымен 98-99% байланысады. Болжамды таралу көлемі 2 л/кг құрайды. Таллитон негізінен өтпен шығарылатын бірнеше метаболиттер түзе отырып, тотығу және конъюгациялану жолымен бауырда қарқынды метаболизмге ұшырайды. Ішке қабылдағаннан кейін бауыр арқылы алғашқы өту метаболизмі 60-75% құрайды. Зерттеулерде карведилолдың ішек-бауырлық айналымы анықталды. Әсер етуші заты негізінен глюкуронидпен конъюгациялану жолымен бауырда метаболизденеді. Фенольді сақинаның деметилденуі және гидроксилденуі -рецепторларды бөгеуге қабілетті үш белсенді метаболиттің түзілуіне әкеледі.
Карведилолдың оксидативті метаболизмі стереоселективті болып табылады. R-энантиомерлер негізінен CYP2D6 және CYP1A2 метаболизденеді, ал S-стереоизомер жоғары дәрежеде CYP2C9 және аз дәрежеде - CYP2D6 метаболизденеді. CYP450 цитохромдарының басқа изоферменттері - CYP3A4, CYP2E1 және CYP2C19 карведилол метаболизміне қатысады. Плазмадағы R-карведилолдың ең жоғары концентрациясы S-карведилолдың концентрациясына қарағанда 2 есе жоғары. Фармакокинетикалық зерттеулердің нәтижесі бойынша, CYP2D6 цитохромы R- және S-карведилолдың метаболизациясында басты роль атқаратынын анықтауға болады.
CYP2D6 баяу метаболизаторларында қан плазмасында карведилолдың (алдымен R-энантиомердің) концентрациясының жоғарылауы байқалған, ол альфа-бөгейтін белсенділігінің жоғарылауына әкелуі мүмкін. CYP2D6 генотипінің R- және S-карведилолдың фармакокинетикасындағы маңыздылығы популяциялық фармакокинетикалық зерттеулердің нәтижелерімен расталады. Әйтсе де басқа зерттеулер осы бақылауды дәлелдеген жоқ. CYP2D6 генетикалық полиморфизмінің клиникалық ролі шектелгені туралы шешім қабылданған.
Карведилолдың жартылай шығарылу кезеңі шамамен 6 сағат құрайды, оның плазмадан клиренсі шамамен 500-700 мл/минут құрайды. Экскрециясы негізінен өтпен жүреді, ал препарат ішек арқылы шығарылады. Аздаған бөлігі метаболиттер түрінде бүйрек арқылы шығарылады.
Карведилол дозаға тәуелді фармакокинетикалық параметрлерге ие, яғни оның плазмадағы деңгейі енгізілген дозаға пропорциональді.
Емделушілердің арнайы тобындағы фармакокинетикасы Қатар жүретін бүйрек функциясының бұзылуымен емделушілер
Карведилолды ұзақ уақыт қабылдағанда бүйректің қан айналымы нашарлаған жоқ, және шумақтық сүзіліс жылдамдығы өзгерген жоқ.
Артериялық гипертензия және бүйрек жеткіліксіздігімен емделушілерде қан плазмасындағы AUC, жартылай шығарылу кезеңі және Cmax айтарлықтай өзгерген жоқ. Бүйрек жеткіліксіздігінде карведилолдың бүйрек арқылы шығарылуы төмендейді, бірақ бұл оның фармакокинетикалық параметрлеріне тек мардымсыз әсер етеді.
Препарат оның бәлкім диализ жарғақшасы арқылы өтуіне кедергі ететін плазма ақуыздарымен күшті байланысуы себебінен организмнен диализ кезінде шығарылмайды.
Бауыр функциясының бұзылуымен емделушілер
Бауыр функциясының ауыр бұзылуында алғашқы өту метаболизмінің әлсіреуіне байланысты карведилолдың биожетімділігі едәуір (80% дейін) жоғарылайды. Сондықтан карведилолды бауыр функциясының бұзылуымен емделушілерде қолдануға болмайды. Циррозбен емделушілердің қатысуымен фармакокинетикалық зерттеулерде карведилолдың экспозициясы (AUC) бауыр ауруларында 6,8 есе жоғарылайтыны анықталды.
Егде жастағы емделушілер
Артериялық гипертензиямен егде жастағы емделушілерде карведилолдың фармакокинетикасы жасына байланысты болады. Егде жастағы емделушілерде плазмадағы карведилолдың деңгейі жастармен салыстырғанда шамамен 50% жоғары.
Жүрек жеткіліксіздігі
Жүрек жеткіліксіздігімен 24 емделушіні клиникалық зерттеуде R- және S-карведилолдың клиренсі дені сау адамдарда бұрын анықталған мәндерге қарағанда нақты төмен болған. Бұл нәтижелер жүрек жеткіліксіздігінің R- және S-карведилолдың фармакокинетикасына айтарлықтай әсер ететінін болжамдауға мүмкіндік береді.
Қант диабетімен емделушілер
β-адреноблокаторлар инсулинге төзімділікті жоғарылатады және гипогликемия симптомдарын бүркемелеуі мүмкін. Сонымен қатар, қантамырларын кеңейтетін әсері бар β-адреноблокаторлар (карведилол) – қандағы глюкоза деңгейіне және липидтер бейініне жағымдырақ әсер ететіні анықталды. Карведилолдың кейбір дәрежеде инсулинге сезімталдықты жоғарылататыны және метаболикалық синдромның кейбір біліністерін тежейтіні көрсетілген.
Фармакодинамикасы
Карведилол– үшінші буынның препараты, адренергиялық рецепторлардың (a1-, b1 және b2-рецепторлардың) іріктелмеген бөгегіші. Вазодилатация алдымен a1-рецепторлармен антагонизміне байланысты. Карведилол ағзаларды қорғауға қабілетті, күшті антиоксидантты әсерге ие және бос радикалдарды бейтараптандырады.
