ТАЙЛОЛФЕН ХОТ
Инструкция
-
русский
-
қазақша
Саудалық атауы
ТАЙЛОЛФЕН ХОТ
Халықаралық патенттелмеген атауы
Жоқ
Дәрілік түрі
Ішке қабылдау үшін ерітінді дайындауға арналған ұнтақ, 20 г
Құрамы
Бір пакеттің ішінде
белсенді заттар: парацетамол500 мг, хлорфенирамин малеаты 4 мг, фенилэфрин гидрохлориді 10 мг;
қосымша заттар: сусыз лимон қышқылы, шарап қышқылы, натрий гидрокарбонаты, сусыз натрий карбонаты, натрий бензоаты (Е211), лимон хошиістендіргіші, рафинадталған қант, поливинилпирролидон К 30.
Сипаттамасы
Лимон иісі бар ақшыл-сары түсті түйіршіктелген сусымалы ұнтақ.
Фармакотерапиялық тобы
Басқа да анальгетиктер - антипиректиктер. Басқа препараттармен біріктірілген (психолептиктерді қоспағанда) парацетамол.
АТХ коды NO2BE51
Фармакологиялық қасиеттері
Фармакокинетикасы
Парацетамолды ішу арқылы тағайындағанда асқазан-ішек жолдарынан жылдам және толық сіңеді. Плазмадағы ең жоғары концентрациясы 10-60 минуттан кейін байқалады. Парацетамол организмнің көптеген тіндеріне тез және бірқалыпты тарайды. Жартылай шығарылу кезеңі 1,25 – 3 сағатты құрайды. Бауырда микросомальді ферменттер жүйесімен метаболизмге ұшырайды. Парацетамолдың ішке қабылданған дозасының шамамен 85% бос және байланысқан түрінде несеп арқылы 24 сағат ішінде шығарылады.
Гематоэнцефалдық және плацентарлық бөгеттерден өтеді, емшек сүтімен шығарылады.
Хлорфенирамин малеаты асқазан-ішек жолдарынан баяу және толық сіңеді. Ішке қабылдағанда плазмадағы ең жоғары концентрациясы 2,5 - 6 сағаттан кейін байқалады. Биожетімділік деңгейі 25 – 50 % құрайды. Сіңген препараттың басым бөлігі (70 %) плазма ақуыздарымен байланысады. Хлорфенирамин малеаты, орталық жүйке жүйесін қоса, көптеген тіндерге таралады. Жартылай шығарылу кезеңі 2 – 43 сағат, әсер ету ұзақтығы 4 – 6 сағат құрайды. Препараттың басым бөлігі метаболизденеді. Өзгермеген препарат және оның метаболиттері несеппен және аздаған мөлшері нәжіспен шығарылады. Гематоэнцефалдық және плацентарлық бөгеттер арқылы өтеді, аздаған мөлшерде емшек сүтіне өтеді.
Фенилэфрин асқазан-ішек жолдарынан сіңеді, бірақ ішу арқылы қабылдағанда жүйе алды метаболизмі салдарынан биожетімділігі азаяды. Ішу арқылы қабылдағанда мұрынның шырышты қабығының ісінуінде тамыр тарылтқыш дәрі ретінде белсенділігі сақталады. Препарат үлкен қан айналым арқылы мұрынның шырышты қабығының қантамырлар орналасқан жерге таралады. Фенилэфринді тамыр тарылтқыш дәрі ретінде 4 - 6 сағат аралықпен ішке қабылдайды. Фенилэфрин мен оның метаболиттері несеппен бірге шығарылады.
Фенилэфрин емшек сүтіне өте аз мөлшерде өтеді, бірақ оның емізетін балаға деген әсері белгісіз.
Фармакодинамикасы
ТАЙЛОЛФЕН ХОТ препараты парацетамол, хлорфенирамин малеаты және фенилэфрин гидрохлоридіне байланысты ауыруды басатын, қызуды түсіретін, антигистаминді және ісінуді басатын қасиеттерге ие.
Парацетамол – ауыруды басатын және ыстықты түсіретін дәрі. Ол ауыру шегін жоғарылату арқылы ауыруды басатын әсер және гипоталамустағы термореттеу орталығына әсер етуі арқылы қызуды түсіретін әсер етеді.
Хлорфенирамин малеаты гистаминдік Н1-рецепторларының антагонисі болып табылады, осылайша, мынадай симптомдарды басады: ринорея, мұрын жолының бітелуі, көздің қызаруы және/немесе асқын сезімталдығы.
Фенилэфрин – бұл β-адренорецепторларына төмен кардиоселективті және ОЖЖ көтермелегіш әсері аз α-адренорецепторларының постсинапстық агонисі. Пресинапстық тармақтардан норадреналиннің босап шығуына ықпал ете отырып және қан тамырларының α-адренорецепторларына тікелей көтермелегіш әсер көрсете отырып, фенилэфрин гидрохлориді тамыр тарылтқыш әсер етеді. Ісінуге қарсы дәрі болып табылады және мұрын және оның қосалқы қойнауларының шырышты қабығы ісінуін басу үшін пайдаланылады.
Қолданылуы
- ЖРВЖ, тұмауды және жоғарғы тыныс алу жолдарының басқа да жұқпаларын симптоматикалық емдеу үшін
Қолдану тәсілі және дозалары
Ересектерге 1 пакеттен әр 6 сағат сайын тағайындайды, тәулігіне 4 пакеттен аспауы керек. Қабылдар алдында 1 пакеттің ішіндегісін бір стақан ыстық суда ерітеді.
Емдеу ұзақтығы - 3 күннен аспауы керек. Емдік әсері болмаса, емдеу аясында 3 күннен артық дене қызуы жоғары болса, сондай-ақ жаңа симптомдары пайда болса, дереу дәрігерге қаралу керек.
Жағымсыз әсерлері
-
аллергиялық реакциялар (терінің бөртуі, қышыну, есекжем)
-
бастың ауыруы, бас айналуы
-
ұйқының бұзылуы, елестеулер, мәңгіру, сананың шатасуы, ұйқышылдық немесе ұйқысыздық, седативті әсерлер
-
көрудің нашарлауы
-
несеп шығарудың іркілуі
-
ауыздың құрғауы, тәбеттің болмауы, жүрек айну, құсу, диарея
-
тахикардия, жүрек аритмиясы, гипотензия
-
гепатит
-
гемолитикалық анемия
- антимускариндік реакциялар (бронхтар, қан тамырлар қабырғалары тегіс бұлшықеттік элементтерінің босаңсуы)
- тромбоцитопениялық пурпура, лейкопения, тромбоцитопения, нейтропения, агранулоцитоз, панцитопения
Қолдануға болмайтын жағдайлар
- препарат компоненттеріне жоғары сезімталдық
- бүйрек және бауыр функцияларының ауыр бұзылулары
- жедел миокард инфаркті, артериялық гипертензия, сонымен қоса көздің тор қабығының асқынған ангиопатиясы, қолқа мен ми тамырларының айқын атеросклерозы
- қант диабеті
- бронх демікпесі
- глаукома
- гипертиреоз
- моноаминооксидаза тежегіштерін бір мезгілде қабылдау
- жүктілік және лактация кезеңі
- 12 жасқа дейінгі балалар
- қуық асты безі функциясының бұзылуымен байланысты несептің іркілуі
Дәрілермен өзара әрекеттесуі
ТАЙЛОЛФЕН ХОТ мыналармен бірге қолданғанда:
- антикоагулянттармен, ұзақ және жоғары дозада қабылдағанда, олардың әсерінің күшеюіне әкеледі
- дифенинмен, бауырдағы дифенин метаболизмін бәсеңдетуі мүмкін, мұндай жағдай қан плазмасындағы дифенин концентрациясының жоғарылауына әкеледі
- алкогольмен, барбитураттармен, ұйықтататын дәрілермен, апиындық анальгетиктермен, анксиолитикалық және антипсихотикалық дәрілік заттармен, орталық жүйке жүйесіне тыныштандыру әсерін күшейтеді
- антиконгестанттармен, үшциклді антидепрессанттармен, тәбетті төмендететін дәрілік заттармен, амфетамин типті психостимуляторлармен және МАО тежегіштерімен, қабынуға қарсы стероидты емес препараттармен артериялық қысым жоғарылауы мүмкін
- метилдопамен, α- және β-адреноблокаторлармен, гуанетидинмен олардың тиімділігі төмендеуі мүмкін
- барбитураттар, үшциклді антидепрессанттар сияқты бауырдың микросомалды ферменттерінің белсенділігін көтермелейтін дәрілік заттар және алкоголь препараттың гепатоуытты әсерін күшейтуі мүмкін.
Айрықша нұсқаулар
ТАЙЛОЛФЕН ХОТ препаратын қабылдар алдында, емделушілер МАО тежегіштерін қабылдаудан кейін 2 аптадан кем емес уақыт өтуі керек екендігі туралы ескертілуі қажет.
Бүйрек жеткіліксіздігі (КК > 30 мл/мин) және/немесе аздаған бауыр жеткіліксіздігі бар, егде жастағы, жүрек, өкпе функциясының бұзылуы және анемиясы бар науқастарға сақтықпен және дәрігердің бақылауында қолдану керек.
Емделу кезінде алкоголь қабылдауды тоқтату керек.
Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері
Автомобиль жүргізу және басқа да қауіптілігі зор механизмдерді басқару кезінде сақ болған жөн.
Артық дозалануы
Симптомдары: жүрек айнуы, құсу, жоғары тершеңдік, дімкәстану, дем алудың қиындауымен бірге жүрек-қан тамыр жеткіліксіздігі, гемодинамикалық өзгерістер.
Емі: асқазанды шаю, одан кейін симптоматикалық және демеуші ем. Парацетамолмен уланғанда арнайы у қайтарғы ацетилцистеин болып табылады.
Шығарылу түрі және қаптамасы
Ішке қабылдау үшін ерітінді дайындауға арналған ұнтақ.
20 г препараттан полиэстер, алюминий фольга және полиэтилен үлбірінен жасалған үш қабатты престелген пакеттерге салынады.
6 немесе 12 пакет мемлекетік және орыс тілдеріндегі медицинада қолданылуы жөніндегі нұсқаулықпен бірге өндіруші фирманың голограммасымен картон қорапшаға салынған.
Сақтау шарттары
Құрғақ, жарықтан қорғалған жерде, 25°С-ден аспайтын температурада сақтау керек.
Балалардың қолы жетпейтін жерде сақтау керек!
Сақтау мерзімі
2 жыл
Жарамдылық мерзімі өткеннен кейін қолдануға болмайды.
Дәріханалардан босатылу шарттары
Рецептісіз
Өндіруші
Нобел Илач Санаи ве Тиджарет А.Ш., Түркия
Тіркеу куәлігінің иесі
«Нобел Алматы Фармацевтикалық Фабрикасы» АҚ, Қазақстан Республикасы
Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы:
«Нобел Алматы Фармацевтикалық Фабрикасы» АҚ,
Қазақстан Республикасы, Алматы қ-сы, Шевченко к-сі 162 Е
Телефон нөмірі: (+7 727) 399-50-50
Факс нөмірі: (+7 727) 399-60-60
Электронды поштасы nobel@nobel.kz