Карведилол өзінің b-бөгейтін белсенділігінің арқасында, рениннің босап шығарылуын азайта отырып, ренин-ангиотензин-альдостерон жүйесін төмендетеді, сондықтан оны қолдану кезінде сұйықтың организмде іркілуі сирек пайда болады.
Карведилол ішкі симпатомиметикалық белсенділікке ие емес, дегенмен пропранолол сияқты жарғақшаны тұрақтандырғыш әсерге ие.
Карведилол екі стереоизомердің рацемиялық қоспасы болып табылады. Оның R(+) және S(-) энантиомерлері бірдей a1-бөгейтін және антиоксидантты әсерге ие. Карведилол b1 және b2-рецепторларды іріктемей басады, ол оның S(-) энантиомерінің қасиеті болып табылады.
Карведилол жақсы антиоксидант болып табылады. Әртүрлі маркерлерді анықтаумен клиникалық зерттеулерде көрсетілгендей, карведилол қабылдайтын емделушілерде тотығу стресі төмендейді. Ол оттегінің бос радикалдарының акцепторы болып табылады және қантамырлары қабырғаларында тегісбұлшықеттік жасушалардың пролиферациясын басады.
1-рецепторлардың карведилолмен іріктеліп бөгелуі шеткергі қантамырлық кедергіні төмендетеді. Карведилол фенилэфриннің
1 -рецепторларының агонисіне гипертензиялық реакцияны баяулатады, бірақ ангиотензин II-нің гипертензивті әсеріне әсер етпейді.
Карведилол липидті бейінге әсер етпейді. Ол жоғары және төмен тығыздықтағы липопротеиндердің (ЖТЛП/ТТЛП) қатынасын өзгертпейді.
Артериялық гипертензия
Артериялық гипертензияда карведилолды қолдану b-рецепторлар бөгелуінің және a1-рецепторлар бөгелуімен байланысты қантамырларының кеңеюінің бірігуі жолымен артериялық қысымды төмендетеді.Оның гипертензияға қарсы әсері таза b-блокаторлардың әсеріне тән, жалпы шеткергі кедергінің жоғарылауына байланысты емес. Оны енгізгенде жүректің жиырылу жиілігі аздап төмендейді. Артериялық гипертониямен науқастарда бүйректің қан айналымы және бүйрек функциясы өзгермейді.
Карведилол ең жоғары көлемге әсер етпейді және жалпы шеткергі қантамырлық кедергіні төмендетеді. Ол жеке ағзалардың перфузиясын және ағзаларды қамтамасыз ететін артериялардағы қан ағымын, оның ішінде бүйрек, қаңқа бұлшықеттері, білек, аяқ, тері және ми артерияларында, сондай-ақ күретамырда қан ағымын нашарлатпайды.
Тамыр кеңейткіш әсері жоқ b-блокаторларға тән аяқ-қолдың суынуын сезіну және дене жүктемелері кезіндегі жоғары шаршағыштық карведилолды қолданғанда сирек кездеседі. Карведилолдың гипертензияда ұзақ әсер етуі бірегей препараттың бірнеше клиникалық зерттеулерінде дәлелденген.
2-3 сағат ішінде ең жоғары шегіне жетіп, оның антигипертензивті әсері жылдам дамиды және 24 сағатқа созылады. Препаратты ұзақ уақыт қолданғанда ең жоғары әсері 3-4 апта ішінде дамуы мүмкін.
Бүйректік гипертония
Созылмалы бүйрек жеткіліксіздігімен емделушілерді, гемодиализдегі немесе бүйрек трансплантациясынан кейінгі емделушілерді қоса бірегей препараттың ашық клиникалық зерттеулерінде анықталғандай, карведилол бүйрек гипертензиясын емдеу үшін жетістікпен қолданылуы мүмкін. Гемодиализ күндеріндегідей, сондай-ақ гемодиализ аралығында, карведилол артериялық қысымды біртіндеп төмендетеді бұл әсері бүйрек функциясы қалыпты тұлғаларда бақыланатын әсерлермен ұқсас.
Гемодиализдегі емделушілердің қатысуымен жүргізілген салыстырмалы зерттеулер негізінде карведилолдың кальций өзекшелерінің блокаторларына қарағанда тиімділігі жоғары және жақсы көтерімді деп шешім қабылданды.
Коронарлы артериялардың аурулары
Коронарлы артериялардың зақымдануымен науқастарда карведилолдың ишемияға және жүрек қыспасына қарсы әсері бар, ол ұзақ уақыт қабылдағанда байқалуы мүмкін. Гемодинамиканы жедел зерттегенде карведилол миокардқа оттегінің қажеттігін және симпатикалық жүйке жүйесінің жоғары белсенділігін айтарлықтай төмендетті. Карведилол қарыншаларға алдыңғы жүктемені (өкпе артериясындағы қысымды, өкпе қылтамырлары бітелуінен болатын қысымды), сондай-ақ соңғы жүктемені (жалпы шеткергі кедергіні) төмендетті.
Созылмалы жүрек жеткіліксіздігі
Созылмалы жүрек жеткіліксіздігіне шағымданумен карведилол әртүрлі себептермен өлімді және бірегей препаратпен жүргізілген клиникалық зерттеулерде жүрек-қан тамыр бұзылуларына қатысты шағымдармен ауруханаға жатқызу жиілігін елеулі төмендетеді.
COPERNICUS зерттеулерінде созылмалы ауыр жүрек жеткіліксіздігімен науқастарда карведилолдың тиімділігі және жақсы көтерілімділігі көрсетілген. Карведилол лықсу фракциясын арттырады және шығу тегі ишемиялық немесе ишемиялық емес созылмалы жүрек жеткіліксіздігі симптомдарын әлсіретеді. Карведилолдың дозаға байланысты әсері көрсетілген. COMET зерттеулерінде карведилолды стандартты ем компоненті ретінде қолдану метопролол қабылдаған топпен салыстырғанда өлім жағдайын айтарлықтай төмендетті.
Бүйрек жеткіліксіздігі
Карведилол гемодиализдегі дилатациялық кардиомиопатиямен емделушілерде ауыру және өлу жағдайларын төмендетеді. Бірегей препараттың ауырлығы орташа немесе орташаға жуық бүйрек ауруымен (>4000) емделушілердің қатысуымен плацебо-бақыланатын клиникалық зерттеулерінің мета-талдауы көрсеткендей жүрек жеткіліксіздігі симптомдары бар және онсыз сол жақ қарынша функциясының бұзылуы бар бүйрек ауруымен науқастарда көрсеткендей, карведилол өлім жағдайын және жүрек жеткіліксіздігімен байланысты жағдайлар жиілігін төмендетеді.
Жедел миокард инфарктінен кейінгі сол жақ қарынша функциясының бұзылуы
Плацебо бақылауымен (CAPRICORN) миокард инфарктісін өткерген 1 959 емделуші қатысуымен, қосарлы-жасырын зерттеуде сол жақ қарынша лықсу фракциясы ≤ 40% немесе сол жақ қарынша қабырғасының қозғалу индексі ≤ 1.3 (жүрек жеткіліксіздігінің клиникалық білінуі барлық емделушілерде байқалған жоқ). Зерттеу нәтижелері бойынша карведилол, әр түрлі себептерге байланысты өлім жағдайларының немесе жүрек-қантамырлық шағымдар бойынша ауруханаға жатқызу жиілігінің (8%-ға төмендеу, p=0,297) біріктірілген алғашқы нүктесі бойынша статистикалық нақты төмендеуін туындатқан жоқ. Әйтсе де, карведилол плацебо тобымен салыстырғанда, әр түрлі себептерге байланысты өлімді ( 23%-ға, p = 0.031), әр түрлі себептерге байланысты өлім + өліммен аяқталатын миокард инфарктінің даму жиілігін (29%-ға p = 0.002), жүрек-қантамырлық себептерге байланысты өлімді (25%-ға p = 0.024), сондай-ақ өліммен аяқталмайтын миокард инфарктісіне байланысты ауруханаға жатқызуды (41%-ға p = 0.014) нақты төмендетті.
Қолданылуы
- монотерапия ретінде немесе біріктірілген ем құрамында артериялық гипертензияда
- клиникалық айқын білінетін созылмалы жүрек жеткіліксіздігінде (NYHA II-IV) біріктірілген ем құрамында: қарсы көрсетілімдері жоқ емделушілерде шығу тегі ишемиялық немесе ишемиялық емес болуына тәуелсіз тұрақты жеңіл, орташа немесе ауыр созылмалы жүрек жеткіліксіздігінде, созылмалы жүрек жеткіліксіздігінің стандартты емімен біріктіріп (жүрек гликозидтерімен немесе онсыз АӨФ тежегіштері, диуретиктер) емдеу үшін.
- жүректің ишемиялық ауруында (оның ішінде тұрақты емес стенокардиямен және миокардтың ауырусыз жүретін ишемиясымен)
Қолдану тәсілі және дозалары
Препаратты тек дәрігердің тағайындауы бойынша ғана қабылдау керек!
Таблеткаларды шайнамай судың көп мөлшерімен ішіп қабылдау керек. Созылмалы жүрек жеткіліксіздігімен емделушілерге таблеткаларды аспен қабылдау керек. Карведилолмен емдеу ұзақ уақытты талап етеді.
Артериялық гипертензия: ұсынылатын бастапқы доза – алғашқы 2 күн бойы тәулігіне бір рет 12,5 мг. Егер емделушілер осы дозаны жақсы көтеретін болса, онда оны жоғарылатуға болады. Демеуші доза: тәулігіне бір рет 25 мг. Бұл доза көптеген емделушілер үшін жеткілікті. Нәтиже қанағаттанарлық болмаған жағдайда, бірақ кемінде емдеудің 14-ші күнінен ерте емес, дозаны тәулігіне бір рет ең жоғарғы деңгейі – 50мг дейін жоғарылатуға болады (немесе тәулігіне екі рет 25 мг-ден).
Жүректің ишемиялық ауруы: ұсынылатын бастапқы доза - алғашқы екі күн бойы тәулігіне екі рет 12,5 мг-ден. Демеуші доза – тәулігіне екі рет 25 мг-ден. Қажет болғанда, дозаны 14-күндік аралықпен тәулігіне екі рет 100 мг ең жоғары тәуліктік дозаға дейін жоғарылатады.
Клиникалық айқын білінетін созылмалы жүрек жеткіліксіздігі (NYHA II-IV):
Таллитонмен емнің басында, сондай-ақ дозаны таңдау және дозаны жоғарылату, кардиологтың мұқият қадағалауымен, емдеу мекемесінде жүргізілуі керек.
Таллитон® препаратының дозасын емделушінің тұрақты клиникалық жағдайында ғана таңдауға болады. Доза әрбір емделуші үшін жекелей тағайындалады.
Дигоксиннің, диуретиктердің және АӨФ тежегіштерінің дозаларын Таллитон препаратын қабылдауды бастағанға дейін тұрақтыландыру керек.
Ұсынылатын бастапқы доза – 14 күн бойы тәулігіне екі рет 3,125 мг-ден (немесе таңертең және кешке 6,25 мг 1/2 таблетка). Егер жақсы көтере алса және клиникалық қажеттілік болса дозаны екі аптадан кем емес аралықтан кейін, тәулігіне екі рет 6,25 мг-ға дейін арттыруға болады, содан кейін тәулігіне екі рет 12,5 мг-ге дейін, ары қарай тәулігіне екі рет 25 мг-ға дейін. Дозаны емделушілер көтере алатын ең жоғары деңгейге дейін жоғарылату керек. Емделушілер олармен ең жоғары көтерімді және демеуші доза қабылдауы керек.
Ең жоғарғы ұсынылатын доза:
- тәулігіне екі рет 25 мг-ден барлық ауыр созылмалы жүрек функциясының жеткіліксіздігімен емделушілер үшін және дене салмағы 85 кг төмен жеңіл және орташа дәрежедегі созылмалы жүрек функциясының жеткіліксіздігімен емделушілер үшін
- тәулігіне екі рет 50 мг-ден дене салмағы 85 кг-нан жоғары жеңіл және орташа созылмалы жүрек жеткіліксіздігі бар емделушілер үшін
Дозаны әрбір жоғарылатар алдында емделушілерді жүрек жеткіліксіздігі симптомдарының күшеюі мен вазодилатация белгілерін (гипотензия, бас айналуы) анықтау мақсатында тексеру керек.
Жүрек жеткіліксіздігі немесе сұйықтың іркілуі симптомдары қайтымды жоғарылауы мүмкін. Аталған жағдайларда диуретиктердің дозасын жоғарылату ұсынылады. Кейбір жағдайларда Таллитон дозасын төмендетуге немесе оны қабылдауды уақытша тоқтатуға қажеттілік пайда болуы мүмкін.
Препаратты қабылдауды бір аптадан артық уақытқа тоқтату қажет болғанда оны қабылдауды тәулігіне 2 рет ең төмен бастапқы ұсынылатын дозадан жаңғырту, ал содан кейін дозаны титрлеудің жоғарыда көрсетілген тәртібіне сәйкес анықтау керек. Препаратты қабылдауды 2 аптадан артық уақытқа тоқтату қажет болғанда оны қабылдауды ең төмен бастапқы ұсынылатын дозадан, яғни тәулігіне екі рет 3,125 мг Таллитоннан жаңғырту керек, ал содан кейін дозаны титрлеудің жоғарыда көрсетілген тәртібіне сәйкес анықтау керек.
Вазодилатация симптомдары даму мүмкіндігінде (гипотензия, жылы аяқ-қолдар) алдымен диуретиктердің дозасын төмендету керек. Егер осы симптомдар сақталса, ал емделуші АӨФ тежегіштерін қабылдаса, АӨФт дозасын төмендету керек. Қажет болса, осыдан кейін Таллитонның дозасын төмендетуге болады.
Осындай жағдайларда Таллитонның дозасын жүрек жеткіліксіздігінің нашарлау симптомдары немесе вазодилатация тұрақтанғанша жоғарылатуға болмайды.
Препаратты тоқтатуды, әсіресе созылмалы стенокардияда дозаны біртіндеп азайта отырып жүргізеді.
Егде емделушілер
- артериялық гипертензияда: бастапқы доза - 12,5мг. Бұл дозаны ұзақ қолдану кейбір емделушілерде артериялық қысымды бақылауға мүмкіндік береді. Қажет болғанда дозаны 2 апталық аралықпен ең жоғары 50 мг дозаға дейін (немесе тәулігіне екі рет 25 мг) арттыруға болады.
- созылмалы тұрақты стенокардияда: ең жоғарғы тәуліктік доза – екі рет қабылдаумен 50 мг.
- клиникалық айқын білінетін созылмалы жүрек жеткіліксіздігінде (NYHA II-IV): ересектер үшін ұсынылатын әдеттегі доза тағайындалады.
- миокард инфарктісінен кейінгі сол жақ қарынша функциясының бұзылуы: ересектер үшін ұсынылатын әдеттегі доза тағайындалады.
Бүйрек функциясының бұзылуымен емделушілер
Орташа немесе ауыр дәрежедегі ауырлықтағы бүйрек жеткіліксіздігі бар емделушілерде, дозаны іріктеудің қажеті жоқ.
Бауыр функциясының бұзылуымен емделушілер
Бауыр функциясының бұзылуымен емделушілерге Таллитонды қолдануға болмайды. Бауыр функциясы орташа бұзылғанда препарат дозасын төмендетуге қажеттілік туындауы мүмкін.
Жағымсыз әсерлері
Өте жиі (>1/10)
- бас айналуы және бас ауыруы (әдетте аздап байқалады және емдеудің басында жиі байқалады)
- жүрек жеткіліксіздігі
- астения (қажығыштықты қоса)
Жиі (>1/100, <1/10)
- бронхит, пневмония, жоғарғы тыныс жолдарының жұқпасы
- ентігу, өкпенің ісінуі, бронх демікпесі
- несеп шығаратын жолдар жұқпасы
- диффузды қантамырлық аурулармен және/немесе бүйрек функциясының бұзылуымен емделушілерде бүйрек функциясының бұзылуы және бүйрек жеткіліксіздігі
- анемия
- дене салмағының жоғарылауы, гиперхолестеринемия, қандағы глюкоза деңгейін бақылаудың нашарлауы (гипергликемия, гипогликемия)
-депрессия, көңіл-күйдің болмауы
- естен тану, естен тану алдындағы жағдай
- көрудің нашарлауы, көз жасы бөлінуінің төмендеуі (көздің құрғақтығы), көздің тітіркенуі
- брадикардия, гиперволемия, ісінулер және сұйықтың іркілуі
- артериялық қысымның төмендеуі, ортостатикалық гипотензия, шеткергі қан айналымының нашарлауы (аяқ-қолдың салқындауы, шеткергі қантамырлар аурулары, ауық-ауық ақсақтықтың нашарлауы және Рейно синдромы)
- жүрек айнуы, құсу, іштің ауыруы, диарея, диспепсия
- аяқтың ауыруы
- ауыру, ісінулер
Жиі емес (>1/1000, <1/100)
- ұйқының бұзылуы
- парестезия
- жүрекше-қарыншалық блокада және стенокардия
- іш қату
- тері реакциялары (мысалы, аллергиялық экзантема, дерматит, есекжем, қышыну, жайпақ теміреткіге ұқсас реакциялар, терінің псориазға ұқсас өзгерістері, некролиз.
- эректильді функцияның бұзылуы
Сирек (> 1/10000, < 1/1000)
- тромбоцитопения
- мұрынның бітелуі
- ауыздың құрғауы
- несеп шығарудың бұзылуы
Өте сирек (< 1/10000)
- лейкопения
- жоғары сезімталдық реакциялары (аллергиялық реакциялар)
- АСТ мен АЛТ аминотрансферазалары және γ-глутамилтрансферазаның деңгейінің жоғарылауы
Іркілген жүрек жеткіліксіздігімен емделушілерде жүрек жеткіліксіздігінің нашарлауы және сұйықтың іркілуі препарат дозасын таңдау кезінде дамуы мүмкін.
Бүйрек функциясының өтпелі нашарлауы созылмалы жүрек жеткіліксіздігімен, төмен артериялық қысыммен, жүректің ишемиялық ауруымен және /немесе бүйрек функциясының бұзылуларымен емделушілерде препаратпен емдеу аясында байқалды.
Тіркеуден кейінгі кезең
Тіркеуден кейінгі кезеңде төменде берілген жағымсыз реакциялар туралы хабарлар түскен. Бұл хабарларда популяцияның мөлшері туралы ақпарат болмағандықтан, әрдайым жиілігі немесе себептік байланысын анықтау мүмкін болған жоқ.
- басқа β-адреноблокаторларды қолданған жағдайдағыдай, Таллитонмен емдеу аясында жасырын ағымдағы қант диабетінің манифестациясы немесе оның белгілерінің күшеюі туралы хабарланды
- алопеция
- тері тарапынан ауыр реакциялар (Стивенс-Джонсон синдромы, уытты эпидермальді некролиз)
- әйелдерде несепті ұстай алмаудың препаратты тоқтатқаннан кейін қайтатын бірнеше жағдайлары байқалған.
Қолдануға болмайтын жағдайлар
- препараттың белсенді немесе белсенді емес ингредиенттерінің кез келгеніне жоғары сезімталдық
- инотропты препараттарды көктамыр ішіне енгізуді қажет ететін сұйықтықтың айқын іркілуі немесе жүрекке жоғары жүктеме
- бауыр функциясының айқын бұзылуы
- сыртартқысындағы бронх түйілуі немесе бронх демікпесі
- өткізгіштіктің бұзылуы (синусты түйін әлсіздігі синдромы, синоатриальді блокада, 2-ші және 3-ші дәрежедегі атриовентрикулярлы блокада), ырғақтың жасанды жүргізушісімен емделушілерді қоспағанда
- айқын брадикардия (жүректің жиырылу жиілігі минутына 50 соғудан кем)
- айқын артериялық гипотензия (систолалық артериялық қысым 85 мм с. б. төмен)
- кардиогенді шок
- метаболикалық ацидоз
- феохромоцитома (a-адреноблокаторларды тағайындаумен тұрақтандырылған жағдайларды қоспағанда)
-
оң инотропты дәрілерді және/немесе диуретиктерді көктамыр ішіне енгізуді талап ететін тұрақсыз қалпына келмейтін жүрек жеткіліксіздігі; өкпелік жүрек
- жүктілік және лактация кезеңі
- 18 жасқа дейінгі балалар мен жасөспірімдер (оның қауіпсіздігі мен тиімділігі жөніндегі деректердің жеткіліксіздігіне байланысты)
Дәрілермен өзара әрекеттесуі
Фармакокинетикалық өзара әрекеттесуі
Карведилол Р-гликопротеиннің субстраты және сонымен бірге тежегіші болып табылады. Осылайша Р-гликопротеин көмегімен тасымалданатын дәрілік заттың биожетімділігі карведилолмен біріктіргенде жоғарылауы мүмкін. Одан басқа Р-гликопротеиннің индукторы немесе тежегіші карведилолдың биожетімділігін өзгертуі мүмкін.
Дигоксин: дені сау адамдарда, сондай-ақ жүрек жеткіліксіздігімен емделушілерде дигоксиннің плазмадағы концентрациясы дигоксинді Таллитонмен біріктіргенде 20%-ға жоғарылауы мүмкін. Дигоксиннің деңгейін ұдайы бақылау емнің басында ұсынылады, дозаны жоғарылатқанда және Таллитонды қабылдауды тоқтатқанда.
Циклоспорин: циклоспорин қабылдаған емделушілерде бүйрек немесе жүрек трансплантациясынан кейін екі зерттеу жүргізілген.Таллитонмен емді бастағаннан кейін циклоспориннің плазмадағы концентрациясының шамамен 10-20% жоғарылауы байқалған. Циклоспориннің дозасы шамамен 30% емделушілерде емдік диапазонда демеу үшін төмендетілген. Басқа емделушілерде дозаны төмендету қажет болған жоқ. Орташа циклоспориннің дозасын шамамен 20% төмендету керек болды. Дозаны нақтылау қажеттігінің айқын жекелей ауытқушылығына байланысты Талитонды қабылдауды бастағаннан кейін циклоспорин концентрациясын мұқият қадағалау керек және қажет болғанда циклоспориннің дозасын нақтылау керек. Циклоспоринді көктамыр ішіне қолданғанда Таллитонмен өзара әрекеттесуі күтілмейді.
CYP2D6 және CYP2C9 цитохромдарының тежегіштері, сондай-ақ индукторлары секілді карведилолдың метаболизмін қан плазмасында R- и S-карведилолдың концентрациясының жоғарылауына немесе төмендеуіне әкеліп, жүйелік және жүйе алдылық стереоспецификалық модифицикациялауы мүмкін.
Рифампицин: 12 дені сау еріктілерге жүргізілген зерттеуде, рифампицин плазмадағы карведилолдың деңгейін шамамен 60%-ға төмендетті, мүмкін, Р-гликопротеин индукциясы нәтижесінде, ол карведилолдың ішектегі сіңуінің азаюына және оның антигипертензиялық әсерінің нашарлауына әкелді.
β-адренорецепторлардың бөгелуінің тиімділігін карведилолды рифампицинмен бірге қабылдаған емделушілерде мұқият бақылау талап етіледі.
Амиодарон: амиодарон мен дезэтил-амиодаронның R‑ және S‑карведилолдың тотығуын тежейтіні көрсетілген. R‑ және S‑карведилолдың ең төмен концентрациясы карведилолды монотерапия ретінде қабылдаған емделушілермен салыстырғанда, карведилолды амиодаронмен бірге қабылдаған жүрек жеткіліксіздігімен емделушілерде 2,2 есе жоғарылады. Амиодаронның S‑карведилолға осындай әсері, бәлкім, CYP2С9 цитохромының күшті тежегіші болып табылатын оның метаболиті дезэтил-амиодаронмен байланысты болуы мүмкін.
Флуоксетин мен пароксетин: жүрек жеткіліксіздігімен 10 емделушіде жүргізілген зерттеулерде, карведилолды флуоксетинмен біріктіріп қолдану (CYP2D6 тежегішімен) энантиомер R(+) AUC мәнінің деңгейінің 77% жоғарылауымен карведилол метаболизмінің стереоспецификалық ингибициясын туындатты.
Сонымен қатар жағымсыз әсерлер, артериялық қысым және жүректің жиырылу жиілігі тұрғысынан топтар арасында айырмашылықтар жоқ.
CYP2D6 цитохромының күшті тежегіші болып табылатын пароксетиннің бір реттік ішілетін дозасының, карведилолдың фармакокинетикасына әсері 12 еріктілердің қатысуымен зерттелді. AUC R- және S‑карведилолдың айтарлықтай жоғарылауына қарамастан, дені сау адамдарда ешқандай клиникалық әсері байқалған жоқ.
Фармакодинамикалық өзара әрекеттесу
Инсулин және пероральді диабетке қарсы препараттар: β-адреноблокаторлар инсулиннің немесе пероральді диабетке қарсы дәрілердің гипогликемиялық әсерін күшейтуі мүмкін. Таллитон гипогликемия белгілерін бәсеңдетуі немесе бүркемелеуі мүмкін (әсіресе тахикардияны). Осыған байланысты инсулин немесе пероральді диабетке қарсы препараттарды қабылдайтын емделушілерде қандағы глюкоза деңгейін үнемі бақылау ұсынылады.
Катехоламиндер деңгейін төмендететін дәрілер: β-адреноблокаторлар және катехоламиндер деңгейін төмендететін дәрілер (мысалы, резерпин немесе моноаминоксидаза тежегіштері) қабылдайтын емделушілер, мұқият бақылауды қажет етеді, өйткені оларда гипотензия және/немесе айқын брадикардия пайда болуы мүмкін.
Дигоксин: Таллитонды жүрек гликозидтерімен бір мезгілде қабылдау жүрекше-қарыншалық өткізгіштікті баяулатуы мүмкін.
Дигидропиридинді типтегі (верапамил, дилтиазем) кальций өзекшелерінің блокаторы және басқа да аритмияға қарсы препараттар (амиодарон): Таллитонмен бір мезгілде қолдану жүрекше-қарыншалық өткізгіштіктің бұзылу қаупін жоғарылатуы мүмкін. Таллитонмен емдеу аясында верапамил және дилтиазем типтес кальций өзекшелерінің блокаторын көктамыр ішіне енгізуге болмайды.
Клонидин: β-адреноблокаторларды клонидинмен бір мезгілде қолданғанда соңғысы олардың антигипертензиялық және брадикардиялық әсерін күшейтуі мүмкін. β-адреноблокатор мен клонидинді қабылдауды тоқтату қажеттігінде алдымен біртіндеп β-адреноблокаторды тоқтату керек. Осыдан кейін бірнеше күннен соң клонидинді қабылдауды дозасын біртіндеп төмендету жолымен тоқтатуға болады.
Антигипертензиялық дәрілер: β-бөгейтін белсенділікке ие басқа препараттар секілді, Таллитон антигипертензиялық әсерге ие (мысалы, a-1 рецепторлардың антагонистері) немесе гипотензияны жағымсыз әсерлер бейінінде иеленген басқа қатар қабылданатын дәрілік заттардың әсерін күшейтуі мүмкін.
Анестетиктер: наркоз кезінде карведилолдың теріс инотропты әсері мен жалпы анестезияда қолданылатын дәрілердің синергизмінің мүмкіндігіне байланысты, организмнің физиологиялық функциясын мониторлау керек.
Қабынуға қарсы стероидты емес дәрілер: осы дәрілерді бета-блокаторлармен біріктіру артериялық қысымның жоғарылауына әкелуі және оның реттелуін нашарлатуы мүмкін.
Бета-блокаторлар және бронходилататорлар: кардиоселективті емес β-адреноблокаторлар β-агонистер типіндегі бронходилататорлардың бронхты кеңейтетін әсеріне қарсы тұрады.
Айрықша нұсқаулар
Созылмалы жүрек жеткіліксіздігі: Созылмалы жүрек жеткіліксіздігімен емделушілерде Таллитонның дозасын іріктеу кезеңінде жүрек жеткіліксіздігі симптомдарының күшеюі немесе сұйықтың іркілуі мүмкін. Мұндай симптомдар пайда болғанда диуретиктердің дозасын жоғарылату керек, ал Таллитонның дозасын емделушінің клиникалық жай-күйі тұрақтанғанға дейін жоғарылатуға болмайды. Кейбір жағдайларда дозаны төмендету немесе Таллитон препаратын қабылдауды уақытша тоқтату қажет болуы мүмкін. Бұл дозаны бұдан әрі қарай дұрыс іріктеуге кедергі келтірмейді. Артериялық гипертензиямен, созылмалы жүрек жеткіліксіздігін емдеу үшін оймақгүл препараттарын қолданудағы емделушілерде, Таллитонды сақтықпен қолдану керек, өйткені оймақгүл және Таллитон жүрекше-қарыншалық өткізгіштікті баяулатуы мүмкін.
Жедел миокард инфарктінен кейін сол жақ қарынша функциясының бұзылуы: Таллитонмен емді бастар алдында емделуші гемодинамикалық тұрақты және АӨФ тежегіштерін кем дегенде 48 сағат ішінде қабылдауы керек, ал соңғы 24 сағатта АӨФт дозасы тұрақтыландырылуы керек.
Қант диабеті: Басқа b-адреноблокаторлар сияқты Таллитон қант диабеті бар науқастарда жедел гипогликемия белгілерін бүркемелеуі немесе гликемиялық бақылауды нашарлатуы мүмкін. Осыған сәйкес қант диабеті бар науқастарда Таллитонмен емнің басында және дозасын жоғарылатқанда айрықша назар аудару және қандағы глюкозаның құрамын жиірек тексеріп отыру талап етіледі.
Басқа β-адреноблокаторларды қолданудағы секілді, Таллитонмен емдеу аясында латентті диабет клиникалық айқындалуы немесе осыған дейін болған клиникалық айқын диабеттің ағымы нашарлауы мүмкін.
Іркілген жүрек жеткіліксіздігінде бүйрек функциясы: Таллитонмен емдеу аясында төмен артериялық қысыммен (систолалық артериялық қысымы 100 мм с.б. төмен) жүректің ишемиялық ауруымен, қантамырларының диффузды зақымдануымен және/немесе бүйрек функциясының бұрын болған бұзылуларымен созылмалы жүрек жеткіліксіздігінде бүйрек функциясының қайтымды төмендеуі мүмкін. Осы жоғарыда аталған қауіп факторлары бар емделушілерде Таллитонның дозасын жоғарылату кезінде бүйрек функциясын бақылау керек. Егер бүйрек функциясының бәсеңдеуі байқалса, онда Таллитонның дозасын азайту немесе емдеуді тоқтату керек.
Жанаспалы линзалар: Жанаспалы линзаларды пайдаланатын емделушілерге, Таллитонды қолдануда көз жасы сұйықтығының өндірілуі азаятынын ескерту керек.
Рейно синдромы: Шеткергі қанайналымы бұзылуы (мысалы, Рейно феномені) анықталғанда Таллитонды симптомдарының күшеюі мүмкін болғандықтан сақтықпен қолдану керек.
Тиреотоксикоз: Басқа да b-адреноблокаторлар секілді, Таллитон тиреотоксикоз белгілерін бүркемелеуі мүмкін.
Брадикардия: Егер науқаста брадикардия (жүректің жиырылу жиілігі минутына 55 соғудан төмен) байқалса препарат дозасын азайту керек
Аса жоғары сезімталдық: Ауыр анафилактикалық реакциялар қаупін ескере отырып, сыртартқысында аса жоғары сезімталдығы бар немесе гипосенсибилизациялық емде жүрген емделушілерге b-адреноблокаторларды сақтықпен тағайындау керек.
Тері тарапынан ауыр реакциялар: Өте сирек жағдайларда карведилолмен емдеу аясында уытты эпидермальді некролиз (УЭН) және Стивен-Джонсон синдромы (СДС) секілді тері тарапынан ауыр реакциялар дамуы туралы хабарланды. Таллитонды препаратты қабылдаумен байланысты болуы мүмкін тері тарапынан ауыр реакциялармен емделушілерде қабылдауды мүлдем тоқтату керек.
Псориаз: Таллитонды псориазбен немесе отбасылық сыртартқысымен науқастарға қолдану қауіп пен пайда арақатынасын бағалауды қажет етеді, өйткені карведилол ауруды күшейтуі немесе белгілерінің пайда болуына түрткі болуы ықтимал.
Феохромоцитома: Таллитонды анықталған феохромоцитомасы бар емделушілерге қолдануды a-адренорецепторлардың сәйкес емдік блокадасына дейін бастауға болмайды. a- сондай-ақ b-бөгейтін қасиеті бар карведилолды феохромоцитомада қолдану тәжірибесі болмағандықтан феохромоцитомаға күдікте оны сақтықпен қолдану керек.
Принцметалл стенокардиясы: Принцметалл стенокардиясы бар науқастарда іріктеп әсер етпейтін b-адреноблокаторлар кеуде тұсының ауыруын туғызуы мүмкін. a1-адреноблокаторлық тиімділігі бұл әсердің алдын алатын болғанымен де, стенокардияның бұл түрінде Таллитонды қолдану тәжірибесі шектеулі.
Өкпенің созылмалы обструктивті аурулары: Өкпесінің созылмалы обструктивті ауруы (оның ішінде бронхтық түйілу синдромы) бар, демікпеге қарсы ішке қабылданатын немесе ингалияциялық препараттарды қабылдамайтын емделушілерде Таллитонды қолдану қауіп пен пайда арақатынасын бағалауды талап етеді. Бронх түйілуіне бейім емделушілерде тыныс алу жолдары кедергісінің артуы нәтижесінде респираторлық дистресс-синдром дамуы мүмкін. Қабылдаудың басында және карведилолдың дозасын жоғарылатқанда мұндай емделушілердің жағдайын айрықша бақылау, ал бронх түйілуі дамығанда карведилолдың дозасын төмендету керек.
Басқа препараттармен өзара әрекеттесуі
Карведилолдың басқа препараттармен (дигоксинмен, циклоспоринмен, рифампицинмен, орталықтық анестезияға арналған дәрілермен, антиаритмиялық препараттармен) маңызды фармакокинетикалық және фармакодинамикалық өзара әрекеттесуі белгілі.
Таллитон және клонидинмен біріктірілген емді тоқтату қажет болғанда алдымен карведилолды қабылдауды біртіндеп тоқтату, ал бірнеше күннен кейін клонидинді енгізуді тоқтату керек.
Сахароза: Таллитонның әр таблеткасының құрамында 12,5мг сахароза бар. Оны препаратты қант диабетімен науқастарға қолданғанда, тұқым қуалаған фруктоза көтере алмаушылығында, глюкоза/галактозаны сіңіру бұзылғанда немесе сахароза/изомальтоза тапшылығында ескеру керек.
Лактоза: Таллитонның әр таблеткасының құрамында 50 мг лактоза бар. Оны препаратты лактаза жеткіліксіздігінде, галактоземия мен глюкоза/галактоза сіңірілуінің бұзылу синдромында қолданғанда ескеру керек.
Таллитонның 12.5 мг әр таблеткасының құрамында Сансет сары (Е 110) бояғышы бар, ол аллергиялық реакция туындатуы мүмкін.
Препаратты тоқтату
Әсіресе жүректің ишемиялық ауруы бар емделушілерде препаратты тоқтатуды тоқтату синдромын болдырмау мақсатында дозаны біртіндеп (1-2 апта ішінде) азайта отырып жүргізеді.
Дәрілік заттың көлік құралдарын және әлеуетті қауіпті механизмдерді басқару қабілетіне ықпал ету ерекшеліктері
Таллитонға жеке реакциялардың әртүрлі болуына (бас айналуы, шаршағыштық) байланысты көлік құралдарын басқару мен механизмдермен жұмыс жасау, тепе-теңдік сезімін талап ететін қызмет түрлерімен айналысу қабілетін нашарлатуы мүмкін. Бұл симптомдар әдетте емдеу курсының басында немесе дозаны өзгерткенде, сондай-ақ алкогольді қабылдауда жиі пайда болады.
Артық дозалануы
Симптомдары: айқын артериялық гипотензия, кейіннен жүрек жеткіліксіздігімен брадикардия, кардиогендік шок, асистолия, тыныс алудың бұзылуы мүмкін, бронх түйілуі, құсу, естен тану және жайылған құрысу ұстамалары.
Емі: Жалпы сипаттағы шаралармен қатар, негізгі физиологиялық көрсеткіштерді мониторингілеу және демеуші емді, қажет болғанда – қарқынды ем бөлімшесінде жүргізу керек. Келесі шараларды қолдануға болады: науқас аяғын жоғары көтерген күйде жатуға тиіс.
Айқын брадикардияда: атропинді 0,5-2 мг-ден көктамыр ішіне. Жүрек қантамыры қызметін демеу үшін: глюкагонды 1-10 мг-ден көктамыр ішіне сорғалатып, содан кейін сағатына 2-5 мг-ден ұзақ инфузия түрінде. Симпатомиметиктер (добутамин, изопреналин, орципреналин немесе адреналин) әртүрлі дозаларда, дене салмағына және емдік тиімділігіне байланысты. Оң инотропты әсері бар препараттарды енгізу қажет болғанда, фосфодиэстераза тежегіштерін тағайындайды. Айқын артериялық гипотензияда: қан айналымы көрсеткіштерін үздіксіз моиторингілеу жағдайында норадреналин тағайындайды. Емге төзімді брадикардия жасанды ырғақ жетекшісін орнатуды қажет етеді. Шеткергі вазодилатация (аяқ жылы болғанда артериялық қысымның төмендеуі) басым болғанда қан айналымы параметрлерін ұдайы мониторлаумен норадреналин қабылдау керек.
Бронх түйілуін басу үшін көктамыр ішіне b2-симпатомиметиктер (аэрозоль түрінде немесе көктамыр ішіне) немесе аминофиллин тағайындалады. Құрысулар дамығанда диазепам немесе клоназепамды баяу енгізу ұсынылады. Ауыр улану жағдайында, шок симптомдары басым болған кезде у қайтарғыларымен емдеу карведилолдың жартылай шығарылу кезеңін (6 сағат) ескере отырып, емделушінің жағдайы тұрақтанғанша жалғастырылуы тиіс.
Шығарылу түрі және қаптамасы
Біріктірілген «соld» (полиамид/алюминий фольга / ПВХ/ / алюминий фольга) үлбірден тұратын пішінді ұяшықты қаптамада 7 (6,25мг доза үшін) және 14 (12,5мг және 25мг доза үшін) таблеткадан.
1 немесе 2 пішінді ұяшықты қаптамадан (12,5мг және 25мг доза үшін) және 2 немесе 4 пішінді ұяшықты қаптамадан (6,25мг доза үшін) медициналық қолдану жөніндегі мемлекеттік және орыс тілдеріндегі нұсқаулықпен бірге картон қаптамаға салынған.
Сақтау шарттары
Жарықтан және ылғалдан қорғалған жерде, 250С-ден аспайтын температурада сақтау керек.
Балалардың қолы жетпейтін жерде сақтау керек!
Сақтау мерзімі
5 жыл
Жарамдылық мерзімі өткеннен кейін пайдалануға болмайды.
Дәріханалардан босатылу шарттары
Рецепт арқылы
Өндіруші
«ЭГИС ФАРМАЦЕВТИКАЛЫҚ ЗАУЫТЫ» ЖАҚ
1106 БУДАПЕШТ, Керестури к-сі, 30-38 Венгрия
Тел: (36-1) 803-5555, Факс: (36-1) 803-5529
Тіркеу куәлігінің иесі
«ЭГИС Фармацевтикалық зауыты» ЖАҚ, Венгрия
Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы:
«ЭГИС Фармацевтикалық зауыты» ЖАҚ ҚР өкілдігі
050060, Алматы қ-сы, Жароков к-сі 286 Г
тел: + 7 (727) 247 63 34, + 7 (727) 247 63 33, факс: + 7 (727) 247 61 41
e-mail: egis@egis.kz